ರಪಕ್ಕ ಸುದ್ದಿ Flash News

ತುಳುಕೂಟದ ಕೋಟಾದಡಿ ಮೆಡಿಕಲ್ ಸೀಟ್ ಪಡೆಯಿನ ನಿಕ್ಷೇಪ್ ಸುವರ್ಣ

Sep 23, 2026

ಸುವರ್ಣ ಐಕಳ ಸಂಸ್ಥೆ ಮಾಲಕೆರ್ ಆಯಿನ ಸುರೇಶ. ಕೆ. ಸುವರ್ಣ ಬೊಕ್ಕ ದಯಾವತಿ ಸುವರ್ಣ ಮೊಕುಲೆನ ಮಗೆ ನಿಕ್ಷೇಪ್ ಸುವರ್ಣ ಮೇರ್ ಆಳ್ವಾಸ್ ಇನ್ಸ್ಟಿಟ್ಯೂಟ್ ಆಫ್ ಮೆಡಿಕಲ್ ಸೈನ್ಸ್ ಬೊಕ್ಕ ರೀಸರ್ಚ್ ಸೆಂಟರ್ ಬೆದ್ರ ಮುಲ್ಪ ತುಳುಕೂಟದ ಕೋಟಾದಡಿ ಆಯ್ಕೆ ಯಾದ್ ಮೆಡಿಕಲ್ ಸೀಟ್ ಪಡೆತೆರ್

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಸೆ.25-27: ಸುರತ್ಕಲ್‌ ಬಂಟರ ಭವನಡ್ ಕೃಷಿ ಮೇಳ, ಆಹಾರ ಮೇಳ, ಹೋಳಿಗೆ ಪರ್ಬ ಬೊಕ್ಕ ಸಸ್ಯೋತ್ಸವ

