ಕೋಟೆಕಾರ್: ಕೋಟೆಕಾರ್ ನೆಲ್ಲಿಸ್ಥಳ ಶ್ರೀ ಕಾಳಿಕಾಂಬಾ ವಿಶ್ವಕರ್ಮ ಸೇವಾ ಸಂಘದ ಮುತಾಲಿಕೆಡ್ ನ.10 ಗುರುವಾರ ಬೊಲ್ಪುರ್ದ್ ನ.11 ಶುಕ್ರಾರ ಬೊಲ್ಪು ಮುಟ್ಟ ಕೋಟೆಕಾರ್ ನೆಲ್ಲಿಸ್ಥಳ ಶ್ರೀ ಕಾಳಿಕಾಂಬ ದೇವಲ್ಯಡ್ ಒಂಜಿ ದಿನತ ಭಜನೆ ಉಚ್ಚಯ ನಡಪರೆ ಉಂಡು.
ಭಕ್ತೆರೆನ ಬೊಕ್ಕ ಭಜನಾ ಮಂಡಳಿದ ಸಹಕಾರಡ್ ನಡಪುನ ಈ ಲೇಸ್ ಡ್ ಮಾತೆರ್ಲ ಪಾಲ್ ಪಡೆದ್ ಶ್ರೀ ದೇವಿನ ಕೃಪೆಗ್ ಪಾತ್ರರಾವೋಡು ಪಂದ್ ಕೋಟೆಕಾರ್ ನೆಲ್ಲಿಸ್ಥಳ ಶ್ರೀ ಕಾಳಿಕಾಂಬ ವಿಶ್ವಕರ್ಮ ಸೇವಾ ಸಂಘದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕೊಯಮತ್ತೂರು: ತಮಿಳ್‌ನಾಡ್‌ದ ಕೊಯಮತ್ತೂರ್‌ಡ್ ಕಾರ್ ಡ್ ಬಾಂಬ್ ಪುಡಾದಿನ ಕೇಸ್‌ಗ್ ಸಂಬಂಧಿಸಾದ್ ರಾಷ್ಟ್ರೀಯ ತನಿಖಾ ದಳ ಮಲ್ಲ ಕ್ರಮ ದೆತೊಂದುಂಡು. ಗುರುವಾರ ಕಾಂಡೆ ಎನ್‌ಐಎ ಕೂಟ ಕೊಯಮತ್ತೂರ್‌ದ 21 ಕಡೆಟ್ಟ್ ಸೇರ್ದ್ ತಮಿಳ್‌ನಾಡ್‌ದ 45 ಜಾಗೆಲೆಡ್ ದಾಳಿ ಮಲ್ತ್‌ದೆರ್.
ಅಕ್ಟೋಬರ್ 23 ಕ್ಕ್ ಐತಾರ ಕೊಯಮತ್ತೂರ್‌ದ ಈಶ್ವರ ದೇವಲ್ಯದ ಎದುರು ಸಾದಿಡ್ ಎಲ್‌ಪಿಜಿ ಸಿಲಿಂಡರ್ ಇತ್ತಿನ ಕಾರ್ ಒರಾನೇ ಪುಡಾದಿತ್ತ್ಂಡ್. ಉಂದೆಟ್ಟ್ ಜಮೀಶಾ ಮುಬಿನ್ ತೀರ್ ಪೋದಿತ್ತೆರ್. ಇಂಚಾದ್ ಈ ನಿಲೆಟ್ಟ್ ತನಿಖೆ ನಡತೊಂದು ಉಂಡು.
ಕಿನ್ನಿಗೋಳಿ: ಕಿನ್ನಿಗೋಳಿದ ಸೈಂಟ್ ಮೇರೀಸ್ ಶಾಲೆಡ್ ರಾತ್ರೆದ ಪೊರ್ತುಡು ಕಂಡೆರೆ ಬತ್ತಿನ ಕಲ್ವೆರೆ ಸಾಲೆದ ಪಿದಾಯಿ ಇಪ್ಪುನ ಕರ್ಬದ ಬಾಕಿಲ್‌ನ್ ಪುಡತ್ತ್ ದ್, ಸಾಲೆದ ಉಲಯಿ ತಿರ್ಗ್ ದೆರ್.
