kudla

ದೈವಾರಾಧನೆಡ್ ಎಲ್ಯ ಪ್ರಾಯೊಡೇ ಮಲ್ಲ ಪುದರ್ ಮಲ್ತಿನಾರ್ ಆದಿತ್ಯ ಪೂಜಾರಿ ಬೋಳ್ಯಾರು

ಸೋತ್ಂಡಲ ತೆಲ್ತೊಂದು ಇಪ್ಪುನಕ್ಲೆನ್ ಏಪಲ ಸೋಪಾವರೆ ಸಾಧ್ಯ ಇಜ್ಜಿ. ಬದ್‌ಕ್‌ದ ಸಾದಿಡ್ ಬಂಗ, ಸುಖ, ಸೋಲ್, ತಿರಸ್ಕಾರದ ಪಾತೆರ ಉಂದೆನ್ ಪೂರ ತಡೆತೊಂದು ಶ್ರೀ ಸತ್ಯ ಮಂತ್ರದೇವತೆದ ಕೃಪೆರ್ದ್ ದೈವಾರಾಧನೆಡ್ ತನ್ನ ನಿಷ್ಕಲ್ಮಶ ಸೇವೆ ಬೊಕ್ಕ ನಿರ್ಮಲ ಮನಸ್ಸ್‌ರ್ದ್ ಎಲ್ಯ ಪ್ರಾಯೊಡೇ ಮಲ್ಲ ಪುದರ್ ಮಲ್ತಿನಾರ್ ಆದಿತ್ಯ ಪೂಜಾರಿ ಬೋಳ್ಯಾರು.

ಡಿಸೆಂಬರ್ 19, 1997ಟ್ ಮುತ್ತಪ್ಪ ಪೂಜಾರಿ ಬೊಕ್ಕ ನಳಿನಾಕ್ಷಿ ದಂಪತಿಲೆನ ಮಗೆಯಾದ್ ಪುಟ್ಟಿಯೆರ್. ತನ್ನ ಶಿಕ್ಷಣನ್ ದತ್ತಾತ್ರೇಯ ಅನುದಾನಿತ ಹಿರಿಯ ಪ್ರಾಥಮಿಕ ಶಾಲೆ ಕುರ್ನಾಡು, ಶಾರದಾ ಪ್ರೌಢ ಶಾಲೆ ಪಾಣೆಮಂಗಳೂರು, ಸರಕಾರಿ ಪದವಿ ಪೂರ್ವ ಕಾಲೇಜು ಸಜಿಪ ಪಡು, ನಾರಾಯಣ ಗುರು ಕಾಲೇಜು ಕುದ್ರೋಳಿ ಡ್ ಮಲ್ತೆರ್. ಸರ್ಚ್ ಟೆಕ್ ಡ್ ಐಟಿಐ ನ್‌ಲ ಮಲ್ತೆರ್. ಎಲ್ಯ ಪ್ರಾಯೊಡೇ ಬ್ಯಾಂಡ್, ವಾದ್ಯಲೆಗ್ ಪೋದು ಬೇಲೆ ಮಲ್ತೊಂದು ಇತ್ತಿನ ಮೇರ್ ಹೋಟೆಲ್‌ಡ್ ಬೇಲೆ, ಕೂಲಿ ಬೇಲೆಲ ಮಲ್ತಿನಾರ್. ಕಷ್ಟದ ಜೀವನದ ನಡುಟ್ಟು ಸರಿಯಾಯಿನ ಬೇಲೆ ತಿಕ್ಕಂದೆ ಪೋಂಡು.

ಪಿಲಿವೇಷಡ್ ಇಪ್ಪುನ ಮೋಕೆರ್ದ್ ಜೋಕುಲೆನ್ ಪೂರ ಒಟ್ಟು ಸೇರ್ಸಾದ್ ತಾನೆ ಎದುರು ಉಂತುದ್ ಊರುಡ್ ಪಿಲಿ ವೇಷ ಗೊಬ್ಬಾದ್ ತೋಜಾಯಿನ ಪೆರ್ಮೆ ಮೆರೆಗ್ ಉಂಡು. ಆಯಿಬೊಕ್ಕ ತಾನ್ ಮಲ್ತೊಂದು ಇತ್ತಿನ ಎಡ್ಡೆ ಬೇಲೆನ್ ಜನಕುಲು ತಪ್ಪಾದ್ ಅರ್ಥ ಮಲ್ತೊಂದಿಪ್ಪುನಗ ಊರೇ ಬುಡೊಡು ಪಂದ್ ನಿರ್ಧಾರ ಮಲ್ತೆರ್. ದೈವದ ಸಂಕಲ್ಪರ್‍ದಾವರ ಮೆರೆನ ಅಜ್ಜೆರ್ ಪೂ ಪೂಜನೆ ಮಲ್ತೊಂದು ಇತ್ತಿನ ಮಂತ್ರದೇವತೆ ಮೆರೆನ ಭಕ್ತಿಗೆ ಒಲಿದ್ ಮೆರ್‍ನ ಕೈಯಿರ್ದ್ ಪೂಜೆ ಪುನಸ್ಕಾರ ಮಲ್ಪೊಡು ಪಂದ್ ಅನು ಕೊರುಂಡು.

ಆನಿರ್ದ್ ಬೊಕ್ಕ ಆದಿತ್ಯ ಪೂಜಾರಿ ಮೇರ್ ಮುಟ್ಟಿನ ಪೂರ ಬಂಗಾರ್ ಆವೊಂದು ಪೋಂಡು. ಮೆರೆನ ಭಕ್ತಿ ಬೊಕ್ಕ ಸೇವೆಗ್ ಇಲ್ಲೇ ಆಲಯವಾದ್ ಬದಲ್ ಆಂಡ್. ಶ್ರೀ ಕ್ಷೇತ್ರ ಬೋಳ್ಯಾರ್ ಸಾನಿಧ್ಯ ಆಂಡ್. ಒಲ್ಪಲ ಪರಿಹಾರ ತಿಕ್ಕಂದಿನ ಜನಕ್ಲೆನ ಸಮಸ್ಯೆಲೆಗ್ ಮುಲ್ಪ ಪರಿಹಾರ ತಿಕೊಂದುಂಡು. ಇಂಚ ದೇವೆರೆನ ಕೃಪೆರ್ದ್ ಊರುದಕುಲೆಗ್ ಪೂರ ಮೇರ್ ಬೋಡಾಪಿನಾರ್ ಆಯೆರ್.