ಒಡಿಪು : ಸುಗುಣೇಂದ್ರತೀರ್ಥ ಶ್ರೀಪಾದೆರ್ ತನ್ನ ಚತುರ್ಥ ಪರ್ಯಾಯದ ಪರವಾದ್ ಮಲ್ತಿನ ಕೋಟಿ ಗೀತಾ ಲೇಖನಯಜ್ಞದ ಕೋಟಿ ಲೇಖನ ಬೂಕುದ ಮೆರವಣಿಗೆ ರಥಬೀದಿಡ್ ನಡತುಂಡು .
ಕೋಟಿ ಲೇಖನ ಬೂಕುದ ಇಂಗ್ಲಿಷ್ ಆವೃತ್ತಿನ್ ಶ್ರೀ ಅದಮಾರು ಮಠದ ಪೆರಿಯ ಶ್ರೀಪಾದೆರಾಯಿನ ಶ್ರೀ ಶ್ರೀ ವಿಶ್ವಪ್ರಿಯತೀರ್ಥ ಶ್ರೀಪಾದೆರ್ ಅಂಚನೆ ಕನ್ನಡ ಆವೃತ್ತಿನ್ ಶ್ರೀ ಪೇಜಾವರ ಮಠದ ಶ್ರೀ ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದೆರ್ ಮಹತೋಭಾರ ಶ್ರೀ ಅನಂತೇಶ್ವರ ದೇವಲ್ಯೋಡು ಬುಡುಗಡೆ ಮಲ್ತೆರ್.
ಈ ಲೇಸ್ ದ ಗುರ್ಕಾರ್ಲಾಯಿನ ಪರಮಪೂಜ್ಯ ಶ್ರೀ ಶ್ರೀ ಸುಗುಣೇಂದ್ರ ತೀರ್ಥ ಶ್ರೀಪಾದೆರ್ ಎಡ್ಡೆಪುದ ನುಡಿ ಪಂಡೆರ್.
ಬ್ರಹ್ಮವರ : ದುರ್ಗಾ ಇಂಗ್ಲಿಷ್ ಮೀಡಿಯಂ ಸ್ಕೂಲ್ ಕೊಕ್ಕರ್ಣೆ ನೆತ್ತ ಪೊಸ ಶ್ರೀ ಕರೆ ಶಂಕರ್ ಶೆಟ್ಟಿ ಹುಬ್ಬಳ್ಳಿ ಆಡಿಟೋರಿಯಂ ಉದಿಪನದ ಲೇಸ್ ಕೋಡೆ ನಡತ್oಡ್ .ಶಾಸಕೆರಾಯಿನ ಶ್ರೀ ಕೆ. ರಘುಪತಿ ಭಟ್ ಲೇಸ್ ಉದಿಪನ ಮಲ್ತೆರ್.
ಈ ಪೊರ್ತುಡು ಸಭಾಪತಿಲಾಯಿನ ಬಸವರಾಜ್ ಹೊರಟ್ಟಿ, ಕೊಕ್ಕರ್ಣೆ ಶ್ರೀ ಅನಿತಾ ಎಜುಕೇಶನಲ್ ಸೊಸೈಟಿ ಗುರ್ಕಾರ್ಲಾಯಿನ ಎಸ್.ಬಿ ಶೆಟ್ಟಿ, ಹುಬ್ಬಳ್ಳಿ, ಧಾರವಾಡ ಬಂಟರ ಸಂಘದ ಗುರ್ಕಾರ್ಲಾಯಿನ ಸುಭಾಷ್ ಚಂದ್ರ ಶೆಟ್ಟಿ, ಕೊಕ್ಕರ್ಣೆ ಗ್ರಾಮ ಪಂಚಾಯತ್ ಗುರ್ಕಾರ್ಲಾಯಿನ ಲಕ್ಷ್ಮಿ, ಹುಬ್ಬಳ್ಳಿ ಶೆಟ್ಟಿಸ್ ಕನ್ಸ್ಕ್ಷನ್ ನ ಪ್ರಸನ್ನ ಶೆಟ್ಟಿ, ಬ್ರಹ್ಮಾವರ ನ್ಯೂ ಕರ್ನಾಟಕ ಬಿಲ್ಡರ್ಸ್ ಅಂಡ್ ಡೆವಲಪರ್ ನ ಚೇತನ್ ಕುಮಾರ್ ಶೆಟ್ಟಿ, ಉದ್ಯಮಿಲಾಯಿನ ಸುಗ್ಗಿ ಸುಧಾಕರ್ ಶೆಟ್ಟಿ ಬೊಕ್ಕ ಶಾಲೆದ ಆಡಳಿತ ಮಂಡಳಿ ಸದಸ್ಯೇರ್ ಪಾಲ್ ಪಡೆದಿತ್ತೆರ್.
