ತುಳು ಸುದ್ದಿ

ಶ್ರೀ ಬ್ರಹ್ಮಬೈದರ್ಕಳ ಗರೋಡಿ ಹೊಸಾಳ ಬಾರಕೂರು : ಪ್ರತಿಷ್ಠಾಮಹೋತ್ಸವ, ಸಹಸ್ರ ಕುಂಭಾಭಿಷೇಕ ಕೆಂಪು ಕಲ್ಲ್ ದ ಆಲಯಡ್ ಮೆನ್ಕೊಂದು ಉಪ್ಪುನ ದೇವಲ್ಯ

ಶ್ರೀ ಬ್ರಹ್ಮಬೈದರ್ಕಳ ಗರೋಡಿ ಹೊಸಾಳ ಬಾರಕೂರು : ಪ್ರತಿಷ್ಠಾಮಹೋತ್ಸವ, ಸಹಸ್ರ ಕುಂಭಾಭಿಷೇಕ

ಕೆಂಪು ಕಲ್ಲ್ ದ ಆಲಯಡ್ ಮೆನ್ಕೊಂದು ಉಪ್ಪುನ ದೇವಲ್ಯ

ಒಡಿಪು :
ಶ್ರೀ ಕ್ಷೇತ್ರ ಬಾರಕೂರು ಗರೋಡಿ ಶ್ರೀ ಬ್ರಹ್ಮಬೈದರ್ಕಳ ಗರೋಡಿ ಹೊಸಾಳ ನೆತ್ತ ಶ್ರೀ ನಾಗ ದೇವೆರ್ , ಸಪರಿವಾರ ಶ್ರೀ ಬ್ರಹ್ಮಬೈದರ್ಕಳ ಬೊಕ್ಕ ಶ್ರೀ ಶಿವರಾಯ, ಕಲ್ಲುಡ, ಕಾಳಮ್ಮ ದೈವದ ನವೀಕೃತ ಆಲಯ ಸಮರ್ಪಣೆ ಬೊಕ್ಕ ಪುನರ್ ಪ್ರತಿಷ್ಠಾಮಹೋತ್ಸವ, ಸಹಸ್ರ ಕುಂಭಾಭಿಷೇಕ ಆವೊಂದು ಉಪ್ಪುನ ಈ ಗರೋಡಿನ್ ಪೂರ್ತಿಯಾದ್ ಕೆಂಪು ಕಲ್ಲ್ ರ್ದ್ ಕಟ್ಟ್ ದೆರ್ ಉಲಯಿದ ಗರ್ಭಗುಡಿಲ ಕೆಂಪುಕಲ್ಲ್ ರ್ದ್ ನಿರ್ಮಾಣ ಆದ್ ಉಂಡು .ಕಲ್ಲು ಜೋಡಾವುನಲ್ಪ ಮಾತ್ರ ಸಿಮೆಂಟ್ ಗಲಸ್ ದೆರ್ . ನೆತ್ತ ಸುತ್ತ ಉಪ್ಪುನ ಕಂಬನ್ ಲಾ ಕೆಂಪು ಕಲ್ಲ್ ರ್ದ್ ಕಲಾತ್ಮಕವಾದ್ ಕೆತ್ತನೆ ಮಲ್ದೆರ್ . ತುಳಸಿಕಟ್ಟೆ ನಾಗನಕಟ್ಟೆಲ ಕೆಂಪು ಕಲ್ಲ್ ರ್ದ್ ಕಟ್ಟಿನವು . ಒಡಿಪು ಜಿಲ್ಲೆಡ್ ಉಂದೊಂಜಿ ಪೊಸ ಮಾದರಿ ಗರೋಡಿ ಪನ್ಪಿನ ಪುಗಾರ್ತೆ ಪಡೆತುಂಡು.

