ಪುತ್ತೂರ್ದ ಸುದ್ದಿ | Puttur News

ಅ.20: ವಿಟ್ಲ ಶ್ರೀ ಭಗವತೀ ಸನ್ನಿಧಿಡ್ ‘ಶ್ರೀ ದುರ್ಗಾ ಪೂಜೆ

ವಿಟ್ಲ : ಶ್ರೀ ಭಗವತೀ ಸನ್ನಿಧಿಡ್ ನವರಾತ್ರಿ ವಿಶೇಷ ಪೂಜೆ ಅ.15 ರ್ದ್ ಅ.23 ಮುಟ್ಟ ನಡಪೆರೆ ಉಂಡು. ಅ.20 ದಾನಿ ರಾತ್ರೆ ದುರ್ಗಾಪೂಜೆ ನಡಪೆರೆ ಉಂಡು. ಈ ಪುಣ್ಯ ಕಾರ್ಯಡ್‌ ಮಾತ ಭಕ್ತೆರ್‌ ಎಚ್ಚಿನ ಸಂಖ್ಯೆಡ್‌ ಪಾಲ್‌ ಪಡೆದ್‌ ದೇವೆರ್ನ ಗಂಧ ಪ್ರಸಾದನ್‌ ಸ್ವೀಕಾರ ಮಲ್ತ್‌, ಶ್ರೀ ದೇವಿನ ಅನುಗ್ರಹಗ್‌ ಪಾತ್ರರಾವೊಡು ಪಂದ್‌ ಆಡಳಿತ ಮಂಡಳಿದಕುಲ್‌ ಲೆಪ್ಪೋಲೆಡ್‌ ತೆರಿಪಾದೆರ್.

ಕಣಿಯೂರು ಶ್ರೀ ಚಾಮುಂಡೇಶ್ವರೀ ದೇವಿ ಕ್ಷೇತ್ರಡ್‌ ಯಕ್ಷಗಾನ ತಾಳಮದ್ದಳೆ

ನವರಾತ್ರಿ ಉಚ್ಚಯದ ಅಂಗವಾದ್ ಶ್ರೀ ಚಾಮುಂಡೇಶ್ವರೀ ಯಕ್ಷ ಕೂಟ ಕಣಿಯೂರು ಮೊಕ್ಲೆರ್ದ್‌ ಕೋಟಿ ಚೆನ್ನಯ ಯಕ್ಷಗಾನ ತಾಳಮದ್ದಳೆ ಪ್ರಸಂಗ ಅ.17 ದಾನಿ ನಡತ್‌ಂಡ್.
ಈ ಪೊರ್ತುಡ್ ಸುಮಾರ್ 60 ವರ್ಷರ್ದ್ ಯಕ್ಷಗಾನ ಕ್ಷೇತ್ರಡ್ ತನ್ನ ಸೇವೆನ್‌ ಸಲ್ಲಿಸಾವೊಂದು ಇಪ್ಪುನ ಹಿರಿಯ ಕಲಾವಿದೆರಾಯಿನ ಕೊಳ್ತಿಗೆ ನಾರಾಯಣ ಗೌಡೆರೆನ್ ಶ್ರೀ ಶ್ರೀ ಮಹಾಬಲೇಶ್ವರ ಸ್ವಾಮೀಜಿ “ತುಳು ಯಕ್ಷ ರಂಗೊದ ಬೀರೆ” ಪನ್ಪುನ ಬಿರುದು ಕೊರ್ದ್‌ ಮಾನಾದಿಗೆ ಮಲ್ತೆರ್. ಕಣಿಪುರ ಯಕ್ಷಗಾನ ಸಂಸ್ಕೃತಿ ಮಾಸ ಪತ್ರಿಕೆದ ಪ್ರಧಾನ ಸಂಪಾದಕೆರ್ ಎಂ. ನಾರಾಯಣ ಚಂಬಲ್ತಿಮಾರ್, ಭಾಗವತೆರ್ ಸೂರ್ಯನಾರಾಯಣ ಭಟ್ ಕಣಿಯೂರು, ಟ್ರಸ್ಟ್‌ದ ಕಾರ್ಯದರ್ಶಿ ಚಂದ್ರಶೇಖರ ಕಣಿಯೂರು ಈ ಪೊರ್ತುಡ್‌ ಇತ್ತೆರ್.‌

