ಕಾಸ್ರೋಡ್ ಸುದ್ದಿ | Kasargod News

ಪತ್ರಕರ್ತೆರೆಗ್ ವಿಶೇಷ ಪ್ಯಾಕೇಜ್ ಕೊರಿಯೆರೆ ಮುಖ್ಯಮಂತ್ರಿಗ್ ಮನವಿ

ಕುಡ್ಲ , ಮೇ 21: ಕೋವಿಡ್-19, ಲಾಕ್‌ಡೌನ್ ನೆಲೆಟ್ಟ್ ಸಂಕಷ್ಟಡ್ ಪತ್ರಕರ್ತೆರೆಗ್ ವಿಶೇಷ ಪ್ಯಾಕೇಜ್ ಘೋಷಣೆ ಮಲ್ಪೊಡು ಪಂದ್ ದ.ಕ.ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ವತಿರ್ದ್ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪಗ್ ಮನವಿ ಮಲ್ದೆರ್ .

ಸಂಘದ ರಾಜ್ಯಾಧ್ಯಕ್ಷ ಶಿವಾನಂದ ತಗಡೂರ್ ಮುಖೇನ ಸಂಘದ ಜಿಲ್ಲಾಧ್ಯಕ್ಷ ಶ್ರೀನಿವಾಸ ನಾಯಕ್ ಇಂದಾಜೆ ಮುಖ್ಯಮಂತ್ರಿಗ್ ಮಲ್ತಿನ ಮನವಿಡ್ ಕೋವಿಡ್-19, ಲಾಕ್‌ಡೌನ್‌ರ್ದಾವರ ಪತ್ರಕರ್ತೆರ್ ಕಷ್ಟಡ್ ಉಲ್ಲೆರ್ . ಐಟ್ ಲಾ ಮುಖ್ಯವಾದ್ ಗ್ರಾಮೀಣ ಪ್ರದೇಶದ ಪತ್ರ ಕರ್ತೆರ್ನ ಶೋಚನೀಯವಾದುಂಡು . ಅಕ್ಲೆಗ್ ಸಂಬಳ, ಗೌರವಧನ ಇಜ್ಜಂದಿಲಕ ಆತುಂಡು . ಅಕ್ಲೆನ ಕುಟುಂಬ ಸಂಕಷ್ಟಗ್ ತಿಕೊಲ್ದುಂಡು . ಅಕ್ಲೆಗ್ ಜೀವನ ಸಾಗಿಸಾವುನೆ ಮಲ್ಲ ಸವಾಲಾದುಂಡು. ಇಂಚೋಗು ಸರಕಾರ ಪತ್ರಕರ್ತೆರೆನ್ ಫ್ರಂಟ್‌ಲೈನ್ ವಾರಿಯಸ್ ಪಂದ್ ಘೋಷಣೆ ಮಲ್ದೆರ್ ಕೇವಲ ಕೋವಿಡ್ ಲಸಿಕೆನ್ ಮಾತ್ರ ಕೊರ್ತುಂಡು .

ಕನಕದಾಸ ಪೀಠ ವತಿರ್ದ್ ಮೇ 23 ಕ್ಕ್ ರಾಜ್ಯಮಟ್ಟದ ಕವಿಗೋಷ್ಠಿ

ಕುಡ್ಲ , ಮೇ 22:  ಕುಡ್ಲ ವಿಶ್ವವಿದ್ಯಾನಿಲಯದ ಕನಕದಾಸ ಅಧ್ಯಯನ ಪೀಠದ ವತಿರ್ದ್ ‘ತಲ್ಲಣಿಸದಿರು ಕಂಡ್ಯ ತಾಳು ಮನವೇ’ ಪರಿಕಲ್ಪನೆದಡಿ ರಾಜ್ಯಮಟ್ಟದ ಕವಿಗೋಷ್ಟಿನ್ ಆನ್‍ಲೈನ್ ಮುಖೇನ ಅಟ್ಟನೆ ಮಲ್ದೆರ್ .

