ರಪಕ್ಕ ಸುದ್ದಿ Flash News

ಮುಲ್ಕಿದ ಜುವೆಲ್ಲರಿರ್ದ್ ಧಣಿನ ಎದುರುಡೇ 30 ಗ್ರಾಂ ಬಂಗಾರ್ ದೀತಿನ ಡಬ್ಬೆ ಕಂಡ್ ದ್ ಕೊನೊಯಿನ ಕಲ್ವೆರ್!

ಮುಲ್ಕಿ : ಬಯ್ಯದ ಪೊರ್ತುಡು ಬೊಲ್ಲಿ ಬಂಗಾರ್ದ ಅಂಗಡಿಗ್ ಗಿರಾಕಿಲ್ನಲೆಕ ಬತ್ತಿನ ರಡ್ಡ್ ಜನ ಆಂಜೊವುಲು ಧಣಿನ ಎದುರುಡೇ ಬಂಗಾರ್ ದೀತಿನ ಡಬ್ಬೆನ್ ಕಂಡ್ ದ್ ಕೊನೊಯಿನ ಘಟನೆ ಮುಲ್ಕಿ ಬಸ್ ಸ್ಟ್ಯಾಂಡ್ ದ ಕೈತಲ್ ಸನಿಯಾರ ನಡತ್ಂಡ್.

ಪುತ್ರನ್ ಮೂಲಸ್ಥಾನದ ಎದುರುದ ಸ್ವಸ್ತಿಕ್ ಜುವೆಲ್ಲರಿ ಶಾಪ್ ಡ್ ಈ ಘಟನೆ ನಡದ್ಂಡ್.

ಅಂದಾಜಿ 1ಲಕ್ಷ 60 ಸಾರ ರೂಪಾಯಿದ 30 ಗ್ರಾಂ ಬಂಗಾರ್ ನ್ ಕಲ್ವೆರ್ ಕೊನೊತೆರ್ ಪಂದ್ ಅಂಗಡಿದ ಧನಿ ಪ್ರಕಾಶ್ ಆಚಾರ್ಯ ಮುಲ್ಕಿ ಸ್ಟೇಶನ್ ಗ್ ದೂರು ಕೊರ್ತೆರ್.

ಶನಿಯಾರ ಬಯ್ಯದ ಪೊರ್ತುಡು ಬೊಳ್ಳಿ ದ ತಾಯಿತ ಬೋಡು ಪಂದ್ ಮಲೆಯಾಳಿ ಪಾತೆರೊಂದು ಅಂಗಡಿಗ್ ಬತ್ತಿನ ಅಂದಾಜಿ 40-45 ವರ್ಷ ಪ್ರಾಯದ ರಡ್ಡ್ ಜನ ಆರೋಪಿಲು , 170 ರೂ. ಬೊಲ್ಲಿದ ತಾಯಿತ ದೆತೊಂದು ಅಯಿಕ್ ಒಂಜಿ ಚೂರು ಬಂಗಾರ್ದ ಕುಸುರು ತಿಕ್ಕಾದ್ ಕೊರ್ಲೆ ಪಂದ್ ಪಂಡೆರ್. ಅಪಗ ಪ್ರಕಾಶ್ ಮೇರ್ ತಿರ್ತ್ ದ ಡ್ರಾಯರ್ ಡ್ ಬಂಗಾರ್ ದೀತಿನ ಡಬ್ಬೆ ದೆತ್ತ್ ದ್ ಅಯಿರ್ದ್ ಒಂಜಿ ಚೂರು ಬಂಗಾರ್ ನ್ ತಾಯಿತನ್ ತಿಕ್ಕಾದ್ ಡಬ್ಬೆನ್ ಪಿರ ದೀತೆರ್ . ಅಪಗ ಒರಿ ಆರೋಪಿ ಅವೆನ್ ಪ್ಲಾಸ್ಟಿಕ್ ಡ್ ಕಟ್ ದ್ ಕೊರ್ಲೆ ಪಂದ್ ಧಣಿನ ಗಮನೊನು ಬೇತೆ ಕಡೆಕ್ಕ್ ತಿರ್ಗಾದ್ ಇಂಚಿಡ್ ಕುಡೊರಿ ಬಂಗಾರ್ ದೀತಿನ ಡಬ್ಬೆನ್ ದೆತ್ತ್ ದ್ ತಾಯಿತ ಪತೊಂದು ಪೋಪಿನ ದೃಶ್ಯ ಅಂಗಡಿಡ್ ಇತ್ತಿನ ಸಿಸಿಟಿವಿಡ್ ತೋಜಿದ್ ಬೈದ್ಂಡ್. ಮುಲ್ಕಿ ಪೊಲೀಸೆರ್ ಜಾಗೆಗ್ ಬತ್ತ್ ದ್ ಪರಿಶೀಲನೆ ಮಲ್ದೆರ್.

