ಟೈಮ್ಸ್ ಆಫ್ ಕುಡ್ಲ | Times of Kudla | Kudla Tulu Patrike

Sat. Sep 19th, 2026

ಒಡಿಪು ಪುತ್ತೂರು ಬೊಲ್ತೆರ್

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಬಂಟ್ವಾಳ ಸುದ್ದಿ ರಪಕ್ಕ ಸುದ್ದಿ Flash News

ಬಂಟ್ವಾಳ : ಅಮ್ಟಾಡಿ ಶಾಲೆದ ಜೋಕುಲೆಗ್ ಕಂಡೊಡು ನೇಜಿ ನಡ್ಪಾದ್ ಬೆನ್ನಿದ ಪಾಠ

ಬಂಟ್ವಾಳ : ತಾಲೂಕುದ ಅಮ್ಟಾಡಿ ಗ್ರಾಮದ ಇನ್‌ಸ್ಟಿಟ್ಯೂಶನ್ ಆಪ್ ವಿದ್ಯಾನಿಕೇತನ ಶಾಲೆದ ಜೋಕುಲೆಗ್ ಕಂಡೊಡು ನೇಜಿ ನಡ್ಪಾದ್ ಬೆನ್ನಿದ ಪರಿಚಯ ಮಲ್ಪುನ ಲೇಸ್ ಇಂಚೊಗು ನಡತ್ಂಡ್.
ಅಪ್ಪಣ್ಣ ಬಾಳಿಗ ಎಜುಕೇಶನ್ ಟ್ರಸ್ಟ್‌ದ ವತಿರ್ದ್ ನಡಪುನ ಈ ವಿದ್ಯಾ ಸಂಸ್ಥೆದ ಜೋಕುಲು ಭಾರಿ ಆಸಕ್ತಿಡ್ ನೇಜಿ ನಡ್ದ್ ಕೃಷಿ ಮಾಹಿತಿ ಪಡೆಯೊಂಡೆರ್. ಹಿರಿಯ ಕೃಷಿಕೆರಾಯಿನ ದಯಾನಂದ ಪೆರಾಜೆ ನೇಜಿ ನಡ್ಪಿನಿ ಎಂಚ ಪಂದ್ ಜೋಕುಲೆಗ್ ಕಲ್ಪಾಯೆರ್.
ವಿದ್ಯಾಸಂಸ್ಥೆದ ಮುಖ್ಯ ಶಿಕ್ಷಕಿ, ಸಹಾಯಕ ಶಿಕ್ಷಕಿಯೆರ್ ಬೊಕ್ಕ ವಿದ್ಯಾರ್ಥಿಲು ಬೆನ್ನಿದ ಬೇಲೆಡ್ ಪಾಲ್ ಪಡೆಯೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News ಮುಲ್ಕಿ ರಾಜಕೀಯ ಸುದ್ದಿ | Political News

ಮುಲ್ಕಿ- ಮೂಡಬಿದ್ರೆ ವಿಧಾನಸಭಾ ಕ್ಷೇತ್ರದ ಕಾಂಗ್ರೆಸ್ ಪ್ರಚಾರ ಸಮಿತಿ ಅಧ್ಯಕ್ಷೆರಾದ್ ಎಚ್. ವಸಂತ ಬರ್ನಾಡ್ ನೇಮಕ

ಕಾಂಗ್ರೆಸ್ ಪಕ್ಷದ ಪ್ರಚಾರ ಸಮಿತಿದ ಅಧ್ಯಕ್ಷೆರ್, ಮಾಜಿ ಸಚಿವೆರ್ ವಿನಯ್ ಕುಮಾರ್ ಸೊರಕೆ ಮೇರ್ ಮುಲ್ಕಿ ಮೂಡಬಿದ್ರೆ ವಿಧಾನಸಭಾ ಕ್ಷೇತ್ರದ ಪ್ರಚಾರ ಸಮಿತಿ ಅಧ್ಯಕ್ಷೆರಾದ್ ಎಚ್ ವಸಂತ ಬರ್ನಾಡ್ ಮೆರೆನ್ ನೇಮಕ ಮಲ್ತ್‌ದ್ ಆದೇಶ ಕಡಪಾದೆರ್.
ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿ ಅಧ್ಯಕ್ಷೆರ್ ಬಿ ಕೆ ಹರಿಪ್ರಸಾದ್ ಮೆರೆನ ಮಾರ್ಗದರ್ಶನಂಚ ಕ್ಷೇತ್ರದ ಮಾಜಿ ಸಚಿವೆರಾಯಿನ ಕೆ. ಅಭಯ್ ಚಂದ್ರ ಜೈನ್ ಬೊಕ್ಕ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ಎಂ ರೈ, ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ಪ್ರಚಾರ ಸಮಿತಿ ಅಧ್ಯಕ್ಷೆರಾಯಿನ ಡೆನ್ನಿಸ್ ಡಿಸಿಲ್ವಾ ಮೊಕ್ಲೆನ ಶಿಫಾರಸ್‌ದ ಮಿತ್ತ್ ನನ ಬರ್ಪಿನ ಚುನಾವಣೆದ ದೃಷ್ಟಿಡ್ ಈ ನೇಮಕ ಮಲ್ದೆರ್.
ಕಾಲೇಜ್ ಜೀವನರ್ದಿಂಚಿಲ ನಾಯಕತ್ವದ ಗುಣ ಇತ್ತಿನ, ಕಾಲೇಜಿನ ವಿದ್ಯಾರ್ಥಿ ಸಂಘದ ಅಧ್ಯಕ್ಷೆರಾದ್, ಮುಲ್ಕಿ ಬ್ಲಾಕ್ ಯುವ ಕಾಂಗ್ರೆಸ್ ಕಾಂಗ್ರೆಸ್ ಕೋಶಾಧಿಕಾರಿಯಾದ್, ಜಿಲ್ಲಾ ಯುವ ಕಾಂಗ್ರೆಸ್ ಉಪಾಧ್ಯಕ್ಷೆರಾದ್ ಸುಮಾರ್ 12 ವರ್ಷ ನಿರಂತರವಾದ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿಯಾದ್, ಮಂಗಳೂರು ತಾಲೂಕು ರಾಜೀವ್ ಗಾಂಧಿ ಪಂಚಾಯತ್ ಸಂಘಟನ್ ಪ್ರಧಾನ ಕಾರ್ಯದರ್ಶಿಯಾದ್, ಕೆಪಿಸಿಸಿ ಕೋ ಆರ್ಡಿನೇಟರ್ ಆದ್, ಕುಂದಾಪುರ ಕ್ಷೇತ್ರದ ಕೋಟ ಬ್ಲಾಕ್ ಕಾಂಗ್ರೆಸ್ ಉಸ್ತುವಾರಿಯಾದ್, ಪಸ್ತುತ ಕೆಪಿಸಿಸಿ ಸದಸ್ಯೆರಾದ್ ಸೇವೆ ಮಲ್ತೊಂದುಲ್ಲೆರ್. ಅಂಚೆನೆ ರಾಜ್ಯಡ್ ನಡತಿನ ಬೇತೆ ಬೇತೆ ಕಡೆತ್ತ ಉಪ ಚುನಾವಣೆಡ್ ಸಹಾಯಕ ವೀಕ್ಷಕೆರಾದ್ ಸೇವೆ ಮಲ್ದಿನ ಅನುಭವ ಮೆರೆಗ್ ಉಂಡು.
ಮುಲ್ಕಿ ಮೂಡಬಿದ್ರೆ ಕ್ಷೇತ್ರಡ್ ನಡತಿನ ಓಟುದ ಕಂಟ್ರೋಲ್ ರೂಮ್ ಜವಾಬ್ದಾರಿನ್ ಪತೊಂದು ಚುನಾವಣೆ ಪ್ರಕ್ರಿಯೆಲೆನ್ ಸುಸೂತ್ರವಾದ್ ನಡಪಾಯಿನ ಅನುಭವ ಮೆರೆಗ್ ಉಂಡು.
ಮೆರೆಗ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್ ಬೆದ್ರ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಪ್ರವೀಣ್ ಕುಮಾರ್ ಜೈನ್ ಮೊಕುಲು ಮಾತ ಅಭಿನಂದನೆ ಸಂದಾದೆರ್.

