2022

ರಂಗೋಲಿದಂಚ ಅರಳುನ ಕಲಾವಿದೆ ಪ್ರಶಾಂತ್ ಸುವರ್ಣ

ಸಾಹಸದ ಒಟ್ಟು ಉಪ್ಪುನ ಸಾಧನೆ ಬರೆಪಿನಾತ್ ಸುಲಭ ಅತ್ತ್ , ಅವೆನ್ ಅನುಭವಿಸಿನಾಯೆಗೆ ಐತ ಗೇನ ಉಪ್ಪುಂಡು . ಸಾಧನೆ ಮಲ್ಪೊಡು ಪಂದ್ ಆಂಡ ಸಾಹಸ ಮಲ್ಪೊಡು,ಸಾಹಸ ದಾoತಿನ ಸಾಧನೆಗ್ ದಾಸೆಮಿದಾತ್ಲಾ ಬಿಲೆ ಇಜ್ಜಿ ಪನ್ಪಿನವು ಸ್ಪಷ್ಟ.!

ಕಲ್ಪುನ ಉಮೇದ್ ಇತ್ತುಂಡ
ಯಾವು, ಮಾತಾ ಕಲೆನ್
ಕರಗತ ಮಲ್ತೊಂದು ಸಾಧನೆದ ಮುಟ್ಟು ಏರ್ದ್ ಸಾಧನೆ ಮಲ್ಪರೆ ಸಾಧ್ಯ. ಕಲಿಕಾ ಉಮೇದ್ ದ ಒಟ್ಟುಗು ಕಲೆತ ಉಲಯಿ ತನನ್ ತಾನ್ ತೊಡಗಾವೊಂದು ಉಪ್ಪುನ ಅಪ್ರತಿಮಾ ಕಲಾ ಪ್ರತಿಭೆ ದೂರದ ಬೊಂಬಾಯಿದ ಪ್ರಶಾಂತ್ ಸುವರ್ಣ.

ಮಾಧವ್ ಸುವರ್ಣ ಬೊಕ್ಕ ಲಕ್ಷ್ಮಿ ಸುವರ್ಣ ದಂಪತಿಲೆನ ಸುಪುತ್ರೆಯಾಯಿನ ಮೇರ್ ಬೊಂಬಾಯಿದ ಗುರುನಾನಕ್ ಪ್ರೌಢ ಶಾಲೆಡ್ ತನ್ನ ಪ್ರಾಥಮಿಕ ಶಿಕ್ಷಣ ಮುಗಿತ್ದ್ ಗುರುನಾನಕ್ ಹೈಯರ್ ಸೆಕೆಂಡರಿ ಕಾಲೇಜ್ ಡ್ ಪದವಿ ಶಿಕ್ಷಣ ಮಲ್ತ್ ಬೊಂಬಾಯಿದ ಸರ್ ಜೆಜೆ ಸ್ಕೂಲ್ ಆಫ್ ಆರ್ಟ್ ಡ್ ಬಿ. ಎಫ್. ಎ ಡ್ ಫಸ್ಟ್ ಕ್ಲಾಸ್ ಅಂಕೊ ಪಡೆದ್ MET ಲೀಗ್ ಆಫ್ ಕೊಲ್ಯಾಜ್ ಡ್ ಕಲೆ ಬೊಕ್ಕ ವಿನ್ಯಾಸದ ಅಧ್ಯಾಪಕೆಯಾದ್ ಬೆನ್ನಿ ಬೆನೊಂದು ಉಲ್ಲೆರ್.ಬಡತನದ ಬೇಗೆಡ್ ಬುಲೆಯಿನ ತಾಮರೆ ಇನಿ ಅರಲ್ದ್ ಉಂತುದುಂಡು.ಕಿನ್ಯ ಪ್ರಾಯೊಡೇ ರಂಗೋಲಿದಂಚಿನ ಸಾಂಪ್ರದಾಯಿಕ ಕಲೆಕ್ಕಾದ್ ಬೇಲೆ ಮಲ್ಪರೆ ಉಮೇದ್ ಇತ್ತಿನ ಪ್ರಶಾಂತ್ ವಿಭಿನ್ನ ರೀತಿಡ್ ತನ್ನ ಚಿತ್ರಣದ ಮುಖೇನ ಬಾರಿ ಪೊರ್ಲುಡೆ ರಂಗೋಲಿ ಬುಡ್ಪಾವುನ ಕಲಾವಿದೆ.ಚಿತ್ರ ಬುಡ್ಪಾವುನವು ಸುಲಭ ಆಂಡ ಆ ಚಿತ್ರಣಡ್ ಒಂಜಿ ಅರ್ಥ ನಾಡುಲಕ ಜನಕ್ಲೆನ ಮನಸ್ಗ್ ಮುದ ಕೊರ್ಪಿನಂಚಿನ ಚಿತ್ರನ್ ಬುಡ್ಪಾವುನ ಅತ್ಯಧ್ಭುತ ಕಲಾವಿದೆ ಮೇರ್ ಪಂಡ ತಪ್ಪಾವಂದ್.

