ಕುಡ್ಲದ ಸುದ್ದಿ | Mangalore News

ಸೌಜನ್ಯಗ್ ನ್ಯಾಯ ತಿಕ್ಕರೆ ಕದ್ರಿ ದೇವಲ್ಯಡ್ ಪ್ರಾರ್ಥನೆ

ಕುಡ್ಲ: ಸೌಜನ್ಯನ ಅತ್ಯಾಚಾರ ಬೊಕ್ಕ ಕೊಲೆ ಪ್ರಕರಣದ ವಿರುದ್ಧ ಹೋರಾಟ ನಡತೊಂದೇ ಉಂಡು.ಅಂಚಾದ್ ಇನಿ ಆ.10 ದಾನಿ ಕದ್ರಿ ಶ್ರೀ ಮಂಜುನಾಥ ದೇವಸ್ಥಾನಗ್ ಪೋದು ಸೌಜನ್ಯಗ್ ನ್ಯಾಯ ತಿಕ್ಕೊಡು ಪಂದ್ ಸೌಜನ್ಯನ ಇಲ್ಲದಕುಲು ವಿಶೇಷ ಪೂಜೆ ಸಂದಾಯ ಮಲ್ತೆರ್.

ಈ ಪೊರ್ತುಡು ಸೌಜನ್ಯನ ಅಮ್ಮ ಕುಸುಮಾವತಿ, ಮಾಮು, ಮೆಗ್ದಿ ಅಂಚನೆ ಕುಡ್ಲ ದ ಸೌಜನ್ಯ ಪರ ಹೋರಾಟಗಾರೆರ್ ಈ ಪೊರ್ತುಡು ಇತ್ತೆರ್.

ಪೆರ್ಮರಿ ಪತಿಯೆರ್ ತುಳುನಾಡ ಬಿರ್ಸೆದಿ ನಯನಾ!

ಪೆರ್ಮರಿ ಇತ್ತೆ ಮಾತಾ ಕಡೆಟ್ಟ್ ಲ ತೋಜಿದ್ ಬರ್ಪುಂಡು. ಅವು ಮನುಷ್ಯೆರೆಗ್ ಅಪಾಯಕಾರಿ ಅತ್ತ್ ಡಲ ಕೋರಿ, ಪುಚ್ಚೆ, ನಾಯಿ, ಕಂಜಿ ಇಂಚ ಎಲ್ಯ ಎಲ್ಯ ಸಾಂಕಣದ ಪ್ರಾಣಿಲೆನ್ ಪತ್ ದ್ ದಿಂಗುವ. ಒರ ಒರ ರಾತ್ರೆಡ್ ಇಲ್ಲಡೆ ಬತ್ತ್ ದ್ ಸೇರೊನುವ. ಆಂಡ ಅವೆನ್ ಪತ್ತರೆ ಮಾತೆರ್ಲ ಪೋಡಿವೆರ್. ಆಂಡ ಮುಲ್ಕಿ ಕೈತಲ್ದ ಗೃಹಿಣಿ ನಯನಾ ಪನ್ಪಿನಾರ್ ಏರ್ನಲ ಇಲ್ಲಡೆಗ್ ಪೆರ್ಮರಿ ಬತ್ತ್ಂಡ ಪೋಡ್ಯಂದೆ ಅವೆನ್ ಪತ್ ದ್ ದೂರ ಕೊನೊದು ಬುಡ್ಪೆರ್.

ಮೇರ್ ಬುಧಾರ (ಆ.9) ಬಯ್ಯಡ್ ಕಾರ್ನಾಡ್ ಬೈಪಾಸ್ ದಲ್ಪ ಬತ್ತಿನ ಮಲ್ಲ ಪೆರ್ಮರಿನ್ ಭಾರಿ ಜಾಗ್ ರ್ತೆಡ್ ಪತ್ ದ್ ಬೇತೆ ಕಡೆಕ್ಕ್ ಕೊನೊದು ಬುಡ್ತೆರ್.

