ಅ.15: ವಸಾಯಿ ಶ್ರೀ ರಜಕ ಸಂಘದ ಕಚೇರಿಡ್ ದುರ್ಗಾಪೂಜೆ
ವಸಾಯಿ ಶ್ರೀ ರಜಕ ಸಂಘದ ಮುತಾಲಿಕೆಡ್ ಅ.15 ಐತಾರ ವಸಾಯಿ ಶ್ರೀ ರಜಕ ಸಂಘದ ಕಚೇರಿಡ್ ದುರ್ಗಾಪೂಜೆ ನಡಪರೆ ಉಂಡು.
ಈ ಲೇಸ್ ಡ್ ಮಾತ ಸಮಿತಿದ ಸದಸ್ಯೆರ್ ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಬೊಂಬಾಯಿದ ಸುದ್ದಿ | Mumbai News
ಅ.15: ಮೀರಾ ಬಾಯಂದರ್ ದ ಸೆವೆಲ್ ಸ್ಕ್ವೇರ್ ಅಕಾಡೆಮಿ ಸ್ಕೂಲ್ ಮೈದಾನಡ್ ಮೈತಿದಿ ತುಳು ನಾಟಕ
ಬೊಂಬೈ: ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ರಚನೆ ಮಲ್ತ್ ದ್ ನಿರ್ದಶನನ ಮಲ್ತಿನ ಮೈತಿದಿ ತುಳು ನಾಟಕ ಮೀರಾ ಬಾಯಂದರ್ ದ ಸೆವೆಲ್ ಸ್ಕ್ವೇರ್ ಅಕಾಡೆಮಿ ಸ್ಕೂಲ್ ಮೈದಾನಡ್ ಅ.15 ಐತಾರ ಬಯ್ಯಗ್ ನಡಪರೆ ಉಂಡು.
ಅಂಚೆನೆ ಈ ಲೇಸ್ ಮೀರಾ ಬಾಯಂದರ್ ಭಾರತೀಯ ಜನತಾ ಪಕ್ಷ ದಕ್ಷಿಣ ಭಾರತೀಯ ಘಟಕ, ನವತರುಣ ಮಿತ್ರ ಮಂಡಳಿ ಬೊಕ್ಕ ಬೊಂಬೈ ರಂಗ ಚಾವಡಿದ ಒಟ್ಟುಸೇರಿಗೆಡ್ ನಡಪರೆ ಉಂಡು.
ನಟೆ ಸ್ವರಾಜ್ ಶೆಟ್ಟಿ ಅಭಿನಯ ಮಲ್ತಿನ ಈ ನಾಟಕಗ್ ಎ.ಕೆ ವಿಜಯ್ (ಕೋಕಿಲಾ) ಸಂಗೀತ ಕೊರ್ತೆರ್.
ಅ.29: ವಿದ್ಯಾದಾಯಿನಿ ಸಭಾದ ಶತಮಾನೋತ್ಸವದ ಲೆಕ್ಕೊಡು ಜಾನಪದ ನೃತ್ಯ ಪಂತೊ
ಬೊಂಬೈ: ಬೊಂಬೈ ವಿದ್ಯಾದಾಯಿನಿ ಸಭಾದ ಶತಮಾನೋತ್ಸವದ ಲೆಕ್ಕೊಡು ಅ.29 ಐತಾರ ಸಾಂತಕ್ರೂಸ್ ಬಿಲ್ಲವ ಭವನದ ಸಭಾಂಗಣಡ್ ಜಾನಪದ ನೃತ್ಯ ಪಂತೊ ನಡಪರೆ ಉಂಡು.
