ಉಡುಪಿದ ಸುದ್ದಿ | Udupi News

ಸಚಿವ ಕೋಟ ಮೆರ್ನ ಇಲ್ಲಗ್ ಪೇಜಾವರ ಶ್ರೀ ಭೇಟಿ ಸಚಿವೆರೆರ್ದ್ ಗುರುಪೂಜೆ

ಪೇಜಾವರ ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದೆರ್ ರಾಜ್ಯ ಹಿಂದುಳಿದ ವರ್ಗದ ಕಲ್ಯಾಣ ಇಲಾಖೆ ಬೊಕ್ಕ ಮುಜರಾಯಿ ಮಂತ್ರಿ ಕೋಟ ಶ್ರೀನಿವಾಸ ಪೂಜಾರಿ ಮೆರ್ನ ಆಹ್ವಾನದ ಮೇರೆಗ್ ಕೋಟಡುಪ್ಪುನ ಆರ್ನ ಇಲ್ಲಗ್ ಸೋಮವಾರ ಬೆಳಕಾಂಡೆ ಗ್ಗೆ ಭೇಟಿ ಕೊರಿಯೆರ್ .

ಶ್ರೀಲೆನ್ ಭಕ್ತಿಡ್ ಎದುಕೊನಿನ ಶ್ರೀನಿವಾಸ ಪೂಜಾರಿ ಶಾಂತಾ ದಂಪತಿ ಶ್ರೀಲೆನ ಕಾರ್ ಗ್ ನೀರ್ ಪಾರ್ದ್ ತುಳಸಿ ಮಾಲಾರ್ಪಣೆ ಮಲ್ತೆರ್ .‌ಇಲ್ಲದ ದೇವೆರ್ನ ಕೋಣೆದ ಎದುರು ಅಲಂಕೃತ ಪೀಠಡ್ ಶ್ರೀ ರಾಮದೇವೆರ್ನ ಭಾವಚಿತ್ರಗ್ ಪುಷ್ಪಮಾಲಾರ್ಪಣೆ ಮಲ್ತೆರ್ ಮಂಗಳಾರತಿ ಮಲ್ತೆರ್ .

