ತುಳು ಮಾತಾ ಜನಕ್ಲೆನ್ ಸಮಾನವಾದ್ ತೂಪಿನ ಭಾಷೆ : ಪದ್ಮಶ್ರೀ ಹರೇಕಳ ಹಾಜಬ್ಬ
ತುಳು ನಮ್ಮ ಅಪ್ಪೆ ಭಾಷೆ. ನಮ್ಮ ಮಾತೆರ್ನಲ ಭಾಷೆ ಆದುಂಡು. ತುಳುನಾಡ್‌ದ ಮಾತಾ ಜನಕ್ಲೆನ್ ಸಮಾನವಾದ್ ತೂಪಿನ ಭಾಷೆ. ಜಾತಿ, ಮತ, ಧರ್ಮನ್ ಮೀರುನ ಭಾಷೆ. ತುಳುಟ್ಟ್ ನನಾತ್ ಕಬಿತೆಲು ಬುಡುಗಡೆ ಆವೊಡು ಪಂದ್ ಪದ್ಮಶ್ರೀ ಹರೇಕಳ ಹಾಜಬ್ಬೆರ್ ಪಂಡೆರ್.
ಮೇರ್ ಡಿ.11 ಐತಾರದಾನಿ ಕುಡ್ಲ ಪೇಂಟೆದ ಕೆನರಾ ಕಾಲೇಜ್‌ದ ಸಭಾ ಚಾವಡಿಡ್ ನಡತಿನ ಕವಿ, ಸಾಹಿತಿ ರಘು ಇಡ್ಕಿದು ಮೆರೆನ 28ನೇ ಕೃತಿ ಆಯಿನ “ಮೋಕೆದಾಲೆಡ ಕೊಂಡಾಟದ ಪಾತೆರ” ತುಳು ಕಬಿತೆದ ಬೂಕುನು ಬುಡುಗಡೆ ಮಲ್ತ್‌ದ್ ಪಾತೆರಿಯೆರ್.
ಲೇಸ್‌ದ ಗುರ್ಕಾರ್ಮೆ ವಹಿಸೊನಿನ ಪೆರಿಯ ಸಾಹಿತಿ ಸದಾನಂದ ನಾರಾವಿ ಪಾತೆರ್ದ್, ನಮ್ಮ ಬೂಕುನು ಬೇತೆಕುಲು ಎಂಚ ಓದೊಡು ಪಂದ್ ನಮ ಬಯಕುವನ ಅಂಚನೆ ನಮಲ ಅಕ್ಲೆನ ಬೂಕುನು ಓದೊಡು. ಮಾತ ಬೂಕುನು ಓದುನ ಅಭ್ಯಾಸ ಮಲ್ಪೊಡು. ಬರವುದ ಜ್ಞಾನ ಇತ್ತ್ಂಡ ಎಡ್ಡೆ ರೀತಿಡ್ ಕಬಿತೆ ಬರೆಯರೆ ಸಾಧ್ಯ ಪಂದ್ ಪಂಡೆರ್.
ತುಳು ರಂಗಭೂಮಿದ ಪೆರಿಯ ನಟೆ ಜಯಶೀಲ ಮರೋಳಿ, ಸುರತ್ಕಲ್ ಗೋವಿಂದದಾಸ್ ಕಾಲೇಜಿದ ಪ್ರಾಂಶುಪಾಲೆರಾಯಿನ ಪ್ರೊ.ಪಿ.ಕೃಷ್ಣಮೂರ್ತಿ, ಕುಡ್ಲ ತಾಲೂಕ್ ಚುಟುಕು ಸಾಹಿತ್ಯ ಪರಿಷತ್ತ್‌ದ ಗುರ್ಕಾರ್ಲು ಕಾ.ವೀ.ಕೃಷ್ಣದಾಸ್, ಶಿಕ್ಷಕೆರ್ ರಮೇಶ್ ಉಳಯ ಮಲ್ಲ ಬಿನ್ನೆರಾದ್ ಲೇಸ್‌ಡ್ ಪಾಲ್ ಪಡೆದಿತ್ತೆರ್.
ವಿನಮ್ರ ಇಡ್ಕಿದು, ಆತ್ಮಿ, ನಮೀಶ್ ಪ್ರಾರ್ಥನೆ ಮಲ್ತೆರ್. ರಘು ಇಡ್ಕಿದು ಬತ್ತಿ ಬಿನ್ನೆರೆನ್ ಎದ್ಕೊನಿಯೆರ್. ವಿದ್ಯಾ ರಘು ಇಡ್ಕಿದು ಬತ್ತಿನ ಬಿನ್ನೆರೆಗ್ ಸೊಲ್ಮೆ ಸಂದೈತ ಮಲ್ತೆರ್. ಲತೀಶ್ ಸಂಕೋಳಿಗೆ ಲೇಸ್ ಸುಧಾರಿಕೆ ಮಲ್ತೆರ್.
ವೇದಮೂರ್ತಿ ಶ್ರೀ ಲಕ್ಷ್ಮೀನಾರಾಯಣ ಅಸ್ರಣ್ಣೆರ್ ತುಡರ್ ಅರ್ಲಾದ್ ಲೇಸ್‌ನ್ ಉದಿಪನ ಮಲ್ತೆರ್.
ತೀರ್ ಪೋಯಿನ ಪೊಣ್ಣು ಬಾಲೆನ್ ಆದಿವಾಸಿ ಕಾಲೊನಿದ ಪದ್ಮನಾಭನ್ ಬೊಕ್ಕ ವಿಲಾಸಿನಿ ಮೊಕಲೆನ ಮಗಲ್ ಪಂದ್ ಗುರ್ತಿಸಾದೆರ್. ರಾತ್ರೆ ಮಿರೆಪೇರ್ ಕೊರ್ದು ಜೆತ್ತಿನ ಬಾಲೆ ಕಾಂಡೆ ತೂನಗ ತೀರ್ ಪೋತುಂಡು. ಮರಣೋತ್ತರ ಪರೀಕ್ಷೆಡ್ ಮಿರೆ ಪೇರ್ ದೊಂಡೆಡ್ ತಿಕೊಂದು ಬಾಲೆ ತೀರ್ ಪೋತುಂಡು ಪಂದ್ ವರದಿಯಾತ್ಂಡ್.
