Thu. Nov 19th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಜಿಮ್ ಡ್ ವರ್ಕೌಟ್ ಮಲ್ಪುನಗ ಬೂರ್ದು ತೀರ್ ಪೋಯೆರ್ ಬಾಲಿವುಡ್ ನಟೆ!

ಬೊಂಬೈ: ಜಿಮ್ ಡ್ ವರ್ಕೌಟ್ ಮಲ್ತೊಂದು ಇತ್ತಿನ ಪೊರ್ತುಡು ಹಿಂದಿದ ಪುಗರ್ತೆದ ನಟೆ ಸಿದ್ಧಾಂತ್ ವೀರ್ ಸೂರ್ಯವಂಶಿ (46) ತಿರ್ತ್ ಬೂರ್ದು ತೀರ್ ಪೋಯಿನ ಘಟನೆ ನಡತ್ಂಡ್.

ಮೆರೆನ ಸಾವುದ ಸುದ್ದಿ ಕೇನ್ದ್ ಅಭಿಮಾನಿಲು ಕಣ್ಣೀರ್ ಪಾಡ್ದೆರ್. ಮೆರೆಗ್ ಬೊಡೆದಿ ಅಲೇಸಿಯಾ ಬೊಕ್ಕ ರಡ್ಡ್ ಜೋಕುಲು ಉಲ್ಲೆರ್. ಅಲೇಸಿಯಾ ಮಾಡೆಲಿಂಗ್ ಜಗತ್ತ್ ಡ್ ಮಲ್ಲ ಪುದರ್ ಮಲ್ದೆರ್.

ಯೂಟ್ಯೂಬ್ ತೂದು ಮಲ್ತಿನ ತುರೆತ್ತ ಜ್ಯೂಸ್ ಪರ್ದ್ ತೀರ್ ಪೋಯಿನ ಜವನೆ!!

ಇಂಧೋರ್‌: ಕೈ ಬೇನೆನ್ ಗುಣ ಮಲ್ಪೆರೆ ಬೋಡಾದ್ ಜವನೆ ಒರಿ ಯೂಟ್ಯೂಬ್ ತೂದು ತುರೆತ್ತ ಜ್ಯೂಸ್ ಮಲ್ತ್ ದ್, ಪರ್ದ್ ತೀರ್ ಪೋಯಿನ ಘಟನೆ ಮಧ್ಯಪ್ರದೇಶದ ಇಂದೋರ್ ಜಿಲ್ಲೆಡ್ ನಡತ್ಂಡ್.


ತೀರ್ ಪೋಯಿನ ಧರ್ಮೇಂದ್ರ ಮೆರೆಗ್ ಜ್ಯೂಸ್ ಪರಿ ಬೊಕ್ಕ ಹುಷಾರ್ ಇಜ್ಜಂದೆ ಆಂಡ್. ಈ ಪೊರ್ತುಡು ಇಲ್ಲಲ್ ದಕುಲು ಆಸ್ಪತ್ರೆಗ್ ಸೇರ್ಸಾಯೆರ್. ಆಂಡ ಮೇರ್ ಚಿಕಿತ್ಸೆಗ್ ಸ್ಪಂದಿಸಂದೆ ತೀರ್ ಪೋಯೆರ್. ಈ ಬಗೆಟ್ ಪೊಲೀಸೆರ್ ತನಿಖೆ ಸುರು ಮಲ್ದೆರ್. ಪುನತ ಮರಣೋತ್ತರ ಪರೀಕ್ಷೆಲ ಆತ್ಂಡ್. ನನ ವರದಿ ಬತ್ತಿನ ಬೊಕ್ಕನೇ ಸಾವುದ ನಿಜ ಕಾರಣ ತೆರಿವೊಡಾತೆ ಪಂದ್ ಪೊಲೀಸೆರ್ ಪಂಡೆರ್.

ತುಳು ಎಂ.ಎ ಕಲ್ಪರೆ ಅರ್ಜಿ ಪಾಡ್ಲೆ

ಕುಡ್ಲ: ತುಳು ಸ್ನಾತಕೋತ್ತರ ಪದವಿ ಮಲ್ಪುನಕುಲು ಕುಡ್ಲ ವಿಶ್ವವಿದ್ಯಾನಿಲಯ ಸಂಜೆ ಕಾಲೇಜ್ ಡ್ ಪ್ರವೇಶಾತಿ ಸುರು ಆತ್ಂಡ್.

