ಪುತ್ತೂರ್ದ ಸುದ್ದಿ | Puttur News

ಕುಕ್ಕೆ ಸುಬ್ರಹ್ಮಣ್ಯ ದೇವೆರೆಗ್ ಬಂಗಾರ್ದ ಪ್ರಭಾವಳಿ ಸಮರ್ಪಣೆ

 ಕುಕ್ಕೆ ಸುಬ್ರಹ್ಮಣ್ಯ ದೇವೆರೆಗ್‌ ಬಂಗಾರ್‌ದ ಪ್ರಭಾವಳಿನ್‌ ಬಿಹಾರ ಮೂಲದ ಡಾ. ರಾಹುಲ್ ಕುಮಾರ್ ಪಾಟ್ನಾ ಸಮರ್ಪಣೆ ಮಲ್ತೆರ್. ಮದುಮೆದ ಬೊಕ್ಕ ಸಂತಾನಗಾದ್‌ ಪನ್ನ ಪರಕೆದ ಸೇವೆ ಪಂದ್‌ ಇತ್ತೆರ್. ಪರಕೆಡ್‌ ಪುತ್ರ ಸಂತಾನ ಆಯಿ ಬೊಕ್ಕ  ಪನ್ನ ಪರಕೆದ ಪ್ರಕಾರ ಬಂಗಾರ್‌ದ ಪ್ರಭಾವಳಿನ್‌ ಕುಕ್ಕೆ ಸುಬ್ರಹ್ಮಣ್ಯ ದೇವೆರೆಗ್ ಸಂದಾದೆರ್‌ ಪಂದ್‌ ತೆರಿದ್‌ ಬೈದ್‌ಂಡ್. ಇನಿ ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಡ್‌ ಮಗನ ಒಟ್ಟಿಗೆ ಅರ್ಚಕೆರ್ ಸತ್ಯನಾರಾಯಣ ನೂರಿತ್ತಾಯ ಬ್ರಹ್ಮಾರ್ಪಣೆ ಮಲ್ತೆರ್. ಅಂಚನೆ ತುಲಾಭಾರ ಸೇವೆನ್‌ಲ ಮಲ್ತೆರ್.

ರೈಲ್‌ಡ್ ಆಯತತ್ತ್‌ದ್‌ ಬೂರ್ದ್‌ ತೀರ್‌ಪೋಯಿನ ಕಡಬದ ಜವನೆ..!

ಕಡಬ: ಕಡಬದ ಜವನೆ ಒರಿ ಕಣ್ಣೂರ್‌ಡ್‌ ಬೊಲ್ಪುಗೆ ರೈಲ್‌ರ್ದ್ ಆಯತತ್ತ್‌ದ್ ಬೂರ್ದ್‌ ತೀರ್‌ಪೋಯಿನ ಘಟನೆ ಅ.20 ದಾನಿ ನಡತ್‌ಂಡ್. ಕಡಬ ತಾಲೂಕುದ ಮರ್ದಾಳ ಬಂಟ್ರ ಗ್ರಾಮದ ನೀರಾಜೆ ನಿವಾಸಿ ಸುರೇಶ (34) ತೀರ್‌ಪೋಯಿನ ಜವನೆ.
ಇನಿ ಕಾಂಡೆ 8 ಗಂಟೆಗ್‌ ಅರೆನ ಮೊಬೈಲ್ ನಂಬರ್‌ಗ್ ಇಲ್ಲರ್ದ್‌ ಕಾಲ್‌ ಮಲ್ಪುನಗ ಆಸ್ಪತ್ರೆದ ಸಿಬ್ಬಂದಿ ಪೋನ್ ದೆತ್ತ್‌ ಪಾತೆರ್ನಗ ಈ ವಿಚಾರ ತೆರಿಪಾದೆರ್‌ ಪಂದ್‌ ತೆರಿದ್‌ ಬೈದ್‌ಂಡ್.

ಸುಳ್ಯ ಸರಕಾರಿ ಆಸ್ಪತ್ರೆಡ್ ಆಯುಧಪೂಜೆ‌

ನವರಾತ್ರಿ ಉಚ್ಚಯದ ಪ್ರಯುಕ್ತ ಸುಳ್ಯ ಸರಕಾರಿ ಆಸ್ಪತ್ರೆದ ಆಂಬ್ಯುಲೆನ್ಸ್ ಬೊಕ್ಕ ಸಿಬ್ಬಂದಿಲೆನ ಗಾಡಿಲೆಗ್ ಇನಿ ಆಯುಧ ಪೂಜೆ ನಡತ್‌ಂಡ್. ಪುರೋಹಿತೆರ್ ಗಣೇಶ್ ಭಟ್ ಪೂಜಾ ಕಾರ್ಯಕ್ರಮ ಮಲ್ತೆರ್.‌ ಈ ಪೊರ್ತುಡ್ ವೈದ್ಯಾಧಿಕಾರಿ ಕರುಣಾಕರ, ನರ್ಸ್‌ನಕುಲ್, ಸಿಬ್ಬಂದಿಲು ಇತ್ತೆರ್.

