kudla and

ಒಡಿಪು ಡಿವೈಎಸ್ಪಿ ರಾಘವೇಂದ್ರ ನಾಯಕ್ ಬೊಕ್ಕ ಎಚ್ ಸಿ ವಿಜಯ ಕುಮಾರ್ಗ್ ಮುಖ್ಯಮಂತ್ರಿ ಪದಕ

Mar 31, 2022

ಒಡಿಪು : 2021ನೇ ಸಾಲ್ ದ ಮುಖ್ಯಮಂತ್ರಿ ಪದಕಗ್ ಒಡಿಪು ಜಿಲ್ಲಾ ಸಶಸ್ತ್ರ ಮೀಸಲು ಪಡೆತ ಡಿವೈಎಸ್ಪಿ ರಾಘವೇಂದ್ರ ಆರ್.ನಾಯಕ್ ಬೊಕ್ಕ ಒಡಿಪು ಡಿಸಿಆರ್‌ಬಿದ ಹೆಡ್‌ಕಾನ್‌ಸ್ಟೇಬಲ್ ಬಿ.ವಿಜಯ ಕುಮಾರ್ ಆಯ್ಕೆಯಾತೆರ್ .

ಉತ್ತರ ಕನ್ನಡ ಜಿಲ್ಲೆದ ಶಿರಸಿ ನಿವಾಸಿ ರಾಘವೇಂದ್ರ ನಾಯಕ್ 2006ಟ್ಟ್ ಪೊಲೀಸ್ ಇಲಾಖೆಗ್ ಸೇರ್ಪಡೆ ಆತೆರ್ , 2007ರ್ದ್ ಕುಡ್ಲಡ್ ಕರ್ತವ್ಯ ಸುರು ಮಲ್ತೆರ್ . ಐರ್ದ್ ಬೊಕ್ಕ 2019ಡ್ ಒಡಿಪು ಡಿಎಆರ್‌ಗ್ ವರ್ಗಾವಣೆ ಆಯಿಬೊಕ್ಕ ಮೇರ್ ರಡ್ಡ್ ವರ್ಷದ ಪಿರವು , ಡಿವೈಎಸ್ಪಿ ಆಯೆರ್.

Udupi DySP Raghavendra Nayak and H Vijay Kumar get the Chief minister’s medal.

Udupi: The CM’s medal for the year 2021 was bagged by Udupi district special forces Dy SP Raghavendra Nayak and B Vijay Kumar head constable of DCRB.

Raghavendra Nayak is from Sirsi district of UK district and joined the forces in 2006 and started duty at Mangalore in2007.He was transferred to Udupi DAR in 2019 and was promoted as DySP.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಪುತ್ತೂರ್ದ ಸುದ್ದಿ | Puttur News

ಮೇ.4ರ್ದ್ ಸುಳ್ಯಡ್ ವಾಲಿಬಾಲ್ ಪಂಥ

Mar 28, 2022

ಸುಳ್ಯ: ಮೇ 4ರ್ದ್ 8 ತಾರೀಖ್ ಮುಟ ಸುಳ್ಯಡ್ ರಾಷ್ಟ್ರೀಯ ವಾಲಿಬಾಲ್ ಪಂದ್ಯಾಟ ನಡಪರೆ ಉಂಡು ನೆಕ್ಕ್ ಮಾತಾ ರೀತಿದ ತಯಾರಿ ಆವೊಂದು ಉಂಡು . ಈ ನೆಲೆಟ್ಟ್ ಶನಿಯಾರ ಕಾಂಡೆ ವಾಲಿಬಾಲ್ ಪಂಥದ ಗ್ಯಾಲರಿ ನಿರ್ಮಾಣಗ್ ಭೂಮಿ ಪೂಜೆ ನಡತುಂಡು .

