ಲಡಾಖ್ಗ್ ಶೂಟಿಂಗ್ಗ್ ಪೋದಿತ್ತಿನ ಪೊರ್ತುಡು ಹುಷಾರ್ದಾಂತೆ ಇತ್ತಿನ ಸ್ಯಾಂಡಲ್ವುಡ್ದ ನಟೆ ಧನುಷ್ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋಯೆರ್.
ನ್ಯೂಮೋನಿಯರ್ದ್ ನರೆಲೊಂದು ಇತ್ತಿನ ಮೇರ್ ರಾತ್ರೆ 10.45 ಕ್ಕ್ ಚಿಕಿತ್ಸೆ ಸಮ ಆವಂದೆ ಬೆಂಗ್ಲೂರ್ದ ಆಸ್ಪತ್ರೆಡ್ ತೀರ್ ಪೋಯೆರ್. ಶ್ರೀ ಮುತ್ತು ರಾಜ ಪನ್ಪಿನ ಪುದರ್ಡ್ ಇತ್ತಿನ ಮೇರ್ ಪಿಚ್ಚರ್ಗಾದ್ ಧನುಷ್ ಪಂದ್ ಬದಲ್ ಮಲ್ತ್ದಿತ್ತೆರ್.
ಪಾಲ್ಘರ್: ಮಹಾರಾಷ್ಟ್ರದ ಪಾಲ್ಘರ್ ಜಿಲ್ಲೆದ ವಸಾಯಿ ಪೇಂಟೆಡ್ ಜಿಮ್ಡ್ ವ್ಯಾಯಾಮ ಮಲ್ತೊಂದಿಪ್ಪುನಗ 67 ವರ್ಷದ ಜನ ಒರಿ ತೀರ್ ಪೋಯಿನ ಘಟನೆ ನಡತ್ಂಡ್.
ಪ್ರಹ್ಲಾದ್ ನಿಕಮ್ ತೀರ್ ಪೋಯಿನಾರ್. ಜಿಮ್ಡ್ ವ್ಯಾಯಾಮ ಮಲ್ತೊಂದಿಪ್ಪುನಗ ತರೆ ತಿರ್ಗ್ದ್ ತಿರ್ತ್ ಬೂರ್ದೆರ್. ತೀರ್ ಪೋಯಿನೆಕ್ಕ್ ಕಾರಣ ದಾದ ಪಂದ್ ತೆರಿದ್ ಬೈದಿಜಿ.
ಹಳೆಯಂಗಡಿ: ದೇವಸ್ಥಾನದ ಅಭಿವೃದ್ಧಿ ಆಂಡ ಗ್ರಾಮದ ಅಭಿವೃದ್ಧಿ ಆಪುಂಡು. ಪ್ರಕೃತಿಡ್ ತಿಕ್ಕುನ ಒವ್ವೇ ವಸ್ತುಲ ಆವಡ್, ಅವು ನಮಕ್ಕ್ ದೇವೆರ್ ಕೊರ್ತಿನವು. ಅವೆನ್ ಅರೆಗೇ ಸಮರ್ಪಣೆ ಮಲ್ತ್ಂಡ ನಮ್ಮ ಬದ್ ಕ್ ಸಾರ್ತಕ ಆಪುಂಡು. ಅಯಿಟ್ಟ್ ದೇವೆರ್ನ ಅನುಗ್ರಹ ತಿಕ್ಕುಂಡು ಪಂದ್ ಶ್ರೀ ಕ್ಷೇತ್ರ ಸುಬ್ರಹ್ಮಣ್ಯ ಮಠದ ಶ್ರೀ ವಿದ್ಯಾ ಪ್ರಸನ್ನ ತೀರ್ಥ ಸ್ವಾಮೀಜಿ ಪಂಡೆರ್.