ಊರುದ ಕೆಲಸ | Regional Jobs ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News ಸುಳ್ಯ ದ ಸುದ್ದಿ | Sullia News

ಕೋಲ್ಚಾರ್ ಮಾರ್ಗ ಕಾಮಗಾರಿಗ್ ಕೆಸರ್ ಕಲ್ಲ್ ಪಾಡಿನ ಶಾಸಕೆರ್ ಭಾಗೀರಥಿ ಮುರುಳ್ಯ

ಕೋಲ್ಚಾರ್ ಬಲ್ಯಾಡಿ ಪೋಪಿನ ಮಾರ್ಗದ ಕಾಂಕ್ರೀಟ್‌ ಆಯೆರೆ ಸುಳ್ಯ ಶಾಸಕೆರ್ ಭಾಗೀರಥಿ ಮುರುಳ್ಯ ಮೇರ್ ಬಲ್ಯಾಡಿಡ್ ಕೆಸರ್ ಕಲ್ಲ್ ಪಾಡಿಯೆರ್.

ಈ ಪೊರ್ತುಡು ಸುಳ್ಯ ತಾಲೂಕ್ ಪಂಚಾಯಿತಿ ‌ಮಾಜಿ ಅಧ್ಯಕ್ಷೆರ್ ಜಯಪ್ರಕಾಶ್ ಕುಂಚಡ್ಕ, ಸಿ.ಎ ನಿರ್ದೇಶಕೆರ್ ಚಿದಾನಂದ ಕೋಲ್ಚಾರ್, ಬಿಜೆಪಿ ಜಾಲ್ಸೂರ್ ಶಕ್ತಿ ಕೇಂದ್ರದ ಕಾರ್ಯದರ್ಶಿ ಸುದರ್ಶನ ಪಾತಿಕಲ್ಲ್, ಆಲೆಟ್ಟಿ ಪಂಚಾಯಿತಿ ಮಾಜಿ ಅಧ್ಯಕ್ಷೆರ್ ಧನಂಜಯ ಕುಂಚಡ್ಕ, ಪುರುಷೋತ್ತಮ ಕೋಲ್ಚಾರ್, ಮಾಜಿ ಉಪಾಧ್ಯಕ್ಷೆರ್ ದಿನೇಶ್ ಕಣಕ್ಕೂರ್, ಮಾಜಿ ಸದಸ್ಯೆರ್ ಸೀತಾರಾಮ ಕೊಲ್ಲರಮೂಲೆ, ಬಿಜೆಪಿ ಯುವಮೋರ್ಚಾ ತಾಲೂಕ್ ಕಾರ್ಯದರ್ಶಿ ಪ್ರದೀಪ್ ಕೊಲ್ಲರಮೂಲೆ, ಬಿಜೆಪಿ ಕೋಲ್ಚಾರ್ ಬೂತ್ ಅಧ್ಯಕ್ಷೆರ್ ಯತಿರಾಜ್ ಕೊಯಂಗಾಜೆ, ಕಾರ್ಯದರ್ಶಿ ಪ್ರಣೀತ್‌ ಕಣಕ್ಕೂರ್, ಗುತ್ತಿಗೆದಾರೆರ್ ತೀರ್ಥರಾಮ ಕುಂಚಡ್ಕ, ಗಂಗಾದರ ಬಲ್ಯಾಡಿ, ಮನೋಜ್ ಕೋಲ್ಚಾರ್, ವಾಮನ ಕೊಯಂಗಾಜೆ, ಮನೋಜ್ ಕೊಯಂಗಾಜೆ, ಗಣೇಶ್ ಕಣಕ್ಕೂರ್, ಸಿದ್ದಾರ್ಥ ಕೋಲ್ಚಾರ್, ನಿಸಾರ್ ತೋಟಕೊಚ್ಚಿ, ಇಸ್ಮಾಯಿಲ್ ತೋಟಕೊಚ್ಚಿ, ದನುಪ್ರಸಾದ್ ನಾಂಗುಳಿ, ವಾಣಿ ಬಲ್ಯಾಡಿ, ಚೆನ್ನಕೇಶವ ಬಲ್ಯಾಡಿ, ರಂಜಿತ್ ಪಾಲರ್, ರಾಜೇಶ್ ಬಲ್ಯಾಡಿ ಬೊಕ್ಕ ಮಾರ್ಗದ ಫಲಾನುಭವಿಲು, ಕಾರ್ಯಕರ್ತೆರ್ ಪಾಲ್ ಪಡೆದಿತ್ತೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಗೌಜಿ ಗಮ್ಮತ್ ದ ಸುದ್ದಿ | Events & Functions ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಜು.19: ಕಿನ್ನಿಗೋಳಿದ ತಾರಿಪಾಡಿ ಮಂಜಲ್ ಪಾದೆಡ್ ತುಲುನಾಡ ಕೆಸರ್ ದ ಗೊಬ್ಬು

ತಾರಿಪಾಡಿ ಜವನೆರೆ ಕಲ, ಪೊಂಜೋವುಲೆನ ಕಲತ್ತ ಮುತಾಲಿಕೆಡ್, ಕುಡ್ಲ ಎಗ್ಗೆದ ಜೈ ತುಲುನಾಡ್ ದ ಒಟ್ಟುಸೇರಿಗೆಡ್ ತೆಲಿಕೆ ನಲಿಕೆಡ್ ತುಲುನಾಡ ಮಣ್ಣ ಕಮ್ಮೆನ ಪಸರುನ ಗೊಬ್ಬುಕೂಟ ತುಲುನಾಡ ಕೆಸರ್ ದ ಗೊಬ್ಬು ಜು.19 ಐತಾರ ಕಿನ್ನಿಗೋಳಿದ ತಾರಿಪಾಡಿ ಮಂಜಲ್ ಪಾದೆಡ್ ನಡಪರೆ ಉಂಡು.

