ರಪಕ್ಕ ಸುದ್ದಿ Flash News

ಕುಡ್ಲ: ಸೆಂಟ್ರಲ್ ಮಾರ್ಕೆಟ್‌ ಕಾರ್ಮಿಕೆರ್‍ನ ಶೆಡ್ ಮಗ್ ರ್ದ್ ಬೂರ್ದು 10 ಜನಕ್ಕ್ ಪೆಟ್ಟ್

ಕುಡ್ಲ: ಬೇಲೆದಕ್ಲೆನ ಶೆಡ್ ಬೂರ್ದು 10 ಜನ ಕೂಲಿ ಕಾರ್ಮಿಕೆರೆಗ್ ಪೆಟ್ಟಾತಿನ ಘಟನೆ ಹಂಪನಕಟ್ಟೆದ ಸೆಂಟ್ರಲ್ ಮಾರ್ಕೆಟ್ ಕಟ್ವಾನೊದ ನಿರ್ಮಾಣದ ಜಾಗೆಡ್ ನಡತ್ಂಡ್.

ಕೋಡೆ ನಡುರಾತ್ರೆ ಈ ಘಟನೆ ನಡತ್ತ್‌ದಿತ್ತ್‌ದ್, ಈ ಪೊರ್ತುಡು ಕೂಲಿ ಕಾರ್ಮಿಕೆರ್ ಶೆಡ್‌ಡ್ ಜೆತ್ತಿತ್ತೆರ್. ಶೆಡ್‌ದ ತಿರ್ತ್‌ದ ಭಾಗ ಬೂರಿನ ಕಾರಣ ಮಸ್ತ್ ಜನಕ್ಕ್ ಪೆಟ್ಟಾತ್ಂಡ್. ಅಕ್ಲೆನ್ ಅಪಗನೇ ಆಸ್ಪತ್ರೆಗ್ ದಾಖಲ್ ಮಲ್ತ್‌ದೆರ್. ಘಟನೆ ಆಯಿನ ಜಾಗೆಗ್ ಪೊಲೀಸ್ ಅಧಿಕಾರಿಲು, ಪಾಲಿಕೆದ ಅಧಿಕಾರಿಲು ಭೇಟಿ ಕೊರ್ದು ಪರಿಶೀಲನೆ ಮಲ್ತ್‌ದೆರ್.

On April 9, Tulu movie Soda Sharbath released on Localwood OTT app ಎಪ್ರಿಲ್ 9 ಗ್ ತುಳು ಪಿಚ್ಚರ್ ಸೋಡಾ ಶರ್ಬತ್ Localwood OTT App ಡ್ ಬುಡುಗಡೆ

ಕುಡ್ಲ : ತುಳನಾಡ್‌ಡ್ ಪುಗರ್ತೆ ಪಡೆಯಿನ ದೇವದಾಸ್ ಕಾಪಿಕಾಡ್, ಅರವಿಂದ ಬೋಳಾರ್ ಅಂಚನೆ ಬೋಜರಾಜ್ ವಾಮಂಜೂರು ಒಟ್ಟು ಸೇರ್ದ್ ಅಭಿನಯ ಮಲ್ತಿನ ತುಳು ಪಿಚ್ಚರ್ ಸೋಡಾ ಶರ್ಬತ್ ಎಪ್ರಿಲ್ 9 ಗ Localwood OTT App ಡ್ ಬುಡುಗಡೆ ಆಯರೆ ಉಂಡು.

ಈ ಪಿಚ್ಚರ್ ಮಸ್ತ್ ಕಾಮಿಡಿ ಆದಿತ್ತ್‌ದ್, ತುಳುನಾಡ್‌ದ ಪುಗರ್ತೆದ ಕಲಾವಿದೆರ್ ನಟನೆ ಮಲ್ತ್‌ದೆರ್. ಒಟಿಟಿಡ್ ಈ ಪಿಚ್ಚರ್‌ಗ್ 199 ರೂ. ಅಂಚನೆ ವಿದೇಶಡ್ 5 ಡಾಲರ್ ಉಂಡು.

CM visit mangalore on march 16th ಮಾ.16 ಕ್ಕ್ ಕುಡ್ಲಗ್ ಸಿಎಂ ಬೊಮ್ಮಾಯಿ

ಕುಡ್ಲ: ಕೇಂದ್ರ ಬೊಕ್ಕ ರಾಜ್ಯ ಸರ್ಕಾರದ ಯೋಜನೆದ ಫಲಾನುಭವಿಲೆನ ಸಮ್ಮೇಳನ ಮಾ.16 ಗುರುವಾರ ಕಾಂಡೆ 10 ಗಂಟೆಗ್ ಕರಾವಳಿ ಉತ್ಸವ ಮೈದಾನಡ್ ನಡಪರೆ ಉಂಡು. ಈ ಲೇಸ್‌ನ್ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ಉದಿಪನ ಮಲ್ಪರೆ ಉಲ್ಲೆರ್.

ಇಂಧನ, ಕನ್ನಡ ಬೊಕ್ಕ ಸಂಸ್ಕೃತಿ ಅಂಚನೆ ಜಿಲ್ಲಾ ಉಸ್ತುವಾರಿ ಸಚಿವೆರ್ ವಿ.ಸುನೀಲ್ ಕುಮಾರ್, ಮೀನುಗಾರಿಕೆ, ಬಂದರು ಬೊಕ್ಕ ಒಳನಾಡು ಜಲಸಾರಿಗೆ ಸಚಿವೆರ್ ಎಸ್. ಅಂಗಾರ ಸೇರಿನಂಚನೆ ಮಸ್ತ್ ಜನ ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್.