ಒವ್ವೇ ಪದವೀಧರೆರ್ನ ಕುಲು ತುಳು ಎಂ.ಎ. ಮಲ್ಪೊಲಿ. ಆನ್‌ಲೈನ್ ಡ್ಲಾ ಅರ್ಜಿ ಸಂದಾವೊಲಿ. http://uucms.Karnataka.gov.in/login/index ಡ್ ಇಪ್ಪುನ uucms ಪೋರ್ಟಲ್ ಡ್ ಆನ್‌ಲೈನ್ ಅರ್ಜಿ ಸಂದಾವೊಲಿ. ತುಳು ಭಾಷೆದ ವೈಜ್ಞಾನಿಕ ದೃಷ್ಟಿ, ತುಳುನಾಡ್ ದ ಇತಿಹಾಸ, ತುಳು ಸಾಹಿತ್ಯ, ತುಳು ಜಾನಪದ, ತುಳುನಾಡ್ ದ ಮಾಧ್ಯಮ- ಸಂಸ್ಥೆ ಇಂಚ ತುಳುತ ಮತ ಪರಿಕಲ್ಪನೆನ್ ಕೊರ್ಪುನ ಪಠ್ಯನ್ ರಡ್ಡ್ ವರ್ಷಲೆಡ್ ಪತ್ತ್ ಪಠ್ಯವಾದ್ ಕಲ್ಪೆರೆ ಅವಕಾಶ ಉಂಡು. ರಡ್ಡ್ ನೇ ವರ್ಷಡ್ ವಿದ್ಯಾರ್ಥಿಲೆಗ್ ಸಂಶೋಧನೆದ ಅಟ್ಟಣೆಗಾದ್ ಸಂಪ್ರಬಂಧ ತಯಾರ್ ಮಲ್ಪಯೆರೆ ಅಪುಂಡು. ವಿಶ್ವವಿದ್ಯಾನಿಲದ ಸಂಧ್ಯಾ ಕಾಲೇಜ್ ಕುಡ್ಲ, ಹಂಪನಕಟ್ಟೆ ಮುಲ್ಪ ತುಳು ಎಂ.ಎ. ವಿಭಾಗದ ಮಾಹಿತಿಗಾದ್ ಮೊಬೈಲ್ ಸಂಖ್ಯೆ 9481270577, 9972261201, 8553216236. ಪೋನ್ ಮಲ್ಪೊಲಿ.

ಮುರುಘಾ ಮಠತ್ತ ಫೋಟೋ ದೆಪ್ಪಾಯಿನ ಕೇಸ್: ಮಾಜಿ ಆಡಳಿತಾಧಿಕಾರಿ ಬಸವರಾಜನ್ ಅರೆಸ್ಟ್

ಚಿತ್ರದುರ್ಗ: ಶಿವಮೂರ್ತಿ ಮುರುಘಾ ಶರಣರೆನ ಫೋಟೊ ದೆಪ್ಪಾಯಿನ ಕೇಸ್ ಗ್ ಸಂಬಂಧ ಪಟ್ಟಿನಂಚನೆ ಮಠದ ಮಾಜಿ ಆಡಳಿತಾಧಿಕಾರಿ ಎಸ್.ಕೆ.ಬಸವರಾಜನ್ ನ್ ಪೊಲೀಸೆರ್ ಅರೆಸ್ಟ್ ಮಲ್ದೆರ್.

ಈ ಕೇಸ್ ಡ್ ಅರೆಸ್ಟ್ ಆದಿತ್ತಿನ ಹೊಸಹಳ್ಳಿ ಗ್ರಾಮ ಪಂಚಾಯತಿ ಮಾಜಿ ಸದಸ್ಯೆರ್ ಮೋಹನಮೂರ್ತಿ ಬೊಕ್ಕ ಡಿಪ್ಲೊಮಾ ಕಾಲೇಜ್ ಉಪನ್ಯಾಸಕೆರ್ ಶಿವಾನಂದಸ್ವಾಮಿ ಕೊರ್ನ ಹೇಳಿಕೆದ ಪ್ರಕಾರ ಪೊಲೀಸೆರ್ ಬಸವರಾಜನ್ ನ್ ವಶಕ್ ದೆತ್ತೊಂದು, ವಿಚಾರಣೆ ನಡಪಾದೆರ್. ಮಠಕ್ ಗಣ್ಯೆರ್ ಭೇಟಿ ಕೊರ್ನ ಪೊರ್ತುಡು ಮುರುಘಾ ಶರಣೆರ್ ದೆಪ್ಪಾದಿನ ಫೋಟೊಲೆನ್ ಮುರುಘಾ ಮಠತ್ತ ರಾಜಾಂಗಣಡ್ ಇತ್ತಿನ ಶಿವಮೂರ್ತಿ ಮುರುಘಾ ಶರಣೆರೆನ 47 ಫೋಟೊಲು ಅ.6ದಾನಿ ಕಂಡ್ ದ್ ಪೋದು ಇತ್ಂಡ್. ಈ ಫೋಟೊ ದೆಪ್ಪೆರೆ ಬಸವರಾಜನ್ ಪ್ರಚೋದನೆ ಮಲ್ದೆರ್ ಪನ್ಪುನ ಆರೋಪದ ಮಿತ್ತ್ ಅರೆಸ್ಟ್ ಮಲ್ದೆರ್. ಈ ಕೇಸ್ ದ ಬಗೆಟ್ ಬಸವರಾಜನ್ ನ ಬೊಡೆದಿ ಸೌಭಾಗ್ಯ ಮೆರೆನ್ಲಾ ವಿಚಾರಣೆ ನಡಪಾದೆರ್.

