ಮಾರ್ಚ್ 1-3: ಕಾಪು ಪೊಸ ಮಾರಿಗುಡಿ ಪ್ರತಿಷ್ಠಾ ಬ್ರಹ್ಮಕಲಶೋತ್ಸವದ ವಾರ್ಷಿಕ ವರ್ಧಂತಿ ಹಿನ್ನೆಲೆಡ್ “ಮಾತೃ ವೈಭವ” ಲೇಸ್
ಕಾಪು ಶ್ರೀ ಪೊಸ ಮಾರಿಗುಡಿ ದೇವಸ್ಥಾನದ ಪ್ರತಿಷ್ಠಾ ಬ್ರಹ್ಮಕಲಶೋತ್ಸವದ ವಾರ್ಷಿಕ ವರ್ಧಂತಿದ ನಿಲೆಟ್ಟ್ ಮಾರ್ಚ್ 1 ತಾರೀಕ್ರ್ದ್ 3 ತಾ. ಮುಟ್ಟ ಕಾಪುದ ಅಪ್ಪೆನ ಸನ್ನಿದಾನಡ್ ಭಕ್ತೆರ್ನ ಸಹಕಾರಡ್ ಧಾರ್ಮಿಕ, ಸಾಂಸ್ಕೃತಿಕ ಬೊಕ್ಕ ಸಾಮಾಜಿಕ ಕಾರ್ಯಕ್ರಮದ ಸಹಿತ “ಮಾತೃ ವೈಭವ” ಪನ್ಪಿನ ಲೇಸ್ನ್ ಗೌಜಿಡ್ ಆಚರಣೆ ಮಲ್ಪರೆ ಐತಾರ ಶ್ರೀಮಾತಾ ಸಭಾಭವನಡ್ ನಡತಿನ ಸಮಾಲೋಚನಾ ಸಭೆಟ್ ತೀರ್ಮಾನ ದೆತೊಂದೆರ್.
ಶ್ರೀ ಪೊಸ ಮಾರಿಗುಡಿ ದೇವಸ್ಥಾನ ಅಭಿವೃದ್ಧಿ ಸಮಿತಿ ಅಧ್ಯಕ್ಷೆರ್ ರಾಜರ್ಷಿ ಕೆ. ವಾಸುದೇವ ಶೆಟ್ಟಿ ಪ್ರಸ್ತಾವನೆದ ಮದಿಪು ಕೊರಿಯೆರ್. ದೇಶ ವಿದೇಶಡ್ ಉಪ್ಪುನ ಭಕ್ತೆರ್ ಬೊಕ್ಕ ಕಾಪುದ ಅಮ್ಮ ಮಾತಾ ಜೋಕ್ಲೆನ ಸಹಕಾರಡ್ ಕಾಪು ಮಾರಿಯಮ್ಮನ ದೇವಸ್ಥಾನದ ಜೀರ್ಣೋದ್ಧಾರ, ಪ್ರತಿಷ್ಠಾ ಬ್ರಹ್ಮಕಲಶೋತ್ಸವ ವೈಭವದಡ್ ಸಂಪನ್ನ ಆತ್ಂಡ್. ಪ್ರತೀ ವರ್ಷ ಮಾರ್ಚ್ 1, 2, 3 ತಾರೀಕ್ಗ್ ಪ್ರತಿಷ್ಠಾ ವರ್ಧಂತಿನ್ ವಿಜ್ರಂಭಣೆಡ್ ಆಚರಣೆ ಮಲ್ಪರೆ ಸೇರ್ದ್ ಮಾತೃ ವೈಭವ ಉತ್ಸವ ಸಮಿತಿ ರಚನೆ ಮಲ್ತ್ದ್, ವಾರ್ಷಿಕ ಉತ್ಸವನ್ ಆಚರಣೆ ಮಲ್ಪುಲೆಕ ಆವೊಡು ಪನ್ಪಿನವು ನಮ್ಮ ಅಭಿಲಾಷೆ. ಮಾತೆರ್ನಲ ಸಹಕಾರ ಬೋಡು ಪಂದ್ ಆರ್ ಪಂಡೆರ್.