ಈ ಪಂತೊ ಆನಿ ಬೊಲ್ಪುರ್ದ್ ಮಧ್ಯಾಹ್ನ ಮುಟ್ಟ ತುಳು ಕನ್ನಡ ಶಾಲೆ ಬೊಕ್ಕ ಸಂಘ ಸಂಸ್ಥೆಲೆಗ್ ನಡಪರೆ ಉಂಡು. ಈ ಪಂತೊಡು ಸುರುಕು ಪುದರ್ ಕೊರಿನ ಪತ್ತ್ ಕೂಟದಕ್ಲೆಗ್ ಮಾತ್ರ ಪಾಲ್ ಪಡೆಯೆರೆ ಅವಕಾಶ ಉಂಡು. ನೆತ್ತ ಮೇಲ್ವಿಚಾರಣೆನ್ ಸುರುತ್ತ 15 ಸಾರ ರೂ., ರಡ್ಡನೇದ 10 ಸಾರ ರೂ., ಬೊಕ್ಕ ಮೂಜಿನೇದ 5 ಸಾರ ರೂ. ನಗದು ಇನಾಮುನ್ ಕನ್ನಡ ಜಾನಪದ ಪರಿಷತ್ತು ಬೆಂಗ್ಲೂರ್ ದ ಮಹಾರಾಷ್ಟ್ರ ಘಟಕದ ಮುತಾಲಿಕೆಡ್ ಕೊರ್ಪುಂಡು.
ಅಂಚೆನೆ ಪಾಲ್ ಪಡೆಯಿನ ಮಾತ ಕೂಟಲೆಗ್ ಸಮಾಧಾನಕರ ಇನಾಮು ಬೊಕ್ಕ ಪಾರಿತೋಷಕನ್ ಸಂಸ್ಥೆದ ಮುತಾಲಿಕೆಡ್ ಕೊರ್ಪೆರ್. ಮಧ್ಯಾಹ್ನರ್ದ್ ಬೊಕ್ಕ ನಡಪರೆ ಇಪ್ಪುನ ಸಭಾ ಲೇಸ್ ಡ್ ಇನಾಮುನ್ ಕೊರ್ಪೆರ್. ಈ ಲೇಸ್ ಮುಟ್ಟ ಸ್ಪರ್ಧಾಳುಲು ಇಪ್ಪೊಡಾಪುಂಡು. ಬೊಲ್ಪುಗ್ ತೆನಸ್, ಮಧ್ಯಾಹ್ನ ಬೊಕ್ಕ ಬಯ್ಯಗ್ ವನಸ್ ದ ವ್ಯವಸ್ಥೆ ಉಂಡು. ಈ ಪಂತೊ ತುಳು ಕನ್ನಡಿಗೆರಾದ್ ಆಯೋಜನೆ ಮಲ್ದೆರ್. ಅಂಚಾದ್ ಮೊಕುಲು ಬನ್ನಗ ಆಧಾರ್ ಕಾರ್ಡ್ ಕೊನವೊಡಾಪುಂಡು.
ಈ ಪಂತೊಡು ಗರಿಷ್ಠ 8 ಜನ ಪಾಲ್ ಪಡೆವೊಲಿ. ಪದ್ಯ ಬೊಕ್ಕ ಡ್ಯಾನ್ಸ್ ಕೇವಲ ಜಾನಪದಗ್ ಅನುಗುಣವಾದಿಪ್ಪೊಡು. ಪದ್ಯನ್ ಬೇತೆನೇ ಪೆನ್ ಡ್ರೈವ್ ಮುಖೇನ ಸಂಸ್ಥೆಗ್ ಕಡಪಾವೊಡು. ಅಂಚೆನೆ ನಿಕ್ಲೆನ ಪುದರ್ ಬೊಕ್ಕ ಎಚ್ಚದ ಪೊಲಬುಗಾದ್ 9324759589 ಅತ್ತಂಡ 8850067062 ನಂಬರ್ ಗ್ ಸಂಪರ್ಕ ಮಲ್ಪೊಲಿ ಪಂದ್ ಸಂಸ್ಥೆದ ಗುರ್ಕಾರೆ ಪುರುಷೋತ್ತಮ ಎಸ್ ಕೋಟ್ಯಾನ್, ಕಾರ್ಯದರ್ಶಿ ಚಿತ್ರಾಪು ಕೆ.ಎಮ್ ಕೋಟ್ಯಾನ್ ಬೊಕ್ಕ ಪದುಕೆರ್ ಪ್ರಕಟಣೆಡ್ ತೆರಿಪಾದೆರ್.