ಮುಲ್ಕಿ ಕಾರ್ನಾಡ್ ಧರ್ಮಸಾನದಲ್ಪದ ಇಲ್ಲದಾರ್ ಆಯಿನ ನಯನಾ ಮೇರ್ ಎಲ್ಯರ್ದಿಂಚಿಲ ಭಾರಿ ಧೈರ್ಯದಾರ್. ಅರೆನ ಪೊಪ್ಪ ಇಲ್ಲ ಬಾಕಿಲ್ ಗ್ ಬರೊಂದಿತ್ತಿನ ಪೆರ್ಮರಿನ್ ಪತ್ತುನೆನ್ ತೂದು ತೂದು ಅವೆನ್ ಪತ್ತುನ ಟ್ರಿಕ್ಸ್ ಕಲ್ತ್ ದಿತ್ತೆರ್. ನಯನಾ ಮೆರೆಗ್ ಕಂಡನಿ ಎಸ್.ಆರ್. ಪ್ರದೀಪ್ ಲ ಪ್ರೋತ್ಸಾಹ ಕೊರೊಂದುಲ್ಲೆರ್. ನಯನಾ ಮೆರೆನ ಧೈರ್ಯೊಗೊಂಜಿ ಸೊಲ್ಮೆ ಸಂದಾಗ.

ಆ.13: ಕೇಂದ್ರ ಸರಕಾರದ ಸಾಧನೆ ನಿಲೆಟ್ಟ್ ತುಳುನಾಡ ದೈವ ದೇವೆರ್ನ ಚಾಕಿರಿ ಮಲ್ಪುನಕ್ಲೆಗ್ ಗೌರವಾರ್ಪಣೆ

ಕುಡ್ಲ: ದೇಶದ ಪ್ರಧಾನಿ ಮಂತ್ರಿ ಆದ್ ನರೇಂದ್ರ ಮೋದಿ 9 ವರ್ಷ ಪೂರೈಕೆ ಮಲ್ತ್ ದ್ ಅಂಚೆನೆ ನಳಿನ್ ಕುಮಾರ್ ಕಟೀಲ್ ದ.ಕ ಸಂಸದೆರಾದ್ 15 ವರ್ಷ ಆಯಿನ ನಿಲೆಟ್ಟ್ ಕುಡ್ಲದ ಬಿಜೆಪಿದ ನಿರೆಲ್ಡ್ ತುಳುನಾಡ್‌ದ ಮಣ್ಣ್ ಡ್ ದೈವ ದೇವರೆನ ಸೇವೆ ಸಂದಾಯ ಮಲ್ತೊಂದಿಪ್ಪುನ ಕೊಣಾಜೆ ಬೊಕ್ಕ ಮಹಾಶಕ್ತಿ ಕೇಂದ್ರದ 12 ಗ್ರಾಮದ ಪ್ರಮುಖರೆಗ್ ಸೊಲ್ಮೆ ಸಂದಾಯದ ಲೇಸ್ ಆ.13 ದಾನಿ
ಬೋಳಿಯಾರ್ ಸಭಾಂಗಣಡ್ ನಡಪರೆ ಉಂಡು ಪಂದ್ ದಕ್ಷಿಣ ಕನ್ನಡ ಬಿಜೆಪಿ ಉಪಾಧ್ಯಕ್ಷ ಸಂತೋಷ್ ಕುಮಾರ್ ರೈ ಬೋಳಿಯಾರ್ ತೆರಿಪಾದೆರ್.

ಬೋಳಿಯಾರ್ ಡ್ ಸೋಮವಾರ ಪತ್ರಿಕಾಗೋಷ್ಠಿಡ್ ಪಾತೆರ್ನ ಆರ್, ಈ ಲೇಸ್‌ಡ್ ನೇಮ ಕಟ್ಟುನಕುಲು, ತಂತ್ರಿವರ್ಯರ್, ಅರ್ಚಕೆರ್, ಗಡಿ ಪತ್ ದಿನಕುಲು, ಭಜನಾ ಮಂದಿರದ ಪ್ರಮುಖೆರ್ ಸೇರಿನಂಚ 200 ರ್ದ್ ಜಾಸ್ತಿ ಜನಕ್ ಗೌರವ ಸಂದಾವುನ ಉದ್ದೇಶನ್ ದೀಯೊಂದ. ಬರ್ಪಿನ ದಿನೊಟ್ ಉಳ್ಳಾಲ ಕ್ಷೇತ್ರದ ಮಾತಾ ಸೇವಕೆರೆಗ್ಲ ಗೌರವ ಸಂದಾಯೆರೆ ಉಲ್ಲ ಪಂದ್ ತೆರಿಪಾಯೆರ್.

