ಒಂಜಾರೆ ತಿಂಗೊಲ್ದ ದುಂಬು ಕೆಜಿಗ್ 300 ರೂ. ಗ್ ಮಾರೊಂದು ಇತ್ತಿನ ಟೊಮೆಟೊ ಕಿರಯ ಇತ್ತೆ ಕುಡ್ಲದ ಅಂಗಡಿಡ್ 25 ರೂ. ಆತ್ಂಡ್.
ಮಹಾರಾಷ್ಟ್ರದ ಲಾತೂರ್ ಡ್ ಟೊಮೆಟೊನ್ ಕೆಜಿಗ್ ಬಜೀ 80 ಪೈಸೆಗ್ ಮಾರೊನ ಪರಿಸ್ಥಿತಿ ಬೈದ್ಂಡ್. ಅಂಚಾದ್ ಬುಲೆಪಾಯೆರೆ ಆಯಿನ ಕಾಸ್ ನ್ ಕುಡ ಪಡೆಯೆರೆ ಆವೊಂದು ಇಜ್ಜಿ ಪಂದ್ ರೈತೆರ್ ಟೊಮೆಟೊನ್ ಮಾರ್ಗಗ್ ದಕ್ಕ್ ದ್ ಪ್ರತಿಭಟನೆ ಮಲ್ತೊಂದು ಉಲ್ಲೆರ್. ಬೆಂಗ್ಲೂರ್ ಡ್ ಕೆಜಿಗ್ 5-8 ರೂ. ಉಂಡು.
ಬಂಟ್ವಾಳ; ಮಾಜಿ ಸಚಿವೆರ್ ಬಿ.ರಮಾನಾಥ ರೈ ಮೆರ್ ನ ಪುಟ್ಟುದಿನ ದಿನತ ಲೆಕ್ಕಡ್ ಪಾಣೇರ್ ಬ್ಲಾಕ್ ಯುವ ಕಾಂಗ್ರೆಸ್ ಸಮಿತಿ ಬೊಕ್ಕ ಅಲ್ಪ ಸಂಖ್ಯಾತ ಘಟಕದ ವತಿರ್ದ್ ಸೆ.13 ದಾನಿ ಬಿ.ಸಿ ರೋಡ್ ದ ರಂಗೋಲಿದ ಚಾವಡಿಡ್ ರಕ್ತದಾನ ಶಿಬಿರ ನಡಪೆರೆ ಉಂಡು ಪಂದ್ ಪಾಣೇರ್ ದ ಬ್ಲಾಕ್ ಯುವ ಕಾಂಗ್ರೆಸ್ ದ ಗುರ್ಕಾರೆ ಇಬ್ರಾಹಿಂ ನವಾಝ್ ಬಡಕೈಲು ಪ್ರಕಟನೆಡ್ ತೆರಿಪಾದೆರ್.
ಕೆಪಿಸಿಸಿ ಸದಸ್ಯೆರ್ ಚಂದ್ರಪ್ರಕಾಶ್ ತುಂಬೆ ಬೊಕ್ಕ ಪಾಣೇರ್ ಬ್ಲಾಕ್ ಕಾಂಗ್ರೆಸ್ ಗುರ್ಕಾರೆರ್ ಸುದೀಪ್ ಕುಮಾರ್ ಶೆಟ್ಟಿ ಮೆರ್ ಈ ಲೇಸ್ ದ ಪೋಸ್ಟರ್ ನ್ ಪಾಣೇರ್ ದ ಬ್ಲಾಕ್ ಕಾಂಗ್ರೆಸ್ ದ ಕಛೇರಿಡ್ ಬುಡುಗಡೆ ಮಲ್ತೆರ್.
ಈ ಪೊರ್ತುಡು ಪಾಣೇರ್ ಬ್ಲಾಕ್ ಅಲ್ಪಸಂಖ್ಯಾತರ ಘಟಕದ ಗುರ್ಕಾರೆ ಅರ್ಷದ್ ಸರವು, ಯುವ ಕಾಂಗ್ರೆಸ್ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ರೋಶನ್ ರೈ, ಪ್ರಸಾದ್ ಗಾಣಿಗ, ಪಾಣೇರ್ ಬ್ಲಾಕ್ ಸಮಿತಿದ ಪದಾಧಿಕಾರಿಲು ಬೊಕ್ಕ ಪಕ್ಷದ ಕಾರ್ಯಕರ್ತೆರ್ ಇತ್ತೆರ್.
