ತುಳು ಸುದ್ದಿ

ಜಗತ್ತ್ ಡೇ ಮಸ್ತ್ ಬಿಲೆತ್ತ ವಜ್ರದ ಗಣಪತಿಗ್ ಪ್ರತಿವರ್ಷಲ ಪೂಜೆ !

ಗುಜರಾತ್ ದ ವಜ್ರದ ಉದ್ಯಮಿ ಕನುಭಾಯಿ 15 ವರ್ಷದ ಪಿರಾವುಡು ಬೆಲ್ಜಿಯಂಗ್ ಪೋದ್ ಇತ್ತೆರ್. ಅಲ್ಪರ್ದ್ ಕಚ್ಚಾ ವಜ್ರಲೆನ್ ಖರೀದಿ ಮಲ್ತ್ ಭಾರತಗ್ ಕನತ್ ಇತ್ತೆರ್. ಒಂಜಿ ದಿನ ಕನುಭಾಯಿ ಅರೆನ ಅಮ್ಮೆರೆಗ್ ತನ್ನ ಮಗೆ ಕನತ್ತಿನ ಕಚ್ಚಾ ವಜ್ರಡ್ ಒಂಜಿ ವಜ್ರ ಗಣಪತಿದ ಆಕಾರ ಡ್ ಉಂಡು ಪಂದ್ ಕನ ಕಟ್ಟ್ಂಡ್. ಮನದಾನಿ ಅವೆನ್ ತೂನಗ ಗಣೇಶನ ಆಕಾರದ ವಜ್ರ ಒಂಜಿ ತೋಜಿಂಡ್.

ಗುಜರಾತ್‌ ದ ಉದ್ಯಮಿ ಒರಿ ವಿಶ್ವದ ದುಬಾರಿ ವಜ್ರದ ಗಣೇಶ ವಿಗ್ರಹನ್ ತನ್ನ ಇಲ್ಲಲ್ ಪ್ರತಿಷ್ಠಾಪನೆ ಮಲ್ತೆರ್. 182.3 ಕ್ಯಾರೆಟ್ ವಜ್ರದ ಈ ಗಣಪತಿ ಮೂರ್ತಿದ ಬಿಲೆ ಬರೋಬ್ಬರಿ 600 ಕೋಟಿ ರೂಪಾಯಿ.

ವಿಶಿಷ್ಟ ರೀತಿದ ವಜ್ರ ಆಯಿನ ಕಾರಣ ಉಂದು ಲಂಡನ್‌ ವರ್ಲ್ಡ್ ಬುಕ್ ಆಫ್ ರೆಕಾರ್ಡ್ಸ್‌ಡ್ ವರದಿ ಆತ್ಂಡ್. ಉಂದು ಕೊಹಿನೂರ್ ವಜ್ರರ್ದ್ ಮಲ್ಲ ಉಂಡು ಪಂದ್ ಉದ್ಯಮಿ ಕನುಭಾಯಿ ರಾಮ್‌ಜಿಭಾಯಿ ಪಂತೆರ್. ಪ್ರತಿವರ್ಷ ಗಣೇಶ ಪರ್ಬದ ಪೊರ್ತುಗು ಈ ಮೂರ್ತಿಗ್ ವಿಶೇಷ ಪೂಜೆ ಮಲ್ತ್ ದ್ ಮೂರ್ತಿದ ಮಿತ್ತ್ ಸುದೆತ ನೀರ್ ನ್ ಪಾಡುವೆರ್.

