ದೇಶಡ್ ನಡಪಿನ ಸುದ್ದಿ | National News

ಸಿಕ್ಕಿಂಡ್ ಮೇಘಸ್ಫೋಟ: 14 ಜನ ತೀರ್ ಪೋಯೆರ್, 102 ಜನ ನಾಪತ್ತೆ

ಸಿಕ್ಕಿಂಡ್ ಆಯಿನ ಮೇಘಸ್ಪೋಟಡ್ ಬೊಲ್ಲ ಬತ್ತ್‌ದ್ 14 ಜನ ತೀರ್ ಪೋದಿತ್ತ್‌ದ್, 102 ಜನ ನಾಪತ್ತೆ ಆಯಿನ ಘಟನೆ ನಡತ್ಂಡ್.

ಸಂಕಲು, ಗಾಡಿಲು, ಇಲ್ಲ್-ಕಟ್ವಾನೊಲು ಬೊಲ್ಲಡ್ ಪೋದಿತ್ತ್‌ದ್ ಈ ಘಟನೆನ್ ಸಿಕ್ಕಿಂ ಸರ್ಕಾರ “ರಾಷ್ಟ್ರೀಯ ವಿಪತ್ತು” ಪಂದ್ ಘೋಷಣೆ ಮಲ್ತ್‌ದ್ಂಡ್. ಅಂಗಾರೆ ನಡುರಾತ್ರೆ ಟೀಸ್ಟಾ ತುದೆಟ್ಟ್ ಬೊಲ್ಲ ಬತ್ತಿತ್ಂಡ್.

ಮೂಜಿ ಜನಕ್ಕ್ ರಸಾಯನ ಶಾಸ್ತ್ರ ನೊಬೆಲ್ ಪುರಸ್ಕಾರ

ಸ್ಟಾಕ್‌ಹೋಂ: ಮೌಂಗಿ ಬವೆಂಡಿ, ಲೂಯಿಸ್ ಬ್ರೂಸ್ ಬೊಕ್ಕ ಅಲೆಕ್ಸಿ ಎಕಿವೊವ್ ಮೊಕುಲೆಗ್ ಕ್ವಾಂಟಮ್ ಡಾಟ್‌ದ ಬೇಲೆಗಾದ್ ಈ ಸಾಲ್‌ದ ಪ್ರತಿಷ್ಟಿತ ರಸಾಯನಶಾಸ್ತ್ರದ ನೊಬೆಲ್ ಪ್ರಶಸ್ತಿನ್ ಕೊರಿಯರ ಉಲ್ಲೆರ್.

ರಾಯಲ್ ಸ್ವೀಡಿಷ್ ಅಕಾಡೆಮಿ ಆಫ್ ಸೈನ್ಸಸ್‌ದ ಪ್ರಧಾನ ಕಾರ್ಯದರ್ಶಿ ಹ್ಯಾನ್ಸ್ ಎಲೆಗ್ರೆನ್ ಮೇರ್ ಸ್ಟಾಕ್‌ಹೋಮ್‌ಡ್ ಪ್ರಶಸ್ತಿನ್ ಘೋಷಣೆ ಮಲ್ತ್‌ದೆರ್.

ಇಟಲಿ: ಸಂಕರ್ದ್ ಪೊರೆಲ್‌ದ್ ಬೂರ್ದಿನ ಬಸ್- 21 ಜನ ತೀರ್ ಪೋಯೆರ್

ಇಟಲಿ: ಕ್ಯಾಂಪ್‌ಗ್ರೌಂಡ್‌ಗ್ ಪ್ರವಾಸಿಗೆರೆನ್ ಲೆತೊಂದು ಪೋವೊಂದಿತ್ತಿನ ಬಸ್ ಉತ್ತರ ಇಟಲಿದ ವೆನಿಸ್ ಕೈತಲ್‌ದ ಸಂಕರ್ದ್ ಪೊರೆಲ್‌ದ್ ಬೂರ್ದು ತೂ ಪೊತ್ತಿನ ಪರಿಣಾಮ 21 ಪ್ರವಾಸಿಗೆರ್ ತೀರ್ ಪೋಯೆರ್.

