ಕರ್ನಾಟಕ ಪ್ರೆಸ್ ಕ್ಲಬ್ ಕೌನ್ಸಿಲ್ ಬೊಕ್ಕ ವಿಶ್ವ ಕನ್ನಡಿಗೆರ್ ದುಬಾಯಿ ಮುತಾಲಿಕೆಡ್ 67 ನೇ ಕರ್ನಾಟಕ ರಾಜ್ಯೋತ್ಸವದ ಲೆಕ್ಕೊಡು ವಿಶ್ವ ಕನ್ನಡ ಹಬ್ಬ ಇನಿ ದುಬಾಯಿದ ಇಂಡಿಯನ್ ಹೈಸ್ಕೂಲ್ ಶೇಕ್ ರಾಷಿದ್ ಚಾವಡಿಡ್ ನಡಪರೆ ಉಂಡು.
ಮೈಸೂರ್ ಸಂಸ್ಥಾನದ ಯಧುವೀರ್ ಕೃಷ್ಣದತ್ತ ಚಾಮರಾಜ ಒಡೆಯರ್, ಪರಮುಪೂಜ್ಯ ಶ್ರೀ ಶ್ರೀ ಶ್ರೀ ಡಾ. ಮಹರ್ಷಿ ಆನಂದ ಗುರೂಜಿ, ಕನ್ನಡದ ಪುಗರ್ತೆದ ಪಿಚ್ಚರ್ ನಟ-ನಟಿಯೆರ್, ಜಾನಪದ ಕಲಾವಿದೆರ್ ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್.
ಕುಡ್ಲ: ಜ್ಞಾನರತ್ನ ಎಜುಕೇಷನ್ ಬೊಕ್ಕ ಚಾರಿಟೇಬಲ್ ಟ್ರಸ್ಟ್ (ರಿ.) ನಿಡ್ಡೋಡಿ ಮೊಕಲೆನ ಮುತಾಲಿಕೆಡ್ ಗ್ರಾಮೋತ್ಸವ-14 ಲೇಸ್ ನ.26 ತಾರೀಕ್ ಸನಿವಾರ ನಿಡ್ಡೋಡಿದ ರತ್ನಗಿರಿಟ್ಟ್ ನಡಪರೆ ಉಂಡು.
ಬಯ್ಯ 7 ಗಂಟೆಗ್ ಸಭಾ ಕಾರ್ಯಕ್ರಮ ನಡಪರೆ ಇತ್ತ್‌ದ್, ಲೇಸ್‌ದ ಅಧ್ಯಕ್ಷತೆನ್ ಬಿಜೆಪಿ ರಾಜ್ಯಾಧ್ಯಕ್ಷೆರ್, ಸಂಸದೆರ್ ನಳಿನ್ ಕುಮಾರ್ ಕಟೀಲ್ ವಹಿಸೊನರೆ ಉಲ್ಲೆರ್. ರಾಜ್ಯಸಭಾ ಸದಸ್ಯೆರ್, ಚಿತ್ರನಟೆ ಜಗ್ಗೇಶ್ ಗ್ರಾಮೋತ್ಸವ ಲೇಸ್ ಉದಿಪನ ಮಲ್ಪರೆ ಉಲ್ಲೆರ್. ಮುಲ್ಕಿ-ಬೆದ್ರ ಕ್ಷೇತ್ರದ ಶಾಸಕೆರ್ ಉಮಾನಾಥ ಎ. ಕೋಟ್ಯಾನ್, ಕರ್ಣಾಟಕ ಬ್ಯಾಂಕ್‌ದ ನಿವೃತ್ತ ಸಹಾಯಕ ಮಹಾಪ್ರಬಂಧಕೆರ್ ಶ್ರೀನಿವಾಸ್ ದೇಶಪಾಂಡೆ, ಸಾರ್ವಜನಿಕ ಶಿಕ್ಷಣ ಇಲಾಖೆದ ಉಪನಿರ್ದೇಶಕೆರ್ ಕೆ. ಸುಧಾಕರ, ಕಲ್ಲಮುಂಡ್ಕೂರು ಗ್ರಾಮಪಂಚಾಯತ್ ಅಧ್ಯಕ್ಷೆರ್ ಕೇಶವ ಪೂಜಾರಿ ಮಲ್ಲ ಬಿನ್ನೆರಾದ್ ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್.
