ಉಡುಪಿದ ಸುದ್ದಿ | Udupi News

ಒಡಿಪುದ ಡಾ.ಟಿ.ಎಂಎ ಪೈ ಆಸ್ಪತ್ರೆ, ಬೊಕ್ಕ ಕಾರ್ಲದ ಡಾ.ಟಿಎಂಎ ಪೈ ರೋಟರಿ ಆಸ್ಪತ್ರೆಡ್ ಕೋವಿಡ್ ಲಸಿಕೆ

ಒಡಿಪು, ಜೂನ್ 25: ಮಣಿಪಾಲದ ಕಸ್ತೂರಬಾ ಆಸ್ಪತ್ರೆ, ಒಡಿಪುದ ಡಾ.ಟಿ.ಎಂಎ ಪೈ ಆಸ್ಪತ್ರೆ, ಬೊಕ್ಕ ಕಾರ್ಲದ ಡಾ.ಟಿಎಂಎ ಪೈ ರೋಟರಿ ಆಸ್ಪತ್ರೆಡ್ ಸಾರ್ವಜನಿಕೆರೆಗ್ ಕೋವಿಡ್ ಲಸಿಕೆ ಲಭ್ಯ ಉಂಡು ಪಂದ್ ಆಸ್ಪತ್ರೆದ ವೈದ್ಯಕೀಯ ಅಧೀಕ್ಷಕೆರೆಗ್ ತೆರಿಪಾದೆರ್.

ಸುರುತ್ತ ಡೋಸ್ ಪಡೆದ್ 84 ದಿನ ಆಯಿನಕ್ಲೆಗ್ ರಡ್ಡನೇ ಡೋಸ್ ಕೋವಿಶೀಲ್ಡ್ ಲಸಿಕೆ ಉಂಡು . ಸರ್ಕಾರ ಪಂಡಿನ ಬಿಲೆಕ್ಕ್ ಲಸಿಕೆ ಕೊರೊಂದು ಉಲ್ಲೆರ್ , ಸಾರ್ವಜನಿಕೆರ್ ನೆತ್ತ ಪ್ರಯೋಜನ ಪಡೆಯೋಲಿ . ಕಾಲೇಜ್ ದ ಜೋಕ್ಲೆಗ್ ವಿಶೇಷ ಕೌಂಟರ್ ವ್ಯವಸ್ಥೆ ಮಲ್ದೆರ್ .

ಎಚ್ಚದ ಮಾಹಿತಿಗಾದ್ ಕಸ್ತೂರ್ಬಾ ಆಸ್ಪತೆ ಮಣಿಪಾಲ: 0820 2922761, ಡಾ.ಟಿಎಂಎ ಪೈ ಆಸ್ಪತೆ, ಒಡಿಪು :08202942126, ಡಾ.ಟಿಎಂಎ ರೋಟರಿ ಪೈ ಆಸ್ಪತೆ, ಕಾರ್ಕಳ: 08258230583 ಗ್ ಲೆಪ್ಪು ಕೊರೋಲಿ .

ಕುಡ್ಲಡ್ ಜುಲೈ 1 ತಾರೀಖ್ ರ್ದ್ ಬಸ್ ಸುರು : ದಿಲ್ ರಾಜ್ ಆಳ್ವ

ಕುಡ್ಲ, ಜೂನ್ 25: ಕುಡ್ಲ ಜುಲೈ 1ರ್ದ್ ಸಿಟಿ ಬೊಕ್ಕ ಸರ್ವಿಸ್ ಬಸ್‌ ಸಂಚಾರ ಸುರು ಮಲ್ಪುಂಡು ಪಂದ್ ಕೆನರಾ ಬಸ್ ಮಾಲಕರ ಅಸೋಸಿಯೇಶನ್ ಗುರ್ಕಾರ್ಲಾಯಿನ ರಾಜವರ್ಮ ಬಲ್ಲಾಳ್ ಬೊಕ್ಕ ದ.ಕ.ಜಿಲ್ಲಾ ಬಸ್ ಮಾಲಕರ ಸಂಘದ ಗುರ್ಕಾರ್ಲಾಯಿನ ದಿಲ್‌ರಾಜ್ ಆಳ್ವ ಪಂಡೆರ್ .

