Bangalore

ಬಪ್ಪನಾಡ್ ಟೂರಿಸಂ ಕಾರಿಡಾರ್ ಮಲ್ಪರೆ ಬಿನ್ನಾಪು

ಮುಲ್ಕಿ: ಬಪ್ಪನಾಡ್‌ದ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನನ್ ರಾಜ್ಯದ ಮಲ್ಲ ಪ್ರವಾಸೋದ್ಯಮ ತಾಣವಾದ್ ಸೇರ್ಪಡೆ ಮಲ್ಪರೆ ಅಂಚೆನೆ ಮುಕ್ಕ-ಸಸಿಹಿತ್ಲು ಬೀಚ್ ರಸ್ತೆ-ಬಪ್ಪನಾಡ್-ಮುಲ್ಕಿ ಉಂದೆನ್ ಟೂರಿಸಂ ಕಾರಿಡಾರ್ ಆದ್ ಪರಿವರ್ತನೆ ಮಲ್ಪರೆ ಮಲ್ದಿತ್ತಿನ ಬಿನ್ನಾಪುಗು ರಾಜ್ಯ ಸರಕಾರ ಇನಿ ಮುಟ್ಟ ದಾಲ ಸ್ಪಂದನೆ ಕೊರಂದಿನ ನಿಲೆಟ್ಟ್ ಆ ಬಿನ್ನಾಪುನು ಕುಡ ಒರ ಪರಿಶೀಲನೆ ಮಲ್ಪೊಡು ಪಂದ್ ಶಾರದಾ ಇನ್‌ಫ್ರಾ ಡಿಸೈನ್ ಪ್ರೈವೇಟ್ ಲಿಮಿಟೆಡ್‌ದ ಆಡಳಿತ ನಿರ್ದೇಶಕೆರ್ ಜೀವನ್ ಕೆ.ಶೆಟ್ಟಿ ಮೇರ್ ಇತ್ತೆದ ಪ್ರವಾಸೋದ್ಯಮ ಮಂತ್ರಿಲಾಯಿನ ಆನಂದ್ ಸಿಂಗ್ ಮೆರೆಗ್ ಪತ್ರ ಬರೆತೆರ್.