Sep 22, 2026

ಕುಡ್ಲ : ಕೃಷಿ ಕ್ಷೇತ್ರದ ಬುಲೆಚ್ಚಿಲ್‌ಗ್ ಪೂರಕ ಆಪಿಲೆಕ ಕೃಷಿಕೆರೆಗ್ ಅಗತ್ಯ ಸಲಕರಣೆಲು, ತಂತ್ರಜ್ಞಾನ ಬೊಕ್ಕ ಕೃಷಿ ಸಂಬಂಧಿತ ಮಾಹಿತಿನ್ ಒಂಜೇ ಜಾಗೆಡ್ ಕೊರ್ಪಾವುನ ಉದ್ದೇಶಡ್ ಸುರತ್ಕಲ್‌‌ಡ್ ಉಂದುವೇ ಸುರುತ್ತ ಸರ್ತಿ ಕೃಷಿ ಮೇಳ ಬೊಕ್ಕ ಆಹಾರ ಮೇಳ ಅಟ್ಟಣೆ ಮಲ್ದ ಪಂದ್ ರೈತ ಕುಡ್ಲ ಪ್ರತಿಷ್ಠಾನದ ಅಧ್ಯಕ್ಷೆರ್ ಭರತ್ ರಾಜ್ ಸೊರಕೆ ಪತ್ರಿಕಾಗೋಷ್ಠಿಡ್ ತೆರಿಪಾಯೆರ್.
ರೈತ ಕುಡ್ಲ ಪ್ರತಿಷ್ಠಾನ ನೇತೃತ್ವಡ್ ಲಯನ್ಸ್ ಕ್ಲಬ್ ಸುರತ್ಕಲ್ ಬೊಕ್ಕ ಬಂಟರ ಸಂಘ (ರಿ.) ಸುರತ್ಕಲ್ ಒಟ್ಟುಸೇರಿಗೆಡ್ ಸೆಪ್ಟೆಂಬರ್ 25, 26 ಬೊಕ್ಕ 27ಕ್ಕ್ ಸುರತ್ಕಲ್‌‌ದ ಬಂಟರ ಭವನಡ್ ಈ ಮೇಳ ನಡಪರೆ ಉಂಡು. ಕಾಂಡೆ 9 ಗಂಟೆರ್ದ್ ರಾತ್ರಿ 9 ಮುಟ್ಟ ಸಾರ್ವಜನಿಕೆರೆಗ್ ಮೇಳಗ್ ಭೇಟಿ ಕೊರೊಲಿ.
ಕೃಷಿ ಕ್ಷೇತ್ರಡ್ ಆಧುನಿಕ ತಂತ್ರಜ್ಞಾನ ಬೊಕ್ಕ ಪೊಸ ಪೊಸ ಉಪಕರಣದ ಬಳಕೆ ದಿನರ್ದ್ ದಿನೊಕ್ಕು ಎಚ್ಚಾವೊಂದುಂಡು. ಕೃಷಿತ್ತ ಬೇಕೆನ್ ಸುಲಭ ಮಲ್ಪುನ ಬೇತೆ ಬೇತೆ ಸಲಕರಣೆದ ಪರಿಚಯ, ಬೊಕ್ಕ ಲಭ್ಯತೆ ಬಗೆಟ್ಟ್ ಕೃಷಿಕೆರೆಗ್ ಮಾಹಿತಿ ಕೊರ್ಪಿನ ಮೇಳದ ಪ್ರಮುಖ ಉದ್ದೇಶವಾದುಂಡು. ಕೃಷಿ ಸಲಕರಣೆದ ಮಾಹಿತಿ ಬೊಕ್ಕ ಮಾರಾಟ ಮೂಲು ನಡಪುಂಡು ಪಂದ್ ಪಂಡೆರ್
ಆಹಾರ ಮೇಳದ ವಿಶೇಷತೆ
ಕೃಷಿ ಮೇಳದ ಒಟ್ಟುಗು ಆಹಾರ ಮೇಳಲ ನಡಪರೆ ಉಂಡು, ಬೇತೆ ಬೇತೆ ಆಹಾರ ಉತ್ಪನ್ನಗಳ ಪರಿಚಯ ಬೊಕ್ಕ ಮಾರಾಟಗ್ ಅವಕಾಶ ಉಂಡು. ಕೃಷಿ ಬೊಕ್ಕ ಆಹಾರ ಸಂಸ್ಕೃತಿ ನಡುತ್ತ ಸಂಬಂಧನ್ ಜನಕ್ಲೆಗ್ ಪರಿಚಯ ಮಲ್ಪುನ ನಿಲೆಟ್ಟ್ ಆಹಾರ ಮೇಳ ಪ್ರಮುಖ ಆಕರ್ಷಣೆ. ಕೃಷಿಕರು, ತೋಟಗಾರಿಕೆ ಆಸಕ್ತೆರ್, ಪೊಂಜೊವುಲು, ಯುವ ಜನಕುಲು ಬೊಕ್ಕ ಸಾರ್ವಜನಿಕೆರ್ ಹೆಚ್ಚಿನ ಸಂಖ್ಯೆಡ್ ಪಾಲ್ ಪಡೆದ್ ಪ್ರಯೋಜನ ಪಡೆಯೊಡು ಪಂದ್ ಸಂಘಟಕೆರ್ ಬಿನ್ನಾಪು ಮಲ್ದೆರ್.
ಪತ್ರಿಕಾಗೋಷ್ಠಿಡ್ ಸುರತ್ಕಲ್ ಸಂಘದ ಅಧ್ಯಕ್ಷೆರ್ ಜಗನ್ನಾಥ ಶೆಟ್ಟಿ ಬಾಳ, ಪ್ರಧಾನ ಕಾರ್ಯದರ್ಶಿ ಲೀಲಾಧರ ಶೆಟ್ಟಿ ಕಟ್ಲ, ರೈತ ಕುಡ್ಲ ಪ್ರತಿಷ್ಠಾನದ ಕಾರ್ಯದರ್ಶಿ ಲತೀಶ್ ಮಳಲಿ ಇತ್ತೆರ್.

ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಮುಲ್ಕಿ ರಪಕ್ಕ ಸುದ್ದಿ Flash News