ಸಮಿತಿ ಕಾರ್ಯಾಧ್ಯಕ್ಷೆರ್, ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ ಪಾತೆರ್ದ್ ಪ್ರತಿಷ್ಠಾ ವರ್ಧಂತಿನ್ ಈ ಉತ್ಸವ ಅವಿಭಜಿತ ದಕ್ಷಿಣ ಕನ್ನಡ ಬೊಕ್ಕ ಉಡುಪಿ ಜಿಲ್ಲೆಗ್ ಮಾದರಿ ಆಪಿಲೆಕ ಮಲ್ಪುಗ ಪಂದ್ ಪಂಡೆರ್.
ಸಮಿತಿ ಗೌರವಾಧ್ಯಕ್ಷೆರ್ ಮಾಜಿ ಸಚಿವ ವಿನಯ್ ಕುಮಾರ್ ಸೊರಕೆ ಪಾತೆರಿಯೆರ್. ಕಾಪು ಶ್ರೀ ಹೊಸ ಮಾರಿಗುಡಿ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷೆರ್ ನಡಿಕೆರೆ ರತ್ನಾಕರ ಶೆಟ್ಟಿ ಅಧ್ಯಕ್ಷತೆ ವಹಿಸ್ದೆರ್. ದೇವಸ್ಥಾನದ ಕಾರ್ಯನಿರ್ವಹಣಾಧಿಕಾರಿ ರವಿಕಿರಣ್, ಅಭಿವೃದ್ಧಿ ಸಮಿತಿ ಗೌರವಾಧ್ಯಕ್ಷೆರ್ ಲಾಲಾಜಿ ಆರ್. ಮೆಂಡನ್, ಅನಿಲ್ ಬಲ್ಲಾಳ್ ಕಾಪು ಬೂಡು, ಪ್ರಧಾನ ಕಾರ್ಯದರ್ಶಿ ರಮೇಶ್ ಹೆಗ್ಡೆ ಕಲ್ಯ, ಉಪಾಧ್ಯಕ್ಷೆರ್ ಕಾಪು ದಿವಾಕರ ಶೆಟ್ಟಿ, ಪ್ರಚಾರ ಸಮಿತಿ ಪ್ರಧಾನ ಸಂಚಾಲಕ ಯೋಗೀಶ್ ವಿ. ಶೆಟ್ಟಿ ಬಾಲಾಜಿ, ಕಾಪು ಶ್ರೀ ಲಕ್ಷ್ಮೀ ಜನಾರ್ದನ ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಮನೋಹರ ಎಸ್. ಶೆಟ್ಟಿ, ಕಾಪು ನಗರ ಯೋಜನಾ ಪ್ರಾಧಿಕಾರದ ಅಧ್ಯಕ್ಷೆರ್ ವಿಕ್ರಂ ಕಾಪು, ಪುರಸಭೆ ಅಧ್ಯಕ್ಷೆ ಹರಿಣಾಕ್ಷಿ ದೇವಾಡಿಗ, ವ್ಯವಸ್ಥಾಪನಾ ಸಮಿತಿ ಸದಸ್ಯೆರಾಯಿನ ಶೇಖರ ಸಾಲ್ಯಾನ್, ಮನೋಹರ ರಾವ್ ಕಲ್ಯ, ರವೀಂದ್ರ ಮಲ್ಲಾರು, ಜಯಲಕ್ಷ್ಮೀ ಎಸ್. ಶೆಟ್ಟಿ, ಚರಿತಾ ದೇವಾಡಿಗ ಬೊಕ್ಕ ಅಭಿವೃದ್ಧಿ ಸಮಿತಿ ಪದಾಧಿಕಾರಿಲು ಇತ್ತೆರ್.
ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್ ಮಾಧವ ಆರ್. ಪಾಲನ್ ಸ್ವಾಗತ ಮಲ್ತೆರ್. ಗೌರವ ಸಲಹೆಗಾರ ನಿರ್ಮಲ್ ಕುಮಾರ್ ಹೆಗ್ಡೆ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.