ಜಾನ್ವಿ ಕೆ.ಪಿ ಕೊಡಿಪ್ಪಾಡಿ ಇಂಡಿಯನ್‌ ಬುಕ್‌ ಆಫ್‌ ರೆಕಾರ್ಡ್ಸ್‌ ಸೇರ್ಪಡೆ

ಪುತ್ತೂರು: ರಾಸಾಯನಿಕ ಧಾತು(Chemical element)ದ 25 ಸಂಕೇತನ್‌ 27 ಸೆಕೆಂಡ್‌ಡ್‌ ಪನ್ಪುನ ಮುಖೇನ ಜಾನ್ವಿ ಕೆ.ಪಿ ಇಂಡಿಯನ್‌ ಬುಕ್‌ ಆಫ್‌ ರೆಕಾರ್ಡ್ಸ್‌ಗ್‌ ಸೇರ್ಪಡೆ ಆದ್‌ ಸಾಧನೆ ಮಲ್ತ್‌ದೆರ್.‌ ಪದ್ಮನಾಭ ಕೋಂಟ್ರುಪ್ಪಾಡಿ ಬೊಕ್ಕ ಶುಭವತಿ ಕೆ ದಂಪತಿಲೆನ ಮಗಲ್‌ ಆಯಿನ ಮೇರ್‌ ಪುತ್ತೂರು ಶ್ರೀ ಸತ್ಯಸಾಯಿ ಶಿಶುವಿಕಾಸ ವಿದ್ಯಾ ಕೇಂದ್ರದ ಯು.ಕೆ.ಜಿ ಕಲ್ಪಾರ್ಥಿ.

ಬಸ್‌ಡ್ ಕೋರಿದ ಮಾಸ ಕೊನೊಯಿನೆಕ್ಕ್ ಪೋಲೀಸ್ ಸ್ಟೇಷನ್‌ಗ್ ಬಸ್ ಕೊನೊಯಿನ ಸರಕಾರಿ ಬಸ್ ಡ್ರೈವರ್!