ಶಿಮಂತೂರು ಹಾಲು ಉತ್ಪಾದಕರ ಮಹಿಳಾ ಸಹಕಾರಿ ಸಂಘದ 2025-26ನೇ ವರ್ಸದ ಸಭೆ

Sep 21, 2026

ಮುಲ್ಕಿ: ಶಿಮಂತೂರು ಹಾಲು ಉತ್ಪಾದಕರ ಮಹಿಳಾ ಸಹಕಾರಿ ಸಂಘದ 2025-26ನೇ ವರ್ಸದ ಸಭೆ ಸೋಮವಾರ ಸಂಘದ ಅಂಗಣಡ್ ನಡತ್ಂಡ್.
ಕಾರ್ಯಕ್ರಮದ ಗುರ್ಕಾರ್ಮೆನ್ ಸಂಘದ ಗುರ್ಕಾರ್ಲು ಪ್ರಫುಲ್ಲಾ ಸಿ ಶೆಟ್ಟಿ ವಹಿಸೊಂದಿತ್ತೆರ್.
ಮಲ್ಲ ಬಿನ್ನೆರಾದ್ ದಕ್ಷಿಣ ಕನ್ನಡ ಜಿಲ್ಲಾ ಹಾಲು ಒಕ್ಕೂಟದ ಸಹಾಯಕ ವ್ಯವಸ್ಥಾಪಕೆರ್ ಸರೋಜಿನಿ ಪಾತೆರ್ದ್ ಸಂಘದ ಅಭಿವೃದ್ಧಿಗ್ ನಿರ್ದೇಶಕೆರ್ ಬೊಕ್ಕ ಸದಸ್ಯೆರೆನ ಸಹಭಾಗಿತ್ವ ಮುಖ್ಯ. ಪೇರ್ ದ ಗುಣಮಟ್ಟ ಕಾಪುನ ಒಟ್ಟುಗು ಸ್ವಚ್ಛತೆ ಶಿಸ್ತು ಬದ್ಧ ಹೈನುಗಾರಿಕೆಡ್ ಮಸ್ತ್ ಲಾಭ ಉಂಡು ಪಂದ್ ಪಂಡೆರ್.
ಮಿತ್ತ ಚಾವಡಿಡ್ ಸಂಘದ ಉಪಾಧ್ಯಕ್ಷೆರ್ ವನಿತಾ ವಿ ಶೆಟ್ಟಿ,ನಿರ್ದೇಶಕೆರ್ ಪದ್ಮಿನಿ ವಿಜಯಕುಮಾರ್ ಶೆಟ್ಟಿ, ಶೋಭಾ ವಿ. ಶೆಟ್ಟಿ, ಲೀಲಾ ಎಸ್ ಶೆಟ್ಟಿ, ಬೇಬಿ ಕೆ, ಶೋಭಾ ಎ ಶೆಟ್ಟಿ, ಗುಲಾಬಿ ಕೆ ಪೂಜಾರಿ, ಶಾಂತಾ ವಿ ಶೆಟ್ಟಿ, ಜಯಶ್ರೀ ಡಿ ಶೆಟ್ಟಿ, ಕಾರ್ಯದರ್ಶಿ ಮಮತಾ ಅನಿಲ್ ಶೆಟ್ಟಿ, ಪೇರ್ ಪರೀಕ್ಷಕಿ ಅಶ್ವಿನಿ ಪಾಂಡುರಂಗ ಬೊಕ್ಕ ವಿನಯ್, ಸಹಾಯಕಿ ಆಶಾಸುಂದರ ಬೊಕ್ಕ ಕೆಲವೆರ್ ಉಪಸ್ಥಿತರಿತ್ತೆರ್.
ಮಮತಾ ಶೆಟ್ಟಿ ಎದ್ಕೊಂದು ನಿರೂಪಣೆ ಮಲ್ತೆರ್. ಅಶ್ವಿನಿ ಸೊಲ್ಮೆ ಸಂದಾಯ ಮಲ್ತೆರ್.
ಕಾರ್ಯಕ್ರಮಡ್ ಕರಿನ ವರ್ಸಡ್ ಸಂಘದ ಸದಸ್ಯೆರೆಗ್ ಶೇ.20 ಡಿವಿಡೆಂಟ್ ಪಟ್ಟಿಯೆರ್ ಅಂಚೆನೆ ಸಂಘಗ್ ಮಸ್ತ್ ಪೇರ್ ಪಾಡಿನ ವಿಜಯ ಆರ್ ಶೆಟ್ಟಿ(ಸುರುತ ), ಜಯಶ್ರೀ ದಿವಾಕರ ಶೆಟ್ಟಿ ಶೆಟ್ಟಿ(ರ), ಹರಿಣಾಕ್ಷಿ ಸುಂದರ ಪೂಜಾರಿ(ಮೂ ) ಅಂಚೆನೆ ಎಡ್ಡೆ ಪೇರ್ ಪಾಡಿನ ನಳಿನಿ ಶಂಕರ ಶೆಟ್ರೆಗ್ ಇನಾಮು ಕೊರ್ದು ಮಾನಾದಿಗೆ ಮಲ್ತೆರ್ ಬೊಕ್ಕ ಪ್ರತಿಭಾವಂತ ಜೋಕುಲೆಗ್ ವಿದ್ಯಾರ್ಥಿ ವೇತನ ಕೊರ್ದು ಗೌರವ ಮಲ್ತೆರ್.

ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಕಮ್ಮಿಡ್ಲ 10 ತುಳು ಪಿಚ್ಚರ್‌ಲೆಗ್ ಸಬ್ಸಿಡಿ ಕೊರ್ಲೆ

Sep 21, 2026

ಮುಖ್ಯಮಂತ್ರಿಲೆಗ್ ತುಳು ಚಲನಚಿತ್ರ ನಿರ್ಮಾಪಕರ ಸಂಘದ ಓಲೆ

ಕುಡ್ಲ : ತುಳು ಭಾಷೆದ ಬೆಳವಣಿಗೆಡ್ ತುಳು ನಾಟಕ ತುಳು ಸಿನಿಮಾದ ಕೊಡುಗೆ ಮಸ್ತ್ ಉಂಡು. ತುಳು ಸಿನಿಮಾ ರಂಗಗ್ ಸುಮಾರ್ 55 ವರ್ಷದ ಇತಿಹಾಸ ಉಂಡು. ಇದಮುಟ್ಟ ತುಳುಟ್ಟು 150 ರ್ದುಲ ಎಚ್ಚ ಸಿನಿಮಾ ರಿಲೀಸ್ ಆತ್ಂಡ್. ಆತೆ ಅತ್ತಾಂದೆ ರಾಜ್ಯ, ರಾಷ್ಟ್ರೀಯ ಮಟ್ಟದ ಪ್ರಶಸ್ತಿಲು ಕೆಲವು ಸಿನಿಮಾಗ್ ತಿಕ್‌ದ್ಂಡ್. ಪ್ರತೀ ವರ್ಷ 15ರ್ದ್‌ಲ ಹೆಚ್ಚ ಸಿನಿಮಾ ತುಳುಟ್ಟು ಬರ್ಪುಂಡು. ಈ ನಿಲೆಟ್ಟ್ ಪ್ರಾದೇಶಿಕ ಭಾಷೆಡ್ ತಯಾರಾಪಿನ ಕನಿಷ್ಠ 10 ಪಿಚ್ಚರ್‌ಗ್ ಸಬ್ಸಿಡಿ ಕೊರೊಡು ಪಂದ್ ತುಳು ಚಲನಚಿತ್ರ ನಿರ್ಮಾಪಕೆರ್‌ನ ಸಂಘದ ಅಧ್ಯಕ್ಷೆರ್ ಆರ್ ಧನರಾಜ್ ಕುಡ್ಲಡ್ ಮುಖ್ಯಮಂತ್ರಿ ಡಿ ಕೆ ಶಿವಕುಮಾರ್ ಮೆರೆನ್ ಭೇಟಿ ಮಲ್ತ್‌ದ್ ಬಿನ್ನಾಪುದ ಓಲೆ ಕೊರಿಯೆರ್.
ಡಿಸೆಂಬರ್ 25ರ್ದ್ 27 ಮುಟ್ಟ ಕುಡ್ಲಡ್ ಪ್ರಾದೇಶಿಕ ಭಾಷಾ ಅಂತಾರಾಷ್ಟ್ರೀಯ ಚಲನ ಚಿತ್ರೋತ್ಸವನ್ ಮಲ್ಪರೆ ತೀರ್ಮಾನ ಮಲ್ತ್‌ದ್, ಅಯಿತ ಉದ್ಘಾಟನೆನ್ ಈರೇ ಮಲ್ಪೊಡು ಪಂದ್ ಮನವಿ ಮಲ್ತೆರ್.
ಪ್ರಾದೇಶಿಕ ಚಲನಚಿತ್ರ ನಿರ್ಮಾಪಕೆರೆನ ಸಬ್ಸಿಡಿ ಸಮಿತಿ, ಪ್ರಶಸ್ತಿ ಸಮಿತಿ ಬೊಕ್ಕ ಸೆನ್ಸಾರ್ ಸಮಿತಿಗ್ ಸೇರ್ಸಾವೊಡು ಪಂದ್ ಓಲೆಡ್ ತೆರಿಪಾದೆರ್.