ಪುರೋಹಿತ ನಾಗರಾಜ ಭಟ್ ಮೇರ್ ಪೂಜಾ ಕಾರ್ಯ ಮಲ್ತೆರ್ .
ಈ ಪೊರ್ತುಡು ವಾಲಿಬಾಲ್ ಅಸೋಸಿಯೇಷನ್ ತಾಲೂಕು ಗುರ್ಕಾರ್ಲಾಯಿನ ದೊಡ್ಡಣ್ಣ ಬರೆಮೇಲು, ರಾಷ್ಟ್ರೀಯ ವಾಲಿಬಾಲ್ ಆಯೋಜನಾ ಸಮಿತಿ ಗುರ್ಕಾರ್ಲಾಯಿನ ಎನ್.ಎ. ರಾಮಚಂದ್ರ, ಸಂಘಟನಾ ಕಾರ್ಯದರ್ಶಿ ಎನ್.ಜಯಪ್ರಕಾಶ್ ರೈ, ಕೋಶಾಧಿಕಾರಿ ಗೋಕುಲ್ ದಾಸ್ ಬೊಕ್ಕ ಬೇತೆ ಸಮಿತಿ ಪದಾಧಿಕಾರಿಲಾಯಿನ ಭವಾನಿಶಂಕರ್ ಕಲ್ಮಡ್ಕ, ಶಶಿಧರ ಎಂ.ಜೆ, ಜಯಪ್ರಕಾಶ್ ಕುಡೆಕಲ್ಲು, ಎ.ಸಿ.ವಸಂತ, ಹರಿಪ್ರಕಾಶ್ ಅಡ್ಕಾರ್, ಬಾಲಗೋಪಾಲ ಸೇರ್ಕಜೆ, ರಾಜು ಪಂಡಿತ್, ಸತೀಶ್. ಎ.ಜಿ, ಹರೀಶ್ ಬೂಡುಪನ್ನೇ, ಶರತ್ ಅಡ್ಕಾರ್, ಹರೀಶ್ ರೈ ಉಬರಡ್ಕ ಪಾಲ್ ಪಡೆದಿತ್ತೆರ್.

ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಕುಡೋರ ಕಾರ್ಣಿಕ ಮೆರೆಯಿನ ಕಂದಾವರ ಪದವುದ ಶ್ರೀ ಕೋಡ್ದಬ್ಬು ಬೊಕ್ಕ ರಾಹುದೈವ

Mar 22, 2022

ಕೈಕಂಬ ; ಕುಡ್ಲದ ಕಂದಾವರ ಗ್ರಾಮ ಪಂಚಾಯತ್ ವ್ಯಾಪ್ತಿದ ಕಂದಾವರ ಪದವಿನ ಶ್ರೀ ಕೋಡ್ದಬ್ಬು ದೈವಸ್ಥಾನಡ್ ತಾರೀಖ್ 20.03.2022 ಕ್ಕ್ ರಾತ್ರಿ ದುಶ್ಕರ್ಮಿಯೊರಿ ದೈವಸ್ಥಾನಗ್ ಕಂಡ್ ದ್ ಬತ್ತ್ ದ್ , ರಾಹು ದೈವದ ಗುಡಿಟ್ ಪೊತ್ತೊಂದು ಇತ್ತಿನ ದೀಪ ತೆಕ್ಕಾದ್ , ಅವೆನ್ ಮಗ್ ತ್ ಪಾರ್ದ್ ಐಕ್ ನೆತ್ತೆರ್ ಪಾಡ್ದ್ ಐರ್ದ್ ಬೊಕ್ಕ ದೈವಸ್ಥಾನದ ದತ್ತ ಮೈಟ್ ಉಪ್ಪುನ ಆಯದಕಲ್ಲ್ ಗ್ ನೆತ್ತೆರ್ ಪಾಡೊಂದು ಒಂಜಿ ಸುತ್ತು ಅಂಗನಡ್ ನೆತ್ತೆರ್ ಪಾಡ್ದೆ.

