2022

ದೇವೆರೆ ಪಾದ ಸೇರಿಯೆರ್ ಕಬಡ್ಡಿ ಪಟು, ಮಂಜೇಶ್ವರದ ಸುನಿಲ್ ಕುಮಾರ್

ಉಳ್ಳಾಲ: ಕೇರಳ ರಾಜ್ಯ ಅಮೆಚೂರು ಕಬ್ಬಡ್ಡಿ ತಂಡದ ಮಾಜಿ ನಾಯಕೆರ್ ಬೊಕ್ಕ‌ ರಾಷ್ಟ್ರೀಯ ತಂಡದ ಮಾಜಿ ಕಬಡ್ಡಿ ಪಟು ಮಂಜೇಶ್ವರ ನಿವಾಸಿ ಸುನಿಲ್ ಕುಮಾರ್ (53) ಇನಿ ತೀರ್ ಪೋಯೆರ್.

ಸಕ್ಕರೆ ರೋಗಡ್ ನರಲೊಂದು ಇತ್ತಿನ ಮೇರ್ ಗ್ಯಾಂಗ್ರೀನ್ ರ್ದ್ ಕೆಲವು ತಿಂಗೊರ್ಲೊದಿಂಚ ಹುಷಾರ್ ಇಜ್ಜಂದೆ ಇತ್ತೆರ್. ಸುರುಕ್ ಕೇರಳಡ್ ಇತ್ತಿನ ಅಬಕಾರಿ ಇಲಾಖೆಡ್ ಬೆನೊಂದು ಇತ್ತೆರ್. ಬೊಕ್ಕ ಉದ್ಯಮ ಮಲ್ತೊಂದಿತ್ತೆರ್. ಅತ್ತಂದೆ ಕಬ್ಬಡ್ಡಿ ಕೇರಳ ರಾಜ್ಯ ತಂಡದ ನಾಯಕೆರಾದ್ ಕೆಲವು ವರ್ಷದ ಕಾಲ ಮುತಾಲಿಕೆ ಒಹಿಸೊಂದು ಕೆಲವು ಗೆಂದುನ ಜಬದಾರಿನ್ ನಿರ್ವಹಿಸಯೆರ್. ರಾಷ್ಟ್ರಮಟ್ಟದ ತಂಡಡ್ ಎಡ್ಡೆ ಗೊಬ್ಬುಗಾರೆ ಆದ್ ಮೆನ್ಕಿನ ಮೇರ್ ಕಾಸ್ರೋಡು ಜಿಲ್ಲೆದ ಕೆಲವು ಗೊಬ್ಬುನ ಜವನೆರೆನ್ ರಾಜ್ಯ ತಂಡಡ್ ಗೊಬ್ಬರೆ ಅವಕಾಶನ್ ಕೊರ್ಪಯೆರೆ. ಮೆರೆನ ಸಾವುಗ್ ಉಮಾಮಹೇಶ್ವರಿ ಕಬ್ಬಡ್ಡಿ ಅಮೆಚೂರು ಅಸೋಸಿಯೇಷನ್ ದಕುಲು ಕಣ್ಣೀರ್ ಪಾಡ್ದೆರ್.

ಪಿದಯಿರ್ದ್ ಬತ್ತಿನಕ್ಲೆಗ್ ಝೀಕಾ ವೈರಸ್ ಟೆಸ್ಟ್ ಕಡ್ಡಾಯ

ರಾಜ್ಯಡ್ ಝೀಕಾ ವೈರಸ್ ಪತ್ತೆ ಆಯಿನ ಬಗೆಟ್ ಆರೋಗ್ಯ ಇಲಾಖೆ ರೋಗ ಲಕ್ಷಣ, ತಪಾಸಣೆ, ಚಿಕಿತ್ಸೆ ಕ್ರಮದ ಪಟ್ಟಿನ್ ಬುಡುಗಡೆ ಮಲ್ದ್ಂಡ್.