ಉಡುಪಿದ ಸುದ್ದಿ | Udupi News ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಉಡುಪಿ ತಾಲೂಕುದ ಕಡೀರ ಪೊಣ್ಣು ಕಮರ್ಷಿಯಲ್ ಪೈಲೆಟ್” ಇನ್ಶಾ ತಸ್ಕೀನ್

Sep 21, 2026

ಕಠಿಣ ತರಬೇತಿ, ನಿರಂತರ ಪರಿಶ್ರಮ ಬೊಕ್ಕ ಆತ್ಮವಿಶ್ವಾಸದ ಮುಕೇನ ಬಾಲ್ಯದ ಕನನ್ ನಿಜ ಮಲ್ತೊಂಡಿನ ಇನ್ಶಾ ತಸ್ಕೀನ್, ಕಮರ್ಷಿಯಲ್ ಪೈಲೆಟ್ ಲೈಸೆನ್ಸ್ ಪಡೆದ್ ಉಡುಪಿ ತಾಲೂಕುದ ಸುರುತ್ತ ಪೊಣ್ಣು ಕಮರ್ಷಿಯಲ್ ಪೈಲೆಟ್ ಪನ್ಪಿನ ಪುಗರ್ತೆದ ಪಡೆತೆರ್.
ಇನ್ಶಾ ತಸ್ಕೀನ್ ಉಡುಪಿದ ಬೈಲೂರು ನಿವಾಸಿಲಾಯಿನ ಇಕ್ಲಾಕ್ ಅಹಮದ್ ಬೊಕ್ಕ ಸೈಯದ್ ತಬಸ್ಸುಮ್ ದಂಪತಿಲೆನ ಮಗಲ್. ಅರೆನ ಅಣ್ಣೆ ದೆಹಲಿ ವಿಮಾನ ನಿಲ್ದಾಣಡ್ ಏರ್ ಇಂಡಿಯಾದ ಹಿರಿಯ ಕಾರ್ಯನಿರ್ವಾಹಕ ಅಧಿಕಾರಿಯಾದುಲ್ಲೆರ್.
ಇನ್ಶಾ ಬ್ರಹ್ಮಾವರದ ಲಿಟಲ್ ರಾಕ್ ಇಂಡಿಯನ್ ಸ್ಕೂಲ್‌ಡ್ ಎಲ್‌ಕೆಜಿರ್ದ್ 12ನೇ ತರಗತಿ ಮುಟ್ಟ ಶಿಕ್ಷಣ ಪಡೆಯೆರ್. ಬೊಕ್ಕ ಪೈಲೆಟ್ ಆಪಿನ ತನ್ನ ಕನನ್ ನನಸ್ ಮಲ್ಪುನ ಉದ್ದೇಶಡ್ ರೆಡ್‌ಬರ್ಡ್ ಫ್ಲೈಟ್ ಟ್ರೈನಿಂಗ್ ಅಕಾಡೆಮಿಗ್ ಸೇರಿಯೆರ್.
ದಿಲ್ಲಿದ ರೆಡ್‌ಬರ್ಡ್ ಸಂಸ್ಥೆಡ್ ಒಂಜಿ ವರ್ಷದ ತರಬೇತಿ ಕಾರ್ಯಕ್ರಮಡ್ ಆರ್ ಗ್ರೌಂಡ್ ಕ್ಲಾಸ್ ಗ್ ಹಾಜರಾದ್, ಅಗತ್ಯ ಪರೀಕ್ಷೆಲೆಗ್ ತಯಾರಿ ಮಲ್ತೆರ್. ಮಾತಾ ಪರೀಕ್ಷೆಲೆನ್ ಸುರುತ್ತ ಪ್ರಯತ್ನಡೆ ಯಶಸ್ವಿಯಾದ್ ಪಾಸ್ ಆಯೆರ್.
ತರಬೇತಿದ ದುಂಬುದ ಹಂತವಾದ್ ಬೆಳಗಾವಿ ಫ್ಲೈಯಿಂಗ್ ಬೇಸ್‌‌ಡ್ 200 ಗಂಟೆಗ್ ಫ್ಲೈಯಿಂಗ್ ತರಬೇತಿನ್ ಯಶಸ್ವಿಯಾದ್ ಪೂರ್ಣ ಮಲ್ತೆರ್. ಬೊಕ್ಕ ಕಮರ್ಷಿಯಲ್ ಪೈಲೆಟ್ ಲೈಸೆನ್ಸ್ ಪಡೆತೆರ್.
ಕಠಿಣ ತರಬೇತಿ, ನಿರಂತರ ಪರಿಶ್ರಮ ಬೊಕ್ಕ ಆತ್ಮವಿಶ್ವಾಸದ ಮೂಲಕ ಬಾಲ್ಯದ ಕನನ್ ನಿಜ ಮಲ್ದಿನ ಇನ್ಶಾ ತಸ್ಕೀನ್ ಉಡುಪಿ ಜಿಲ್ಲೆ ಪೊಣ್ಣುಲೆಗ್ ವಿಶೇಷವಾದ್ ವಿಮಾನಯಾನ ಕ್ಷೇತ್ರಡ್ ವೃತ್ತಿಜೀವನ ಮಲ್ಪುನಕ್ಲೆಗ್ ಸ್ಫೂರ್ತಿ ಆತೆರ್.

