ಕುಡ್ಲದ ಸುದ್ದಿ | Mangalore News

ದೊಂದಿ ಬೊಲ್ಪು ಡು ನಡಪುನ ರಾಶಿ ಪೂಜೆಗ್ ಛಾಯಾಚಿತ್ರ ಸ್ಪರ್ಧೆದ ಸಾಂಗತ್ಯ -2021  

ಮಹತೋಬಾರ  ಕೊಡವೂರು ಶ್ರೀ ಶಂಕರನಾರಾಯಣ ರಾಶಿಪೂಜೆ ಸೇವಾ ಸಮಿತಿ ಪ್ರಾಯೋಜಕತ್ವಡ್  ಸೌತ್ ಕೆನರಾ ಫೋಟೋ ಗ್ರಾಪರ್ಸ್  ಅಸೋಷಿಯೇಷನ್  ಉಡುಪಿ ವಲಯ ಅಟ್ಟನೆ ಮಲ್ಪುನ ” ದೊಂದಿ ಬೊಲ್ಪುಡು ನಡಪುನ ರಾಶಿ ಪೂಜೆಗ್ ಛಾಯಾಚಿತ್ರ ಸ್ಪರ್ಧೆದ ಸಾಂಗತ್ಯ -2021″(ಈಶ ಸೇವೆದೊಟ್ಟುಗು ಕಲಾ ಸೇವೆ).

ಕೊಡವೂರು ಶ್ರೀ ಶಂಕರನಾರಾಯಣ ದೇವಸ್ಥಾನಡ್ ಫೆಬ್ರವರಿ 4,ಗುರುವಾರ ದೊಂದಿ ಬೊಲ್ಪುಡು ನಡಪುನ ರಾಶಿ ಪೂಜಾ ಮಹೋತ್ಸವದ ಚಿತ್ತಾಕರ್ಷಕ
ದೃಶ್ಯನ್ ಛಾಯಾಗ್ರಾಹಕೆರ್ ಅಕ್ಲೆನ ಕ್ಯಾಮರಾ ಕಣ್ಣ್ ಡ್ ಸೆರೆ ಪತ್ತ್ ದ್ ಈ ಪಂಥೋ ಡು ಪಾಲ್ ಪಡೆದ್ ಇನಾಮು ಪಡೆಯರೆ ಇಂದೊಂಜಿ ಅಪೂರ್ವ ಅವಕಾಶ.
ಸುರುತ್ತ ಇನಾಮು 3,000-00 +ಸ್ಮರಣಿಕೆ
 ರಡ್ಡನೇ ಇನಾಮು  2,000-00 +ಸ್ಮರಣಿಕೆ,  
 ಮೂಜನೇ ಇನಾಮು 1,000-00 +ಸ್ಮರಣಿಕೆ ಬೊಕ್ಕ್  ರಡ್ಡ್ ಸಮಾಧಾನಕರ ಬಹುಮಾನ.

ಸ್ಪರ್ಧಾ ನಿಯಮ ಬೊಕ್ಕ ನಿಬಂಧನೆಲು :