ಆರ್ ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾ ಗಣಪತಿ ದೇವಸ್ಥಾನಡ್ ಜ.28ಗು ನಡಪುನ ಅಷ್ಟ ಬಂಧ ಬ್ರಹ್ಮಕಲಶ ಉಚ್ಚಯದ ನಿಲೆಟ್ಟ್ ದೇವಸ್ಥಾನಡ್ ಉಗ್ರಾಣ ಮೂರ್ತಗ್ ಚಾಲನೆ ಕೊರ್ದು ಪಾತೆರಿಯೆರ್.
ದೇವಲ್ಯದ ತಂತ್ರಿಲಾಯಿನ ವೇ.ಮೂ ರಾಧಾಕೃಷ್ಣ ಉಪಾಧ್ಯಾಯೆರ್ನ ಮುತಾಲಿಕೆಡ್ ಮಹಾಪೂಜೆ, ಸಾಮೂಹಿಕ ಪ್ರಾರ್ತನೆ ನಡತ್ಂಡ್. ಅವೆರ್ದ್ ಬೊಕ್ಕ ತೋರಣ ಪ್ರತಿಷ್ಠೆ, ಪುಣ್ಯಾಹ ಪಂಚಗವ್ಯ, ದೇವ ನಾಂದಿ, ಕಂಕಣ ಕಟ್ಟುನ, ಅರಣಿ ಮಥನ, ಭದ್ರ ದೀಪ, ಪ್ರತಿಷ್ಠೆ, ಗವ್ಯ ಯಾಗ, ಗೋಪೂಜೆ ನಡತ್ಂಡ್.
ಜೀರ್ಣೋದ್ಧಾರದ ಅಂಗವಾದ್ ಭಕ್ತಾದಿಲು ಸೇವಾ ರೂಪಡ್ ಕೊರ್ತಿನ ಬೇತೆ ಬೇತೆ ಕೊಡುಗೆಲೆನ ಲೋಕಾರ್ಪಣೆ ಕಾರ್ಯಕ್ರಮ ನಡತ್ಂಡ್.
ಈ ಪೊರ್ತುಡು ಜ್ಯೋತಿಷಿ ಯಚ್ ಶಿವರಾಯ ಪ್ರಭು ಮೇರ್ ಬರೆತಿನ ಶ್ರೀ ಕ್ಷೇತ್ರದ ಇತಿಹಾಸ ಸಂಚಿನ್ ಸ್ವಾಮಿಲು ಬುಡುಗಡೆ ಮಲ್ತೆರ್.
ಕಟೀಲು ಕ್ಷೇತ್ರದ ಅನುವಂಶಿಕ ಮೊಕ್ತೇಸರೆರ್ ವಾಸುದೇವ ಅಸ್ರಣ್ಣ, ಮುಲ್ಕಿ ಸೀಮೆ ಅರಸೆರ್ ದುಗ್ಗಣ್ಣ ಸಾವಂತರು, ಮಲ್ಲ ವಿದ್ವಾಂಸೆರ್ ವೇ.ಮೂ. ಕೃಷ್ಣ ಭಟ್ ಪಾವಂಜೆ, ಪ್ರಧಾನ ಅರ್ಚಕೆರ್ ವಾಸುದೇವ ಭಟ್, ಪವಿತ್ರ ಪಾಣಿ ಪಿ. ಗಣೇಶ್ ಭಟ್ , ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಸೂರ್ಯ ಕುಮಾರ್, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಪ್ರಕಾಶ್ ಎನ್ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ, ಚಂದ್ರಶೇಖರ ನಾನಿಲ್ , ಜೊತೆ ಕಾರ್ಯದರ್ಶಿ ರಾಮದಾಸ್ ಪಾವಂಜೆ, ಹಳೆಯಂಗಡಿ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಪೂರ್ಣಿಮಾ, ಕೆಮ್ರಾಲ್ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಲೀಲಾ ಕೃಷ್ಣಪ್ಪ, ಪಡುಪಣಂಬೂರು ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಮಂಜುಳಾ, ಅದಿತ್ಯ ಮುಕಾಲ್ದಿ ಖಂಡಿಗೆ ಬೂಡು, ಹಳೆಯಂಗಡಿ ಬಿಲ್ಲವ ಸಂಘದ ಗೌರವಾಧ್ಯಕ್ಷೆರ್ ಗಣೇಶ್ ಬಂಗೇರ, ಶಶೀಂದ್ರ ಸಾಲಿಯಾನ್, ಕಸ್ತೂರಿ ಪಂಜ, ವಿನೋದ್ ಬೊಳ್ಳೂರು, ಜೀವನ್ ಪ್ರಕಾಶ್ ಕಾಮೆರೊಟ್ಟು, ದಿನೇಶ್ ಹರಿಪಾದೆ, ಸುಕೇಶ್ ಪಾವಂಜೆ, ಪ್ರವೀಣ್ ಬೊಳ್ಳೂರು, ಕೃಷ್ಣ ಹೆಬ್ಬಾರ್, ಅಶ್ವಿನಿ ದೇವಾಡಿಗ, ಪ್ರೇಮಲತಾ ಯೋಗೀಶ್, ಅರುಣಾ ಮುಕ್ಕ, ಗೌತಮ್ ಜೈನ್ ಮುಲ್ಕಿ ಅರಮನೆ,ಎಸ್ ಕೆ ಪಿ ಎ ನ ಮೋಹನ್ ರಾವ್, ಸುಧಾಕರ ಅಮೀನ್ ಹಳೆಯಂಗಡಿ, ಜ್ಯೋತಿ ರಾಮಚಂದ್ರ, ಸುಲೋಚನಾ , ರಾಘು ದೇವಾಡಿಗ, ಸುಕುಮಾರ್ ವ್ಯವಸ್ಥಾಪನಾ, ಜೀರ್ಣೋದ್ಧಾರ ಸಮಿತಿದ ಸದಸ್ಯೆರ್ ಬೊಕ್ಕ ಚೌಕ ಗ್ರಾಮಸ್ಥೆರ್ ಇತ್ತೆರ್.
ದೊಡ್ಡಬಳ್ಳಾಪುರ: ಮರಕ್ಕ್ ಲುಂಗಿ ಕಟ್ ದ್ ಸೈಯರೆ ಪೋಯಿನ ಜವನೆ ಮುಂಡು ಪರಿದ್ ತಿರ್ತ್ ಬೂರ್ದು ತೀರ್ ಪೋಯಿನ ಘಟನೆ ದೊಡ್ಡಬಳ್ಳಾಪುರ ಪೇಂಟೆದ ಭಗತ್ಸಿಂಗ್ ಕ್ರೀಡಾಂಗಣದ ಕೈತಲ್ ನಡತ್ಂಡ್.
19 ವರ್ಷ ಪ್ರಾಯದ ಜವನೆ ಮುಂಡುನ್ ಮರಕ್ಕ್ ಕಟ್ ದ್ ಆತ್ಮಹತ್ಯೆ ಮಲ್ಪರೆ ಪ್ರಯತ್ನ ಮಲ್ತ್ದೆ. ಅಪಗ ಮುಂಡು ಪರಿದ್ ತಿರ್ತ್ ಬೂರ್ದಿನ ಬಿರ್ಸ್ಗ್ ತರೆಕ್ಕ್ ತಾಗ್ದ್ ಮಸ್ತ್ ನೆತ್ತೆರ್ ಪೋದು ತೀರ್ ಪೋತೆರ್. ದೊಡ್ಡಬಳ್ಳಾಪುರ ಪೊಲೀಸೆರ್ ಭೇಟಿ ಕೊರ್ದು ಪರಿಶೀಲನೆ ಮಲ್ತ್ದೆರ್.
ಕುಡ್ಲ: ಇಲ್ಲಡ್ ತೂ ಪೊತ್ತ್ದ್ ಲಕ್ಷಾಂತರ ರೂಪಾಯಿದ ಸೊತ್ತುಲು ಪೊತ್ತ್ದ್ ಕರಿಂಚಿದ್ ಪೋಯಿನ ಘಟನೆ ಸುರತ್ಕಲ್ ಕೈತಲ್ದ ಬಾಂಗ್ಲಾ ವಠಾರಡ್ ನಡತ್ಂಡ್.