ಇಟಲಿದ ಅಧಿಕಾರಿಲೆನ ಮಾಹಿತಿದ ಪ್ರಕಾರ ಈ ಅಪಘಾತಗ್ ಕಾರಣ ತೆರಿದ್ ಬೈದಿಜಿ. ಬಸ್ಸ್‌ಟ್ಟ್ ಇತ್ತಿನ 15 ಜನನ್ ಮಾತ್ರ ಒರಿಪಾಯೆರ ಸಾಧ್ಯ ಆಂಡ್ ಪಂದ್ ಅಧಿಕಾರಿಲು ಮಾಹಿತಿ ಕೊರ್ತೆರ್.

ಏಷ್ಯನ್ ಗೇಮ್ಸ್‌ಡ್ ಬಂಗಾರ್‌ದ ಪದಕ ಗೆಂದಿನ ಭಾರತ

ಹ್ಯಾಂಗ್‌ಝೂ ಮುಲ್ಪ ನಡತೊಂದು ಇಪ್ಪುನ ಏಷ್ಯನ್ ಗೇಮ್ಸ್‌ಡ್ ಭಾರತದ ಆರ್ಚರಿ ತಂಡ ಮಿಶ್ರ ಕಾಂಪೌಂಡ್ ವಿಭಾಗಡ್ ಬಂಗಾರ್‌ದ ಪದಕ ಗೆಂದ್‌ದೆರ್.

ಭಾರತದ ಜ್ಯೋತಿ ಸುರೇಖಾ ವೆನ್ನಂ ಅಂಚನೆ ಓಜಸ್ ದೇವತಲೆ ಮೇರ್ ಕೊರಿಯಾದ ಚೇವಾನ್ ಬೊಕ್ಕ ಜೂ ಜೇಹೂನ್ ಮೆರೆನ್ ಸೋಪಾದ್ ಬಂಗಾರ್‌ದ ಪದಕನ್ ಗೆಂದ್‌ದೆರ್.

ಅಮೆರಿಕಡ್ ಬಿ.ಆರ್ ಅಂಬೇಡ್ಕರ್ ಮೆರೆನ ಮಾಮಲ್ಲ ಮೂರ್ತಿ ಅನಾವರಣ

ವಾಷಿಂಗ್ಟನ್: ಭಾರತದ ಸಂವಿಧಾನ ಶಿಲ್ಪಿ ಡಾ.ಬಿ.ಆರ್.ಅಂಬೇಡ್ಕರ್ ಮೆರೆನ ಮಾಮಲ್ಲ ಮೂರ್ತಿ ಅಮೆರಿಕದ ಮೇರಿಲ್ಯಾಂಡ್‌ಡ್ ಅಕ್ಟೋಬರ್ 14 ಕ್ಕ್ ಅನಾವರಣ ಆಯರೆ ಉಂಡು. ಪಿದಯ್ ದೇಶಡ್ ಸ್ಥಾಪನೆ ಆವೊಂದಿಪ್ಪುನ ಮಾಮಲ್ಲ ಮೂರ್ತಿ ಉಂದು ಆದ್ ಉಂಡು ಪಂದ್ ಸಂಘಟಕೆರ್ ತೆರಿಪಾದೆರ್.