ಬೊಕ್ಕ ಕಬಾಟ್‌ಲೆಡ್, ಡ್ರಾವರ್ಡ್ ಕಾಸ್ ನಾಡ್ದೆರ್. ಅಲ್ಪ ದಾಲ ತಿಕ್ಕಂದಿನ ತೂದು ಮೊಕುಲು ಕುಡೊಂಜಿ ಕೋಣೆಡಿತ್ತಿನ ಫ್ರಿಡ್ಜ್‌ಡಿತ್ತಿನ ಚಾಕಲೇಟ್‌ಲೆನ್ ತಿಂದ್ ಸಾಲೆದ ಉಲಯಿ ಅವೆತ ಕಾಕಜಿನ್ ದಕ್‌ದ್ ಪೋತೆರ್ ಪಂದ್ ಸಾಲೆದ ಸಿಬ್ಬಂದಿಲು ತೆರಿಪಾದೆರ್. ಈ ಘಟನೆ ಮಿತ್ತ್ ಪಾರ್ದಿತ್ತಿನ ಸಿ.ಸಿ ಕ್ಯಾಮರಾಡ್ ತೋಜಿದ್ ಬೈದ್ಂಡ್.
ಗೋವಾ: ಬೀಚ್ ಗ್ ತಿರ್ಗರೆ ಬತ್ತಿತ್ತಿನ ಮಗೆ ಅರ್ಜುನ್ ನೊಟ್ಟುಗು ಕ್ರಿಕೆಟ್‌ ಆಟಗಾರೆ ಸಚಿನ್ ತೆಂಡೂಲ್ಕರ್ , ಗೋವಾದ ಕಡಲ ಬರಿಟ್ಟ್ ಮೀನುಗಾರೆರ್ನ ಒಟ್ಟುಗು ರಂಪೊನಿ ಒಯಿತ್ ದ್, ಮೀನ್ ಪತ್ ದ್ ಕೈದಿನ ಮೀನ್ ದ ವನಸ್ ಮಲ್ತ್ ಕುಷಿ ಪಡೆಯೆರ್.
ಕಡಲ ಬರಿಟ್ಟ್ ಮೀನುಗಾರೆರೆನ ಒಟ್ಟುಗು ರಂಪೊನಿದ ದಂಡ್ ಪತೊಂದು ಖುಷಿ ಪಡೆಯೆರ್.
ಆತೆ ಅತ್ತಂದೆ ತಾನ್ ಪತ್ತಿನ ಮೀನ್ ದ ಅಡಿಗೆನ್ ತಿಂದ್ ಖುಷಿ ಆತೆರ್. ಮೇರ್ ಮೆರೆನ ಮಗೆ ಅರ್ಜುನ್ ತೆಂಡೂಲ್ಕರ್ ನೊಟ್ಟಿಗೆ ಗೋವಾ ಟ್ರಿಪ್‍ ಗ್ ಬೈದೆರ್. ಮೇರೆನ ಈ ಸರಳತೆನ್ ತೂದು ಮೀನ್ ಗಾರೆರ್ ಖುಷಿ ಆತೆರ್.
ಇನಿ ಅಡಿಲೇಡ್’ದ ಓವಲ್ ಡ್ ಭಾರತ ಬೊಕ್ಕ ಇಂಗ್ಲೆಂಡ್ ಟೀಮ್ ದ ನಡುಟ್ಟು ಸೆಕೆಂಡ್ ಸೆಮಿಫೈನಲ್ ಗೊಬ್ಬು ನಡಪರೆ ಉಂಡು.
