Wed. Nov 18th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಜ.2-4 : ಕೋಳ್ಯೂರು ಶ್ರೀ ಶಂಕರನಾರಾಯಣ ದೇವಲ್ಯಡ್ ವರ್ಷಾಧಿದ ಜಾತ್ರೆ,ಮಂಡಲ ಪೂಜೆ

ಮಂಜೇಶ್ವರದ ಕೋಳ್ಯೂರು ಶ್ರೀ ಶಂಕರನಾರಾಯಣ ದೇವಲ್ಯಡ್ ಜನವರಿ 2 ತಾರೀಕ್‌ರ್ದ್ 4 ತಾರೀಕ್ ಮುಟ್ಟ ವರ್ಷಾವಧಿ ಜಾತ್ರೆ ಬೊಕ್ಕ ಮಂಡಲ ಪೂಜೆ ನಡಪರೆ ಉಂಡು.

ವೇದಮೂರ್ತಿ ವರ್ಕಾಡಿ ದಿನೇಶ ತಂತ್ರಿಲೆನ ಮುತಾಲಿಕೆಡ್ ಧಾರ್ಮಿಕ ಅಂಚನೆ ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು. ಮಾತ ಭಕ್ತೆರ್ ಬತ್ತ್‌ದ್ ಶ್ರೀ ಮಹಾ ಗಣಪತಿ ಶಂಕರ-ನಾರಾಯಣ ದೇವೆರೆನ ಶ್ರೀ ಮುಡಿ ಗಂಧ ಪ್ರಸಾದನ್ ದೆತೊಂದು ಶ್ರೀಮೂರ್ತಿಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಅನುವಂಶಿಕ ಮೊಕ್ತೇಸರೆರ್ ವರ್ಕಾಡಿ ಹೊಸಮನೆ ರಾಜೇಶ್ ತಾಳಿತ್ತಾಯ, ಮೊಗಸಾಲೆ ಕೇಶವ ಭಟ್ಟ, ಉತ್ತಾರ ಕೊಡಂಗೆ ಕೃಷ್ಣ ಕುಮಾರ, ಚಕ್ರಕೋಡಿ ಕೃಷ್ಣ ಭಟ್ಟ ಬೊಕ್ಕ ಪ್ರಧಾನ ಅರ್ಚಕೆರ್ ವೇದಮೂರ್ತಿ ಕೆ. ರವಿಶಂಕರ ಹೊಳ್ಳ ಅಂಚನೆ ಶ್ರೀ ಶಂಕರನಾರಾಯಣ ಸೇವಾ ಸಮಿತಿ (ರಿ.) ಕೋಳ್ಯೂರು ಉಂದೆತ್ತ ಅಧ್ಯಕ್ಷೆರ್ ವೇದಮೂರ್ತಿ ಬೋಳಂತಕೋಡಿ ರಾಮ ಭಟ್ಟರು ಬೊಕ್ಕ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಕುಕ್ಕೆ ಸುಬ್ರಹ್ಮಣ್ಯ ದೇವಲ್ಯಡ್ ಚಂಪಾ ಷಷ್ಠಿ ಉಚ್ಚಯದ ಅವಭೃತ, ಓಕುಳಿ