ಹಾಸನ: ತನ್ನ ಜೋಕ್ಲೆನ್ ತೂಯರೆ ಬುಡಂದಿನೆಕ್ಕ್ ಇಲ್ಲಗ್ ಕಂಡನಿ ತೂ ಪಾಡಿನ ಘಟನೆ ಹಾಸನ ತಾಲೂಕ್‌ದ ದೊಡ್ಡಬೀಕನಹಳ್ಳಿಡ್ ನಡತ್ಂಡ್.
ಈ ಘಟನೆರ್ದ್ ಇಲ್ಲದ ಉಲಯಿ ಇತ್ತಿನ ಬೊಡೆದಿ ಗೀತಾ ಬೊಕ್ಕ ರಡ್ಡ್ ಆನ್ ಜೋಕುಲು ಚಿರಂತನ್(7), ನಂದನ್ (5) ಮೊಕುಲೆಗ್ ಮಸ್ತ್ ಪೆಟ್ಟಾತ್ಂಡ್. ಜಾಗೆದ ಇಚಾರಗ್ ಕಂಡನಿ ಬೊಡೆದಿಗ್ ಲಡಾಯಿ ಆದಿತ್ತ್ಂಡ್. ಗೊರೂರು ಪೊಲೀಸ್ ಠಾಣೆಡ್ ಈ ಪ್ರಕರಣ ದಾಖಲಾತ್ಂಡ್.
ಕುಡ್ಲ: ತುಳುನಾಡ್ ದ ಸ್ವಾತಂತ್ರ್ಯ ಪೊರ್ಂಬಾಟಗಾರೆ, ಸಮರವೀರೆ ಕೆದಂಬಾಡಿ ರಾಮಯ್ಯ ಗೌಡ ಮೆರೆನ ಪೊರ್ಲಕಂಟ್ ದ ಕಂಚಿದ ಮೂರ್ತಿನ್ ಸಿಎಂ ಬಸವರಾಜ್ ಬೊಮ್ಮಾಯಿ ಮೇರ್ ಸನಿಯಾರ ಕಾಂಡೆ ಕುಡ್ಲದ ಬಾವುಟಗುಡ್ಡೆ ಪಾರ್ಕ್ ಡ್ ಉದಿಪನ ಮಲ್ತೆರ್.
ಈ ಪೊರ್ತುಡು ಬಂದರು, ಮೀನುಗಾರಿಕೆ ಅಂಚನೆ ಒಳನಾಡು ಜಲಸಾರಿಗೆ ಸಚಿವೆರ್ ಎಸ್. ಅಂಗಾರ, ಉಳ್ಳಾಲ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಯು.ಟಿ.ಖಾದರ್, ಕುಡ್ಲ ದಕ್ಷಿಣ ಕ್ಷೇತ್ರದ ಶಾಸಕೆರ್ ವೇದವ್ಯಾಸ್ ಕಾಮತ್ ಸೇರಿನಂಚನೆ ಮಸ್ತ್ ಜನ ಪ್ರತಿನಿಧಿಕುಲು ಲೇಸ್‌ಡ್ ಪಾಲ್ ಪಡೆದಿತ್ತೆರ್.
ಕುಡ್ಲ: ಸ್ವಾತಂತ್ರ್ಯ ಪೊರ್ಂಬಾಟಗಾರೆ, ಸಮರವೀರೆ ಕೆದಂಬಾಡಿ ರಾಮಯ್ಯ ಗೌಡ ಮೆರೆನ ಕಂಚ್‌ದ ಮೂರ್ತಿ ಲೋಕಾರ್ಪಣೆ ಮಲ್ಪರೆ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಸನಿವಾರ ಬಜಪೆದ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗ್ ಬತ್ತೆರ್.
ಈ ಪೊರ್ತುಡು ಬಂದರು, ಮೀನುಗಾರಿಕೆ ಅಂಚನೆ ಒಳನಾಡು ಜಲಸಾರಿಗೆ ಸಚಿವೆರ್ ಎಸ್. ಅಂಗಾರ ಅಂಚನೆ ಜನಪ್ರತಿನಿಧಿಲು ಅರೆನ್ ಎದ್ಕೊನಿಯೆರ್.