ಪ್ರಧಾನಿ ನರೇಂದ್ರ ಮೋದಿ ಪ್ರಧಾನಿ ಆಯಿನ ಬೊಕ್ಕ ಮಲ್ತಿನ ಸಾಧನೆ ಬೊಕ್ಕ ನಳಿನ್ ಸಂಸದೆರಾಯಿನ ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲೆಗ್ ಕೊರ್ನ ಅನುದಾನ ಅಂಚನೆ ಉಳ್ಳಾಲ ತಾಲೂಕ್‌ಡ್ ಸಂಸದೆರರ್ನ ನಿಧಿಟ್ಟ್ ನಡತಿನ ಅಭಿವೃದ್ಧಿ ಯೋಜನೆನ್ ಜನಕ್ಲೆಗ್ ತೆರಿಪಾವ್‌ನ ಯೋಜನೆನ್ ರೂಪಿಸಾಯೆರೆ ಉಲ್ಲ ಪಂಡೆರ್.

ಕೋಟಿ ಕೋಟಿ ಅನುದಾನ ನಮ್ಮ ಕ್ಷೇತ್ರಗ್ ಬತ್‌ಂಡಲ ಕ್ಷೇತ್ರದ ಸಂಸದರೆರ್ನ ನಿಧಿರ್ದ್ ಅನುದಾನ ಬೈಜಿ ಪಂದ್ ಅಪಪ್ರಚಾರ ಮಲ್ತೊಂದುಲ್ಲೆರ್. ಐಕಾದ್ ಸತ್ಯಾಂಶ ತೆರಿಪಾಯೆರೆ ಈ ಕಾರ್ಯಕ್ರಮ ಮಲ್ತೊಂದುಲ್ಲ ನೆಕ್ ಮಾತೆರ್ಲ ಸಹಕಾರ ಕೊರೊಡ್ ಪಂದ್ ಪಂತೆರ್.

ಬಿಜೆಪಿ ಮುಖಂಡೆರ್ ಸತೀಶ್ ಕುಂಪಲ, ಕುಡ್ಲದ ಮಂಡಲ ಅಧ್ಯಕ್ಷೆರ್ ಚಂದ್ರಹಾಸ್ ಪಂಡಿತ್ ಹೌಸ್, ಜಯಂತಿ ಉಪಾಧ್ಯಕ್ಷೆರ್ ಯಶವಂತ್ ಅಮೀನ್, ಪ್ರಧಾನ ಕಾರ್ಯದರ್ಶಿ ನವೀನ್ ಪಾದಲ್ಪಾಡಿ, ಉಪಾಧ್ಯಕ್ಷೆರ್ ರವಿಶಂಕರ್, ಕೊಣಾಜೆ ಶಕ್ತಿ ಕೇಂದ್ರದ ಅಧ್ಯಕ್ಷೆರ್ ನವೀನ್ ಶೆಟ್ಟಿ ಕುರ್ನಾಡು, ಸುರೇಶ್ ದೇರಾಜೆ, ಹೇಮಂತ್ ಶೆಟ್ಟಿ, ಮೊಕುಲ್ ಈ ಪೊರ್ತುಡು ಇತ್ತೆರ್.

ದೀಪಕ್ ರಾವ್ ಕೊಲೆ ಆರೋಪಿ ಅರೆಸ್ಟ್

ಮಸ್ತ್ ಕೇಸ್ ಲೆಡ್ ಇತ್ತ್ ದ್ ಕೋರ್ಟು ವಿಚಾರಣೆಗ್ ಹಾಜರ್ ಆವಂದೆ ಒಂಜರೆ ವರ್ಷರ್ದ್ ದೆಂಗ್ ದ್ ಕುಲ್ದ್ ಇತ್ತಿನ ಆರೋಪಿನ್ ಕುಡ್ಲದ ಸಿಸಿಬಿ ಪೋಲಿಸೆರ್ ಪತ್ತ್ ದ್ ದುಂಬುದ ಕ್ರಮಕ್ಕಾದ್ ಸುರತ್ಕಲ್ ಪೊಲೀಸ್ ಠಾಣೆಗ್ ಕೊರ್ತೆರ್.

