ಗ್ರಾಮ

ಬಂಟ್ವಾಳ ತಾಲೂಕು ಕೆದಿಲ ಗ್ರಾಮೊದ ಶ್ರೀದೇವೀ ಭಜನಾ ಮಂದಿರಡ್ ತುಳುಲಿಪಿ ಕಲಿಕಾ ಕಾರ್ಯಗಾರ

ಬಂಟ್ವಾಳ ತಾಲೂಕು ಕೆದಿಲ ಗ್ರಾಮೊದ ಶ್ರೀದೇವಿ ಭಜನಾ ಮಂದಿರಡ್ ತಾರೀಕ್ 08/11/2020 ಐತಾರೊದಾನಿ ಕಾಂಡೆ 10 ಗಂಟೆಗ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಜೈ ತುಳುನಾಡ್ (ರಿ), ಶ್ರೀ ದೇವಿ ಭಜನಾ ಮಂಡಳಿ ಗಾಂಧಿನಗರ ಕೆದಿಲ ಬೊಕ್ಕ ಶ್ರೀ ದೇವಿ ಸ್ಪೋರ್ಟ್ಸ್ ಕ್ಲಬ್ ಗಾಂಧಿನಗರ ಕೆದಿಲ ಮೊಕ್ಲೆನ ಒಟ್ಟು ಸೇರಿಗೆಡ್ *ಬಲೆ ತುಲು ಲಿಪಿ ಕಲ್ಪುಗ* ಕಾರ್ಯಗಾರ ನಡತ್ತ್ಂಡ್. ಕಾರ್ಯಗಾರೊಡು ಬಿನ್ನೆರಾದ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರ್ಲು ದಯಾನಂದ ಜಿ ಕತ್ತಲ್ಸಾರ್, ಅಕಾಡೆಮಿದ ಪದುಕೆರಾಯಿನ ಕಡಬ ದಿನೇಶ್ ರೈ, ಜೈ ತುಲುನಾಡ್ (ರಿ.) ಸಂಘಟನೆದ ಗುರ್ಕಾರ್ಲು ಆಯಿನ ಸುದರ್ಶನ್ ಸುರತ್ಕಲ್ ಪಾಲ್ ಪಡೆದಿತ್ತೆರ್.

ಶ್ರೀದೇವಿ ಭಜನಾ ಮಂದಿರದ ಗುರ್ಕಾರ್ಲು ಆಯಿನ ಜಿನ್ನಪ್ಪ ಗೌಡ ಕಂಪ ಇಂಬೆರೆನ ಗುರ್ಕಾರ್ಮೆಡ್ ನಡತ್ತಿನ ತುಳು ಲಿಪಿ ಕಲಿಕಾ ಕಾರ್ಯಗಾರೊನು, ಚೆನ್ನಪ್ಪ ಗೌಡ ಕುದುಮಾನ್ ತುಡರ್ ಪೊತ್ತಾದ್ ಉದಿಪನ ಮಲ್ತೆರ್. ತುಳು ಲಿಪಿ ಕಲ್ಪಾದಿಲಾಯಿನ ಜಗದೀಶ ಗೌಡ ಕಲ್ಕಳ ಮೇರ್ ತುಳು ಲಿಪಿ ಬರೆಪುನ ಮುಕೇನ ಕಾರ್ಯಾಗಾರೊಗ್ ಚಾಲನೆ ಕೊರ್ಯೆರ್.