ಬೆದ್ರ: ಆಟೋ ರಿಕ್ಷಾ ಚಾಲಕ- ಮಾಲಕ ಸಂಘ ಬೆದ್ರ ದ ಗುರ್ಕಾರೆ ಆದ್ ಧರಣೇಂದ್ರ ಜೈನ್ ಕರಿಂಜೆ , ಪ್ರಧಾನ ಕಾರ್ಯದರ್ಶಿಯಾದ್ ದೀಪಕ್ ರಾಜ್ ಕೊಡಂಗಲ್ಲು ಆಯ್ಕೆ ಆತೆರ್.
ಗೌರವಾದ್ಯೆಕ್ಷೆರಾದ್ ಶರತ್ ಶೆಟ್ಟಿ, ಉಪಾಧ್ಯಕ್ಷೆರಾದ್ ಪೀರ್ ಸಾಹೇಬ್, ವಿಕ್ಟರ್ ಫೇರ್ನಾಂಡಿಸ್, ವಿಶ್ಬನಾಥ ಮಡಿವಾಳ, ಅಬ್ದುಲ್ ಲತೀಫ್ ಪುಚ್ಚಮೊಗರು, ಕೋಶಾಧಿಕಾರಿಯಾದ್ ನಾರಾಯಣ ಕಲ್ಲಬೆಟ್ಟು, ಜೊತೆ ಕಾರ್ಯದರ್ಶಿಯಾದ್ ವಿನಯ ಕುಮಾರ್ ಕೊಣಾಜೆ, ಸಂತೋಷ್ ರಾವ್ ನಾಗರಕಟ್ಟೆ, ಗೌರವ ಸಲಹೆಗಾರೆರಾದ್ ಸಂತೋಷ್ ಆರ್. ಶೆಟ್ಟಿ ಮಾರ್ನಾಡ್, ಪ್ರಶಾಂತ್ ಅಂಚನ್ ಒಂಟಿಕಟ್ಟೆ ಬೊಕ್ಕ 12 ಜನ ಕಾರ್ಯಕಾರಿ ಸಮಿತಿ ಸದಸ್ಯೆರಾದ್ ಆಯ್ಕೆ ಮಲ್ತೆರ್.
ಬೋಲ್ತೆರ್: ಕರಿನ ಒರ್ಬ ದಿನತ್ತ ಪಿರಾವು ಉಜಿರೆಡ್ ನಡತ್ತಿನ ನೋತಿನ ಪ್ರಕರಣಡ್ ಆರೋಪಿಲೆನ್ ಇನಿ ಮುಟಲ ಅರೆಸ್ಟ್ ಮಲ್ಪಂದಿನ ಪೊಲೀಸೆರ್ನ ಮಿತ್ತ್ ಬಾಸ್ಕರ್ ನಾಯ್ಕ್ ಹೈಕೋರ್ಟ್ ದೂರು ಕೊರ್ದು ಇತ್ತೆರ್. ಇನಿ ಅರ್ಜಿನ್ ಪರಿಶೀಲನೆ ನಡಪಾಯಿನ ಹೈಕೋರ್ಟ್ ದ.ಕ ಜಿಲ್ಲಾ ಎಸ್ಪಿಗ್ ಈ ಬಗೆಟ್ ಕಾರಣ ಕೇಂದ್ ನೋಟಿಸ್ ಕಡಪುರ್ದುಂಡು. ಆರೋಪಿಲೆನ್ ಕೂಡ್ಲೆ ಅರೆಸ್ಟ್ ಮಲ್ಪೆರೆ ಈ ನೋಟಿಸ್ ಡ್ ಆದೇಶನ್ ಕೋರ್ಟ್ ಕೊರ್ತುಂಡು.