ಕುಡ್ಲ ವಿಮಾನ ನಿಲ್ದಾಣಡ್ ಪತಿಯೆರ್ 2 ಕೋಟಿ ರೂ. ಬಿಲೆತ್ತ ಬಂಗಾರ್!

ಕುಡ್ಲ: ಕುಡ್ಲದ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಡ್ ಕಸ್ಟಮ್ಸ್ ಅಧಿಕಾರಿಲು ನ. 11 ದಾನಿ ನಾಲ್ ಪ್ರಯಾಣಿಕೆರ್ ಕಲ್ವ ತಾದಿಡ್ ಕೊನೊಂದು ಇತ್ತಿನ 2.01 ಕೋಟಿ ರೂಪಾಯಿ ಬಿಲೆತ ಬಂಗಾರ್ ನ್ ವಶಕ್ ಪಡೆತೆರ್.


ದುಬೈರ್ದ್ ಬತ್ತಿನ ಮೊಕುಲೆನ್ ಏರ್‌ಪೋರ್ಟ್ ಕಸ್ಟಮ್ಸ್ ಅಧಿಕಾರಿಲು ಅರೆಸ್ಟ್ ಮಲ್ದೆರ್. 2,01,37,250 ಬಿಲೆತ 3.895 ಕೆಜಿ ತೂಕದ ರೋಢಿಯಮ್ ಲೇಪಿತ ಇಪ್ಪುನ ಬಂಗಾರ್ ದ ಪಟ್ಟಿಲೆನ ಅಕುಲೆನ ಟ್ರಾಲಿ ಬ್ಯಾಗ್‌ಲೆಡ್ ದೆಂಗಾದ್ ದೀತಿನವು ಪತ್ತೆ ಆತ್ಂಡ್. ಅಧಿಕಾರಿಲು ಹೆಚ್ಚದ ತನಿಖೆ ಮಲ್ತೊಂದು ಉಲ್ಲೆರ್.

ರಾಜೀವ್ ಗಾಂಧಿ ಹತ್ಯೆ ಕೇಸ್‌ದ ಆರೋಪಿ ನಳಿನಿ ಸೇರ್ದ್ ಆಜಿ ಜನ ಬುಡುಗಡೆ: ಸುಪ್ರೀಂ ಕೋರ್ಟ್ ಆದೇಶ

ಮಾಜಿ ಪ್ರಧಾನಿ ರಾಜೀವ್ ಗಾಂಧಿ ಹತ್ಯೆ ಕೇಸ್‌ಗ್ ಸಂಬಂಧಿಸಾದ್ ಜೀವಾವಧಿ ಶಿಕ್ಷೆಡಿತ್ತಿನ ನಳಿನಿ ಬೊಕ್ಕ ಆರ್.ಪಿ.ರವಿಚಂದ್ರನ್ ಸೇರಿನಂಚನೆ ಆಜಿ ಆರೋಪಿಲೆನ್ ಬುಡುಗಡೆ ಮಲ್ಪರೆ ಸುಪ್ರೀಂ ಕೋರ್ಟ್ ಆದೇಶ ಮಲ್ತ್‌ದ್ಂಡ್.