ಉಮೇಶ ಆಚಾರ್ಯ ಮೆರೆನ ಇಲ್ಲಡ್ ತೂ ಪೊತ್ತ್ದ್ಂಡ್. ಇಲ್ಲಡ್ ಏರ್ ಇಜ್ಜಂದಿನ ಪೊರ್ತುಡು ಫ್ರಿಡ್ಚ್ಡ್ ತೂ ಪೊತ್ತ್ದ್ ಇಲ್ಲದ ಮಾತ ಕಡೆಕ್ಕ್ ಪಗರ್ದ್ಂಡ್. ಶಾಸಕೆರ್ ಭರತ್ ಶೆಟ್ಟಿ ವೈ. ಮೇಯರ್ ಜಯಾನಂದ ಅಂಚನ್ ಜಾಗೆನ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್.
ಉಬಾರ್: ಟಯರ್ ರಿಸೋಲ್ ಅಂಗಡಿಡ್ ಏರ್ ಕಂಪ್ರೆಸರ್ ಪುಡಾದ್ ಕಾರ್ಮಿಕೆ ತೀರ್ ಪೋಯಿನ ಉಬಾರ್ದ ಗಾಂಧಿಪಾರ್ಕ್ ಕೈತಲ್ ಜ.18 ಗ್ ನಡತ್ಂಡ್.
ಆಲಂಕಾರುದ ರಾಜೇಶ್ ಪೂಜಾರಿ (43) ತೀರ್ ಪೋಯಿನಾರ್. ಈ ಘಟನೆಡ್ ಅಂಗಡಿಡ್ಲ ಮಸ್ತ್ ನಷ್ಟ ಆತ್ಂಡ್. ಜಾಗೆಗ್ ಉಬಾರ್ ಠಾಣಾ ಪೊಲೀಸೆರ್ ಭೇಟಿ ಕೊರ್ದು ಪರಿಶೀಲನೆ ಮಲ್ತೊಂದುಲ್ಲೆರ್.
ಶಿಮ್ಲಾ: ರಾಹುಲ್ ಗಾಂಧಿ ಮುತಾಲಿಕೆದ ಭಾರತ್ ಜೋಡೊ ಯಾತ್ರೆ ಬುಧಾರ ಹಿಮಾಚಲ ಪ್ರದೇಶಗ್ ಬತ್ತ್ಂಡ್.
ಹಿಮಾಚಲ ಪ್ರದೇಶದ ಮುಖ್ಯಮಂತ್ರಿ ಸುಖ್ವಿಂದರ್ ಸಿಂಗ್ ಸುಖು, ಉಪಮುಖ್ಯಮಂತ್ರಿ ಮುಖೇಶ್ ಅಗ್ನಿಹೋತ್ರಿ, ರಾಜ್ಯ ಪಕ್ಷದ ಮುಖ್ಯಸ್ಥೆರ್ ಪ್ರತಿಭಾ ಸಿಂಗ್ ಸಿಂಗ್, ಸಚಿವೆರ್, ಶಾಸಕೆರ್, ಮುಖಂಡೆರ್ ಸೇರಿನಂಚನೆ ಕಾರ್ಯಕರ್ತೆರ್ ಮುಲ್ಪದ ಮನ್ಸೆರಾ ಟೋಲ್ ಪ್ಲಾಜಾದ ಕೈತಲ್ ಯಾತ್ರೆನ್ ಎದ್ಕೊನಿಯೆರ್. ಜ.30 ಗ್ ಈ ಯಾತ್ರೆ ಮುಗಿಯರೆ ಉಂಡು.