“ಸುರುಕ್ಕು ಎಂಕ್ ಪೈಲೆಟ್ ಆಪಿನ ಬಗೆಟ್ಟ್ ಆಸಕ್ತಿ ಇತ್ತಿಜಿ. ಯಾನ್ ಎಸ್‌ಎಸ್‌ಎಲ್‌ಸಿ ಓದೊಂದು ಉಪ್ಪುನಗ ಒರ ದಿಲ್ಲಿಗ್ ಪ್ರಯಾಣ ಮಲ್ದಿತ್ತೆ. ಆ ವಿಮಾನ ನಿಲ್ದಾನ ತೂನಗ ಪೈಲಟ್ ಆವೊಡುಂದು ಆಸೆ ಪುಟ್ಟುಂಡ್. ಕುಟುಂಬದಕ್ಲೆನ ಬೆಂಬಲರ್ದ್ ಎನ್ನ ಕನ ನನಸಾವರೆ ಸಾಧ್ಯ ಆಂಡ್. ನನ ದುಂಬುದ ದಿನಟ್ಟ್ ಕಮರ್ಷಿಯಲ್ ಪೈಲೆಟ್ ಆದ್ ಕೆಲಸ ಮಲ್ಪುನೆತ್ತ ಒಟ್ಟುಗು ವಿಮಾನಯಾನ ಕ್ಷೇತ್ರಡ್ ನನಾತ್ ಸಾಧನೆ ಮಲ್ಪೊಡು ಪನ್ಪಿನ ಉದ್ದೇಶ ಉಂಡು” ಪಂದ್ ಕ್ಯಾಪ್ಟನ್ ಇನ್ಶಾ ತಸ್ಕೀನ್ ತೆರಿಪಾದೆರ್.

ಸೆ.24 : ಕಾಪುದಪ್ಪೆಗ್ ಅಕ್ಷರ ನಮನ, ಮಾತೃಕಾ ಶಕ್ತಿ ಪೂಜೆ, ಕಾಪು ಚಾರಿಟೇಬಲ್ ಟ್ರಸ್ಟ್ (ರಿ.) ಉದಿಪನ