ಕುಡ್ಲ: ಕುಕ್ಕೆ ಶ್ರೀ ಸುಬ್ರಹಣ್ಯ ದೇವಲ್ಯದ ವಾರ್ಷಿಕ ಚಂಪಾ ಷಷ್ಠಿ ಉಚ್ಚಯದ ಲೆಕ್ಕೊಡು ಶಾಂತಿ ಸುವ್ಯವಸ್ಥೆ ಕಾಪಾಡುನ ಬೊಕ್ಕ ಸಾರ್ವಜನಿಕೆರೆನ ಹಿತ ದೃಷ್ಟಿರ್ದ್ ಮುಂಜಾಗ್ರತೆ ಕ್ರಮವಾದ್ ಬಾರ್ ನ್ ಮುಚ್ಚೆರೆ ಕರ್ನಾಟಕ ಅಬಕಾರಿ ಕಾಯಿದೆ 1965 ಸೆಕ್ಷನ್ 21(1)ದಂಚ ಜಿಲ್ಲಾಧಿಕಾರಿ ರವಿಕುಮಾರ್ ಎಂ.ಆರ್. ಆದೇಶ ಕೊರ್ತೆರ್.
ಈ ಪೊರ್ತುಡು ಸುಬ್ರಹಣ್ಯ ಗ್ರಾಮ ಪಂಚಾಯತ್ ವ್ಯಾಪ್ತಿದ ಇಂಚಾಡಿದ ಪ್ರಶಾಂತ್ ಬಾರ್ ಬೊಕ್ಕ ರೆಸ್ಟೋರೆಂಟ್ ಬೊಕ್ಕ ಬೆಳ್ಳಿ ಬಾರ್ ಬೊಕ್ಕ ರೆಸ್ಟೋರೆಂಟ್‍ಲೆನ್ ಉಂದುವೇ ನ.28 ದಾನಿ ಬೊಲ್ಪುಗು 6 ಗಂಟೆರ್ದ್ ನ. 29 ದ ನಡುರಾತ್ರೆ 12 ಗಂಟೆ ಮುಟ್ಟ ಮುಚ್ಚೆರೆ ಆದೇಶ ಕೊರಿಯೆರ್.
ಕಡಬ: ಎಲ್ಯ ಪ್ರಾಯದ ಮಗನ ಕೈಕ್ ಬೈಕ್ ಕೊನೊಯೆರೆ ಕೊರ್ನ ಅಮ್ಮೆರೆಗ್ ಪುತ್ತೂರ್ ಎ.ಸಿ.ಜೆ. ಜೆ.ಎಮ್.ಎಫ್.ಸಿ ಕೋರ್ಟು 20 ಸಾರ ರೂಪಾಯಿ ದಂಡ ಪಾಡ್ದ್ಂಡ್.
ಕೊಯಿಲ ಗ್ರಾಮದ ಕೆ.ಸಿ.ಫಾರ್ಮ್ ನಿವಾಸಿ ಅಬ್ದುಲ್ ರಹಿಮಾನ್ ದಂಡ ಕಟ್ಟಿನಾರ್. ಮೇರ್ 2020 ನೇ ಇಸ್ವಿಡ್ ಮಗನ ಕೈಕ್ ಬೈಕ್ ಕೊರ್ದಿತ್ತೆರ್. ಆ ಪೊರ್ತುಡು ಬೈಕ್ ಆಕ್ಸಿಡೆಂಟ್ ಆದ್, ಮಗನ ಮಿತ್ತ್ ಕಡಬ ಠಾಣೆಡ್ ಕೇಸ್ ದಾಖಲ್ ಆದಿತ್ತ್ಂಡ್. ಇತ್ತೆ ಕೇಸ್ ದ ವಿಚಾರಣೆ ಮಲ್ತಿನ ಪುತ್ತೂರ್ ಎ.ಸಿ.ಜೆ. ಜೆ.ಎಮ್.ಎಫ್.ಸಿ ಕೋರ್ಟುದ ನ್ಯಾಯಾಧೀಶೆರ್ ಯೋಗೀಂದ್ರ ಶೆಟ್ಟಿ ಮೇರ್ ದಂಡ ಪಾಡಿನವು ತೆರಿದ್ ಬೈದ್ಂಡ್. ಈ ಬಗೆಟ್ ಸರಕಾರದ ಪರವಾದ್ ಎ.ಪಿ.ಪಿ. ಕವಿತಾ ಮೇರ್ ವಾದ ಮಲ್ದಿತ್ತೆರ್.
ಒಡಿಪು: ಒಡಿಪು ಜಿಲ್ಲೆ ಬ್ರಹ್ಮಾವರ ತಾಲೂಕ್ ಕೋಡಿ ಗ್ರಾಮದ ಬೆಂಗ್ರೆದ ಕಡಲ್ ಬರಿಟ್ಟ್ ಡಾಲ್ಫಿನ್ ಜಾತಿದ ಮೀನ್ ಸೈತ್ತಿನವು ಕೋಡೆ ತೆರಿದ್ ಬೈದ್ಂಡ್.