ಮೊಹಮ್ಮದ್ ನೌಷದ್ ಯಾನೆ ಉಲ್ಲಂಜೆ ನೌಷದ್ (28) ಉಲ್ಲಂಜೆ, ಮೆನ್ನಬೆಟ್ಟು ಪನ್ಪುನ ಆರೋಪಿ 2018 ಡ್ ಸುರತ್ಕಲ್ ಪೊಲೀಸ್ ಠಾಣಾ ವ್ಯಾಪ್ತಿಡ್ ನಡತಿನ ದೀಪಕ್ ರಾವ್ ಕೊಲೆ ಪ್ರಕರಣ, ಮುಲ್ಕಿ ಠಾಣಾ ವ್ಯಾಪ್ತಿಡ್ ನಡತಿನ ಕೊಲೆ ಬೆದರಿಕೆ ಪ್ರಕರಣ, ಬೆಲೆಡ್ ಇತ್ತಿನ ಪೊಲೀಸೆರ್‌ರ್ನ ಕೊಲೆ ಯತ್ನ ಪ್ರಕರಣ ಬೊಕ್ಕ ಮಹಿಳಾ ಠಾಣೆಡ್ ದಾಖಲಾಯಿನ ಪೋಕ್ಸೋ ಪ್ರಕರಣಡ್ ಭಾಗಿಯಾದ್ ಇತ್ತೆರ್.

ಆರೋಪಿನ ಪತ್ತೆ ಕಾರ್ಯಡ್ ಸಿಸಿಬಿ ಘಟಕದ ಎಸಿಪಿ ಪಿ ಎ ಹೆಗಡೆ, ಪೊಲೀಸ್ ನಿರೀಕ್ಷಕೆರ್ ಶ್ಯಾಮ್ ಸುಂದರ್ ಹೆಚ್ ಎಂ, ಪಿಎ ಶರಣಪ್ಪ ಭಂಡಾರಿ ಬೊಕ್ಕ ಸಿಬ್ಬಂದಿಲು ಈ ಪೊರ್ತುಡು ಇತ್ತೆರ್.

ಆಟಿಡೊಂಜಿ ದಿನ ಲೇಸ್ ದ ಲೆಪ್ಪೋಲೆ ಬುಡುಗಡೆ

ಕುಡ್ಲ : ಕರ್ನಾಟಕ ಜಾನಪದ ಪರಿಷತ್ ದ.ಕ ಘಟಕ ಬೊಕ್ಕ ಆಮಂತ್ರಣ ಪರಿವಾರ ನಿರೆಲ್ಡ್ ಆ.13 ದಾನಿ ಕುಡ್ಲದ ಪುರಭವನಡ್
ನಡಪರೆ ಉಪ್ಪುನ ಆಟಿಡೊಂಜಿ ದಿನ ಲೇಸ್ ದ ಲೆಪ್ಪೋಲೆ ಆ.6 ದಾನಿ ಬುಡುಗಡೆ ನಡತ್ಂಡ್.

ದ.ಕ.ಜಿಲ್ಲಾ ಘಟಕದ ಅಧ್ಯಕ್ಷೆರಾಯಿನ ಪ್ರವೀಣ್ ಕುಮಾರ್ ಕೊಡಿಯಾಲ್ ಬೈಲ್ ಲೆಪ್ಪೋಲೆ ಬಿಡುಗಡೆ ಮಲ್ತೆರ್.

ಈ ಪೊರ್ತ್ ಡು ಜಾನಪದ ಪರಿಷತ್ ಸದಸ್ಯೆರ್ ಟಿಪೇಶ್. ಎಸ್. ಅಮೀನ್ ಅದ್ಯಪಾಡಿ, ಆಮಂತ್ರಣ ಪರಿವಾರದ ವಿಜಯ ಕುಮಾರ್ ಜೈನ್, ದಿನೇಶ್ ಶೆಟ್ಟಿ ಕೊಂಚಾಡಿ, ಪ್ರಕಾಶ್ ಆಚಾರ್ಯ ಮೂಡಬಿದ್ರೆ, ಪ್ರಸಾದ್ ನಾಯಕ್, ಕಾರ್ಲ, ಅಜಿತ್ ಪಂಚರತ್ನ ಅಳದಂಗಡಿ ಮೊಕುಲು ಈ ಪೊರ್ತುಡು ಇತ್ತೆರ್.