Sep 21, 2026

ಕಾಪು : ಶಕ್ತಿ ಸ್ವರೂಪಿಣಿ ಕಾಪುದ ಮಾರಿಯಮ್ಮನ ನಡೆಟ್ಟ್ ಲೋಕದ ಎಡ್ಡೆಪ್ಪುಗಾದ್ ಬೊಕ್ಕ ಮಾತಾ ಭಕ್ತೆರ್‌ನ ಉದ್ಧಾರೊಗಾದ್ ಸೆ.24 ಗುರುವಾರ ಮದ್ಯಾನ 3 ಗಂಟೆಗ್‌ “ಮಾತೃಕಾ ಶಕ್ತಿ ಪೂಜೆ” ನಡಪರೆ ಉಂಡು.
ದೇವಸ್ಥಾನದ ಪ್ರಧಾನ ತಂತ್ರಿಲಾಯಿನ ವಿದ್ವಾನ್ ಕೆ.ಪಿ. ಕುಮಾರಗುರು ತಂತ್ರಿಲೆನ ಮಾರ್ಗ ದರ್ಶನಡ್, ಪ್ರಧಾನ ಅರ್ಚಕೆರಾಯಿನ ವೇದಮೂರ್ತಿ ಶ್ರೀನಿವಾಸ ತಂತ್ರಿ ಕಲ್ಯ ಮೆರೆನ ಸಹಯೋಗಡ್ ಈ ಪೂಜಾ ವಿಧಿ ನಡಪರೆ ಉಂಡು. 3.30 ಗಂಟೆಗ್ ಸಾಮೂಹಿಕ ಪ್ರಾರ್ಥನೆ, 4 ಗಂಟೆಗ್ ದೀಪ ಉದಿಪನ, 4.30ಕ್ಕ್ ಸಭಾ ಕಾರ್ಯಕ್ರಮ, 5.30ಕ್ಕ್ ಮಹಾ ಮಂಗಳಾರತಿ ಆವರೆ ಉಂಡು.
ಸಭಾ ಕಾರ್ಯಕ್ರಮರ್ದ್ ದುಂಬು ಮಲ್ಲ ಬಿನ್ನೆರಾದ್ ಎಂ.ಆರ್.ಜಿ ಗ್ರೂಪ್ ಚೇರ್‌ಮ್ಯಾನ್ ಡಾ. ಕೆ ಪ್ರಕಾಶ್ ಶೆಟ್ಟಿ ಮೇರ್ ಕಾಪು ಕ್ಷೇತ್ರದ ಧಾರ್ಮಿಕ, ಶೈಕ್ಷಣಿಕ, ಸಾಂಸ್ಕೃತಿಕ ಬೊಕ್ಕ ಸಾಮಾಜಿಕ ಸೇವೆಗಾದ್ ಸ್ಥಾಪಿತ ಆಪಿನ ಕಾಪು ಚಾರಿಟೇಬಲ್ ಟ್ರಸ್ಟ್ ಸಂಸ್ಥೆನ್ ಉದಿಪನ ಮಲ್ಪುವೆರ್ ಪಂದ್ ದೇವಸ್ಥಾನದ ಪ್ರಕಟಣೆಡ್ ತೆರಿಪಾದೆರ್.
Box
“ಕಾಪುದಪ್ಪೆಗ್ ಅಕ್ಷರ ನಮನ”
ನವದುರ್ಗಾ ಲೇಖನ ಯಜ್ಞ ಸಮಿತಿ ವತಿರ್ದ್ 9 ಜನ ಗಣ್ಯೆರ್‌ನ ಎದುರು “ಕಾಪುದಪ್ಪೆಗ್ ಅಕ್ಷರ ನಮನ” ಮಹಾ ಅಭಿಯಾನಗ್ ಚಾಲನೆ ಕೊರಿಯರೆ ಉಂಡು.
ನವದುರ್ಗಾ ಲೇಖನ ಪುಸ್ತಕಡ್ ನವ ದುರ್ಗೆಯೆರ್‌ನ ಪುದರ್‌ನ್ 9 ದಿನ ಬರೆದ್ ಶಾಶ್ವತ ಸೇವೆ ಮಲ್ಪುನ ಭಕ್ತೆರೆಗ್ ಅನುಗ್ರಹ ಪ್ರಸಾದದ ಒಟ್ಟುಗು “ಅದೃಷ್ಟದ ಚೀಟಿ” ತಿಕ್ಕುಂಡು.

ಬಂಗಾರ್‌ದ ಪದಕ :

ನವದುರ್ಗೆನ ಪುದರ್ ಬರೆದ್ ಭಕ್ತಿಡ್ ಸಮರ್ಪಣೆ ಮಲ್ಪುನ 9 ಭಕ್ತೆರೆಗ್ ಕಾಪು ಚಾರಿಟೇಬಲ್ ಟ್ರಸ್ಟ್ (ರಿ.) ವತಿರ್ದ್ ಅಮ್ಮನ ಪ್ರಸಾದ ರೂಪಡ್ ಅದೃಷ್ಟ ಚೀಟಿಡ್ ತಲಾ 9 ಗ್ರಾಂ ತೂಕದ ಬಂಗಾರ್‌ದ ಪದಕ ತಿಕ್ಕರೆ ಉಂಡು. ಎಚ್ಚದ ಮಾಹಿತಿಗಾದ್ ಸಂಪರ್ಕ ಮಲ್ಪೊಲಿ (9481550999) ಪಂದ್ ಪ್ರಕಟಣೆಡ್ ತೆರಿಪಾದೆರ್.

