ಬೊಂಬಾಯಿದ ಸುದ್ದಿ | Mumbai News

ಅ.15-23: ಸುಭಾಷ್ ನಗರ ಶ್ರೀ ದತ್ತಾತ್ರೇಯ ದುರ್ಗಾಂಬಿಕಾ ದೇವಲ್ಯಡ್ 58ನೇ ವರ್ಷೊದ ಮಾರ್ನೆಮಿ ಉಚ್ಚಯ

ಬೊಂಬೈ: ಘಾಟ್ ಕೋಪರ್ ದ ಸುಭಾಷ್ ನಗರ ಶ್ರೀ ದತ್ತಾತ್ರೇಯ ದುರ್ಗಾಂಬಿಕಾ ದೇವಲ್ಯಡ್ 58ನೇ ವರ್ಷೊದ ಮಾರ್ನೆಮಿ ಉಚ್ಚಯ ಅ.15-23 ಮುಟ್ಟ ನಡಪರೆ ಉಂಡು.

ಅಂಚೆನೆ ಪ್ರತಿದಿನೊಲ ಬೇತೆ ಬೇತೆ ಧಾರ್ಮಿಕ, ವೈದಿಕ ವಿಧಿ ವಿಧಾನಲು ನಡಪುಂಡು. ಈ ಲೇಸ್ ಡ್ ಭಕ್ತಾಭಿಮಾನಿಲು ಮಾತೆರ್ಲಾ ಕುಟುಂಬ ಸಮೇತೆರಾದ್ ಬತ್ತ್ ದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು, ಶ್ರೀ ಗುರು ದತ್ತಾತ್ರೇಯ, ಆದಿಮಾತೆ ಶ್ರೀ ದುರ್ಗಾಂಬಿಕೆ, ಶ್ರೀ ಅಂಜನೇಯ, ಶ್ರೀ ನಾಗಶೇಷ ಬೊಕ್ಕ ಅಪ್ಪೆ ಚಾಮುಂಡಿ ದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ದತ್ತಾತ್ರೇಯ ಮಿತ್ರ ಭಜನಾ ಮಂಡಳಿ (ರಿ.) ದ ಗುರ್ಕಾರೆ, ಧರ್ಮದರ್ಶಿಲು ದೇವ್ ಬಿ ಪೂಜಾರಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಅ.21: ಸಾಂತಾಕ್ರೂಜ್ ದ ಬಿಲ್ಲವ ಭವನಡ್ ಮಾರ್ನೆಮಿ ಉಚ್ಚಯ

ಬಿಲ್ಲವರ ಸಂಘ ಬೊಂಬೈದ ಪೊಂಜೋವ್ ಲೆನ ವಿಭಾಗದ ಮುತಾಲಿಕೆಡ್ ಮಾರ್ನೆಮಿ ಉಚ್ಚಯ ಅ.21ಸನಿಯಾರ ಸಾಂತಾಕ್ರೂಜ್ ದ ಬಿಲ್ಲವ ಭವನಡ್ ನಡಪರೆ ಉಂಡು.

ಆನಿ ಮಧ್ಯಾಹ್ನ 3 ಗಂಟೆಗ್ ಲಲಿತಾ ಸಹಸ್ರನಾಮ, ದಾಂಡಿಯಾ ರಾಸ್ ನಡಪರೆ ಉಂಡು. ಈ ಲೇಸ್ ಗ್ ಕುಟುಂಬ ಸಮೇತೆರಾದ್ ಬರೊಡು ಪಂದ್ ಬಿಲ್ಲವರ ಸಂಘ ಬೊಂಬೈದ ಗುರ್ಕಾರೆ ಹರೀಶ್ ಜಿ ಅಮೀನ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಬಿಜೆಪಿ ದಕ್ಷಿಣ ಭಾರತೀಯ ಘಟಕ ಮೀರಾಭಾಯಂದರ್ ದ ಗುರ್ಕಾರೆಯಾದ್ ಬಳ್ಕುಂಜೆಗುತ್ತು ರವೀಂದ್ರ ಶೆಟ್ಟಿ ಗುತ್ತಿನಾರ್ ಆಯ್ಕೆ

