ರಪಕ್ಕ ಸುದ್ದಿ Flash News

ಮೂಲ್ಕಿ ತಾಲೂಕು ಸಾಹಿತ್ಯ ಉಚ್ಚಯದ ಪ್ರಶಸ್ತಿಗ್ ಆಯ್ಕೆ

ದಕ್ಷಿಣ ಕನ್ನಡ ಜಿಲ್ಲಾ ಚುಟುಕು ಸಾಹಿತ್ಯ ಪರಿಷತ್‌ದ ಮೂಲ್ಕಿ ತಾಲೂಕು ಘಟಕ, ಕಿನ್ನಿಗೋಳಿದ ಯುಗಪುರುಷ ಅಂಚನೆ ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ ಮೊಕ್ಲೆನ ಒಟ್ಟು ಸೇರಿಗೆಡ್ ನಡಪರೆ ಇಪ್ಪುನ ಮೂಲ್ಕಿ ತಾಲೂಕ್‌ ಸಾಹಿತ್ಯ ಉಚ್ಚಯ ಪ್ರಶಸ್ತಿ-ಪುರಸ್ಕಾರಗ್ ಸಾಧಕೆರೆನ್ ಆಯ್ಕೆ ಮಲ್ತ್‌ದೆರ್.

ಮೂಲ್ಕಿ ತಾಲೂಕು ಕಲಾಶ್ರೀ ಪ್ರಶಸ್ತಿಗ್ ಕಟೀಲು ಶ್ರೀ ದುರ್ಗಾಪರಮೇಶ್ವರೀ ಪದವಿ ಪೂರ್ವ ಕಾಲೇಜಿದ ಫ್ರೌಢಶಾಲಾ ವಿಭಾಗದ ಶಿಕ್ಷಕೆರ್ ಆಯಿನ ಸಾಯಿನಾಥ ಶೆಟ್ಟಿ, ಯುವ ರಂಗಕರ್ಮಿ ಕಲಾ ಪ್ರಕಾರಡ್ ಪ್ರಾಮಾಣಿಕವಾದ್ ಸೇವೆ ಮಲ್ತೊಂದಿಪ್ಪುನ ರಜತ್‌ಕುಮಾರ್ ಸಸಿಹಿತ್ಲು, ಕಲ್ಪುನ ಪ್ರಾಯೊಡೇ ಕಲೆತ್ತ ಮಿತ್ತ್ ಆಸಕ್ತಿ ತೋಜಾಯಿನ ಪ್ರತಿಭೆ ಕು. ಸಿಂಚನ ಕಿನ್ನಿಗೋಳಿ ಅಂಚನೆ ಸೇವಾಶ್ರೀ ಪುರಸ್ಕಾರಗ್ ಪಡುಪಣಂಬೂರು ಗ್ರಾಮ ಪಂಚಾಯತ್‌ದ ಅಧ್ಯಕ್ಷೆರಾದ್ ರಾಷ್ಟ್ರಮಟ್ಟಡ್ ಗುರ್ತಿಸಾಯಿನ ಪಂಚಾಯತ್‌ದ ಮುಕೇನ ಸಮಾಜ ಸೇವೆಡ್ ಇಪ್ಪುನ ಮಂಜುಳಾ ಪಡುಪಣಂಬೂರು, ಹಳೆಯಂಗಡಿಡ್ ಆಂಬ್ಯುಲೆನ್ಸ್ ಸೇವೆದೊಟ್ಟುಗು ಕ್ರೀಡೆ, ಸಾಮಾಜಿಕ ಸೇವೆಡ್ ಇಪ್ಪುನ ಜೈಕೃಷ್ಣ ಕೋಟ್ಯಾನ್ ಅರೆನ್ ಆಯ್ಕೆ ಮಲ್ತ್‌ದೆರ್.