‘ಸರಕಾರದ ಮಾರ್ಗಸೂಚಿನ್ ಯಥಾವತ್ತಾದ್ ಪಾಲಿಸಾಯೆರೆ ಸಾಧ್ಯ ಇಜ್ಜಿ ಬಸ್ ಡ್ ಉಪ್ಪುನ ಸೀಟ್ ದ ಅರ್ಧದಾತ್ ಜನಕ್ಲೆನ್ ಲೆತೊಂದು ಪೊಂಡ ನಮಕ್ ಒವ್ವೆ ಆದಾಯ ಇಜ್ಜಿ. ಇತ್ತೇ ಡೀಸೆಲ್ ಬೆಲೆ ಲ ಜಾಸ್ತಿ ಆತುಂಡು . ಪ್ರಯಾಣ ದರ ಜಾಸ್ತಿ ಮಲ್ಪರೆ ಕೇನೆರೆ ಆಪುಜಿ. ಪಂದ್ ದಿಲ್‌ರಾಜ್ ಆಳ್ವ ಪಂಡೆರ್ .

ಟ್ಯಾಬ್ಲೆಟ್ ಪಿಸಿ ರ್ದ್ ಆನ್ಲೈನ್ ವಿದ್ಯಾಭ್ಯಾಸಗ್ ಅನುಕೂಲ : ರಘುಪತಿ ಭಟ್

ಒಡಿಪು, ಜೂನ್ 24: ಕೋವಿಡ್ ಸಂಕಷ್ಟದ ನೆಲೆಟ್ಟ್ ಜೋಕ್ಲೆಗ್ ವಿದ್ಯಾಭ್ಯಾಸಗ್ ಅನುಕೂಲ ಆಪಿನ ನೆಲೆಟ್ಟ್ , ಸರಕಾರ ಮಾತಾ ಸರಕಾರಿ ಕಾಲೇಜ್ ದ ಪದವಿ ಜೋಕ್ಲೆಗ್ ಉಚಿತ ಟ್ಯಾಬ್ಲೆಟ್ ಪಿಸಿ ಕೊರೊಂದು ಉಲ್ಲೆರ್ , ನೆರ್ದಾವರ ಜೋಕ್ಲೆಗ್ ಆನ್‌ಲೈನ್ ತರಗತಿಗ್ ಹಾಜರಾಯೆರೆ ಅನುಕೂಲ ಆಯೆರೆ ಉಂಡು . ಈ ಲೇಸ್ ಕೋಡೆ ಮುಖ್ಯಮಂತ್ರಿಲು , ಉನ್ನತ ಶಿಕ್ಷಣ ಸಚಿವೆರ್ನ ಸಮ್ಮುಖಡ್ ಚಾಲನೆ ಕೊರೊಂದು ಉಪ್ಪುನ ಅಭಿನಂದನೀಯ ಪಂದ್ ಶಾಸಕ ರಘುಪತಿ ಭಟ್ ಪಂಡೆರ್ .

ಮೇರ್ ಕೋಡೆ ಅಜ್ಜರಕಾಡು ಡಾ.ಜಿ. ಶಂಕರ್ ಸರ್ಕಾರಿ ಮಹಿಳಾ ಪ್ರಥಮ ದರ್ಜೆ ಕಾಲೇಜ್ ಡ್ , ಕಾಲೇಜು ಶಿಕ್ಷಣ ಇಲಾಖೆ ಸರಕಾರಿ ಪ್ರಥಮ ದರ್ಜೆ ಕಾಲೇಜು ತೆಂಕನಿಡಿಯೂರು ಬೊಕ್ಕ ಡಾ.ಜಿ.ಶಂಕರ್ ಸರ್ಕಾರಿ ಮಹಿಳಾ ಪ್ರಥಮ ದರ್ಜೆ ಕಾಲೇಜು ಅಜ್ಜರಕಾಡು ಮೆರ್ನ ಸಂಯುಕ್ತ ಆಶ್ರಯಡ್ ನಡತಿನ ಸ್ಮಾರ್ಟ್ಕ್ಲಾಸ್ ರೂಂದ ಉದಿಪನ ಬೊಕ್ಕ ಪ್ರಥಮ ಪದವಿ ಜೋಕ್ಲೆಗ್ ಉಚಿತ ಟ್ಯಾಬ್ಲೆಟ್ ಪಿ.ಸಿ ವಿತರಣೆ ಲೇಸ್ ನ್ ಉದಿಪನ ಮಲ್ತ್ ಕೊರಿಯೆರ್.

ಸಂತ ಜೋಸೆಫ್ ಇಂಜಿನಿಯರಿಂಗ್ ಕಾಲೇಜ್ ಗ್ ಪೊಸ ಸ್ವಾಯತ್ತ ಮಾನದಿಗೆ

ಕುಡ್ಲ , ಜೂ.24: ಪೇಂಟೆದ ಸಂತ ಜೋಸೆಫ್ ಇಂಜಿನಿಯರಿಂಗ್ ಕಾಲೇಜ್ ಗ್ (ಎಸ್‌ಜೆಇಸಿ) 2021-22ರ ಶೈಕ್ಷಣಿಕ ವರ್ಷರ್ದ್ ಅನ್ವಯ ಆಪಿಲಕ ಪೊಸ ಸ್ವಾಯತ್ತ ಮಾನದಿಗೆ ಕೊರ್ತೆರ್.