ವಿಟ್ಲ : ಬಲ್ಲ್ ದೆತೊಂದು ಜವನೆ ಆತ್ಮಹತ್ಯೆ..!!!

ವಿಟ್ಲ : ಬಲ್ಲ್‌ ದೆತೊಂದು ಜವನೆ ಆತ್ಮಹತ್ಯೆ ಮಲ್ತಿನ ಘಟನೆ ವಿಟ್ಲ ಕೈತಲ್‌ದ ಪುಣಚಡ್‌ ನಡತ್‌ಂಡ್. ಪುಣಚ ಚೆಕ್ಕುತ್ತಿ ನಿವಾಸಿ ಶ್ರೀ ಕೃಷ್ಣ (26) ಆತ್ಮಹತ್ಯೆ ಮಲ್ತೊನ್ನ ಜವನೆ. ಕೃಷ್ಣ ಸೆಂಟ್ರಿಂಗ್ ಬೇಲೆ ಮಲ್ತೊಂದು ಇತ್ತೆರ್. ಆತ್ಮಹತ್ಯೆಗ್ ನಿಖರ ಕಾರಣ ತೆರಿದ್‌ ಬೈದಿಜಿ. ವಿಟ್ಲ ಪೊಲೀಸೆರ್ ಜಾಗೆಗ್‌ ಬತ್ತ್‌ದ್ ಪರಿಶೀಲನೆ ಮಲ್ತೊಂದು ಉಲ್ಲೆರ್.

ಸುಳ್ಯ: ಹಾರ್ಟ್‌ ಆಟ್ಯಾಕ್‌ಡ್‌ ತೀರ್‌ಪೋಯಿನ ಪೊಂಜೊವ್..!‌

ಸುಳ್ಯ: ಪೊಂಜೊವ್‌ ಒರ್ತಿ ಹಾರ್ಟ್‌ ಅಟ್ಯಾಕ್‌ಡ್‌ ತೀರ್‌ಪೋಯಿನ ಘಟನೆ ಸುಳ್ಯದ ಗುತ್ತಿಗಾರ್‌ಡ್‌ ನಡತ್‌ಂಡ್.‌

ಗುತ್ತಿಗಾರ್‌ಡ್ ಗ್ಯಾರೇಜ್ ನಡಪಾವೊಂದು ಇಪ್ಪುನ ಕಾಂತಪ್ಪ ಪೂಜಾರಿನ ಬುಡೆದಿ ನೀತಾ ಕುಮಾರಿ (43) ತೀರ್‌ಪೋಯಿನಾರ್. ಮೇರೆಗ್‌ ಕಂಡನಿ, ರಡ್ಡ್‌ ಜೋಕುಲ್‌ ಉಲ್ಲೆರ್.‌

ಅ.21: ಸುಳ್ಯ ದಸರಾ 2023 ಸುರು

ಸುಳ್ಯದ ಶ್ರೀ ಶಾರದಾಂಬ ದಸರಾ ಸೇವಾ ಟ್ರಸ್ಟ್ , ಸಾರ್ವಜನಿಕ ಶ್ರೀ ಶಾರದಾಂಬ ಸೇವಾ ಸಮಿತಿ (ರಿ.) ದಸರಾ ಉತ್ಸವ ಸಮಿತಿದ ಮುತಾಲಿಕೆಡ್ 52ನೇ ವರ್ಷದ ಶ್ರೀ ಶಾರದಾಂಬ ಉತ್ಸವ ಶ್ರೀ ಚೆನ್ನಕೇಶವ ದೇವಾಲಯದ ಎದುರು ಶ್ರೀ ಶಾರದಾಂಬ ಕಲಾ ವೇದಿಕೆಡ್ ಒರ್ಂಬ ದಿನ ಗೌಜಿಡ್ ನಡಪರೆ ಉಂಡು.
ಕಾಂಡೆ ಪೇಂಟೆದ ಜ್ಯೋತಿ ಸರ್ಕಲ್‌ರ್ದ್ ಶ್ರೀ ಶಾರದಾದೇವಿ ಮೂರ್ತಿದ ಪ್ರತಿಷ್ಠಾ ಮೆರವಣಿಗೆಗ್ ಶಾಸಕೆರ್ ಭಾಗೀರಥಿ ಮುರುಳ್ಯ ಚಾಲನೆ ಕೊರಿಯೆರೆ ಉಲ್ಲೆರ್.‌ ಒರ್ಂಬ ದಿನ ಬೇತೆ ಬೇತೆ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮದೊಟ್ಟಿಗೆ ಶ್ರೀ ಶಾರದಾಂಬ ಕಲಾವೇದಿಕೆಡ್ ದಸರಾ ಮಹೋತ್ಸವ ನಡಪರೆ ಉಂಡು. ಅ.28ದಾನಿ ಮಧ್ಯಾಹ್ನ ಸುಳ್ಯ ಪೇಂಟೆದ ಪ್ರಮುಖ ಬೀದಿಡ್ ದಸರಾ ಉತ್ಸವದ ಶೋಭಾಯಾತ್ರೆ ನಡಪರೆ ಉಂಡು.