ಅ.15-24: ಬೊಂಬೈ ಚರ್ಚ್ ಗೇಟ್ ದ ಶ್ರೀ ದುರ್ಗಾಂಬಿಕಾ ಭಜನಾ ಮಂಡಳಿದ 50 ವರ್ಷೊದ ಮಾರ್ನೆಮಿ ಉಚ್ಚಯ
ಬೊಂಬೈದ ಚರ್ಚ್ ಗೇಟ್ ದ ಶ್ರೀ ದುರ್ಗಾಂಬಿಕಾ ಭಜನಾ ಮಂಡಳಿದ 50 ನೇ ವರ್ಷೊದ ಮಾರ್ನೆಮಿ ಬೊಕ್ಕ ದಸರಾ ಉಚ್ಚಯ, ಸುವರ್ಣ ಮಹೋಚ್ಚಯ ಲೇಸ್ ಅ.15-24 ಮುಟ್ಟ ನಡಪರೆ ಉಂಡು.
ಪ್ರತಿದಿನೊಲ ಬೇತೆ ಬೇತೆ ಪೂಜೆ, ಭಜನೆ ಬೊಕ್ಕ ಧಾರ್ಮಿಕ, ವೈದಿಕ ವಿಧಿ ವಿಧಾನಲು ನಡಪರೆ ಉಂಡು. ಅಂಚೆನೆ ಅ.21 ಸನಿಯಾರ ಶ್ರೀ ಅಣ್ಣಪ್ಪ ಪಂಜುರ್ಲಿ ದೈವೊದ ಪೂಜೆ, ಅ.23 ಸೋಮಾರ ಮಹಾಕಾಳಿ ಅಮ್ಮನ ಪೂಜೆ ಬೊಕ್ಕ ಅ.24 ಅಂಗಾರೆ ವಿಜಯದಶಮಿದ ಲೆಕ್ಕೊಡು ಬಯ್ಯಗ್ ಸಭಾ ಲೇಸ್ ಬೊಕ್ಕ ಮಂಡಳಿದ ಸುವರ್ಣ ಉಚ್ಚಯದ ಲೆಕ್ಕೊಡು ಮಂಡಳಿಡ್ ಮಸ್ತ್ ವರ್ಷ ಸೇವೆ ಸಂದಾಯಿನಕ್ಲೆಗ್ ಸನ್ಮಾನ ನಡಪರೆ ಉಂಡು ಪಂದ್ ಶ್ರೀ ದುರ್ಗಾಂಬಿಕಾ ಭಜನಾ ಮಂಡಳಿದ ಗುರ್ಕಾರ್ಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಭಾರತ್ ಬ್ಯಾಂಕ್ ದ ಪೊಸ ಕಾರ್ಯಾಧ್ಯಕ್ಷೆರಾದ್ ಸೂರ್ಯಕಾಂತ್ ಜಯ ಸುವರ್ಣ ಆಯ್ಕೆ
ಭಾರತ್ ಕೋ-ಆಪರೇಟಿವ್ ಬ್ಯಾಂಕ್ ದ ಪೊಸ ಕಾರ್ಯಾಧ್ಯಕ್ಷೆರಾದ್ ಸೂರ್ಯಕಾಂತ್ ಜಯ ಸುವರ್ಣ ನೇಮಕ ಆತೆರ್.
ನನ ದುಂಬಾಗ್ ಮೆರೆನ ದುಂಬಾತ್ತಿಗೆಡ್ ಈ ಬ್ಯಾಂಕ್ ನಡಪರೆ ಉಂಡು.
ಅ.15: ಬೊಂಬೈ ತೀಯಾ ಸಮಾಜದ ಮುತಾಲಿಕೆಡ್ ವರ್ಷೊದ ಭಗವತೀ ಪೂಜೆ
ತೀಯಾ ಸಮಾಜ ಬೊಂಬೈದ ಮುತಾಲಿಕೆಡ್ ಮಾರ್ನೆಮಿ ಉಚ್ಚಯದ ಲೆಕ್ಕೊಡು ಭಗವತೀ ಪೂಜೆ ಅ.15 ಕ್ಕ್ ಬಯ್ಯಗ್ ಸಂಘದ ಕಚೇರಿಡ್ ಗುರ್ಕಾರೆ ಕೃಷ್ಣ ಎನ್ ಉಚ್ಚಿಲ್ ಮೆರೆನ ದುಂಬಾತ್ತಿಗೆಡ್ ನಡಪರೆ ಉಂಡು.