ಮಹೇಶ್ ಶೆಟ್ಟಿ ತಿಮರೋಡಿನ ಚಡ್ಡಿ ದೋಸ್ತಿ ಭಾಸ್ಕರ್ ನಾಯ್ಕ್ ಸೆ.೩ ದಾನಿ ಬಯ್ಯಗ್ ಕುಡ್ಲದ ಯೂ ಟ್ಯೂಬ್ ಚಾನೆಲೆಗ್ ಸಂದರ್ಶನ ಕೊರ್ದು ವಾಪಾಸ್ ಬರ್ಪುನ ಪೊರ್ತುಗು ಮಹೇಶ್ ಶೆಟ್ಟಿ ತಿಮರೋಡಿ, ಮೋಹನ್ ಶೆಟ್ಟಿ, ಮುಖೇಶ್ ಶೆಟ್ಟಿ, ನಿತಿನ್, ಪ್ರಜ್ವಲ್ ಕೆ.ವಿ ಗೌಡ, ಪ್ರಮೋದ್ ಶೆಟ್ಟಿ, ಮೊಕುಲ್ ಕಾರ್ ನ್ ಅಡ್ಡ ದೀದ್ ನೋತುದೆರ್. ನೆತ್ತ ಬಗೆಟ್ ಬೋಲ್ತೆರ್ ಪೊಲೀಸ್ ಸ್ಟೇಷನ್ ಡ್ ಅಟ್ರಾಸಿಟಿ ಕೇಸ್ ದಾಖಲಾದ್ ಇತ್ತ್ಂಡ್.
ೆ
ಮಹೇಶ್ ಶೆಟ್ಟಿ ತಿಮರೋಡಿನ್ ೯ ದಿನ ಆಂಡಲ ಅರೆಸ್ಟ್ ಮಲ್ಪಂದೆ ಮನಿಪಂದೆ ಕುಲ್ದೆರ್. ಅವ್ ಅತ್ತಂದೆ ಕಟೀಲ್ ಬೋಲ್ತೆರ್ ಡ್ ನಡತ್ತಿನ ಪ್ರತಿಭಟನಾ ಸಭೆಟ್ ಮಹೇಶ್ ಶೆಟ್ಟಿ ಪಾಲ್ ಪಡೆದಿತ್ತೆರ್. ಈ ಬಗೆಟ್ ಭಾಸ್ಕರ್ ನಾಯ್ಕ್ ಕೋರ್ಟುಗು ದೂರು ಕೊರ್ದು ಇತ್ತೆರ್. ಅಂಚಾದ್ ಸೆ.12 (ಇನಿ) ಹೈಕೋರ್ಟ್ ಆದೇಶ ಕೊರ್ತುಂಡು.
ಬೇಗನೆ ಆರೋಪಿ ಮಹೇಶ್ ಶೆಟ್ಟಿ ತಿಮರೋಡಿ ಬೊಕ್ಕ ತಂಡನ್ ಅರೆಸ್ಟ್ ಮಲ್ತ್ ನ್ಯಾಯಾಲಯಗ್ ಹಾಜರ್ ಮಲ್ಪೊಡು ಪಂದ್ ಆದೇಶ ಕೊರ್ತೆರ್. ಹೈಕೋರ್ಟ್ ವಕೀಲೆರಾಯಿನ ರಾಜ್ ಶೇಖರ್ ಭಾಸ್ಕರ್ ನಾಯ್ಕ್ ಪರವಾದ್ ವಾದ ಮಲ್ತ್ ದೆರ್.
ಕುಡ್ಲ: 2023 ತ್ತ ಜಿಲ್ಲಾ ಮಟ್ಟದ ಸ್ವಚ್ಛ ಸರ್ವೇಕ್ಷಣ ಗ್ರಾಮೀಣ ಪ್ರಶಸ್ತಿನ್ ಗುರುಪುರ ಗ್ರಾಮ ಪಂಚಾಯತ್ ಪಡೆತ್ಂಡ್.