ಲೇಸ್‌ನ್ ಲೆತ್ತ್ ಪಾತೆರ್ನ ದಯಾನಂದ ಜಿ ಕತ್ತಲ್ಸಾರ್, ಇಡೀ ಹಿಂದೂ ಧರ್ಮೊಗೆ ಓಂ ಬರೆಪುನೆನ್ ಪಂದ್ ಕೊರ್ನ ತುಳು ಬಾಸೆದ ಲಿಪಿ ನಮ್ಮ, ಈ ಸತ್ಯ ಅವ್ವೇತೊ ಜನಕ್ ತೆರಿಯಂದೆ ಪೊತುಂಡ್, ತುಳುಕು ಸುಮಾರ್ 2500 ವರ್ಷೊದ ಇತಿಹಾಸ ಉಂಡು, ಇಂಚಿನ ಬಾಸೆನ್ ನಮ ಕಲ್ಪಂದೆ ಪಿರಬೂರುಲೆಕ ಮಲ್ತ. ನನಾಂಡಲ ಈ ಬಾಸೆ‌ನ್ ಕಲ್ತ್‌ದ್ ದುಂಬುದ ಪೀಳಿಗೆಗ್ಲ ಒರಿಪವುನ ಕೆಲಸ ಮಲ್ಪುಗ. ನಿಕುಲೆನೊಟ್ಟುಗ್ ಅಕಾಡೆಮಿ ಯಾಪಲ ಉಂಡು ಪಂಡೆರ್. ತುಳುನಾಡ್‌ದ ಮಾತ ಅಂಗಡಿ, ಶಾಲೆ, ಕಚೇರಿಡ್ಲ ತುಳು ಲಿಪಿತ ಬೋರ್ಡ್ ಪಾಡುಲೆಕ ಆವೊಡು ಪಂಡೆರ್.
ಕೆದಿಲ ದೈವಸ್ಥಾನೊದ ಮೀರಾವನ ಕೃಷ್ಣ ಭಟ್ಟ್ ಪಾತೆರ್ದ್ ತುಳು ಬಾರಿ ಪೊರ್ಲುದ ಬಾಸೆ, ತುಳು ಅಕಾಡೆಮಿ ಮಲ್ಪುನ ಕೆಲಸೊಲೆನ್ ತೂವೊಂದುಲ್ಲ….ನಿಕುಲೆನ ಕೆಲಸದೊಟ್ಟುಗು ಎಂಕುಲುಲ ಕೈ ಸೇರವ ಪಂಡೆರ್.
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಪದುಕೆರ್ ಕಡಬ ದಿನೇಶ್ ರೈ ಪಾತೆರೊಂದು ತುಳು ಅಪ್ಪೆನ ಸೇವೆ ಮಲ್ತಿನೆರ್ದಾವರ ಇನಿ ಯಾನ್ ನಿಕುಲೆಗ್ ತೋಜಿದೆ. ಎನ್ನ ಪುದರ್ ನಿಕುಲೆಗ್ ತೆರಿಯೊಡುಂದಾಂಡ ಅವೆಕ್ ತುಳು ಅಪ್ಪೆನೆ ಕಾರಣ. ತುಳು ಸೇವೆ ಪ್ರತಿ ಒರಿಲ ಮಲ್ಪುಲೆಕ ಆವೊಡು. ಅಂಚಂಡ ಮಾತ್ರ ತುಳುಕ್ ಒಂಜಿ ಮಲ್ಲ ಶಕ್ತಿ ಬರ್ರೆ ಸಾದ್ಯ ಉಂಡು ಪಂಡೆರ್. ಇತ್ತೆದ ಅಕಾಡೆಮಿ ಮಾತೆರ್ಲ ಬಾರಿ ಎಡ್ಡೆಡ್ ಕೆಲಸ ಮಲ್ತೊಂದುಲ್ಲ, ನಿಕುಲೆಗ್ ಒವ್ವೆ ರೀತಿದ ಸಹಕಾರ ಬೋಡಿತ್ತ್ಂಡಲ ಅಕಾಡೆಮಿಗ್ ಬರೊಲಿ ಪಂಡೆರ್.
ಲೇಸ್‌ದ ಗುರ್ಕಾರ್ಲು ಜಿನ್ನಪ್ಪ ಗೌಡ ಕಂಪ ಪಾತೆರೊಂದು, ತುಳುತ ಬಗ್ಗೆ ಉಪ್ಪುನ ಕೀಳರಿಮೆ ಬುಡೊಡು, ಇಲ್ಲಲ್ ತುಳು ಬಾಸೆನ್ ಪಾತೆರೊಡು, ಜೋಕುಲೆಡ ಪಾತೆರಂದೆ ಪರಬಾಸೆಡ್ ಪಾತೆರುನೆನ್ ಉಂತವೊಡು ಪಂಡೆರ್.
ಜೈ ತುಲುನಾಡ್ (ರಿ) ಸಂಘಟನೆದ ಗುರ್ಕಾರ್ಲು ಸುದರ್ಶನ್ ಸುರತ್ಕಲ್ ಪಾತೆರೊಂದು, ಸಂಘಟನೆ ಸಾಮಾಜಿಕ ಜಾಲತಾನೊಡು ಕೆಲಸ ಮಲ್ತೊಂದುಪ್ಪುನ ಕಾಲೊರ್ದ್ ಇನಿ ಮುಟ್ಟಲ ತುಳುಕ್ ಮಾನಾದಿಗೆದ ಕೆಲಸೊಗಾದೆ ಶಕ್ತಿಮೀರ್ದ್ ಪ್ರಯತ್ನೊಲೆನ್ ಮಲ್ತೊಂದುಂಡು. ಅಕಾಡೆಮಿದೊಟ್ಟು ಸಂಘಟನೆಲ ಸಹಕಾರ ಕೊರೊಂದು ಬರೊಂದುಂಡು. ಇನಿಕಾನಗ ಸುಮಾರ್ 180 ಶಿಕ್ಷಕೆರೆನ್ ತುಳು ಲಿಪಿ ಕಲ್ಪವುನ ಸಲುವಾದ್ ತಯಾರ್ ಮಲ್ತ್‌ದ್ಂಡ್, ಕೆದಿಲ ಗ್ರಾಮೊಡುಲ ತುಳು ಲಿಪಿನ್ ಮಾತೆರ್ಲ ಕಲ್ಪೊಡು. ತುಳುಕ್ ಸರಿಯಾಯಿನ ಮಾನಾದಿಗೆ ತಿಕ್ಕೊಡು ಪ‌ಂದ್ ಕೇನೊಂಡೆರ್.