ಸುಬ್ರಹ್ಮಣ್ಯ: ಮಹತೋಭಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯಡ್ ಚಂಪಾ ಷಷ್ಠಿ ಜಾತ್ರೆ ಉಚ್ಚಯದ ಮುಗಿತಲದ ನಿಲೆಟ್ಟ್ ಮಾರ್ಗಶಿರ ಶುದ್ಧ ಸಪ್ತಮಿದ ದಿನವಾಯಿನ ಬುಧಾರ ಬೊಲ್ಪುಗು ಕುಮಾರಾಧಾರೆಡ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವೆರೆನ ನೌಕಾ ವಿಹಾರ ಬೊಕ್ಕ ಅವಭೃತ ಉಚ್ಚಯ ಸಂಪನ್ನ ಆಂಡ್. ದೇವಲ್ಯದ ಪ್ರಧಾನ ಅರ್ಚಕೆರ್ ವೇದಮೂರ್ತಿ ಸೀತಾರಾಮ ಎಡಪಡಿತ್ತಾಯ ಮೇರ್ ಧಾರ್ಮಿಕ ವಿದಿವಿಧಾನಲೆರ್ದ್ ಮಲ್ತೆರ್. ಶ್ರೀ ದೇವಲ್ಯದ ಅರ್ಚಕೆರಾಯಿನ ವೇದಮೂರ್ತಿ ರಾಜೇಶ್ ನಡ್ಯಂತಿಲ್ಲಾಯ ಬೊಕ್ಕ ವೇದಮೂರ್ತಿ ಸತ್ಯನಾರಾಯಣ ನೂರಿತ್ತಾಯ ಮೊಕುಲು ಉಚ್ಚಯದ ವೈದಿಕ ವಿದಿ ವಿಧಾನಲೆಡ್ ಸಹಕಾರ ಕೊರಿಯೆರ್. ಸಾರ ಸಾರ ಭಕ್ತೆರ್ ಶ್ರೀ ದೇವೆರೆನ ಅವಭೃತ ಸ್ನಾನಡ್ ಪಾಲ್ ಪಡೆದ್ ಪುಣ್ಯ ಸ್ನಾನ ಮಲ್ತ್ ದ್ ಕೃತಾರ್ಥರಾಯೆರ್.

ಬೊಕ್ಕ ಬೊಲ್ಪುಗು ದೇವಲ್ಯದ ದ್ವಾದಶಿ ಮಂಟಪಡ್ ಓಕುಳಿ ಪೂಜೆ ನಡತ್ಂಡ್. ಆಯಿರ್ದ್ ಬೊಕ್ಕ ದೇವೆರೆಗ್ ಓಕುಳಿ ಸಮರ್ಪಣೆಯಾದ್ ಭಕ್ತೆರೆಗ್ ಓಕುಳಿ ನೀರ್ ತಲ್ತ್ ದ್ ಬೊಕ್ಕ ಓಕುಳಿ ಗೊಬ್ಬುದು, ಶ್ರೀ ದೇವೆರೆನ ಅವಭೃತೋಚ್ಚಯದ ಸವಾರಿ ಪಿದಡ್ಂದ್, ಬಿಲದ್ವಾರದ ಕಟ್ಟೆಡ್ ಕಟ್ಟೆಪೂಜೆ ನಡತ್ಂಡ್. ಆಯಿರ್ದ್ ಬೊಕ್ಕ ಕುಮಾರಧಾರೆದ ಮತ್ಸ್ಯ ತೀರ್ಥದ ಶ್ರೀ ದೇವೆರೆನ ಜಳಕದ ಗುಂಡಿಡ್ ದೇವೆರೆನ ಅವಭೃತೋಚ್ಚಯ ನಡತ್ಂಡ್. ಕ್ಷೇತ್ರದ ಪುರೋಹಿತೆರ್ ಮಧುಸೂದನ ಕಲ್ಲೂರಾಯ, ಸರ್ವೇಶ್ವರ ಭಟ್, ಕುಮಾರ ಭಟ್, ರಾಮಕೃಷ್ಣ ಭಟ್ ಮಂತ್ರಘೋಷ ಮಲ್ತೆರ್. ಮಂತ್ರ ಘೋಷದ ನಡುಟ್ ಪ್ರಧಾನ ಅರ್ಚಕೆರ್ ಕುಮಾರಧಾರೆ ಪುಣ್ಯ ತೀರ್ಥನ್ ಶಂಖಡ್ ದೇವೆರೆಗ್ ಸಮರ್ಪಣೆ ಮಲ್ತೆರ್. ಬೊಕ್ಕ ಬೊಂಡದ ಅಭಿಷೇಕ ಬೊಕ್ಕ ಬೇತೆ ಬೇತೆ ವೈದಿಕ ವಿದಧಿ ವಿಧಾನಲೆನ್ ಮಲ್ತೆರ್. ಅಯಿರ್ದ್ ಬೊಕ್ಕ ಕುಮಾರಧಾರೆದ ಪುಣ್ಯತೀರ್ಥಡ್ ಕುಕ್ಕೆ ಸುಬ್ರಹ್ಮಣ್ಯನ ಜಳಕ ನಡತ್ಂಡ್.


