ಕಾರ್ಲ : ಹೊಸ ಸಂಜೆ ಕೂಟ ಕಾರ್ಲ, ರಶ್ಮಿ ಚಾರಿಟೇಬಲ್ ಟ್ರಸ್ಟ್ (ರಿ.) ಮೆಕ್ಲೆನ ಒಟ್ಟು ಸೇರಿಗೆಡ್ ಕಾರ್ಲ ಬೊಕ್ಕ ಹೆಬ್ರಿ ತಾಲೂಕು ಮಟ್ಟದ ಶ್ರೀ ಮದ್ ಭಗವದ್ಗೀತೆದ 12 ನೇ ಅಧ್ಯಾಯದ ಸುರುತ್ತ 8 ಶ್ಲೋಕ ಬಾಯಿಪಾಠ ಪಂಥ ನಡಪರೇ ಉಂಡು. ಪಂಥಗ್ ಪ್ರಾಯದ ಮಿತಿ ಇಜ್ಜಿ,ಗೆಂದಿನಕ್ಲೆಗ್ 5000 ಪಣವುದ ಇನಾಮು ಉಂಡು. ಪಂಥ ನಡಪುನ ಜಾಗೆ ಬೊಕ್ಕ ಪೊರ್ತುನು ಜನವರಿ 7 ತಾರೀಖ್ ಗ್ ತೆರಿಪಾವೆರ್.
ಬೆಂಗ್ಳೂರು: ಇನಿರ್ದ್ ರಾಜ್ಯೊಡು 15 ರ್ದ್ 18 ವರ್ಷದ ಜೋಕ್ಲೆಗ್ ಕೊರೋನಾ ಮರ್ದ್ ಕೊರೊಂದು ಉಲ್ಲೆರ್ . ಈ ನೆಲೆಟ್ಟ್ ಮರ್ದ್ ಪಾಡಿನ ಜೋಕ್ಲೆಗ್ ಮನದಾನಿ ರಜೆ ಕೊರಿಯೆರೆ ರಾಜ್ಯ ಸರ್ಕಾರ ತೀರ್ಮಾನ ಮಲ್ದೆರ್ . ಶಾಲೆಡ್ ಸುರುತ ದಿನ 50 ಜೋಕ್ಲೆಗ್ ಮಾತ್ರ ಮರ್ದ್ ಪಾಡ್ದೆರ್.
ಭಾರತ್ ಬಯೋಟೆಕ್ ಸಂಸ್ಥೆ ಅಭಿವೃದ್ಧಿ ಮಲ್ದಿನ ದೇಶಿಯ ಕೋವಾಕ್ಸಿನ್ ಮರ್ದ್ ನ್ 15 ರ್ದ್ 18 ವರ್ಷ ಪ್ರಾಯದ ಜೋಕ್ಲೆಗ್ ಕೊರೊಡು , ಸುರುತ ಡೋಸ್ ಕೊರಿನ 28 ದಿನರ್ದ್ ಬೊಕ್ಕ ರಡ್ಡನೇ ಡೋಸ್ ಲಸಿಕೆ ಕೊರೋಲಿ ಪಂದ್ ರಾಜ್ಯ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಇಲಾಖೆ ಮಾಹಿತಿ ಕೊರ್ತೆರ್ .
ಬೆಂಗ್ಳೂರು : ರಾಜ್ಯಡ್ ದಿನರ್ದ್ ದಿನಕ್ ಕೊರೊನಾ (corona), ಒಮಿಕ್ರಾನ್ (Omicron( ಸೋಂಕುದ ಪ್ರಕರಣ ಜಾಸ್ತಿ ಆವೊಂದು ಉಪ್ಪುನ ನೆಲೆಟ್ಟ್ ದುಂಬುದ ಕ್ರಮ ದೆತೊನುನ ಬಗ್ಗೆ ಎಲ್ಲೆ ಬೈಯ್ಯಗ್ ತಜ್ನೆರ್ನ ಒಟ್ಟುಗು ಮಹತ್ವದ ಸಭೆ ನಡಪಾಯೆರೆ ಉಲ್ಲೆರ್ ಪಂದ್ ಸಿಎಂ ಬಸವರಾಜ ಬೊಮ್ಮಾಯಿ ಪಂತೆರ್ .