ಪಡುಪಣಂಬೂರು: ತಹಶೀಲ್ದಾರ್ ಗ್ರಾಮ ವಾಸ್ತವ್ಯಡ್ 7 ಅರ್ಜಿ ಇತ್ಯರ್ಥ

ಹಳೆಯಂಗಡಿ: ಗ್ರಾಮೀಣ ಪ್ರದೇಶದ ಜನಕ್ಲೆಗ್ ಅನುಕೂಲ ಆವಡ್ ಪಂದ್ ರಾಜ್ಯ ಸರ್ಕಾರ ಕಂದಾಯ ಇಲಾಖೆ ಅಧಿಕಾರಿಲೆನ ಒಟ್ಟುಗು “ಜಿಲ್ಲಾಧಿಕಾರಿಗಳ ನಡೆ ಹಳ್ಳಿ ಕಡೆ” ಅಭಿಯಾನದ ಗ್ರಾಮ ವಾಸ್ತವ್ಯದ ಪ್ರಯೋಜನನ್ ಸಾರ್ವಜನಿಕೆರ್ ಪಡೆವೊಡು ಪಂದ್ ಮೂಲ್ಕಿ ತಾಲೂಕು ತಹಶೀಲ್ದಾರ್ ಅನಂತ ಶಂಕರ್ ಪಂಡೆರ್.

ಆರ್ ಪಡುಪಣಂಬೂರು ಗ್ರಾಮ ಪಂಚಾಯತ್‌ ಕಚೇರಿಡ್ ಸನಿಯಾರ ನಡತಿನ “ತಹಶೀಲ್ದಾರೆರ್ನ ಗ್ರಾಮ ವಾಸ್ತವ್ಯ” ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.

ಪಡುಪಣಂಬೂರು ಗ್ರಾಮ ಪಂಚಾಯತ್‌ ಅಧ್ಯಕ್ಷೆರ್ ಮಂಜುಳಾ ಸಭೆತ್ತ ಗುರ್ಕಾರ್ಮೆ ಒಯಿಸ್ ದಿತ್ತೆರ್. ಗ್ರಾಮ ವಾಸ್ತವ್ಯಡ್ ಒಟ್ಟು 8 ಅರ್ಜಿನ್ ಸ್ವೀಕಾರ ಮಲ್ತ್ ದ್ ಅವುಲೇ 7 ಅರ್ಜಿದ ಸಮಸ್ಯೆನ್ ಇತ್ಯರ್ಥ ಮಲ್ತೆರ್.

ನೆಟ್ಟ್ ಪಡುಪಣಂಬೂರು ಅರಮನೆ ಎದುರುದ ಮಾರ್ಗದ ಸಮಸ್ಯೆದ ಬಗೆಟ್ಟ್ ಮೂಡಾದ ಗಮನೊಗು ಕನವರೆ ನಿರ್ಧಾರ ಮಲ್ತೆರ್. ನಾಲ್ ಜನತ್ತ ಹಕ್ಕ್ ಪತ್ರದ ಸಮಸ್ಯೆ, ಒಂಜಿ ಆರ್‌ಟಿಸಿ ತಿದ್ದುಪಡಿ ಬೊಕ್ಕ ತೋಕೂರು ಮದ್ದೇರಿ ಸಾನದ ಮೀಸಲು ಜಾಗೆ, ರಸ್ತೆ ಸಮಸ್ಯೆದ ಬಗ್ಗೆಟ್ಟ್ ಸಾರ್ವಜನಿಕೆರ್ ಅಧಿಕಾರಿಲೆನ ಗಮನೊಗು ಕನತೆರ್. ಚರ್ಚೆಡ್ ಮೂಲ್ಕಿ ಅರಮನೆತ್ತ ಗೌತಮ್ ಜೈನ್,ಪಿ.ಸಿ.ಕೋಟ್ಯಾನ್ ಬೊಕ್ಕ ಕೈತಲ್ದಕುಲು ಪಾಲ್ ಪಡೆದಿತ್ತೆರ್.

ಪಡುಪಣಂಬೂರು ಗ್ರಾಮ ಪಂಚಾಯತ್‌ ಸದಸ್ಯೆರಾಯಿನ ಮೋಹನ್‌ದಾಸ್, ಉಮೇಶ್ ಪೂಜಾರಿ, ಹರಿಪ್ರಸಾದ್, ವಿನೋದ್ ಸಾಲ್ಯಾನ್, ನಮಿತಾ, ವಿಜಯಲಕ್ಷ್ಮೀ, ಪವಿತ್ರಾ, ಜ್ಯೋತಿ ಕುಲಾಲ್, ದಿನೇಶ್ ಶೆಟ್ಟಿ, ಹೇಮಂತ್ ಅಮೀನ್, ಉಪತಹಶೀಲ್ದಾರ್ ದಿಲೀಪ್ ರೋಡ್ಕರ್, ಪೂರ್ಣಿಮಾ, ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ರಮೇಶ್ ನಾಯ್ಕ್, ತಾಲೂಕು ಸರ್ವೇಯರ್ ಮಧುಕರ್, ಕೆಮ್ರಾಲ್ ಪ್ರಾಥಮಿಕ ಆರೋಗ್ಯ ಕೇಂದ್ರದ ಡಾ.ಅನ್ಸಿಲಾ ಪತ್ರಾವೋ, ಅಂಗನವಾಡಿ ಮೇಲ್ವಿಚಾರಕಿ ನಾಗರತ್ನ, ಗ್ರಾಮಸಹಾಯಕೆರ್ ಪುರುಷೋತ್ತಮ್ ಮೊಕುಲು ಮಾತ ಇತ್ತೆರ್.

ಮೂಲ್ಕಿ ತಾಲೂಕು ಕಂದಾಯ ನಿರೀಕ್ಷಕೆರ್ ದಿನೇಶ್ ಸ್ವಾಗತ ಮಲ್ತೆರ್. ಗ್ರಾಮ ಕರಣಿಕೆರ್ ಮೋಹನ್ ಸೊಲ್ಮೆ ಸಂದಾಯೆರ್.