ಆರೋಪಿಲೆನ್ ಬುಡುಗಡೆ ಮಲ್ಪುಲೆಕ್ಕ ತಮಿಳ್‌ನಾಡ್ ರಾಜ್ಯಪಾಲರೆಗ್ ಶಿಫಾರಸ್ ಮಲ್ತ್‌ದಿತ್ತ್ಂಡ್. ಇತ್ತೆ ಸುಪ್ರೀಂ ಕೋರ್ಟ್ ಬುಡುಗಡೆ ಮಲ್ಪುಲೆಕ್ಕ ಆದೇಶ ಮಲ್ತ್‌ದ್ಂಡ್.

ಶಬರಿಮಲೆ ಕೈತಲ್ ನ.17ರ್ದ್ ಜ.15 ಮುಟ್ಟ ಅಮಲ್ ದ ಸೊತ್ತು ನಿಷೇಧ : ಕೇರಳ ಸರ್ಕಾರ ಘೋಷಣೆ

 

ಪಟ್ಟಣಂತಿಟ್ಟ: ಶಬರಿಮಲೆ ಅಯ್ಯಪ್ಪ ದೇವಲ್ಯಡ್ ನ.17 ತಾರೀಕ್ ರ್ದ್ ಜನವರಿ 15 ಮುಟ್ಟ ಶಬರಿಮಲೆ ಯಾತ್ರೆ, ವಾರ್ಷಿಕ ದರ್ಶನ ನಡಪುಂಡು. ಈ ಪೊರ್ತುಡು ದೇವಲ್ಯದ ಆವರಣ ಬೊಕ್ಕ ಸುತ್ತಮುತ್ತದ ಪ್ರದೇಶಡ್ ಅಮಲ್ ದ ಸೊತ್ತುಲೆನ ಮಾರುನ ಬೊಕ್ಕ ಸೇವನೆ ಮಲ್ಪುನ ನಿಷೇಧ ಪಂದ್ ಕೇರಳ ಸರ್ಕಾರ ಘೋಷಣೆ ಮಲ್ದ್ಂಡ್.


ಈ ಆದೇಶ ದೇವಲ್ಯದ ಆವರಣ, ಪಂಪ, ತ್ರಿವೇಣಿ, ಮರಕೂಟಂ, ಶಬರಿ ಪೀಠ ಬೊಕ್ಕ ಸುತ್ತಮುತ್ತದ ಕೆಲವು ಗ್ರಾಮಲೆಗ್ ಅನ್ವಯ ಅಪುಂಡು ಪಂದ್ ತೆರಿಪಾದ್ಂಡ್. ಬೊಕ್ಕ ದೇವಲ್ಯಗ್ ಬರ್ಪುನ ಭಕ್ತೆರ್ ಸರ್ಕಾರದ ಆದೇಶನ್ ಗಮನಡ್ ದೀವೊನೊಡ್, ಆದೇಶನ್ ಮೀರ್ದ್ ನಡಪರೆ ಇಜ್ಜಿ ಪಂದ್ ಪಂಡ್, ಈ ಪೊರ್ತುಡು ಪೊಲೀಸ್, ಅಬಕಾರಿ, ಅರಣ್ಯ ಇಲಾಖೆ ಅಧಿಕಾರಿಲು ಒಟ್ಟು ಸೇರಿಗೆಡ್ ದಾಳಿ ಮಲ್ತ್ ದ್ ಆದೇಶದ ಕಟ್ಟುನಿಟ್ಟ್ ದ ಪಾಲನೆದ ನಿಗಾ ಒಯಿಸೊನಿಯೆರೆ ಉಲ್ಲೆರ್ ಪಂದ್ ತೆರಿಪಾದ್ಂಡ್.

ನ.19: ತುಳುನಾಡ ವೀರೆ ಕೆದಂಬಾಡಿ ರಾಮಯ್ಯ ಗೌಡೆರೆನ ಕಂಚಿದ ಮೂರ್ತಿ ಉದಿಪನ

ಕುಡ್ಲ : ಬಾವುಟಗುಡ್ಡೆಡ್ ಬ್ರಿಟೀಷೆರ್ನ ಕೊಡಿನ್ ದೆತ್ತ್ ದ್ ತುಳುನಾಡ ಕೊಡಿನ್ ಏರಾಯಿನ ತುಳುತ್ತ ಪೊರ್ಂಬಾಟಗಾರೆ, ಅಮರ ಸುಳ್ಯ ಸ್ವಾತಂತ್ರ್ಯದ ರೈತ ಸೈನ್ಯದ ನೇತಾರೆ ತುಳುನಾಡ ವೀರ ಸಮರಕಲಿ ಕೆದಂಬಾಡಿ ರಾಮಯ್ಯ ಗೌಡ ಮೆರೆನ ಕಂಚಿದ ಮೂರ್ತಿ ನವೆಂಬರ್ 19 ಸನಿವಾರ ಕುಡ್ಲದ ಬಾವುಟಗುಡ್ಡೆಡ್ ಉದಿಪನ ಆಯರೆ ಉಂಡು.