ಕಾಲೇಜ್ ಗ್ 2018ರ ಸ್ವಾಯತ್ತ ಕಾಲೇಜುದ ಯೋಜನೆದಡಿ ವಿಶ್ವವಿದ್ಯಾನಿಲಯ ಧನಸಹಾಯ ಆಯೋಗ (ಯುಜಿಸಿ) 2019ಟ್ಟ್ ಕಾಲೇಜು ಕೊರಿನ ಅರ್ಜಿಗ್ ಪ್ರತಿಕ್ರಿಯೆಯಾದ್ ಸ್ವಾಯತ್ತತೆ ಕೊರ್ತುಂಡು . ಉಂದೆನ್ ಇಂಚೋಗು ಬೆಳಗಾವಿದ ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯ (ವಿಟಿಯು) ನನ ದುಂಬು ಬರ್ಪಿನ ಶೈಕ್ಷಣಿಕ ವರ್ಷರ್ದ್ ಸುರು ಆಪಿನ 9 ವರ್ಷ ಮುಟ ಅವಧಿಗ್ ಅನುಮೋದನೆ ಕೊರ್ತುಂಡು.

ವಾಮಂಜೂರ್ದ ಸಂತ ಜೋಸೆಫ್ ಇಂಜಿನಿಯರಿಂಗ್ ಕಾಲೇಜ್ ದ ಕಲಾಮ್ ಸಭಾಂಗಣಡ್ ಬುಧವಾರ ನಡತಿನ ಸುದ್ದಿಗೋಷ್ಠಿಟ್ ಪಾತೆರಿನ ಕಾಲೇಜ್ ದ ಪ್ರಾಂಶುಪಾಲ ಡಾ.ರಿಯೊ ಡಿಸೋಜ, ಯುಜಿಸಿ ತಜ್ಞರ ಕೂಟ 2020ರ ನವೆಂಬರ್ 28, 29 ತಾರೀಖ್ ಗ್ ಕಾಲೇಜ್ ಗ್ ಭೇಟಿ ಕೊರ್ದು ಕಾಲೇಜ್ ಪರಿಶೀಲನೆ ಮಲ್ತಿತ್ತೆರ್.

ಎಂಆರ್ ಪಿಎಲ್ ಡ್ ಕೈತಲ್ ದಕ್ಲೆಗ್ ಬೇಲೆ ದೆತ್ತ್ ಕೊರಿಯರೆ ದಕ್ಷಿಣ ಕನ್ನಡ ಯುವ ಜೆಡಿಎಸ್ ಪರವಾದ್ ಬಿನ್ನಾಪು

ಕುಡ್ಲ, ಜೂನ್ 24: ಎಂ ಆರ್ ಪಿ ಎಲ್ ಸೇರಿನಂಚ ಕೆಲವು ಬೃಹತ್ ಕಂಪೆನಿಡ್ ಕೈತಲ್ ದ ತುಳುನಾಡ್ ದ ಜವನೆರೆಗ್ ಬೇಲೆ ಕೊರೊಡು ಪಂದ್ ಆಗ್ರಹ ಮಲ್ತ್ ದಕ್ಷಿಣ ಕನ್ನಡ ಜಿಲ್ಲಾ ಯುವ ಜೆಡಿಎಸ್ ವತಿರ್ದ್ ಬುಧವಾರ ಸಂಸದ ಪ್ರಜ್ವಲ್ ರೇವಣ್ಣ ಮುತಾಲಿಕೆಡ್ ಬಿನ್ನಾಪು ಮಲ್ತೆರ್ .

ಐರ್ದ್ ಬೊಕ್ಕ ಮಾಧ್ಯಮದೊಟ್ಟುಗು ಪಾತೆರಿನ ಆರ್ 2800 ಎಕ್ರೆ ಜಾಗೆ ದೆತೊoದು ಪಡೆದ್ ಮಲ್ಲ ಕಂಪೆಯನಿಯಾದ್ ಬುಲೆಡ್ ಬೈದುಂಡು ಮುಲ್ಪದ ಜವನೆರೆಗ್ ಬೇಲೆ ಕೊರಂದೆ ಪ್ರಾದೇಶಿಕತೆದ ಭಾವನೆಗ್ ಧಕ್ಕೆಯಾವೊಂದು ಉಂಡು . ತುಳುನಾಡ್ ದ ಜವನೆರೆಗ್ ಬೇಲೆ ಕೊರೊಡು ಪಂದ್ ಬಿನ್ನಾಪು ಮಲ್ತೆರ್.