ಮಾನಾದಿಗೆ

ವಿಜಯಾ ಕಲಾವಿದೆರ್ ಕುಟುಂಬದ ಸಾಧಕೆರೆಗ್ ಮಾನಾದಿಗೆ, ಊರುಗು ಬರೊಡ್ಚಿ ನಾಟಕದ ಮುರ್ತ

ವಿಜಯಾ ಕಲಾವಿದೆರ್ ಕಿನ್ನಿಗೋಳಿ ನೆತ್ತ ಒರುಟ್ಟು ಕುಟುಂಬೊದ ಕಲಾವಿದೆರೆಗ್ ಮಾನಾದಿಗೆ ಬೊಕ್ಕ “ಊರುಗು ಬರೊಡ್ಚಿ” ತುಳು ನಾಟಕೊದ ಮುರ್ತದ ಲೇಸ್ ಐತಾರದಾನಿ
ಕಿನ್ನಿಗೋಳಿದ ಐಕಳ ಹರೀಶ್ ಶೆಟ್ರೆನ ಶ್ರೀ ಭ್ರಮರಾಂಬಿಕೆ ಇಲ್ಲದ ಜಾಲ್ ಡ್ ನಡತ್ಂಡ್.
ಸಮಾಜೊಗು ಎಡ್ಡೆಂತಿನೆನ್ ಬೋಧನೆ ಮಲ್ಪುನ ವಿಜಯಾ ಕಲಾವಿದೆರ್ನ ಯಶಸ್ವಿ “ಬೈರಾಸ್ ಭಾಸ್ಕರೆ” ನಾಟಕೊದ ಲೆಕ್ಕನೆ ಊರುಗು ಬರೊಡ್ಚಿ ಪನ್ಪಿನ ನಾಟಕಲಾ ಎಡ್ಡೆ ಸಂದೇಶ ಕೊರ್ದು ಯಶಸ್ವಿ ಆವಡ್ ಪಂಡೆರ್ ಮಲ್ಲ ಬಿನ್ನೆರಾದ್ ಬತ್ತಿನ ಶ್ರೀ ಲಕ್ಷ್ಮಿ ನಾರಾಯಣ ಆಸ್ರಣ್ಣೆರ್ ಪಂಡೆರ್.ಲೇಸ್ ದ ಗುರ್ಕಾರ್ಮೆ ವಹಿಸಿದಿತ್ತಿನ ಜಾಗತಿಕ ಬಂಟೆರ್ನ ಸಂಘೊಲೆನ ಫೆಡರೇಷನ್ ದ ಗುರ್ಕಾರ್ಲು ಐಕಳ ಹರೀಶ್ ಶೆಟ್ರ್ ಪಾತೆರ್ದ್ ಶುಭ ಹಾರೈಕೆ ಮಲ್ತೆರ್. ಕೊರೊನಾದ ಕಾಲೊಡು ಬೊಂಬಾಯಿದಕಲೆನ ಪರಿಸ್ಥಿತಿ ಬಾರಿ ಬಂಞ ಇತ್ತ್ಂಡ್. ಆಂಡಾ ಬೊಂಬಾಯಿ ಇಜ್ಜಿಡ ಊರು ಇಜ್ಜಿ . ದಾಯೆ ಪಂಡ ಊರುದ ಬುಲೆಚ್ಚಿಲ್ ಗ್ ದೈವ ದೇವಸ್ಥಾನೊಲೆನ ಜೀರ್ಣೋದ್ಧಾರೊಗು ಏತ್ ಕಷ್ಡ ಆಂಡಲಾ ಕಷ್ಟ ಬುಡ್ತಿನಕುಲು ಬೊಂಬಾಯಿದಕುಲು. ಇಂಚಿನ ಪೊರ್ತುಡು ಊರುಗು ಬರೊಡ್ಚಿ ಪನ್ಪಿನ ನಾಟಕ ಎಡ್ಡೆ ಸಂದೇಶ ಕೊರ್ದು ಯಶಸ್ವಿ ಆವಡ್ ಪಂಡೆರ್.
ಧರ್ಮದರ್ಶಿ ಹರಿಕೃಷ್ಣ ಪುನರೂರು ,
ಕಲಾಪೋಷಕೆರ್, ಸಂತೋಷ್ ಶೆಟ್ಟಿ , ರಂಗ ನಿರ್ದೇಶಕೆರ್ ಚಂದ್ರಶೇಖರ ಸುವರ್ಣೆರ್ ಶುಭ ಹಾರೈಕೆ ಮಲ್ತೆರ್.

