2021

ಕಂಬುಲದ ಕರೆಕ್ಕ್ ನನ ಜಪ್ಪುಜಿ ಪಂಡ್ದ್ ದೇವೆರ್ನ ಲೆಪ್ಪುಗು ಓಕೊಂಡೆ ಕುಟ್ಟಿ

ಆಯೆ ಸಾಮಾನ್ಯದಾಯೆ ಅತ್ತ್ , ಕಂಬಳದ ಕರೆಟ್ ಚಿಗರೆದಲಕ ಬಲಿತ್ತಿನಾಯೆ .. ತನ್ನ ಒಟ್ಟುಗು ಪಂತೋ ಗು ಉಂತಿನ ಚಾಂಪಿಯನ್ ಎರುಕುಲೆಗ್ ಸರಿಯಾಟಿಯಾಯಿನಾಯೆ ಏದೋಟ್ಟುರ್ದು ತಂಡಬೈಲ್ ಮುಟ ಸಾಂಕಿನ ಗುರ್ಕಾರ್ಲೆಗ್ ಗೌರವ ಕಂತಿನಾಯೆ .. ಅವ್ವೆತೋ ಕಂಬಳ ಕರೆಟ್ ಮಾನದಿಗೆ ಪಡೆಯಿನ ಕುಟ್ಟಿ ಇತ್ತೆ ಶಾಶ್ವತ ನಿದ್ರೆಗ್ ಜಾರ್ದೆ . ಕಂಬಳ ಕ್ಷೇತ್ರಡ್ ಅವ್ವೆತೋ ಸಮಯರ್ದ್ ತನ್ನ ಚಾತುರ್ಪುನು ತೋಜಾಯಿನ ಕುಟ್ಟಿ ಪನ್ಪಿನ ಎರು ಐತಾರಾ ದೇವೆರೆ ಪಾದ ಸೇರ್ದುಂಡು.ಕೆಸರ್ ದ ಕರೆಟ್ಟ್ ಕ್ಷಣ ಮಾತ್ರಡ್ ಗುರಿ ಮುಟ್ಟೋನ್ದು ಇತ್ತಿನ ಕುಟ್ಟಿ ಅಲ್ಪ ಕಾಲದ ಅಸೌಖ್ಯರ್ದ್ ತೀರ್ಪೋತೆ.

ಏದೋಟ್ಟು ರಾಜು ಶೆಟ್ಟಿ ಮೆರ್ನ ಎಲ್ಯ ಪ್ರಾಯದ ಕುಟ್ಟಿ 2008-09 ನೇ ಸೀಸನ್ ಡ್ ಮೀಯ್ಯಾರ್ ಡ್ ನಡತಿನ ನಡತಿನ ಕುದಿ ಟ್ ಪಾಲ್ ಪಡೆದ್ ಇತ್ತೆ . ಬಾರಿ ಪೊರ್ಲುಡು ಜಿಂಕೆದಲಕ ಬಲ್ತೊಂದು ಇತ್ತಿನ ಕುಟ್ಟಿ ಮಾತೆರ್ನಲ ಮೈ ಇರ್ಮೆನ ಮಲ್ತೊಂದು ಇತ್ತೆ.ಅಂಚನೇ ಮಣಿಪಾಲಡ್ ನಡತಿನ ಅನಂತ – ಮಾಧವ ಕಂಬಳಡ್ ಹಗ್ಗ ಕಿರಿಯ ವಿಭಾಗಡ್ಲ ಕುಟ್ಟಿ ರಡ್ಡನೇ ಇನಾಮು ಪಡೆದಿತ್ತೆ.ಉಂದೆನ್ ಗೇನೊಗು ದೆತೊನಿನ ಅಲೆವೂರು ರಾಘು ಶೆಟ್ಟಿ ಆಯೆನ್ ತಮ್ಮ ಕೂಟೋಗೂ ಸೇರ್ಪಾದಿತ್ತೆರ್.ಅಂಚಾದ್ ಆಯೆ ಅಲೆವೂರು ಕುಟ್ಟಿ ಪಂದ್ ಪಂದ್ ಪುಗಾರ್ತೆ ಪಡೆಯೆ . ಬಾರಾಡಿ ಸೂರ್ಯ- ಚಂದ್ರ ಕಂಬಳಡ್ ಸುರುತ್ತಾ ಬಾರಿ ನೇಗಿಲು ಕಿರಿಯ ವಿಭಾಗಡ್ ಪದಾರ್ಪಣೆ ಮಲ್ದಿನ ಕುಟ್ಟಿ ಅವ್ವೆ ದಿನ ಪಂತೋ ಗೆಂದ್ದ್ ಇನಾಮುಲ ಪಡೆದಿತ್ತೆ .