ಅಂಚೆನೆ ಈ ಲೇಸ್ ಡ್ ವಾಲಿಬಾಲ್, ಚೆಂಡ್ ಅಡಕ್ಕುನು (ತ್ರೋಬಾಲ್), ಬಲ್ಲ್ ಒಯಿಪುನ ಕೂಟೊದ ಪಂತೊಲು, ಲಿಂಬೆ ಚಮಚ, ಪಾಲೆ ಒಯಿಪುನು, ಕೊಪ್ಪರಿಗೆ ನಾಡುನು, ಕರ ದರ್ಪುನು, ಪಾಲೆಡ್ ಒಯಿಪುನು, ಮೂಜಿ ಕಾರಡ್ ಬಲಿಪುನು, ಪಿರ ಪಿರ ಬಲಿಪುನು, ಗಿರಿಗಿಟ್ ಬಲಿಪು, ಚೆಂಡ್ ಕೈಪಗಪುನು (ಬಾಲ್ ಪಾಸಿಂಗ್), ಬಲಿಪುನ ಪಂತೊ, ರಿಲೇ ಬೊಕ್ಕ 10 ವರ್ಷೊದ ತಿರ್ತ್ ದ ಆನ್ ಜೋಕುಲು, ಪೊಂಜೋಕುಲು ಒಟ್ಟಿಗೆ ಬಲಿಪುನು, 20 ವರ್ಷೊದ ತಿರ್ತ್ ದ ಆನ್ ಜೋಕುಲು, ಪೊಂಜೋಕುಲು ಬೇತೆ ಬೇತೆ ಬಲಿಪುನು, 20 ಮಿತ್ತ್ ದ ಆನ್ ಜೋಕುಲು, ಪೊಂಜೋಕುಲೆಗ್ ಬೇತೆ ಬೇತೆ ಬಲಿಪುನ ಪಂತೊ, ಅತ್ತಂದೆ ಉಪ್ಪು ಮುಡಿ, ತಪ್ಪಂಗಾಯಿ, ಸಬಿಸವಲ್ ತಾರಿಪಾಡಿ, ಎಳತ್ತೂರ್ ಜೈ ತುಲುನಾಡ್ (ರಿ.) ಕೂಟದಕ್ಲೆಗ್ ಮಾತ್ರ ಈ ಪಂತೊ ನಡಪರೆ ಉಂಡು.

ಈ ಲೇಸ್ ನ್ ತಾರಿಪಾಡಿ ಗುತ್ತು ನಂದಿನಿದ ಟಿ.ರಾಮಚಂದ್ರ ಎನ್ ಶೆಟ್ಟಿ ಉದಿಪನ‌ ಮಲ್ಪೆರೆ ಉಲ್ಲೆರ್. ತಾರಿಪಾಡಿ ಜವನೆರೆ ಕಲತ್ತ ಮಾರ್ಗದರ್ಶಕೆರ್ ಕುಶನ್ ಪೂಜಾರಿ ಲೇಸ್ ದ ಗುರ್ಕಾರ್ಮೆನ್ ಒಯಿಸೊನುವೆರ್. ಮಣಿಪಾಲ‌ ಒಡಿಪು ಸಮೂಹ ಶಿಕ್ಷಣ ಸಂಸ್ಥೆದ ಸಹ ಪ್ರಾಧ್ಯಾಪಕೆರ್ ಅರ್ಪಿತಾ ಪ್ರಶಾಂತ್ ಶೆಟ್ಟಿ ತುಲು ಕೊಡಿ ರಾಪಾಯೆರೆ ಉಲ್ಲೆರ್.

ಮಲ್ಲ ಬಿನ್ನೆರಾದ್ ಕಿನ್ನಿಗೋಳಿ ಪಟ್ಟಣ ಪಂಚಾಯಿತಿ ಗುರ್ಕಾರ್ಲು ಗುರುರಾಜ್ ಮಲ್ಲಿಗೆಯಂಗಡಿ, ತಾರಿಪಾಡಿ ಶ್ರೀ ಧರ್ಮ ಜಾರಂದಾಯ ಜುಮಾದಿ ಬಂಟ ದೈವಸ್ಥಾನದ ಗುರ್ಕಾರ್ಲು ಸುನಿಲ್ ಭಟ್ ತಾರಿಪಾಡಿ, ಭಾಸ್ಕರ ಶೆಟ್ಟಿ ತಾರಿಪಾಡಿ ಗುತ್ತು, ತಾಳಿಪಾಡಿ ಶ್ರೀ ಕೋರ್ದಬ್ಬು ದೈವಸ್ಥಾನದ ಗುರ್ಕಾರ್ಲು ಧನಪಾಲ ಶೆಟ್ಟಿ ತಾಳಿಪಾಡಿ ಗುತ್ತು, ನಿರ್ಮಾಪಕೆರ್, ನಟೆ ಶೋಧನ್ ಶೆಟ್ಟಿ ಪೇಟೆ ಮನೆ ಪಡ್ಡೆದ್ರ, ಪೊಂಪೆ ಪದವಿ ಕಾಲೇಜ್ ದ ಪ್ರಾಂಶುಪಾಲೆರ್ ಪುರುಷೋತ್ತಮ ಕೆವಿ, ನಾರಾಯಣ ಅಂಚನ್ ತಾರಿಪಾಡಿ,  ಜೈ ತುಲುನಾಡ್ ಕೇಂದ್ರ ಸಮಿತಿದ ಗುರ್ಕಾರ್ಲು ಅಶ್ವತ್ ತುಲುವೆ, ಮಾಜಿ ತಾಲೂಕ್ ಪಂಚಾಯಿತಿ ಪದುಕೆರ್ ದಿವಾಕರ ಕರ್ಕೇರ, ಕಿನ್ನಿಗೋಳಿ ಪಟ್ಟಣ ಪಂಚಾಯಿತಿ ಪದುಕೆರ್ ಪ್ರಣೀಕ್ ಕಿನ್ನಿಗೋಳಿ ಪಾಲ್ ಪಡೆಯೆರೆ ಉಲ್ಲೆರ್.