” ಕನಸೆಂಬ ಕುದುರೆಯನ್ನೇರಿ ನಾ ಹೊರಟಿರುವೆ ಪನ್ಪಿನಲೆಕ್ಕ ಮೆರೆಗ್ ತಾನೋರಿ ಮಾಮಲ್ಲ ಚಿತ್ರ ಕಲಾವಿದೆ ಆದ್ ಗುರ್ತಿಸಾವೊಡು ಪನ್ಪಿ ಆಸೆ.ಬಂಗ ಉಪ್ಪುನoಚಿನ ಕಲೆನ್ ಕಲ್ತ್ ಐಟ್ ದಾಲ ಸಾಧನೆ ಮಲ್ಪೊಡು ಪನ್ಪಿ ಹಂಬಲೊಡು ಪೊಸ ಪೊಸ ವಿಷಯೊಲೆನ್ ಕಲ್ಪುನಲ್ಪ ಉಮೇದ್ ತೋಜಾವುನಾರ್ ಮೇರ್.

“ಬಾನೋದ ಒಂಜಿ ಮೂಲೆರ್ದ್ ಸೂರ್ಯ ಮೆಲ್ಲನೆ ಬೊಲ್ಪು ಪತ್ತೊಂದು ಮಿತ್ತ್ ಬರ್ಪಿನಲೆಕ್ಕ ಯಶಸ್ಸ್ ದ ಮುಟ್ಟು ಏರ್ದ್ ನಿಧಾನವಾದ್ ,ಭದ್ರವಾದ್ ,ಒಂಜೊಂಜೆ ಪಜ್ಜೆ ದೀದ್ ಮಿತ್ತ್ ಬರೊಡು ಎದುರು ದೀನ ಪಜ್ಜೆ ಪಿರ ದೀವಂದೆ ಗುರಿ ಮುಟ್ಟೋಡು ಪಂದ್ ಪ್ರಶಾಂತ್ ಪನ್ಪೆರ್.

ತನ್ನ ಈ ಸಾಧನೆಗ್ ತನ್ನ ಸುತ್ತ ಉಪ್ಪುನಂಚಿನ ಜೀವಂತ ಬೊಕ್ಕ ನಿರ್ಜೀವವಾಯಿನ ವಸ್ತು ಬೊಕ್ಕ ವ್ಯಕ್ತಿಲು ಪಂದ್ ಮೇರ್ ಪನ್ಪೆರ್ . “ನನಗೆ ನಾನೇ ಗುರು ” ಪನ್ಪಿ ಪಾತೆರದಕಲಕ ಅವ್ವೆತೋ ಕಲಾವಿದೆರೆನ್ ತೂದು ಅವ್ವೆತೋ ವಿಷಯಲೆನ್ ಕಲ್ತ್ ದೆ ಆಂಡ ಅಕುಲು ಮಲ್ಪುನ ಕಲೆನ್ ತೂಪುನೆರ್ದ್ ಕಲ್ಪರೆ ಸಾಧ್ಯ ಇಜ್ಜಿ ಈ ವಿಶಿಷ್ಟ ಕಲಾ ಪ್ರಕಾರೊಡು ಅನುಭವಿಯಾಯಿನ ಮಾಸ್ಟರ್ ಗುನ್ವಂತ್ ಮಂಜ್ರೇಕರ್ ನ್ ತೂದು ತಾನ್ ಅವ್ವೆತೋ ಇಚಾರಲೆನ್ ತಾನ್ ಕಲ್ತ್ದೆ ಪಂದ್ ಪ್ರಶಾಂತ್ ಪನ್ಪೆರ್ .