ಐರ್ದ್ ಬೊಕ್ಕ ನಡತಿನ ಗುರುವಂದನಾ ಸಭೆಟ್ ಪ್ತಸ್ತಾವನೆದೊಟ್ಟಿಗೆ ಶ್ರೀಲೆಗ್ ಸಚಿವೆರ್ 7 ವರ್ಷದ ಪಿರವು ಕೀರ್ತಿಶೇಷ ಶ್ರೀ ವಿಶ್ವೇಶತೀರ್ಥ ಶ್ರೀಲು ಇಲ್ಲಗ್ ಭೇಟಿ ಕೊರ್ದು ಅನುಗ್ರಹ ಮಲ್ತಿನೆನ್ ನೆಂಪು ಮಲ್ತೊಂದು ಇತ್ತೆ ಶಿಷ್ಯ ಶ್ರೀಲಾ ಗುರುಕ್ಲೆನ ಮಹದಾಶಯದ ಸಾದಿಡ್ ಪೋವೊಂದು ಸಮಸ್ತ ಹಿಂದೂ ಸಮಾಜನ್ ಸಂಘಟನೆ ಮಲ್ಪುನ ಕಾರ್ಯಡ್ ಸಕ್ರಿಯೆರಾದ್ ಪೋವೊಂದು ಉಪ್ಪುನ ಬಾರಿ ಸಂತೋಸದ ಇಚಾರ ಪಂದ್ ಪಂಡೆರ್.ಶ್ರೀಲೆನ ಆಗಮನರ್ದ್ ಕುಚೇಲನ ಇಲ್ಲಗ್ ಕೃಷ್ಣ ಬತ್ತಿಲಕತನ್ನ ಇಡೀ ಕುಟುಂಬಗ್ ಬಾರಿ ಸಂತೋಷ ಆತುಂಡು ಪಂದ್ ಪಂಡೆರ್.ಅಂಚನೇ ಪೂಮಾಲೆ, ಫಲಪುಷ್ಪ ಗುರುಕಾಣಿಕೆ ಸಹಿತ ಗುರುವಂದನೆ ನ್ ಪೂಜಾರಿಲೆನ ಇಲ್ಲದಕುಲು ಮಲ್ತೆರ್ . ಇಂದೇ ಪೊರ್ತುಡು  ಮಾರ್ಚ್ 13 ತಾರೀಖ್ ಗ್ ನಡಪರೆ ಉಪ್ಪುನ ದಕ ಉಡುಪಿ ಉಭಯ ಜಿಲ್ಲೆದ ಪಂಚಾಯತ್ ಸದಸ್ಯೆರ್ನ *ಹೊಳಪು* ಕ್ರೀಡಾಕೂಟದ ಆಂಮತ್ರಣ ಪತ್ರಿಕೆನ್ ಶ್ರೀಲು ಬುಡುಗಡೆ ಮಲ್ತೆರ್. ಸಂದೇಶ ಕೊರಿನ ಶ್ರಿಲು , ರಾಮನ ಕಾರ್ಯಡ್ ಸಮಗ್ರ ಹಿಂದು ಸಮಾಜ ಬಾರಿ ಉಮೇದ್ ಡ್ ಪಾಲ್ ಪಡೆಯೋಡು. ಅನ್ಯ ಮತೀಎರೆರ್ದ್ ಹಿಂದೂ ಸಮಾಜ ಎದುರಿಸಾವುನ ಸವಾಲುಲೆನ್ ಸಂಘಟಿತರಾದ್ ಎದುರಿಸಾವೊಡು . ಹೊಳಪು ಕ್ರೀಡಾಕೂಟ ಯಶಸ್ವಿಯಾವಡ್ ಪಂದ್ ಎಡ್ಡೆಪ್ಪು ಬಯಕಿನ ಶ್ರೀಲು ಸಚಿವ ಪೂಜಾರಿಲು ಮಂತ್ರಿಯಾದ್ ಇಡೀ ಸಮಾಜದ ಎಡ್ಡೆಪ್ಪುಗು ಬೆರಿಸಾಯ ಕೊರ್ಪಿನ ಶ್ಲಾಘನೀಯ ಪಂದ್ ಪಂಡೆರ್.

ಉದ್ಯಮಿ ,ಸಾಮಾಜಿಕ ಧುರೀಣ ಆನಂದ್ ಸಿ ಕುಂದರ್ , ಜಿ ಪಂ ಗುರ್ಕಾರ್ಲಾಯಿನ ದಿನಕರ ಬಾಬು , ಬಿ ಎನ್ ಶಂಕರಪೂಜಾರಿ ಮಧುಸೂದನ ಬಾಯರಿ ರಾಮದೇವ ಐತಾಳ, ಶ್ರೀರಮಣ ಉಪಾಧ್ಯಾಯ ಅಚ್ಯುತ ಅಮೀನ್ ಕಲ್ಮಾಡಿ , ಅನೇಕ ಗ್ರಾಮ‌ಪಂಚಾಯತ್ ಗುರ್ಕಾರ್ಲು, ಸದಸ್ಯೆರ್ ಜಿ.‌ಪಂ ತಾಲೂಕು ಪಂಚಾಯತ್ ಸದಸ್ಯೆರ್ ಅಂಚನೇ ಪೂಜಾರಿನ ಕುಟುಂಬಸ್ತೆರ್ ಪಾಲ್ ಪಡೆದಿತ್ತೆರ್ . ವಾಸುದೇವ ಭಟ್ ಪೆರಂಪಳ್ಳಿ ಸಚಿವರ ಆಪ್ತರಾಯಿನ ಹರೀಶ್ ಶೆಟ್ಟಿ ಕೋಟ , ಪ್ರಕಾಶ್ , ರಂಜಿತ್ ಅಶೋಕ್ , ವಿವೇಕ್ ಸುಬ್ರಾಯ ಆಚಾರ್ಯ ಸಾಕಾರ ಕೊರಿಯೆರ್.