ಕೇಂದ್ರ ಪರ್ಪಿನ ನೀರ್ ಬೊಕ್ಕ ನೈರ್ಮಲ್ಯ ಇಲಾಖೆ ಬೊಕ್ಕ ಜಲಶಕ್ತಿ ಮಂತ್ರಾಲಯ, ಸ್ವಚ್ಛ ಭಾರತ್ ಮಿಷನ್ ಯೋಜನೆದಡಿಟ್ಟ್ ಸ್ವಚ್ಛ ಸರ್ವೇಕ್ಷಣ ಗ್ರಾಮೀಣ 2023 ಪನ್ಪುನ ಸಮೀಕ್ಷೆ ನಡಪಾದಿತ್ತ್ಂಡ್.
ಈ ಪ್ರಶಸ್ತಿನ್ ಸೆ.11 ಸೋಮಾರ ಕುಡ್ಲ ಜಿಲ್ಲಾ ಪಂಚಾಯತ್ ನೇತ್ರಾವತಿ ಸಭಾಂಗಣಡ್ ನಡತಿನ ಲೇಸ್ ಡ್ ಪ್ರಧಾನ ಮಲ್ತೆರ್. ಅಂಚೆನೆ ಈ ಸಾಧನೆಗ್ ಪ್ರತ್ಯಕ್ಷ ಬೊಕ್ಕ ಪರೋಕ್ಷವಾದ್ ಕಾರಣವಾಯಿನ ಮಾತೆರೆಗ್ಲಾ ಗುರುಪುರ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಸಫರ ಎಂ ಅಭಿನಂದನೆ ಸಂದಾದೆರ್.
ಕುಡ್ಲ : ಪಣಂಬೂರು ಬೀಚ್ ದಲ್ಪ ನಿಷೇಧಿತ ಅಂಬರ್ ಗ್ರೀಸ್ (ತಿಮಿಂಗಿಲದ ತೆಟ್ಟ್) ಮಾರ್ರೆ ತೂಯಿನ ಮೂಜಿ ಜನ ಅರೋಪಿಲೆನ್ ಕುಡ್ಲ ಪೇಂಟೆದ ಅಪರಾಧ ವಿಭಾಗದ ಪೋಲಿಸೆರ್ ಅರೆಸ್ಟ್ ಮಲ್ದೆರ್. ಅಕ್ಲೆಡ ಇತ್ತಿನ 90 ಲಕ್ಷ ರೂ. ಬಿಲೆತ್ತ ಅಂಬರ್ ಗ್ರೀಸ್ ನ್ ವಶಕ್ಕ್ ಪಡೆತೆರ್.
ಒಡಿಪು ಜಿಲ್ಲೆದ ಸಾಲಿಗ್ರಾಮ ಗ್ರಾಮದ ನಿವಾಸಿ ಜಯಕರ (39) ಶಿವಮೊಗ್ಗ ಜಿಲ್ಲೆದ ಸಾಗರ ತಾಲೂಕ್ ನಿವಾಸಿ ಅದಿತ್ಯ (25), ಹಾವೇರಿ ಜಿಲ್ಲೆದ ಶಿಗ್ಗಾಂವ್ ತಾಲೂಕ್ ನಿವಾಸಿ ಲೋಹಿತ್ ಕುಮಾರ್ ಗುರಪ್ಪನವರ್ (39) ಅರೆಸ್ಟ್ ಆಯಿನ ಆರೋಪಿಲು. ಈ ಬಗೆಟ್ಟ್ ಕೇಸ್ ದಾಖಲ್ ಮಲ್ತಿನ ಪೋಲಿಸೆರ್ ತನಿಖೆ ಮಲ್ತೊಂದುಲ್ಲೆರ್.
ಮುಲ್ಕಿ : ಸಮಾಜಸೇವಕೆರ್, ಧಾರ್ಮಿಕ ಮುಂದಾಳು, ಶಿಕ್ಷಣ ಪ್ರೇಮಿ ಅಂಚೆನೆ ಚಿತ್ರಕಲಾವಿದೆರಾದಿತ್ತಿನ ಹರಿಶ್ಚಂದ್ರ ವಿ.ಕೋಟ್ಯಾನ್ ಮೆರೆನ ಬದ್ ಕ್ ಬೊಕ್ಕ ಆದರ್ಶ ಸಮಾಜೊಗು ಮಾದರಿ ಆದುಂಡು ಪಂದ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು ಪಂಡೆರ್.