ಮೀರಾರೋಡ್: ಮೀರಾ ಭಾಯಂಧರ್ ಪರಿಸರಡ್ ಸಾಮಾಜಿಕ, ಧಾರ್ಮಿಕ ಸೇವೆನ್ ಮಲ್ತೊಂದು ಸಂಘಟಕೆರಾದ್, ಬಂಟರ ಸಂಘದ ಮೀರಾ ಭಾಯಂದರ್ ಪ್ರಾದೇಶಿಕ ಸಮಿತಿದ ಕಾರ್ಯದರ್ಶಿಲು, ನವತರುಣ ಮಿತ್ರ ಮಂಡಳಿದ ಮಾನಾದಿಗೆದ ಗುರ್ಕಾರೆ ಬಳ್ಕುಂಜೆಗುತ್ತುದ ಗುತ್ತಿನಾರ್ ರವೀಂದ್ರ ಶೆಟ್ಟಿ ಕೊಟ್ರಪಾಡಿ ಮೆರೆನ್ ಬಿಜೆಪಿದ ದಕ್ಷಿಣ ಭಾರತೀಯ ಘಟಕ ಮೀರಾ ಭಾಯಂದರ್ ದ ಗುರ್ಕಾರೆಯಾದ್ ಮಹಾರಾಷ್ಟ್ರ ಬಿಜೆಪಿ ಸಮಿತಿ ಆಯ್ಕೆ ಮಲ್ದ್ಂಡ್.

ಆಯ್ಕೆ ಲೇಸ್ ಡ್ ಮಹಾರಾಷ್ಟ್ರ ಬಿಜೆಪಿ ಸಮಿತಿದ ಪದುಕೆರ್, ಬಿಜೆಪಿ ರಾಷ್ಟ್ರೀಯ ಗುರ್ಕಾರೆ ಜೆಪಿ ನಡ್ಡಾ, ಉಪ ಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್, ಮೀರಾ ಭಾಯಂದರ್ ದ ಮಾಜಿ ಎಂಎಲ್ ಎ ನರೇಂದ್ರ ಮೆಹ್ತಾ, ಮೀರಾ ಭಾಯಂದರ್ ದ ಬಿಜೆಪಿ ಗುರ್ಕಾರೆ ಕಿಶೋರ್ ಶರ್ಮ, ಕಾರ್ಪೊರೇಟರ್ ಅರವಿಂದ ಆನಂದ ಶೆಟ್ಟಿ ಪಾಲ್ ಪಡೆದಿತ್ತೆರ್.

ರವೀಂದ್ರ ಶೆಟ್ಟಿ ಕೊಟ್ರಪಾಡಿ ಮೇರ್ ಒಡಿಪು ಜಿಲ್ಲೆ ಕಾರ್ಲ ತಾಲೂಕ್ ದ ಬಳ್ಕುಂಜೆದ ಚಿನ್ನಯ ಬೆನ್ನಿ ಕುತ್ಯಾರು ದೇಜು ಶೆಟ್ಟಿ ಬೊಕ್ಕ ಬಳ್ಕುಂಜೆ ಗುತ್ತು ಪುಷ್ಪಾ ಶೆಟ್ಟಿ ದಂಪತಿಲೆನ ನಾಲ್ ಜೋಕುಲೆಡ್ ಎಲ್ಯ ಮಗೆಯಾದ್ ಬೊಂಬೈ ಪೇಂಟೆಡ್ ಪುಟ್ಟಿಯೆರ್. ಮೇರ್ ಪ್ರಾಥಮಿಕ ವಿದ್ಯಾಭ್ಯಾಸ ಬೊಕ್ಕ ಹೈಸ್ಕೂಲ್ ವಿದ್ಯಾಭ್ಯಾಸನ್ ಊರುಡು ಮುಗಿತ್ ದ್ ಬೊಂಬೈಗ್ ಬತ್ತೆರ್. ಬೊಕ್ಕ ಬೊಂಬೈಡ್ ಬೇಲೆ ಮಲ್ತೊಂದು ಸ್ವಂತ ಬೇಲೆ ಸುರು ಮಲ್ತೆರ್.

