ಉಡುಪಿದ ಸುದ್ದಿ | Udupi News

ಜ್ಞಾನದೀವಿಗೆ ಯೋಜನೆಯಡಿ ಒಡಿಪುಡು ಮಲಬಾರ್ ಗೋಲ್ಡ್ ರ್ದ್ 100 ಟ್ಯಾಬ್ ವಿತರಣೆ

ಪಬ್ಲಿಕ್ ಟಿವಿ ಸುದ್ದಿವಾಹಿನಿ ಬೊಕ್ಕ ರೋಟರಿ ಇಂಟರ್ನ್ಯಾಷನಲ್ ಒಟ್ಟು ಸೇರಿಗೆಡ್ ಜ್ಞಾನ ದೀವಿಗೆ ಉಚಿತ ಟ್ಯಾಬ್ ವಿತರಣಾ ಅಭಿಯಾನಗ್ ಮಲಬಾರ್ ಗೋಲ್ಡ್ ಆಂಡ್ ಡೈಮಂಡ್ಸ್ ಸಂಸ್ಥೆ ಕೈ ಜೋಡಾಯೆರ್ . ಒಡಿಪು ಜಿಲ್ಲೆದ ರಡ್ಡ್ ಸರಕಾರಿ ಶಾಲೆಗ್ 100 ಟ್ಯಾಬ್ ವಿತರಣೆ ಮಲ್ತೆರ್.

ಸರಕಾರಿ ಪ್ರೌಢಶಾಲೆ ಸಿದ್ದಾಪುರದ 100 ಜೋಕ್ಲೆಗ್ , ಸರಕಾರಿ ಪ್ರೌಢಶಾಲೆ ಹೆಬ್ರಿದ 100 ಜೋಕ್ಲೆಗ್ ಉಪಯೋಗ ಆಪುನ ಟ್ಯಾಬ್ ಲೆನ್ ಮಲಬಾರ್ ಗೋಲ್ಡ್ ಸಂಸ್ಥೆ ಕೊರ್ತುಂಡು. 3,45,000 ಪಾಣವುದ ಟ್ಯಾಬ್ ಲೆನ್ ಸರಕಾರಿ ಶಾಲೆದ ಜೋಕ್ಲೆಗ್ ಕೊರಿಯೆರ್.ಮಲಬಾರ್ ಗೋಲ್ಡ್ ಕಚೇರಿಡ್ ನಡತಿನ ಲೇಸ್ ಡ್ ಮಲ್ಲ ಬಿನ್ನೆರ್ ಆದ್ ಜಿಲ್ಲಾಧಿಕಾರಿ ಜಿ. ಜಗದೀಶ್ ಪಾಲ್ ಪಡೆಯೆರ್ .

ಮಲಬಾರ್ ಗೋಲ್ಡ್ ಬೊಕ್ಕ ಡೈಮಂಡ್ಸ್ ಮೆಕ್ಲೆನ ಸಮಾಜಮುಖಿ ಕಾರ್ಯ ಶ್ಲಾಘನೀಯ. ಜೋಕ್ಲೆನ ಶಿಕ್ಷಣಗ್ ಮಲ್ಲ ಮಟ್ಟದ ದೇಣಿಗೆ ಕೊರ್ತಿನವು ಬಡಪತ್ತ್ ಡ್ ಇತ್ತಿನ ಜೋಕ್ಲೆಗ್ ಬಾರೀ ಮಲ್ಲ ಸಹಾಯ ಆಂಡ್. ಹಳ್ಳಿ ದ ಜೋಕ್ಲೆನ ದುಂಬುದ ವಿದ್ಯಾಭ್ಯಾಸಗ್ ಜೋಕ್ಲೆನ ಏಳಿಗೆಗಾದ್ ದೆತೊoಡಿನ ಈ ಲೇಸ್ ಯಶಸ್ವಿಯಾವೊಡಾನ್ಡ ಜೋಕುಲು ಐತ ಸದುಪಯೋಗನ್ ಪಡೆಯೋಡು ಪಂದ್ ಪಂಡೆರ್. ಎಸ್ ಎಸ್ ಎಲ್ ಸಿ ಫಲಿತಾಂಶಗ್ ಟ್ಯಾಬ್ ಪೂರಕ ಆಯರೆ ಉಂಡು . ಸಮಾಜಡ್ ಏರೆಗ್ ಮಾತಾ ಕೊಡುಗೆ ಕೊರ್ರೆ ಸಾಧ್ಯ ಉಂಡಾ ಅಕುಲು ಈ ಅಭಿಯಾನಗ್ ಕೈ ಜೋಡಾವೊಡು,ವಿದ್ಯಾದಾನ ಬೇಲೆ ಬಾರೀ ಪುಣ್ಯದ ಕಾರ್ಯ ಪಂದ್ ಜಿಲ್ಲಾಧಿಕಾರಿಲು ಪಂಡೆರ್.