ಆರ್ ಮುಲ್ಕಿದ ಪುನರೂರು ಕಾಂಪ್ಲೆಕ್ಸ್ ದ ಚಾವಡಿಡ್ ಅಂಗಾರೆ ಬೊಲ್ಪುಗು ನಡತಿನ ಹರಿಶ್ಚಂದ್ರ ವಿ.ಕೋಟ್ಯಾನ್ ಶ್ರದ್ಧಾಂಜಲಿ ಸಭೆಟ್ಟ್ ಪಾತೆರಿಯೆರ್.
ಈ ಪೊರ್ತುಡು ಬಪ್ಪನಾಡು ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ಟಿ, ಲಯನ್ಸ್ ಅಧ್ಯಕ್ಷೆರ್ ಶೀತಲ್ ಸುಶೀಲ್, ರವಿಶಂಕರ್ ರೈ,ಮುಲ್ಕಿ ನಗರಪಂಚಾಯತ್ ಸದಸ್ಯೆರ್ ಹರ್ಷರಾಜ ಶೆಟ್ಟಿ ಜಿಎಂ, ಯೋಗೀಶ್ ಕೋಟ್ಯಾನ್ ಚಿತ್ರಾಪು, ಬಿಜೆಪಿ ಮಂಡಲ ಅಧ್ಯಕ್ಷೆರ್ ಸುನಿಲ್ ಆಳ್ವ, ಮುಲ್ಕಿ ಬಿಲ್ಲವ ಸಂಘದ ಅಧ್ಯಕ್ಷೆರ್ ಪ್ರಕಾಶ್ ಸುವರ್ಣ, ಸರೋಜಿನಿ ಸುವರ್ಣ, ಡಾಲ್ಫಿ ಡಿಕೋಸ್ತ,ವಾಸು ಪೂಜಾರಿ ಚಿತ್ರಾಪು, ಬಾಲಚಂದ್ರ ಸನಿಲ್ ಮೊಕುಲು ಎಚ್. ವಿ.ಕೋಟ್ಯಾನ್ ರೆನ ಸಮಾಜ ಸೇವೆನ್ ನೆಂಪು ಮಲ್ತೆರ್.
ಸಭೆಟ್ಟ್ ಅರೆನ ಆತ್ಮೊದ ಶಾಂತಿಗಾದ್ ಮೌನ ಪ್ರಾರ್ಥನೆ ನಡತ್ಂಡ್. ಸಭೆಟ್ಟ್ ವಿಜಯಕುಮಾರ್ ಕುಬೆವೂರು, ಸರ್ವೋತ್ತಮ ಅಂಚನ್, ದೇವಪ್ರಸಾದ್ ಪುನರೂರು, ಹರಿಶ್ಚಂದ್ರ ಸಾಲ್ಯಾನ್, ಲತಾ ಶೇಖರ್, ಚಂದ್ರಶೇಖರ ಸುವರ್ಣ, ಕಿಶೋರ್ ಜೆ ಸಾಲ್ಯಾನ್, ರಾಘು ಸುವರ್ಣ, ರಮೇಶ್ ಅಮೀನ್ ಕೊಕ್ಕರಕಲ್, ಭಾಸ್ಕರ ಹೆಗ್ಡೆ, ಪುರಂದರ ಸಾಲ್ಯಾನ್, ರಂಗನಾಥ ಶೆಟ್ಟಿ, ಸತೀಶ್ ಕಿಲ್ಪಾಡಿ, ಉದಯ ಕುಮಾರ್ ಮಟ್ಟು ಮೊಕುಲು ಮಾತ ಪಾಲ್ ಪಡೆದಿತ್ತೆರ್. ಈ ಪೊರ್ತುಡು ಅವಿನಾಶ್, ಜೀವನ್ ಸಾಲ್ಯಾನ್, ಶಿವರಾಮ್ ಮೊಕುಲು ಮಾತ ಇತ್ತೆರ್
ಹಳೆಯಂಗಡಿ: ಪಂಜ ಕೊಯಿಕುಡೆ ನವ ಜ್ಯೋತಿ ಮಹಿಳಾ ಮಂಡಲದ ವತಿರ್ದ್ 23ನೇ ವರ್ಷದ ವೈಭವ ಲಕ್ಷ್ಮಿ ಪೂಜೆ ಶ್ರೀ ವಿಠೋಭ ಭಜನಾ ಮಂದಿರಡ್ ಶುಕ್ರವಾರ ನಡತ್ಂಡ್.