ಈ ಬಗೆಟ್ ಮಾಹಿತಿ ಪಡೆಯಿನ ಒಡಿಪು ವಲಯದ ವಲಯ ಅರಣ್ಯಾಧಿಕಾರಿ ಸುಬ್ರಹ್ಮಣ್ಯ ಆಚಾರ್‌ ಮೆರೆನ ಮಾರ್ಗದರ್ಶನಡ್ ಸರಕಾರೇತರ ಸಂಸ್ಥೆ ರೀಫ್‌ ವಾಚ್ ಬೊಕ್ಕ ಅರಣ್ಯ ಇಲಾಖೆದ ಒಟ್ಟು ಸೇರಿಗೆಡ್ ಕಾರ್ಯಾಚರಣೆ ನಡಪಾದ್ ಡಾಲ್ಫಿನ್ ಮೀನ್ ದ ಕಳೇಬರದ ಮರಣೋತ್ತರ ಪರೀಕ್ಷೆ ಮಲ್ತೆರ್. ಬೊಕ್ಕ ಜಮೀನ್ ಡ್ ದಫನ ಮಲ್ತೆರ್. ಈ ಕಾರ್ಯಾಚರಣೆಡ್ ಒಡಿಪು ಕೇಂದ್ರ ಸ್ಥಾನದ ಉಪವಲಯ ಅರಣ್ಯಾಧಿಕಾರಿ ಗುರುರಾಜ ಕೆ., ಅರಣ್ಯ ರಕ್ಷಕೆರ್ ಕೇಶವ್ ಪೂಜಾರಿ ಎಂ., ಗಾಡಿ ಡ್ರೈವರ್ ಜೋಯ್ ಬೊಕ್ಕ ರಿಫ್ ವಾಚ್ ಸಂಸ್ಥೆದ ಡಾ। ತೇಜಸ್ವಿನಿ ಶೆಟ್ಟಿಗಾರ್ ಬೊಕ್ಕ ವಿರಿಲ್ಲ್ ಇತ್ತೆರ್.
ಅಂಬ್ಲಮೊಗೆರ್: ಅಂಬ್ಲಮೊಗೆರ್ ಗ್ರಾಮದ ಕೋಟ್ರಗುತ್ತುದ ವ್ಯಾಪ್ತಿಡ್ ಬರ್ಪುನ ಆಡು, ಪೆರಂಗಾವು, ತಿಲಕನಗರ, ಕಂಡಿಲ, ಕರಿದೋಟ ಪ್ರದೇಶಗ್ ಸಂಬಂಧ ಪಟ್ಟಿನ ಅನಾದಿ ಕಾಲೊರ್ದಿಂಚಲ ಪೂರ್ವಿಕೆರ್ ಆರಾಧನೆ ಮಲ್ತೊಂದು ಬರ್ಪುನ, ಶ್ರೀ ದೈವಲೆಗ್ ಸಂಬಂಧ ಪಟ್ಟಿನ ಜಾಗೆಡ್ ಶ್ರೀ ಲಕ್ಷ್ಮೀನರಸಿಂಹ ದೇವಲ್ಯ, ಕೋಟ್ರಗುತ್ತು ಮುಲ್ಪದ ಪ್ರಧಾನ ಅರ್ಚಕೆರ್ ಶ್ರೀ ಅಕ್ಷಯ ಭಟ್, ಕೋಳ್ಯೂರು ಮೆರೆನ ಪೌರೋಹಿತ್ಯಡ್ ಸುದರ್ಶನ ಹೋಮ ಬೊಕ್ಕ ನ.23 ಬುಧಾರದಾನಿ ಬೊಲ್ಪುಗು 9 ಗಂಟೆಗ್ ಸರಿಯಾದ್ ಶ್ರೀ ಕೋರ್ದಬ್ಬು ಬೊಕ್ಕ ಸಂಕೋಲೆ ಗುಳಿಗ ದೈವಲೆನ ದರ್ಶನ ಸೇವೆ ನಡಪರೆ ಉಂಡು.