ಶಬರಿನ್ ತೂಯಿಲಕ ಆಂಡ್…!!! :

ಇಲ್ಲಡ್ ರಾಮಗ್ ಮಂಗಳಾರತಿ ಮಲ್ತಿ ಬೊಕ್ಕ ಸಚಿವ ಕೋಟ ತನ್ನ ಅಪ್ಪೆ 90 ವರ್ಷದ ಲಚ್ಚಿಪೂಜಾರ್ತಿಲೆನ ಮುಖೇನ ಅಯೋಧ್ಯೆ ಮಂದಿರ ನಿರ್ಮಾಣಗ್ ನಿಧಿ ಸಮರ್ಪಣೆ ಮಲ್ತೆರ್ . ನೆರ್ದ್ ಸಂತೋಷಆಯಿನ ಶ್ರೀಲು ಶಬರಿನ ದರ್ಶನ ಆಯಿಲಕ ಆಂಡ್ ಪಂದ್ ಲಚ್ಚಿಯಮ್ಮಗ್ ಶಾಲು ಪಾರ್ದ್ ಎಡ್ಡೆಪ್ಪು ಬಯಕಿಯೆರ್.

ಸುಲ್ತಾನ್ ಡೈಮಂಡ್ಸ್ ಆಯಂಡ್ ಗೋಲ್ಡ್ ಒಡಿಪು ಶೋರೂಮ್‌ಡ್ ಟ್ರೆಡಿಷನಲ್ ಡೈಮಂಡ್ ತನ್ಮನಿಯಾ ಪ್ರದರ್ಶನದ ಉದಿಪನ

ಒಡಿಪು, ಫೆ.23: ಸುಲ್ತಾನ್ ಡೈಮಂಡ್ಸ್ ಆಯಂಡ್ ಗೋಲ್ಡ್ ಒಡಿಪುದ ಶೋರೂಮ್‌ಡ್ ಫೆ.27 ಮುಟ ನಡಪರೆ ಉಪ್ಪುನ ಟ್ರೆಡಿಷನಲ್ ಡೈಮಂಡ್ ತನ್ಮನಿಯಾ ಪ್ರದರ್ಶನನ್ ಕೋಡೆ ಉದಿಪನ ಮಲ್ತೆರ್.

ಮಲ್ಲ ಬಿನ್ನೆರಾದ್ ಬತ್ತಿನ ಒಡಿಪುದ ಬಲ್ಲಾಳ್ ಫೈನಾನ್ಸ್ ಆಯಂಡ್ ಇನ್ವೆಸ್ಟ್‌ಮೆಂಟ್‌ದ ಎನ್.ಮುರಳೀಧರ ಬಲ್ಲಾಳ್ ದಂಪತಿ, ಕಾಪು ಉದ್ಯಮಿ ಶ್ರೀರಾಮ್ ರಾವ್ ಬೊಕ್ಕ ಕುಟುಂಬ, ನಾವುಂದ ಟಿ.ಎಫ್.ಎನ್. ಫಿಶರೀಸ್‌ದ ಮುಸ್ತಫಾ ಬೊಕ್ಕ ಕುಟುಂಬ, ಉಡುಪಿ ಕಾರ್ಸ್‌ದ ಅಶ್ರಫ್ ಬೊಕ್ಕ ಕುಟುಂಬ, ಉದ್ಯಮಿ ಅಶ್ರಫ್ ಬೀಜಾಡಿ, ಬಜಗೋಳಿದ ಅಗ್ನಿಲ ಸರ್ವಿಸ್ ಸ್ಟೇಶನ್ ಶ್ರಾವಣ್ ಜೈನ್ ದಂಪತಿ ದೇಶವಿದೇಶ ದ ಡೈಮಂಡ್ ತನ್ಮನಿಯಾನ್ ಉದಿಪನ ಮಲ್ತೆರ್ .

