ಒಡಿಪು: ಹಿಂದೂ ಪದತ್ತ ವಿಚಾರೊಡು ವಿವಾದಾಸ್ಪದ ಪಾತೆರ ಪನ್ತಿನ ಕೆಪಿಸಿಸಿ ಕಾರ್ಯಾಧ್ಯಕ್ಷೆರ್ ಸತೀಶ್ ಜಾರಕಿಹೊಳಿನ ವಿರುದ್ಧ ಇನಿ ಉಡುಪಿ ಜಿಲ್ಲಾ ಬಿಜೆಪಿ ಕಚೇರಿದ ಕೈತಲ್ ಪ್ರತಿಭಟನೆ ನಡತ್ಂಡ್.
ಈ ಪೊರ್ತುಡು ಒಡಿಪು ಶಾಸಕೆರ್ ಕೆ.ರಘುಪತಿ ಭಟ್, ಬಿಜೆಪಿ ಜಿಲ್ಲಾ ಅಧ್ಯಕ್ಷೆರ್ ಸುರೇಶ್ ನಾಯಕ್ ಕುಯಿಲಾಡಿ, ಮುಖಂಡೆರಾಯಿನ ಉದಯ ಕುಮಾರ್ ಶೆಟ್ಟಿ, ದಿನಕರ ಬಾಬು, ವೀಣಾ ಶೆಟ್ಟಿ, ರಾಘವೇಂದ್ರ ಕಿಣಿ, ಮಹೇಶ್ ಠಾಕೂರ್, ಒಡಿಪು ನಗರಸಭೆ ಅಧ್ಯಕ್ಷೆರ್ ಸುಮಿತ್ರಾ ಆರ್. ನಾಯಕ್ ಇತ್ತೆರ್.
ಅಮೆರಿಕ: ಮೇರಿಲ್ಯಾಂಡ್ ಲೆಫ್ಟಿನೆಂಟ್ ಗವರ್ನರ್ ಆದ್ ಭಾರತ ಮೂಲದ ಅಮೆರಿಕನ್ ಪ್ರಜೆ ಅರುಣಾ ಮಿಲ್ಲರ್ ಆಯ್ಕೆ ಆತೆರ್.
ಮಾಜಿ ಪ್ರತಿನಿಧಿ ಡೆಮಾಕ್ರೆಟಿಕ್ ಗವರ್ನರ್ ದ ಚುನಾಯಿತೆರ್ ವೆಸ್‌ ಮೂರ್ ನ ವಿರುದ್ದ ಸ್ಪರ್ಧೆ ಮಲ್ತಿನ ಮೆರೆಗ್ ಅಮೆರಿಕಾ ಅಧ್ಯಕ್ಷೆರ್ ಜೋ ಬೈಡೆನ್ ಬೊಕ್ಕ ಉಪಾಧ್ಯಕ್ಷೆರ್ ಕಮಲಾ ಹ್ಯಾರಿಸ್ ರಡ್ಡ್ ಜನಲ ಪ್ರಚಾರದ ಪೊರ್ತುಡು ಬೆಂಬಲ ಕೊರ್ತೆರ್.
ಇಡ್ಕಿದು: ರಜತಾದ್ರಿ ಮುಂಡ್ರಬೈಲ್ ಶ್ರೀ ಆದಿಶಕ್ತಿ ಚಾಮುಂಡೇಶ್ವರಿ ದೇವಲ್ಯಡ್ ಪ್ರತಿಷ್ಠಾ ವಾರ್ಷಿಕೋತ್ಸವ ನ.12 ರ್ದ್ ನ.14 ಮುಟ್ಟ ನಡಪರೆ ಉಂಡು.