ಲೇಸ್‌ಡ್ ಶ್ರೀದೇವಿ ಸ್ಪೋರ್ಟ್ಸ್ ಕ್ಲಬ್‌ದ ಗುರ್ಕಾರ್ಲು ಮಿಥುನ್ ಪೂಜಾರಿ ಕೆರೆಕೋಡಿ ತುಳು ಲಿಪಿ ಕಲ್ಪಾದಿಲಾಯಿನ ಪೂರ್ಣಿಮಾ ಬಂಟ್ವಾಳ ಬೊಕ್ಕ ಜನಾರ್ಧನ್ ಪೆರ್ನೆ ಇತ್ತೆರ್.
ಉಮೇಶ್ ಗಾಂಧಿನಗರ ಗಣ್ಯೆರೆನ್ ಎದ್ಕೊಂಡೆರ್, ಜೈ ತುಲುನಾಡ್ (ರಿ) ಸಂಘಟನೆದ ಬೆಂಗಳೂರು ಎಗ್ಗೆದ ಗುರ್ಕಾರ್ಲಾಯಿನ ಜಯಪ್ರಸಾದ್ ತುಲುನಾಡ್ ಮಾತೆರೆಗ್ಲ ಸೊಲ್ಮೆ ಸಂದಾಯಿತ ಮಲ್ತುದ್, ಗೀತಾ ಜಯಪ್ರಸಾದ್ ಬಂದ್ಯಾನ್ ಲೇಸ್‌ನ್ ನಡಪಾದ್ ಕೊರ್ಯೆರ್.