ಬಂಟ್ವಾಳ : ಬಸ್‌ಡ್ ಬತ್ತಿನಾಯೆ ಒರಿ ಚೀಲಡ್ ಕೋರಿದ ಮಾಸ ಪತೊಂದು ಬಸ್ ಬರ್ತಿನೆಕ್ಕ್ ಆಯಗ್ ಕಂಡಕ್ಟರ್ ಬಪ್ಪರ್ ನೆರಿನಿ ಮಾತ್ರ ಅತ್ತಂದೆ, ಡ್ರೈವರ್ ಬಸ್‌ನ್ ಸೀದಾ ಬಂಟ್ವಾಳ ಪೋಲೀಸ್ ಸ್ಟೇಷನ್‌ಗ್ ಕೊನೊತಿನ ಘಟನೆ ನಡತ್‌ದ್‌ಂಡ್. ಸುರೇಶ್ ಪನ್ಪಿನಾರ್ ತುಂಬೆಡ್ ಸ್ಟೇಟ್‌ಬ್ಯಾಂಕ್-ಪುತ್ತೂರುದ ಕೆಎಸ್ಸಾರ್ಟಿಸಿ ಬಸ್ ಬರ್ತ್‌ದೆರ್. ಬಸ್ ಕಂಡಕ್ಟರ್ ಟಿಕೆಟ್ ದೆತೊನರೆ ಬನ್ನಗ ಮೆರೆನ ಕೈಟ್ ಕೋರಿದ ಮಾಸದ ಚೀಲದ ಬಗೆಟ್ ಕೆಂಡೆರ್. ಅವ್ ಕೋರಿದ ಮಾಸ ಪನ್ದ್ ತೆರಿನೇ ಅರೆನ್ ಬಸ್‌ರ್ದ್ ತಿರ್ತ್ ಜಪ್ಪರೆ ಪನ್ತೆರ್.
ಕೋರಿದ ಮಾಸೊನು ಬಸ್‌ಟ್ ಕನವರೆ ಅವಕಾಶ ಇಜ್ಜಿ ಪನ್ಪಿನವು ಕಂಡಕ್ಟರ್‌ನ ವಾದ. ಆಂಡ ಕೂಲಿ ಬೇಲೆ ಮಲ್ಪುನ ಜನಕ್ ಉಂದು ತೆರಿಯಂದೆ ಬಸ್‌ರ್ದ್ ಜಪ್ಪರೆ ಒತ್ತೊನುಜೆರ್. ಮೊಕಲೆನ ನಡುಟು ಪಾತೆರೊಗು ಪಾತೆರ ಆದ್ ಕಂಡಕ್ಟರ್ ಬಪ್ಪರ್ ನೆರ್ತೆರ್ ಪನ್ದ್ ಸುರೇಶೆರ್ ಆರೋಪ ಮಲ್ದೆರ್. ಆರ್ ಬಸ್‌ರ್ದ್ ಜಪ್ಪಂದಿನ ತೂದು ಡ್ರೈವರ್ ಜನಕುಲೆಡ್ ದಿಂಜಿನ ಬಸ್‌ನ್ ಸೀದಾ ಬಂಟ್ವಾಳ ಪೋಲೀಸ್ ಸ್ಚೇಷನ್‌ಗ್ ಕನತ್ ಅರೆನ್ ಒಯ್ತ್ ಜಪುಡಾದೆರ್ಗೆ. ಈ ಪೊರ್ತುಡು ಎಸೈ ರಾಮಕೃಷ್ಣ ಮೇರ್ ಬಸ್‌ದ ಡ್ರೈವರ್ ಬೊಕ್ಕ ಕಂಡಕ್ಟರ್‌ಗ್ ಬುದ್ದಿ ಪನ್ತೆರ್ಗೆ. ಕೂಲಿ ಬೇಲೆ ಪೋಪಿನಕುಲು ಪಾಪದಕುಲು ಬಸ್‌ಟ್ ಕೋರಿ, ಮೀನ್ ಕೊನವಂದೆ ಬೊಕ್ಕ ಎಂಚ ಕೊನೊಪಿನಿ? ಒಂಜಿ ಕೆ.ಜಿ ಕೋರಿಗ್ ಕಾರ್, ರಿಕ್ಷಾ ಬಾಡಿಗೆ ಮಲ್ತ್ ಕೊನೊಡಾ ಪನ್ದ್ ಸುರೇಶೆರ್ ಕೇಂಡ್ ದೆರ್. ಬಸ್‌ಡ್ ಕೋರಿದ ಮಾಸ ಕನರೆ ಇಜ್ಜಿ. ಜೀವ ಇತ್ತಿನ ವಸ್ತುಲೆನ್ ಮಾತ್ರ ಕನೊಲಿ, ಮಾಸ ಪೂರ ಬಾಕಿದಕಲೆಗ್ ವಾಸನೆ ಬರ್ಪುಂಡು. ಉಂದೆರ್ದ್ ಬಾಕಿದಕಲೆಗ್ ಸಮಸ್ಯೆ ಆಪುಂಡು ಪನ್ಪಿನ ದಿಸೆಟ್ ಕರ್ನಾಟಕದ ಸರಕಾರಿ ಬಸ್ ನಿಗಮ ಆದೇಶ ಮಲ್ದ್ಂಡ್ ಪನ್ದ್ ಬಂಟ್ವಾಳ ವಿಭಾಗದ ಅಧಿಕಾರಿ ಶ್ರೀಶ ಭಟ್ ಪಂಡೆರ್.