ಸುಲ್ತಾನ್ ಗೋಲ್ಡ್‌ದ ಉಡುಪಿ ಬ್ರಾಂಚ್ ಮೆನೇಜರ್ ಮುಹಮ್ಮದ್ ಅಜ್ಮಲ್ ಬಿನ್ನೆರೆನ್ ಎದುಕೊಂಡೆರ್ . ಫ್ಲೋರ್ ಮೆನೇಜರ್ ಸಿದ್ದೀಕ್ ಹಸನ್ ಲೇಸ್ ನಡಪಾದ್ ಕೊರಿಯೆರ್.

ಪಂಜ ಕೊಯಿಕುಡೆ ಶ್ರೀ ಶನೀಶ್ವರ ಮಂಡಳಿರ್ದ್ ಪ್ರತಿಭಾವಂತೆರೆಗ್ ಮಾನಾದಿಗೆ

ಮುಲ್ಕಿ : ಪಂಜ- ಕೊಯಿಕುಡೆ ಶ್ರೀ ಶನೀಶ್ವರ ಮಂಡಳಿ (ರಿ) ಉಂದೆತ್ತ ವರ್ಷದ ಪೂಜೆ ಬೊಕ್ಕ ಊರುದ ಪ್ರತಿಭಾವಂತ ಜೋಕುಲೆಗ್ ಮಾನಾದಿಗೆ ಮಲ್ಪುನ ಲೇಸ್ ಶನಿಯಾರ ನಡತ್ಂಡ್.ಕಲ್ಪುನ ಜೋಕುಲೆನ್ ಗುರುತಿಸಾದ್ ಗೌರವ ಮಲ್ತ್ಂಡ ಅಂಚೆನೇ ಸಮಾಜಮುಖಿ ಸೇವೆ ಮಲ್ತ್ಂಡ ಶನೀಶ್ವರ ದೇವೆರೆನ ಅನುಗ್ರಹ ತಿಕ್ಕುಂಡು ಪಂಡ್ ದ್ ಶನೀಶ್ವರ ಮಂಡಳಿದ ಗೌರವಾಧ್ಯಕ್ಷೆರ್ ಪಂಜ ಶ್ರೀ ವಾಸುದೇವ ಭಟ್ರ್ ಪಂಡೆರ್.

ಕೆಮ್ರಾಲ್ ಪಂಚಾಯ್ತಿದ ಪೊಸ ಗುರ್ಕಾರ್ದಿ ಲೀಲಾ ಕೃಷ್ಣಪ್ಪ ಪೂಜಾರಿ ಮೇರ್ ಪ್ರತಿಭಾವಂತ ಜೋಕುಲೆಗ್ ಮಾನಾದಿಗೆ ಮಲ್ತೆರ್.
ಬಿನ್ನೆರಾದ್ ನಲ್ಯಗುತ್ತು ವಿರಾರ್ ಶಂಕರ ಶೆಟ್ರ್, ಜಯ ಶೆಟ್ಟಿ, ವಸಂತ ಶೆಟ್ಟಿ, ಪಂಜದಗುತ್ತು ವಿಶ್ವನಾಥ ಶೆಟ್ಟಿ, ಬಾಲಕೃಷ್ಣ ಮೊಯಿಲಿ, ಕೆಮ್ರಾಲ್ ಪಂಚಾಯ್ತಿ ಒತ್ತು ಗುರ್ಕಾರೆ ಸುರೇಶ್ ದೇವಾಡಿಗ ಪಂಜ, ಸದಸ್ಯೆರ್ ಕೇಶವ ಪೂಜಾರಿ, ಶನೀಶ್ವರ ಮಂಡಳಿದ ಗುರ್ಕಾರ್ಲು ರಾಮಚಂದ್ರ ಶೆಟ್ಟಿ ಮೊಕುಲು ಮಿತ್ತರ್ಮೆಡ್ ಇತ್ತೆರ್.
ಮಂಡಳಿದ ಪಿರವುದ ಗುರ್ಕಾರ್ಲು ಭಾಸ್ಕರ ಶೆಟ್ಟಿ ಲೇಸ್ ನಡಪಾದ್ ಕೊರ್ದು ಸೊಲ್ಮೆ ಸಂದಾಯೆರ್.
ಬೊಕ್ಕ ಖ್ಯಾತ ಕಲಾವಿದೆರ್ನ ಒಟ್ಟುಸೇರಿಗೆಡ್ ಯಕ್ಷಗಾನ ತಾಳಮದ್ದಳೆ ದ ರೂಪೊಡು ಶನಿ ದೇವೆರೆನ ಕಥೆತ್ತ ಪಾರಾಯಣ ನಡತ್ಂಡ್.

