ಬೊಲ್ತೆರ್ ಸುದ್ದಿ | Belthangady News

ಶ್ರೀ ಕ್ಷೇತ್ರ ಧರ್ಮಸ್ಥಳಡ್ ಕಾಲಾವಧಿ ಜಾತ್ರೆ ಸುರು

ಉಜಿರೆ: ಧರ್ಮಸ್ಥಳ ಶ್ರೀ ಮಂಜುನಾಥ ಸ್ವಾಮಿ ದೇವಸ್ಥಾನಡ್ ಏ.13- ರಿಂದ 23 ಮುಟ್ಟ ಕಾಲಾವಧಿ ಜಾತ್ರೆ ನಡಪರೆ ಉಂಡು.
ಈ ಹಿನ್ನೆಲೆಡ್ ಸಂಪ್ರದಾಯ ಪ್ರಕಾರ ಏ.13ಕ್ಕ್ ಮಾಯಿ ನಡಾವಳಿ ನಿಮಿತ್ತ ಅಂಚೆನೆ ಏ.15 ಬುಧವಾರ ಜಾತ್ರೆ ಪ್ರಯುಕ್ತ ಪಡಿ ಬಿತ್ತ್ ಪಟ್ಟುನ ಕಜ್ಜ ನಡತ್ಂಡ್. ಅಯಿರ್ದ್ ಬೊಕ್ಕ ಮಾಯಿ ನಡಾವಳಿ ನಡತ್ಂಡ್.
ಕಾಲಾವಧಿ ಜಾತ್ರೆ ಪ್ರಯುಕ್ತ ಏ.19 ಐತಾರ ಕೆರೆಕಟ್ಟೆ ಉತ್ಸವ ನಡತ್ಂಡ್. ಏ.20 ಸೋಮವಾರ ರಾತ್ರೆ ಗೌರಿಮಾರು ಕಟ್ಟೆ ಉತ್ಸವ, ಏ.21 ಅಂಗಾರೆ ರಾತ್ರೆ ಬ್ರಹ್ಮರಥೋತ್ಸವ ನಡಪರೆ ಉಂಡು.ಏ.22 ಬುಧವಾರ ರಾತ್ರಿ ಕೊಡಿ ಜಾದ್ ಕಾಲಾವಧಿ ಜಾತ್ರೆ ಮುಗಿವುಂಡು.

ಲಲಿತೋದ್ಯಾನ ಉತ್ಸವ
ಧರ್ಮಸ್ಥಳಡ್ ನಡಪುನ ಕಾಲಾವಧಿ ಜಾತ್ರೆದ ಅಂಗವಾದ್ ಶನಿವಾರ ರಾತ್ರಿ ಶ್ರೀ ಮಂಜುನಾಥ ಸ್ವಾಮಿನ ಲಲಿತೋದ್ಯಾನ ಉತ್ಸವದ ಸಂದರ್ಭ ಬೊಳ್ಳಿರಥ ಉತ್ಸವ ನಡತ್ಂಡ್.

ಬೇತೆ ಬೇತೆ ಕಡೆ ರ್ದ್ ಬೈದಿನ ಭಕ್ತೆರ್ ಬೊಳ್ಳಿರಥ ಉತ್ಸವ ತೂದು ಧನ್ಯರಾಯೆರ್.