ಸುದ್ದಿಗಾರೆರ್ನ ಒಟ್ಟುಗು ಪಾತೆರಿನ ಆರ್ , ರಾಜ್ಯಡ್ ಕೊರೋನ ತಡೆಕ್ ಬೋಡಾಯಿನ ಬೋಡಾಯಿನ ಕ್ರಮ ದೆತೊನೆರೆ ಎಲ್ಲೆ ಬೈಯ್ಯಗ್ ಮಹತ್ವದ ಸಭೆ ನಡಪಾಯೆರೆ ಉಲ್ಲೆರ್ .
ಬೆಂಗ್ಳೂರು: ಇನ್ಫೋಸಿಸ್ ಫೌಂಡೇಶನ್ದ ಗುರ್ಕಾರ್ದಿ ಬೊಕ್ಕ ಭಾರತದ ಮಾಮಲ್ಲ ಮಾಹಿತಿ ತಂತ್ರಜ್ಞಾನ (ಐಟಿ) ಕಂಪನಿಡ್ ಒಂಜಾಯಿನ ಇನ್ಫೋಸಿಸ್ದ ಗೆಲ್ಮೆ ಡ್ ಪ್ರಮುಖ ಪಾತ್ರಧಾರಿ, ಸುಧಾ ಮೂರ್ತಿ ಮೇರ್ ಶುಕ್ರವಾರ ಇನ್ಫೋಸಿಸ್ ಫೌಂಡೇಶನ್ದ ಗುರ್ಕಾರ್ಮೆರ್ದ್ ಕಡೆಕಾದ್ ವಿದಾಯ ಪನೆರೆ ತೀರ್ಮಾನ ಮಲ್ದೆರ್.
ಈ ನಡುಟು ಆರ್ ಅವ್ವೆತೋ ವರ್ಷರ್ದ್ ಮಲ್ತೊಂದು ಉಪ್ಪುನ ಸಮಾಜ ಸೇವೆನ್ ದುಂಬರಿತೊಂದು ಪೋಯೇರೆ ತೀರ್ಮಾನ ಮಲ್ದೆರ್.
ಪುತ್ತೂರು : ಬಹುನಿರೀಕ್ಷಿತ ಕಿರುಚಿತ್ರ ‘ಯುವ-2’ ನ್ ಮಲ್ತೊಂದು ಉಪ್ಪುನ ಪುತ್ತೂರಿನ ಕೂಟ ಪೊಸ ವರ್ಷದ ಪ್ರಯುಕ್ತ ಈ ಚಿತ್ರದ ಒಂಜಿ ಎಲ್ಯ ದೃಶ್ಯ ನ್ Firstfly creations ಯೂಟ್ಯೂಬ್ ಚಾನೆಲ್ ಡ್ ಬುಡುಗಡೆ ಮಲ್ದೆರ್.
ಕರ್ನಾಟಕದ ಕಿರುಚಿತ್ರ ಇತಿಹಾಸಡೇ ಸುರುತ ಸಲ ವಿಭಿನ್ನ ಶೈಲಿದ ಕಥಾಹಂದರದ ಮುಖೇನ ಪೊಸ ದಾಖಲೆ ಮಲ್ಪುನಲ್ಪ ಪುತ್ತೂರುದ ಈ ಕೂಟ ದುಂಬರಿಯೊಂದು ಉಂಡು.