ಬಯ್ಯಗ್ ತುಡರ್ ಅರ್ಲಾವೆರೆ, ಭಜನೆ ಸಂಘದ ಸದಸ್ಯೆರೆರ್ದ್ ಮಂಗಳಾರತಿ ಬೊಕ್ಕ ತೀರ್ಥ ಪ್ರಸಾದ ಪಟ್ಟಿಯೆರೆ ಉಂಡು. ಈ ಲೇಸ್ ಗ್ ಸಮುದಾಯ ಭಾಂದವೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ತೀರ್ಥ ಪ್ರಸಾದ ದೆತೊಂದು ಭಗವತೀ ಅಪ್ಪೆನ ಕೃಪೆಗ್ ಪಾತ್ರರಾವೊಡು ಪಂದ್ ಬೊಂಬೈ ತೀಯಾ ಸಮಾಜದ ಗುರ್ಕಾರ್ಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಅ.13: ನಾಲಾಸೋಪಾರ ಹೋಟೆಲ್ ಗ್ಯಾಲಕ್ಸಿಡ್ “ಮೈತಿದಿ’ ನಾಟಕ
ಬೊಂಬೈ: ಫ್ರೆಂಡ್ಸ್ ಸರ್ಕಲ್ ಕಣಂಜಾರ್ ಬೊಂಬೈದ 20ನೇ ವರ್ಷೊದ ಲೆಕ್ಕೊಡು ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ರಚನೆ, ನಿರ್ದೇಶನದ ಮೈತಿದಿ ತುಳು ನಾಟಕ ಅ.13 ಸುಕ್ರಾರ ನಾಲಾಸೋಪಾರ ಹೋಟೆಲ್ ಗ್ಯಾಲಕ್ಸಿ ಸಭಾಂಗಣಡ್ ನಡಪರೆ ಉಂಡು.
ಈ ನಾಟಕನ್ ಶಶಿಧರ ಕೆ. ಶೆಟ್ಟಿ ಇನ್ನಂಜೆ ಮೆರೆನ ಗುರ್ಕಾರ್ಮೆಡ್, ಪ್ರವೀಣ್ ಶೆಟ್ಟಿ ಕಣಂಜಾರ್ ಮೆರೆನ ಮುತಾಲಿಕೆಡ್ ಕಲಾ ಸಂಗಮದ ಕಲಾವಿದೆರೆರ್ದ್, ಸ್ವರಾಜ್ ಶೆಟ್ಟಿ ಅಭಿನಯಡ್ ಈ ನಾಟಕ ನಡಪರೆ ಉಂಡು. ಈ ನಾಟಕಗ್ ಎ.ಕೆ ವಿಜಯ್ (ಕೋಕಿಲಾ) ಮೇರ್ ಸಂಗೀತ ಕೊರ್ತೆರ್.
ಅ.15-24: ಜೋಗೇಶ್ವರಿ ಶ್ರೀ ಜಗದಂಬಾ ಕಾಲಬೈರವ ದೇವಲ್ಯಡ್ ಮಾರ್ನೆಮಿ ಉಚ್ಚಯ
ಬೊಂಬೈ: ಜೋಗೇಶ್ವರಿ ಶ್ರೀ ಜಗದಂಬಾ ಕಾಲಬೈರವ ದೇವಲ್ಯಡ್ ಅ.15-24 ಮಾರ್ನೆಮಿ ಉಚ್ಚಯ ನಡಪರೆ ಉಂಡು.