ರೋಗ ಲಕ್ಷಣ ಸೋಂಕು ಪತ್ತೆ ಮಲ್ತ್ ದ್, ಚಿಕಿತ್ಸೆ ಕೊರ್ಪುನ ಬಗೆಟ್ ಮಾರ್ಗಸೂಚಿನ್ ಕೊರ್ತುಂಡು. ಪಿದಯಿ ದೇಶ, ಪಿದಯಿ ರಾಜ್ಯರ್ದ್ ಪ್ರಯಾಣ ಮಲ್ತಿನ ವ್ಯಕ್ತಿಲು ಬೊಕ್ಕ ಬಂಜಿನಕುಲು ಕಡ್ಡಾಯವಾದ್ ಝೀಕಾ ವೈರಸ್ ಟೆಸ್ಟ್ ಮಲ್ಪಾವೊಡು. ಜ್ವರ, ತರೆಬೇನೆ, ಕಿಂರ್ಬುನೆ, ಕಣ್ಣ್ ದ ಬಣ್ಣ ಬದಲಾಪುನೆ ಝೀಕಾದ ಲಕ್ಷಣಲು. ನೆಕ್ ಜ್ವರಕ್ ಕೊರ್ಪುನ ಚಿಕಿತ್ಸೆನೆ ದೆತೊನೊಲಿ ಪಂದ್ ಇಲಾಖೆ ತೆರಿಪಾದ್ಂಡ್.

ಡಿ.17: ಪೆರ್ಲ ಬೈಪಾಡಿ ಸರಕಾರಿ ಪ್ರೌಢ ಶಾಲೆಡ್ ಬೊಳ್ಳಿ ಪರ್ಬ ಲೇಸ್

ಬೊಲ್ತೇರ್: ಪೆರ್ಲ ಬೈಪಾಡಿ ಸರಕಾರಿ ಪ್ರೌಢ ಶಾಲೆಡ್ ಬೊಳ್ಳಿ ಪರ್ಬ ಲೇಸ್ ಡಿ.17 ಶನಿಯಾರ ನಡಪರೆ ಉಂಡು.

ಬಯ್ಯಡ್ ಗುರುವಂದನೆ ಬೊಕ್ಕ ಪುರಸ್ಕಾರ ಲೇಸ್ ನಡಪುಂಡು. ಈ ಲೇಸ್ ಡ್ ಬೆಳಾಲು ಪ್ರಾ.ಕೃ.ಪ ಸರಕಾರಿ ಸಂಘದ ಅಧ್ಯಕ್ಷೆರ್ ಪದ್ಮ ಗೌಡ ರಾಷ್ಟ್ರದ ಕೊಡಿ ಏರಾಯೆರೆ ಉಲ್ಲೆರ್. ಅಧ್ಯಕ್ಷತೆನ್ ಪೆರ್ಲ ಬೈಪಾಡಿ ಎಸ್.ಡಿ.ಎಂ.ಸಿ. ಸ.ಪ್ರೌ. ಶಾಲೆದ ಕಾರ್ಯಧ್ಯೆಕ್ಷೆರ್ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಬೊಲ್ತೇರ್ ವಿಧಾನಸಭಾ ಕ್ಷೇತ್ರದ ಮಾಜಿ ಶಾಸಕೆರ್ ಕೆ.ವಸಂತ ಬಗೇರ ಪಾಲ್ ಪಡೆಯೆರೆ ಉಲ್ಲೆರ್. ಬಿನ್ನೆರಾದ್ ಬೊಲ್ತೇರ್ ಪ್ರೌ. ಶಾ. ಮುಖ್ಯ ಶಿಕ್ಷಕೆರೆನ ಸಂಘದ ಅಧ್ಯಕ್ಷೆರ್ ವೆಂಕಟೇಶ್ ತುಳುಪುಳೆ, ದ.ಕ ಪ್ರೌಢಶಾಲೆ ಸಹಶಿಕ್ಷಕರ ಸಂಘದ ಜಿಲ್ಲಾಧ್ಯೆಕ್ಷೆರ್ ಮಹಮ್ಮದ್‌ ರಿಯಾಝ್, ರಾಜ್ಯಮಟ್ಟದ ಎಡ್ಡೆ ಶಿಕ್ಷಕ ಪ್ರಶಸ್ತಿ ಪುರಸ್ಕೃತೆರ್ ಬೊಕ್ಕ ಕೊಯ್ಯೂರು ಸ.ಪ್ರೌಢ ಶಾಲೆದ ಮುಖ್ಯ ಶಿಕ್ಷಕೆರ್ ರಾಧಾಕೃಷ್ಣ ಟಿ., ಕೆ.ಎಸ್. ಆರ್.ಟಿ.ಸಿ. ಧರ್ಮಸ್ಥಳ ಘಟಕದ ವ್ಯವಸ್ಥಾಪಕೆರ್ ಉದಯ ಶೆಟ್ಟಿ, ಬಂದಾರ್ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಮೋಹನ್ ಬಂಗೇರ, ಭಾರತೀಯ ಭೂಸೇನೆ ನಿವೃತ್ತ ಯೋಧೆ ರಮೇಶ್ ಕೆ. ಬರಿಯೆರೆ ಉಲ್ಲೆರ್. ಬೊಕ್ಕ ಶಾಲೆದ ಕಲ್ಪಾರ್ಥಿಲೆರ್ದ್ ನೃತ್ಯ ವೈವಿಧ್ಯ ನಡಪುಂಡು.