ಜೈ ತುಲುನಾಡ್ (ರಿ.) ಕುಡ್ಲ ಎಗ್ಗೆದ ಗುರ್ಕಾರ್ಲು ರಾಜಶ್ರೀ ಚಂದ್ರಶೇಖರ್ ತುಲುನಾಡ್, ತಾರಿಪಾಡಿ ಯುನೈಟೆಡ್ ಫ್ರೆಂಡ್ಸ್ ದ ರಾಕೇಶ್ ಸುವರ್ಣ, ತಾರಿಪಾಡಿ ಜವನೆರೆ ಕಲತ್ತ ಗುರ್ಕಾರ್ಲು ಉದಯ ಪೂಜಾರಿ, ತಾರಿಪಾಡಿ ಪೊಂಜೋವುಲೆನ ಕಲತ್ತ ಗುರ್ಕಾರ್ಲು ಮೀರಾ ಪೂಜಾರಿ ಒತ್ತು ಪಾಲ್ ಪಡೆಯೆರೆ ಉಲ್ಲೆರ್.

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಕಾಸ್ರೋಡ್ ಸುದ್ದಿ | Kasargod News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಸಿರಿಬಾಗಿಲು : ತುಳು ತಾಳಮದ್ದೊಳಿ “ಪೇರ ಕಡಲ್”

ಕಾಸ್ರೋಡು : ಸಿರಿಬಾಗಿಲು ವೆಂಕಪ್ಪಯ್ಯ ಸಾಂಸ್ಕೃತಿಕ ಪ್ರತಿಷ್ಠಾನದ ಶ್ರೀ ಕೇಶವಾನಂದ ಭಾರತಿ ಸ್ವಾಮೀಜಿ ನೆಂಪುದ ಮಂದಿರೊಡು, ವಿಶಾಲ ಯಕ್ಷ ಕಲಾ ಬಳಗ ನಂದಳಿಕೆ ಕಲಾವಿದೆರೆನ ಸೇರಿಗೆಡ್ “ಪೇರ ಕಡಲ್” ತುಳು ತಾಳಮದ್ದೊಳಿ
ಸೇವೆ ಸಂದಾಯಿತ ಆಂಡ್.
ಹಿಮ್ಮೇಳೊಡು ಗಣೇಶ ಮಯ್ಯ ವರ್ಕಾಡಿ, ವಾಸುದೇವ ಮಯ್ಯ,
ಸ್ಕಂದರಾಜ ಮಯ್ಯ ಅಂಚೆನೆ
ಅರ್ಥಗಾರಿಕೆಡ್ ಡಾ. ವಾದಿರಾಜ ಕಲ್ಲೂರಾಯ(ಶ್ರೀ ಕೃಷ್ಣ)
ಸುಬ್ರಹ್ಮಣ್ಯ ಬೈಪಾಡಿತ್ತಾಯ (ವಿದುರ) ಪಾಲ್ ಪಡೆಯೆರ್.
ಕಲಾವಿದೆ ಪ್ರೊ. ಎಂ. ಎಲ್ ಸಾಮುಗೆರ್ ಲೇಸ್‌ದ ಉದಿಪನ ಮಲ್ತೆರ್.
ಪ್ರಸಂಗ ಕರ್ತ ಡಾ. ಕಬ್ಬಿನಾಲೆ ವಸಂತ ಭಾರದ್ವಾಜ್ ಪುಗರ್ತೆದ ಪಾತೆರ ಪಂಡೆರ್.
ಬರಹಗಾರೆ ರಾಧಾಕೃಷ್ಣ ಉಳಿಯತಡ್ಕ ಕಲಾವಿದೆರೆಗ್
ಮಾನಾದಿಗೆ ಮಲ್ತೆರ್.
ಪ್ರತಿಷ್ಠಾನದ ಗುರ್ಕಾರೆ
ರಾಮಕೃಷ್ಣ ಮಯ್ಯ ಲೇಸ್‌ದ ಸುಧಾರಿಕೆ ಮಲ್ತೆರ್.

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

“ಶ್ರೀ ವಿಠೋಬ ಕ್ಷೇಮ ನಿಧಿ” ಸ್ಥಾಪನೆ, ಹಾರ್ಮೋನಿಯಂ ಕ್ಲಾಸ್‌ಗ್ ಚಾಲನೆ

ಪಂಜ ಕೊಯಿಕುಡೆ : ಶ್ರೀ ವಿಠೋಬ ಭಜನಾ ಮಂದಿರಡ್ “ಶ್ರೀ ವಿಠೋಬ ಕ್ಷೇಮ ನಿಧಿ” ಉದಿಪನ ಅಂಚೆನೆ ಹಾರ್ಮೋನಿಯಂ ಕಲ್ಪಾವುನ ಕ್ಲಾಸ್‌ಗ್ ಚಾಲನೆ ಕೊರ್ಪಿನ ಲೇಸ್ ಮಂದಿರದ ಶಾಂತಾರಾಮ ಶೆಟ್ಟಿ ಸಭಾಂಗಣಡ್ ನಡತ್ಂಡ್.
ಪಂಜ ಶ್ರೀ ಮಹಾಗಣಪತಿ ಮಂದಿರದ ಅರ್ಚಕೆರ ಸುರೇಶ್ ಭಟ್ ದೀಪ ಬೆಳಗಾದ್ ಉದಿಪನ ಮಲ್ತ್‌ದ್ ಶುಭ ಹಾರೈಕೆ ಮಲ್ತೆರ್.
ಈ ಪೊರ್ತುಡು ಶ್ರೀ ವಿಠೋಬ ಭಜನಾ ಮಂದಿರದ ಗೌರವಾಧ್ಯಕ್ಷೆರಾಯಿನ ಸದಾನಂದ ಎಮ್. ಶೆಟ್ಟಿ, ಸುಧಾಕರ್ ಎಸ್. ಪೂಂಜ, ಶ್ರೀ ಚಾಮುಂಡೇಶ್ವರಿ ಸನ್ನಿಧಿ ಪಂಜದ ಸೀತಾರಾಮ ಅಮೀನ್, ಶಿವಸಂಜೀವಿನಿ ಸುರಗಿರಿ ಅಧ್ಯಕ್ಷೆರ್ ನವೀನ್ ಭಂಡಾರಿ, ಶ್ರೀ ಶನೈಶ್ಚರ ಮಂಡಳಿ ಅಧ್ಯಕ್ಷೆರ್ ಸುರೇಶ್ ಪಂಜ ಬೊಕ್ಕ ಹಾರ್ಮೋನಿಯಂ ಗುರು ದಿನೇಶ್ ಎರ್ಮಾಳ್ ಬಿನ್ನೆರಾದ್ ಪಾಲ್ ಪಡೆಯೆರ್.
ಈ ಸಂದರ್ಭಡ್ ಸಮಾಜಸೇವಕೆರ್, ಶಿವ ಸಂಜೀವಿನಿ ಅಧ್ಯಕ್ಷೆರ್ ನವೀನ್ ಭಂಡಾರಿ ಮೆರೆನ್ ಸನ್ಮಾನ ಮಲ್ತೆರ್.
ಉಂದುವೇ ಪೊರ್ತುಡು ಅಂಚೆ ಇಲಾಖೆದ ಅಧಿಕಾರಿಲು ಸಾರ್ವಜನಿಕೆರೆಗ್ ಅಗತ್ಯವಾಯಿನ ಆರೋಗ್ಯ ವಿಮೆತ್ತ ಬಗೆಟ್ ಮಾಹಿತಿ ಕೊರಿಯೆರ್.
ಶ್ರೀ ವಿಠೋಬ ಭಜನಾ ಮಂಡಳಿದ ಅಧ್ಯಕ್ಷೆರ್ ಭರತ್ ರಾಜ್ ಶೆಟ್ಟಿ ಸ್ವಾಗತ ಮಲ್ತೆರ್. ಭಜನಾ ಸಂಚಾಲಕೆರಾಯಿನ ಸತೀಶ್ ಎಂ. ಶೆಟ್ಟಿ ಬೈಲಗುತ್ತು ಲೇಸ್‌ ಸುದಾರಿಕೆ ಮಲ್ತೆರ್. ಕೋಶಾಧಿಕಾರಿ ಪದ್ಮನಾಭ ಪೂಜಾರಿ ಧನ್ಯವಾದ ಕೊರಿಯೆರ್. ಕಾರ್ಯದರ್ಶಿ ಅವಿನಾಶ್ ಶೆಟ್ಟಿ ಬೊಕ್ಕ ಸರ್ವ ಸದಸ್ಯೆರ್, ಮಹಿಳಾ ಸಮಿತಿದಕುಲು, ಹಾರ್ಮೋನಿಯಂ ಕಲ್ಪುನಕುಲು ಪಾಲ್ ಪಡೆದಿತ್ತೆರ್.

ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಪುತ್ತೂರ್ದ ಸುದ್ದಿ | Puttur News

ವಿಟ್ಲ ಹನುಮಗಿರಿ ಶ್ರೀ ರಾಮ ಮಂದಿರಡ್ ಶ್ರೀ ರಾಮೋಚ್ಚಯ

ವಿಟ್ಲ ಹನುಮಗಿರಿ ಶ್ರೀ ರಾಮ ಮಂದಿರಡ್ ಕೊಪ್ಪ ಕೃಷ್ಣ ಪ್ರಸಾದ್ ಮುತಾಲಿಕೆಡ್ ಶ್ರೀ ರಾಮೋಚ್ಚಯ ನಡತ್ಂಡ್.

ವಿಟ್ಲ ಜಿಎಸ್ ಬಿ ಸಮಾಜದ ಅಧ್ಯಕ್ಷೆರ್ ಸುಭಾಶ್ ಚಂದ್ರ ನಾಯಕ್, ರಾಧಾಕೃಷ್ಣ ಪೈ, ನರೇಂದ್ರ ಶೆಣೈ, ವಿಕಾಸ್ ಅರ್ಗೋಡ್, ಮಂಜುನಾಥ ಪೈ, ಶ್ರೀಧರ್ ಪೈ, ಪ್ರದೀಪ್ ಭಟ್, ಮುರಳೀಧರ ಭಟ್, ರಾಘವೇಂದ್ರ ಪೈ ಪಾಲ್ ಪಡೆದಿತ್ತೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News