ಜಳಕದ ಬೊಕ್ಕ ಕುಮಾರಧಾರೆ ತುದೆ ಬರಿತ್ತ ಅವಭೃತ ಕಟ್ಟೆಡ್ ದೇವೆರೆಗ್ ಇಸೇಸ ಕಟ್ಟೆಪೂಜೆ ನಡತ್ಂಡ್. ಈ ಪೊರ್ತುಡು ಶ್ರೀ ದೇವಲ್ಯದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷೆರ್ ಮೋಹನರಾಂ ಸುಳ್ಳಿ, ಕಾರ್ಯನಿರ್ವಹಣಾಧಿಕಾರಿ ಡಾ.ನಿಂಗಯ್ಯ, ವ್ಯವಸ್ಥಾಪನಾ ಸಮಿತಿ ಸದಸ್ಯೆರಾಯಿನ ಪ್ರಸನ್ನ ದರ್ಬೆ, ವನಜಾ.ವಿ.ಭಟ್, ಶೋಭಾ ಗಿರಿಧರ್, ಪಿಜಿಎಸ್‌ಎನ್ ಪ್ರಸಾದ್, ಶ್ರೀವತ್ಸ ಬೆಂಗ್ಲೂರ್, ಮನೋಹರ ರೈ, ಲೋಕೇಶ್ ಮುಂಡುಕಜೆ, ಎಇಒ ಪುಷ್ಪಲತಾ ರಾವ್, ಮಾಸ್ಟರ್ ಪ್ಲಾನ್ ಸಮಿತಿ ಸದಸ್ಯೆರಾಯಿನ ಮನೋಜ್ ಸುಬ್ರಹ್ಮಣ್ಯ, ಕಿಶೋರ್ ಕುಮಾರ್ ಕೂಜುಗೋಡು, ಚಂದ್ರಶೇಖರ ಮರ್ಧಾಳ, ಚಂದ್ರಶೇಖರ ನಲ್ಲೂರಾಯ, ಉದ್ಯಮಿ ಅಜಿತ್ ಶೆಟ್ಟಿ, ಶಿಷ್ಟಾಚಾರ ವಿಭಾಗದ ಕೆ.ಎಂ.ಗೋಪಿನಾಥ್ ನಂಬೀಶ, ಪ್ರಮೋದ್ ಕುಮಾರ್.ಎಸ್, ದೇವಲ್ಯದ ಸಿಬ್ಬಂದಿಲು ಬೊಕ್ಕ ಸಾರ ಸಾರ ಭಕ್ತೆರ್ ಇತ್ತೆರ್.