ಕಾಂಡೆ ದೈವದ ಚಾಕರಿದಾರ್ ದೈವಸ್ಥಾನ ಗ್ ಬನ್ನಗ ಈ ಘಟನೆ ತೊಜೀದ್ ಬೈದುಂಡು.
ಅಪಗನೆ ಸಧ್ಭಕ್ತೆರ್ ದೈವಸ್ಥಾನದ ಅಂಗಣಡ್ ಬತ್ತ್ ದ್ ಮಧ್ಯಾಹ್ನನೇ ಶ್ರೀ ಬಬ್ಬು ಸ್ವಾಮಿನ ದರ್ಶನಗ್ ಪೊರ್ತು ಗೊತ್ತು ಮಲ್ತ್ ದರ್ಶನದ ಪೊರ್ತುಡು ದುಷ್ಕರ್ಮಿ ದೈವಸ್ಥಾನಗ್ ಬರೊಡು ಪಂದ್ ಕೈ ಮುಗಿಯೆರ್ .

ಐರ್ದ್ ಬೊಕ್ಕ ಬಜ್ಪೆ ಠಾಣೆಗ್ ದೂರು ಕೊರ್ದು ಪೊಲೀಸೆರ್ ಬತ್ತ್ ದ್ ಒಂಜಿ ಗಂಟೆದ ಉಲಯಿ ಕಲ್ವೇನ್ ಪತ್ತಿಯೆರ್.

ಕರಿನ 2020 ನೇ ಇಸವಿಡ್ ದೈವಸ್ಥಾನನ್ ಪುನರ್ ನಿರ್ಮಾಣ ಮಲ್ತ್ , ಪಂಚವಿಂಶತಿ ಕಲಶಾಭಿಷೇಕ ಆದ್ ಶ್ರೀ ದೈವದ ಕಾರಣಿಕ ದಿನರ್ದ್ ದಿನಕ್ ಜಾಸ್ತಿ ಆವೊಂದು ಉಂಡು ಇನಿ ನಡತಿನ ಘಟನೆ ಶ್ರೀ ಬಬ್ಬು ಸ್ವಾಮಿ ಬೊಕ್ಕ ರಾಹುದೈವದ ಕಾರಣಿಕಗ್ ಕುಡೋರ ಸಾಕ್ಷಿ ಆಂಡ್.

ಕಾರ್ಲದ ಸುದ್ದಿ Karkala News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಕಾರ್ಲ ಉಚ್ಚಯಗ್ ಕಾಸ್ದ ಬರ್ಸ : ತುಳು ಕಲ್ಪಾರ್ಥಿಲೆನ ಸೇವೆಗ್ ಇಜ್ಜಿ ಬಿಲೆ : 2 ವರ್ಷೋರ್ದು ಗೌರವ ಧನ ಕೊರ್ಜಿಂಡಲಾ ತುಟಿ ಬಿಚ್ಚoದಿನ ಸಂಸ್ಕೃತಿ ಸಚಿವೆರ್

Mar 18, 2022

ಕುಡ್ಲ : ನಮ್ಮ ರಾಜಕಾರಣಿಲು ಸರ್ಕಾರದ ಕಾಸ್ ನ್ ಎಂಚ ಗಲಸೊಂದು ಉಲ್ಲೆರ್ ಪನ್ಪಿನೆಕ್ಕ್ ಸ್ಪಷ್ಟ ಉದಾರ್ಮೆ ನಮಡ ಉಂಡು , ನಂಕ್ ತೆರಿನಲಕ ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವ ವಿ. ಸುನೀಲ್ ಕುಮಾರ್ ಮೆರ್ನ ತವರು ಕ್ಷೇತ್ರಡ್ ಕಾರ್ಲಾ ಉಚ್ಚಯ ನಡತೊಂದು ಉಂಡು. ನೆತ್ತ ಭಾಗವಾದ್ ಕಾರ್ಲಾದ ಪೌರ ಕಾರ್ಮಿಕೆರೆಗ್ ಹೆಲಿಕಾಪ್ಟರ್ ಡ್ ತಿರುಗಾಟ ಮಲ್ದೆರ್ . ನನೊಂಜಿ ಕಡೆಟ್ ನಮ್ಮ ತುಲುನಾಡ್ ದ ಅಪ್ಪೆ ಬಾಸೆ ಆಯಿನ ತುಳು ಭಾಸೆನ್ ಕಲ್ಪಾವುನ ಪಾಪದ ಕಲ್ಪಾರ್ಥಿಲೆಗ್ 2 ವರ್ಷರ್ದ್ ಸಂಬಳ ಕೊರಂದೆ ಬೆನ್ಪಾವೊಂದು ಉಲ್ಲೆರ್.