19 ಅಡಿ ಎತ್ತರದ ಬಿ.ಆರ್.ಅಂಬೇಡ್ಕರ್ ಮೆರೆನ ಮೂರ್ತಿಗ್ “ಸಮಾನತೆದ ಪ್ರತಿಮೆ” ಪಂದ್ ಪುದರ್ ದೀತೆರ್. ಈ ಮೂರ್ತಿನ್ ಪುಗರ್ತೆದ ಶಿಲ್ಪಿ, ಪದ್ಮಭೂಷಣ ಪ್ರಶಸ್ತಿ ಪುರಸ್ಕೃತೆರ್ ರಾಮ್ ವಾಂಜಿ ಸುತಾರ್ ನಿರ್ಮಾಣ ಮಲ್ತ್‌ದೆರ್.

ಕಾರ್ ಬೊಕ್ಕ ಟ್ರಕ್ ಆಕ್ಸಿಡೆಂಟ್; ತೀರ್ ಪೋಯೆರ್ 8 ಜನ

ಲಕ್ನೋ: ಕಾರ್ ಬೊಕ್ಕ ಟ್ರಕ್‌ದ ನಡುಟ್ಟ್ ಆಕ್ಸಿಡೆಂಟ್ ಆದ್ 8 ಜನ ತೀರ್ ಪೋಯಿನ ಘಟನೆ ಉತ್ತರ ಪ್ರದೇಶದ ವಾರಣಾಸಿಡ್ ಬುಧಾರ ಕಾಂಡೆ ನಡತ್ಂಡ್.

ವಿಪಿನ್ ಯಾದವ್ ಬೊಕ್ಕ ಅರೆನ ಅಪ್ಪೆ ಗಂಗಾ ಯಾದವ್, ಮಹೇಂದ್ರ ವರ್ಮಾ ಬೊಕ್ಕ ಅರೆನ ಬೊಡೆದಿ ಚಂದ್ರಕಾಳಿ, ರಾಜೇಂದ್ರ ಯಾದವ್ ಪಂದ್ ಗುರ್ತಿಸಾದೆರ್. ನನ ಮೂಜಿ ಜನತ್ತ ಗುರುತ್ತ ನನಲ ತಿಕ್ಕ್‌ದಿಜಿ.

ವಾರಣಾಸಿ-ಲಖನೌ ಹೈವೇಡ್ ಬನಾರಸ್‌ರ್ದ್ ಪಿಲಿಭಿತ್ ಕಡೆಕ್ಕ್ ಪೋವೊಂದಿತ್ತಿನ ಕಾರ್ ಟ್ರಕ್‌ಗ್ ಗುದ್ದುದ್ಂಡ್. ಮೂಲದ ಪ್ರಕಾರ ತೀರ್ ಪೋಯಿನಕುಲು ದೇವೆರೆನ ದರ್ಶನ ಪಡೆದ್ ವಾಪಾಸ್ ಆವೊಂದಿತ್ತಿನ ಪೊರ್ತುಡು ಈ ಘಟನೆ ನಡತ್ಂಡ್.

ದಿಲ್ಲಿಡ್ ಭೂಕಂಪ

ದಿಲ್ಲಿದ ಎನ್‌ಸಿಆರ್‌ಡ್ ಅಂಗಾರೆ ಮಧ್ಯಾಹ್ನ 2.25ಕ್ಕ್ ಭೂಕಂಪ ಆತ್ಂಡ್. ರಿಕ್ಟರ್ ಮಾಪಕಡ್ 4.6 ಮಟ್ಟಡ್ ಭೂಕಂಪ ಆತ್ಂಡ್ ಪಂದ್ ಭೂಕಂಪ ಶಾಸ್ತ್ರದ ರಾಷ್ಟ್ರೀಯ ಕೇಂದ್ರ ತೆರಿಪಾದ್ಂಡ್.

ಈ ಭೂಕಂಪಡ್ ಒವ್ವೇ ರೀತಿದ ತೊಂದರೆ ಆತಿಜಿ. ದಿಲ್ಲಿದ ಜನಕುಲು ಭೂಕಂಪದ ಅನುಭವದ ಬಗೆಟ್ ಪೋಸ್ಟ್ ಮಲ್ತ್‌ದೆರ್.