ಮೀರಾಭಾಯಂದರ್ ಪರಿಸರಡ್ ತನ್ನ ಸಾಮಾಜಿಕ ಸೇವೆನ್ ಸುರು ಮಲ್ತಿನ ಮೇರ್ 2024 ಟ್ಟ್ ನವತರುಣ ಮಿತ್ರ ಮಂಡಳಿ ಗಣೇಶೋತ್ಸವ ಸಮಿತಿ ಸ್ಥಾಪನೆದ ರೂವಾರಿಯಾದ್ 19 ವರ್ಷ ಕೆಲಸ ಮಲ್ದೆರ್. ಈ ಸಂಸ್ಥೆದ ಮುಖೇನ ನೆತ್ತೆರ್ ದಾನ, ವೈದ್ಯಕೀಯ ಶಿಬಿರ, ಶಿಕ್ಷಣ ಇಂಚ ಸುಮಾರ್ ಬೇಲೆನ್ ಮೇರ್ ಮಲ್ತೊಂದು ಬೈದೆರ್. ಬೊಕ್ಕ ಬೊಂಬೈಡ್ ನಾಗೇಶ್ ಪೊಳಲಿ ಬೊಕ್ಕ ಅಜೆಕಾರ್ ಬಾಲಕೃಷ್ಣ ಶೆಟ್ಟಿ ಮೊಕ್ಲೆನ ಮಾರ್ಗದರ್ಶನಡ್ ಯಕ್ಷಗಾನಡ್ ಪಾತ್ರ ಮಲ್ದೆರ್.

ಮೆರೆನ ಸೇವೆನ್ ಗುರುತಿಸಾದ್ ಅಜೆಕಾರ್ ಕಲಾಭಿಮಾನಿ ಬಳಗ ಸಮಾಜ ರತ್ನ ಬಿರುದು ಕೊರ್ದು ಮಾನಾದಿಗೆ ಮಲ್ದ್ಂಡ್. ಬೆದ್ರ ಅಮಣ್ಣ ಬೆಟ್ಟು ಮುದ್ದಣ ಶೆಟ್ಟಿ ಬೊಕ್ಕ ಮಾರ್ನಾಡ್ ಮೀನಾಕ್ಷಿ ಶೆಟ್ಟಿ ದಂಪತಿಲೆನ ಮಗಲ್ ವನಿತ ಮೆರೆನ್ ಮದಿಮೆ ಆದ್, ಹಾರ್ದಿಕ್ ಬೊಕ್ಕ ದ್ರುತಿಕ್ ಪನ್ಪಿನ ರಡ್ಡ್ ಜೋಕುಲೆನೊಟ್ಟಿಗೆ ಸಂಸಾರ ಮಲ್ತೊಂದು ಉಲ್ಲೆರ್.

ಕರ್ನಾಟಕ ಸಂಘ ಸಯನ್, ಪೊಸ ಸಂಘದ ಉದಿಪನ ಲೇಸ್

ಬೊಂಬೈ: ಕರ್ನಾಟಕ ಸಂಘ ಸಯನ್ ದ ಉದಿಪನ ಲೇಸ್ ಅ.15 ಕ್ಕ್ ಬೊಲ್ಪುಗು ನಿತ್ಯಾನಂದ ಸಭಾಗೃಹಡ್ ಗೌಜಿಡ್ ನಡತ್ಂಡ್.

ಮಲ್ಲ ಬಿನ್ನೆರಾದ್ ಸಯನ್ ಪರಿಸರದ ರಾಮ್ ದೇವ್ ಹೋಟೇಲ್ ದ ಧಣಿ, ಮಹಾದಾನಿ, ಸುಂದರ ಶೆಟ್ಟಿ, ಮಾನಾದಿಗೆದ ಬಿನ್ನೆರ್ ಅಂತರಾಷ್ಟ್ರೀಯ ಪುಗರ್ತೆ ದ ಹೃದಯ ತಜ್ಞೆರ್ ಡಾ. ಸದಾನಂದ ಶೆಟ್ಟಿ, ಕರ್ನಾಟಕ ಸಂಘ ಸಾಯನ್ ದ ಗುರ್ಕಾರೆ ಪ್ರವೀಣ್ ಭಟ್ ಮೇರ್ ಸಂಘದ ಬ್ಯಾನರ್ ನ್ ಬುಡುಗಡೆ ಮಲ್ತೆರ್. ಬೊಕ್ಕ ಸಂಘದ ಉದಿಪನ ಮಲ್ತೆರ್.