ಮೇ.23 ಐತಾರ ಬೈಯ್ಯಗ್ 4.30ರ್ದ್ ಕವಿಗೋಷ್ಟಿ ನ್ ಪ್ರಸಿದ್ಧ ಕವಿಲಾಯಿನ ಎಚ್. ಡುಂಡೀರಾಜ್ ಉದಿಪನ ಮಲ್ಪರೆ ಉಲ್ಲೆರ್ .ಕುಡ್ಲ ವಿಶ್ವವಿದ್ಯಾನಿಲಯದ ಕುಲಪತಿ ಪ್ರೊ. ಪಿ.ಎಸ್ ಯಡಪಡಿತ್ತಾಯ ಗುರ್ಕಾರ್ಮೆ ವಹಿಸರೆ ಉಲ್ಲೆರ್ .

ಕವಿಲಾಯಿನ ಆರ್ ತಾರಿಣಿ ಶುಭದಾಯಿನಿ ಚಿತ್ರದುರ್ಗ, ಆನಂದ ಋಗ್ವೇದಿ ದಾವಣಗೆರೆ, ರಾಧಾಕೃಷ್ಣ ಬೆಳ್ಳೂರು ಕಾಸರಗೋಡು, ಚಿದಾನಂದ ಸಾಲಿ ರಾಯಚೂರು ಬೊಕ್ಕ ಕಾತ್ಯಾಯಿನಿ ಕುಂಜಿಬೆಟ್ಟು ಒಡಿಪು ಮೇರ್ ತಲ್ಲಣಿಸದಿರು ಕಂಡ್ಯ ತಾಳು ಮನವೇ ಪನ್ಪಿನ ಪರಿಕಲ್ಪನೆಗ್ ಪೂರಕವಾಪಿಲಕ ವರ್ತಮಾನದ ತಲ್ಲಣನ್ ಮೀರುನ ಬಗ್ಗೆ ಕಬಿತೆ ವಾಚಿಸಾಯೆರೆ ಉಲ್ಲೆರ್.

ಎಚ್ಆರ್ ಎಸ್ ವತಿರ್ದ್ ಆಶಾಕಾರ್ಯಕರ್ತೆರೆಗ್ ಆಕ್ಸಿಮೀಟರ್ ವಿತರಣೆ

ಕುಡ್ಲ,ಮೇ 21: ಜಮಾಅತೆ ಇಸ್ಲಾಮಿನ ಹಿಂದ್ ಅಂಗಸಂಸ್ಥೆ ಹ್ಯುಮಾನಿಟೇರಿಯನ್ ರಿಲೀಫ್ ಸೊಸೈಟಿ ವತಿರ್ದ್ ತೆಂಕ ಎಡಪದವು ಗ್ರಾಮ ಪಂಚಾಯತ್ ದ ಆಶಾ ಕಾರ್ಯಕರ್ತೆರ್ ಬೊಕ್ಕ ಪಂಚಾಯತ್ ಸಿಬ್ಬಂದಿಲೆಗ್ 20 ಮಾಸ್ಕ್ (N95) ಬೊಕ್ಕ 1 ಆಕ್ಸಿಮೀಟರ್ ನ್ ಹ್ಯುಮಾನಿಟೇರಿಯನ್ ರಿಲೀಫ್ ಸೊಸೈಟಿ ಮೂಡುಬಿದಿರೆ ತಂಡದಕುಲು ಬೊಕ್ಕ ವೆಲ್ಪೇರ್ ಪಾರ್ಟಿ ಆಫ್ ಇಂಡಿಯಾ ನೆತ್ತ ಗುರುಪುರ ವಲಯ ಕಾರ್ಯದರ್ಶಿ ಮುನೀರ್ ಪದ್ರೆಂಗಿ ಕೊರಿಯೆರ್.

ಈ ಪೊರ್ತುಡು ತೆಂಕ ಎಡಪದವು ಪಂಚಾಯತ್ ಗುರ್ಕಾರ್ಲಾಯಿನ ಸುಕುಮಾರ್, ಉಪಾಧ್ಯಕ್ಷೆ ಪ್ರೇಮ, ಗ್ರಾಮಾಭಿವೃದ್ಧಿ ಅಧಿಕಾರಿ (ಪಿಡಿಒ) ರಾಜೀವಿ, ಕಾರ್ಯದರ್ಶಿ ಇಸ್ಮಾಯಿಲ್ ಹಾಗೂ ಜಮಾಅತೆ ಇಸ್ಲಾಮಿ ಹಿಂದ್ ಎಡಪದವು ಸಂಚಾಲಕ ಝಾಕಿರ್ ಹಸೈನ್ ಪಾಲ್ ಪಡೆದಿತ್ತೆರ್ .