ಪಂಜ ಶ್ರೀ ಮಹಾ ಗಣಪತಿ ಮಂದಿರದ ಪ್ರಧಾನ ಅರ್ಚಕೆರ್ ಸುರೇಶ್ ಭಟ್ ಮೆರೆನ ಮಾರ್ಗದರ್ಶನಡ್ ಮಂದಿರದ ಅರ್ಚಕೆರಾಯಿನ ಕಾರ್ತಿಕೇಯ ಭಾರ್ಗವ ಮೆರೆನ ಪೌರೋಹಿತ್ಯಡ್ ಪೂಜೆ ನಡತ್ಂಡ್.
ಈ ಪೊರ್ತುಡು ಮಹಿಳಾ ಮಂಡಲದ ಅಧ್ಯಕ್ಷೆರ್ ಬೊಕ್ಕ ಸದಸ್ಯೆರ್ ಅಂಚೆನೆ ಊರುದ ಗ್ರಾಮಸ್ಥೆರ್ ಇತ್ತೆರ್.
ನೆರ್ದ್ ದುಂಬು ಭಜನಾ ತಂಡಲೆರ್ದ ಭಜನಾ ಕಾರ್ಯಕ್ರಮ ನಡತ್ಂಡ್.
ಬೋಲ್ತೆರ್: ಯುವ ವಾಹಿನಿ ಕೇಂದ್ರ ಸಮಿತಿದ ಆಶ್ರಯಡ್ ಕುಡ್ಲದ ಪುರಭವನಡ್ ಸೆ.10 ಐತಾರ ದಾನಿ ನಡತ್ತಿನ ಡೆನ್ನಾನ ಡೆನ್ನನ-2023 ಅಂತರ್ ಘಟಕ ಸಾಂಸ್ಕೃತಿಕ ಪಂತೋ ಡ್ ಬೋಲ್ತೆರ್ ಯುವ ವಾಹಿನಿ ಘಟಕ ಸುರುತ ಇನಾಮುನು ಪಡೆಯೊಂದೆರ್.
ಸಾಮಾಜಿಕ ಸಮಸ್ಯೆದ ಕಥಾ ರಚನೆನ್ ಹೊಂದಿನ “ತಲ್ಲಣ” ಪನ್ಪಿನ ವಿಷಯನ್ ತಂಡ ಪ್ರಸ್ತುತ ಪಡಿಸಾದ್ ಇನಾಮುದ ಒಟ್ಟಿಗೆ 25,000 ಕ್ಯಾಶ್ ಪ್ರೈಜ್ ಅಂಚನೆ ಬಂಗಾರ್ದ ಪದಕನ್ ಪಡೆಯೊಂದೆರ್.
ಕಟೀಲ್: ಕರ್ತವ್ಯ ಮಲ್ಪುನಕ್ಲೆನ್ ದೇವೆರ್ ಏಪಲ ಆಶೀರ್ವಾದ ಮಲ್ಪುವೆರ್. ಅಂಚೆನೆ ಐಕಳ ಹರಿಶ್ ಶೆಟ್ಟಿ ಮೇರ್ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಅಧ್ಯಕ್ಷೆರಾದ್ ಸಮಾಜಮುಖಿ ಕೆಲಸನ್ ಮಲ್ತೊಂದು ಬೈದೆರ್. ಇಂಚಿನ ಕೆಲಸಗ್ ದೇವೆರೆನ ಆಶೀರ್ವಾದ ಉಂಡು ಪಂದ್ ಕಟೀಲ್ ದೇವಲ್ಯದ ಪ್ರಧಾನ ಅರ್ಚಕೆರ್ ಲಕ್ಷ್ಮೀನಾರಾಯಣ ಆಸ್ರಣ್ಣ ಪಂಡೆರ್.