“ಪರಮ‌” ಪಾದ ಸೇರಿನ ಪರಮಾನಂದ ಸಾಲ್ಯಾನ್

ಉಡಲ್‌ದ ಬೇನೆನ್ ದಿಂಗೊಂಡೆರ್..ಮನಸ್‌ನ್ ಕಡಲ್ ಮಲ್ತೊಂಡೆರ್…

ಅವು ಅರೆನ ಮರಣದ ಪ್ರಾಯ ಅತ್ತ್. 64 ವರ್ಷ ಪ್ರಾಯ ಕರಿನಾತೆ. ಆಂಡ ಅನಾರೋಗ್ಯ ಪನ್ಪಿನವು ಬೆರಿ ಬುಡಂದಿನ ಕಾರಣೊಗು ಇನಿಕ್ಕಾನಗ ಆರ್ ದೇವೆರೆನ ಪಾದ ಸೇರಿಯೆರ್…!
ಅಂದ್ ಹಿರಿಯ ಪತ್ರಕರ್ತೆ, ರಂಗ ನಿರ್ದೇಶಕೆರ್, ಸಾಂಸ್ಕೃತಿಕ ಲೋಕದ ರಾಯಭಾರಿ ಪರಮಾನಂದ ವಿ. ಸಾಲ್ಯಾನ್ (ಜನನ 25-1-1962) ಮೇರ್ ಜುಲೈ 13 ಸೋಮವಾರ ಜಾಮಂದ ಪೊರ್ತುಡು ದೇವೆರೆ ಪಾದ ಸೇರಿಯೆರ್. ಆರ್ ನನ ನಮಕ್ಕ್ ನೆಂಪು ಮಾತ್ರ.
ಸಾಧಾರಣ 2 ವರ್ಷರ್ದಿಂಚಿ ಅನಾರೋಗ್ಯ ಇತ್ತ್ಂಡಲ, ಅರೆನ “ವಿಲ್ ಪವರ್” ಇದಮುಟ್ಟ ಅರೆನ್ ಬದ್‌ಕಾದ್ಂಡ್ಂದೇ ಪನೊಲಿ. “ಉಡಲ್‌ದ ಬೇನೆನ್ ದಿಂಗೊಂಡೆರ್ … ಮನಸ್‌ನ್ ಕಡಲ್ ಮಲ್ತೊಂಡೆರ್…” ಪನ್ಪಿನ ಅರೆನನೇ ಒಂಜಿ ಗೀತಾ ನಾಟಕದ ಪದತ್ತ ಸಾಲ್‌ದ ಲೆಕ ಅರೆನ ಬೇನೆನ್ ಮನಸ್‌ಡೇ ದೀವೊಂದು ಗಟ್ಟಿ ಮನಸ್ ಮಲ್ದಿತ್ತೆರ್. ಬೊಡೆದಿಗ್‌, ಮಗಕ್ಕ್‌ ಬೊಕ್ಕ ಕುಟುಂಬದಕ್ಲೆಗ್ ಧೈರ್ಯ ಪನೊಂದಿತ್ತೆರ್.
ಸಸಿಹಿತ್ಲು ಶ್ರೀ ಸಾರಂತಾಯ ಗರೊಡಿ ಉಳ್ಳಾಯ ದೈವಸ್ಥಾನದ ಜೀರ್ಣೋದ್ಧಾರ ಸಮಿತಿದ ಕಾರ್ಯಾಧ್ಯಕ್ಷೆರಾದ್ ಸಕ್ರಿಯವಾದ್ ಬೇಲೆ ಮಲ್ತ್‌ದ್ ಬ್ರಹ್ಮಕಲಶೋತ್ಸವದ ಸಂದರ್ಭಡ್ ಕುಡ ಅಸೌಖ್ಯ ಇತ್ತ್ಂಡಲ ಶ್ರೀ ಉಳ್ಳಾಯ ದೇವೆರೆನೇ ಸದಾ ನೆನೆತೊಂದಿತ್ತೆರ್. ಸಸಿಬಿತ್ತ್‌ಲ್ದ ಸಿರಿ ಭಗವತಿ ಅಪ್ಪೆನ್ ದಿನಲ ಸುಗಿತೊಂದಿತ್ತೆರ್. ಅಕುಲೇ ಎನ್ನ ಶಕ್ತಿ, ಭಕ್ತಿ, ಪ್ರೀತಿ ಪಂದ್ ಎನ್ನ್‌ದಿನಾರ್ ಪರಮಾನಂದ ಸಾಲ್ಯಾನ್.
ಪತ್ರಿಕಾ ರಂಗದ ವಿಚಾರೊಡು ಬನ್ನಗ ಮುಂಗಾರು, ಹೊಸದಿಗಂತ ಪತ್ರಿಕೆಗ್ ತನ್ನ ಕ್ರೀಡಾ ವರದಿಗಾರಿಕೆಡ್ ಪುದರ್ ಕನದಿನಾರ್. “ಅಜೇಯ” ಪನ್ಪಿನ ಪತ್ರಿಕೆದ ಸಂಪಾದಕೆರಾದ್ ಅವೆನ್ ಕೆಲವು ವರ್ಷ ನಡಪಾದೆರ್. ಕಡೆ ಕಾಲ ಮುಟ್ಟಲ ಪರಮ ಸತ್ಯ ಪನ್ಪಿನ ಅಂಕಣ ಬರೆದ್ ತನ್ನ ಬರವುದ ತಾಕತ್ತ್‌ನ್ ತೊಜಪಾದಿನಾರ್.
ವಿಜಯಕುಮಾರ್ ಕೊಡಿಯಾಲ್ ಬೈಲ್‌ರೆನ “ಶಿವದೂತೆ ಗುಳಿಗೆ” ನಾಟಕದ ಸಂಭಾಷಣೆ ಅರೆಗ್ ಮಲ್ಲ ಪುದರ್‌ನ್ ಕನತ್ ಕೊರುಂಡು. ಅವೆರ್ದ್ ಪರಮ ಪದ್ಮ ಕಲಾವಿದರು ಕೂಟನ್ ಪುಟ್ಟುಪಾಡ್ದ್ ” ಶಿವ ಪುರ್ಸಾದ ಬೊಬ್ಬರ್ಯೆ” ನಾಟಕ ರಚನೆ, ನಿರ್ದೇಶನ ಮಲ್ತ್‌ದ್ ಪ್ರದರ್ಶನ ಕೊರಿಯೆರ್.
ಮಸ್ತ್ ವರ್ಷದ ಪಿರವುಡು ಸಸಿಹಿತ್ಲು ಡು ತನ್ನ ಕರಿದ್ ಪೋಯಿನ ಅರುವತ್ತೆ, ಕಲಾವಿದೆ ಸುದರ್ಶನ್‌ನ ನೆಂಪುಗಾದ್ ರಂಗ ಸುದರ್ಶನ (ರಿ) ಪನ್ಪಿನ ಕಲಾ ಕೂಟ ಕಟ್‌ದ್ ಊರುಡು ಮಾತ್ರ ಅತ್ತಾಂದೆ ಬೊಂಬೈ, ಬೆಂಗಳೂರು, ದುಬೈ, ಕುವೈತ್, ಮಸ್ಕತ್ ಇಂಚ ಪಿದಯಿ ದೇಶೊಡ್ಲ ರಂಗ ಪ್ರದರ್ಶನ ಮಲ್ತ್‌ದ್ ತುಳುನಾಡ ಮಣ್ಣ್‌ದ ಸಾಂಸ್ಕೃತಿಕ ವೈಭವೊನು ಜಗತ್ತ್‌ಗ್ ಪಸೆರ್‌ದೆರ್. ಅವೇತೋ ಯುವ ಕಲಾವಿದೆರೆನ್ ತಯಾರ್ ಮಲ್ದೆರ್. ಸಸಿಹಿತ್ಲು ಶ್ರೀ ಭಗವತೀ ದೇವಸ್ಥಾನದ ಆವರಣೊಡು ಪ್ರತಿವರ್ಷ ಅಸ್ಟೆಮಿದಾನಿ ಸಾಂಪ್ರದಾಯಿಕವಾದ್ ನಡತೊಂದಿತ್ತಿನ ಮಸುಲುಡಿಕೆಗ್ (ಮೊಸರುಕುಡಿಕೆ) ಪೊಸ ದೇಖಿದ ರೂಪಕೊಲೆನ್ ಬರೆದ್ ನಿರ್ದೇಶನ ಮಲ್ತ್‌ದ್ ಪೊಸ ರಂಗ್ ಕೊರ್ತಿನಾರ್ ಪರಮಾನಂದ ಸಾಲ್ಯಾನ್.
ಇಂಚಿತ್ತಿನ ಬಹುಮುಖ ಪ್ರತಿಭೆ, ತುಳು ಬಾಸೆದ ಪ್ರೇಮಿ ಆದಿತ್ತಿನ ಪರಮಾನಂದ ಸಾಲ್ಯಾನ್‌ರೆನ ಆತ್ಮೊಗು ಸದ್ಗತಿ ತಿಕ್ಕಡ್ ಪಂದ್ “ಟೈಮ್ಸ್ ಆಫ್ ಕುಡ್ಲ” ಪತ್ರಿಕೆದ ಪರವಾದ್ ದೇವೆರೆ‌ಡ ಪ್ರಾರ್ಥನೆ ಮಲ್ಪುವ.

ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಬಂಟ್ವಾಳ ಸುದ್ದಿ ರಪಕ್ಕ ಸುದ್ದಿ Flash News

ಶ್ರೀ ಕ್ಷೇತ್ರ ಅರ್ಕುಳಡ್ ಸಮೃದ್ಧಿ ಸಂಕಲ್ಪ ಸಭೆ

ಭಕ್ತಿ, ಸಾಮೂಹಿಕ ಜಬದಾರಿರ್ದ್ ಕ್ಷೇತ್ರದ ಅಭಿವೃದ್ಧಿ ಸಾಧ್ಯ: ಜಿಲ್ಲಾಧ್ಯಕ್ಷೆರ್ ತೇವು ತಾರಾನಾಥ ಕೊಟ್ಟಾರಿ