ನೃತ್ಯ, ಗಜಲ್, ನಟನೆ, ರಂಗೋಲಿ ಚಿತ್ರ ಕಲೆ ಇಂಚ ಅವ್ವೆತೋ ಕಲೆಕ್ಲೆನ್ ಕರಗತ ಮಲ್ತೊಂದು ಉಲ್ಲೆರ್.
“ತನ್ನ ಅನುಭವಡ್ ರಂಗೋಲಿ ಬುಡ್ಪಾವುನವು ಪೊಣ್ಣು ಪೊಂಜೊವ್ಲೆಗ್ ಪಂದ್ ಪಂಡೆರ್ ಆಂಡ ಇನಿಕಾನಗ ತಾನ್ ಮಲ್ಪುನ ಈ ಬೇಲೆಗ್ ಪೊಣ್ಣುಲುಲಾ ಕೈ ಜೋಡಾವುನ ಬಾರಿ ಕುಸಿತ ಇಚಾರ ಪಂದ್ ಪ್ರಶಾಂತ್ ಪನ್ಪೆರ್.” ರಂಗೋಲಿ ಕಲೆನ್ ಅಂತರಾಷ್ಟ್ರೀಯ ಮಟ್ಟೋಗು ಕನಪಿನವು ಮೆರೆನ ಮಾಮಲ್ಲ ಕನ ಆದ್ ಉಂಡು.

ಮೆರೆನ್ ತೂನಗ ಸಂಸ್ಕೃತದ ಒಂಜಿ ವಾಕ್ಯ ನೆಂಪುಗು ಬರ್ಪುಂಡು . *ಸರ್ವೇ ಜನಾ ಸುಖಿನೋ ಭಂವತು* ಈ ಸಾಧಕೆಗ್ಲಾ ಈ ವಾಕ್ಯಗ್ಲಾ ಬಾರಿ ಹೋಲಿಕೆ ಉಂಡು . ಮಾತೆರೆನ್ಲ ಮೋಕೆ ಮಲ್ಪುನ ಗುಣ,ಮಾತೆರ್ಡಲ ಒಂಜಾದ್ ಒಗ್ಗಟ್ಟಾದ್ ಉಪ್ಪುನ ಸಹೃದಯ ಮನಸ್, ಜೋಕ್ಲೆನ ಒಟ್ಟುಗು ಬಾಲೆ ಆದ್ ,ಪಿರಿಯಾಕ್ಲೆನ ಒಟ್ಟುಗು ಮೋಕೆದ ಮಗೆಯಾದ್ ,ಕಿರಿಯಾಕ್ಲೆಗ್ ಸಾಕಾರ ಕೊರ್ಪಿನ ಪಲಯೆಯಾದ್, ಸಮಾಜೊಡು ಅಜಾತಶತ್ರುವಾದ್ ತೋಜುನಾರ್ ಪ್ರಶಾಂತ್ ಸುವರ್ಣ.ಪುದರ್ ದ ಪಿರವು ಪೋವಂದೆ ತನ್ನ ಇಷ್ಟಗಾದ್ ಬೇಲೆ ಮಲ್ತೊಂದು ತನ್ನ ಖುಷಿಕಾದ್ ಮಲ್ಪುನ ಬೇಲೆನ್ ಪ್ರಾಮಾಣಿಕವಾದ್ ನಿಷ್ಠೆಡ್ ಮಲ್ತುಂಡ ಒವುಲಾ ಅಸಾಧ್ಯ ಅತ್ತ್ ಪನ್ಪಿನವು ಮೆರೆನ ಆಶಯ.

ಎಲೆಮರೆದಂಚಿನ ಅದ್ಭುತವಾಯಿನ ಕಲಾ ಪ್ರಾಮೀಣ್ಯತೆಯುಪ್ಪುನ ಪ್ರಶಾಂತ್ ನ ಕಲಾ ಬದ್ಕ್ ಗ್ ನನಾತ್ ಬೊಲ್ಪು ಕೊರ್ಪಿನ ಪ್ರೋತ್ಸಾಹ ತಿಕ್ಕಡ್, ಸಾಧನೆದ ತಾದಿಗ್ ಪುರ್ಪದಲಕ ಅವಕಾಶದ ಮತ್ತರ್ಮೆ ನಾಡೊಂದು ಬರಡ್, ಕಲ್ತಿನ ಕಲೆ ಅಕ್ಷಯವಾದ್ ಉಪ್ಪಡ್ ಪನ್ಪಿನವು ಟೈಮ್ಸ್ ಆಫ್ ಕುಡ್ಲ ಪತ್ರಿಕೆದ ಆಶಯ.