ಪುತ್ತೂರು ತಾಲ್ಲೂಕು ಕೊಡಿಪಾಡಿ ಗ್ರಾಮ ಪಂಚಾಯತ್ ಗುರ್ಕಾರ್ಲಾದ್ ರೇಖಾ ರತ್ನಾಕರ್ ಬಟ್ರುಪಾಡಿ ಬೊಕ್ಕ ಉಪಾಧ್ಯಕ್ಶೆರಾದ್ ಸುಮಿತ್ರಾ ಚಂದ್ರಶೇಖರ್ ಅವಿರೋಧವಾದ್ ಆಯ್ಕೆ

ಪುತ್ತೂರು ತಾಲ್ಲೂಕು ಕೊಡಿಪಾಡಿ ಗ್ರಾಮ ಪಂಚಾಯತ್ ಗುರ್ಕಾರ್ಲಾದ್ ರೇಖಾ ರತ್ನಾಕರ್ ಬಟ್ರುಪಾಡಿ ಬೊಕ್ಕ ಉಪಾಧ್ಯಕ್ಶೆರಾದ್ ಸುಮಿತ್ರಾ ಚಂದ್ರಶೇಖರ್ ಅವಿರೋಧವಾದ್ ಆಯ್ಕೆ  ಆತೆರ್.

ಒಟ್ಟು 8 ಸ್ಥಾನ ಉಪ್ಪುನ ಕೊಡಿಪಾಡಿ ಗ್ರಾಮ ಪಂಚಾಯತ್ ಡ್ ಮಾತಾ ಸ್ಥಾನಡ್ ಲಾ ಬಿಜೆಪಿ ಬೆಂಬಲಿತ ಅಭ್ಯರ್ಥಿಲು ಗೆಂದ್ ದೆರ್. ಗುರ್ಕಾರ್ದಿ ಸ್ಥಾನಗ್ ಎಸ್ ಸಿ ಪೊಂಜೊವು ಬೊಕ್ಕ ಉಪಾಧ್ಯಕ್ಷ ಸ್ಥಾನಗ್ ಹಿಂದುಳಿದ ವರ್ಗದ ಪೊಂಜೊವ್ಲೆಗ್ ಮೀಸಲಾತಿ ಘೋಷಣೆ ಆದಿತ್ತುಂಡು. ಸಮಾಜ ಕಲ್ಯಾಣ ಇಲಾಖೆ ನಿರ್ದೇಶಕಿ ಗಾಯತ್ರಿ ಸಿ ಹೆಚ್ ಮೇರ್ ಚುನಾವಣ ಪ್ರಕ್ರಿಯೆ ನಡಪಾದ್ ಕೊರಿಯೆರ್. ಗ್ರಾಮ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಹೊನ್ನಮ್ಮ ಮೇರ್ ಒಟ್ಟು ಸೇರಿಯೆರ್. ಗ್ರಾಮ ಪಂಚಾಯತ್ ಸದಸ್ಯೆರಾಯಿನ ಗಿರಿಧರ ಗೌಡ ಗೋಮುಖ ಸೋಮಪ್ಪ ಪೂಜಾರಿ, ಗಿರೀಶ್ ಕೆ ನಂಧನ, ನವೀನ್ ಪೂಜಾರಿ, ಸ್ಮಿತಾ ಪಿ ಹನಿಯೂರು ಚಂದ್ರಾವತಿ ಕಮಲಾಕ್ಷ ಬೊಕ್ಕ ತಾಲೂಕು ಪಂಚಾಯತ್ ಸದಸ್ಯೆರಾಯಿನ ದಿವ್ಯ ಪುರುಷೋತ್ತಮ, ಬಿಜೆಪಿ ಶಕ್ತಿ ಕೇಂದ್ರದ ಅಭಿಜಿತ್ ಕೊಳಕ್ಕಿಮಾರು, ಕೊಡಿಪಾಡಿ ಬಿಜೆಪಿ ಉಸ್ತುವಾರಿ ರಾಮ್ ದಾಸ್ ಹಾರಾಡಿ ಪಾಲ್ ಪಡೆದಿತ್ತೆರ್.