ಅ.15-23 : ವಿಟ್ಲ ಮೇಗಿನಪೇಟೆ ಮಹಮ್ಮಾಯಿ ದೇವಸ್ಥಾನಡ್‌ ನವರಾತ್ರಿ ಉಚ್ಚಯ

ವಿಟ್ಲ: ಮೇಗಿನ ಪೇಟೆ ಶ್ರೀ ಮಹಮ್ಮಾಯಿ ಅಮ್ಮನ ದೇವಸ್ಥಾನಡ್ ಅ. 23 ಮುಟ್ಟ ನವರಾತ್ರಿ ಉಚ್ಚಯ ರಾತ್ರೆ 8 ಗಂಟೆಗ್‌ ನಡಪೆರೆ ಉಂಡು. ಅ.20 ಶುಕ್ರವಾರ ದಾನಿ ಕಾಂಡೆ 8 ಗಂಟೆಗ್ ಗಣಪತಿ ಹೋಮ ಬೊಕ್ಕ ಬಯ್ಯಗ್‌ 5 ಗಂಟೆರ್ದ್ ವಿಶೇಷ ದುರ್ಗಾ‌ ನಮಸ್ಕಾರ ಪೂಜೆ ನಡಪರೆ ಉಂಡು. ರಾತ್ರೆ ಪೂಜೆರ್ದ್ ಬೊಕ್ಕ ಪ್ರಸಾದ ಭೋಜನದ ವ್ಯವಸ್ಥೆ ಉಂಡು ಪಂದ್ ಪ್ರಕಟಣೆಡ್‌ ತೆರಿಪಾದೆರ್.

ಕೋಡಿಂಬಾಡಿ ಶ್ರೀ ಮಹಿಷ ಮರ್ದಿನಿಗ್ ವಜ್ರದ ಸರ ಕೊರಿನ ಶಾಸಕೆರ್ ಅಶೋಕ್ ರೈ

ಪುತ್ತೂರು: ಪುತ್ತೂರು ಶಾಸಕೆರಾಯಿನ ಅಶೋಕ್ ಕುಮಾರ್ ರೈ ನವರಾತ್ರಿ ಉಚ್ಚಯದ ಪ್ರಯುಕ್ತ ಕೋಡಿಂಬಾಡಿ ಶ್ರೀ ಮಹಿಷ ಮರ್ಧಿನಿ ದೇವಸ್ಥಾನಡ್ ಚಂಡಿಕಾ ಹೋಮ ಬೊಕ್ಕ ತುಲಾಭಾರ ಸೇವೆ ಸಲ್ಲಿಸಾದ್ ದೇವೆರೆಗ್ ವಜ್ರದ‌ ಸರ ಸಮರ್ಪಣೆ ಮಲ್ತೆರ್.‌ ಕಾಂಡೆ ದೇವಸ್ಥಾನಡ್ ಚಂಡಿಕಾಹೋಮ, ವಿಶೇಷ ಪೂಜೆ ಬೊಕ್ಕ ತುಲಾಭಾರ ಸೇವೆನ್‌ ನಡಪಾದ್‌ ಕೊರಿಯೆರ್.
ಕಾರ್ಯಕ್ರಮಡ್ ಗ್ರಾಮದ ಭಕ್ತಾದಿಲು ಶಾಸಕೆರ್ನ ಕುಟುಂಬಸ್ಥೆರ್‌ ಪಾಲ್‌ ಪಡೆದಿತ್ತೆರ್. ಸೇವಾ ರೂಪಡ್ ತನ್ನ ಪುಟ್ಟುದಿನ ಊರುದ ಆರಾಧ್ಯ ದೇವೆರಾಯಿನ ಮಹಿಷ‌ಮರ್ಧಿನಿಗ್ ವಜ್ರದ ಸರನ್ ಸೇವಾರೂಪಡ್ ಸಮರ್ಪಣೆ ಮಲ್ತೆರ್. ಪೂಜೆದ ಬೊಕ್ಕ ಅನ್ನದಾನ ನಡತ್‌ಂಡ್.

