July 2022

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಧ್ಯಮ ಪುರಸ್ಕಾರಗ್ ಆಯ್ಕೆ ಆಯಿನ ರೋನ್ಸ್ ಬಂಟ್ವಾಳ್

ಕುಡ್ಲ: ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ 2021ನೇ ವರ್ಸದ ಸಾಧಕೆರೆಗ್ ವಾರ್ಷಿಕ ಪ್ರಶಸ್ತಿ ಕೊರ್ಪಿನ ಲೇಸ್ ಅಗೋಸ್ಟ್ 21 ತಾರೀಕ್ ಗ್ ಕುಡ್ಲದ ಪುರಭವನಡ್ ನಡಪರೆ ಉಂಡು. ವಿಶೇಷವಾದ್ ರೋನ್ಸ್ ಬಂಟ್ವಾಳ್, ಬೊಂಬಾಯಿ ಮೇರೆಗ್ 2021ನೇ ವರ್ಸದ ಮಾಧ್ಯಮ ಕ್ಷೇತ್ರಡ್ ಮಲ್ತಿನ ಸಾಧನೆಗಾದ್ ಮಾಧ್ಯಮ ಪುರಸ್ಕಾರ ತಿಕ್ ದ್ಂಡ್

ಬೊಂಬಾಯಿದ ಪ್ರತಿಷ್ಠಿತ “ಪತ್ರಕಾರ್ ರತ್ನ” ಬಿರುದು ಪಡೆದಿನ ಪತ್ರಕರ್ತೆ ರೋನ್ಸ್ ಬಂಟ್ವಾಳ್ ಮೇರ್ “ಕರ್ನಾಟಕ ಮಾಧ್ಯಮ ಅಕಾಡೆಮಿ 2014 – ಪ್ರಶಸ್ತಿ” ಪಡೆತಿನ ಪಿದಯಿ ರಾಜ್ಯದ ಪತ್ರಕರ್ತೆ. ಡೈಜಿ ವಲ್ಡ್ ಡಾಟ್.ಕಾಮ್, ಕೆಮ್ಮಣ್ಣು ಡಾಟ್.ಕಾಮ್ ಕೆನರಾ ನ್ಯೂಸ್ ಡಾಟ್.ಕಾಮ್, ಬೆಳ್ಳಿವಿಶನ್ ಡಾಟ್.ಕಾಮ್, ಇಂಚಿತ್ತಿನ ಪುಗರ್ತೆದ ಅಂತರ್ಜಾಲ ಮಾಧ್ಯಮದ ಮಹಾರಾಷ್ಟ್ರ ರಾಜ್ಯದ ಬ್ಯೂರೊ ಚೀಫ್, ಸುದ್ದಿ ಸಂಪಾದಕೆರಾದ್ ಸೇವೆ ಮಲ್ತೊಂದಿಪ್ಪುನ ಮೇರ್ ಇತ್ತೆ ಟೈಮ್ಸ್ ಆಫ್ ಇಂಡಿಯಾ, ವಿಜಯ ಕರ್ನಾಟಕ, ಇಂಚಿತ್ತಿನ ಪತ್ರಿಕೆದ ಬೊಂಬಾಯಿದ ವರದಿಗಾರೆರಾದ್ ಸೇವೆ ಮಲ್ತೊಂದುಲ್ಲೆರ್.

ಸುಮಾರ್ ಪತ್ತೆರ್ದ್ ಲ ಎಚ್ಚ ಕನ್ನಡ, ಕೊಂಕಣಿ ವಾರ ಪತ್ರಿಕೆಲು, ಇಂಗ್ಲೀಷ್ ಸಾಪ್ತಾಹಿಕ, ಪಾಕ್ಷಿಕ ಬೊಕ್ಕ ಮಸ್ತ್ ಮಾಸಿಕದ ವರದಿಗಾರೆರಾದ್ ರಾಷ್ಟ್ರನೇ ಪ್ರತಿನಿಧಿಸಾವುನ ಅಪ್ರೂಪದ ಪತ್ರಕರ್ತೆರಾತೆರ್. ಮೂಜಿ ದಶಕಡ್ದ್ ಪತ್ರಿಕೋದ್ಯಮ ಡ್ ಇತ್ತ್ ದ್, ಕುಡ್ಲದ ಬಜಪೆಡ್ ಸಿವಿಲ್ ಇಂಜಿನೀಯರಿಂಗ್ ಕಲ್ತ್ ದ್, ಬೊಂಬಾಯಿಡ್ ವ್ಯoಗ್ಯ ಚಿತ್ರಕಾರೆರಾದ್ ಪತ್ರಿಕೋದ್ಯಮಡ್ ಕೃಷಿ ಸುರು ಮಲ್ತೆರ್.

ತುಳುವೆರ್ ಅಂಚನೆ ಕರ್ನಾಟಕದ ಜನಕ್ಲೆನ ರೂವಾರಿಯಾದ್ ಪ್ರಸಿದ್ಧೆರ್. ಕ.ಪ.ಸ.ಮ. ಉಂದೆತ್ತ ಅಧ್ಯಕ್ಷೆರಾದ್ ಉಲ್ಲೆರ್. ಮಸ್ತ್ ಸಂಘ ಸಂಸ್ಥೆಲು ಮೇರೆನ್ ಮಾನಾದಿಗೆ ಮಲ್ತ್ ದೆರ್. ಬೊಂಬಾಯಿಡ್ ರಡ್ಡ್ ರಾಷ್ಟ್ರೀಯ ಪತ್ರಕರ್ತೆರ್ನ ಅಧಿವೇಶನನ್ ಯಶಸ್ವಿಯಾದ್ ನಡಪಾದ್ ಕೊರ್ತೆರ್.

ಸಾಮಾಜಿಕ ಕಾರ್ಯಕರ್ತೆರಾದ್, ಸಮಾಜ ಸೇವಕೆರಾದ್ ಇತ್ತಿನ ಮೇರ್ ಅಖಿಲ ಭಾರತ ತುಳು ಒಕ್ಕೂಟದ ಕಾರ್ಯದರ್ಶಿಲ ಅಂದ್. ಸುರುತ್ತ ಸರ್ತಿ ನಡತಿನ ವಿಶ್ವ ತುಳುವೆರೆ ಪರ್ಬಗ್ ತನ್ನನೇ ಆಯಿನ ಕೊಡುಗೆನ್ ಕೊರ್ತೆರ್.