ತೆಲಂಗಾಣ: ಕರಿನ ಕೋವಿಡ್ ಲಾಕ್ ಡೌನ್ ಪೊರ್ತುಡು ಬರೋಬ್ಬರಿ 1400 ಕಿಲೋ ಮೀಟರ್ ದೂರ ಸ್ಕೂಟರ್ ಡೆ ಪೋದು ತನ್ನ ಮಗನ್ ಲೆತೊಂದು ಬರ್ಪಿನ ಮುಖೇನ ಮೂಲಕ ತೆಲಂಗಾಣದ ನಿಜಾಮ್ ಬಾದ್ ಜಿಲ್ಲೆದ ಶಾಲಾ ಶಿಕ್ಷಕಿ ರಝಿಯಾ ಬೇಗಂ ಭಾರೀ ಸುದ್ದಿಯಾದ್ ಇತ್ತೆರ್ .
ಇನಿ ಅರೇನ ಮಗೆ ಯುದ್ಧ ಪೀಡಿತ ಉಕ್ರೇನ್ ಡ್ ಉಲ್ಲೆರ್ . ಅಪ್ಪೆ ದಾಲ ಮಲ್ಪರೆ ಆವಂದೆ ಬಂಗಡ್ ಉಲ್ಲೆರ್ . ರಝಿಯಾ ಬೇಗಂನ ಮಗೆ ನಿಝಾಮುದ್ದೀನ್ ಅಮಾನ್ ಉಕ್ರೇನ್ ದ ಸುಮಿ ಪ್ರಾಂತ್ಯಡ್ ಕಲ್ತೊಂದು ಉಲ್ಲೆರ್ , ಎಂಬಿಬಿಎಸ್ ದ ಸುರುತ ವರ್ಷದ ವಿದ್ಯಾರ್ಥಿಯಾದ್ ಉಲ್ಲೆರ್ .
ತನ್ನ ಮಗೆನ ಒಟ್ಟುಗು ಸಂಕಷ್ಟಡ್ ಉಪ್ಪುನ ಮಾತಾ ಜೋಕ್ಲೆನ್ ಲೆತೊಂದು ಬರ್ಪಿನ ವ್ಯವಸ್ಥೆ ಮಲ್ಪರೆ ಅಪ್ಪೆ ರಝಿಯಾ ಬೇಗಂ ಪ್ರಧಾನ ಮಂತ್ರಿ ಮೋದಿ, ತೆಲಂಗಾಣ ಸಿಎಂ ಕೆಸಿಆರ್, ತೆಲಂಗಾಣ ಗೃಹ ಸಚಿವ ಮಹಮ್ಮದ್ ಮಹ್ಮದ್ ಅಲಿಗ್ ಬಿನ್ನಾಪು ಮಲ್ದೆರ್.
ಕುಡ್ಲ : ಕುಡ್ಲ ಉತ್ತರ ವಿಧಾನ ಸಭಾ ಕ್ಷೇತ್ರದ ಶಾಸಕಕೆರಾಯಿನ ಡಾ. ಭರತ್ ಶೆಟ್ಟಿ ವೈ ಮೇರ್ ಶನಿವಾರ ಕುಡ್ಲದ ಮಿನಿ ವಿಧಾನಸೌಧಡ್ ಉಪ್ಪುನ ತಾಲೂಕು ಕಚೇರಿಗ್ ಪನಂದೆ ಭೇಟಿ ಕೊರಿಯೆರ್ .
ಕಂದಾಯ ವಿಭಾಗ ಭೂಮಿ ವಿಭಾಗ, ಸ್ವೀಕೃತಿ ಕೇಂದ್ರ ಬೊಕ್ಕ ದಾಖಲೆ ವಿಭಾಗಗ್ ಭೇಟಿ ಕೊರ್ದು ಪರಿಶೀಲನೆ ಮಲ್ತೆರ್ .
ದಾಖಲೆ ಕೇಂದ್ರೊಡು ಕೊರ್ಪಿನ ದಾಖಲೆಲು ತಿಕ್ಕoದೆ ಅವೆತೋ ಸಲ ತಿರ್ಗುನ ಪರಿಸ್ಥಿತಿ ಉಂಡು ಪಂದ್ ಸಾರ್ವಜನಿಕೆರ್ ದೂರು ಕೊರಿಯೆರ್.