ಇನಿತ ಈ ಪಂದ್ಯಡ್ ಗೆಂದಿನ ಟೀಮ್ ಪಾಕ್ ದ ವಿರುದ್ಧ ಪ್ರಶಸ್ತಿಗಾದ್ ಗೊಬ್ಬರೆ ಉಂಡು ಪಂದ್ ತೆರಿದ್ ಬೈದ್ಂಡ್.
ಮಲ್ಪೆ: ಮಲ್ಪೆ ಸಿಟಿ ಸೆಂಟರ್ ದಲ್ಪ ಇಪ್ಪುನ ಕ್ಲೌಡ್ 9 ಫ್ಯಾಮಿಲಿ ಶಾಪ್ ಡ್ ಕೇವಲ ಒಂಜೇ ಒಂಜಿ ಸರ್ತಿ 500/-ರೂ. ಕೊರ್ದು ಲಕ್ಕಿ ಕೂಪನ್ ದೆತ್ತೊಂದು 6 ಅದೃಷ್ಟ ಡ್ರಾಟ್ಟ್ ಪಾಲ್ ಪಡೆಯೊಲಿ.
ಉಪ ಕೂಪನ್ ದೆತ್ತೊನ್ನ 15 ದಿನತ ಬೊಕ್ಕ 500/-ರೂ. ಬಿಲೆತ ಸೊತ್ತುಲೆನ್ ದೆತೊನೊಲಿ. ಸೊತ್ತುಲೆನ್ ದೆತ್ತೊನ್ನ ಬೊಕ್ಕಲ ಕೂಪನ್ ಡ್ರಾ ಇಪ್ಪುಂಡು. ಸುರುತ ಡ್ರಾ ಉಂದುವೇ ತಿಂಗೊಲ್ 22 ದಾನಿ ನಡಪರೆ ಉಂಡು.
ದೆಲ್ಲಿ: ನೇಪಾಳಡ್ ಭೂಕಂಪನ ಆಯಿನ ಬೆರಿಕ್ಕೆ ಅಂಡಮಾನ್ ನಿಕೋಬಾರ್ ದ್ವೀಪಡ್ ಭೂಕಂಪನದ ಅನುಭವ ಆತ್ಂಡ್.
ರಿಕ್ಟರ್ ಮಾಪಕಡ್ ಭೂಕಂಪನದ ತೀವ್ರತೆ 4.3ದಾತ್ ದಾಖಲ್ ಆತ್ಂಡ್. ಪೋರ್ಟ್ ಬ್ಲೇರ್ ರ್ದ್ 253 ಕಿಲೋ ಮೀಟರ್ ದೂರಡ್, ಭೂಮಿರ್ದ್ 10 ಕಿಲೋ ಮೀಟರ್ ಅಡಿಟ್ ಈ ಭೂಕಂಪನ ಆತ್ಂಡ್ ಪಂದ್ ತೆರಿದ್ ಬೈದ್ಂಡ್.
ತಾರಿಪಡ್ಪು: ನವಚೇತನ ಫ್ರೆಂಡ್ಸ್ ಕ್ಲಬ್ (ರಿ.) ಬೆಜ್ಜ ತಾರಿಪಡ್ಪು ಮುತಾಲಿಕೆಡ್ ಪೊಸ ಕಟ್ಟಡದ ಉದಿಪನ ಲೇಸ್ ಬೊಕ್ಕ 62 ಕೆಜಿ ವಿಭಾಗದ ಹೊನಲು ಬೊಲ್ಪುದ ಮ್ಯಾಟ್ ಕಬ್ಬಡ್ಡಿ ಪಂದ್ಯಾಟ ನ.12 ಕ್ಕ್ ಶನಿಯಾರ ಬಯ್ಯಗ್ 7 ಗಂಟೆಗ್ ಬೆಜ್ಜ ತಾರಿಪಡ್ಪುಡ್ ನಡಪರೆ ಉಂಡು.