ನ.12 ಕ್ ಬಯ್ಯಗ್ 6 ಗಂಟೆಗ್ ದುರ್ಗಾ ನಮಸ್ಕಾರ ಪೂಜೆ, ಕೈತಲ್ದಕ್ಲೆರ್ದ್ ಸಾಂಸ್ಕೃತಿಕ ಲೇಸ್ ಬೊಕ್ಕ ಉಳ್ಳಾಲ್ತಿ ದುರ್ಗಾಪರಮೇಶ್ವರಿ ಕೃಪಾಪೋಷಿತ ಯಕ್ಷಗಾನ ಮಂಡಳಿ (ರಿ.) ಅಂಗ್ರಿ, ಕನ್ಯಾನ ಮೊಕ್ಲೆರ್ದ್ ರಂಗಚಕ್ರವರ್ತಿ ಸುಬ್ಬು ಸಂಟ್ಯಾರ್ ವಿರಚಿತದ ಅಜ್ಜನ ಪಜ್ಜೆ ತುಳು ಆಟ ನಡಪರೆ ಉಂಡು. ನೆಕ್ಕ್ ಬಿನ್ನೆರಾಯಿನ ರಂಗ್ ದ ರಾಜೆ ಸುಂದರ್ ರೈ ಮಂದಾರ ಕಲಾವಿದೆರಾದ್ ಬರ್ಯೆರೆ ಉಲ್ಲೆರ್. ನ.13ಕ್ ಬೊಲ್ಪುಗು 6 ಗಂಟೆರ್ದ್ ಗಣಹೋಮ, ನಾಗತಂಬಿಲ,ನವಕಲಶ, ಬೊಕ್ಕ ಚಂಡಿಕಾ ಹವನ ಸುರು ಆದ್ 11:30ಕ್ ಮುಗಿಪುಂಡು. ಬೊಕ್ಕ ಮಹಾಪೂಜೆ, ಪ್ರಸಾದ, ಅನ್ನಸಂತರ್ಪಣೆ, ಆಯಿರ್ದ್ ಬೊಕ್ಕ ದೈವದ ಭಂಡಾರ ಜಪ್ಪರೆ ಉಂಡು. ಬೊಕ್ಕ ಕಲ್ಲುರ್ಟಿ, ಪಟ್ಟದ ಪಂಜುರ್ಲಿ, ಗುಳಿಗಗ್ ನೇಮ ನಡಪುಂಡು.
ನ.14 ಕ್ ಬೊಲ್ಪುಗು 10:30ಕ್ ಶ್ರೀ ದೇವಿಗ್ ಇಸೇಸ ಮಹಾಪೂಜೆ, ದೈವಲೆಗ್ ವಾರ್ಷಿಕ ತಂಬಿಲ, ಗುಳಿಗಗ್ ಕೋರಿ ಕೊರ್ಯೆರೆ ಉಂಡು. ರಾತ್ರೆ 8 ಗಂಟೆಗ್ ಕಲ್ಲುರ್ಟಿ ಅಗೆಲ್ ನಡಪುಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಮುಲ್ಕಿ: ಜವನೆಡನ ಕೂಟಸಕುಲು ಪಗೆಲ್ ಡ್ ಬೇಲೆ ಮುಗಿತ್ ದ್ ರಾತ್ರೆದ ಪೊರ್ತುಡು ಸಮಾಜ ಸೇವೆ ರೂಪಡ್ ಮಾರ್ಗದ ಗುಂಡಿಲೆನ್ ಸ್ವಂತ ಖರ್ಚಿರ್ದ್ ಕಾಂಕ್ರೀಟ್ ಪಾಡ್ದ್ ಮುಚ್ಚುನ ಬೇಲೆ ಮಲ್ತೊಂದುಲ್ಲೆರ್.