*ಶ್ರೀ ಕ್ಷೇತ್ರ ಧರ್ಮಸ್ಥಳಗ್ ಬತ್ತ್ಂಡ್ “ಶ್ರೀ ಸತ್ಯಸಾಯಿ ಪ್ರೇಮ ಪ್ರವಾಹಿನಿ” ತೇರ್

ಭಗವಾನ್ ಶ್ರೀ ಸತ್ಯಸಾಯಿಬಾಬಾ ಜನ್ಮದಿನದ 100ನೇ ವರ್ಷ ಸಂಭ್ರಮಾಚರಣೆ

ಧರ್ಮಸ್ಥಳ: ಭಗವಾನ್ ಸತ್ಯಸಾಯಿ ಬಾಬಾ ಮೆರೆನ ಜನ್ಮ ಶತಮಾನೋತ್ಸವದ ಅಂಗವಾದ್ ದೇಶದಾದ್ಯಂತ ಸಂಚಾರ ಮಲ್ಪುನ “ಶ್ರೀ ಸತ್ಯಸಾಯಿ ಪ್ರೇಮ ಪ್ರವಾಹಿನಿ ತೇರ್” ಶ್ರೀ ಕ್ಷೇತ್ರ ಧರ್ಮಸ್ಥಳಗ್ ಬೈದ್ಂಡ್.
ಈ ರಥಯಾತ್ರೆ ಭಗವಾನ್ ಶ್ರೀ ಸತ್ಯಸಾಯಿಬಾಬಾ ಮೆರೆನ ಪ್ರೀತಿ, ಸೇವೆ, ಸತ್ಯ, ಧರ್ಮ, ಶಾಂತಿ ಬೊಕ್ಕ ಅಹಿಂಸೆದ ಸಂದೇಶನ್ ಸಮಾಜದ ಮಾತ ವರ್ಗದ ಜನಕ್ಲೆಗ್ ಮುಟ್ಟಾವುನ ಉದ್ದೇಶಡ್ ಅಟ್ಟಣೆ ಮಲ್ದೆರ್.
ದೇಶದ ಬೇತೆ ಬೇತೆ ಜಾಗೆಡ್ ಸಂಚಾರ ಮಲ್ಪುನ ಈ ತೇರ್, ಧರ್ಮಸ್ಥಳಗ್ ಬತ್ತಿನ ಪೊರ್ತುಡು ಭಕ್ತೆರ್ ಭಕ್ತಿಭಾವಡ್ ಸ್ವಾಗತ ಮಲ್ತೆರ್.
ಈ ಸಂದರ್ಭಡ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆರ್ ಪ್ರೇಮ ಪ್ರವಾಹಿನಿ ತೇರ್‌ನ್ ಎದ್ಕೊಂದು, ಭಗವಾನ್ ಸತ್ಯಸಾಯಿ ಬಾಬಾನ ಆದರ್ಶ ಮಾನವೀಯ ಮೌಲ್ಯನ್ ಎಚ್ಚ ಮಲ್ಪುನೆಟ್ಟ್ ಮಲ್ಲ ಬೇಲೆ ಮಲ್ದ್ಂಡ್. ಈ ಸಮಾಜಡ್ ಸೇವಾ ಮನೋಭಾವ, ಪ್ರೀತಿ ಬೊಕ್ಕ ಸಹಾನುಭೂತಿದ ಮೌಲ್ಯನ್ ಗಟ್ಟಿ ಮಲ್ಪುನೆಟ್ಟ್ ಸತ್ಯಸಾಯಿ ಚಳವಳಿ ಮಲ್ಲ ಕೊಡುಗೆ ಕೊರ್ತುಂಡು ಪಂದ್ ಪಂಡೆರ್ .
ರಥದೊಂದಿಗೆ ಭಗವಾನ್ ಸತ್ಯಸಾಯಿಬಾಬಾರ ಜೀವನ ಬೊಕ್ಕ ಸಂದೇಶನ್ ಪರಿಚಯ ಮಲ್ಪುನ ಪ್ರದರ್ಶನ, ಭಕ್ತಿಗೀತೆ ಬೊಕ್ಕ ಆಧ್ಯಾತ್ಮಿಕ ಕಾರ್ಯಕ್ರಮ ನಡತ್ಂಡ್. ಭಕ್ತೆರ್ ಹೆಚ್ಚಿನ ಸಂಖ್ಯೆಡ್ ಪಾಲ್ ಪಡೆಯೆರ್.
ಭಗವಾನ್ ಶ್ರೀ ಸತ್ಯಸಾಯಿ ಬಾಬಾ ಮೆರೆನ ಜನ್ಮದಿನದ ಶತವರ್ಷ ಸಂಭ್ರಮಾಚರಣೆದ ಅಂಗವಾದ್ ಪ್ರೇಮ ಪ್ರವಾಹಿನಿ ರಥಯಾತ್ರೆ ದೇಶದ ಬೇತೆ ಬೇತೆ ತೀರ್ಥಕ್ಷೇತ್ರ ಬೊಕ್ಕ ಪೇಂಟೆಲೆಡ್ ತಿರ್ಗ್‌ದ್ ಜನಕ್ಲೆಡ ಮಾನವೀಯ ಮೌಲ್ಯದ ಪೊಲಬು ಪುಟ್ಟಾವುನ ಬೇಲೆ ಮಲ್ತೊಂದುಂಡು.
ಕರ್ನಾಟಕ ರಾಜ್ಯದ ಶ್ರೀ ಸತ್ಯಸಾಯಿ ಸೇವಾ ಸಂಸ್ಥೆದ ಅಧ್ಯಕ್ಷೆರ್ ಪದ್ಮನಾಭನ್ ಪೈ, ಹೆಗ್ಗಡೆರ್‌ನ ಆಪ್ತ ಕಾರ್ಯದರ್ಶಿ ಎ.ವಿ. ಶೆಟ್ಟಿ, ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಬಿ.ಸಿ. ಟ್ರಸ್ಟ್‌ ‌ದ ಕಾರ್ಯನಿರ್ವಾಹಕ ನಿರ್ದೇಶಕೆರ್ ಅನಿಲ್ ಕುಮಾರ್, ಯೋಜನೆದ ಟ್ರಸ್ಟಿ ಡಾ. ಹರೀಶ್ ಕೃಷ್ಣಸ್ವಾಮಿ, ದೇವಲ್ಯದ ಪಾರುಪತ್ಯಗಾರೆರಾಯಿನ ಲಕ್ಷ್ಮೀನಾರಾಯಣ ರಾವ್, ರಾಜೇಂದ್ರ ದಾಸ್ ಮೊಕುಲು ಮಾತ ಇತ್ತೆರ್.