ಕಾರ್ಲಾದ ಪೌರ ಕಾರ್ಮಿಕಕೆರೆನ್ ಹೆಲಿಕಾಪ್ಟರ್ ಸುತ್ತಾಯಿನ ಬಗ್ಗೆ ಏರ್ಲ ಪಾತೆರುಜೆರ್ . ಆಂಡ ಬಂಜಿಗ್ ದಾಲ ದಾoತಿನಾಯೆಗ್ ಜುಟ್ಟುಗು ಮಲ್ಲಿಗೆ ಪೂ ಬೋಡ ಪನ್ಪಿ ಪಾತೆರದಲಕ ಪೌರ ಕಾರ್ಮಿಕೆರೆಗ್ ಅವ್ವೆತೋ ಸೌಲಭ್ಯಗದ ಕೊರತೆ ತೊಜೊಂದು ಉಂಡು . ಅಕ್ಲೆಗ್ ಶೂ ಇಜ್ಜಿ , ಕೈಕ್ ಕುಂಟು ಇಜ್ಜಿ . ಆರೋಗ್ಯ ಸಮಸ್ಯೆ ಬತ್ತ್oಡ ಸರಿಯಾಯಿನ ಹೆಲ್ತ್ ಇನ್ಸೂರೆನ್ಸ್ ಇಜ್ಜಿ . ಈ ಮಾತೆತ್ತ ನಡುಟು , ಒರಿ ಒರಿಯಗ್ ತಲಾ 2 ಸಾರ ರೂ. ಖರ್ಚು ಮಲ್ತ್ ಹೆಲಿಕಾಪ್ಟರ್ ಡ್ ತಿರ್ಗಾವುನ ಅಗತ್ಯ ಉಂಡಾ ಪನ್ಪಿ ಪ್ರಶ್ನೆ ಬುದ್ದಿ ಇತ್ತಿನಕುಲು ಕೇನುವೆರ್ . ಈ ನಡುಟು ತುಳು ಭಾಸೆ ಕಲ್ಪಾವುನ ಸುಮಾರರ್ 43 ಜನ ಕಲ್ಪಾರ್ಥಿಲೆಗ್ 30 ತಿಂಗೊಲುರ್ದು ಗೌರವ ಧನ ಕೊರ್ತುಜೆರ್ .

ಕುಡ್ಲ ಬೊಕ್ಕ ಒಡಿಪುದ 42 ಶಾಲೆಡ್ ತುಳು ಭಾಷೆನ್ ಮೂಜನೆ ಭಾಷೆಯಾದ್ ಕಲ್ಪಾವೊಂದು ಉಲ್ಲೆರ್ ನೆಕ್ಕ್ 43 ತುಳು ಕಲ್ಪಾರ್ತಿಲೆನ್ ನೇಮಕ ಮಲ್ದೆರ್ ಮೆಕ್ಲೆಗ್ ತಿಂಗೊಲ್ಗು ಜುಜುಬಿ 3 ಸಾರ ರೂ. ಗೌರವ ಧನ ಕೊರೊಂದು ಉಲ್ಲೆರ್ . ಆಂಡ ಈ ಕಲ್ಪಾರ್ತಿಲೆಗ್ ಕರಿನ 30 ತಿಂಗೊಲುರ್ದು ಆ ಕಾಸ್ಲಾ ಕೊರೊಂದು ಇಜ್ಜೆರ್.