ಈ ಪೊರ್ತುಡು ಮಾನಾದಿಗೆದ ಬಿನ್ನೆರಾದ್ ರಾಜಕೀಯ ನೇತಾರ ಅಮಿತ್ ಜೆ.ಶೆಟ್ಟಿ, ಖ್ಯಾತ ನಾಟಕ ನಿರ್ದೇಶಕೆರ್ ವಿಜಯ ಕುಮಾರ್ ಶೆಟ್ಟಿ ಕೊಡಿಯಾಲ್ ಬೈಲ್, ಸಂಘದ ಗೌರವಾಧ್ಯಕ್ಷೆರ್, ಅಜಂತ ಕ್ಯಾಟರರ್ಸ್ ದ ಧಣಿ ಜಯರಾಮ್ ಶೆಟ್ಟಿ, ಸಲಹೆಗಾರೆ, ರಾಜಕೀಯ ಮುಂದಾಳು ಭಾಸ್ಕರ್ ಶೆಟ್ಟಿ, ಗಿರೀಶ್ ಬಿ.ಸಾಲ್ಯಾನ್, ಪ್ರದೀಪ್ ಶೆಟ್ಟಿ, ಸುಂದರ್ ಶೆಟ್ಟಿ, ಉಪಾಧ್ಯಕ್ಷೆರ್ ಸತೀಶ್ ಆರ್.ಶೆಟ್ಟಿ, ದಿನೇಶ್ ಶೆಟ್ಟಿ, ಸದಾಶಿವ ಬಿಎನ್ ಶೆಟ್ಟಿ, ಸದಾನಂದ ಶೆಟ್ಟಿ, ಸಂಘದ ಸಂಸ್ಥಾಪಕ ಸದಸ್ಯೆರ್ ಹ್ಯಾರಿ ಸಿಕ್ವೇರ, ಗೌರವ ಕಾರ್ಯದರ್ಶಿ ಡಾ.ಜಿ.ಪಿ.ಕುಸುಮ, ಜತೆ ಕಾರ್ಯದರ್ಶಿ ಜಯಶೀಲ ಬಿ.ಮೂಲ್ಯ, ಉಮೇಶ್ ಶೆಟ್ಟಿ ಕುಕ್ಕುಂದೂರು, ದಯಾನಂದ ಆರ್.ಮೂಲ್ಯ, ನವೀನ್ ಪೂಜಾರಿ, ಗೌರವ ಕೋಶಾಧಿಕಾರಿ ಸುರೇಶ್ ಶೆಟ್ಟಿ, ಜತೆ ಕೋಶಾಧಿಕಾರಿ ಚಂದ್ರಿಕಾ ಶೆಟ್ಟಿ, ಚೈತನ್ಯ ಕೆ.ಆಚಾರ್ಯ, ಸಾಂಸ್ಕೃತಿಕ ಸಮಿತಿದ ತೇಜಾಕ್ಷಿ ಎಸ್.ಶೆಟ್ಟಿ, ಪ್ರಭಾ ಎನ್.ಸುವರ್ಣ ಪಾಲ್ ಪಡೆದಿತ್ತೆರ್.

ಅ.15: ವಸಾಯಿ ಶ್ರೀ ರಜಕ ಸಂಘದ ಕಚೇರಿಡ್ ದುರ್ಗಾಪೂಜೆ

ವಸಾಯಿ ಶ್ರೀ ರಜಕ ಸಂಘದ ಮುತಾಲಿಕೆಡ್ ಅ.15 ಐತಾರ ವಸಾಯಿ ಶ್ರೀ ರಜಕ ಸಂಘದ ಕಚೇರಿಡ್ ದುರ್ಗಾಪೂಜೆ ನಡಪರೆ ಉಂಡು.