ಮುಲ್ಕಿ ಎಚ್ ಡಿಎಫ್ ಸಿ ಬ್ಯಾಂಕ್ ಶಾಖೆದ ಎದುರು ಇತ್ತಿನ ಮಲ್ಲ ಗುಂಡಿನ್ ರಾತ್ರೆ ಸುರಭಿ ಇಲೆಕ್ಟ್ರಾನಿಕ್ಸ್ ಸಿಬ್ಬಂದಿ ಸುಪ್ರೀತಾ ಪಿ ಬೊಕ್ಕ ಸಂಬಂಧಿಕೆರಾಯಿನ ಸಚಿನ್ ಪುನರೂರ್, ನರೇಶ್ ಪುನರೂರ್, ಮೊಕುಲು ರಮೇಶ್ ಮೆರೆನ ಒಟ್ಟಿಗೆ ಸೇರ್ದ್ ಜಲ್ಲಿ ಬೊಕ್ಕ ಸಿಮೆಂಟ್ ಪಾಡ್ದ್ ಮಾರ್ಗದ ನಡುಟ್ಟಿತ್ತಿನ ಗುಂಡಿನ್ ಮುಚ್ಚಿದೆರ್. ನೆರ್ದ್ ದುಂಬುಲ ಕೆಂಚನಕೆರೆ ಶಾಲೆದ ಎದುರುದ ಮಾರ್ಗಡ್ ಇತ್ತಿನ ಗುಂಡಿನ್ ಮೊಕುಲು ಇಂಚೆನೆ ಮುಚ್ಚಿದಿತ್ತೆರ್. ಮೊಕ್ಲೆನ ಈ ಬೇಲೆನ್ ಕೈತಲ್ದಕುಲು ಬೊಕ್ಕ ರಿಕ್ಷಾ ಡ್ರೈವರ್ ನಕುಲು ಮೆಚ್ಚಿ ದೆರ್.
ಸಿಡ್ನಿ: ಟಿ-20 ವಿಶ್ವಕಪ್ ಕ್ರಿಕೆಟ್ ಪಂತೊಡು ಪಾಕಿಸ್ತಾನ ಕೂಟದಕುಲು ಫೈನಲ್‌ಗ್ ಎಂಟ್ರಿ ಆತೆರ್.
ಸೆಮಿಫೈನಲ್ ಪಂತೊಡು ನ್ಯೂಜಿಲ್ಯಾಂಡ್ ಮಿತ್ತ್ 7 ವಿಕೆಟ್ ರ್ದ್ ಗೆಂದಿನ ಪಾಕಿಸ್ತಾನ ಫೈನಲ್‌ಗ್ ಎಂಟ್ರಿ ಆತ್ಂಡ್.
2022 ಟ್ಟ್ ಯುರೋಪ್‌ಡ್ ದೊಂಬುಗು 15 ಸಾರ ಜನ ತೀರ್ ಪೋತೆರ್ ಪಂದ್ ವಿಶ್ವ ಆರೋಗ್ಯ ಸಂಸ್ಥೆ ತೆರಿಪಾದ್ಂಡ್. ಸ್ಪೇನ್ ಬೊಕ್ಕ ಜರ್ಮನ್‌ಡ್ ಎಚ್ಚ ಜನ ತೀರ್ ಪೋತೆರ್.
ಜೂನ್, ಆಗೋಸ್ಟ್‌ದ ಪೊರ್ತುಡು ಯುರೋಪ್‌ಡ್ ದಾಖಲ್ ಮಲ್ಪಿನ ಮಟ್ಟಡ್ ದೊಂಬು ಇತ್ತ್ಂಡ್. ಸ್ಪೇನ್‌ಡ್ 4 ಸಾರ, ಪೋರ್ಚುಗಲ್‌ಡ್ 1 ಸಾರ, ಯು.ಕೆ ಡ್ 3,200 ಅಂಚನೆ ಜರ್ಮನ್‌ಡ್ 4,500 ಜನ ತೀರ್ ಪೋತೆರ್ ಪಂದ್ WHO ಅಧಿಕಾರಿಲು ಪಂತೆರ್.