ಚಂದ್ರಿಕಾ ಹರೀಶ್ ಶೆಟ್ರ್ ,ಯಕ್ಷ ಲಹರಿದ ಗುರ್ಕಾರ್ಲು ರಘುನಾಥ ಕಾಮತ್ ಕೆಂಚನಕೆರೆ, ರಂಗ ನಟೆ ರಾಜೇಶ್ ಕೆಂಚನಕೆರೆ, ಮೂಲ್ಕಿ ವಲಯದ ಪತ್ರಕರ್ತೆರ್ನ ಕೂಟದ ಗುರ್ಕಾರ್ಲು ನಿಶಾಂತ್ ಕಿಲೆಂಜೂರು , ಸ್ವರಾಜ್ ಶೆಟ್ರ್ ಮೊಕುಲು ಇತ್ತೆರ್.ಉಂದುವೇ ಪೊರ್ತುಡು
ಧಾರ್ಮಿಕ ಪರಿಷತ್ ದ ಪದುಕೆರಾಯಿನ ಯುಗಪುರುಷ ದ ಸಂಪಾದಕೆರ್ ಭುವನಭಿರಾಮ ಉಡುಪೆರ್, ಮಲ್ಲ ಬೆನ್ನಿದಾರ್ , ಕಲಾವಿದೆ ಸುಧಾಕರ ಸಾಲ್ಯಾನ್ ಅಂಚೆನೇ ತುಳು ಸಾಹಿತ್ಯ ಅಕಾಡೆಮಿದ ಪದುಕೆರಾಯಿನ ಪತ್ರಕರ್ತೆ ನರೇಂದ್ರ ಕೆರೆಕಾಡು ಮೆರೆಗ್ ಮಾನಾದಿಗೆ ಮಲ್ತೆರ್.ಉಂದುವೇ ಪೊರ್ತುಡು ಐಕಳ ಹರೀಶ್ ಶೆಟ್ರ್ ನಾಟಕಕಾರೆ ಹರೀಶ್ ಪಡುಬಿದ್ರಿ ಮೆರೆಗ್ ನಾಟಕೊಗು ವೀಳ್ಯ ಕೊರಿಯೆರ್.

ಬಾಲ ಕಲಾವಿದೆ ಮಂಜೂಷ ಭಗವಾನ್ ಸುರತ್ಕಲ್ ದೇವೆರೆನ್ ಸುಗಿತೆರ್.
ವಿಜಯ ಕಲಾವಿದೆರ್ ನೆತ್ತ ಸಂಚಾಲಕೆರ್ ಸಾಯಿನಾಥ್ ಶೆಟ್ಟಿ ಮಾನಾದಿಗೆ ಪಡೆಯಿನಕಲೆಗ್ ಅಭಿನಂದನೆ ಮಲ್ತೆರ್.ಕಲಾವಿದೆರಾಯಿನ ಭಾಸ್ಕರ ಪಕ್ಷಿಕೆರೆ, ಹರಿಪ್ರಸಾದ್ ನಂದಳಿಕೆ, ಸುಷ್ಮಿತಾ ಕುಲಾಲ್ ಮಾನಾದಿಗೆ ಪತ್ರ ಓದು ಪಂಡೆರ್.
ವಿಜಯಾ ಕಲಾವಿದೆರ್ ಗುರ್ಕಾರ್ಲು ಶರತ್ ಶೆಟ್ಟಿ ಎದ್ಕೊಂಡೆರ್ . ಅಂಚೆನೇ ಲೇಸ್ ನಡಪಾದ್ ಕೊರಿಯೆರ್.

ಯಕ್ಷ ಕವಿ, ಛಂದೋ ಬ್ರಹ್ಮ ಗಣೇಶ್ ಕೊಲಕಾಡಿ ಮೆರೆಗ್ ಬಿರುವೆರ್ ಕುಡ್ಲ ಮುಲ್ಕಿ ಘಟಕೊರ್ದು ಮಾನಾದಿಗೆ

ಮುಲ್ಕಿದ ಬಿರುವೆರ್ ಕುಡ್ಲ ಸದಸ್ಯೆರ್ ಯಕ್ಷ ಕವಿ, ಛಂದೋಬ್ರಹ್ಮ, ದಕ ಜಿಲ್ಲೆದ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ ಗಣೇಶ್ ಕೊಲಕಾಡಿ ಮೆರೆಗ್ ಮಾನಾದಿಗೆ ಮಲ್ತೆರ್.ಅಂಚೆನೇ ಬಿರುವೆರೆ ಕುಡ್ಲದ ೩೪ನೇ ಸೇವಾ ಯೋಜನೆನ್ಲಾ ಗಣೇಶ್ ಕೊಲಕಾಡಿ ಮೆರೆಗ್ ಸಂದೈತ ಮಲ್ತೆರ್.

