ತುಳು ಸುದ್ದಿ

“ಸಜ್ಜನ ” ಲೇಸ್ ದ ಸಂಯೋಜಕೆರಾದ್ ಹರ್ಷಿತ ಅಡೀಲು ನೇಮಕ

ಕುಡ್ಲ : ಸಾಹಿತಿಕ, ಸಾಂಸ್ಕೃತಿಕ, ಕ್ರೀಡೆ, ರಸಪ್ರಶ್ನೆ ಇಂಚ ಬೇತೆ ಬೇತೆ ಕ್ಷೇತ್ರಡ್ ಬೇಲೆ ಮಲ್ತೊಂದು ಉಪ್ಪುನ ಸಜ್ಜನ ಪ್ರತಿಷ್ಠಾನ ಬೀಜದಕಟ್ಟೆ ನೆತ್ತ “ಕಾರ್ಯಕ್ರಮ ಸಂಯೋಜಕೆರಾದ್ ” ಹರ್ಷಿತ ಆಡೀಲು ನೇಮಕ ಆತೆರ್ .

ಹರ್ಷಿತಾ ಮೇರ್ ಮೂಲತಃ ಪುತ್ತೂರುದಾರ್ ಆದುಲ್ಲೆರ್ , ಕರಿನ 12 ವರ್ಷರ್ದ್ ಬೆಂಗ್ಳೂರುದ ಬೇತೆ ಬೇತೆ ಸಂಸ್ಥೆಡ್ ಕಾರ್ಯಕ್ರಮ ಸಂಯೋಜಕೆರಾದ್ , ಪ್ರೋಗ್ರಾಮ್ ಆಫೀಸರ್ ಆದ್ ಪ್ರೋಗ್ರಾಮ್ ಮ್ಯಾನೇಜರ್ ಆದ್ ಬೇಲೆ ಮಲ್ದೆರ್.

ಹರ್ಷಿತ ಮೆರ್ನ ನೇಮಕ ಜುಲೈ 20, 2021 ಕ್ಕ್ ಜಾರಿಗ್ ಬರ್ಪುಲಕ ಮಲ್ದೆರ್ ಪಂದ್ ಸಜ್ಜನ ಪ್ರತಿಷ್ಠಾನ ಬೀಜದಕಟ್ಟೆ ನೆತ್ತ ಆಡಳಿತ ಮಂಡಳಿ ಪ್ರಕಟನೆಡ್ ತೆರಿಪಾದುಂಡು .

ತಕ್ಕ ಮಟ್ಟ್ ಗ್ ಹುಷಾರಾವೊಂದು ಉಪ್ಪುನ ಆಸ್ಕರ್ ಫೆರ್ನಾಂಡಿಸ್ : ಡಾ. ಮಹಮ್ಮದ್ ತಾಹಿರ್

ಕುಡ್ಲ,: ಪೇಂಟೆದ ಯೆನೆಪೊಯ ಆಸ್ಪತ್ರೆದ ತೀವ್ರ ನಿಗಾ ಘಟಕಡ್ ಕರಿನ ಐನ್ ದಿನರ್ದ್ ಚಿಕಿತ್ಸೆ ಪಡೆಯೊಂದು ಉಪ್ಪುನ ಪೆರಿಯ ಕಾಂಗ್ರೆಸಿಗ, ರಾಜ್ಯಸಭಾ ಸದಸ್ಯ ಆಸ್ಕರ್ ಫೆರ್ನಾಂಡಿಸ್ ಮೆರ್ನ ಆರೋಗ್ಯ ಸ್ಥಿತಿ ಗಂಭೀರ ಆಂಡಲಾ ಸ್ಥಿರವಾದುಂಡು ಪಂದ್ ಯೆನೆಪೊಯ ಆಸ್ಪತ್ರೆದ ವೈದ್ಯಕೀಯ ನಿರ್ದೇಶಕ ಡಾ.ಮುಹಮ್ಮದ್ ತಾಹಿರ್ ಪಂಡೆರ್ .

ಆಸ್ಕರ್ ಮೇರ್ ದಿನನಿತ್ಯದ ವ್ಯಾಯಾಮ ಮಲ್ಪುನ ಪೊರ್ತುಡು ತರೆಕ್ ಎಲ್ಯ ಗಾಯ ಆಯಿಬೊಕ್ಕ ‘ಇಂಟ್ರಾಕ್ರೇನಿಯಲ್’ ರಕ್ತಸ್ರಾವ ಆದ್ ಇತ್ತುಂಡು. ಅರೆಗ್ ದುಂಬೇ ಇತ್ತಿನ ಹೃದಯ ಬೊಕ್ಕ ಮೂತ್ರಪಿಂಡದ ಸಮಸ್ಯೆರ್ದ್ ಆರ್ನ ಆರೋಗ್ಯ ಸ್ಥಿತಿ ಜಟಿಲವಾದ್ ಇತ್ತುಂಡು . ನೆಕ್ಕ್ ಚಿಕಿತ್ಸೆ ಪಡೆಯೊಂದು ಇತ್ತೆರ್ .

ನಂದಿನಿ ಉತ್ಪನ್ನಡ್ ತುಳು ಲಿಪಿ ಪಾಡರೆ ಬಿನ್ನಾಪು ಮಲ್ತಿನ ವೇದವ್ಯಾಸ್ ಕಾಮತ್

ಕುಡ್ಲ : ದಕ್ಷಿಣ ಕನ್ನಡ ಜಿಲ್ಲೆಡ್ ಕೆ.ಎಂ.ಎಫ್ ಸಂಸ್ಥೆರ್ದ್ ಪೋಪಿನoಚಿನ ಉತ್ಪನ್ನದ ಮಿತ್ತ್ ತುಳು ಲಿಪಿತ ವರ್ಣಮಾಲೆ ಮುದ್ರಣ ಮಲ್ತ್ ಪಟ್ಟರೆ ಶಾಸಕ ವೇದವ್ಯಾಸ್ ಕಾಮತ್ ದಕ್ಷಿಣ ಕನ್ನಡ ಹಾಲು ಉತ್ಪಾದಕ ಸಂಸ್ಥೆದ ಗುರ್ಕಾರ್ಲೆಗ್ ಬೊಕ್ಕ ವ್ಯವಸ್ಥಾಪನಾ ನಿರ್ದೇಶಕೆರೆಗ್ ಪತ್ರ ಬರೆತೆರ್ .

ಈ ವಿಚಾರವಾದ್ ಪಾತೆರಿನ ಶಾಸಕ ಕಾಮತ್, ದಕ್ಷಿಣ ಕನ್ನಡ, ಉಡುಪಿ ಬೊಕ್ಕ ಕಾಸರಗೋಡು ಜಿಲ್ಲೆಡ್ ಪಾತೆರುನoಚಿನ ತುಳುಭಾಷೆಗ್ ಐತಿಹಾಸಿಕ ಹಿನ್ನೆಲೆ ಉಂಡು . ಅವ್ವೆತೋ ಶಾಸನಡ್ ತುಳುಲಿಪಿ ತೊಜಿದ್ ಬೈದುಂಡು ಭಾಷೆದ ಉಳಿವು ಅವೆನ್ ಗಲಸ್ಯಡ ಮಾತ್ರ ಆಯೆರೆ ಸಾಧ್ಯ . ಆ ನೆಲೆಟ್ಟ್ ಕೆ.ಎಂ.ಎಫ್ ಸಂಸ್ಥೆದ ಉತ್ಪನ್ನದ ಮಿತ್ತ್ ತುಳುಲಿಪಿತ ವರ್ಣಮಾಲೆದ ಬಳಕೆಗ್ ಪತ್ರ ಬರೆತೆ ಪಂದ್ ಪಂಡೆರ್.

ಆಗಸ್ಟ್ 10 ತಾರೀಖ್ ದ ಉಲಯಿ ಎಸ್ಸೆಸ್ಸೆಲ್ಸಿ ಫಲಿತಾಂಶ- ಸಚಿವ ಸುರೇಶ್ ಕುಮಾರ್

ಬೆಂಗ್ಳೂರು: ಈ ಸಲ ಪತ್ತನೇ ತರಗತಿ ಪರೀಕ್ಷೆ ಆಯಿನೆರ್ದಾವರ, ಆಗಸ್ಟ್ 10ರ ಉಲಯಿ ಫಲಿತಾಂಶ ಪ್ರಕಟ ಮಲ್ಪುವ ಪಂದ್ ಶಿಕ್ಷಣ ಸಚಿವ ಎಸ್.ಸುರೇಶ್ ಕುಮಾರ್ ಪಂಡೆರ್ .

ಬೆಂಗ್ಳೂರುಡು ಪಾತೆರಿನ ಮೇರ್ , ರಡ್ಡ್ ದಿನ ನಡತಿನ ಪರೀಕ್ಷೆಲು ಯಶಸ್ವಿಯಾದ್ ನಡತುಂಡ್ , ಪರೀಕ್ಷೆ ಬರೆಯಿನ ಜೋಕ್ಲೆಗ್ ಸೊಲ್ಮೆ ಸಂದೈತ ಮಲ್ಪುವ ಪಂದ್ ಪಂಡೆರ್ .