ಕೊರೋನಾ ಕಾಲಡ್ ಅವ್ವೆತೋ ಜೋಕುಲು ವಿದ್ಯೆ ಕಲ್ಪರೆ ಆತುಜಿ.ಹಳ್ಳಿದ ಸರಕಾರಿ ಜೋಕ್ಲೆಗ್ ಆನ್ ಲೈನ್ ತರಗತಿಲು ಸಾಧ್ಯ ಆಯಿಜಿ . ಮೊಬೈಲ್, ಟಿವಿ ಇಜ್ಜಂದಿನ ಅವ್ವೆತೋ ಬಡ ಕುಟುಂಬಲು ನಮ್ಮ ಜಿಲ್ಲೆಡ್ ಉಂಡು . ಸಂಕಷ್ಟದ ಪೊರ್ತುಡು ಪಬ್ಲಿಕ್ ಟಿವಿ ಬೊಕ್ಕ ರೋಟರಿ ಸಂಸ್ಥೆ ಒಟ್ಟು ಸೇರಿಗೆದ ಜ್ಞಾನದೀವಿಗೆ ಲೇಸ್ ಗ್ ಮಲಬಾರ್ ಗೋಲ್ಡ್ ಸಂಸ್ಥೆ ಕೈ ಸೇರಾದಿನವು ನಮಕ್ ಪೆರ್ಮೆದ ಸಂಗತಿ, ನಮ್ಮ ಲಾಭಾಂಶದ ಐನ್ ಶೇಕಡ ಸಾಮಾಜಿಕ ಚಟುವಟಿಕೆಲೆಗ್ ನಮ ದುಂಬುರ್ದೆ ಕೊರೊಂದು ಬೈದ. ಶೈಕ್ಷಣಿಕ , ವೈದ್ಯಕೀಯ, ಪರಿಸರ, ಪೊಣ್ಣು ಜೋಕ್ಲೆಗ್ ಬಂಗಾರ್ ಕೊರ್ದು ಮದಿಮೆ ಮಲ್ಪುನoಚಿನ ಪುಣ್ಯ ಕಾರ್ಯಡ್ ಮಲಬಾರ್ ಗೋಲ್ಡ್ ಪಾಲ್ ಪಡೆತುಂಡು .

ಡಿಡಿಪಿಐ ಹೆಚ್ಎನ್ ನಾಗೂರ, ರೋಟರಿ ಇಂಟರ್ ನ್ಯಾಷನಲ್ ಸಂಸ್ಥೆದ ಉಡುಪಿದ ಗುರ್ಕಾರ್ದಿ ರಾಧಿಕಾ ಲಕ್ಷ್ಮೀನಾರಾಯಣ ಈ ಪೊರ್ತುಡು ಪಾತೆರಿಯೆರ್. ಪಬ್ಲಿಕ್‌ ಟಿವಿ ಜಿಲ್ಲಾ ವರದಿಗಾರ ದೀಪಕ್ ಜೈನ್ ಲೇಸ್ ದ ನಿರೂಪಣೆ ಮಲ್ತೆರ್.