ದೈವಸ್ಥಾನಲೆನ ಪುನರ್ನವೀಕರಣ ಕೇವಲ ನಿರ್ಮಾಣ ಯೋಜನೆ ಅತ್ತ್; ಅವು ನಮ್ಮ ಭಕ್ತಿ, ಪರಂಪರೆ ಬೊಕ್ಕ ಸಾಮೂಹಿಕ ಜಬದಾರಿದ ಪ್ರತೀಕ ಆತ್ಂಡ್. ಇಡೇ ಮುಟ್ಟ ಎಂಚ ಭಕ್ತೆರೆನ ಪ್ರೀತಿ, ವಿಶ್ವಾಸ ಬೊಕ್ಕ ಉದಾರ ಸಹಕಾರರ್ದ್ ಕ್ಷೇತ್ರ ಅಭಿವೃದ್ಧಿದ ಪಥಡ್ ಪೋತ್ಂಡ್, ಅವ್ವೇ ರೀತಿ ನನದ ಯೋಜನೆಲು ನಮ ಮಾತೆರೆರ್ನಾಲ ಮುತಾಲಿಕೆಡ್ ಯಶಸ್ವಿ‌ ಆಯೆರೆ ಉಂಡು ಪನ್ಪಿನ ದೃಢ ವಿಶ್ವಾಸ ನಮ್ಮ ಆತ್ಂಡ್ ಪಂದ್ ಸಂಸ್ಕಾರ ಭಾರತೀಯ ದಕ್ಷಿಣ ಕನ್ನಡ ಜಿಲ್ಲಾಧ್ಯಕ್ಷೆರ್ ತೇವು ತಾರಾನಾಥ ಕೊಟ್ಟಾರಿ ಮೇರ್ ಮಲ್ಲ ಬಿನ್ನೆರಾದ್ ಪಾತೆರಿಯೆರ್.

ಅರ್ಕುಳ ಬೂಡುಡು ಇಂಚಿಪ್ಪ ನಡತಿನ “ಕ್ಷೇತ್ರ ಸಮೃದ್ಧಿ ಸಂಕಲ್ಪ ಸಭೆ” ಟ್ಟ್ ಸಾಮೂಹಿಕ ಪ್ರಾರ್ತನೆದ ಬೊಕ್ಕ ರಥ ಗೋಪುರ, ಸುತ್ತು ಪೌಳಿದ ವಿನ್ಯಾಸ ನಕ್ಷೆನ್ ಅನಾವರಣ ಮಲ್ತ್ ದ್ ಪಾತೆರಿಯೆರ್.

ನಮ್ಮ ಹಿರಿಯಕುಲು ಅಪಾರ ಶ್ರದ್ಧೆ, ತ್ಯಾಗ ಬೊಕ್ಕ ಸೇವಾಭಾವರ್ದ್ ಈ ಪವಿತ್ರ ಕ್ಷೇತ್ರನ್ ಒರಿಪಾದ್ ಬುಲೆಪಾದೆರ್. ಮೆರೆನ ಪರಿಶ್ರಮದ ಫಲವಾದ್ ಇನಿ ನಮ ಈ ದಿವ್ಯ ಸನ್ನಿಧಿಡ್ ಒಂಜಾಪುನ ಭಾಗ್ಯನ್ ಪಡೆತ. ಇತ್ತೆ ಈ ಪರಂಪರೆನ್ ನನಾತ್ ಸಮೃದ್ಧ ಮಲ್ಪೆರೆ ನನದ ಪೀಳಿಗೆಗ್ ಹಸ್ತಾಂತ ಮಲ್ಪುನ ಜಬದಾರಿ ನಮ್ಮ ಮಾತೆರ್ನಾಲ ಮಿತ್ತ್ ಉಂಡು ಪಂದ್ ಪ್ರಾಸ್ತವಿಕವಾದ್ ಡಾ.ಜಯಕುಮಾರ ಶೆಟ್ಟಿ ಮೇರ್ ಪಂಡೆರ್.

ಅರ್ಕುಳ ಬೂಡು ವಜ್ರನಾಭ ಶೆಟ್ಟಿ ಮೇರ್ ಸಭೆತ್ತ ಅಧ್ಯಕ್ಷತೆನ್ ಒಯಿಸೊಂದು ಪಾತೆರ್ದ್, ಇನಿ ನಮ ದೆತೊನ್ನ ಸಂಕಲ್ಪ ಕೇವಲ ಭೌತಿಕ ಅಭಿವೃದ್ಧಿದ ಸಂಕಲ್ಪ ಅತ್ತ್; ಉಂದು ಧರ್ಮ, ಸಂಸ್ಕೃತಿ, ಪರಂಪರೆ ಬೊಕ್ಕ ಹಿರಿಯಕುಲು ನಮಕ್ ಕೊರ್ನ ಅಮೂಲ್ಯ ಪರಂಪರೆನ್ ಒರಿಪಾದ್ ಬುಲೆಪಾವುನ ಸಂಕಲ್ಪ ಆತ್ಂಡ್ ಪಂದ್ ತೆರಿಪಾದೆರ್.

ಲೇಸ್ ಡ್ ಪೊಳಲಿ ರಾಜರಾಜೇಶ್ವರಿ ದೇವಸ್ಥಾನದ ಆಡಳಿತ ಟ್ರಸ್ಟಿಲು ಡಾ.ಮಂಜಯ್ಯ ಶೆಟ್ಟಿ, ಕಂಪ ಸದಾನಂದ ಆಳ್ವ, ಶಿವಪ್ಪ ಸುವರ್ಣ, ಮೇರಮಜಲ್ ಗುತ್ತು ನಾಗಪ್ಪ ಶೆಟ್ಟಿ, ಗೋವಿಂದ ಶೆಣೈ, ಕೃಷ್ಣಕುಮಾರ‌ ಪೂಂಜ, ಚಂದ್ರಶೇಖರ ಗಾಂಭೀರ, ಉಮೇಶ್ ಶೆಟ್ಟಿ ಬರ್ಕೆ, ಮನೋಜ್ ಉಳಿದೊಟ್ಟು, ಲೋಕಯ್ಯ ಪೂಜಾರಿ, ದಾಮೋದರ ಶೆಣೈ, ಅಬ್ಬೆಟ್ಟು ಗಂಗಾಧರ ಕೋಟ್ಯಾನ್, ಅಬ್ಬೆಟ್ಟು ಜಯರಾಮ ಶೆಟ್ಟಿ ಪಾಲ್ ಪಡೆದಿತ್ತೆರ್.