ಕುಡ್ಲ : ಕುಡ್ಲದ ಟೌನ್ ಹಾಲ್ ಕೈತಲ್ ಉಪ್ಪುನ ಫುಟ್ಬಾಲ್ ಮೈದಾನದ ಪ್ರವೇಶ ದ್ವಾರದ ಕೈತಲ್ ಮರಕ್ ತೂ ಪಾರ್ದಿನ ಘಟನೆ ನಡತ್oಡ್ . ಕೆಲ ದಿನತ ಪಿರವು ಅಲಂಗಾರುದ ಕೈತಲ್ ಇಂಚಿನ ಪ್ರಕರಣ ಆದ್ ಇತ್ತುಂಡು ಐರ್ದ್ ಬೊಕ್ಕ ಪರಿಸರವಾದಿ ಬೊಕ್ಕ ಉಪ ಮೀಸಲು ಅರಣ್ಯಾಧಿಕಾರಿಲು ಜಾಗೆಗ್ ಬತ್ತ್ ದ್ ತೂ ತೆಕ್ಕಯೆರೆ ಪ್ರಯತ್ನ ಮಲ್ತ್ ಇತ್ತೆರ್. . ಇತ್ತೇ ಟೌನ್ ಹಾಲ್ ಬಳಿಕೈತಲ್ಲಾ ಇಂಚಿನನೇ ಘಟನೆ ನಡತ್oಡ್ ,. ಈ ಬಗ್ಗೆ ಬರ್ಕೆ ಪೊಲೀಸ್ ಠಾಣೆಡ್ ಪ್ರಕರಣ ದಾಖಲ್ ಆತುಂಡು.
ಕಾರ್ಲ : ಜೆಸಿಐ ಕಾರ್ಲದ ಪದಗ್ರಹಣ ಲೇಸ್ ತಾರಿಕ್ 7.3.2022 ನೇ ಸೋಮಾರ ಬೈಯ್ಯಗ್ 7 ಗಂಟೆಗ್ ಜೆಸಿಸ್ ಇಂಗ್ಲಿಷ್ ಮೀಡಿಯಂ ಸ್ಕೂಲ್ ಕಾರ್ಲಡ್ ನಡಪರೆ ಉಂಡು .
ಜೆಸಿ.ಡಾ.ಮುರಳಿಧರ್ ಭಟ್ ಪೊಸ ಗುರ್ಕಾರ್ಲಾದ್ , ಜೆಸಿ ಶ್ವೇತಾ ಜೈನ್ ಮೇರ್ ಕಾರ್ಯದರ್ಶಿಯಾದ್ ಆಯ್ಕೆ ಆತೆರ್ .
ಕಾರ್ಲಾ : ಕಾರ್ಲಾ ಉತ್ಸವ -2022 , ವಿನೂತನ ಲೇಸ್ ಮಾರ್ಚ್ 10 ರ್ದ್ ಮಾರ್ಚ್ 20 ಮುಟ ಕಾರ್ಲಾಡ್ ನಡಪರೆ ಉಂಡು ನೆತ್ತ ವಿಶೇಷ ಆಕರ್ಷಣೆಡ್ ಒಂಜಾಯಿನ ಹೆಲಿಕಾಪ್ಟರ್ ರೈಡ್.
ನೆತ್ತ ಪೂರ್ವ ತಯಾರಿಯಾದ್ ಕಾರ್ಲಾ ಉಚ್ಚಯದ ಹೆಲಿಕಾಪ್ಟರ್ ಸಮಿತಿದ ಪೂರ್ವಭಾವಿ ಸಭೆ ತಾರಿಕ್ 5.3.2022 ಕ್ಕ್ ಕಾರ್ಲಾ ತಾಲೂಕು ಕ್ರೀಡಾಂಗಣಡ್ ನಡತ್oಡ್ .ಈ ಸಭೆಟ್ ಸಮಿತಿದ ಮಾತಾ ಸದಸ್ಯೆರ್ ಪಾಲ್ ಪಡೆದ್ ಜನಕ್ಲೆಗ್ ಅನುಕೂಲ ಆಪಿಲಕ ವ್ಯವಸ್ಥೆಲೆನ್ ಮಲ್ಪುನ ನೆಲೆಟ್ಟ್ ಜವಾಬ್ದಾರಿಲೆನ್ ಸದಸ್ಯೆರೆಗ್ ಕೊರಿಯೆರ್.
ಕಾರ್ಲ : ಶ್ರೀ ಲಕ್ಷ್ಮಿ ಅಂಬಾಭವಾನಿ ದೇವಸ್ಥಾನ ದುರ್ಗ ದೇವಸ್ಥಾನದ ಪ್ರತಿಷ್ಠಾ ವರ್ಧಂತಿ ಬೊಕ್ಕ ಚಂಡಿಕಾಯಾಗ ತಾರಿಕ್ 12/03/2022 ನೇ ಸನಿಯಾರ ನಡಪರೆ ಉಂಡು ಅವ್ವೆ ದಿನ ರಾತ್ರಿ 9 ಗಂಟೆಗ್ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ಕೃಪಾಪೋಷಿತ ದಶಾವತಾರ ಯಕ್ಷಗಾನ ಮಂಡಳಿ ಮುಲ್ಕಿ ಮೆಕ್ಲೆನೆರ್ದ್ ಶ್ರೀದೇವಿ ಮಾರಿಯಮ್ಮ ಯಕ್ಷಗಾನ ನಡಪರೆ ಉಂಡು.