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ಕುಡ್ಲ ಮಹಾನಗರ ಪಾಲಿಕೆ, ಸ್ವಾತಂತ್ರ್ಯ ಪೊರ್ಂಬಾಟಗಾರೆ ಕೆದಂಬಾಡಿ ರಾಮಯ್ಯ ಗೌಡ ಸ್ಮಾರಕ ಉಸ್ತುವಾರಿ ಸಮಿತಿ(ರಿ.) ಕುಡ್ಲ ಮೊಕ್ಲೆನ ಒಟ್ಟು ಸೇರಿಗೆಡ್ ಈ ಲೇಸ್ ನಡಪರೆ ಉಂಡು.

ನಾಪತ್ತೆ ಆದಿತ್ತಿನ ಬದಿಯಡ್ಕದ ಡಾಕ್ಟರ್ ಹಟ್ಟಿಯಂಗಡಿಡ್ ಪುನ ಆದ್ ಪತ್ತೆ

ಕುಂದಾಪುರ: ನಾಪತ್ತೆ ಆದಿತ್ತಿನ ಕಾಸ್ರೋಡು ಕೈತಲ್ ದ ಬದಿಯಡ್ಕದ ವೈದ್ಯೆರ್ ಡಾ. ಕೃಷ್ಣಮೂರ್ತಿ ಆತ್ಮಹತ್ಯೆ ಮಲ್ತೊನ್ನ ಸ್ಥಿತಿಟ್ಟ್ ಕುಂದಾಪುರದ ಅಜ್ಜಿಮನೆ ರೈಲ್ವೆ ಹಳಿತ್ತಲ್ಪ ಪತ್ತೆ ಆತೆರ್.


ಕುಂದಾಪುರ ಗ್ರಾಮಾಂತರ ಪೊಲೀಸ್ ಠಾಣಾ ವ್ಯಾಪ್ತಿದ ಹಟ್ಟಿಯಂಗಡಿ ಗ್ರಾಮದ ಕಾಡು ಅಜ್ಜಿಮನೆತ್ತಲ್ಪ ಮೆರೆನ ಪುನ ಪತ್ತೆ ಆತ್ಂಡ್. ರೈಲ್ ದ ಅಡಿಕ್ ತಿಕ್ಕಿನ ಅರೆನ ದೇಹ ರಡ್ಡ್ ತುಂಡಾದ್ ಬೇತೆ ಬೇತೆ ಆದಿತ್ತ್ಂಡ್. ಬದಿಯಡ್ಕಡ್ ಇಂಚಿಪ್ಪ ಕೆಲವೆರ್ ಆಸ್ಪತ್ರೆಗ್ ಪೊಗ್ಗುದು ಡಾಕ್ಟ್ರೆಗ್ ಬೆದರಿಕೆ ಪಾಡ್ದ್ ಇತ್ತೆರ್. ನೆರ್ದ್ ಬೇಜಾರಾದ್ ಆತ್ಮಹತ್ಯೆ ಮಲ್ತೊಂದೆರಾ ಪಂದ್ ಜನಕ್ಲೆಗ್ ಸಂಸಯ ಬೈದ್ಂಡ್.

ಬೆಂಗ್ಲೂರ್ ಡ್ ಪ್ರಧಾನಿ ಮೋದಿ

ಬೆಂಗ್ಲೂರ್: ಪ್ರಧಾನಿ ನರೇಂದ್ರ ಮೋದಿ ಇನಿ ಸಿಲಿಕಾನ್ ಸಿಟಿ ಬೆಂಗ್ಲೂರ್ ಗ್ ಬತ್ತ್ ದ್ ಜತ್ತೆರ್.

ಮೆರೆನ್ ರಾಜ್ಯಪಾಲ ಥಾವರ್ ಚಂದ್ ಗೆಹ್ಲೋಟ್, ಸಿಎಂ ಬೊಮ್ಮಾಯಿ, ಸಂಸದೆರ್ ತೇಜಸ್ವಿ ಸೂರ್ಯ, ಕೇಂದ್ರ ಸಚಿವೆರ್ ಪ್ರಹ್ಲಾದ್ ಜೋಶಿ ಎದ್ಕೊನಿಯೆರ್.