ಧರ್ಮಸ್ಥಳಡ್ ಶಿವರಾತ್ರೆ ವೈಭವ : ರಾತ್ರೆ ಪುಲ್ಯ ಮುಟ್ಟ ಶಿವಪಂಚಾಕ್ಷರಿ ಪಠಣ

ಭಕ್ತೆರೆಗ್ ಸುಖ-ಶಾಂತಿ, ನೆಮ್ಮದಿ, ಸನ್ಮಂಗಳ ಆವಡ್ : ಡಿ. ವೀರೇಂದ್ರ ಹೆಗ್ಗಡೆರ್

ಉಜಿರೆ: “ಸರ್ವೇ ಜನಾಃ ಸುಖಿನೋ ಭವಂತು”. ಮಾತೆರೆಗ್ಲ ಸುಖ-ಶಾಂತಿ, ನೆಮ್ಮದಿ ತಿಕ್‌ದ್ ಸನ್ಮಂಗಳ ಆವಡ್ ಪಂದ್ ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆರ್ ಹಾರೈಕೆ ಮಲ್ತೆರ್.
ಆರ್ ಐತಾರದಾನಿ ಧರ್ಮಸ್ಥಳದ ಪ್ರವಚನ ಮಂಟಪಡ್ ತುಡರ್ ಅರ್ಲಾದ್ “ಅಹೋರಾತ್ರಿ ಶಿವಪಂಚಾಕ್ಷರಿ ಪಠಣಗ್ ಚಾಲನೆ ಕೊರ್ದು ಶುಭ ಹಾರೈಕೆ ಮಲ್ತೆರ್.
ಬೊಕ್ಕ ಮಾತೆರ್ಲ ಸೇರ್ದ್ “ಓಂ ನಮಃ ಶಿವಾಯ”ಪಠಣ ಮಲ್ತೆರ್.
ಮಾತೆರ್ಲ ಶ್ರದ್ಧಾ-ಭಕ್ತಿಡ್ ಪಾದಯಾತ್ರೆಡ್ ಧರ್ಮಸ್ಥಳಗ್ ಬತ್ತ್‌ದ್ ದೇವೆರ್ನ ದರ್ಶನ ಮಲ್ತ್‌ದ್ ಪ್ರಾರ್ಥನೆ ಮಲ್ತ್‌ದ್ ಧನ್ಯರಾತರ್. ನಿಕ್ಲೆನ ಮಾತಾ ಕಷ್ಟಲೆನ್ ಶಿವಗ್ ಅರ್ಪಣೆ ಮಲ್ತ್‌ದ್ ಎಡ್ಡೆ ವಿಚಾರಲೆನ್ ಮಾತ್ರ ಪತೊನ್ಲೆ. ವಿಷಕಂಠೆ ಶಿವಗ್ ಮಾತ್ರ ವಿಷನ್ ಸ್ವೀಕಾರ ಮಲ್ಪುನ ಸಾಮರ್ಥ್ಯ ಉಪ್ಪುನು. ಎಂಕ್ ಪಂದ್ ಎನ್ನ ವೈಯಕ್ತಿಕ ಸುಖಕ್ಕಾದ್ ಪ್ರಾರ್ಥನೆ ಮಲ್ಪುನ ಬದಲ್ ನಮಕ್ಕ್, ಇಡಿ ಸಮಾಜಗ್ ಎಡ್ಡೆ ಆವಡ್ ಪನ್ಪಿನ ಪ್ರಾರ್ಥನೆ ನಿಕುಲು ಮಲ್ಪೊಡು ಪಂದ್ ಶುಭ ಹಾರೈಕೆ ಮಲ್ತೆರ್.