ವಾಷಿಂಗ್ಟನ್: ಫೇಸ್ಬುಕ್, ಅಮೆಜಾನ್ ಬೊಕ್ಕ ಮೈಕ್ರೋಸಾಫ್ಟ್ ಕಂಪೆನಿಲು 10 ಸಾರ ಜನಕ್ಲೆನ್ ಬೇಲೆರ್ದ್ ದೆಪ್ಪರೆ ದುಂಬಾತ್ಂಡ್.
ಸಂಪನ್ಮೂಲ ಬೊಕ್ಕ ಇಂಜಿನಿಯರಿಂಗ್ ವಿಭಾಗ ಸೇರ್ದ್ ಸಾರರ್ದ್ಲ ಎಚ್ಚ ಉದ್ಯೋಗಿಲೆನ್ ದೆತ್ತ್ ಪಾಡಿಯರೆ ಮೈಕ್ರೋಸಾಫ್ಟ್ ಯೋಚನೆ ಮಲ್ತ್ದ್ಂಡ್. ಕಮ್ಮಿ ಆದಾಯದ ಕಾರಣ ಉದ್ಯೋಗಿಲೆನ್ ದೆತ್ತೊಂದು ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.
ಕೈವ್: ಉಕ್ರೇನ್ ರಾಜಧಾನಿ ಕೈವ್ ಡ್ ಹೆಲಿಕಾಪ್ಟರ್ ಬೂರ್ದು ರಡ್ಡ್ ಜೋಕುಲು ಬೊಕ್ಕ ಉಕ್ರೇನ್ದ ಆಂತರಿಕ ಮಂತ್ರಿ ಸೇರ್ದ್ 16 ಜನ ತೀರ್ ಪೋಯೆರ್.
ತೀರ್ ಪೋಯಿನಕ್ಲೆಡ್ ಉಕ್ರೇನ್ದ ಆಂತರಿಕ ಸಚಿವೆರ್ ಡೆನಿಸ್ ಮೊನಾಸ್ಟಿರ್ಸ್ಕಿ ಸೇರಿನಂಚನೆ ಆಂತರಿಕ ಸಚಿವಾಲಯದ ಮಸ್ತ್ ಅಧಿಕಾರಿಲು ಉಲ್ಲೆರ್ ಪಂದ್ ರಾಷ್ಟ್ರೀಯ ಪೊಲೀಸ್ ಮುಖ್ಯಸ್ಥೆರ್ ಇಗೊರ್ ಕ್ಲೈಮೆಂಕೊ ತೆರಿಪಾದೆರ್.
ಎರ್ನಾಕುಲಂ: ಹೋಟೆಲ್ ಒಂಜೆಟ್ಟ್ ತೆನಸ್ ತಿಂದ್ದ್ 68 ಜನ ಹುಷಾರ್ದಾಂತೆ ಆಯಿನ ಘಟನೆ ಕೇರಳದ ಎರ್ನಾಕುಲಂ ಜಿಲ್ಲೆದ ಉತ್ತರ ಪರವೂರ್ದ ಮಜ್ಲಿಸ್ ಹೋಟೆಲ್ಡ್ ನಡತ್ಂಡ್.
ಹುಷಾರ್ ತತ್ತಿನಕ್ಲೆನ್ ಆಸ್ಪತ್ರೆಗ್ ಸೇರ್ಸಾದೆರ್. ತಿಂತಿನ ತೆನಸ್ ಡ್ ವಿಷತ್ತ ಅಂಶ ತೋಜಿದ್ ಬೈದ್ಂಡ್. ಆಹಾರನ್ ಸೇಲ್ ಮಲ್ತಿನ ರೆಸ್ಟೋರೆಂಟ್ದ ಲೈಸನ್ಸ್ನ್ ಕ್ಯಾನ್ಸಲ್ ಮಲ್ತ್ದ ಪಂದ್ ರಾಜ್ಯ ಆರೋಗ್ಯ ಸಚಿವೆರ್ ವೀಣಾ ಜಾರ್ಜ್ ತೆರಿಪಾದೆರ್.