ಬಿರುವೆರ್ ಕುಡ್ಲ ಮುಲ್ಕಿದ ಗುರ್ಕಾರ್ಲು ಕಿಶೋರ್ ಸಾಲ್ಯಾನ್ ಲೇಸ್ ದ ಗುರ್ಕಾರ್ಮೆ ವೈಸೊಂಡೆರ್.
ಮಲ್ಲ ಬಿನ್ನೆರಾದ್ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ ಚಂದ್ರಶೇಖರ ಸುವರ್ಣ ಬತ್ತಿತ್ತೆರ್.ಮಿತ್ತರ್ಮೆಡ್ ಮುಲ್ಕಿ ವಿಜಯಾ ರೈತರ ಸೇವಾ ಸಹಕಾರಿ ಸಂಘದ ಗುರ್ಕಾರ್ಲು ರಂಗನಾಥ ಶೆಟ್ಟಿ,ಕೊಲೆಕಾಡಿ ಛಂದೋಬ್ರಹ್ಮ ಟ್ರಸ್ಟ್ ದ ಮಲ್ಲ ಗುರ್ಕಾರ್ಲು ಸದಾಶಿವ ಶೆಟ್ಟಿಗಾರ್ , ಪದುಕೆರಾಯಿನ ಧನಂಜಯ ಕೊಯಿಲ, ಹರಿರಾಜ ಶೆಟ್ಟಿಗಾರ್, ಗುರುರಾಜ ಉಪಾಧ್ಯಾಯ ಎರ್,ಪಂಚಾಯತ್ ಮಾಜಿ ಸದಸ್ಯೆರ್ ಪ್ರಾಣೇಶ್ ಹೆಜಮಾಡಿ, ಬಿರುವೆರ್ ಕುಡ್ಲ ಮುಲ್ಕಿದ ಕಾರ್ಯಂತೆರ್ ಸತೀಶ್ ಕಿಲ್ಪಾಡಿ, ಒತ್ತು ಕಾರ್ಯಂತೆರ್ ರಿತೇಶ್ ಅಂಚನ್, ರಕ್ಷಿತ್ ಕೊಳಚಿಕಂಬಳ,ಸಂಘಟನಾ ಕಾರ್ಯಂತೆರ್ ರಮಾನಾಥ ಸುವರ್ಣ, ಸಲಹೆಗಾರೆರ್ ಉಮೇಶ್ ಮಾನಂಪಾಡಿ, ಗ್ರಾಮ ಸಂಚಾಲಕೆರ್ ಜಗದೀಶ್ ಕಕ್ವಾ, ಮಾಧವ ಪೂಜಾರಿ ಕಿಲ್ಪಾಡಿ, ಕಿಶೋರ್ ಅಂಚನ್, ಬಿರುವೆರ್ ಕುಡ್ಲದ ಸದಸ್ಯೆರ್ ಬೊಕ್ಕ ಅಭಿಮಾನಿಲು ಇತ್ತೆರ್.
ಕಿಶೋರ್ ಸಾಲ್ಯಾನ್ ಬಪ್ಪನಾಡು ಮಾತೆರೆನ್ಲ ಎದ್ಕೊನಿಯೆರ್. ರಿತೇಶ್ ಅಂಚನ್ ಮಾನಾದಿಗೆ ಪತ್ರ ಓದು ಪಂಡೆರ್. ಸತೀಶ್ ಕಿಲ್ಪಾಡಿ ಲೇಸ್ ನಡಪಾದ್ ಕೊರಿಯೆರ್.

ಮುಲ್ಕಿ ಯುವವಾಹಿನಿದ ತುಡರ ಪರ್ಬ ಉದಿಪನ ಬೊಕ್ಕ ಎಚ್.ವಿ.ಕೋಟ್ಯಾನ್ ರೆಗ್ ಮಾನಾದಿಗೆ

ಮುಲ್ಕಿ ಯುವವಾಹಿನಿದಕಲೆಡ್ದ್ ಪದಿನೆಡ್ಮನೇ ವರ್ಷದ ತುಳುವೆರೆ ತುಡರ ಪರ್ಬ ಶುಕ್ರಾರ ಮುಲ್ಕಿ ದ ಬಿಲ್ಲವ ಸಂಘದ ಸಭಾಂಗಣೊಡು ಪರ್ಬದ ಕಟ್ಟ್ ಕಟ್ಟಳೆ ಪ್ರಕಾರ ನಡತ್ಂಡ್.