ಸುಬ್ರಮಣ್ಯ : ಎಸ್ ಎಸ್ ಪಿ ಯು ಕಾಲೇಜ್ದ ರೇಂಜರ್ಸ್ ಬೊಕ್ಕ ರೋವರ್ಸ್ ಜೋಕ್ಲೆನೆರ್ದ್ ನಿರ್ಮಲ ಮಲ್ಪುನ ಲೇಸ್ ಇನಿ ತಿಮ್ಮಕ್ಕ ಪಾರ್ಕ್ಡ್ ನಡತ್oಡ್.
ರೋವರ್ಸ್ ಬೊಕ್ಕ ರೇಂಜರ್ಸ್ ಜೋಕ್ಲೆಗ್ ಪ್ರವೇಶ ಬ್ಯಾಜ್ನ್ ಕೊರಿಯೆರ್ .ರೋವರ್ಸ್ ಶಿಕ್ಷಕೆರಾಯಿನ ಪ್ರವೀಣ್ ರೇಂಜರ್ಸ್ ಶಿಕ್ಷಕಿಯಾಯಿನ ಸವಿತಾ ಕೈಲಾಸ್ ಮೇರ್ ಜೋಕ್ಲೆಗ್ ಮಾರ್ಗದರ್ಶನ ಬೊಕ್ಕ ಸಾಕಾರ ಕೊರಿಯೆರ್.
ಈ ಪೊರ್ತುಡು ಅರಣ್ಯ ಇಲಾಖೆದ ಚಂದ್ರ ಬೊಕ್ಕ ಸಿಬ್ಬಂದಿ ಅಂಚನೆ ಕೈಲಾಸ್ ಭಟ್ ಪಾಲ್ ಪಡೆದಿತ್ತೆರ್.
ರೋವರ್ಸ್ದ 36 ಜೋಕುಲು,ರೇಂಜರ್ಸ್ 27 ಜನ ಜೋಕುಲು ಈ ಕಾರ್ಯಡ್ ಪಾಲ್ ಪಡೆದಿತ್ತೆರ್.
ವರದಿ : ಗೋಪಿಚಂದನ್ ಕೆ. ಎಸ್
ಒಡಿಪು : ಯುದ್ಧ ಪೀಡಿತ ಉಕ್ರೇನ್ದ ಖಾರ್ಕೀವ್ ನೇಶನಲ್ ಮೆಡಿಕಲ್ ಯುನಿವರ್ಸಿಟಿದ ಕಡೆತ ವರ್ಷದ ಮೆಡಿಕಲ್ ವಿದ್ಯಾರ್ಥಿ ರೋಹನ್ ಧನಂಜಯ್ ಮೇರ್ ಇನಿ ಕಾಂಡೆ ಭಾರತ ಸರಕಾರ ಅಟ್ಟನೆ ಮಲ್ತಿನ ವಿಮಾನೊಡು ಡೆಲ್ಲಿ ದ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗ್ ಬತ್ತೆರ್.
ಉಕ್ರೇನ್ರ್ದ್ ಬುಧಾರ ಪೊಲೆಂಡ್ಗ್ ಬತ್ತಿನ ಮೇರ್ ಕೋಡೆ ನಡುರಾತ್ರಿ 1:00 ಗಂಟೆಗ್ ಅಲ್ಪರ್ದ್,ಭಾರತಗ್ ಬೈದೆರ್ ಇನಿ ಕಾಂಡೆ ರಾಜ್ಯ ಸರಕಾರ ವ್ಯವಸ್ಥೆ ಮಲ್ತಿನ ವಿಮಾನೋಡು ರಾತ್ರಿ 9:30ಕ್ ಮೇರ್ ಬೆಂಗ್ಳೂರು ಮುಟ್ಟೆರೆ ಉಲ್ಲೆರ್ ಪಂದ್ ರೋಹನ್ ತಂದೆ ಬ್ರಹ್ಮಾವರ ಕೃಷಿ ವಿಜ್ಞಾನ ಕೇಂದ್ರದ ಮುಖ್ಯಸ್ಥ ಡಾ.ಬಿ. ಧನಂಜಯ್ ಪಂಡೆರ್ .