ಈ ಲೇಸ್ ಡ್ ಮಾತ ಸಮಿತಿದ ಸದಸ್ಯೆರ್ ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಅ.15: ಮೀರಾ ಬಾಯಂದರ್ ದ ಸೆವೆಲ್ ಸ್ಕ್ವೇರ್ ಅಕಾಡೆಮಿ ಸ್ಕೂಲ್ ಮೈದಾನಡ್ ಮೈತಿದಿ ತುಳು ನಾಟಕ

ಬೊಂಬೈ: ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ರಚನೆ ಮಲ್ತ್ ದ್ ನಿರ್ದಶನನ ಮಲ್ತಿನ ಮೈತಿದಿ ತುಳು ನಾಟಕ ಮೀರಾ ಬಾಯಂದರ್ ದ ಸೆವೆಲ್ ಸ್ಕ್ವೇರ್ ಅಕಾಡೆಮಿ ಸ್ಕೂಲ್ ಮೈದಾನಡ್ ಅ.15 ಐತಾರ ಬಯ್ಯಗ್ ನಡಪರೆ ಉಂಡು.

ಅಂಚೆನೆ ಈ ಲೇಸ್ ಮೀರಾ ಬಾಯಂದರ್ ಭಾರತೀಯ ಜನತಾ ಪಕ್ಷ ದಕ್ಷಿಣ ಭಾರತೀಯ ಘಟಕ, ನವತರುಣ ಮಿತ್ರ ಮಂಡಳಿ ಬೊಕ್ಕ ಬೊಂಬೈ ರಂಗ ಚಾವಡಿದ ಒಟ್ಟುಸೇರಿಗೆಡ್ ನಡಪರೆ ಉಂಡು.

ನಟೆ ಸ್ವರಾಜ್ ಶೆಟ್ಟಿ ಅಭಿನಯ ಮಲ್ತಿನ ಈ ನಾಟಕಗ್ ಎ.ಕೆ ವಿಜಯ್ (ಕೋಕಿಲಾ) ಸಂಗೀತ ಕೊರ್ತೆರ್.

ಅ.29: ವಿದ್ಯಾದಾಯಿನಿ ಸಭಾದ ಶತಮಾನೋತ್ಸವದ ಲೆಕ್ಕೊಡು ಜಾನಪದ ನೃತ್ಯ ಪಂತೊ

ಬೊಂಬೈ: ಬೊಂಬೈ ವಿದ್ಯಾದಾಯಿನಿ ಸಭಾದ ಶತಮಾನೋತ್ಸವದ ಲೆಕ್ಕೊಡು ಅ.29 ಐತಾರ ಸಾಂತಕ್ರೂಸ್ ಬಿಲ್ಲವ ಭವನದ ಸಭಾಂಗಣಡ್ ಜಾನಪದ ನೃತ್ಯ ಪಂತೊ ನಡಪರೆ ಉಂಡು.

ಈ ಪಂತೊ ಆನಿ ಬೊಲ್ಪುರ್ದ್ ಮಧ್ಯಾಹ್ನ ಮುಟ್ಟ ತುಳು ಕನ್ನಡ ಶಾಲೆ ಬೊಕ್ಕ ಸಂಘ ಸಂಸ್ಥೆಲೆಗ್ ನಡಪರೆ ಉಂಡು. ಈ ಪಂತೊಡು ಸುರುಕು ಪುದರ್ ಕೊರಿನ ಪತ್ತ್ ಕೂಟದಕ್ಲೆಗ್ ಮಾತ್ರ ಪಾಲ್ ಪಡೆಯೆರೆ ಅವಕಾಶ ಉಂಡು. ನೆತ್ತ ಮೇಲ್ವಿಚಾರಣೆನ್ ಸುರುತ್ತ 15 ಸಾರ ರೂ., ರಡ್ಡನೇದ 10 ಸಾರ ರೂ., ಬೊಕ್ಕ ಮೂಜಿನೇದ 5 ಸಾರ ರೂ. ನಗದು ಇನಾಮುನ್ ಕನ್ನಡ ಜಾನಪದ ಪರಿಷತ್ತು ಬೆಂಗ್ಲೂರ್ ದ ಮಹಾರಾಷ್ಟ್ರ ಘಟಕದ ಮುತಾಲಿಕೆಡ್ ಕೊರ್ಪುಂಡು.