ಮಠಂತಬೆಟ್ಟು ದೇವಸ್ಥಾನಡ್ ಸಾಧನ ಸಂಗೀತ ಪ್ರತಿಷ್ಠಾನದ ಕಲ್ಪಾರ್ಥಿಲೆರ್ದ್ ಶಾಸ್ತ್ರೀಯ ಸಂಗೀತ‌

ಪುತ್ತೂರು: ಕೋಡಿಂಬಾಡಿದ ಮಠಂತಬೆಟ್ಟು ಶ್ರೀ ಮಹಿಷಮರ್ದಿನಿ ದೇವಸ್ಥಾನಡ್ ನವರಾತ್ರಿ ಪ್ರಯುಕ್ತ ನಡತೊಂದು ಇಪ್ಪುನ ಸಾಂಸ್ಕೃತಿಕ ಕಾರ್ಯಕ್ರಮದ ಅಂಗವಾದ್ ಪುತ್ತೂರುದ ಸಾಧನ ಸಂಗೀತ ಪ್ರತಿಷ್ಠಾನದ ಡಾ.ವಿದುಷಿ ಸುಚಿತ್ರಾ ಹೊಳ್ಳ ಮೇರ್ನ ಶಿಷ್ಯ ವೃಂದರ್ದ್ ಶಾಸ್ತ್ರೀಯ ಸಂಗೀತ ಕಾರ್ಯಕ್ರಮ ನಡತ್‌ಂಡ್.‌
ಇಶಾ .ಬಿ, ಅಂಜಲಿ ನಾಯಕ್ ಕೆ, ಮಾನಸ .ಬಿ, ಆರ್ಯನ್ ಸಿ. ಆರ್, ಮಾನ್ವಿ ಕಜೆ, ಅವನಿ ನಾಯಕ್, ಸುಪ್ರಜಾ ರಾವ್, ಮಯೂರಿ.ಕೆ, ಶ್ರೀವಿಭಾ ಕೇಪು, ಕಾರ್ತಿಕ್ ಪ್ರಸಾದ್, ಹೃಷಿಕೇಶ್ ಕೆ, ವಯಲಿನ್‌ಡ್ ಅನನ್ಯ ಪಿ.ಎಸ್, ಮೃದಂಗಡ್ ಶ್ಯಾಮ್ ಭಟ್ ಸಹಕಾರ ಕೊರಿಯೆರ್.

ಪಂಜ ದೇವಸ್ಥಾನಡ್‌ ನವರಾತ್ರಿ ಉಚ್ಚಯ

ಪಂಜ ಸೀಮೆದ ಶ್ರೀ ಪರಿವಾರ ಪಂಚಲಿಂಗೇಶ್ವರ ದೇವಸ್ಥಾನದ ಶ್ರೀ ದುರ್ಗಾಪರಮೇಶ್ವರಿ ಸನ್ನಿಧಿಡ್ ಅ.15 ರ್ದ್ ಅ.23 ಮುಟ್ಟ ನವರಾತ್ರಿ ಉಚ್ಚಯ ನಡಪೆರೆ ಉಂಡು.
ಅ.18 ದಾನಿ ರಾತ್ರೆ ಶ್ರೀ ವಿಷ್ಣು ಭಜನಾ ಮಂಡಳಿ ಅಳ್ಪೆ ಚಿಂಗಾಣಿಗುಡ್ಡೆ ಮೊಕ್ಲೆರ್ದ್ ಭಜನಾ ಸಂಕೀರ್ತನೆ, ಮಹಾಪೂಜೆ, ಪ್ರಸಾದ, ವಿತರಣೆ, ಅನ್ನ ಸಂತರ್ಪಣೆ ನಡತ್‌ಂಡ್. ಗೋಪಾಲಕೃಷ್ಣ ದೇವಸ್ಯ, ಸುಭಾಷ್ ಪಂಜ, ರಚನಾ ಚಿದ್ಗಲ್, ಸುಬ್ರಹ್ಮಣ್ಯ ಭಟ್ ದೇವಸ್ಯ , ಲಕ್ಷ್ಮೀಶ ಶಗ್ರಿತ್ತಾಯ , ಗಗನ್ ಪಂಜ ಮೊಕ್ಲೆರ್ದ್ ಯಕ್ಷಗಾನ ಕಲಾ ಸೇವೆ ನಡತ್‌ಂಡ್.‌ ವ್ಯವಸ್ಥಾಪನಾ ಸಮಿತಿದಕುಲ್, ಸೀಮೆದ ಭಕ್ತಾದಿಲು ಈ ಪೊರ್ತುಡು ಇತ್ತೆರ್.