ಬೆಂಗಳೂರುರ್ದು ಪಾದಯಾತ್ರೆದ ರೂವಾರಿ ಗುರು ಹನುಮಂತಪ್ಪ ಬೊಕ್ಕ ಮರಿಯಪ್ಪ ಮೊಕ್ಲೆನ ಮುತಾಲಿಕೆಡ್ ಏಳ್ ಜನತ್ತ ಒಟ್ಟಿಗೆ ಸುರುವಾತಿನ ಪಾದಯಾತ್ರೆಡ್ 70 ಸಾರ ಭಕ್ತೆರ್ ಬೆಂಗಳೂರು ಬೊಕ್ಕ ಬೇತೆ ಬೇತೆ ಕಡೆ ರ್ದ್ ಶನಿವಾರ ಧರ್ಮಸ್ಥಳಗ್ ಬತ್ತಿತ್ತೆರ್. ಮಾತೆರೆಗ್ಲ ಶ್ರೀ ಮಂಜುನಾಥ ಸ್ವಾಮಿನ ದರ್ಶನ, ಸೇವೆದ ಫಲ ತಿಕ್ಕಡ್ ಪಂದ್ ಪಂಡೆರ್.
ಹೇಮಾವತಿ ವೀ. ಹೆಗ್ಗಡೆ, ಡಿ. ಸುರೇಂದ್ರಕುಮಾರ್, ಸುಪ್ರಿಯಾ ಹರ್ಷೇಂದ್ರಕುಮಾರ್ ಶಿವಪಂಚಾಕ್ಷರಿ ಪಠಣಡ್ ಪಾಲ್ ಪಡೆಯೆರ್.
ಮಾಣಿಲದ ಮೋಹನದಾಸ ಸ್ವಾಮೀಜಿ, ಪಾದಯಾತ್ರೆದ ರೂವಾರಿ ಗುರು ಹನುಮಂತಪ್ಪ ಸ್ವಾಮೀಜಿ ಬೊಕ್ಕ ಮರಿಯಪ್ಪ ಮೊಕುಲು ಇತ್ತೆರ್ .
ಶ್ರೀನಿವಾಸ ರಾವ್ ಧರ್ಮಸ್ಥಳ ಕಾರ್ಯಕ್ರಮ ನಿರ್ವಹಣೆ ಮಲ್ತೆರ್. ಅಹೋರಾತ್ರಿ ಶಿವಪಂಚಾಕ್ಷರಿ ಪಠಣ ನಡತ್ಂಡ್. ಭಕ್ತೆರ್ ದೇವೆರ್ನ ದರ್ಶನ ಮಲ್ತ್‌ದ್ ವಿಶೇಷವಾದ್ ಬೊಂಡಾಭಿಷೇಕ ಬೊಕ್ಕ ಶತರುದ್ರಾಭಿಷೇಕ ಸೇವೆ ಸಂದಾಯೆರ್.

ದೇವಲ್ಯದ ಪಾರುಪತ್ಯಗಾರೆರಾಯಿನ ಲಕ್ಷ್ಮಿ ನಾರಾಯಣ ರಾವ್, ಹೆಗ್ಗಡೆರ್ನ ಆಪ್ತ ಕಾರ್ಯದರ್ಶಿ ಎ.ವಿ. ಶೆಟ್ಟಿ ಪಾಲ್ ಪಡೆದಿತ್ತೆರ್. ಬೆಂಗಳೂರುದ ಭಕ್ತೆರ್ 1,75,000 ಜನಕ್ಕ್ ಉಚಿತವಾದ್ ಅನ್ನ ಸಂತರ್ಪಣೆ ಮಲ್ತೆರ್.