ಅಂಚೆನೆ ಪಾಲ್ ಪಡೆಯಿನ ಮಾತ ಕೂಟಲೆಗ್ ಸಮಾಧಾನಕರ ಇನಾಮು ಬೊಕ್ಕ ಪಾರಿತೋಷಕನ್ ಸಂಸ್ಥೆದ ಮುತಾಲಿಕೆಡ್ ಕೊರ್ಪೆರ್. ಮಧ್ಯಾಹ್ನರ್ದ್ ಬೊಕ್ಕ ನಡಪರೆ ಇಪ್ಪುನ ಸಭಾ ಲೇಸ್ ಡ್ ಇನಾಮುನ್ ಕೊರ್ಪೆರ್. ಈ ಲೇಸ್ ಮುಟ್ಟ ಸ್ಪರ್ಧಾಳುಲು ಇಪ್ಪೊಡಾಪುಂಡು. ಬೊಲ್ಪುಗ್ ತೆನಸ್, ಮಧ್ಯಾಹ್ನ ಬೊಕ್ಕ ಬಯ್ಯಗ್ ವನಸ್ ದ ವ್ಯವಸ್ಥೆ ಉಂಡು. ಈ ಪಂತೊ ತುಳು ಕನ್ನಡಿಗೆರಾದ್ ಆಯೋಜನೆ ಮಲ್ದೆರ್. ಅಂಚಾದ್ ಮೊಕುಲು ಬನ್ನಗ ಆಧಾರ್ ಕಾರ್ಡ್ ಕೊನವೊಡಾಪುಂಡು.

ಈ ಪಂತೊಡು ಗರಿಷ್ಠ 8 ಜನ ಪಾಲ್ ಪಡೆವೊಲಿ. ಪದ್ಯ ಬೊಕ್ಕ ಡ್ಯಾನ್ಸ್ ಕೇವಲ ಜಾನಪದಗ್ ಅನುಗುಣವಾದಿಪ್ಪೊಡು. ಪದ್ಯನ್ ಬೇತೆನೇ ಪೆನ್ ಡ್ರೈವ್ ಮುಖೇನ ಸಂಸ್ಥೆಗ್ ಕಡಪಾವೊಡು. ಅಂಚೆನೆ ನಿಕ್ಲೆನ ಪುದರ್ ಬೊಕ್ಕ ಎಚ್ಚದ ಪೊಲಬುಗಾದ್ 9324759589 ಅತ್ತಂಡ 8850067062 ನಂಬರ್ ಗ್ ಸಂಪರ್ಕ ಮಲ್ಪೊಲಿ ಪಂದ್ ಸಂಸ್ಥೆದ ಗುರ್ಕಾರೆ ಪುರುಷೋತ್ತಮ ಎಸ್ ಕೋಟ್ಯಾನ್, ಕಾರ್ಯದರ್ಶಿ ಚಿತ್ರಾಪು ಕೆ.ಎಮ್ ಕೋಟ್ಯಾನ್ ಬೊಕ್ಕ ಪದುಕೆರ್ ಪ್ರಕಟಣೆಡ್ ತೆರಿಪಾದೆರ್.

ಅ.15-24: ಬೊಂಬೈ ಚರ್ಚ್ ಗೇಟ್ ದ ಶ್ರೀ ದುರ್ಗಾಂಬಿಕಾ ಭಜನಾ ಮಂಡಳಿದ 50 ವರ್ಷೊದ ಮಾರ್ನೆಮಿ ಉಚ್ಚಯ

ಬೊಂಬೈದ ಚರ್ಚ್ ಗೇಟ್ ದ ಶ್ರೀ ದುರ್ಗಾಂಬಿಕಾ ಭಜನಾ ಮಂಡಳಿದ 50 ನೇ ವರ್ಷೊದ ಮಾರ್ನೆಮಿ ಬೊಕ್ಕ ದಸರಾ ಉಚ್ಚಯ, ಸುವರ್ಣ ಮಹೋಚ್ಚಯ ಲೇಸ್ ಅ.15-24 ಮುಟ್ಟ ನಡಪರೆ ಉಂಡು.