ಪಡುಬಿದ್ರೆ : ಟಗ್ ತೆರವು ಮಲ್ಪರೆ ತಯಾರಿ

ಪಡುಬಿದ್ರಿ, ಮೇ 21: ಕರಿನ ವಾರ ತೌಕ್ತೆ ಚಂಡಮಾರುತಗ್ ತಿಕೊಲ್ದು ಕಡಲ್ ಡ್ ಮುರ್ಕುದು ಪಡುಬಿದ್ರಿದ ಕಾಡಿಪಟ್ಣ ಕಡಲ್ ದ ಬರಿಟ್ ಪತ್ತೆಯಾಯಿನ ಟಗ್ ತೆರವು ಮಲ್ಪರೆ ಬೋಡಾಯಿನ ತಯಾರಿ ನಡತುದುಂಡು.

ಬಿಲಾಲ್ ಮೊಯ್ದಿನ್ ಮುತಾಲಿಕೆದ ಕುಡ್ಲ ಬದ್ರಿಯಾ ತಜ್ಞರ ಕೂಟ ತೆರವು ಕಾರ್ಯಾಚರಣೆ ಸುರು ಮಲ್ದುಂಡು.

ತೆಡಿಲ್ ಬರ್ಸ ಮೂಜಿ ಇಲ್ಲಗ್ ಹಾನಿ

ಭಟ್ಕಳ ಮೇ 21: : ಪೇಂಟೆದ ಬೇಂಗ್ರೆಯ ಚಿಟ್ಟಿಹಕ್ಲಿಡ್ ಗುರುವಾರ ರಾತ್ರಿ ಭಾರೀ ತೆಡಿಲ್ ಮಿಂಚ್ ಗಾಳಿ ಬರ್ಸಗ್ ಮೂಜಿ ಇಲ್ಲಗ್ ಹಾನಿ ಆತುಂಡು,ಕರೆಂಟ್ ದ ಮೀಟರ್ ಸೇರಿನoಚ ಬಾಕಿದ ಇಲ್ಲದ ಸಾಮಗ್ರಿ ಪೊತ್ತುದುಂಡು.

ಚಿಟ್ಟಿಹಕ್ಲಿದ ಗಣಪತಿ ಜಟ್ಟಯ್ಯ ದೇವಡಿಗ ಮೆರ್ನ ಇಲ್ಲಗ್ ತೆಡಿಲ್ ಹಾಕ್ ದ್ ಇಲ್ಲ್ ಬಿರುಕು ಬುಡ್ತಿನ ಮಾಹಿತಿ ತಿಕ್ಕ್ ದುಂಡು.

ನಡಿಕುದ್ರು ಪರಪಟ್ಟ ಪ್ರದೇಶಗ್ ತಹಶೀಲ್ದಾರ್ ಭೇಟಿ

ಪಡುಬಿದ್ರಿ, ಮೇ 21: ತೌಕ್ತೆ ಚಂಡಮಾರುತ ಪ್ರಭಾವರ್ದ್ ಉಪ್ಪುನೀರು ಬತ್ದ್ ಹೆಜಮಾಡಿ ಗ್ರಾಮ ಪಂಚಾಯಿತಿ ವ್ಯಾಪ್ತಿದ ನಡಿಕುದ್ರು, ಪರಪಟ್ಟ ಪ್ರದೇಶದಲ್ಲಿ ಕೃಷಿಕೆರೆಗ್ ಬೊಕ್ಕ ಪರ್ಪಿನ ನೀರ್ ಗ್ ಸಮಸ್ಯೆಯಾಯಿನ ಪ್ರದೇಶಗ್ ಕಾಪು ತಹಸೀಲ್ದಾರ್ ಪ್ರತಿಭಾ ಆರ್ ಭೇಟಿ ಕೊರಿಯೆರ್ .