ಮುಲ್ಕಿದ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ ಸೌಹಾರ್ದತೆಗ್ ಸಾಕ್ಷಿಆಯಿನ ಕ್ಷೇತ್ರ. ಉಂದು ಪ್ರವಾಸೋದ್ಯಮದ ನಿಲೆಟ್ಟ್ ಅಭಿವೃದ್ಧಿ ಆವರೆ ಬಾರಿ ಅವಕಾಶ ಇತ್ತಿನ ಪುಣ್ಯ ಕ್ಷೇತ್ರ. ಅಂಚಾದ್ ಸಸಿಹಿತ್ಲು ಬೀಚ್ ರಸ್ತೆ, ಸಸಿಹಿತ್ಲು ಶ್ರೀ ಭಗವತಿ ದೇವಸ್ಥಾನ, ಪೊಯ್ಯೆದಗುಡ್ಡೆ ಶ್ರೀ ಉಮಾಮಹೇಶ್ವರಿ ದೇವಸ್ಥಾನ, ಚಿತ್ರಾಪು-ಕಲ್ಲ್‌ಸಂಕ-ಪಡುಬೈಲ್- ಕೋರ್‍ದಬ್ಬು ದೈವಸ್ಥಾನ- ಕೊಳಚಿಕಂಬುಲ ಮಂತ್ರ ಸರ್ಫಿಂಗ್ -ಬಪ್ಪನಾಡ್ ದೇವಸ್ಥಾನ ಈ ಜಾಗೆಲೆನ್ ಸಂಪರ್ಕ ಮಲ್ಪುನ ಟೂರಿಸಂ ಕಾರಿಡಾರ್ ಮಲ್ಪರೆ ಅವಕಾಶ ಉಂಡು. ಅವೆಕ್ಕ್ ಸರಕಾರ ಬೇಗ ಕಾರ್ಯಗತ ಮಲ್ಪೊಡು ಪಂದ್ ಜೀವನ್ ಶೆಟ್ಟಿ ಮೇರ್ ೨೦೨೦ನೇ ಇಸ್ವಿ ಅಕ್ಟೋಬರ್ ೧೬ಕ್ಕ್ ಮಾಜಿ ಮುಖ್ಯಮಂತ್ರಿ ಬಿ.ಎಸ್, ಯಡಿಯೂರಪ್ಪ, ಪ್ರವಾಸೋದ್ಯಮ ಸಚಿವೆರಾದಿತ್ತಿನ ಸಿ.ಟಿ.ರವಿ ಮೆರೆಗ್ ಶಾಸಕೆರ್ ಉಮಾನಾಥ್ ಕೋಟ್ಯಾನ್ ಬೊಕ್ಕ ಮಾಜಿ ಸಚಿವೆರ್ ಅಭಯಚಂದ್ರ ಜೈನ್ ಮುಕೇನ ಯೋಜನಾ ನಕ್ಷೆ ಸಮೇತ ಮನವಿ ಕೊರ್ದಿತ್ತೆರ್.
ಉಂದೆನ್ ಪರಿಶೀಲನೆ ಮಲ್ದಿನ ಜಿಲ್ಲಾಧಿಕಾರಿಲು ೨೦೨೦ನೇ ನ.೫ ಕ್ಕ್ ಉತ್ತರ ಕೊರ್ತೆರ್. ೨೦೨೧ನೇ ಜನವರಿ ೧೮ ಗು ಜಿಲ್ಲಾ ಪ್ರವಾಸೋದ್ಯಮ ಇಲಾಖೆದ ಉಪನಿರ್ದೇಶಕೆರ್ ಬೆಂಗಲೂರುಗು ನಿರ್ದೇಶಕೆರೆಗ್ ಪತ್ರ ಬರೆದಿತ್ತೆರ್. ೨೦೨೧ನೇ ಇಸ್ವಿ ಫೆ.೨೨ಕ್ಕ್ ಶಾಸಕೆರ್‌ಗ್ ಕುಡ ಒರ ಮನವಿನ್ ಕೊರ್ದಿತ್ತೆರ್. ಈ ಮನವಿನ್ ಮಾಜಿ ಸಚಿವೆರ್ ಪಿ.ಜಿ.ಆರ್ ಸಿಂಧ್ಯ ೨೦೨೧ನೇ ಇಸ್ವಿ ಮಾರ್ಚ್ ೩ ತಾರೀಕ್‌ಗ್ ಮುಖ್ಯಮಂತ್ರಿಲೆಗ್ ಶಿಫಾರಸ್ ಮಲ್ದಿತ್ತೆರ್. ಅಂಚೆನೆ ೨೦೨೧ ಮಾರ್ಚ್ ೨೧ಕ್ಕ್ ಸಸಿಹಿತ್ಲುಗು ಭೇಟಿ ಕೊರ್ತಿನ ಪ್ರವಾಸೋದ್ಯಮ ಸಚಿವೆರ್ ಸಿ.ಪಿ.ಯೋಗೀಶ್ವರ್ ಮೆರೆಗ್ ಕುಡೊರ ಮನವಿ ಕೊರ್ದಿತ್ತೆರ್. ಈತಾಂಡಲ ಈ ಯೋಜನೆದ ಬಗೆಟ್ಟ್ ರಾಜ್ಯ ಸರಕಾರ ಕ್ರಮ ದೆತೊಂದಿಜಿ. ರಾಜ್ಯ ಸರಕಾರ ಆಯಿನಾತ್ ಬೇಗ ಈ ಯೋಜನೆನ್ ಕಾರ್ಯಗತ ಮಲ್ತ್‌ದ್ ಮುಲ್ಕಿ ತಾಲೂಕುದ ಸಮಗ್ರ ಅಭಿವೃದ್ಧಿಗ್ ಅವಕಾಶ ಮಲ್ತ್ ಕೊರೊಡು ಪಂದ್ ಜೀವನ್ ಶೆಟ್ರ್ ೨೦೨೨ನೇ ಇಸ್ವಿ ಜನವರಿ ೨೨ ತಾರೀಕ್‌ಗ್ ಜಿಲ್ಲಾಧಿಕಾರಿಲು, ಶಾಸಕೆರ್ ಅಂಚೆನೆ ಸಚಿವೆರ್‍ನ ಮೂಲಕ ಮುಖ್ಯಮಂತ್ರಿಲು ಬಸವರಾಜ ಬೊಮ್ಮಾಯಿ ಮೆರೆಗ್‌ಲ ಪತ್ರ ಬರೆದ್ ಬಿನ್ನಾಪು ಮಲ್ದೆರ್.