ಬೊಕ್ಕ ಸಭಾ ಲೇಸ್. ಈ ಲೇಸ್ ಡ್ ಬೊಲ್ತೇರ್ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಹರೀಶ್ ಪೂಂಜ ದೀಪ ಅರ್ಲಾವೆರೆ ಉಲ್ಲೆರ್. ಅಧ್ಯಕ್ಷತೆನ್ ಬಂದಾರು ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಪರಮೇಶ್ವರಿ ಕೆ.ಗೌಡ ಒಯಿಸೊನ್ವೆರ್. ಭಾರತ ಸರಕಾರದ ರಾಜ್ಯಸಭೆ ಸಂಸದೆರ್ ಬೊಕ್ಕ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ಡಿ ವೀರೇಂದ್ರ ಹೆಗ್ಗಡೆ ಮೇರ್ ಶುಭಾಶಂಸನೆ ಕೊರಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಕರ್ನಾಟಕ ಸರಕಾರದ ವಿಧಾನ ಪರಿಷತ್ ಶಾಸಕೆರ್ ಕೆ. ಹರೀಶ್ ಕುಮಾರ್, ಬೊಕ್ಕ ಕೆ.ಪ್ರತಾಪಸಿಂಹ ನಾಯಕ್, ಬಂದಾರು ಗ್ರಾ.ಪಂ ಸದಸ್ಯೆರ್ ಮೋಹನ್ ಗೌಡ, ಭಾರತಿ, ಅನಿತಾ ಬೊಕ್ಕ ಬೊಲ್ತೇರ್ ಕ್ಷೇತ್ರದ ಶಿಕ್ಷಣಾಧಿಕಾರಿ ವಿರೂಪಾಕ್ಷಪ್ಪ ಎಚ್.ಎಸ್, ಉಜಿರೆ ಶ್ರೀ. ಧ. ಮಂ. ಪದವಿ ಕಾಲೇಜ್ ಸಹಾಯಕ ಪ್ರಾಧ್ಯಾಪಕೆರ್ ಶ್ರೀಧರ ಭಟ್, ಉಜಿರೆ ಬದುಕು ಕಟ್ಟೋಣ ಬನ್ನಿ ತಂಡದ ಸಂಚಾಲಕೆರ್ ಕೆ.ಮೋಹನ್ ಕುಮಾರ್, ಪದ್ಮುಂಜ ಪ್ರಾ.ಕೃ.ಪ.ಸರಕಾರಿ ಸಂಘದ ಅಧ್ಯಕ್ಷೆರ್ ರಕ್ಷಿತ್ ಶೆಟ್ಟಿ ಪಣಿಕ್ಕರ ಬರಿಯೆರೆ ಉಲ್ಲೆರ್. ಇಸೇಸವಾದ್ ಕಾಂತಾರ ಪಿಕ್ಚರ್ ದ ತುಳು ರಂಗಭೂಮಿ ಕಲಾವಿದೆರ್ ದೀಪಕ್ ರೈ ಪಾಣಾಜೆ ಬೊಕ್ಕ ಪ್ರಕಾಶ್ ತೂಮಿನಾಡು ಪಾಲ್ ಪಡೆಯೆರೆ ಉಲ್ಲೆರ್. ಬೊಕ್ಕ ಆರ್ಯಭಟ ಪ್ರಶಸ್ತಿ ಪುರಸ್ಕೃತೆರ್ ಉದಯಕುಮಾರ್ ಲಾಯಿಲ ಮೆರೆನ ಸಂಯೋಜನೆ ಬೊಕ್ಕ ನಿರ್ದೇಶನಡ್ ಶಾಲೆದ ಕಲ್ಪಾರ್ಥಿಲೆನ ಸಾಂಸ್ಕೃತಿಕ ಲೇಸ್ ತುಳುನಾಡ ವೈಭವ. ಬೊಕ್ಕ ಶಾಲೆದ ಹಳೆ ವಿದ್ಯಾರ್ಥಿ ಲೆನ ಮುತಾಲಿಕೆಡ್ ಐಸಿರಿ ಕಲಾವಿದೆರ್ ಮಂಜೇಶ್ವರ ‌ಮೊಕುಲು ಅಭಿನಯ ಮಲ್ಪುನ ತುಳು ಹಾಸ್ಯಮಯ ನಾಟಕ ಮಾತೆರ್ಲೆಕ ಅತ್ತ್ ನಡಪರೆ ಉಂಡು. ಈ ಲೇಸ್ ಗ್ ನಿಕುಲು ಮಾತ ಪಾಲ್ ಪಡೆವೊಡು ಪಂದ್ ಬೊಳ್ಳಿಪರ್ಬ ಆಚರಣಾ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಮೋಹನ್ ಗೌಡ ಕೋಡ್ಯೆಲು, ಎಸ್.ಡಿ‌.ಎಂ.ಸಿ. ಕಾರ್ಯಧ್ಯೆಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಮಹಾಬಲ ಗೌಡ ನಾಗಂದೋಡಿ, ಮುಖ್ಯ ಶಿಕ್ಷಕೆರ್ ಬೊಕ್ಕ ಸಹಶಿಕ್ಷಕ ವೃಂದ ಬಾಲಕೃಷ್ಣ ಕೊರಮೇರು, ಹಳೆ ವಿದ್ಯಾರ್ಥಿ ಸಂಘದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಕೇಶವ ಅಂಗಡಿಮಜಲು, ಬೊಳ್ಳಿಪರ್ಬ ಆಚರಣೆ ಸಮಿತಿದ ಸಂಚಾಲಕೆರ್ ಹರೀಶ್ ಪರಪ್ಪಾಜೆ, ಬೊಳ್ಳಿಪರ್ಬ ಆಚರಣೆ ಸಮಿತಿದ ಕೋಶಾಧಿಕಾರಿ ಉಮೇಶ್ ಅಂಗಡಿಮಜಲು, ಶಾಲಾ ವಿದ್ಯಾರ್ಥಿ ನಾಯಕಿ ಬೊಕ್ಕ ವಿದ್ಯಾರ್ಥಿ ವೃಂದ ಕು.ಸುಜನ್ಯಾ ಬೊಕ್ಕ ಬೊಳ್ಳಿಪರ್ಬ ಆಚರಣೆ ಸಮಿತಿ, ಶಾಲಾಭಿವೃದ್ಧಿ ಬೊಕ್ಕ ಮೇಲುಸ್ತುವಾರಿ ಸಮಿತಿ, ಪೋಷಕ ವೃಂದ ಬೊಕ್ಕ ಊರುದ ವಿದ್ಯಾಭಿಮಾನಿಲು ತೆರಿಪಾದೆರ್.