ಆ.13 ದಾನಿ ನಡಪುನ ಲೇಸ್ ಡ್ ಶಾಸಕೆರ್ ವೇದವ್ಯಾಸ್ ಕಾಮತ್ ಲೇಸ್ ದ ಉದಿಪನ ಮಲ್ಪೆರೆ ಉಲ್ಲೆರ್. ನಿರ್ದೇಶಕೆರ್, ನಿರ್ಮಾಪಕೆರ್
ವಿಜಯ ಕುಮಾರ್ ಕೊಡಿಯಾಲ್ ಬೈಲ್ , ರಾಗ ತರಂಗ ಸಂಸ್ಥೆದ ಅಧ್ಯಕ್ಷೆರ್ ಆಶಾ ಹೆಗ್ಡೆ, ಅಮೃತ ಪ್ರಕಾಶ ಪತ್ರಿಕೆದ ಸಂಪಾದಕೆರ್ ಡಾ.ಮಾಲತಿ ಶೆಟ್ಟಿ ಮಾಣೂರು, ಕರ್ನಾಟಕ ಜಾನಪದ ಪರಿಷತ್ ಕುಡ್ಲ ಘಟಕ ಅಧ್ಯಕ್ಷೆರ್ ಮೋಹನ್ ದಾಸ್,ಯುವ ಉದ್ಯಮಿ ಸದಾನಂದ ಎಂ.ನಾವರ,ಚಲನಚಿತ್ರ ನಟೆ ಸೂರಜ್ ಸನಿಲ್, ಜೈ ತುಲುನಾಡು ಸಂಸ್ಥೆದ ಅಧ್ಯಕ್ಷೆರ್ ವಿಶು ಶ್ರೀಕೇರ,ಕುಡ್ಲ Boy Zone ಡಾನ್ಸ್ ಅಕಾಡೆಮಿದ ಕಿಶೋರ್, ದ.ಕ ಜಿಲ್ಲಾ ಶಾಮಿಯಾನ ಸಂಘ ಬೆಳ್ತಂಗಡಿ ಘಟಕ ಅಧ್ಯಕ್ಷೆರ್ ಸುಕೇಶ್ ಜೈನ್ ಈ ಲೇಸ್ ಡ್ ಪಾಲ್ ಪಡೆಯರೆ ಉಲ್ಲೆರ್.

ಬಾಂಗ್ ಚಾಕೊಲೇಟ್ ಡ್ ಗಾಂಜಾದ ಅಂಶ ಪತ್ತೆ

ಕುಡ್ಲ: ಬಾಂಗ್ ಬೆರಕೆ ಮಲ್ದಿನ ಚಾಕೊಲೇಟ್ ಡ್ ಗಾಂಜಾದ ಅಂಶ ಪತ್ತೆ ಆತ್ಂಡ್.

ಗಾಂಜಾ ಅಂಶ ಇಪ್ಪುನ ಬಗೆಟ್ ವಿಧಿವಿಜ್ಞಾನ ಪ್ರಯೋಗಾಲಯರ್ದ್ ವರದಿ ಬೈದ್ಂಡ್.

ಪೊಲೀಸೆರ್ ಇಂಚೊಗು ಕುಡ್ಲದ ಕಾರ್ ಸ್ಟ್ರೀಟ್‌ಡ್ ಇಪ್ಪುನ ವೈಭವ ಪೂಜಾ ಸೇಲ್ಸ್ ಅಂಗಡಿದ ಮನೋಹರ್ ಶೇಟ್‌ನ ಕೈರ್ದ್ ಒಟ್ಟು 12,592 ಬಿಲೆತ್ತ ಬಾಂಗ್ ಚಾಕೊಲೇಟ್ ಬೊಕ್ಕ ಹೈಲ್ಯಾಂಡ್ಸ್ ಕೈತಲ್ದ ಗೂಡಂಗಡಿಡ್ ಬೆಚನ್ ಸೋನ್ಕರ್ ಮೇರ್ 55,000 ರೂ. ಬಿಲೆತ್ತ ಬಾಂಗ್ ಚಾಕೊಲೇಟ್‌ನ್ ಮಾರೊಂದಿತ್ತಿನ ಬಗೆಟ್ ಉತ್ತರ ಪೊಲೀಸ್ ಠಾಣೆದ ಪೊಲೀಸೆರ್ ಸ್ವಾಧೀನ ಮಲ್ತ್ ಇತ್ತೆರ್.

ಈ ಸೊತ್ತುಲೆಡ್ ಮಾದಕ ಗಾಂಜಾ ಅಂಶದ ಪತ್ತೆದ ಬಗ್ಗೆ ವಿಧಿ ವಿಜ್ಞಾನ ಪ್ರಯೋಗಾಲಯಗ್ ಕಡಪುರ್ದ್ ಇತ್ತೆರ್. ಈ ವರದಿದ ಪ್ರಕಾರ ಅರೋಪಿಲೆನ ವಿರುದ್ದ ಪ್ರಕರಣ ದಾಖಲಾತ್‌ಂಡ್. ಅರೋಪಿಲೆಗ್ 14 ದಿನತ ನ್ಯಾಯಾಂಗ ಬಂಧನಗ್ ಕೊರ್ತೆರ್.