ಗೆಜ್ಜೆಗಿರಿದ ಮಾದರಿಡ್ ಮುಲ್ಪ ಗರೋಡಿ ನಿರ್ಮಾಣ ಆವೊಡು ಪನ್ಪಿನ ಭಕ್ತೆರ್ನ ಆಸೆದಲಕ ಗೆಜ್ಜೆಗಿರಿದ ಗರಡಿ ನಿರ್ಮಾಣ ಮಲ್ತಿನ ಮೂಲತಃ ಗದಗದಾರ್ ಆಯಿನ ಇತ್ತೇ ಕುಡ್ಲಡ್ ಉಪ್ಪುನ ಲಂಬಾಣಿ ಕುಬೇರಪ್ಪನ್ ಸಂಪರ್ಕ ಮಲ್ತ್ ಈ ಬೇಲೆ ಅರೆಗ್ ಕೊರ್ತೆರ್.

ಮುಲ್ಪ ನನೊಂಜಿ ಇಸೇಸತೇ ದಾದ ಪಂದ್ ಕೇಂಡ ಗರಡಿಡ್ ಇತ್ತಿನ ಮರರ್ದ್ ಕಟ್ಟಿನ ಕೋಟಿ- ಚೆನ್ನಯ, ಶಿವರಾಯ, ಬಲ್ಲಾಳ, ಜೋಗಿಪುರುಷ, ಬೊಬ್ಬರ್ಯ, ಮಾಯಂದಾಲ್ ಕಾಷ್ಠಶಿಲ್ಪಗ್ ಪ್ರಕೃತಿಕ ವರ್ಣ ಛಾದನೆ ಕೊರೊಂದು ಉಪ್ಪುನವು ಪೇಂಟೆಡ್ ಸುರು ಪಂದ್ ಪಂಡೆರ್ . ರಾಸಾಯನಿಕ ಪೈಂಟ್ ಗಲಸಂದೆ ಕಾಲಿ ಬರೇ ರಂಗ್ ರಂಗ್ ದ ಕಲ್ಲ್ ನ್ ಪೊಡಿ ಮಲ್ತ್ ಐಕ್ ಒಂತೆ ನೀರ್ ಪಾರ್ದ್ ದೊಂಬುಡು ದೀದ್ ಪ್ರಕೃತಿರ್ದೇ ತಯಾರ್ ಮಲ್ತಿನ ಅಂಟ್ ನ್ ಐಕ್ ಮಿಶ್ರಣ ಮಲ್ತ್ ಈ ಕಾಷ್ಠ ಶಿಲ್ಪಗ್ ಬ್ರಶ್‌ದ ಮುಖೇನ ಪಾಡುವೆರ್ . ಈ ಕಲ್ಲ್ ನ್ ಕೇರಳ, ತಮಿಳುನಾಡು ರ್ದ್ ಕಂದೆರ್ . ಆತೆ ಅತ್ತoದೆ ಕಪ್ಪು ರಂಗ್ ನ್ ಚಿಮಣಿ ದೀಪಗ್ ಎಳ್ಳೆಣ್ಣೆನ್ ಪಾಡ್ದ್ ಐತ ಮಜಿರ್ದ್ ತಯಾರ್ ಮಲ್ದೆರ್ . ಈ ರಂಗ್ ಏತ್ ವರ್ಷ ಆಂಡಲಾ ಪೋಪುಜಿ ಪಂದ್ ಅವೆನ್ ತಯಾರ್ ಮಲ್ತಿನ ಕೇರಳ ಕಣ್ಣಾನೂರುದ ಜಗದೀಶ ಪಾಲಿಯಾಟ ಪಂಡೆರ್ .

*ಕೋಡೆ ಪುದೆಕಾಣಿಕೆ*: ಮೇ 22ಕ್ಕ್ ಮಧ್ಯಾಹ್ನ 3 ಗಂಟೆಗ್ ಬಾರಕೂರು ಶ್ರೀ ಪಂಚಲಿಂಗೇಶ್ವರ ದೇವಸ್ಥಾನರ್ದ್ ಪುದೆಕಾಣಿಕೆ ಮೆರವಣಿಗೆ ಪೋದು ಶ್ರೀ ಬ್ರಹ್ಮಬೈದರ್ಕಳ ಗರಡಿಗ್ ಮುಟ್ಟೆರೆ ಉಂಡು.