ಅಯಿರ್ದ್ ಬೊಕ್ಕ ದೇವಲ್ಯಗ್ ಶ್ರೀ ದೇವೆರೆನ ಸವಾರಿ ಪಿದಡ್ಂಡ್. ಅಲ್ಪಲ್ಪ ಭಕ್ತಾದಿಲು ಆರತಿ, ಪೂ, ಹಣ್ಣುಕಾಯಿ, ಕರ್ಪೂರಾರತಿನ್ ದೇವೆರೆಗ್ ಸಮರ್ಪಣೆ ಮಲ್ತೆರ್. ಅವಭೃತೋಚ್ಚಯ ಸವಾರಿ ಬೊಕ್ಕ ಕುಕ್ಕೆ ಸುಬ್ರಹ್ಮಣ್ಯ ದೇವೆರೆಗ್ ಶ್ರೀ ದೇವಲ್ಯದ ಪಿದಯಿ ಚಾವಡಿಡ್ ಇಪ್ಪುನ ದಶಮಿ ಮಂಟಪಡ್ ಪೂಜೆ ನಡತ್ಂಡ್. ಬೊಕ್ಕ ಉಲಯಿ ಇಪ್ಪುನ ಚಾವಡಿಕಟ್ಟೆಡ್ ವಸಂತ ಪೂಜೆ ಬೊಕ್ಕ ಸಮಾಪನ ಪೂಜೆ ನಡತ್ಂಡ್. ಬೊಕ್ಕ ಭಕ್ತಾದಿಲೆಗ್ ವಸಂತ ಪೂಜೆದ ಫಲಹಾರ ಪ್ರಸಾದ ಬೊಕ್ಕ ಶರಬತ್ತ್ ನ್ ಕೊರಿಯೆರ್. ಅಯಿರ್ದ್ ಬೊಕ್ಕ ಶ್ರೀ ಕುಕ್ಕೆ ಸುಬ್ರಹ್ಮಣ್ಯ ದೇವೆರೆನ ನೌಕಾವಿಹಾರ ಬೊಕ್ಕ ಅವಭೃತೋಚ್ಚಯ ಪೊರ್ತುಡು ಕ್ಷೇತ್ರದ ಆನೆ ಯಶಸ್ವಿ ಮಾರ್ತೆಲೆಕ್ಕ ಮೀದ್ ನೀರ್ ಡ್ ಗೊಬ್ಬುಂಡು‌. ಶ್ರೀ ದೇವೆರೆನ ನೌಕೌವಿಹಾರದ ಪೊರ್ತುಡು ದೇವೆರೆಗ್ ನಮಸ್ಕಾರ ಪಾಡ್ಂಡ್. ದೆರ್ತ್ ದ್, ದೇವೆರೆಗ್ ನಮಸ್ಕಾರ ಮಲ್ತ್ಂಡ್. ಸಾರ ಸಾರ ಭಕ್ತೆರ್ ಪುಣ್ಯ ಸ್ನಾನ ಮಲ್ತೆರ್. ದೇವೆರ್ ಅವಭೃತ ಸ್ನಾನ ಮುಗಿತ್ ದ್, ಕುಮಾರಧಾರೆರ್ದ್ ಸುಬ್ರಹ್ಮಣ್ಯಗ್ ಬರ್ಪುನ ಪೊರ್ತುಡು ಕೈತಲ್ ದ ಭಕ್ತಾದಿಲು ಶರ್ಬತ್ತ್ ಪಾನಕ, ಮಜ್ಜಿಗೆ ಬೊಂಡ ಕೊರಿಯೆರ್. ಡಿ.5 ಮಾರ್ಗಶಿರ ಶುದ್ಧ ದ್ವಾದಶಿದಾನಿ ಕೊಪ್ಪರಿಗೆ ಜಾಪ್ಪುನೆತ್ತೊಟ್ಟಿಗೆ ವಾರ್ಷಿಕ ಚಂಪಾ ಷಷ್ಠಿ ಜಾತ್ರೆ ಮುಗಿಪುಂಡು.ಈ ದಿನ ರಾತ್ರೆ ದೇವಲ್ಯದ ಪಿದಯಿಡ್ ನೀರ್ ಡ್ ಬಂಡಿ ಉಚ್ಚಯ ನಡಪುಂಡು. ಅತ್ತಂದೆ ಗೋಪುರ ನಡಾವಳಿ ನಡಪರೆ ಉಂಡು.
(ವರದಿ : ಗೋಪಿಚಂದನ ಕೆ.ಎಸ್.)

ಡಿ.16-20: ಕೇಪು ಶ್ರೀ ಉಳ್ಳಾಲ್ತಿ ದುರ್ಗಾಪರಮೇಶ್ವರೀ ದೇವಲ್ಯಡ್ ಕಜಂಬು ಜಾತ್ರೆ

ಬಂಟ್ವಾಳ ತಾಲೂಕ್‌ದ ಕೇಪು ಶ್ರೀ ಉಳ್ಳಾಲ್ತಿ ದುರ್ಗಾಪರಮೇಶ್ವರೀ ದೇವಲ್ಯಡ್ ಡಿ.16 ಸುಕ್ರಾರರ್ದ್ ಡಿ.20 ತಾರೀಕ್ ಅಂಗಾರೆ ಮುಟ್ಟ ಕಾಲಾವಧಿ ಕಜಂಬು ಜಾತ್ರೆ ನಡಪರೆ ಉಂಡು.