ವರದಿ: ಸುಪ್ರೀತ ಕೊಯ್ಯುರು

ಮುಸ್ಲಿಂ ಆಣನೊಟ್ಟಿಗೆ ಬೆಂಗ್ಲೂರ್ ಗ್ ಪೋವೊಂದು ಇತ್ತಿನ ಹಿಂದೂ ಪೊಣ್ಣು: ಬಸ್ ಉಂತಾಯಿನ ಬಜರಂಗದಳತ ಕಾರ್ಯಕರ್ತೆರ್

ವಿಟ್ಲ: ಮುಸ್ಲಿಂ ಆಣನೊಟ್ಟಿಗೆ ಹಿಂದೂ ಪೊಣ್ಣು ಬೆಂಗ್ಲೂರ್ ಗ್ ಪೋವೊಂದು ಇತ್ತಿನ ಬಸ್ ನ್ ಬಜರಂಗದಳತ ಕಾರ್ಯಕರ್ತೆರ್ ಉಂತಾಯಿನ ಘಟನೆ ದಾಸಕೋಡಿಡ್ ನಡತ್ಂಡ್.

ಬೊಕ್ಕ ಬಸ್ ಟ್ ಕಾರ್ಯಕರ್ತೆರ್ ಬೊಕ್ಕ ಪ್ರಯಾಣಿಕೆರೆನ ನಡುಟ್ ಪಾತೆರಕತೆ ನಡತಿನ ವಿಡಿಯೋ ವೈರಲ್ ಆತ್ಂಡ್. ಈ ಘಟನೆ ನಡತಿನ ಜಾಗೆಗ್ ಪೊಲೀಸೆರ್ ಬತ್ ದ್, ಕಾರ್ಯಕರ್ತೆರೆನ್ ಬೊಕ್ಕ ಆಣ್, ಪೊಣ್ಣನ್ ಸ್ಟೇಷನ್ ಗ್ ಲೆತೊಂದು ಪೋಯೆರ್. ಅಲ್ಪ ಪಾತೆರ್ದ್, ಇಲ್ಲದಕ್ಲೆನೊಟ್ಟಿಗೆ ಕಡಪಾದೆರ್ ಪಂದ್ ತೆರಿದ್ ಬೈದ್ಂಡ್.

ದುನಿಯಾ ವಿಜಿಗ್ ಪೊಲೀಸ್ ನೋಟಿಸ್

ಬೆಂಗ್ಲೂರ್: ಕರಿಯಾ ಐ ಲವ್ ಯೂ ಪಿಚ್ಚರ್ದ್ ನಟೆ ದುನಿಯಾ ವಿಜಯ್ ಬೊಕ್ಕ ಪಾನಿಪೂರಿ ಕಿಟ್ಟಿನ ನಡುತ ಗಲಾಟೆದ ಬಗೆಟ್ ತನಿಖೆ ನಡತೊಂದು ಉಂಡು.

ಈ ಬಗೆಟ್ ವಿಚಾರಣೆಗ್ ಹಾಜರಾವೊಡು ಪಂದ್ ಹೈ ಗ್ರೌಂಡ್ಸ್ ಠಾಣೆದ ಪೊಲೀಸೆರ್ ದುನಿಯಾ ವಿಜಯ್ ಗ್ ನೋಟಿಸ್ ಜಾರಿ ಮಲ್ದೆರ್. 2018ಟ್ ನಡತಿನ ಪೆಟ್ಟ್ ದ ಬಗೆಟ್ ವಿಚಾರಣೆ ನಡತೊಂದುಂಡು.

ಬೆಂಗ್ಲೂರ್ ಡ್ ಡೆಂಗ್ಯೂ ಜ್ವರ: ಪ್ರತಿ ದಿನ 50 ಕೇಸ್

ಬೆಂಗ್ಲೂರ್: ರಾಜಬೂಡು ಬೆಂಗ್ಲೂರ್ ಡ್ ಬರೊಂದು ಇಪ್ಪುನ ಪನಿ ಪನಿ ಬರ್ಸದೊಟ್ಟಿಗೆ ಡೆಂಗ್ಯೂ ಕೇಸ್ ಹೆಚ್ಚಾತ್ಂಡ್. ಉಂದು ಆರೋಗ್ಯ ಇಲಾಖೆದ ಅಧಿಕಾರಿಲೆನ ಮಂಡೆಬೆಚ್ಚೊಗು ಕಾರಣ ಆತ್ಂಡ್.

