“ಪೊಂಜೊವುಲೆನ ಗೌರವನೇ ಸಮಾಜದ ಗೌರವ” – ಶ್ರೀಚಂದ್ರಶೇಖರ ಸ್ವಾಮೀಜಿ
ಮುಲ್ಕಿ: “ಮಾತೃದೇವೋ ಭವಃ ಪಂದ್ ಅಪ್ಪೆನ್ ದೇವೆರೆನ್ ಸ್ಥಾನಡ್ ಪೂಜೆ ಮಲ್ಪುನ ಸಂಸ್ಕೃತಿ ಭಾರತೀಯ ಸಮಾಜದ ಮಹಾನ್ ಪರಂಪರೆ. ಪೊಂಜೊವುಲೆಗ್ ಗೌರವ ಕೊರ್ಪುನ ಸಮಾಜನೆ ನಿಜವಾಯಿನ ಸಾಂಸ್ಕೃತಿಕ ಸಮಾಜ. ಪೊಂಜೊವು ಕುಟುಂಬದ ಆಧಾರಸ್ತಂಭ ಮಾತ್ರ ಅತ್ತ್ ಸಮಾಜ ಕಟ್ಟುನಲ್ಪ ಪ್ರಮುಖ ಪಾತ್ರ ದೆತೊನುವಲ್ ಪಂದ್ ,” ಶ್ರೀಚಂದ್ರಶೇಖರ ಸ್ವಾಮೀಜಿ ಪಂಡೆರ್ .
ವಿಶ್ವ ಪೊಂಜುವುಲೆನ ದಿನಾಚರಣೆದ ಅಂಗವಾದ್ ನಡತಿನ ಮುಲ್ಕಿ ಶ್ರೀ ಚಂದ್ರಶೇಖರ ಸ್ವಾಮೀಜಿ ಆಶ್ರಮಡ್ ಸಾಧಕ ಪೊಂಜೊವುಲೆಗ್ ಗೌರವ ಮಲ್ಪುನ ಕಾರ್ಯಕ್ರಮಡ್ ಪಾತೆರಿನ ಸ್ವಾಮೀಜಿ , “ಪೊಂಜೊವುಲೆನ ಶಕ್ತಿನ್ ಗುರ್ತ ಮಲ್ತ್ ದ್ ಅಕುಲೆಗ್ ಶಿಕ್ಷಣ, ಉದ್ಯೋಗ ಬೊಕ್ಕ ನಾಯಕತ್ವದ ಕ್ಷೇತ್ರಡ್ ಜಾಸ್ತಿ ಅವಕಾಶನ್ ಕೊರ್ಪುನ ಮಸ್ತ್ ಅಗತ್ಯ. ಪೊಂಜೊವುಲು ಆತ್ಮವಿಶ್ವಾಸಡ್ ದುಂಬು ಬನ್ನಗ ಸಮಾಜ ಜಾಸ್ತಿ ಪ್ರಗತಿಪರವಾದ್ ಇಪ್ಪುಂಡು ” ಪಂಡೆರ್.
ಪೊಂಜೊವುಲೆನ ದಿನಾಚರಣೆ ಕೇವಲ ಒಂಜಿ ದಿನಕ್ ಆಚರಣೆ ಅತ್ತ್ ; ಪೊಂಜೊವುಲೆನ ಹಕ್ಕುಲು , ಭದ್ರತೆ, ಸಮಾನ ಅವಕಾಶಲು ಬೊಕ್ಕ ಗೌರವನ್ ಸಮಾಜದ ಪ್ರತಿಯೊಂಜಿ ಹಂತಡ್ ಖಚಿತ ಮಲ್ಪುನ ಸಂಕಲ್ಪದ ದಿನ ಆವೊಡು ಪಂದ್ ತೆರಿಪಾಯೆರ್ . “ಪೊಂಜೊವುಲೆನಮಿತ್ತ್ ಆಪುನ ಹಿಂಸಾಚಾರ, ಅಸಮಾನತೆ ಬೊಕ್ಕ ಅಜ್ಞಾನನ್ ನಿವಾರಣೆ ಮಲ್ಪರೆ ಕುಟುಂಬಡೆ ಎಡ್ಡೆ ಸಂಸ್ಕಾರ ಬೊಕ್ಕ ಶಿಕ್ಷಣನ್ ಕೊರೊಡು. ಪೊಂಜೊವುಲೆನ ತನ್ನ ಸಾಮರ್ಥ್ಯನ್ ತೆರಿಯೊಂದು ಸಮಾಜದ ನಾಯಕತ್ವಡ್ ದುಂಬು ಪೋವೊಡು ಪಂದ್ ,” ಸ್ವಾಮೀಜಿ ಪಂಡೆರ್ .
ಇದೇ ಪೊರ್ತುಡು ಮಾತೃಶ್ರೀ ಶಾರದಮ್ಮ ಗೋವಿಂದ ಭಟ್ ಸೇರ್ದ್ ಬೇತೆ ಬೇತೆ ಕ್ಷೇತ್ರಡ್ ಸಾಧನೆ ಮಲ್ತಿನ ಪೊಂಜೊವುಲೆಗ್ ಮಾನಾದಿಗೆ ಮಲ್ತ್ ಗೌರವ ಮಲ್ತೆರ್.
ಈ ಪೊರ್ತುಡು ಸೇವಾಶ್ರಮದ ನಿರ್ದೇಶಕಿ ರಜನಿ ಚಂದ್ರಶೇಖರ್, ಸಾಧಕ ಯುವ ಉದ್ಯಮಿ ರಾಹುಲ್ ಚಂದ್ರಶೇಖರ್, ನಿರ್ದೇಶಕರಾಯಿನ ರಾಘವ ಸೂರ್ಯ, ಕಾನೂನು ಸಲಹೆಗಾರರಾದ ರೋಶಿನಿ ರಾಘವ್ ಸೂರ್ಯ, ನಿವೃತ್ತ ಪೊಲೀಸ್ ಅಧಿಕಾರಿ ಜಿ. ಎ. ಭಾವ ಭದ್ರತಾದಿಕಾರಿಲಾಯಿನ ಪ್ರದೀಪ್ ಕುಮಾರ್, ಮೋಹನ್ ನಾಯ್ಕ್, ಕಿರಣ್ ಕುಮಾರ್, ಬೊಕ್ಕ ಆಶ್ರಮದ ಸಂಚಾಲಕೆರ್ ಪುನೀತ್ ಕೃಷ್ಣ ಬೊಕ್ಕ ಕೆಲವೆರ್ ಉಪಸ್ಥಿತರಿತ್ತೆರ್ .