ಮಾರ್ಚ್ 26 ಕ್ಕ್ ಕಿನ್ನಿಗೋಳಿದ ಯುಗಪುರುಷಡ್ ನಡಪುನ ಲೇಸ್‌ಡ್ ಬಿನ್ನೆರ್‍ನ ಸಮ್ಮುಖಡ್ ಈ ಪ್ರಶಸ್ತಿ, ಪುರಸ್ಕಾರನ್ ಕೊರ್ದು ಮಾನಾದಿಗೆ ಮಲ್ಪರೆ ಉಂಡು ಪಂದ್ ಕಿನ್ನಿಗೋಳಿ ಯುಗಪುರುಷದ ಪ್ರಧಾನ ಸಂಪಾದಕೆರ್ ಕೆ.ಭುವನಾಭಿರಾಮ ಉಡುಪ, ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್‌ದ ಅಧ್ಯಕ್ಷೆರ್ ಸಂತೋಷ್ ದೇವಾಡಿಗ ಬೊಕ್ಕ ಮೂಲ್ಕಿ ತಾಲೂಕು ಚುಟುಕು ಸಾಹಿತ್ಯ ಪರಿಷತ್‌ದ ಅಧ್ಯಕ್ಷೆರ್ ನರೇಂದ್ರ ಕೆರೆಕಾಡು ತೆರಿಪಾದೆರ್.

ಮಿಥುನ್ ರೈಕ್ಲೆಗ್ ತುಳುನಾಡ್ ದ ದೈವ ದೇವರ್ನ ಅನುಗ್ರಹ ಉಂಡು,ಪೊಟ್ಟು ಬೆದರಿಕೆಗ್ ಬಗ್ಗುಜೆರ್ : ಮೋಹನ್ ಕೋಟ್ಯಾನ್

ಹಳೆಯಂಗಡಿ : ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿಲು, ಮುಲ್ಕಿ- ಬೆದ್ರ ವಿಧಾನಸಭೆ ಕ್ಷೇತ್ರದ ಉಸ್ತುವಾರಿ ಆದುಪ್ಪುನ ಮಿಥುನ್ ರೈ ಮೆರೆಗ್ ತುಳುನಾಡ್ದ ಮಾತಾ ದೈವ ದೇವೆರ್ನ ಅನುಗ್ರಹ ಇತ್ತಿನೆರ್ದಾವರ ಅರೆನ ಜೀವೊಗು ಒವ್ವೇ ರೀತಿದ ತೊಂದರೆ ಆವಂದ್ ಪಂದ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್ ತೆರಿಪಾಯೆರ್.

ಸಾಮಾಜಿಕ ಜಾಲತಾಣೊಡು ಮಿಥುನ್ ರೈಕ್ಲೆಗ್ ಕೆಲವೆರ್ ಜೂವ ಬೆದರಿಕೆ ಪಾಡ್ದಿನ ನಿಲೆಟ್ಟ್ ಅಂಗಾರೆ ಕಾಂಗ್ರೆಸ್ ಕಚೇರಿಡ್ ನಡತಿನ ಸುದ್ದಿಗೋಷ್ಠಿಡ್ ಆರ್ ಈ ವಿಷಯ ಪಂಡೆರ್.

ಜೂವ ಬೆದರಿಕೆ ಪಾಡ್ದಿನಕ್ಲೆನ ಮಿತ್ತ್ ಮುಲ್ಕಿ ಸ್ಟೇಶನ್ ಡ್ ಕಂಪ್ಲೈಂಟ್ ಕೊರ್ತ. ಬಿಜೆಪಿದಕ್ಲೆನ ಪೊಟ್ಟು ಬೆದರಿಕೆಗ್ ಎಂಕುಲು ಪೋಡ್ಯುಜ. ಮಿಥುನ್ ರೈಕ್ಲೆನ ಪಿರವುಡು ಆರೇ ಕಟ್ ದಿನ ಕಾಂಗ್ರೆಸ್ ಕಾರ್ಯಕರ್ತೆರ್ನ ಮಲ್ಲ ಕೂಟನೇ ಉಂಡು. ಅರೆಗ್ ಪೊಲೀಸ್ ಭದ್ರತೆದ ಅಗತ್ಯ ಇಜ್ಜಿ. ಎಂಕುಲೇ ಅರೆನ ರಕ್ಷಣೆಗ್ ತಯಾರಾದುಲ್ಲ ಪಂಡೆರ್.