ತುಳುವ ಮಣ್ಣುದ ಸತು ಸಾಹಿತ್ಯದ ಶ್ರೀಮತಿ ರೂಪಕಲಾ ಆಳ್ವ ಬರೆತಿನ ತುಳುವ ಅಪ್ಪೆನ್ ಮದಪರೆ ಬಲ್ಲಿ ಪನ್ಪಿ ಬಿನ್ನಪುದ ”ಕಾಲ ಪಿಜಿರಡ್ ಜಾಲ್ ಪಗರಡ್ …” ಬೊಕ್ಕ ಬೆಳ್ತಂಗಡಿದ ವಿಮಲಾ ದುಗ್ಗಣ್ಣ ಬೆಳಾಲು ಬರೆತಿನ ಪ್ರಕೃತಿ ದೇವೆರೆನ ಸುಗಿಪುದ ಪದ ” ಉದಿ ತೆರ್ ದೇವೆರ್ ಮುಗಲ್ ದಾ ತೇರ್ ಡ್ …” ಐತಾರ ರಡ್ಡ್ ತಾರೀಖ್ ರಾತ್ರೆ ಎಡ್ಮ ಗಂಟೆಗ್ ಕರೋಕೆ ಸಮೇತಾ ಬುಡುಗಡೆ ಆವರೆ ಉಂಡು.
ತುಳು ಬಾಸೆಡ್ ಪೊರ್ಲ ಸತ್ವದ ಸಾಹಿತ್ಯದ ಪದೊಕುಲು ಕಮ್ಮಿ ಉಲ್ಲ ಪನ್ಪಿನ ಕುಂದೆಲ್ ಕಲೆಯೆರೆಗಾದ್ ಐಲೇಸಾ – ದಿ ವಾಯ್ಸ್ ಆಫ್ ಓಷನ್ (ರಿ) ಬೆಂಗಳೂರು ಸಂಸ್ಥೆ ನೂತೊಂಜಿ ತುಳು ಪದೊಕುಲೆನ್ ಮೈನಸ್ ಟ್ರಾಕ್ ಸಮೇತಾ ಕನಪಿನ ಉದ್ದೇಶ ದೀದ್ ಸುಮಾರ್ ಪತ್ತ್ ಪದ ತಯಾರ್ ಮಲ್ತು ಅವೆಟ್ಟ್ ಮೂಜಿ ಪದೊಕುಲೆನ್ ಅಪಗನೆ ಬುಡುಗಡೆ ಮಲ್ ದುಂಡು . ಪಿರ ರಡ್ಡ್ ಪದೊಕುಲೆನ್ ರಡ್ಡನೇ ತಾರೀಖ್ದಾನಿ ಬುಡುಗಡೆ ಆವೊಂದುಂಡು .ಸೌದಿ ಅರೇಬಿಯಾದ ಶ್ರೀ ನರೇಂದ್ರ ಶೆಟ್ಟಿ ಬೊಕ್ಕ ಶ್ರೀಮತಿ ಸುಮನಾ ಎನ್ ಶೆಟ್ಟಿ ಅಂಚನೆ ಕುವೈಟ್ದ ಶ್ರೀ ರಘು ಚೆನ್ನಯ ಪೂಜಾರಿ ಬೊಕ್ಕ ಶ್ರೀಮತಿ ಗುಣವತಿ ಆರ್ ಪೂಜಾರಿ ದಂಪತಿಲು ಪರಿವಾರದೊಟ್ಟುಗು ಈ ತುಳು ಇಂಪು ತಂಪುದ ಪದೊಕುಲೆನ್ ತುಳುವೆರೆ ಮಟ್ಟೆಲ್ಗ್ ಮುಟ್ಟವುನ ಬೇಲೆಗ್ ಪುಗ್ಗೆಲ್ ಕೊರ್ತೆರ್ .