ಕಾಂಡೆದ ಪೊರ್ತುಗು ಯುವವಾಹಿನಿದ ಪೊಂಜೊವುಲೆನ ಕೂಟದಕುಲು ಪೆತ್ತ ಕೈಕಂಜಿಲೆಗ್ ಪೂಜೆ ಮಲ್ತ್
ತೆನಸ್ ತಿನ್ಪಾಯೆರ್.
ಬೈಯದ ಲೇಸ್‌ನ್ ಹರಿಹರ ಕ್ಷೇತ್ರದ ಶ್ರೀ ವಿಷ್ಣುಮೂರ್ತಿ ದೇವಸ್ಥಾನದ ಅರ್ಚಕೆ ರ್ ಶ್ರೀ ಹಯಗ್ರೀವ ತಂತಿಲು ಲೇಸ್‌ದ ಉದಿಪನ ಮಲ್ತೆರ್.

ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ್ ದುಂಬು ದೀವೊಂದು ನಿಕುಲು ಮಲ್ಪುನ ಪೂರಾ ಕಜ್ಜಲಾ ಎಡ್ಡೆ ಆವಡ್ ಕೊರೋನಾ ಸೀಕ್ದ ಕತ್ತಲೆ ಮಾಜಿದ್ ಜಗತ್ತೇ ಬೊಲ್ಪು ಅರ್ಲಡ್ ಪಂಡ್‌ದ್ ಹಯಗ್ರೀವ ತಂತ್ರಲು ಆಶೀರ್ವಾದ ಮಲ್ತೆರ್.

ಲಯನ್ಸ್ ಕ್ಲಬ್ ಸುರತ್ಕಲ್ ನೆತ್ತ ಮಾಜಿ ಗುರ್ಕಾರ್ಲು ಮೊಯಿದ್ದಿನ್ ಕುಂಞ, ಮೂಲ್ಕಿ ಸಿಎಸ್‌ಐ ಚರ್ಚ್‌ದ ಧರ್ಮ ಗುರುಕುಲು ರೆ.ಎಡ್ವರ್ಡ್ ಎಸ್. ಕರ್ಕಡ, ಮೂಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಗುರ್ಕಾರ್ಲು ರಮೇಶ್ ಅಮೀನ್ ಕೊಕ್ಕರಕಲ್, ಯುವವಾಹಿನಿ ಮುಲ್ಕಿದ ಗುರ್ಕಾರ್ಲ ದಿವಾಕರ ಕೋಟ್ಯಾನ್, ಕಾರ್ಯಂತೆರ್ ವಿನಯಕುಮಾರ್ ಮಟ್ಟು ಮಿತ್ತ ಚಾವಡಿಡ್ ಓಲಗ ಆದಿತ್ತೆರ್. ಉಂದುವೇ ಪೊರ್ತುಡು ಸಮಾಜ ಸೇವಕರ್, ಮುಲ್ಕಿ ಬಿಲ್ಲವ ಸಂಘದ ಮಾಜಿ ಗುರ್ಕಾಲು ಎಚ್.ವಿ.ಕೋಟ್ಯಾನ್ ಮೆರೆಗ್ ಮಾನಾದಿಗೆ ಮಲ್ತೆರ್,

ಲೇಸ್‌ದ ಮುತಾಲಿಕೆ ವಹಿಸಿನ ಮಾಧವ ಪೂಜಾರಿ ಕಿಲ್ಪಾಡಿ, ಪಣವುದ ಪಾಲವೆರ್ ರಿತೇಶ್ ಅಂಚನ್ ಬೊಕ್ಕ ಯುವವಾಹಿನಿ ಮಾತಾ ಸದಸ್ಯೆರ್ಲ ಈ ಲೇಸ್ಡ್ ಪಾಲ್ ಪಡೆಯೆರ್.

ಉದಯ ಕುಮಾರ್ ಮಟ್ಟು ಪ್ರಸ್ತಾವನೆ ಮಲ್ತೆರ್, ವಿನಯ ಕುಮಾರ್ ಮಟ್ಟು ವಂದನೆ ಮಲ್ತೆರ್, ಮೋಹನ್ ಕುಮಾರ್ ಲೇಸ್‌ದ ನಿರೂಪಣೆ ಮಲ್ತೆರ್ .