ಒರಿ 8*10 ಗಾತ್ರದ ಗರಿಷ್ಠ ಮೂಜಿ  ಛಾಯಾಚಿತ್ರ ಕಡಪಾವೊಲಿ.ಛಾಯಾಚಿತ್ರದ  ಪಿರವು ತಮ್ಮ ಪುದರ್ , ವಿಳಾಸ ಬೊಕ್ಕ ಮೊಬೈಲ್ ಸಂಖ್ಯೆನ್ ಕಡ್ಡಾಯವಾದ್ ಬರೆಯೊಡು . ಧಾರ್ಮಿಕ ವಿಧಿ ವಿಧಾನಗಲೆಗ್ ಒವ್ವೆ ರೀತಿದ ಅಡಚಣೆಯಾವಂದಿಲಕ ಛಾಯಾಚಿತ್ರನ್ ದೆಪ್ಪೊಡು. ಛಾಯಾಚಿತ್ರ ದೆಪ್ಪುನ ಪೊರ್ತು ಫೆ.4, ಗುರುವಾರ ಬೈಯ್ಯ ಗಂಟೆ 7.00ರ್ದ್ ಫೆ. 5, ಶುಕ್ರವಾರ ಕಾಂಡೆ ಗಂಟೆ 6.00 ಮುಟ ಮಾತ್ರ ಅವಕಾಶ.ನಿರ್ಣಾಯಕೆರ್ನ ತೀರ್ಮಾನನೇ ಕಡೆತವು. ಮಾತೆರೆಗ್ಲಾ ಮುಕ್ತ ಅವಕಾಶ. ಛಾಯಾಚಿತ್ರ ಕಡಪಾಯರೇ ಕಡೆತ ದಿನ ತಾರೀಖ್ 15 .02.2021, ಸೋಮವಾರ.ಮೊಬೈಲ್ಡ್ ದೆತ್ತಿನ ಛಾಯಾಚಿತ್ರನ್ ಸ್ಪರ್ಧೆಗೆ ದೆಪ್ಪುಜ.ಛಾಯಾಚಿತ್ರಲೆನ್ ಕಡಪಾವೊಡಾಯಿನ ವಿಳಾಸ-ಶಾಡೋಸ್ ಡಿಜಿಟಲ್ ಕ್ರಿಯೇಶನ್, ಕಸ್ತೂರಿ ಬಿಲ್ಡಿಂಗ್, ರಡ್ಡನೇ ಮಹಡಿ ಶಿರಿಬೀಡು, ಉಡುಪಿ.ಇನಾಮು ಪಟ್ಟುನ ಲೇಸ್ 21. 02.  2021, ಸೋಮವಾರ. ಶ್ರೀದೇವಳಡ್   @ ಛಾಯಾಚಿತ್ರಲೆನ್ ಸಾಧಾರಣ ಅಂಚೆ ಅತ್ತುಂಡ ತ್ವರಿತ ಅಂಚೆ ಇಜ್ಜಿಡ ನೋಂದಾಯಿತ ಅಂಚೆ ಮುಖೇನ ಕಡಪಾವೊಡು.

ಎಚ್ಚದ ಮಾಹಿತಿಗಾದ್  :

ಕೊಡವೂರು ಪ್ರಕಾಶ್ ಜಿ.:9880058665

ಜನಾರ್ದನ್ ಕೊಡವೂರು: 9448252363

ಪ್ರಕಾಶ್ ಕೊಡಂಕೂರು: 9880953649

ಸುಕೇಶ್ ಅಮೀನ್ : 7204146368

ಲೆಪ್ಪು ಕೊರ್ಲೆ.

ಜ.೩೧ ಮುಲ್ಕಿಡ್ ವಿವೇಕ ಕಾಯಕ ರತ್ನ ಪ್ರಶಸ್ತಿ ಪಟ್ಟುನ ಲೇಸ್

ಮುಲ್ಕಿ : ಕರಿನ ಪತ್ತ್ ವರ್ಸೊರ್ದಿಂಚಿ ಸಮಾಜಸೇವೆಗಾದ್ ಪುನೆಪಿನ ಕಿನ್ನಿಗೋಳಿದ ಸ್ವಾಮಿ ವಿವೇಕಾನಂದ ಸೇವಾ ಸಂಸ್ಥೆರ್ದ್ ಸ್ವಾಮಿ ವಿವೇಕಾನಂದೆರ್ನ ೧೫೮ನೇ ಪುಟ್ಟು ಪರ್ಬದ ಲೆಕ್ಕೊಡು ಬೊಲ್ಪುಗು ಬರಂದಿನ ೨೩ ಸಾಧಕೆರ್ ಬೊಕ್ಕ ರಡ್ಡ್ ಸೇವಾ ಸಂಸ್ಥೆ ಲೆಗ್ ವಿವೇಕಾನಂದ ಕಾಯಕ ರತ್ನ ಪ್ರಶಸ್ತಿ ಪಟ್ಟುನ ಲೇಸ್ ಜ.೩೧ ಐತಾರ ಬಯ್ಯಡ್ ೪.೩೦ ಗು ಮುಲ್ಕಿ ಬಪ್ಪನಾಡ್ ದೇವಸ್ಥಾನ ವಠಾರದ ಅನ್ನಪೂರ್ಣೇಶ್ವರಿ ಸಭಾಂಗಣೊಡು ನಡಪರೆ ಉಂಡು ಪಂಡ್ ದ್ ಸಂಸ್ಥೆ ದ ಗುರ್ಕಾರ್ಲು ಡಾ.ಜಗನ್ನಾಥ ಶೆಟ್ಟಿ ನಿಡ್ಡೋಡಿ ಚಾವಡಿಮನೆ ತೆರಿಪಾದೆರ್.