ಪೇಂಟೆಡ್ ಪ್ರತಿ ದಿನ 50ರ್ದ್ ಹೆಚ್ಚ ಡೆಂಗ್ಯೂ ಕೇಸ್ ವರದಿ ಆವೊಂದುಂಡು ಪಂದ್ ಆರೋಗ್ಯ ಇಲಾಖೆ ಪಂತ್ ಡ್. ಕೇವಲ ಬೆಂಗ್ಲೂರ್ ಮಾತ್ರ ಅತ್ತಂದೆ ಜಿಲ್ಲಾ ಕೇಂದ್ರಲೆಡ್ಲಾ ಉಂದುವೇ ಪರಿಸ್ಥಿತಿ ಉಂಡು ಪಂದ್ ಆರೋಗ್ಯ ಇಲಾಖೆ ತೆರಿಪಾದ್ಂಡ್. ಚಳಿ ಬೊಕ್ಕ ಬರ್ಸರ್ದ್ ಬೆಂಗ್ಲೂರ್ ಡ್ ಎಲ್ಯ ಜೋಕುಲೆಗ್ ಹೆಚ್ಚದ ಸಂಖ್ಯೆಡ್ ಜ್ವರ ಬೈದ್ಂಡ್.

ಬಂಟರ ಯಾನೆ ನಾಡವರ ಮಾತೃಸಂಘ ಉಪಾಧ್ಯಕ್ಷೆರಾದ್ ರಡ್ಡನೇ ಸರ್ತಿ ಕಾವು ಹೇಮನಾಥ ಶೆಟ್ಟಿ ಆಯ್ಕೆ

ಪುತ್ತೂರ್: ದಕ್ಷಿಣ ಕನ್ನಡ, ಒಡಿಪು ಬೊಕ್ಕ ಕಾಸ್ರೋಡು ಜಿಲ್ಲಾ ವ್ಯಾಪ್ತಿದ ಬಂಟರ ಯಾನೆ ನಾಡವರ ಮಾತೃ ಸಂಘ ಕುಡ್ಲ ನೆತ್ತ ಉಪಾಧ್ಯಕ್ಷೆರಾದ್ ಕಾವು ಹೇಮನಾಥ ಶೆಟ್ಟಿ ರಡ್ಡನೇ ಸರ್ತಿ ಆಯ್ಕೆ ಆತೆರ್.