ಅಂಚನೆ ಕರಿನ ಸುಮಾರ್ ವರ್ಷೊರ್ದಿಂಚಿ ಅಜೀರ್ಣಾವಸ್ಥೆಡ್ ಇಪ್ಪುನ ಕೋಟ್ರಗುತ್ತುದ ಶ್ರೀ ಕೋರ್ದಬ್ಬು ದೇವಲ್ಯನ್, ಇತ್ತೆದ ಕೋಟ್ರಗುತ್ತುದ ಇಲ್ಲದಕ್ಲು, ಚಾಕರಿ ವರ್ಗದಕ್ಲು ಬೊಕ್ಕ ಊರುದಕ್ಲು ಮಾತ ಒಟ್ಟು ಸೇರ್ದ್ ಶ್ರೀ ದೈವದ ಜೀರ್ಣೋದ್ಧಾರ ಕಾರ್ಯನ್ ಮಲ್ಪುನ ಸಲುವಾದ್, ಶ್ರೀ ಕೋರ್ದಬ್ಬು ಜೀರ್ಣೋದ್ಧಾರ ಸಮಿತಿ ರಚನೆ ಮಲ್ತ್ ದ್, ಆಯಿನಲೆಕ್ಕನೇ ಈ ಕಾರ್ಯದ ಸುರುತ ಹಂತವಾದ್ ಶ್ರೀ ದೈವಲೆಗ್ ಸಂಬಂಧ ಪಟ್ಟಿನ ಜಾಗೆಡ್ ತಾಂಬೂಲ ಪ್ರಶ್ನಾ ಚಿಂತನೆನ್ ನಡಪಾಯೆರ್.
ಅಂಚನೆ ಈ ಮಾತ ಲೇಸ್ ಗ್ ಶ್ರೀ ಕೋರ್ದಬ್ಬು ದೈವೊಲ್ಯಗ್ ಸಂಬಂಧ ಪಟ್ಟಿನ ಊರುದ ಮತ ಭಕ್ತೆರ್ ಹೆಚ್ಚದ ಸಂಖ್ಯೆಡ್ ಸೇರ್ದ್ ಪಾಲ್ ಪಡೆವೊಡು. ಅಂಚನೆ ತನು ಮನ ಧನಲೆರ್ದ್ ಸಹಕಾರ ಮಲ್ಪುನ ಮುಖೇನ ಜೀರ್ಣೋದ್ಧಾರ ಕಾರ್ಯ ಆಯಿನಾತ್ ಬೇಗ ಅಪುಲೆಕ್ಕ ನಿಕ್ಲೆನ ಕೊಡುಗೆನ್ ಕೊರ್ದು, ಶ್ರೀ ಕೊರ್ದಬ್ಬು ಬೊಕ್ಕ ಪರಿವಾರ ದೈವಲೆನ ಕೃಪೆಗ್ ಪಾತ್ರರಾವೋಡು ಪಂದ್ ಕೆ. ಪದ್ಮನಾಭ ರೈ, ಕೋಟ್ರಗುತ್ತು ಬೊಕ್ಕ ಇಲ್ಲದಕುಲು, ಅಂಬ್ಲಮೊಗರು ಕೋಟ್ರಗುತ್ತು ಶ್ರೀ ಕೋರ್ದಬ್ಬು ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್, ಸಂಜೀವ ಗುರ್ಕಾರ್ಲು ಬೊಕ್ಕ ಚಾಕರಿದಕುಲು ಲೆಪ್ಪೋಲೆಡ್ ತೆರಿಪಾದೆರ್.
ಬೆಂಗ್ಲೂರ್: ಪೇಂಟೆದ ಖಾಸಗಿ ಕಾಲೇಜ್ ದ ಮೂಜಿ ಜನ ವಿದ್ಯಾರ್ಥಿಲು ಕಾಲೇಜ್ ದ ಕೈತಲ್ ಪಾಕಿಸ್ತಾನದ ಪರ ಘೋಷಣೆ ಪಾಡ್ದೆರ್.
ಈ ಬಗೆಟ್ ಮಾರತ್ ಹಳ್ಳಿ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ರಿಯಾ, ದಿನಕರ್ ಬೊಕ್ಕ ಆರ್ಯನ್ ಈ ಕೇಸ್ ದ ಆರೋಪಿಲು. ಪೊಲೀಸೆರ್ ಮೂಜಿ ಜನ ವಿದ್ಯಾರ್ಥಿಲೆನ ಸುರುತ ವಿಚಾರಣೆ ನಡಪದೆರ್. ಇನಿ ಕೂಡ ವಿಚಾರಣೆಗ್ ಹಾಜರ್ ಆಯೆರೆ ಪಂತೆರ್. ರಿಯಾ ಹುಬ್ಬಳ್ಳಿ ಮೂಲದಾರ್. ಬೊಕ್ಕ ರಡ್ಡ್ ಜನ ಪಿದಯಿ ರಾಜ್ಯದ ವಿದ್ಯಾರ್ಥಿಲು ಪಂದ್ ತೆರಿದ್ ಬೈದ್ಂಡ್.