ಕುಕ್ಕೆ ಕ್ಷೇತ್ರಗ್ ಕೃಷಿ ಸಚಿವೆರ್ ಚೆಲುವರಾಯ ಸ್ವಾಮಿ ಭೇಟಿ‌

ಸುಬ್ರಹ್ಮಣ್ಯ: ನಾಗಾರಾಧನೆದ ಪುಣ್ಯ ತಾಣ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಗ್‌ ಐತಾರ ಕೃಷಿ ಸಚಿವೆರ್‌ ಎನ್.ಚೆಲುವರಾಯ ಸ್ವಾಮಿ ಬೊಕ್ಕ ಮೇರ್ನ ಬುಡೆದಿ ಧನಲಕ್ಷ್ಮೀ ಭೇಟಿ ಕೊರಿಯೆರ್. ದೇವರ ದರ್ಶನ ಮಲ್ತ್‌ದ್‌, ದೇವಸ್ಥಾನದ ಪ್ರಧಾನ ಅರ್ಚಕೆರ್ ಸೀತಾರಾಮ ಎಡಪಡಿತ್ತಾಯ ಸಚಿವರಿಗೆ ಶಾಲ್‌ ಪಾರ್ದ್ ಪ್ರಸಾದ ಕೊರಿಯೆರ್.
ಈ ಪೊರ್ತುಡ್‌ ದೇವಸ್ಥಾನದ ಎಇಒ ರಾಜಣ್ಣ, ವ್ಯವಸ್ಥಾಪನಾ ಸಮಿತಿದ ಸದಸ್ಯೆರ್ ಶ್ರೀವತ್ಸ ಬೆಂಗಳೂರು, ಕಡಬ ಬ್ಲಾಕ್ ಕಾಂಗ್ರೆಸ್ ಗುರ್ಕಾರ್ಲು ಸುಧೀರ್ ಕುಮಾರ್ ಶೆಟ್ಟಿ, ನಿಕಟಪೂರ್ವ ತಾ.ಪಂ.‌ ಸದಸ್ಯೆರ್ ಅಶೋಕ್ ನೆಕ್ರಾಜೆ, ಸುಬ್ರಹ್ಮಣ್ಯ ಗ್ರಾಮ ಸಮಿತಿದ ಗುರ್ಕಾರ್ಲು ಹರೀಶ್ ಇಂಜಾಡಿ, ಕಾಂಗ್ರೆಸ್ ಯುವ ಮುಖಂಡೆರಾಯಿನ ಶೇಷಕುಮಾರ್ ಶೆಟ್ಟಿ, ಮನೋಜ್ ಕೈಕಂಬ, ದೇವಳದ ಅಧೀಕ್ಷಕೆರ್ ಪದ್ಮನಾಭ ಶೆಟ್ಟಿಗಾರ್, ಶಿಷ್ಠಾಚಾರ ವಿಭಾಗದ ಪ್ರಮೋದ್ ಕುಮಾರ್ ಎಸ್, ಹರೀಶ್, ನವೀನ್ ಬಟ್ರುಪ್ಪಾಡಿ ಇತ್ತೆರ್.