ಸುಮಾರ್ 26 ಸಾರರ್ದ್ ಹೆಚ್ಚ ಸದಸ್ಯೆರ್ ಇಪ್ಪುನ ಬಂಟರ ಯಾನೆ ನಾಡವರ ಮಾತೃಸಂಘಗ್ ಸರಿಸುಮಾರ್ 115 ವರ್ಷದ ಇತಿಹಾಸ ಉಂಡು. ಮೂಜಿ ವರ್ಷದ ಅವಧಿಗ್ ಈ ಪದಾಧಿಕಾರಿಲೆನ ಆಯ್ಕೆ ಪ್ರಕ್ರಿಯೆ ಸಂಘಡ್ ನಡಪುಂಡು. ಪುತ್ತೂರ್ ದ ರಾಮಕೃಷ್ಣ ಪ್ರೌಢ ಶಾಲೆದ ಸಂಚಾಲಕೆರಾದ್ ಶಾಲೆನ್ ರಾಷ್ಟ್ರೀಯ ಬೊಕ್ಕ ಅಂತರರಾಷ್ಟ್ರೀಯ ಮಟ್ಟಡ್ ಗೊತ್ತಾಪಿಲೆಕ ಮಲ್ತಿನ ಖ್ಯಾತಿ ಮೆರೆಗ್ ಸೇರುಂಡು. ಲಯನ್ಸ್ ಪ್ರಾಂತೀಯ ಅಧ್ಯಕ್ಷೆರಾದ್ ಸೇವೆ ಸಂದಾವೊಂದು ಇಪ್ಪುನ ಮೇರ್ ತನ್ನ ಅವಧಿಡ್ 5 ಪೊಸ ಕ್ಲಬ್‌ ದ ರಚನೆಗ್ ಕಾರಣಕರ್ತೆರಾತೆರ್. ರಾಜಕೀಯ ಕ್ಷೇತ್ರಡ್ ಕೆಪಿಸಿಸಿ ಸಂಯೋಜಕೆರಾತೆರ್. ಕಾವು ಸರಕಾರಿ ಹಿ ಪ್ರಾ ಶಾಲೆನ್ ದತ್ತು ದೆತೊನ್ನ ಮುಖೇನ ಶಾಲೆಡ್ ಇಂಗ್ಲಿಷ್ ಮೀಡಿಯಂ ಎಲ್‌ಕೆಜಿ, ಯುಕೆಜಿ ತರಗತಿನ್ ಸುರು ಮಲ್ತ್ ದ್ ಕಾವು ಶಾಲೆನ್ ಮಾದರಿ ಶಾಲೆಯಾದ್ ಮಲ್ತೆರ್. ಸಾಮಾಜಿಕ ಬೊಕ್ಕ ಧಾರ್ಮಿಕ ಕ್ಷೇತ್ರಡ್ ಇಪ್ಪುನ ಮೇರ್ ಸುಮಾರ್ ದೇವಲ್ಯದ ಬ್ರಹ್ಮಕಲಶ ಉಚ್ಚಯಡ್ ಪಾಲ್ ಪಡೆತೆರ್. ಇತ್ತೆ ಬಂಟರ ಯಾನೆ ನಾಡವರ ಮಾತೃಸಂಘದ ಉಪಾಧ್ಯಕ್ಷೆರಾದ್ ಆಯ್ಕೆ ಆಪುನ ಮುಖೇನ ಜಾತಿ ಸಂಘಟನೆದ ಹೊಣೆನ್ ಒಯಿಸೊಂದೆರ್. ಈ ಸಂಘದ ನಿರ್ದೇಶಕೆರಾದ್ ದಯಾನಂದ ರೈ ಮನವಳಿಕೆ ಗುತ್ತು, ಜಯಪ್ರಕಾಶ್ ರೈ ನೂಜಿಬೈಲು, ದುರ್ಗಾಪ್ರಸಾದ್ ರೈ ಕುಂಬ್ರ, ಸಾಜ ರಾಧಾಕೃಷ್ಣ ಆಳ್ವ, ಪುರಂದರ್ ರೈ ಮಿತ್ರಂಪಾಡಿ, ಜಯರಾಜ್ ಭಂಡಾರಿ ನೊಣಾಲು, ವಾಣಿ ಎಸ್ ಶೆಟ್ಟಿ ನೆಲ್ಯಾಡಿ ಮೊಕುಲು ಆಯ್ಕೆ ಆತೆರ್.

Kavu Hemnath Shetty is Vice President of Bantara Yani Nadavara Matru Sangha for the second time

Puttur: Kavu Hemnath Shetty has been elected as the vice president of Bantara Yani Nadavara Matru Sangha which includes DK district, Udupi and Kasaragod.
The Sangha has more than 26,000 members with an history of 115 years.The selection process to the Sangha takes place once every three years.
He is the correspondent of Ramakrishna School Puttur and is responsible for taking the school to great heights.He is also the president of the the Lions Club and is an organiser for KPCC.
He has adopter Kaup government school and has made it a model institution.He has also strived for the development of many religions places .

Dayanand Rai Manavalikay Guttu, Jayaprakash Rai Nojibail,
Durgaprasad Rai Kumbray, Radhakrishna Alva, Purandar Rai Mitrampady, Jayaraj Bhandari, Vani S Shetty have been selected as directors of the association.