ರಡ್ಡ್ ಪದೊಕುಲೆನ್ಲಾ ಪುಗರ್ತೆದ ಸಂಗೀತ ಸಂಯೋಜಕಿ, ಗಾಯಕಿ ಪ್ರೇಮಲತಾ ದಿವಾಕರ್ ರಾಗ ಸಂಯೋಜನೆ ಕೊರ್ದು ಕೇರಳದ ನಿಶಾಂತ್ ಕ್ಯಾಲಿಕಟ್ ಬೊಕ್ಕ ತುಳುನಾಡುದ ಪೆರ್ಮೆ ಪ್ರಮೋದ್ ಸಪ್ರೆ ಒರ್ಕೆಸ್ಟ್ರ ಮಲ್ದೆರ್ . ಉದಿತ್ತೆರ್ ದೇವೆರ್ ಪಡೋನು ಪೆರ್ಮೆದ ಸಂಗೀತ ಬಾಲಚಂದ್ರ ಅಂಚನೆ ಕಾಲ ಪಿಜಿರಡ್ ಪದೊನು ಖ್ಯಾತ ಗಾಯಕಿ ಸುಪ್ರಿಯಾ ರಘುನಂದನ್ ತನ್ಕುಲೆನ ಪೊರ್ಲು ಸ್ವರೊಟು ಉಡಲ್ ದಿಂಜುಲಕ್ಕ ಪಂಡ್ದು ತೋಜಾದೆರ್. ಉಡುಪಿದ ಜಯಂತ್ ಐತಾಳ್ ಬೊಕ್ಕ ವಿನಾಯಕ ಮಲ್ಯ ಸಂಕಲನ ಬೊಕ್ಕ ಛಾಯಾಗ್ರಹಣ ಮಲ್ತುದು ರೂಪು ಕೊರ್ತೆರ್ . ಬೋಡಿತ್ತಿನ ಚಿತ್ರೊಲೆನ್ ಮುಂಬೈದ ಹರ್ಷ ಉಡುಪಿ ದೆತ್ತುದ್ ಕೊರ್ತೆರ್ .
2-1-2022 ಐತಾರ ರಾತ್ರೆ ಎಡ್ಮ ಗಂಟೆಗ್ ನಡಪುನ ಈ ಬುಡುಗಡೆ ಕಾರ್ಯಕ್ರಮೊನು ಫ್ಲೋರಿಡಾ ತುಳುಕೂಟದ ಶ್ರೀವಲ್ಲಿ ರಾಯ್ ಮಾರ್ಟಲ್ ನಡಪಾದ್ ಕೊರ್ಪೆರ್ . ತುಳುವೆರ್ ಮಾತೆರ್ಲಾ ಜೂಮ್ ವೇದಿಕೆದ ಐಡಿ :862991 22198 Pass word : ilesa ಗಲಸೊಂದು ಈ ಬುಡಗಡೆ ಲೇಸ್ಗ್ ಬತ್ತ್ ದ್ Ilesa -The Music channel subscribe ಮಲ್ತುದು ಬೆರಿಸಾಯ ಆವೊಡುಂದು ಮಾತಾ ತುಳುವೆರೆಡ ಪುಗರ್ತೆದ ಗಾಯಕೆ ಶ್ರೀ ರಮೇಶ್ಚಂದ್ರ ಬಿನ್ನಾಪು ಮಲ್ದೆರ್.
ಗುರುಪುರ,: ಮಹಾರಾಷ್ಟ್ರದ ಪುಣೆಡ್ ಇಂಚೋಗು ನಡತಿನ ಎಲ್ಯಕ್ಲೆನ ರಾಷ್ಟ್ರೀಯ ಮಟ್ಟದ ಕಿಕ್ ಬಾಕ್ಸಿಂಗ್ ಚಾಂಪಿಯನ್ ಶಿಪ್-2021ಟ್ಟ್ ಪಾಲ್ದೆನೆದ ಕ್ಯಾಂಬ್ರಿಡ್ಜ್ ಸ್ಕೂಲ್ದ 10ನೇ ತರಗತಿಯ ವಿದ್ಯಾರ್ಥಿ, ವಾಮಂಜೂರುದ ಜಿ. ಆದಿತ್ಯ ಕಿರಣ್ ಬಂಗಾರ್ದ ಪದಕ ಪಡೆತೆರ್ .ಕಾವೂರುದ ಇನ್ಸ್ಟಿಟ್ಯೂಟ್ ಆಫ್ ಕರಾಟೆ ಬೊಕ್ಕ ಮಾರ್ಷಲ್ ಆರ್ಟ್ಸ್ (ಐಕೆಎಂಎ) ಸಂಸ್ಥೆಡ್ ಕಿಕ್ ಬಾಕ್ಸಿಂಗ್ ಕಲ್ತೊಂದು ಉಲ್ಲೆರ್.