ಬಯ್ಯಗ್ 6:30ಕ್ ಸಭಾ ಕಾರ್ಯಕ್ರಮ ಬೊಕ್ಕ ಉದಿಪನ ಲೇಸ್ ನಡಪುಂಡು. ಈ ಲೇಸ್ ದ ಪ್ರಾರ್ತನೆನ್ ಸ್ಥಳೀಯೆರ್ ಸೇರ್ದ್ ಮಲ್ಪೆರೆ ಉಲ್ಲೆರ್. ಬಿನ್ನೆರೆನ್ ನವಚೇತನ ಫ್ರೆಂಡ್ಸ್ ಕ್ಲಬ್ ದ ಸದಸ್ಯೆರ್ ವಿಠಲ ಪೂಜಾರಿ ಎದ್ಕೊನಿಯೆರೆ ಉಲ್ಲೆರ್. ಪೊಸ ಕಟ್ವಾನದ ಉದಿಪನನ್ ಮಂಜೇಶ್ವರ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಎಕೆಎಮ್ ಆಶ್ರಫ್ ಬೊಕ್ಕ ಕಬಡ್ಡಿ ಪಂದ್ಯಾಟದ ಉದಿಪನನ್ ಮಜಿಬೈಲು ಸರ್ವೀಸ್ ಕೋ-ಆಪರೇಟಿವ್ ಬ್ಯಾಂಕ್ ಅಧ್ಯಕ್ಷೆರ್ ಎಮ್. ಸಂಜೀವ ಶೆಟ್ಟಿ ಮೊಕುಲು ಮಲ್ಪುವೆರ್. ಅಂಚನೆ ಲೇಸ್ ದ ಅಧ್ಯಕ್ಷತೆನ್ ಮೀಂಜ ಗ್ರಾಮ ಪಂಚಾಯತಿ ಅಧ್ಯಕ್ಷೆರ್ ಸುಂದರಿ ಆರ್. ಶೆಟ್ಟಿ ಒಯಿಸೊಂನ್ವೆರ್. ಬಿನ್ನೆರಾದ್ ಬ್ಲಾಕ್ ಪಂಚಾಯತಿ ಸದಸ್ಯೆರ್ ಅಶ್ವಿನಿ ಪಜ್ವ, ಅಂಬಾರು ಶ್ರೀ ಸದಾಶಿವ ದೇವಲ್ಯದ ಆಡಳಿತ ಮೊಕ್ತೇಸೆರ್ ಕೃಷ್ಣಪ್ಪ ಪೂಜಾರಿ ದೇರಂಬಳ, ಮೊಹಮ್ಮದ್ ಹಾಜಿ ಪೊಯ್ಯತ್ತಬೈಲ್, ಮೀಂಜ ಗ್ರಾಮ ಪಂಚಾಯತಿ ಸದಸ್ಯೆರ್ ವಿನೋದ್ ಜಿ. ಬೆಜ್ಜ, ಬರ್ಯೆರೆ ಉಲ್ಲೆರ್. ಬೊಕ್ಕ ನವಚೇತನ ಫ್ರೆಂಡ್ಸ್ ಕ್ಲಬ್ ದ ಗೌರವಾಧ್ಯಕ್ಷೆರ್ ವಿಠಲ ರೈ ಬಾಂಗೇಮಾರ್, ಶ್ರೀ ರಾಮ ಭಜನಾ ಮಂದಿರ ಬೆಜ್ಜದ ಅಧ್ಯಕ್ಷೆರ್ ಚಂದ್ರಹಾಸ ಬೆಜ್ಜ ಸರೋಳ್ಯ, ಬೆಜ್ಜ ಸ್ನೇಹ ಸಂಗಮದ ಅಧ್ಯಕ್ಷೆರ್ ಸೀತಾರಾಮ ಶೆಟ್ಟಿ ಬೆಜ್ಜದಗುತ್ತು, ಜನಾರ್ಧನ ರೈ ತಲೇಕಳ, ಕಡಂಬಾರ್ ಪೋಸ್ಟ್‌ ಮಾಸ್ಟರ್ ಸದಾನಂದ ಶೆಟ್ಟಿ ತಲೇಕಳ, ನವಚೇತನ ಫ್ರೆಂಡ್ಸ್ ಕ್ಲಬ್ ಗೌರವ ಸಲಹೆಗಾರೆರ್ ಲೋಕನಾಥ ಪೂಜಾರಿ ಕೊಟ್ಟಾರ ಈ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್. ಈ ಪೊರ್ತುಡು ಮೀಂಜ ಹಿರಿಯ ಕಬಡ್ಡಿ ಪಟು ಯಶವಂತ ಮಾಡ ತಲೇಕಳ ಮೇರೆಗ್ ತಮ್ಮನ ನಡಪುಂಡು. ಅಂಚನೆ ಈ ಲೇಸ್ ಗ್ ನವಚೇತನ ಫ್ರೆಂಡ್ಸ್ ಕ್ಲಬ್ ದ ಸದಸ್ಯೆರ್ ಜಯೇಶ್ ಪೂಜಾರಿ ಬೆಜ್ಜ ಗುಡ್ಡೆಮಾರ್ ಸೊಲ್ಮೆ ಸಂದಾಯೆರ್ ಉಲ್ಲೆರ್ ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಬೆದ್ರ: ಬೆದ್ರದ ಜೈನ ಪ.ಪೂ ಕಾಲೇಜ್ ಡ್ ಕಲ್ತೊಂದು ಇತ್ತಿನ ಫಸ್ಟ್ ಪಿಯುಸಿ ವಾಣಿಜ್ಯ ವಿಭಾಗದ ವಿದ್ಯಾರ್ಥಿನಿ ಸಂಗೀತಾ (17) ಆತ್ಮಹತ್ಯೆ ಮಲ್ತೊನ್ನ ಘಟನೆ ಬುಧಾರ ಹೌದಾಲ್ ಡ್ ನಡತ್ಂಡ್.
ಬೈಲೂರ್ ಮೂಲದಾರ್ ಆಯಿನ ಮೇರ್ ಹೌದಾಲ್ ಡ್ ತನ್ನ ಚಿಕ್ಕಮ್ಮನ ಇಲ್ಲಲ್ ರ್ದ್ ಕಾಲೇಜ್ ಗ್ ಪೋದು ಬರೊಂದು ಇತ್ತೆರ್. ಅಂಗಾರೆ ಮಧ್ಯಾಹ್ನ ಕೆಬಿ ಬೇನೆ ಪಂದ್ ಕಾಲೇಜ್ ರ್ದ್ ಇಲ್ಲಡೆ ಬೈದೆರ್. ಬುಧಾರ ಬೊಲ್ಪುಗು ಕಾಲೇಜ್ ಗ್ ಪೋಪುನೆ ಪಂದ್ ಪೋಯಿನಾರ್ ಇಲ್ಲ ಕೈತಲ್ ದ ಮರಕ್ ಬಲ್ಲ್ ದೆತೊಂದು ಆತ್ಮಹತ್ಯೆ ಮಲ್ತೊಂದೆರ್ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ಬೆದ್ರ ಪೊಲೀಸೆರ್ ಜಾಗೆಗ್ ಬತ್ತ್ ದ್ ಕೇಸ್ ದಾಖಲ್ ಮಲ್ದೆರ್.