ಕಾವೇರಿ ಆಸ್ಪತ್ರೆ, ಸಾಯಿ ಸಂಗಮ ಡಯಾಗ್ನೋಸ್ಟಿಕ್ ಬೊಕ್ಕ ಹೆಲ್ತ್ ಕೇರ್ ಮುತಾಲಿಕೆಡ್ ಕರ್ನಾಟಕ ಟೆಲಿವಿಷನ್ ಅಸೋಷಿಯೇಶನ್ ಸದಸ್ಯೆರೆಗ್ ಅಪ್ಪು ಅಮರ ಹೆಲ್ತ್ ಕಾರ್ಡ್ ಕೊರ್ಪಿನ ಭರವಸೆ ಕೊರ್ದಿತ್ತ್ಂಡ್.
ಅಂಚಾದ್ ನವೆಂಬರ್ 13 ಕ್ಕ್ ಐತಾರ ಬಯ್ಯ 5 ಗಂಟೆಗ್ ಬೆಂಗ್ಲೂರ್‌ದ ಕಾವೇರಿ ಆಸ್ಪತ್ರೆಡ್ ನಡಪುನ ಲೇಸ್‌ಡ್ ಅಪ್ಪು ಅಮರ ಹೆಲ್ತ್ ಪ್ರಿವಿಲೇಜ್ ಕಾರ್ಡ್ ಕೊರ್ಪಿನ ಲೇಸ್ ನಡಪರೆ ಉಂಡು.
ವಿಶ್ವ ಹಿಂದೂ ಪರಿಷದ್, ಬಜರಂಗದಳ, ಮಾತೃಶಕ್ತಿ ದುರ್ಗಾವಾಹಿನಿ ಕಾಣಿಯೂರ್ ಪುತ್ತೂರ್ ಗ್ರಾಮಾಂತರ ಪ್ರಖಂಡ ಬೊಕ್ಕ ಪುತ್ತೂರ್ ಹಿಂದೂ ಜಾಗರಣ ವೇದಿಕೆದ ಮುತಾಲಿಕೆಡ್ ಹಿಂದೂ ಜಾಗೃತಿ ಸಮಾವೇಶ ನ.13 ಐತಾರದಾನಿ ಮಧಾಹ್ನ 2:30 ಕ್ ಕಾಣಿಯೂರ್ ಡ್ ಜಾತ್ರೆದ ಕಂಡಡ್ ನಡಪರೆ ಉಂಡು.
ಈ ಲೇಸ್ ಗ್ ಮಾರ್ಗದರ್ಶನ ಕೊರ್ಯೆರೆ ಒಡಿಯೂರ್ ಶ್ರೀ ಗುರುದೇವದತ್ತ ಸಂಸ್ಥಾನದ ಸಾದ್ವಿ ಶ್ರೀ ಶ್ರೀ ಮಾತಾನಂದಮಯಿ ಉಲ್ಲೆರ್. ಹಿರಿಯೆರ್ ರಾಷ್ಟ್ರೀಯ ಸ್ವಯಂ ಸೇವಕೆರ್ ಬೆಲಿಯಪ್ಪ ಗೌಡ ದೇವರತ್ತಿ‌ಮಾರ್ ಈ ಲೇಸ್ ದ ಅಧ್ಯಕ್ಷತೆನ್ ಒಯಿಸೊನ್ವೆರ್. ಬಜರಂಗದಳ ಕರ್ನಾಟಕ ದಕ್ಷಿಣ ಪ್ರಾಂತದ ಸಹ ಸಂಯೋಜಕೆರ್ ರಘು ಸಕಲೇಶಪುರ ದಿಕ್ಸೂಚಿ ಭಾಷಣ ಮಲ್ಪೆರೆ ಉಲ್ಲೆರ್. ಬಜರಂಗದಳ ಕರ್ನಾಟಕ ದಕ್ಷಿಣ ಪ್ರಾಂತದ ಸಹ ಸಂಯೋಜೆಕೆರ್ ಮುರಳಿಕೃಷ್ಣ ಹಸಂತಡ್ಕ, ಹಿಂದೂ ಜಾಗರಣ ವೇದಿಕೆದ ಚಿನ್ಮಯ್ ಈಶ್ವರಮಂಗಲ, ಹಿಂದೂ ಮುಖಂಡೆರ್ ಅರುಣ್ ಕುಮಾರ್ ಪುತ್ತಿಲ, ವಿಶ್ವ ಹಿಂದೂ ಪರಿಷತ್ ಪುತ್ತೂರ್ ಗ್ರಾಮಾಂತರ ಪ್ರಖಂಡ ಕಾರ್ಯದರ್ಶಿ ರವಿಕುಮಾರ್ ಕೈತ್ತಡ್ಕ ಈ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್. ಮಾತ ಹಿಂದೂ ಬಾಂಧವೆರ್ ಅತಿ ಎಚ್ಚ ಸಂಖ್ಯೆಡ್ ಸೇರ್ದ್, ಈ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಒಡಿಪು: ಒಡಿಪು ಅಗ್ನಿಶಾಮಕದ ಸಹಾಯಕ ಠಾಣಾಧಿಕಾರಿ ಮೀರ್ ಮುಹಮ್ಮದ್ ಗೌಸ್ 2021ಇಸ್ವಿದ ರಾಷ್ಟ್ರಪತಿಲೆನ ಸೇವಾ ಪದಕನ್ ಸೋಮಾರ ಬೆಂಗ್ಲೂರ್ ರಾಜಭವನಡ್ ರಾಜ್ಯಪಾಲ ಥಾವರ್ ಚಂದ್ ಗೆಹ್ಲೋಟ್ ಮೆರೆರ್ದ್ ದೆತ್ತೊಂಡೆರ್.
1992ಟ್ ಅಗ್ನಿಶಾಮಕ ಇಲಾಖೆಗ್ ಸೇರ್ನ ಮೇರ್, 30ವರ್ಷ ಸೇವಾ ಅವಧಿಡ್ ಎಡ್ಡೆ ಅಗ್ನಿಶಾಮಕೆರಾದ್, ಬೊಕ್ಕ ಸಹಾಯಕ ಠಾಣಾಧಿಕಾರಿಯಾದ್ ಕಜ್ಜ ಮಲ್ದೆರ್. ನಿಸ್ವಾರ್ಥ ಸೇವೆದ ಗೌರವಾರ್ಥವಾದ್ ಮೆರೆಗ್ ಇಲಾಖೆ 33 ಸರ್ತಿ ನಗದು ಇನಾಮ್ ಲೆನ್ , 2 ಸೇವೆ ಪತ್ರಲೆನ್ ಕೊರ್ತುಂಡು. ಮೆರೆಗ್ 2012ಟ್ ಮುಖ್ಯಮಂತ್ರಿಲು ಬಂಗಾರ್ ದ ಪದಕ ಕೊರ್ದು ಗೌರವಿಸಾದೆರ್.
ತಮಿಳ್‌ನಾಡ್‌ಡ್ 29 ವರ್ಷದ ಟಿ.ಸಿಂಧು ಮೋನಿಕಾ ಪನ್ಪಿನಾರ್ 7 ತಿಂಗೊಲ್‌ಡ್ 42 ಲೀಟರ್ ಮಿರೆ ಪೇರ್ ದಾನ ಮಲ್ತ್‌ದೆರ್.
ಸರ್ಕಾರಿ ಆಸ್ಪತ್ರೆಡ್ ಪುಟ್ಟಿನ 1,400 ಜೋಕುಲೆಗ್ ಆರ್ ಮಿರೆ ಪೇರ್‌ನ್ ಕೊರ್ತೆರ್. ಜುಲೈ 2021 ಜೆರ್ದ್ ಎಪ್ರಿಲ್ 2022 ಮುಟ್ಟ 42 ಲೀಟರ್ ಪೇರ್‌ನ್ ದಾನ ಮಲ್ತ್‌ದೆರ್. ಸಿಂಧು ಮೆರೆನ ಈ ಬೇಲೆ ಏಷ್ಯನ್ ಬುಕ್ ಆಫ್ ರೆಕಾರ್ಡ್‌ಡ್ ದಾಖಲ್ ಆತ್ಂಡ್.
