B C Nagesh

ಬ್ರಹ್ಮಶ್ರೀ ನಾರಾಯಣ ಗುರು ಪಾಠ ಪಿರ ಸೇರ್ಸಾವರೆ ಶಿಕ್ಷಣ ಸಚಿವೆರೆರ್ದ್ ಸೂಚನೆ

ಕುಡ್ಲ : ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ ಪಾಠೊನು 10 ನೇ ಕ್ಲಾಸ್ ದ ಸಮಾಜ ವಿಜ್ಞಾನ ಪುಸ್ತೊಕೊಗು ಪಿರ ಸೇರ್ಸಾವರೆ ಶಿಕ್ಷಣ ಇಲಾಖೆ ಮಹತ್ವದ ತೀರ್ಮಾನ ದೆತೊಂದುಂಡು. ಶಿಕ್ಷಣ ಸಚಿವೆರ್ ಬಿ.ಸಿ.ನಾಗೇಶ್ ಮೇರ್ ಶಿಕ್ಷಣ ಇಲಾಖೆಗ್ ಸೂಚನೆ ಕೊರ್ತೆರ್.

ರಾಜ್ಯ ಸರಕಾರದ ಪಾಠ ಪುಸ್ತಕ ಸಮಿತಿ ಗುರುಕ್ಲೆನ ಪಾಠೊನು ಸಮಾಜ ವಿಜ್ಞಾನೊರ್ದು ದೆತ್ತ್ ದ್ ಐಚ್ಚಿಕವಾದುಪ್ಪುನ ಕನ್ನಡ ಪಾಠ ಪುಸ್ತಕೊಗು ಸೇರ್ಸಾದಿನೆನ್ ಖಂಡಿಸಾದ್ ಬಿಲ್ಲವ ಸಂಘಟನೆಲು ಅಂಚೆನೆ ನಾರಾಯಣ ಗುರುಕ್ಲೆನ ಅಭಿಮಾನಿಲು ಭಾರಿ ಪ್ರತಿಭಟನೆ ಮಲ್ದಿತ್ತೆರ್. ನನಲ ಪ್ರತಿಭಟನೆ ಮಲ್ಪರೆ ನಿರ್ದಾರ ಮಲ್ದಿತ್ತೆರ್. ಅಂಚಾದ್ ಕನ್ನಡ ಬೊಕ್ಕ ಸಂಸ್ಕೃತಿ ಸಚಿವೆರ್ ಸುನಿಲ್ ಕುಮಾರ್ ಬೊಕ್ಕ ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್ ಶಿಕ್ಷಣ ಸಚಿವೆರೆಗ್ ಈ ವಿಚಾರೊಡು ಮನವಿ ಮಲ್ತ್ ದಿತ್ತೆರ್.

ಆರ್.ಪದ್ಮರಾಜ್ ಅಭಿನಂದನೆ

ಪತ್ತನೇ ಕ್ಲಾಸ್ ದ ಸಮಾಜ ವಿಜ್ಞಾನ ಪಾಠ ಪುಸ್ತಕೊಡು ನಾರಾಯಣ ಗುರುಕ್ಲೆನ ಪಾಠ ಪಿರ ಸೇರ್ಸಾವರೆ ಆದೇಶ ಕೊರಿಯರೆ ಪ್ರಯತ್ನ ಮಲ್ದಿನ ಸಚಿವೆರ್ ಸುನಿಲ್ ಕುಮಾರ್ ಬೊಕ್ಕ ನಳಿನ್ ಕುಮಾರ್ ಕಟೀಲ್ ಮೆರೆಗ್ ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ ಆರ್.ಪದ್ಮರಾಜ್ ಕೃತಜ್ಞತೆ ಸಂದಾದೆರ್.

ರಾಜ್ಯ ಸರ್ಕಾರ ಈ ವಿಚಾರೊಡು ಬೇಗ ಆದೇಶ ಕಡಪುಡೊಡು. ಅವೆರ್ದ್ ಬೊಕ್ಕ ಬಿಲ್ಲವ ಸಂಘಟನೆಲೆನ ಪ್ರತಿಭಟನೆ ಪಿರ ದೆಪ್ಪುವ ಪಂದ್ ಆರ್ ತೆರಿಪಾದೆರ್. ಅವ್ವತ್ತಾಂದೆ ನೆತ್ತ ಬಗೆಟ್ಟ್ ಹೋರಾಟ ಮಲ್ತಿನ ಮಾತೆರೆಗ್ಲ ಕೃತಜ್ಞತೆನ್ ಪತ್ರಿಕಾ ಹೇಳಿಕೆಡ್ ತೆರಿಪಾದೆರ್.