ತುಪ್ಪೆಕಲ್ಲ್ ನಾಗರಾಜ ಶೆಟ್ಟಿ ಬೊಕ್ಕ ಮಂಟಮೆ ದಿನಕರ ಕರ್ಕೇರ ಲೇಸ್ ನ್ ಸುಧಾರಿಕೆ ಮಲ್ತೆರ್. ಮನೋಜ್‌ ಬಂಗೇರಾ ಸೊಲ್ಮೆ ಸಂದಾಯೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಮುಲ್ಕಿ

ಸಾಹಿತಿ, ಪತ್ರಕರ್ತೆರ್ ಚಿದಂಬರ ಬೈಕಂಪಾಡಿ ಮೆರೆಗ್ ಕೊ.ಅ. ಉಡುಪ ಪ್ರಶಸ್ತಿ

ಕಿನ್ನಿಗೋಳಿ: ಯುಗಪುರುಷ ಸಂಸ್ಥಾಪಕೆರ್ ದಿ| ಕೊ.ಅ. ಉಡುಪೆರೆನ ನೆಂಪುಗಾದ್ ಪ್ರತಿ ವರ್ಷ ಗೌರವಪೂರ್ವಕವಾದ್ ಕೊರ್ಪಿನ ಕೊ.ಅ.ಉಡುಪ ಪ್ರಶಸ್ತಿನ್ ಈ ಸರ್ತಿ ಸಾಹಿತಿ, ಪತ್ರಕರ್ತೆರ್ ಚಿದಂಬರ ಬೈಕಂಪಾಡಿ ಮೆರೆಗ್ ಕೊರಿಯೆರೆ ಉಂಡು.

ಪ್ರತಿಭಾವಂತ ಕವಿಯಾದ್, ಸಾಹಿತಿಯಾದ್, ಪತ್ರಕರ್ತೆರಾದ್ ಸಮಾಜಡ್ ಗುರುತಿಸಾಯಿನ ಚಿದಂಬರ ಬೈಕಂಪಾಡಿ ಮೇರ್ ಸುಮಾರ್ ವರ್ಷ ಪತ್ರಿಕೋದ್ಯಮ ಕ್ಷೇತ್ರಡ್ ಸೇವೆ ಸಂದಾದೆರ್. 8 ಕೃತಿನ್ ರಚನೆ ಮಲ್ತ್ ದ್, ಸಾಹಿತ್ಯ ಲೋಕಗ್ ಅರ್ಪಣೆ ಮಲ್ದೆರ್.

ದ.ಕ.ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಪ್ರಧಾನ ಕಾರ್ಯದರ್ಶಿಯಾದ್, ಕರ್ನಾಟಕ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ರಾಜ್ಯ ಸಮಿತಿ ಸದಸ್ಯೆರಾದ್, ದ.ಕ.ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಕಟ್ವಾನ ಸಮಿತಿದ ಕಾರ್ಯದರ್ಶಿಯಾದ್, ಸರ್ಕಾರಿ ಲೇಡಿಗೋಷನ್ ಆಸ್ಪತ್ರೆದ ಸಲಹಾ ಸಮಿತಿದ ಸದಸ್ಯೆರಾದ್, ಕುಡ್ಲ ವಿಶ್ವವಿದ್ಯಾನಿಲಯದ ಸೆನೆಟ್ ಸದಸ್ಯೆರಾದ್, ಕುಡ್ಲ ವಿವಿ ಪತ್ರಿಕೋದ್ಯಮ ವಿಭಾಗದ ಸಂದರ್ಶಕೆರಾದ್, ಪ್ರಾಧ್ಯಾಪಕೆರಾದ್ ಸೇವೆ ಸಂದಾದೆರ್. ಕರ್ನಾಟಕ ಸಂಘದ ಕನ್ನಡ ಅಭಿವೃದ್ಧಿ ಸಮಿತಿದ ಬೊಕ್ಕ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆರಾತೆರ್.

ಚಿದಂಬರ ಬೈಕಂಪಾಡಿ ಮೆರೆಗ್ ದ.ಕ. ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, ಕರ್ನಾಟಕ ಪತ್ರಕರ್ತೆರೆನ ಸಂಘದ ಅತ್ಯುತ್ತಮ ತನಿಖಾ ವರದಿಗಾರೆ ಪ್ರಶಸ್ತಿ, ಅಖಿಲಭಾರತ ಆಕಾಶವಾಣಿ ವರ್ಷೊದ ಪ್ರಶಸ್ತಿ, ಬನ್ನಂಜೆ ರಾಮಾಚಾರ್ಯ ಪತ್ರಿಕೋದ್ಯಮ ಪ್ರಶಸ್ತಿ, ಇನ್‌ಲ್ಯಾಂಡ್ ಪ್ರಶಸ್ತಿ, ಕರ್ನಾಟಕ ಮಾಧ್ಯಮ ಅಕಾಡೆಮಿ ವರ್ಷೊದ ಪ್ರಶಸ್ತಿ, ಕೋಟ ಶಿವರಾಮ ಕಾರಂತ ಪ್ರಶಸ್ತಿ, ಪಟ್ಲ ಪ್ರಶಸ್ತಿ, ನಿಟ್ಟೆ ಯುನಿವರ್ಸಿಟಿ ಮಾಧ್ಯಮ ಪ್ರಶಸ್ತಿದೊಟ್ಟಿಗೆ ಸುಮಾರ್ ಪ್ರಶಸ್ತಿ ತಿಕ್ ದ್ಂಡ್.

ಕರಿನ ಸರ್ತಿದ ದ.ಕ. ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷತೆನ್ ಒಯಿಸೊಂದಿತ್ತೆರ್. ಕೊ.ಅ. ಉಡುಪ ಪ್ರಶಸ್ತಿನ್ ಉಂದುವೇ ಜುಲೈ 24ಕ್ಕ್ ಕಿನ್ನಿಗೋಳಿ ಯುಗಪುರುಷ ಸಭಾಭವನಡ್ ನಡಪರೆ ಇಪ್ಪುನ ಲೇಸ್ ಡ್ 10,000/- ರೂ. ನಗದು, ಗೌರವ ಫಲಕ, ಪ್ರಶಸ್ತಿ ಪತ್ರದೊಟ್ಟಿಗೆ ಪ್ರಧಾನ ಮಲ್ಪೆರೆ ಉಂಡು ಪಂದ್ ಯುಗಪುರುಷದ ಪ್ರಧಾನ ಸಂಪಾದಕೆರ್ ಕೊಡೆತ್ತೂರು ಭುವನಾಭಿರಾಮ ಉಡುಪೆರ್ ತೆರಿಪಾಯೆರ್.

You Missed

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಮಂಗಳೂರು ಜಿಲ್ಲೆ ಪುದರ್ ಬದಲಾವಣೆಗ್ ಪರಿಶೀಲನೆ

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಕರಾವಳಿ ಜಿಲ್ಲೆ ಅಭಿವೃದ್ಧಿಗ್ 32,612 ಕೋಟಿ ರೂ. ಪ್ಯಾಕೇಜ್

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ತುಳು ರಾಜ್ಯದ 2 ನೇ ಅಧಿಕೃತ ಬಾಸೆ

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

“ಟಾಸ್” ಪಿಚ್ಚರ್ ರಾಜ್ಯಾದ್ಯಂತ ಬಿಡುಗಡೆ

Copyright © All rights reserved - The Times of Kudla Mangalore | Paper News by Themeansar.