ನಿತಿನ್ ಎನ್ ಸುವರ್ಣ ಬೊಕ್ಕ ಸಂಪತ್ ಕುಮಾರ್ ಮೆರೆರ್ದ್ ತರಬೇತು ಪಡೆಯೊಂದು ಉಲ್ಲೆರ್ . ಜಿ. ಕಿರಣ್ ಬೊಕ್ಕ ಸಿಎಸ್ ಲೀಲಾವತಿ ದಂಪತಿಲೆನ ಪುತ್ರೆಯಾಯಿನ ಮೇರ್ ಬಾಗಲಕೋಟೆಡ್ ನಡತಿನ ರಾಜ್ಯ ಮಟ್ಟದ ಡಬ್ಯೂಯುಎಸ್ಎಚ್ಯು ಚಾಂಪಿಯನ್ ಶಿಪ್ ಬೊಕ್ಕ ಮೈಸೂರು ರಾಜ್ಯ ಮಟ್ಟದ ಕಿಕ್ ಬಾಕ್ಸಿಂಗ್ಡ್ ಮೂಜಿ ಬಂಗಾರ್ದ ಪದಕ ಪಡೆತೆರ್ .
ಸುರತ್ಕಲ್, ಜನವರಿ 1 : ನಾಗರಿಕ ಸಲಹಾ ಸಮಿತಿ (ರಿ) ಸುರತ್ಕಲ್ ಮುತಾಲಿಕೆಡ್ ರಾಮಕೃಷ್ಣ ಮಿಷನ್ ಒಟ್ಟು ಸೇರಿಗೆಡ್ ರೋಟರಿ ಕ್ಲಬ್ ಸುರತ್ಕಲ್, ವಿದ್ಯಾದಾಯಿನಿ ಗ್ರಾಮೀಣಾಭಿವೃದ್ಧಿ ಬೊಕ್ಕ ಕೃಷಿ ತರಬೇತಿ ಕೇಂದ್ರ (ವಿರಾಟ್) ಮೆಕ್ಲೆನ ಒಟ್ಟು ಸೇರಿಗೆಡ್ ಎಂಆರ್ಪಿಎಲ್ ಪ್ರಾಯೋಜಕತ್ವಡ್ ಸ್ವಚ್ಛ ಸುರತ್ಕಲ್ ಅಭಿಯಾನ-3 ನೆತ್ತ ಉದಿಪನ ಜ.2 ಕ್ಕ್ ಕಾಂಡೆ 10 ಗಂಟೆಗ್ ನಡಪರೇ ಉಂಡು ಪಂದ್ ಸಮಿತಿ ಕಾರ್ಯದರ್ಶಿ ಸತೀಶ್ ಸದಾನಂದ ಸುದ್ದಿಗೋಷ್ಟಿಡ್ ಪಂಡೆರ್ .
ಒಡಿಪು : ಶ್ರೀ ಕೃಷ್ಣಮಠದ ಚಾವಡಿಡ್ ನರಹರಿತೀರ್ಥ ಮತ್ತರ್ಮೆಡ್ ಪರ್ಯಾಯ ಶ್ರೀಅದಮಾರು ಮಠದ ಒಟ್ಟು ಸೇರಿಗೆಡ್ ನಿರಂತರ ಜ್ಞಾನಯಜ್ಞದ ಪರವಾದ್ ,ವಿಶೇಷ ಪ್ರವಚನ ಮಾಲಿಕೆಡ್ ಪರ್ಯಾಯ ಅದಮಾರು ಶ್ರೀಈಶಪ್ರಿಯತೀರ್ಥ ಶ್ರೀಪಾದರ ಮುತಾಲಿಕೆಡ್ , ಶ್ರೀಮದುತ್ತರಾದಿ ಮಠಾಧೀಶೆರಾಯಿನ ಶ್ರೀಸತ್ಯಾತ್ಮತೀರ್ಥ ಶ್ರೀಪಾದೆರ್ “ಯುವಪೀಳಿಗೆನ್ ಕಾಡೊಂದು ಉಪ್ಪುನ ಧಾರ್ಮಿಕ ಸವಾಲು ಬೊಕ್ಕ ಪರಿಹಾರ” ದ ಉಪನ್ಯಾಸ ಕೊರಿಯೆರ್ .