ಈ ಪೊರ್ತುಡು ತಹಸೀಲ್ದಾರ್, ಹೆಜಮಾಡಿ ಗ್ರಾಮದ ನಡಿಕುದ್ರು, ಪರಪಟ್ಟ ಪ್ರದೇಶಗಗ್ ತುರ್ತು ಪರ್ಪಿನ ನೀರ್ ಕೊರಿಯರೆ ಕ್ರಮ ದೆತೊನೆರೆ ಗ್ರಾಮ ಪಂಚಾಯಿತಿ ಪಿಡಿಒ ಗ್ ಸೂಚನೆ ಕೊರಿಯೆರ್.

ಈ ಪೊರ್ತುಡು ಕಂದಾಯ ನಿರೀಕ್ಷಕ ಸುಧೀರ್‍ಕುಮಾರ್ ಶೆಟ್ಟಿ, ಗ್ರಾಮಕರಣಿಕ ಅರುಣ್ ಕುಮಾರ್, ಉಪಾಧ್ಯಕ್ಷೆ ಪವಿತ್ರ ಗಿರೀಶ್, ಸದಸ್ಯ ಪಾಂಡುರಂಗ ಕರ್ಕೇರ, ಪಿಡಿಒ ಸುಮತಿ, ಕೈತಲ್ದಕುಲಾಯಿನ ವಾಮನ ಕೋಟ್ಯಾನ್, ಉಮೇಶ್ ಪಾಲ್ ಪಡೆದಿತ್ತೆರ್.

ಜಿಲ್ಲೆಡ್ ಪೊಸ ಮಾರ್ಗಸೂಚಿ ಬುಡುಗಡೆ ಮಲ್ದ್ ಜಿ : ಡಿ.ಸಿ.ಸ್ಪಷ್ಟನೆ

ಪುತ್ತೂರು, ಮೇ 20: ಕೋವಿಡ್ ನಿಯಂತ್ರಣಗ್ ಸಂಭಂದ ಪಟ್ಟಿನoಚ ದಕ್ಷಿಣ ಕನ್ನಡಡ್ ಒವ್ವೆ ಪೊಸ ಮಾರ್ಗಸೂಚಿ ಬುಡುಗಡೆ ಮಲ್ದುಜ , ಸದ್ಯಗ್ ಇತ್ತೆದ ಮಾರ್ಗಸೂಚಿಯೇ ಜಾರಿಡ್ ಉಪ್ಪುಂಡು ಪಂದ್ ದ.ಕ.ಜಿಲ್ಲಾಧಿಕಾರಿ ಡಾ.ಕೆ.ವಿ ರಾಜೇಂದ್ರ ಪ್ರಕಟಣೆಡ್ ಪಂಡೆರ್. ದ.ಕ.ಜಿಲ್ಲೆಡ್ ಕೆಲವು ನಿರ್ಬಂಧದೊಟ್ಟುಗು ಪೊಸ ಮಾರ್ಗಸೂಚಿ ಬುಡುಗಡೆ ಆಪುಂಡು , ವಾರಡ್ ರಡ್ಡ್ ದಿನ ಮಾತ್ರ ಸಾಮಾಗ್ರಿ ಖರೀದಿಗ್ ಅವಕಾಶ ,ಮದಿಮೆ ಸಮಾರಂಭಗ್ ಅವಕಾಶ ಇಜ್ಜಿ ಪಂದ್ ಸಾಮಾಜಿಕ ಜಾಲತಾಣ ಬೊಕ್ಕ ವೆಬ್ ಮಾಧ್ಯಮಡ್ ಬರೊಂದು ಉಪ್ಪುನ ವರದಿದ ಬಗ್ಗೆ ಜಿಲ್ಲಾಧಿಕಾರಿಡ ಮಾಹಿತಿ ಕೇನ್ನಗ ಅವು ತಪ್ಪು ಮಾಹಿತಿ ಪಂದ್ ಡಾ.ಕೆ.ವಿ.ರಾಜೇಂದ್ರ ಸ್ಪಷ್ಟನೆ ಕೊರ್ತೆರ್ .