ತುಳು ಕಲ್ಪಾವುನಕ್ಲೆನೆಟ್ಟ್ ಮಸ್ತ್ ಜನ ಬಾರಿ ಬಡತನದ ಕುಟುಂಬದಕುಲು ಅಂಗವಿಕಲೆರ್ಲಾ ಉಲ್ಲೆರ್ . ಜುಜುಬಿ 3 ಸಾರ ಪಣವುದ ಆಸೆಗ್ ತಮ್ಮ ಅಮೂಲ್ಯ ಪೊರ್ತುನು ತುಳು ಬಾಸೆ ಗಾದ್ ದೀತೆರ್ . ಆಂಡ ಸರಕಾರ ಮೆಕ್ಲೆಗ್ ಗೌರವ ಧನ ಕೊರೊಂದು ಇಜ್ಜಿ . ಉಸ್ತುವಾರಿ ಸಚಿವ ಸುನಿಲ್ ಕುಮಾರ್ ಮೇರ್ ತಂಕ್ ಆ ವಿಷಯ ಗೊತ್ತಿಜ್ಜಂದಿಲಕ ಉಲ್ಲೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಜೇಸನ್ ರಾಯ್ ಬದಲ್ಗ್ ಪೊಸ ಪಂತಾರ್ತಿನ್ ಆಯ್ಕೆ ಮಲ್ತಿನ ಗುಜರಾತ್ ಟೈಟಾನ್

Mar 9, 2022

ಮುಂಬೈ: ನನ ಕೆಲವೇ ದಿನೊಟ್ಟು 2022ರ ಸಾಲ್ ದ ಐಪಿಎಲ್ ಕೂಟ ಸುರು ಆಯೆರೆ ಉಂಡು . ಈ ಸಲ ರಡ್ಡ್ ಪೊಸ ಕೂಟದ ಒಟ್ಟುಗು ಮಲ್ಲ ಮಟ್ಟದ ಪಂಥ ನಡಪೆರೆ ಉಂಡು.ಮೆಗಾ ಹರಾಜ್ ಡ್ ರಡ್ಡ್ ಕೋಟಿ ರೂಗ್ ಗುಜರಾತ್ ಟೈಟನ್ಸ್ ಕೂಟಗ್ ಸೇರ್ಪಡೆ ಆಯಿನ ಜೇಸನ್ ರಾಯ್ ಬೊಕ್ಕ ಕೂಟರ್ದ್ ಪಿರ ಬತ್ತ್ ದ್ ಇತ್ತೆರ್ .

ಬಯೋ ಬಬಲ್ ವಾಸದ ಕಾರಣರ್ದ್ ರಾಯ್ ಕೂಟಡ್ ಗೊಬ್ಬೊoದು ಇಜ್ಜೆರ್ ,ಇತ್ತೇ ಗುಜರಾತ್ ಟೈಟಾನ್ಸ್ ಕೂಟ ರಾಯ್ ಬದಲ್ ಗ್ ಅಫ್ಘಾನಿಸ್ಥಾನದ ರಹಮಾನುಲ್ಲಾ ಗುರ್ಬಾಜ್ನ್ ಆಯ್ಕೆ ಮಲ್ದೆರ್.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಬೊಲ್ತೆರ್ ಸುದ್ದಿ | Belthangady News ರಪಕ್ಕ ಸುದ್ದಿ Flash News