ಒಡಿಪು : ನಗರ ಬಿಜೆಪಿ ಬೊಕ್ಕ ಯುವ ಮೋರ್ಚಾ ಒಟ್ಟು ಸೇರಿಗೆಡ್ ಸ್ವಾತಂತ್ರ್ಯದ ಅಮೃತ ಮಹೋತ್ಸವದ ಪರವಾದ್ ಅಂಚನೆ ಮಾಜಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ ಪುಟ್ಟು ಪರ್ಬದ ಪ್ರಯುಕ್ತ ಶಾಸಕೆರಾಯಿನ ಕೆ. ರಘುಪತಿ ಭಟ್ ಬೊಕ್ಕ ನಗರ ಬಿಜೆಪಿ ಗುರ್ಕಾರ್ಲಾಯಿನ ಮಹೇಶ್ ಠಾಕೂರ್ ರ ಒಟ್ಟು ಸೇರಿಗೆಡ್ ಅಟ್ಟನೆ ಮಲ್ತಿನ ಹೊನಲು ಬೊಲ್ಪುದ ವಾಲಿಬಾಲ್ ಪಂದ್ಯಕೂಟದ ಫೈನಲ್ ಪಂಥನ್ ಒಡಿಪುದ ಆದರ್ಶ್ ಫ್ರೆಂಡ್ಸ್ ಅಂಬಾಗಿಲು ಕೂಟ ಗೆಂದ್ ದ್ 50 ಸಾವಿರ ಪನವು ಬೊಕ್ಕ ಮೆನ್ಕುನ ಅಟಲ್ ಟ್ರೋಫಿ 2021 ಮಾನಾದಿಗೆ ಪಡೆತೆರ್.
ಮುಗಿತಲದ ಲೇಸ್ ಡ್ ರಾಜ್ಯ ಯುವ ಮೋರ್ಚಾ ಗುರ್ಕಾರ್ಲಾಯಿನ ಡಾ.ಸಂದೀಪ್ ಪಾಲ್ ಪಡೆದಿತ್ತೆರ್ . ನಗರಬಿಜೆಪಿ ಗುರ್ಕಾರ್ಲಾಯಿನ ಮಹೇಶ್ ಠಾಕೂರ್ ಲೇಸ್ ದ ಗುರ್ಕಾರ್ಮೆ ವಹಿಸ್ ದಿತ್ತೆರ್ . ಜಿಲ್ಲಾ ಬಿಜೆಪಿ ಗುರ್ಕಾರ್ಲಾಯಿನ ಕುಯಿಲಾಡಿ ಸುರೇಶ್ ನಾಯಕ್, ನಗರ ಯುವ ಮೋರ್ಚಾ ಗುರ್ಕಾರ್ಲಾಯಿನ ರೋಷನ್ ಶೆಟ್ಟಿ, ನಗರ ಬಿಜೆಪಿ ಪ್ರಧಾನ ಕಾರ್ಯದರ್ಶಿ ದಿನೇಶ್ ಅಮೀನ್, ನಗರಸಭಾ ಸದಸ್ಯ ಸಂತೋಷ್ ಜತ್ತನ್, ಪಂದ್ಯಕೂಟದ ಸಂಚಾಲಕೆರಾಯಿನ ಸುವರ್ಧನ್ ನಾಯಕ್, ವಾಲಿಬಾಲ್ ಫ್ರೆಂಡ್ಸ್ ಹನುಮಂತ ನಗರ ನೆತ್ತ ಗುರ್ಕಾರ್ಲಾಯಿನ ದಿನೇಶ್ ಕುಂದರ್ ಪಾಲ್ ಪಡೆದಿತ್ತೆರ್.