ಇನಿ ಜಿಲ್ಲಾ ಉಸ್ತುವಾರಿ ಸಚಿವ ಬಸವರಾಜ ಬೊಮ್ಮಾಯಿ ಉಡುಪಿ ಜಿಲ್ಲಾ ಪ್ರವಾಸ

ಒಡಿಪು , ಫೆ.20: ರಾಜ್ಯದ ಗೃಹ ಬೊಕ್ಕ ಕಾನೂನು, ಸಂಸದೀಯ ವ್ಯವಹಾರ ಅಂಚನೇ ಉಡುಪಿ ಜಿಲ್ಲಾ ಉಸ್ತುವಾರಿ ಸಚಿವ ಬಸವರಾಜ ಬೊಮ್ಮಾಯಿ ಮೇರ್ ಫೆ.20 ತಾರೀಖ್ ಶನಿವಾರದಾನಿ ಉಡುಪಿ ಜಿಲ್ಲೆಡ್ ಪ್ರವಾಸ ಪೋಯೆರೆ ಉಲ್ಲೆರ್ , ಇನಿ ಕಾಂಡೆ 11 ಗಂಟೆಗ್ ಕಾರ್ಕಳ ನಗರ ಠಾಣೆದ ಕೈತಲ್ ಉಪ್ಪುನ ಪೊಲೀಸ್ ವಸತಿ ಗೃಹದ ನೂತನ ಕಟ್ಟಡ ಉದಿಪನ ಲೇಸ್ ಮಧ್ಯಾಹ್ನ 2 ಗಂಟೆಗ್ ಜಿಲ್ಲಾ ನ್ಯಾಯಾಂಗ ಉಡುಪಿ, ಲೋಕೋಪಯೋಗಿ ಇಲಾಖೆ ಉಡುಪಿ ಬೊಕ್ಕ ವಕೀಲೆರ್ನ ಸಂಘ ಕಾರ್ಕಳ ಮೆಕ್ಲೆನ ಒಟ್ಟು ಸೇರಿಗೆಡ್ ಕಾರ್ಕಳಡ್ ಪೊಸತ್ತ್ ಆತಿನ ನ್ಯಾಯಾಲಯದ ಸಂಕೀರ್ಣದ ಉದಿಪನ ಲೇಸ್ ಅಂಚನೇ 3:30ಕ್ ಕಾಪು ಪೊಲೀಸ್ ಠಾಣೆ ಕೈತಲ್ ಉಪ್ಪುನ ಕಾಪು ಪೊಲೀಸ್ ವಸತಿ ಗೃಹದ ಪೊಸ ಕಟ್ಟಡ ಉದಿಪನದ ಲೇಸ್ ಡ್ ಪಾಲ್ ಪಡೆದ್ ಬೊಕ್ಕ ಕುಡ್ಲಗ್ ಪೋಯೆರೆ ಉಲ್ಲೆರ್ ಪಂದ್ ಪ್ರಕಟಣೆಗ್ ತೆರಿಪಾದೆರ್.