ಸೆ.30: ದಿಲ್ಲಿಡ್ ಯಕ್ಷ ಧ್ರುವ ಪಟ್ಲ ಸಂಭ್ರಮ

ದಿಲ್ಲಿ: ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದಿಲ್ಲಿ ಘಟಕ ಬೊಕ್ಕ ನಿನಾದ ಸಾಂಸ್ಕೃತಿಕ ಕೇಂದ್ರ ತಂಟೆಪ್ಪಾಡಿ ಬೆಳ್ಳಾರೆ ನೆತ್ತ ಮುತಾಲಿಕೆಡ್ ಯಕ್ಷ ಧ್ರುವ ಪಟ್ಲ ಸಂಭ್ರಮ 2023 ಲೇಸ್ ಸೆ.30 ಮದ್ಯಾಹ್ನ 3.30 ರ್ದ್ ರಾತ್ರೆ 9 ಗಂಟೆ ಮುಟ ಡೆಲ್ಲಿದ ಕರ್ನಾಟಕ ಸಂಘದ ಚಾವಡಿಡ್ ನಡಪರೆ ಉಂಡು.

ಲೇಸ್ ದ ಗುರ್ಕಾರ್ಮೆನ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ಪ್ರಧಾನ ಸಂಚಾಲಕೆರ್, ಖ್ಯಾತ ಉದ್ಯಮಿ ಶಶಿಧರ್ ಶೆಟ್ಟಿ ಬರೋಡ ಮೇರ್ ವಹಿಸೋನಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಚಲನಚಿತ್ರ ನಟೆ ದಯಾನಂದ ಶೆಟ್ಟಿ, ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಗುರ್ಕಾರೆರ್ ಪಟ್ಲ ಸತೀಶ್ ಶೆಟ್ಟಿ, ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ಡೆಲ್ಲಿ ಘಟಕದ ಗೌರವ ಗುರ್ಕಾರೆರ್ ಟಿ. ಶಿವಪ್ರಸಾದ್ ಶೆಟ್ಟಿ, ಡೆಲ್ಲಿ ಕರ್ನಾಟಕ ಸಂಘದ ಗುರ್ಕಾರೆರ್ ಸಿ.ಎಂ ನಾಗರಾಜ, ಡೆಲ್ಲಿ ಕರ್ನಾಟಕ ಸಂಘದ ಪ್ರಧಾನ ಕಾರ್ಯದರ್ಶಿ ಆರ್. ರೇಣುಕುಮಾರ್ ಪಾಲ್ ಪಡೆಯೆರೆ ಉಲ್ಲೆರ್.

ಹಿರಿಯ ಯಕ್ಷಗಾನ ಕಲಾವಿದೆರ್ ಅರುವ ಕೊರಗಪ್ಪ ಶೆಟ್ಟಿ, ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರ್, ಖ್ಯಾತ ಉದ್ಯಮಿ ಜಯರಾಮ ಬನಾನ್, ಡೆಲ್ಲಿ ಕನ್ನಡ ಶಾಲೆದ ದೈಹಿಕ ಶಿಕ್ಷಣ ಶಿಕ್ಷಕಿ ಡೇರೆಲ್ ಜೆಸ್ಸಿಕಾ ಫೆರ್ನಾಂಡಿಸ್ ಮೊಕ್ಲೆಗ್ ಈ ಪೊರ್ತುಡು ಮಾನಾದಿಗೆ ನಡಪರೆ ಉಂಡು.

ಅಂಚನೆ ಯಕ್ಷ ಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ಕುಡ್ಲ ಮೊಕ್ಲೆರ್ದ್ “ಮಾಯಾ ಮೋಹಿನಿ, ವೀರ ಭಾರ್ಗವ ಯಕ್ಷಗಾನ ನಡಪರೆ ಉಂಡು. ಬೊಕ್ಕ ನಿನಾದ ಸಾಂಸ್ಕೃತಿಕ ಕೇಂದ್ರ ತಂಟೆಪ್ಪಾಡಿ ಬೆಳ್ಳಾರೆ ಮೊಕ್ಲೆರ್ದ್ “ಪಜ್ಜೆ-ಗೆಜ್ಜೆ” ತುಳು ಕನ್ನಡ ಜಾನಪದ ಬೊಕ್ಕ ಶಾಸ್ತ್ರೀಯ ನೃತ್ಯ ಕಾರ್ಯಕ್ರಮ ನಡಪರೆ ಉಂಡು.