ಪುತ್ತೂರು : ರಾಜಕೀಯ ಮದತ್ ದ್ ಒಟ್ಟಾಯಿನ ನಾಯಕೆರ್

ಪುತ್ತೂರು : ದೇವಸ್ಥಾನದ ಕಾರ್ಯಕ್ರಮ ಒಂಜೆಟ್ಟ್ ರಾಜಕೀಯ ಮರತ್ತ್‌ದ್ ನಾಯಕೆರ್‌ ಮಾತಾ ಒಂಜಾದ್‌ ತೋಜಿದೆರ್. ಇತಿಹಾಸ ಪ್ರಸಿದ್ಧ ಪುತ್ತೂರು ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನ ವಠಾರಡ್ ಪುನರುತ್ಥಾನ ಕಾರ್ಯದ ಪೈಕಿ ಅನ್ನಛತ್ರ ನಿರ್ಮಾಣ, ಕಿರೆ ಪುನರುತ್ಥಾನ ನಿಧಿ ಸಂಚಯದ ಬಗ್ಗೆಟ್ ಅ.15 ದಾನಿ ನಡತ್ತ್‌ನ ಭಕ್ತರ ಮಹಾಸಭೆಟ್ ಶಾಸಕೆರ್ ಅಶೋಕ್ ಕುಮಾರ್ ರೈ, ಮಾಜಿ ಶಾಸಕೆರ್ ಸಂಜೀವ ಮಠಂದೂರು, ಪುತ್ತಿಲ ಪರಿವಾರದ ಅರುಣ್ ಕುಮಾರ್ ಪುತ್ತಿಲ, ಮುರಳಿಕೃಷ್ಣ ಹಸಂತಡ್ಕ ಜೊತೆಯಾದ್‌ ಇತ್ತೆರ್.
ಈ ಪೊರ್ತುಡು ಕಾಂಗ್ರೆಸ್ ನಾಯಕೆರ್ ಕೃಷ್ಣಪ್ರಸಾದ್ ಆಳ್ವ ಒಟ್ಟಿಗೆ ಇತ್ತೆರ್‌. ಸಭಾ ಕಾರ್ಯಕ್ರಮದ ಉದಿಪನನ್ ಶಾಸಕೆರ್ ಅಶೋಕ್ ಕುಮಾರ್ ರೈ ಮಲ್ತೆರ್. ಬೊಕ್ಕ ಮಾಜಿ ಶಾಸಕೆರ್ ಸಂಜೀವ ಮಠಂದೂರು, ಪಿ.ಜಿ.ಜಗನ್ನಿವಾಸ ರಾವ್ ಬೊಕ್ಕ ದೇವಸ್ಥಾನದ ವ್ಯವಸ್ಥಾಪನ ಸಮಿತಿದ ಗುರ್ಕಾರ್ಲು ಕೇಶವಪ್ರಸಾದ್ ಮುಳಿಯ ಇತ್ತೆರ್.‌ ಈ ಮಾತ ಬೆಳವಣಿಗೆದ ಮೂಲಕ ರಾಜಕೀಯ ದೇವಸ್ಥಾನದ ಪಿದಯಿ ಮಾತ್ರ ಉಲಾಯಿ ಅತ್ತ್‌ ಪಂದ್‌ ತೊಜಿಪಾದ್‌ ಕೊರಿಯೆರ್.‌ ಶಾಸಕೆರ್‌ ತನ್ನ ಭಾಷಣಡ್ ದೇವಸ್ಥಾನದ ಉಲಾಯಿ ಬನ್ನಗ ಚಪ್ಪಲ್‌ನ್‌ ಎಂಚ ಪಿದಾಯಿ ಬುಡ್ದು ಬರ್ಪ ಅಂಚೆನೆ ರಾಜಕೀಯನ್‌ಲ ಬುಡ್ದು ಬರೊಡು ಪಂದ್‌ ಪಂಡೆರ್.