ಸೋಮಾರ ಸುದ್ದಿಗೋಷ್ಠಿಡ್ ಈ ವಿಷಯ ಪಂಡಿನ ಆರ್, ಲೇಸ್ ಡ್ ಬೆದ್ರ ಜೈನ ಮಠತ್ತ ಸ್ವಸ್ತಿ ಶ್ರೀ ಭಟ್ಟಾರಕ ಚಾರುಕೀರ್ತಿ ಪಂಡಿತಾಚಾರ್ಯ ಮಹಾ ಸ್ವಾಮೀಜಿ ವಿಶೇಷ ಸಂದೇಶ ಕೊರ್ರೆ ಉಲ್ಲೆರ್. ಮುಲ್ಕಿ ಸೀಮೆ ಅರಸುಲು ದುಗ್ಗಣ್ಣ ಸಾವಂತೆರ್ ಲೇಸ್ ಉದಿಪನ ಮಲ್ಪುವೆರ್.ಕುಡ್ಲ ಆರ್ ಎಸ್ಸೆಸ್ ಪ್ರಚಾರ ಪ್ರಮುಖ್ ಸುನಿಲ್ ಕುಲಕರ್ಣಿ ವಿವೇಕಾನಂದೆರ್ನ ಸಂದೇಶ ಪನ್ಪೆರ್. ತೋಕೂರು ಎಂಆರ್ ಎಚ್ ಪೂಂಜ ಐಟಿಐ ಪ್ರಿನ್ಸಿಪಾಲ್ ವೈ.ಎನ್.ಸಾಲ್ಯಾನ್ ಅಭಿನಂದನೆ ಭಾಷಣ ಮಲ್ಪುವೆರ್. ಮಲ್ಲ ಬಿನ್ನೆರಾದ್ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ ದ ಆಡಳ್ತೆ ಮೊಕ್ತೇಸರೆರ್ ಎನ್.ಎಸ್.ಮನೋಹರ ಶೆಟ್ಟಿ, ಮುಲ್ಕಿ ಬಂಟರ ಅಧ್ಯಕ್ಷೆರ್ ಸಂತೋಷ್ ಕುಮಾರ್ ಹೆಗ್ಡೆ , ಮುಲ್ಕಿ ಮಂಡಲ ಬಿಜೆಪಿ ಅಧ್ಯಕ್ಷೆರ್ ಸುನಿಲ್ ಆಳ್ವ, ಸುವರ್ಣ ಆರ್ಟ್ಸ್ ಮುಲ್ಕಿದ ಚಂದ್ರಶೇಖರ ಸುವರ್ಣ ಪಾಲ್ ಪಡೆವೆರ್ ಪಂಡೆರ್.ಬೇತೆ ಬೇತೆ ಕ್ಷೇತ್ರೊಡು ಸಾಧನೆ ಮಲ್ತ್ ದ್ ಬೊಲ್ಪುಗು ಬರಂದಿನ ೨೩ ಸಾಧಕೆರ್ ಬೊಕ್ಕ ರಡ್ಡ್ ಸಂಸ್ಥೆ ಲೆಗ್ ವಿವೇಕ ಕಾಯಕ ರತ್ನ ಪ್ರಶಸ್ತಿನ್ ಪಟೊಂದುಲ್ಲ ಪಂಡ್ ದ್ ಡಾ. ಜಗನ್ನಾಥ ಶೆಟ್ರ್ ಪಂಡೆರ್.ಸುದ್ದಿಗೋಷ್ಠಿಡ್ ಸಂಸ್ಥೆದ ಸಂಚಾಲಕೆರಾಯಿನ ಭಾಸ್ಕರ್ ಶೆಟ್ಟಿಗಾರ್ ಮುಲ್ಕಿ, ಶರತ್ ಶೆಟ್ಟಿ ದೊಡ್ಮನೆ ಮುಂಡ್ಕೂರು, ನಾರಾಯಣ ರೈ ಕುಬೆವೂರು ಬೊಕ್ಕ ನರೇಂದ್ರ ಕೆರೆಕಾಡು ಇತ್ತೆರ್.