ಅಗತ್ಯ ಸೇವೆ Emergency Services ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಅಕ್ಟೋಬರ್ 1ರ್ದ್ ಸಬ್ಸಿಡಿ ಎಲ್‌ಪಿಜಿಗ್ ಬಯೋಮೆಟ್ರಿಕ್ ಆಧಾರ್ ಕಡ್ಡಾಯ

Sep 21, 2026

ದಿಲ್ಲಿ : ಸಬ್ಸಿಡಿಡ್ ತಿಕ್ಕುನ ಗ್ಯಾಸ್ ಸಿಲಿಂಡರ್‌ ರೀಫಿಲ್ ಮಲ್ಪಾವುನಕುಲು ಅಕ್ಟೋಬರ್ 1 ತಾರೀಕ್‌ರ್ದ್ ಕಡ್ಡಾಯವಾದ್ ಬಯೋಮೆಟ್ರಿಕ್ ಆಧಾರ್ ದೃಢೀಕರಣ ಮಲ್ಪಾವೊಡು” ಪಂದ್ ಕೇಂದ್ರ ಸರ್ಕಾರ ತೆರಿಪಾದ್ಂಡ್.
ಪೆಟ್ರೋಲಿಯಂ ಬೊಕ್ಕ ನೈಸರ್ಗಿಕ ಅನಿಲ ಸಚಿವಾಲಯದ ಪ್ರಕಾರ, ಆಧಾರ್ ದೃಢೀಕರಣದ ಮುಕೇನ ಎಲ್‌ಪಿಜಿ ಸಂಪರ್ಕನ್ ನಿಖರವಾದ್ ಗುರ್ತಿಸಾವೊಡು, ನಕಲಿ ಅತ್ತ್‌ಡ ಅನರ್ಹ ಕನೆಕ್ಷನ್ ಪತ್ತೆ ಮಲ್ಪುನು ಬೊಕ್ಕ ಸಬ್ಸಿಡಿದ ಗೃಹ ಬಳಕೆದ ಎಲ್‌ಪಿಜಿ ಸಿಲಿಂಡರ್‌ ದುರ್ಬಳಕೆ ತಡೆಪುನು ನೆತ್ತ ಪ್ರಮುಖ ಉದ್ದೇಶವಾದುಂಡು. ನೆರ್ದ್ ದುಂಬೇ ಬಯೋಮೆಟ್ರಿಕ್ ಆಧಾರ್ ದೃಢೀಕರಣ ಮಲ್ಪಾದಿನಕುಲು ಕುಡೊರ ಮಲ್ಪಾವುನ ಅಗತ್ಯ ಇಜ್ಜಿ. ನನಲ ದೃಢೀಕರಣ ಪೂರ್ಣ ಮಲ್ಪಂದಿನ ಗ್ರಾಹಕೆರ್ ಪ್ರಕ್ರಿಯೆ ಮಲ್ಪಾಯಿ ಬೊಕ್ಕ ಸಬ್ಸಿಡಿ ರೀಫಿಲ್ ಬುಕಿಂಗ್ ಸೌಲಭ್ಯ ದೆತೊನೊಲಿ ಪಂದ್ ಸರ್ಕಾರ ತೆರಿಪಾದ್ಂಡ್.

ದೃಢೀಕರಣ ಮಲ್ಪುನ ವಿಧಾನ

ಗ್ರಾಹಕೆರ್ ತನ್ಕ್ ಅನುಕೂಲ ಆಪಿಲೆಕ ಬೇತೆ ಬೇತೆ ವಿಧಾನೊಡು ಈ ಬೇಲೆ ಮಲ್ಪೊಲಿ. ಇಲ್ಲಗ್ ಸಿಲಿಂಡರ್ ಕನಪಿನ ಸಿಬ್ಬಂದಿಲೆನ ಮೊಬೈಲ್ ಅಪ್ಲಿಕೇಶನ್ ಮುಕೇನ ದೃಢೀಕರಣ ಮಲ್ಪೊಲಿ. ಅತ್ತ್‌ಡ ಎಲ್‌ಪಿಜಿ ಏಜೆನ್ಸಿಗ್ ಪೋದು ಬಯೋಮೆಟ್ರಿಕ್ ದೃಢೀಕರಣ ಮಲ್ಪೊಲಿ. ನಿಕ್ಲೆನ ಸಂಬಂಧಿತ OMCದ ಅಧಿಕೃತ ಮೊಬೈಲ್ ಅಪ್ಲಿಕೇಶನ್ ಮುಕೇನ ಈ ಬೇಲೆ ಮಲ್ಪೊಲಿ.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News