kanthara

ಕಾಂತಾರ ಪಿಕ್ಚರ್ ಪ್ರತಿ ಇಲ್ಲ್ ಇಲ್ಲಗ್ ಮುಟ್ಟಡ್, ಸರ್ಕಾರ ತೆರಿಗೆ ವಿನಾಯ್ತಿ ಕೊರಡ್ : ಮಿಥುನ್ ರೈ

ಕುಡ್ಲ : ದೈವಾರಾಧನೆಗ್ ಇಡೀ ಜಗತ್ತ್ ಡೇ ಮಲ್ಲ ಗೌರವ ಉಂಡು, ಅವು ಪುಟ್ಟುದಿನಿ ನಮ್ಮ ತುಳುನಾಡ್ ದ ಮಣ್ಣ್ ಡ್. ದೈವಾರಾಧನೆಡ್ ಜನಕ್ಲೆಗ್ ಇಪ್ಪುನ ಭಯ ಭಕ್ತಿ ಇನಿ ಮಾಜುನಂಚಿನ ಸ್ಥಿತಿಟ್ಟ್ ಉಂಡು. ಒಂಜಿ ಪಿಚ್ಚರ್ ದ ಮುಕೇನ ದೈವಾರಾಧನೆದ ಬಗೆಟ್ಟ್ ಜನಕ್ಲೆನ್ ಮುಟ್ಟುನ ಪ್ರಯತ್ನ ಇನಿ “ಕಾಂತಾರ” ಪಿಕ್ಚರ್ ಡ್ ಆತ್ಂಡ್ . “ಕಾಂತಾರ” ಪಿಕ್ಚರ್ ದ ವಿಚಾರೊನು ಏತ್ ಪಂಡಲ ಯಾವಂದ್, ನೆತ್ತ ಅದ್ಬುತ ಪರಿಕಲ್ಪನೆದ ಬಗೆಟ್ಟ್ ಇಡೀ ರಾಜ್ಯನೇ ಪುಗರೊಂದುಂಡು. ಅಂಚಾದ್ “ಕಾಂತಾರ” ಪಿಕ್ಚರ್ ಪ್ರತಿ ಇಲ್ಲ ಇಲ್ಲಗ್ ಲ ಮುಟ್ಟೊಡು, ಈ ಪಿಕ್ಚರ್ ಗ್ ತೆರಿಗೆ ಮುಕ್ತ ಮಲ್ಪೊಡು. ತುಳುನಾಡ್ ದ ದೈವಾರಾಧನೆದ ಮಹತ್ವ ಸಮಸ್ತ ಕರ್ನಾಟಕಡ್ ತೆರಿವೊಡು ಪಂದ್ ಸಮಸ್ತ ತುಳುವೆರೆನ ಕೋರಿಕೆ.

ಅಂಚನೆ ತುಳುನಾಡ್ ದ ದೈವಾರಾಧನೆದ ವೈಶಿಷ್ಟ್ಯತೆನ್ ಬಿಂಬಿಸುನ ಒಟ್ಟಿಗೆ ಆರಾಧನೆದ ಮಹತ್ವನ್ ಸಾರಿ ಪನ್ನ ‘ಕಾಂತಾರ’ ಪಿಕ್ಚರ್ ನಿಜಕ್ಕ್ ಲ ಅದ್ಭುತವಾದ್ ಮೂಡ್ದ್ ಬೈದ್ಂಡ್. ದೈವಾರಾಧನೆ ಬೊಕ್ಕ ನಂಬಿಕೆನ್ ಎಳೆಎಳೆಯಾದ್ ತೂಪಾವುನ ಮೂಲಕ ಯುವ ಸಮಾಜಡ್ ನನತ್ ನಂಬಿಕೆ ಬೈದ್ಂಡ್. ಈ ಪಿಕ್ಚರ್ ನ್ ರಾಜ್ಯದ ಮುಖ್ಯಮಂತ್ರಿಲು ತೂವೊಡು. ಬೊಕ್ಕ ಈ ಪಿಕ್ಚರ್ ಗ್ ತೆರಿಗೆ ವಿನಾಯಿತಿ ಮಲ್ಪೊಡು ಪಂದ್ ಸರ್ವ ತುಳುನಾಡ್ ದಕಲೆನ ಪರವಾದ್ ಬಿನ್ನಾಪು ಮಲ್ದೆರ್.

ರಿಷಭ್ ಶೆಟ್ರ್ ನ ಪಿಕ್ಚರ್ ಬೊಕ್ಕ ಅರೆನ ತಂಡ ಕರಾವಳಿ ಭಾಗದ ಧಾರ್ಮಿಕ, ಸಾಂಸ್ಕೃತಿಕ ಬೊಕ್ಕ ಪರಂಪರೆದ ಬಗೆಟ್ ಸಮಗ್ರವಾದ್ ವೇದಿಕೆ ಕೊನಪುನಡೆಗ್ ಯಶಸ್ವಿಯಾದ್ ಬೆಂದಿನವು ಶ್ಲಾಘನೀಯ ಅತ್ಂಡ್. ಈ ಒಂಜಿ ಪಿಕ್ಚರ್ ನ್ ಮನೋರಂಜನೆದ ದೃಷ್ಟಿಡ್ ತೂವನ್ಂದೆ ಸಮಾಜದ ಮತ ಜನಕುಲ್ ನೆತ್ತ ಇತಿಹಾಸದ ಬಗೆಟ್ ಒಂಜಿ ಅವಲೋಕನ ಪನ್ಪುನಂಚನೆ ಮಾತೆರ್ಲಾ ತೂವೊಡು ಪನ್ಪುನವು ಎನ್ನ ಬಿನ್ನಾಪು. ಈ ಪಿಕ್ಚರ್
ಇತಿಹಾಸ ಬರೆವಡ್. ನನದ ಪೀಳಿಗೆಗ್ ಎಡ್ಡೆ ಸಂದೇಶ ಕೊರ್ಪುಲೆಕ ಆವಡ್ ಪಂದ್ ಮಿಥುನ್ ರೈ ಬಿನ್ನಾಪು ಮಲ್ದೆರ್.