ಈ ಲೇಸ್ ದೇವಲ್ಯದ ಪ್ರಧಾನ ಅರ್ಚಕೆರ್ ಪಾದೂರು ನರಹರಿ ತಂತ್ರಿಲೆನ ಪೌರೋಹಿತ್ಯಡ್ ನಡಪರೆ ಉಂಡು. ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ಜಗದಂಬೆನ ಕೃಪೆಗ್ ಪಾತ್ರರಾವೊಡು ಪಂದ್ ಬೊಂಬೈ ಶ್ರೀ ಜಗದಂಬಾ ಕಾಲಬೈರವ ದೇವಲ್ಯದ ಗುರ್ಕಾರ್ಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಅ.10: ಅಂಧೇರಿ ಮೊಗವೀರ ಭವನಡ್ ಶಿವದೂತೆ ಗುಳಿಗೆ ತುಳು ನಾಟಕ
ಬೊಂಬೈ ಮೊಗವೀರ ವ್ಯವಸ್ಥಾಪಕ ಮಂಡಳಿದ ಸಾಂಸ್ಕೃತಿಕ ಸಮಿತಿದ ಮುತಾಲಿಕೆಡ್, ಕಲಾ ಸಂಗಮ ಕುಡ್ಲ ಕಲಾವಿದೆರ್ ಅಭಿನಯ ಮಲ್ಪುನ ಶಿವದೂತೆ ಗುಳಿಗೆ ತುಳು ನಾಟಕ ಅ.10 ಸನಿಯಾರ ಬಯ್ಯಗ್ ಬೊಂಬೈದ ಅಂಧೇರಿ ಮೊಗವೀರ ಭವನಡ್ ನಡಪರೆ ಉಂಡು.
ತುಳು ರಂಗಭೂಮಿಡ್ ಇಸೇಸ ಸಂಚಲನ ಮೂಡಿಸಾಯಿನ ಅದ್ಭುತ, ಅಮೋಘ ಬೊಕ್ಕ ಅತ್ಯಾಕರ್ಷಕವಾಯಿನ ಈ ನಾಟಕನ್ ತೂಪುನ ಅವಕಾಶನ್ ಕಳೆವೊನೊರ್ಚಿ ಪಂದ್ ಬೊಂಬೈ ಮೊಗವೀರ ವ್ಯವಸ್ಥಾಪಕ ಮಂಡಳಿದ ಗುರ್ಕಾರೆ ಎಸ್ ಅರುಣ್ ಕುಮಾರ್, ಮಾನಾದಿಗೆದ ಪ್ರಧಾನ ಕಾರ್ಯದರ್ಶಿ ದಿಲೀಪ್ ಕುಮಾರ್ ಮುಲ್ಕಿ, ಮಾನಾದಿಗೆದ ಕೋಶಾಧಿಕಾರಿ ಪ್ರತಾಪ್ ಕುಮಾರ್ ಕರ್ಕೇರ ಲೆಪ್ಪೋಲೆಡ್ ತೆರಿಪಾದೆರ್.
ಬೊಂಬೈದ ಗೋರೆಗಾಂವ್ ಡ್ ತೂ ಪೊತ್ತ್ ದ್ 6 ಜನ ತೀರ್ ಪೋಯೆರ್
ಬೊಂಬೈದ ಗೋರೆಗಾಂವ್ ಡ್ ಇಪ್ಪುನ 7 ಮಾಳಿಗೆದ ಕಟ್ವಾನಡ್ ನಡುರಾತ್ರೆ ತೂ ಪೊತ್ತ್ ದ್ 6 ಜನ ತೀರ್ ಪೋಯೆರ್.
ಅತ್ತಂದೆ ಈ ಘಟನೆಡ್ 45 ಜನಕ್ಕ್ ಮಸ್ತ್ ಪೆಟ್ಟಾತ್ಂಡ್. 2 ಜನತ್ತ ಸ್ಥಿತಿ ಗಂಭೀರ ಉಂಡು. ಸುರುಕು ಪಾರ್ಕಿಂಗ್ ಜಾಗೆಡ್ ಸುರು ಆಯಿನ ತೂ ಕ್ರಮೇಣ ಒಂಜೊಂಜೇ ಮಾಳಿಗೆಗ್ ಪಸೆರ್ಂಡ್. ಪಾರ್ಕಿಂಗ್ ಜಾಗೆಗ್ ಉಂತಾದ್ ಇತ್ತಿನ 4 ಕಾರ್ ಬೊಕ್ಕ 30 ಬೈಕ್ ತೂಟ್ಟ್ ಪೊತ್ತ್ ದ್ಂಡ್.