ಬಿಜೆಪಿಗ್ ವೋಟುಡು ಸೋಪುನ ಪೋಡಿಗೆ ಪುಟುದುಂಡು.ಅಂಚಾದ್ ಮಿಥುನ್ ರೈಕ್ಲೆನ ಏಳಿಗೆನ್ ಸಹಿಸಂದಿನ ಬಿಜೆಪಿದಕುಲು ಅರೆನ್ ತಿರ್ತ್ ಮಲ್ಪುನ ಕೆಲಸ ಮಲ್ತೊಂದುಲ್ಲೆರ್. ಒಡಿಪು ಮಠತ್ತ ಜಾಗೆದ ವಿಚಾರೊಡು ಪೇಜಾವರ ಸ್ವಾಮಿಲೇ ಪಂತಿನ ಪಾತೆರೊನು ಪ್ರಸ್ತಾಪ ಮಲ್ದಿನೆಕ್ಕ್ ಅರೆನ ವಿರುದ್ಧ ಅಪಪ್ರಚಾರ ಮಲ್ತೊಂದುಲ್ಲೆರ್ ಪಂದ್ ಕೋಟ್ಯಾನ್ ಪಂಡೆರ್. ಮಿಥುನ್ ರೈ ನಿಜವಾಯಿನ ಗೋಪ್ರೇಮಿ. 300-400 ಗೋವು ಉಂಬೊಲಿ ಕೊರ್ತೆರ್.ಅರೆನ ಧರ್ಮ‌ನಿಷ್ಠೆ ಬೊಕ್ಕ ನೈಜ ಹಿಂದುತ್ವನ್ ಪ್ರಶ್ನೆ ಮಲ್ಪರೆ ಮೊಕ್ಲೆಗ್ ವಾ ನೈತಿಕ ಹಕ್ಕ್ ಲ ಇಜ್ಜಿ. ಬಿಜೆಪಿದಕ್ಲೆನ ನಕಲಿ ಹಿಂದುತ್ವ ಪಂದ್ ಪಂಡೆರ್.

ಸುದ್ದಿಗೋಷ್ಠಿಡ್ ಕೆಪಿಸಿಸಿ ಕೋಆರ್ಡಿನೇಟರ್ ವಸಂತ ಬರ್ನಾಡ್, ಮುಲ್ಕಿ ನಗರ ಪಂಚಾಯತ್ ಸದಸ್ಯೆರ್ ಮಂಜುನಾಥ ಕಂಬಾರ, ಬಾಲಚಂದ್ರ ಕಾಮತ್, ರಾಜ್ಯ ಹಿಂದುಳಿದ ವರ್ಗದ ಪ್ರಧಾನ ಕಾರ್ಯದರ್ಶಿ ದೀಪಕ್ ಪೆರ್ಮುದೆ, ಯುವ ಕಾಂಗ್ರೆಸ್ ಅಧ್ಯಕ್ಷೆರ್ ಅಶೋಕ್ ಪೂಜಾರ್, ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಉಪಾಧ್ಯಕ್ಷೆರ್ ಅಬ್ದುಲ್ ಖಾದರ್, ಎನ್ ಎಸ್ ಯುಐ ಅಧ್ಯಕ್ಷೆರ್ ಸೃಜನ್ ಅಂಚನ್, ರಕ್ಷಿತ್ ಕೊಳಚಿಕಂಬಳ, ರಿತೇಶ್ ಸುವರ್ಣ, ಸಮೀರ್ ಮೊಕುಲು ಮಾತ ಇತ್ತೆರ್.