ಮೇರ್ ಕಟೀಲ್ ಗೋಪಾಲಕೃಷ್ಣ ಆಸ್ರಣ್ಣ ಸಭಾಭವನಡ್ ನಡತಿನ ಲೇಸ್ ಡ್, ಒಡಿಪು ಅಜ್ಜರಕಾಡು ಮೈದಾನಡ್ ವಿಶ್ವ ಬಂಟರ ಸಮ್ಮೇಳನದ ಲೆಕ್ಕೊಡು ಅಕ್ಟೋಬರ್ 28 ಬೊಕ್ಕ 29 ಕ್ಕ್ ನಡಪರೆ ಇಪ್ಪುನ ವಿಶ್ವ ಬಂಟರ ಸಾಂಸ್ಕೃತಿಕ ವೈಭವದ ಕರಪತ್ರ ಬುಡುಗಡೆ ಮಲ್ತ್ ದ್, ಆಶೀರ್ವಚನ ಕೊರ್ದು, ಪಾತೆರಿಯೆರ್.
ಜಾಗತಿಕ ಬಂಟರ ಸಂಘಲೆನ ಒಕ್ಕೂಟ ಬೇತೆ ಸಂಘ ಸಂಸ್ಥೆಲೆಗ್ ಮಾದರಿಯಾದ್ ಕೆಲಸ ಮಲ್ತೊಂದು ಉಂಡು. ನಮ್ಮ ಜೋಕುಲೆಗ್ ಸಂಸ್ಕೃತಿ ಸಂಸ್ಕಾರ ಕೊರ್ಪುನ ಕೆಲಸ ನಡತೊಂದು ಉಂಡು. ಉಂದು ಏಪಲ ನಡತೊಂದು ಇಪ್ಪಡ್, ಸತ್ಕರ್ಮಲೆನ ಮುಖೇನ ನನಾತ್ ಎತ್ತರಗ್ ಬುಲೆವಡ್ ಪಂದ್ ಪಂಡೆರ್.
ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರ್ಲು ಐಕಳ ಹರೀಶ್ ಶೆಟ್ಟಿ ಪಾತೆರ್ದ್, ಜಾಗತಿಕ ಬಂಟರ ಸಂಘ ಸುಮಾರ್ 150 ಬಂಟರ ಸಂಘಲೆನ ಮಾತೃ ಸಂಘ ಆತ್ಂಡ್. ನೆತ್ತ ಮುತಾಲಿಕೆಡ್ ಅಕ್ಟೋಬರ್ 28 ಬೊಕ್ಕ 29 ಕ್ಕ್ ಒಡಿಪುದ ಅಜ್ಜರಕಾಡು ಮೈದಾನಡ್ ವಿಶ್ವ ಬಂಟರ ಸಮ್ಮೇಳನ ನಡಪರೆ ಉಂಡು. ಮಾತ ಬಂಟರ ಸಂಘಲೆನ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಬರಿಯೆರೆ ಉಲ್ಲೆರ್. ಸಾಂಸ್ಕೃತಿಕ ವೈಭವದ ಸಂಚಾಲಕೆರಾದ್ ಬಂಟ್ವಾಳ ಬಂಟರ ಸಂಘದ ಅಧ್ಯಕ್ಷೆರ್ ಚಂದ್ರಹಾಸ ಶೆಟ್ಟಿ ರಂಗೋಲಿ ಜಬದಾರಿನ್ ಬೊಕ್ಕ ಕ್ರೀಡಾ ಕೂಟದ ಸಂಚಾಲಕೆರಾದ್ ಗಿರೀಶ್ ಶೆಟ್ಟಿ ತೆಳ್ಳಾರ್ ಜಬದಾರಿನ್ ಒಯಿಸೊಂದೆರ್. ನಳಿನ ಭೋಜ ಶೆಟ್ಟಿ ಕ್ರೀಡಾ ವೇದಿಕೆ ಬೊಕ್ಕ ಕನ್ಯಾನ ಸದಾಶಿವ ಶೆಟ್ಟಿ ಸಾಂಸ್ಕೃತಿಕ ಚಾವಡಿಡ್ ಗೌಜಿಡ್ ಈ ಲೇಸ್ ನಡಪರೆ ಉಂಡು. ಲೇಸ್ ಡ್ ಸ್ವಾಮೀಜಿಲು, ರಾಜಕೀಯ ಮುಖಂಡೆರ್ ಸಿನಿಮಾ ಸ್ಟಾರ್ಸ್ ಬೊಕ್ಕ ಬೇತೆ ಬೇತೆ ರಂಗದ ಸಾಧಕೆರ್ ಪಾಲ್ ಪಡೆಯೆರೆ ಉಲ್ಲೆರ್. ಸಾರರ್ದ್ ಎಚ್ಚ ಜನ ಸೇರುನ ನೀರೀಕ್ಷೆ ಉಂಡು ಪಂದ್ ಪಂಡೆರ್.