ರಾಜಕೀಯ ಮಲ್ಪಂದೆ ಕೋವಿಡ್ ನಿರ್ಮೂಲನೆಗ್ ಸಾಕಾರ ಕೊರ್ಲೆ : ದಿನೇಶ್

ಕಲ್ಲಡ್ಕ ಮೇ 20: ಕೋವಿಡ್ ನಿರ್ಮೂಲನೆನೇ ನಮ್ಮ ಸುರುತ್ತ ಆದ್ಯತೆಯಾದುಂಡು ರಾಜಕೀಯ ಮಲ್ಪಂದೆ ಮಾತೆರ್ಲ ಜವಬ್ದಾರಿರ್ದ್ ವರ್ತಿಸಾಲೆ ಗ್ರಾಮ ಪಂಚಾಯತ್ ದ ಒಟ್ಟುಗು ಸಾಕಾರ ಕೊರ್ಲೆ ಪಂದ್ ಗ್ರಾಮ ಪಂಚಾಯತ್ ಗುರ್ಕಾರ್ಲಾಯಿನ ದಿನೇಶ್ ಪಂಡೆರ್.

ಮೇರ್ ವೀರಕಂಭ ಗ್ರಾಮ ಪಂಚಾಯತ್ಡ್ ಬುಧವಾರ ನಡತಿನ ಕೋವಿಡ್ ಟಾಸ್ಕ್ ಫೋರ್ಸ್ ಸಮಿತಿ ಸಭೆಟ್ ಸಮಿತಿದ ಸದಸ್ಯೆರಾಯಿನ ವೀರಕಂಭ ವ್ಯಾಪ್ತಿದ ಆರೋಗ್ಯ ಸಹಾಯಕಿಯೆರ್ , ಆಶಾ ಕಾರ್ಯಕರ್ತೆರ್ , ಅಂಗನವಾಡಿ ಶಿಕ್ಷಕಿರ್ ಅಂಚನೆ ಪಂಚಾಯತ್ ದ ರಡ್ಡ್ ಸಿಬ್ಬಂದಿಲೆಗ್ ಪಂಚಾಯತ್ ವತಿರ್ದ್ ರೈನ್ ಕೋಟು ಬೊಕ್ಕ ಮಾಸ್ಕ್ ಕೊರ್ದು ಪಾತೆರಿಯೆರ್.

ಪಂಚಾಯತ್ ವ್ಯಾಪ್ತಿದ ಪ್ರತಿ ವಾರ್ಡ್ ದ ಸದಸ್ಯೆರ್ ತಮ್ಮ ವ್ಯಾಪ್ತಿಡುಪ್ಪುನ ಅಂಗಡಿಲೆನ್ ಜಿಲ್ಲಾಡಳಿತ ಕೊರಿನ ಪೊರ್ತುಡು ತಕ್ಕ ಬೇಲೆ ಮಲ್ಪರೆ ಅಂಚನೆ ಹೊರರಾಜ್ಯ ಪಿದಾಯಿದ ಜಿಲ್ಲೆರ್ದ್ ಬರ್ಪಿನ ನಾಗರಿಕೆರ್ನ ಬಗ್ಗೆ ಮಾಹಿತಿ ಕೊರ್ಪಿನೆತ್ತ ಒಟ್ಟುಗು ತಮ್ಮ ತಮ್ಮ ವಾರ್ಡ್ ವ್ಯಾಪ್ತಿಡ್ 45 ವರ್ಷ ಜಾಸ್ತಿ ಆಯಿನಕುಲು ಲಸಿಕೆ ಪಾಡೆರೆ ಬಾಕಿ ಇಪ್ಪುನ ನಾಗರಿಕೆರೆನ್ ಗುರ್ತಿಸಾದ್ ಲಸಿಕೆ ಪಾಡಾವುನ ಜವಾಬ್ದಾರಿ ಕೊರಿಯೆರ್.
ಗ್ರಾಮ ಪಂಚಾಯತ್ ಒತ್ತು ಗುರ್ಕಾರ್ದಿ ಶ್ರೀಮತಿ ಶೀಲಾ ವೇಗಸ್ ,ಪಿ‌.ಡಿ.ಒ. ಗಿರಿಜಾ ಪಿ., ಗ್ರಾಮ ಕರಣಿಕ ಕರಿಬಸಪ್ಪ, ಟಾಸ್ಕ್ ಫೋರ್ಸ್ ಸಮಿತಿ ಸದಸ್ಯೆರ್ ಪಾಲ್ ಪಡೆದಿತ್ತೆರ್ .