ಪುತ್ತೂರ‍್ದ ಪಿಲಿರಂಗ್ ಸೀಸನ್-2 ಲೇಸ್ ದ ಚಪ್ಪರ ಮೂರ್ತ

ಪುತ್ತೂರು: ಪುತ್ತೂರು ಕಿಲ್ಲೆ ಮೈದಾನಡ್‌ ಮಾಜಿ ಶಾಸಕಿ ಶಕುಂತಳಾ ಶೆಟ್ಟಿ ಸಾರಥ್ಯಡ್ ಅ.22 ದಾನಿ ನಡಪುನ ಪುತ್ತೂರ‍್ದ ಪಿಲಿರಂಗ್ ಸೀಸನ್-2 ಕಾರ್ಯಕ್ರಮದ ಚಪ್ಪರ ಮೂರ್ತ ಅ.15 ದಾನಿ ನಡತ್‌ಂಡ್. ವೇ.ಮೂ. ನವೀನ್ ಕೃಷ್ಣ ಪೂಜಾ ವಿಧಿ ವಿಧಾನ ನಡಪಾದ್‌ ಭೂಮಿಪೂಜೆ ಮಲ್ತೆರ್. ‌
ಪುತ್ತೂರ‍್ದ ಪಿಲಿರಂಗ್ ಸೀಸನ್-2 ಕಾರ್ಯಕ್ರಮದ ಗುರ್ಕಾರ್ಲು ಬೊಕ್ಕ ಬನ್ನೂರು ರೈತರ ಸೇವಾ ಸಹಕಾರಿ ಸಂಘದ ಗುರ್ಕಾರ್ಲು ಆದ್‌ ಇಪ್ಪುನ ಪಂಜಿಗುಡ್ಡೆ ಈಶ್ವರ ಭಟ್ ಬೊಕ್ಕ ಪಿಡಬ್ಲ್ಯೂಡಿ ಗುತ್ತಿಗೆದಾರೆರ್, ಪಿಲಿರಂಗ್ ಸೀಸನ್ -2 ಕ್ರೀಡಾ ಸಮಿತಿದ ಪದಾಧಿಕಾರಿ ರಾಧಾಕೃಷ್ಣ ಧ್ವಜಸ್ತಂಭ ನಡ್ಪುನ ಮೂಲಕ ಚಪ್ಪರ ಮುಹೂರ್ತಗ್‌ ಚಾಲನೆ ಕೊರಿಯೆರ್.‌

ಪುತ್ತೂರ‍್ದ ಪಿಲಿರಂಗ್ ಸೀಸನ್-2 ಕ್ರೀಡಾ ಸಮಿತಿ ಬೇತೆ ಬೇತೆ ಪದಾಧಿಕಾರಿಲಾಯಿನ ರಂಜಿತ್ ಬಂಗೇರ, ರೋಷನ್ ರೈ ಬನ್ನೂರು, ಪೂರ್ಣೇಶ್ ಭಂಡಾರಿ, ಶ್ರೀಪ್ರಸಾದ್ ಪಾಣಾಜೆ, ಕೃಷ್ಣಪ್ರಸಾದ್ ಆಲ್ವ, ಪ್ರಜ್ವಲ್ ರೈ ತೊಟ್ಲ, ಸನತ್ ರೈ ಏಳ್ನಾಡು ಗುತ್ತು, ಜಯಂತ ನಗರ, ಶರತ್ ಕೇಪುಳು, ಹರ್ಷಿತ್‌ರಾಮ್ ಬೊಳುವಾರು, ಶಮೀರ್ ಪಳಿಕೆ, ಕಿಶೋರ್, ಸುಶಾಂತ್ ಶೆಟ್ಟಿ ಕಂಬಳಬೆಟ್ಟು, ಸುಮಿತ್ ಶೆಟ್ಟಿ ಕಂಬಳಬೆಟ್ಟು, ಶ್ರೀಕಾಂತ್, ವಿಕ್ರಂ ರೈ ಅಂತರ, ಸೀತಾ ಭಟ್, ಸುಧಾ ಕುಂಜತ್ತಾಯ, ರವಿ ಕುಂಜತ್ತಾಯ, ವಿಕ್ರಂ ಆಳ್ವ, ಹರ್ಷ ಶೆಟ್ಟಿ, ಪ್ರತೀಕ್ ಚಿಕ್ಕಪುತ್ತೂರು, ಕಾರ್ತಿಕ್ ಚಿಕ್ಕಪುತ್ತೂರು, ಧನುಷ್, ರವಿ ಮಣಿಯ, ವಿಶ್ವಜಿತ್ ಅಮ್ಮುಂಜ, ಯೋಗಿಣಿ ರೈ ಸರ್ವೆ, ಸಂತೋಷ್ ಭಂಡಾರಿ ಚಿಲ್ಮೆತ್ತಾರು, ಮಿಥುನ್ ರೈ, ಸಂದೀಪ್ ರೈ, ಜೆ.ಎಸ್.ಭಂಡಾರಿ, ಕಾರ್ತಿಕ್ ಗೌಡ, ಯೋಗೀಶ್ ಸಾಮಾನಿ, ರಾಮಚಂದ್ರ ನಾಯ್ಕ ಈ ಪೊರ್ತುಡು ಇತ್ತೆರ್.