ಪಾವಂಜೆ ಶ್ರೀ ಮಹಾಲಿಂಗೇಶ್ವರ ದೇವೆರೆಗ್ ದೃಢಕಲಶ ಅಭಿಷೇಕ

ಹಳೆಯಂಗಡಿ : ಇಂಚೊಗು ಜೀರ್ಣೋದ್ಧಾರ ಆದ್ ಬ್ರಹ್ಮಕಲಶ ಉಚ್ಚಯ ನಡತಿನ “ತುಳುನಾಡ ಕೈಲಾಸ” ಪುಗರ್ತೆದ ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಸ್ಥಾನಡ್ ದೃಢಕಲಶ ಅಭಿಷೇಕ ಮಾ.12 ಐತಾರ ಬೊಲ್ಪುಗು ನಡತ್ಂಡ್.

ಕ್ಷೇತ್ರದ ತಂತ್ರಿಲಾಯಿನ ರಾಧಾಕೃಷ್ಣ ಉಪಾಧ್ಯಾಯೆರ್ ಬೊಕ್ಕ ಅರ್ಚಕೆರ್ ವಾಸುದೇವ ಭಟ್ ಮೆರೆನ ಮುತಾಲಿಕೆಡ್ ರಕ್ತೇಶ್ವರಿ ಸನ್ನಿಧಿಡ್ ಹೋಮ, ಮಹಾಲಿಂಗೇಶ್ವರ ಸನ್ನಿಧಿ ಡ್ 101 ಕಲಶ ಪ್ರಧಾನ ಹೋಮ, ಪ್ರಾಯಶ್ಚಿತ್ತ ಹೋಮ, ಗಣಯಾಗ, ನಾಗದೇವೆರೆಗ್ ಕಲಶಾಭಿಷೇಕ ಮಹಾಪೂಜೆ ನಡತ್ಂಡ್. ಬೊಕ್ಕ ಅನ್ನ ಸಂತರ್ಪಣೆ ನಡತ್ಂಡ್.

ವಿದ್ವಾಂಸೆರಾಯಿನ ಕೃಷ್ಣ ಭಟ್ ಪಾವಂಜೆ, ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಸೂರ್ಯಕುಮಾರ್, ಬ್ರಹ್ಮಕಲಶ ಸಮಿತಿದ ಅಧ್ಯಕ್ಷೆರ್ ಪ್ರಕಾಶ್ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಚಂದ್ರಶೇಖರ್ ನಾನಿಲ್, ಸದಸ್ಯೆರಾಯಿನ ಗೋಪಾಲಕೃಷ್ಣ ರಾವ್, ರಘು ದೇವಾಡಿಗ, ಜ್ಯೋತಿ ರಾಮಚಂದ್ರ, ಸುಲೋಚನ ಮಹಾಬಲ, ರಾಮದಾಸ್ ಪಾವಂಜೆ, ಮೋಹನ್ ರಾವ್, ವೆಂಕಟೇಶ ಭಟ್ ಮೊಕುಲು ಮಾತ ಇತ್ತೆರ್.

ಬೀದಿ ನಾಯಿಲು ತುಚ್ಚಿದ್ 7 ಬೊಕ್ಕ 5 ವರ್ಷದ ಮೆಗ್ಯ ಪಲಯೆ ತೀರ್ ಪೋಯೆರ್!

ದಿಲ್ಲಿ: ದಿಲ್ಲಿದ ನೈಋತ್ಯ ಪ್ರದೇಶಡ್ ತಾದಿಡ್ ಇತ್ತಿನ ಬೀದಿ ನಾಯಿಲು ದಾಳಿ ಮಲ್ತ್‌ದ್ 7 ಬೊಕ್ಕ 5 ವರ್ಷ ಪ್ರಾಯದ ಮೆಗ್ಯ ಪಲಯನಕುಲು ತೀರ್ ಪೋಯಿನ ಘಟನೆ ನಡತ್ಂಡ್.

ಅನಂದ್ ಬೊಕ್ಕ ಆದಿತ್ಯ ತೀರ್ ಪೋಯಿನಕುಲು ಪಂದ್ ಗುರ್ತಿಸಾದೆರ್. ಈ ರಡ್ಡ್ ಜೋಕುಲು ದಿಲ್ಲಿದ ವಸಂತ್ ಕುಂಜ್ ನಿವಾಸಿಲು ಆದಿತ್ತ್‌ದ್, ವಸಂತ್ ಕುಂಜ್ ಪೊಲೀಸೆರೆಗ್ ಮಾರ್ಚ್ 10 ಕ್ಕ್ ಮಧ್ಯಾಹ್ನ 3 ಗಂಟೆಗ್ ಜೋಕುಲು ಕಾಣೆ ಆತಿನೆನ್ ದೂರು ಕೊರ್ದಿತ್ತೆರ್. ಮಸ್ತ್ ನಾಡಿನೆಡ್ದ್ ಬೊಕ್ಕ ಒಂಜಿ ಗೋಡೆದ ಬರಿಟ್ಟ್ ರಡ್ಡ್ ಜೋಕುಲೆನ ಪುನ ತೋಜಿದ್ ಬೈದ್ಂಡ್.