ಪುತ್ತೂರುಡು ಒಂಜಿ ಕೋಟಿ ರೂ ವೆಚ್ಚಡ್ ಆಕ್ಸಿಜನ್ ಪ್ಲಾಂಟ್ ನಿರ್ಮಾಣಗ್ ಶಿಲಾನ್ಯಾಸ

ಪುತ್ತೂರು, ಮೇ 20: ಪುತ್ತೂರು ಸರ್ಕಾರಿ ಆಸ್ಪತ್ರೆದ ಕೈತಲ್ ಕ್ಯಾಂಪ್ಕೋ ಸಂಸ್ಥೆದ ಒಟ್ಟು ಸೇರಿಗೇಡ್ ಸುಮಾರ್ ರೂ. 1 ಕೋಟಿ ವೆಚ್ಚಡ್ ಪೊಸತಾದ್ ಕಟ್ಟರೆ ಉಪ್ಪುನ 450 ಎಲ್‌ಎಪಿ ಉತ್ಪಾದನಾ ಸಾಮರ್ಥ್ಯದ ಸಿಲಿಂಡರ್ ಆಕ್ಸಿಜನ್ ಉತ್ಪಾದನಾ ಘಟಕಗ್ ಬುಧವಾರ ಸಂಸದೆರ್ ಬೊಕ್ಕ ಬಿಜೆಪಿ ರಾಜ್ಯಾಧ್ಯಕ್ಷ ನಳಿನ್ ಕುಮಾರ್ ಕಟೀಲು ಶಿಲಾನ್ಯಾಸ ಮಲ್ತೆರ್ .

ಈ ಪೊರ್ತುಡು ಪಾತೆರಿನ ಶಾಸಕ ಸಂಜೀವ ಮಠಂದೂರು, ಕ್ಯಾಂಪ್ಕೋ ಸಂಸ್ಥೆ ಪುತ್ತೂರುಗು ಅವ್ವೆತೋ ಮಲ್ಲ ಮಟ್ಟದ ಕೊಡುಗೆಲೆನ್ ದುಂಬುರ್ದು ಲಾ ಕೊರೊಂದು ಬೈದುಂಡು ಪಂದ್ ಪಂಡೆರ್.

ಡಿವೈಎಫ್‌ಐ ಸಂಘಟನೆದ ವತಿರ್ದ್ ನೆತ್ತೆರ್ ದಾನ ಶಿಬಿರ

ಕುಡ್ಲ , ಮೇ 19: ಕೋವಿಡ್‌ಗ್ ಸಂಬಂಧ ಪಟ್ಟಿನoಚ ಡಿವೈಎಫ್‌ಐ ಸಂಘಟನೆದ ಹೆಲ್ಪ್ಲೈನ್ ಕೆಲವು ದಿನರ್ದ್ ನಿರಂತರವಾದ್ ಬೇಲೆ ಮಲ್ತೊಂದು ಉಪ್ಪುನ ನಡುಟುಲಾಸೋಮವಾರ ಡಿವೈಎಫ್‌ಐ ಕಾರ್ಯoತೆರ್ ಬೆಂಗರೆ ಪ್ರದೇಶಡ್ ಇಂಡಿಯನ್ ರೆಡ್‌ಕ್ರಾಸ್ ಬ್ಲಡ್ ಬ್ಯಾಂಕ್‌ಡ್ ನೆತ್ತೆರ್ ದಾನ ಮಲ್ತೆರ್.

ಈ ಪೊರ್ತುಡು ಡಿವೈಎಫ್‌ಐ ರಾಜ್ಯಾಧ್ಯಕ್ಷ ಮುನೀರ್ ಕಾಟಿಪಳ್ಳ, ಸಹಾಯವಾಣಿ ಮುತಾಲಿಕೆ ವಾಯಿಸೊಂಡಿನ ಡಿವೈಎಫ್‌ಐ ದ.ಕ. ಜಿಲ್ಲಾ ಕಾರ್ಯದರ್ಶಿ ಸಂತೋಷ್ ಬಜಾಲ್, ನಗರಾದ್ಯಕ್ಷ ನವೀನ್ ಕೊಂಚಾಡಿ, ನೌಶಾದ್ ಬೆಂಗರೆ, ರಿಯಾಝ್ ಬೆಂಗರೆ, ಬಿಲಾಲ್ ಬೆಂಗರೆ, ಅಸ್ಲಂ, ಮುಹಾಬ್ ಪಾಲ್ ಪಡೆದ್ ಇತ್ತೆರ್.