ಲೇಸ್ ರ್ದ್ ಸುರುಕು ಕಟೀಲ್ ದೇವಲ್ಯಡ್ ಕಟೀಲ್ ದೇವಲ್ಯದ ಪ್ರಧಾನ ಅರ್ಚಕೆರ್ ವೆಂಕಟರಮಣ ಆಸ್ರಣ್ಣ ಮೆರೆನ ದುಂಬಾತ್ತಿಗೆಡ್ ಪ್ರಾರ್ತನೆ ಸಂದಾಯೆರ್.
ಈ ಪೊರ್ತುಡು ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ ಶೆಟ್ಟಿ, ಬಂಟ್ವಾಳದ ಬಂಟರ ಸಂಘ ಗುರ್ಕಾರ್ರ್ ಸಾಂಸ್ಕೃತಿಕ ವೈಭವದ ಸಂಚಾಲಕೆರ್, ಚಂದ್ರಹಾಸ ಶೆಟ್ಟಿ ರಂಗೋಲಿ, ಮುಲ್ಕಿ ಬಂಟರ ಸಂಘದ ಗುರ್ಕಾರ್ಲು ಪುರುಷೋತ್ತಮ ಶೆಟ್ಟಿ, ಗೌರವಾಧ್ಯಕ್ಷೆರ್ ಸಂತೋಷ್ ಕುಮಾರ್ ಹೆಗ್ಡೆ, ಎಕ್ಕಾರು ಬಂಟರ ಸಂಘದ ಅಧ್ಯಕ್ಷೆರ್ ರತ್ನಾಕರ ಶೆಟ್ಟಿ, ಸುರತ್ಕಲ್ ಬಂಟರ ಸಂಘದ ನಿಕಟಪೂರ್ವ ಅಧ್ಯಕ್ಷೆರ್ ಸುಧಾಕರ ಎಸ್ ಪೂಂಜ, ಬೆಳ್ಮಣ್ ಬಂಟರ ಸಂಘದ ಸತೀಶ್ ಶೆಟ್ಟಿ, ಒಕ್ಕೂಟದ ಮಾಜಿ ಕೋಶಾಧಿಕಾರಿ ಕೊಲ್ಲಾಡಿ ಬಾಲಕೃಷ್ಣ ರೈ, ಪ್ರಚಾರ ಸಮಿತಿದ ಸಂಚಾಲಕೆರ್ ಬಾಳ ಜಗನ್ನಾಥ ಶೆಟ್ಟಿ, ಸಾಯಿನಾಥ ಶೆಟ್ಟಿ, ಶರತ್ ಶೆಟ್ಟಿ, ನಿಶಾಂತ್ ಶೆಟ್ಟಿ, ರೂಪಾರಾಣಿ ಶೆಟ್ಟಿ, ಪ್ರಮೀಳಾ ಶೆಟ್ಟಿ, ಭಾಗ್ಯರಾಜ್ ಶೆಟ್ಟಿ, ಸಾಹಿಲ್ ರೈ, ಅಭಿಷೇಕ್ ಶೆಟ್ಟಿ, ರವಿರಾಜ್ ಶೆಟ್ಟಿ ಜತ್ತಬೆಟ್ಟು ಪಾಲ್ ಪಡೆದಿತ್ತೆರ್.