ಕುಡ್ಲ: ಯಕ್ಷಾಂಗಣ ಕುಡ್ಲ ಯಕ್ಷಗಾನ ಚಿಂತನ ಮಂಥನ ಬೊಕ್ಕ ಪ್ರದರ್ಶನ ವೇದಿಕೆ, ಕುಡ್ಲ ವಿಶ್ವವಿದ್ಯಾನಿಲಯ ಡಾ.ದಯಾನಂದ ಪೈ, ಸತೀಶ್ ಪೈ ಯಕ್ಷಗಾನ ಅಧ್ಯಯನ ಕೇಂದ್ರ ಬೊಕ್ಕ ಕರ್ನಾಟಕ ಯಕ್ಷ ಭಾರತಿ(ರಿ.) ಪುತ್ತೂರ್ ದ ಮುತಾಲಿಕೆಡ್ ನಡಪಾವುನ ಕರ್ನಾಟಕ ರಾಜ್ಯೋತ್ಸವ ಕಲಾ ಸಂಭ್ರಮ ‘ಯಕ್ಷಗಾನ ತಾಳಮದ್ದಳೆ ಸಪ್ತಾಹ’ ದ ದಶಮಾನ ಸಡಗರ ಉಂದುವೇ ನ. 21ರ್ದ್ 27ಮುಟ್ಟ ಕುಡ್ಲ ವಿಶ್ವವಿದ್ಯಾನಿಲಯ ಕಾಲೇಜ್ ದ ರವೀಂದ್ರ ಕಲಾಭವನಡ್ ನಡಪರೆ ಉಂಡು.
ಈ ಪೊರ್ತುಡು ಕೊರ್ಪುನ ‘ಯಕ್ಷಾಂಗಣ ರಾಜ್ಯೋತ್ಸವ’ ಪುರಸ್ಕಾರಗ್ ಬೊಂಬೈದ ಉದ್ಯಮಿ ಬೊಕ್ಕ ಕಲಾಪೋಷಕೆರ್ ಐಕಳ ಹರೀಶ್ ಶೆಟ್ಟಿ ಆಯ್ಕೆ ಆತೆರ್. ಸೇವಾರಾಧಕೆರಾದ್ ಬೇತೆ ಬೇತೆ ಸಂಘ ಸಂಸ್ಥೆಲೆಡ್ ಸಕ್ರಿಯರಾದ್ ಇಪ್ಪುನ ಮೇರ್ ಬೊಂಬೈ ನಗರದ ಪುಗರ್ತೆದ ಉದ್ಯಮಿ ಬೊಕ್ಕ ಸಮಾಜಸೇವಕೆರ್. ತನ್ನ ಶಾಲೆ ದಿನರ್ದಿಂಚನೆ ಪುಟ್ಟಿನ ಊರುಡು ಎಡ್ಡೆ ಕ್ರೀಡಾಪಟುವಾದ್ ದೇಹದಾರ್ಢ್ಯತೆ ಸ್ಪರ್ಧೆಡ್ ರಾಜ್ಯ-ರಾಷ್ಟ್ರಮಟ್ಟಡ್ ಮಿ.ದಕ್ಷಿಣ ಕನ್ನಡ, ಕರ್ನಾಟಕ ಕಿಶೋರ್, ಭಾರತ್ ಕಿಶೋರ್ ಪ್ರಶಸ್ತಿಲೆನ್ ಪಡೆತೆರ್. ಬೊಂಬೈದ ಆಹಾರ್ ಉಪಾಧ್ಯಕ್ಷೆರಾದ್, ಸಾಯಿ ಸಂಧ್ಯಾ ಆರ್ಟ್ಸ್ ಗೌರವಾಧ್ಯಕ್ಷೆರಾದ್, ಮಾತೃಭೂಮಿ ಕೋ-ಆಪರೇಟಿವ್ ಸೊಸೈಟಿ ನಿರ್ದೇಶಕೆರಾದ್, ಎಸ್ಎಂಎಸ್ ಕಾಲೇಜ್ ಕಟ್ಟಡ ಸಮಿತಿದ ಕಾರ್ಯಾಧ್ಯಕ್ಷೆರಾದ್ ಬೆಂದಿನಾರ್. ಬಂಟರ ಸಂಘದ ಕ್ರೀಡಾ ಸಮಿತಿ ಕಾರ್ಯಾಧ್ಯಕ್ಷೆರಾದ್ ಅಖಿಲ ಭಾರತ ಮಟ್ಟದ ಕ್ರೀಡೋತ್ಸವನ್ ನಡಪಾದೆರ್. ಶಿಕ್ಷಣ ಸಮಿತಿ ಕಾರ್ಯಾಧ್ಯಕ್ಷೆರಾದ್ 1500 ವಿದ್ಯಾರ್ಥಿಲೆಗ್ ಶೈಕ್ಷಣಿಕ ಸಕಾಯ, ಒಂಜಿ ಕೋಟಿಗ್ಲಾ ಎಚ್ಚ ಶಾಶ್ವತ ನಿಧಿ ಸ್ಥಾಪನೆ, ಪ್ರಕೃತಿ ವಿಕೋಪಗ್ ಬಲಿ ಆಯಿನಕುಲೆಗ್ ಪನವುದ ಸಕಾಯ, ಡ್ರೆಸ್ ಕೊರ್ಪುನೆ ಈ ರೀತಿದ ಸಮಾಜ ಸೇವೆನ್ ಮಲ್ದೆರ್. ದೈವಭಕ್ತೆರಾಯಿನ ಮೇರ್ ಶ್ರೀ ಕ್ಷೇತ್ರ ಬಪ್ಪನಾಡ್ ಬೊಕ್ಕ ಕಟೀಲ್ ದೇವಲ್ಯದ ಮಹಾದ್ವಾರ ನಿರ್ಮಾಣ, ಬೇತೆ ಬೇತೆ ದೇವಲ್ಯದ ಜೀರ್ಣೋದ್ಧಾರ ಸಮಿತಿ ಕಾರ್ಯಭಾರ, ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯದ ಬ್ರಹ್ಮ ಕಳಶೋತ್ಸವ, ಬೊಂಬೈ ಸಮಿತಿ ಅಧ್ಯಕ್ಷೆರಾದ್ ಶ್ರೀ ದೇವಿಗ್ ಬಂಗಾರ್ ದ ಕಳಶ ಸಮರ್ಪಣೆ, ಬೊಂಬೈ ಬಂಟರ ಸಂಘದ ಅಧ್ಯಕ್ಷೆರಾದ್ ಕಟ್ಟಡ ನಿರ್ಮಾಣ, ಜಾತಿ ಮತ ಭೇದ ಇಜ್ಜಂದೆ ಬಡಪತ್ತ್ ದಕುಲೆಗ್ ಪಣವುದ ಸಕಾಯನ್ ಕೊರ್ನ ಮೇರೆಗ್ ಸಮಾಜ ಸೇವಕ ಪ್ರಶಸ್ತಿ ಸಾರ್ಥಕ ಆತ್ಂಡ್. ಇತ್ತೆದ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಅಧ್ಯಕ್ಷೆರಾದ್ ರಡ್ಡ್ ವರ್ಷರ್ದ್ ಬೇತೆ ಬೇತೆ ಸಮಾಜದ ಬಡವೆರೆಗ್, ರೋಗಿಲೆಗ್, ವಸತಿ ಇಜ್ಜಂದಿನಕುಲೆಗ್ ಬೊಕ್ಕ ಶಿಕ್ಷಣಾರ್ಥಿಲೆಗ್ ಸುಮಾರ್ 11 ಕೋಟಿ ರೂಪಾಯಿದ ಸಮಾಜ ಸೇವಾ ಕಾರ್ಯದೊಟ್ಟೆಗೆ ಮೇರ್ ಮತೆರೆಗ್ಲಾ ಮಾದರಿ ಆತೆರ್. ಬೇತೆ ಬೇತೆ ರಂಗದ ಕಲಾವಿದೆರೆನ್ ಪ್ರೋತ್ಸಾಹ ಮಲ್ಪುನ ಒಟ್ಟಿಗೆ ಕಲೆ ಬೊಕ್ಕ ಕಲಾ ಸಂಸ್ಥೆಲೆಗ್ ಏಪಲ ಸಪೋರ್ಟ್ ಮಲ್ಪುನ ಮೆರೆಗ್ ಪುಗರ್ತೆದ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಸೇರ್ದ್ ನೂರ್ದೆದ್ಲಾ ಎಚ್ಚ ಗೌರವ ತಮ್ಮನೊಲು ಆತ್ಂಡ್. ಮೆರೆನ ಸಾಧನೆದ ಬಗೆಟ್ ಬೊಂಬೈ ವಿಶ್ವವಿದ್ಯಾನಿಲಯ ಪ್ರಕಟಣೆ ಮಲ್ತಿನ ‘ಸಾರ್ವಭೌಮ’ ಗೌರವ ಗ್ರಂಥ ಇಂಚಿಪ್ಪ ಉದಿಪನ ಆಂಡ್. ಉಂದುವೇ ನ. 21ದಾನಿ ಬಯ್ಯಗ್ ನಡಪುನ ಯಕ್ಷಾಂಗಣದ ದಶಮಾನ ಸಡಗರದ ಉದಿಪನ ಲೇಸ್ ಡ್ ಕುಡ್ಲ ವಿಶ್ವವಿದ್ಯಾನಿಲಯದ ಕುಲಪತಿ ಡಾ. ಪಿ. ಎಸ್. ಯಡಪಡಿತ್ತಾಯ ಮೇರ್ ಐಕಳ ಹರೀಶ್ ಶೆಟ್ಟಿ ಮೆರೆಗ್ ದಶಮಾನೋತ್ಸವ ಸಂಭ್ರಮದ ಇಸೇಷ ‘ಯಕ್ಷಾಂಗಣ ರಾಜ್ಯೋತ್ಸವ ಪುರಸ್ಕಾರ’ ಪ್ರದಾನ ಮಲ್ಪುವೆರ್. ಸಂಸ್ಥೆದ ಗೌರವಾಧ್ಯಕ್ಷೆರ್ ಡಾ. ಎ.ಜೆ.ಶೆಟ್ಟಿ ಅಧ್ಯಕ್ಷತೆ ಒಯಿಸೊನ್ವೆರ್. ಈ ಲೇಸ್ ಗ್ ಶಾಸಕೆರ್ ಡಿ.ವೇದವ್ಯಾಸ ಕಾಮತ್, ಎ. ಸದಾನಂದ ಶೆಟ್ಟಿ, ಕೂಳೂರು ಕನ್ಯಾನ ಸದಾಶಿವ ಶೆಟ್ಟಿ, ಪ್ರದೀಪ್ ಕುಮಾರ್ ಕಲ್ಕೂರ, ಶಶಿಧರ ಶೆಟ್ಟಿ ಬರೋಡ, ವಿ. ಕರುಣಾಕರ, ಕೆ.ಕೆ.ಶೆಟ್ಟಿ ಅಹಮದ್ ನಗರ ಬಿನ್ನೆರಾದ್ ಬರ್ಯೆರೆ ಉಲ್ಲೆರ್. ಬೊಕ್ಕ ಪತ್ತ್ ನೇ ವರ್ಷದ ನುಡಿ ಪರ್ಬವಾದ್ ನ 27 ಮುಟ್ಟ ‘ಸಪ್ತ ವಿಜಯ’ ಯಕ್ಷಗಾನ ತಾಳಮದ್ದಳೆ ಸಪ್ತಾಹದ ಸರಣಿ ತಾಳಮದ್ದಳೆ, ತಮ್ಮನ ಬೊಕ್ಕ ಸಂಸ್ಮರಣ ಲೇಸ್ ಲು ನಡಪುಂಡು ಪಂದ್ ಯಕ್ಷಾಂಗಣದ ಕಾರ್ಯಾಧ್ಯಕ್ಷೆರ್ ಪ್ರೊ. ಭಾಸ್ಕರ ರೈ ಕುಕ್ಕುವಳ್ಳಿ ಪ್ರಕಟಣೆಡ್ ತೆರಿಪಾದೆರ್.