2010-11ರ ಸೀಸನ್ ಡ್ ಸೀನಿಯರ್ ವಿಭಾಗಗ್ ಪಾಲ್ ಪಡೆಯಿನ ಕುಟ್ಟಿ ಆ ಸೀಸನ್ ಡ್ 14 ಕಂಬಳಡ್ ಸುರುತ್ತಾ ಇನಾಮು ಪಡೆದಿತ್ತೆ ದುಂಬುದ ವರ್ಷ 12 ಸುರುತ್ತ ಇನಾಮು , ರಡ್ಡ್ ರಡ್ಡನೇ ಇನಾಮು ಅಲೆವೂರು ಕೂಟಗ್. ಅವು ನೇಗಿಲು ವಿಭಾಗಡ್ ಅಲೆವೂರು ತೆಂಕುಮನೆ ರಾಘು ಶೆಟ್ರು ಪಂಡ ಬಾರಿ ಪುದರ್ ನೆಕ್ಕ್ ಮೂಲ ಕಾರಣ ಈ ಕುಟ್ಟಿ ಪಂಡ ತಪ್ಪಾವಂದ್.

ಕಾರ್ಕಳ ಜೀವನ್ ದಾಸ್ ಅಡ್ಯಂತಾಯ ಬೊಕ್ಕ ತಂಡಬೈಲ್ ನಾಗೇಶ್ ದೇವಾಡಿಗೆರ್ನ ಜಂಟಿ ಕೂಟಡ್ ಮಿಂಚಿನವು ಚಾಂಪಿಯನ್ ಎರುಕುಲಾಯಿನ ಮುಕೇಶ ಬೊಕ್ಕ ಕುಟ್ಟಿ. ನಾಲೈನ್ ವರ್ಷದ ಪಿರಾವು ಮೂಡುಬಿದಿರೆ ಕಂಬಳಡ್ 144.5 ಮೀಟರ್ ದೂರನ್ ಕಾಲಿ 14.01 ಸೆಕೆಂಡ್ಡ್ ಬಲ್ತ್ ದ್ ಗುರಿ ಮುಟ್ಟುದಿನ ಕುಟ್ಟಿ ಬೊಕ್ಕ ಮುಕೇಶ ಆ ಕಾಲದ ದಾಖಲೆ ನಿರ್ಮಾಣ ಮಲ್ತಿತ್ತೆರ್ .

ಕಂಬಳಡ್ ಮುಕೇಶ ಬೊಕ್ಕ ಕುಟ್ಟಿ ಬಲ್ಪುನೆನ್ ತೂoಡ ಪಾಪ ಪರಿಹಾರ ಆವು , ಆತ್ ಪೊರ್ಲುದ ಬಲಿಪು ಅಕ್ಲೆನ ಪನ್ಪಿನವು ಅಭಿಮಾನಿಲೆನ ಪಾತೆರ. ಅವ್ವೆತೋ ಮಾನದಿಗೆ, ದಾಖಲೆಲು , ಅಭಿಮಾನಿಲೆನ್ ಪಡೆಯೊಂದಿನ ‘ಚಾಂಪಿಯನ್ ಕುಟ್ಟಿ’ ನನ ನೆಂಪು ಮಾತ್ರ.