ಪ್ರತಿದಿನೊಲ ಬೇತೆ ಬೇತೆ ಪೂಜೆ, ಭಜನೆ ಬೊಕ್ಕ ಧಾರ್ಮಿಕ, ವೈದಿಕ ವಿಧಿ ವಿಧಾನಲು ನಡಪರೆ ಉಂಡು. ಅಂಚೆನೆ ಅ.21 ಸನಿಯಾರ ಶ್ರೀ ಅಣ್ಣಪ್ಪ ಪಂಜುರ್ಲಿ ದೈವೊದ ಪೂಜೆ, ಅ.23 ಸೋಮಾರ ಮಹಾಕಾಳಿ ಅಮ್ಮನ ಪೂಜೆ ಬೊಕ್ಕ ಅ.24 ಅಂಗಾರೆ ವಿಜಯದಶಮಿದ ಲೆಕ್ಕೊಡು ಬಯ್ಯಗ್ ಸಭಾ ಲೇಸ್ ಬೊಕ್ಕ ಮಂಡಳಿದ ಸುವರ್ಣ ಉಚ್ಚಯದ ಲೆಕ್ಕೊಡು ಮಂಡಳಿಡ್ ಮಸ್ತ್ ವರ್ಷ ಸೇವೆ ಸಂದಾಯಿನಕ್ಲೆಗ್ ಸನ್ಮಾನ ನಡಪರೆ ಉಂಡು ಪಂದ್ ಶ್ರೀ ದುರ್ಗಾಂಬಿಕಾ ಭಜನಾ ಮಂಡಳಿದ ಗುರ್ಕಾರ್ಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಭಾರತ್ ಬ್ಯಾಂಕ್ ದ ಪೊಸ ಕಾರ್ಯಾಧ್ಯಕ್ಷೆರಾದ್ ಸೂರ್ಯಕಾಂತ್ ಜಯ ಸುವರ್ಣ ಆಯ್ಕೆ

ಭಾರತ್ ಕೋ-ಆಪರೇಟಿವ್ ಬ್ಯಾಂಕ್ ದ ಪೊಸ ಕಾರ್ಯಾಧ್ಯಕ್ಷೆರಾದ್ ಸೂರ್ಯಕಾಂತ್ ಜಯ ಸುವರ್ಣ ನೇಮಕ ಆತೆರ್.‌

ನನ ದುಂಬಾಗ್ ಮೆರೆನ ದುಂಬಾತ್ತಿಗೆಡ್ ಈ ಬ್ಯಾಂಕ್ ನಡಪರೆ ಉಂಡು.

ಅ.15: ಬೊಂಬೈ ತೀಯಾ ಸಮಾಜದ ಮುತಾಲಿಕೆಡ್ ವರ್ಷೊದ ಭಗವತೀ ಪೂಜೆ

ತೀಯಾ ಸಮಾಜ ಬೊಂಬೈದ ಮುತಾಲಿಕೆಡ್ ಮಾರ್ನೆಮಿ ಉಚ್ಚಯದ ಲೆಕ್ಕೊಡು ಭಗವತೀ ಪೂಜೆ ಅ.15 ಕ್ಕ್ ಬಯ್ಯಗ್ ಸಂಘದ ಕಚೇರಿಡ್ ಗುರ್ಕಾರೆ ಕೃಷ್ಣ ಎನ್ ಉಚ್ಚಿಲ್ ಮೆರೆನ ದುಂಬಾತ್ತಿಗೆಡ್ ನಡಪರೆ ಉಂಡು.

ಬಯ್ಯಗ್ ತುಡರ್ ಅರ್ಲಾವೆರೆ, ಭಜನೆ ಸಂಘದ ಸದಸ್ಯೆರೆರ್ದ್ ಮಂಗಳಾರತಿ ಬೊಕ್ಕ ತೀರ್ಥ ಪ್ರಸಾದ ಪಟ್ಟಿಯೆರೆ ಉಂಡು. ಈ ಲೇಸ್ ಗ್ ಸಮುದಾಯ ಭಾಂದವೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ತೀರ್ಥ ಪ್ರಸಾದ ದೆತೊಂದು ಭಗವತೀ ಅಪ್ಪೆನ ಕೃಪೆಗ್ ಪಾತ್ರರಾವೊಡು ಪಂದ್ ಬೊಂಬೈ ತೀಯಾ ಸಮಾಜದ ಗುರ್ಕಾರ್ಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.