ಪೆರ್ನೆ : ಕಳೆಂಜ ವಿಷ್ಣುಮೂರ್ತಿ ದೇವಸ್ಥಾನದ ಬಂಗಾರ್ ನಾಪತ್ತೆ..!

ಉಬಾರ್ : ಪೆರ್ನೆದ ಕಳೆಂಜ ದೇಂತಡ್ಕದ ಶ್ರೀ ವಿಷ್ಣುಮೂರ್ತಿ ದೇವಸ್ಥಾನಡ್ ದೇವರೆಗ್ ಕೊರ್ನ ಬಂಗಾರ್ ನಾಪತ್ತೆ ಆಯಿನ ಬಗ್ಗೆ ಅ.15 ದಾನಿ ತೆರಿದ್ ಬೈದುಂಡ್. ಈ ಬಗೆಟ್ಟ್ ದೇವಾಲಯದ ಮಾಜಿ ಕಾರ್ಯದರ್ಶಿ ಗೋಪಾಲ ಶೆಟ್ಟಿ ಎನ್. ಉಬಾರ್ ಪೊಲೀಸೆರೆಗ್ ದೂರು ಕೊರ್ತೆರ್.
ಕರಿನ ಡಿಸೆಂಬರ್‌ ಡ್ ಈ ದೇವಾಲಯದ ಬ್ರಹ್ಮಕಲಶಾಭಿಷೇಕ ಆದ್, ಈ ಪೊರ್ತುಡ್ ದೇವೆರೆ ಗ್ ಭಕ್ತೆ ಒರಿ ಸುಮಾರ್ ಮೂಜಿ ಮುಕ್ಕಾಲು ಪವನ್ ದ ಐನ್ ಇಲೆತ ಬಂಗಾರ್ ದ ಜೋ ಮಾಲೆನ್ ದೇವೆರೆಗ್ ಸಮರ್ಪನೆ ಮಲ್ತ್ ಇತ್ತೆರ್. ಅವ್ ಬೊಕ್ಕ ರೆಡ್ ಪವನ್ದ ಬಂಗಾರ್ ದ ಸರ ನಾಪತ್ತೆಯಾತ್‌ಂಡ್. ಸರಕಾರ ದೇವಾಲಯಗ್ ಆಡಳಿತಾಧಿಕಾರಿನ್‌ ನೇಮಕ ಮಲ್ತ್‌ ಇತ್ತೆರ್. ಅಧಿಕಾರ ಸ್ವೀಕಾರ ಮಲ್ತಿನ ಆರ್ ಅ.15 ದಾನಿ ಭಕ್ತಾದಿಲೆನ ಸಮ್ಮುಖಡ್ ಮಹಜರು ಮಲ್ಪುನಗ ಬಂಗಾರ್ದ ಸರ ನಾಪತ್ತೆ ಆತಿನ ವರದಿ ಆತ್‌ಂಡ್. ನೆತ್ತ ಬಗೆಟ್ಟ್‌ ಉಬಾರ್‌ ಪೊಲೀಸ್‌ ಸ್ಟೇಷನ್‌ಡ್‌ ಕೇಸ್‌ ದಾಖಲಾತ್‌ಂಡ್.