ದೇವಂದಬೆಟ್ಟು ದೇವಲ್ಯ ಜೀರ್ಣೋದ್ಧಾರ ಕೆಲಸದ ಬಗೆಟ್ ಶಾಸಕೆರ್ ರಾಜೇಶ್ ನಾಯ್ಕ್ ಮೆಚ್ಚಿಗೆ

Feb 1, 2022

ಬಂಟ್ವಾಳ: ತಾಲೂಕುದ ದೇವಂದಬೆಟ್ಟು ಶ್ರೀ ಲಕ್ಷ್ಮಿ ವಿಷ್ಣುಮೂರ್ತಿ ದೇವಸ್ಥಾನದ ಜೀರ್ಣೋದ್ಧಾರ ಕೆಲಸದ ನಿಲೆಟ್ಟ್ ನಡಪುನ ಶ್ರಮದಾನೊಡು ಐತಾರದಾನಿ ಪಾಲ್ ಪಡೆಯಿನ ಬಂಟ್ವಾಳ ಶಾಸಕೆರ್ ರಾಜೇಶ್ ನಾಯ್ಕ್, ಉಳೆಪಾಡಿ ಮೇರ್ ದೇವಸ್ಥಾನದ ಜೀರ್ಣೋದ್ಧಾರದ ಕೆಲಸೊಲೆನ್ ಪರಿಶೀಲನೆ ಮಲ್ತ್‌ದ್ ಬೇಲೆದ ವಿಚಾರೊಡು ಕುಷಿ ಪಡೆಯೆರ್.
ಈ ಪೊರ್ತುಡು ಪಾತೆರ್‍ನ ಆರ್, ಒಂಜಿ ತಿಂಗೊಲುರ್ದಿಂಚಿ ಕಳ್ಳಿಗೆ, ತುಂಬೆ ಬಿ.ಮೂಡ ಬೊಕ್ಕ ನಡು ಗ್ರಾಮದ ಬೇತೆ ಬೇತೆ ಸಂಘಸಂಸ್ಥೆದಕುಲು ಅಂಚೆನೆ ಮಾತೃಶಕ್ತಿ ಕೂಟದಕುಲು ನಿರಂತರವಾದ್ ಶ್ರಮದಾನೊಡು ಪಾಲ್ ಪಡೆವೊಂದುಲ್ಲೆರ್. ಅಂಚಾದ್ ಶ್ರೀ ಕ್ಷೇತ್ರ ಬೊಕ್ಕ ಇಡೀ ಪರಿಸರ ಪೊಸ ರೂಪು ಪಡೆದ್ ಬ್ರಹ್ಮಕಲಶೋತ್ಸವ ಬಾರಿ ಗೌಜಿಡ್ ನಡಪರೆ ಉಂಡು ಪಂಡೆರ್.

ವ್ಯವಸ್ಥಾಪನಾ ಸಮಿತಿ ಕಾರ್ಯಂತೆರ್ ದಾಮೋದರ ನೆತ್ತರಕೆರೆ, ಸದಸ್ಯೆರಾಯಿನ ದಿವಾಕರ ಶೆಟ್ಟಿ ಕುಪ್ಪಿಲ, ಸತೀಶ್ ಶೆಟ್ಟಿ ಮೊಡಂಕಾಪು, ಪುರುಷೋತ್ತಮ ಕೊಟ್ಟಾರಿ ಮಾಡಂಗೆ, ಕೇಶವ ದೈಪಲ, ಅಮಿತಾ ವಿಶ್ವನಾಥ್ ದಾಸರಕೋಡಿ, ಉಮಾ ಲಿಂಗಪ್ಪ ತುಂಬೆ, ಬ್ರಹ್ಮಕಲಶ ಸಮಿತಿದ ಗುರ್ಕಾರ್ಲು ಸದಾನಂದ ಶೆಟ್ಟಿ ರಂಗೋಲಿ, ಸಂಚಾಲಕೆರ್ ತೇವು ತಾರನಾಥ ಕೊಟ್ಟಾರಿ, ಫರಂಗಿಪೇಟೆ, ಪ್ರಧಾನ ಕಾರ್ಯಂತೆರ್ ಗಣೇಶ್ ಸುವರ್ಣ ತುಂಬೆ, ಕೋಶಾಧಿಕಾರಿ ಕವಿರಾಜ್ ಚಂದ್ರಿಗೆ, ಮನೋಜ್ ವಳವೂರು, ಮಹೇಶ್ ಶೆಟ್ಟಿ ಜುಮಾದಿಗುಡ್ಡೆ, ಮನೋಹರ ಕಂಜತ್ತೂರು, ರಾಘವ ಕಾರಂತ ಕನಪಾಡಿ, ವೇಣುಗೋಪಾಲ ಶೆಟ್ಟಿ ಕುಪ್ಪಿಲಗುತ್ತು, ವಿಶ್ವನಾಥ ಕುಲಾಲ್ ನೆತ್ತರಕೆರೆ, ಪೂವಪ್ಪ ಸಫಲ್ಯ ದರಿಬಾಗಿಲು ಮೊಕುಲು ಮಾತ ಇತ್ತೆರ್.