ಈ ಲೇಸ್‌ಗ್ ಭಕ್ತೆರ್ ಬತ್ತ್‌ದ್, ಲೇಸ್‌ನ್ ಎಡ್ಡೆ ಮಲ್ತ್ ಕೊರೊಡು ಪಂದ್ ಕೇಪು ಶ್ರೀ ಉಳ್ಳಾಲ್ತಿ ದೇವಸ್ಥಾನದ ಅನುವಂಶಿಕ ಆಡಳಿತದಾರೆರ್ ಅಂಚನೆ ಶ್ರೀ ದುರ್ಗಾಪರಮೇಶ್ವರಿ (ಉಳ್ಳಾಲ್ತಿ) ಸೇವಾ ಸಮಿತಿ, ಸೀಮೆದ ಗುರಿಕಾರೆರ್ ಬೊಕ್ಕ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಡಿ.7: ಶ್ರೀ ಕಾವೇಶ್ವರ ದೇವಲ್ಯದ ವಠಾರೊಡು ಕಟೀಲ್ ಮೇಳದ ಶ್ರೀ ದೇವಿ ಮಹಾತ್ಮೆ ಆಟ

ಪೊಳಲಿ : ತೆಂಕಬೆಳ್ಳೂರುದ ಶ್ರೀ ಕಾವೇಶ್ವರ ದೇವಲ್ಯದ ವಟಾರೊಡು ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದ ಕಲಾವಿದೆರೆರ್ದ್ ಡಿ.7 ಬುಧಾರದಾನಿ ಬಯ್ಯಗ್ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ ಬಯಲಾಟ ನಡಪರೆ ಉಂಡು.

ಆನಿ ಬೊಲ್ಪುಗು ಶ್ರೀ ಸತ್ಯನಾರಾಯಣ ಪೂಜೆ, ಸಾರ್ವಜನಿಕ ಅನ್ನಸಂತರ್ಪಣೆ, ಶ್ರೀ ಕಾವೇಶ್ವರ ಭಜನಾ ಮಂಡಳಿ ಮೊಕ್ಲೆರ್ದ್ ಭಜನೆ, ಚೌಕಿ ಪೂಜೆ ಬೊಕ್ಕ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ ಸುರು ಅಪುಂಡು. ಅಯಿರ್ದ್ ಬೊಕ್ಕ ಸಾರ್ವಜನಿಕ ಅನ್ನಸಂತರ್ಪಣೆ ನಡಪುಂಡು. ಈ ಲೇಸ್ ಗ್ ಕಲಾಭಿಮಾನಿಲು ಆಯಿನ ನಿಕುಲು ಮಾತ ಬತ್ ದ್, ಶ್ರೀ ದೇವಿನ ಪ್ರಸಾದ ದೆತೊಂದು, ಈ ಸೇವೆ ಬಯಲಾಟನ್ ಪೊರ್ಲು ಮಲ್ತ್ ದ್ ಕೊರ್ದು, ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಸೇವಾದಾರೆರಾಯಿನ ರೂಪಶ್ರೀ ಬೊಕ್ಕ ನಾರಾಯಣ ನಾಯಕ್ ಬೊಕ್ಕ ಜೋಕುಲು ತೆಂಕಬೆಳ್ಳೂರು ಪೊಳಲಿ ಮೊಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಡಿ.12: ಕರಿಯಂಗಳ ಗ್ರಾಮದ ನಾಗರೀಕೆರೆನ ಪರವಾದ್ ಶ್ರೀ ಕ್ಷೇತ್ರ ಪೊಳಲಿಡ್ ಪಚ್ಚಿನಡ್ಕ ಸೇಸಪ್ಪ ಕೋಟ್ಯಾನ್, ಪೊಳಲಿ ಜಯರಾಮ್ ಭಟ್ ಗ್ ಪೌರ ತಮ್ಮನ

ಕರಿಯಂಗಳ ಗ್ರಾಮದ ನಾಗರೀಕೆರೆನ ಪರವಾದ್ ಶ್ರೀ ಕ್ಷೇತ್ರ ಪೊಳಲಿಡ್ ದಕ್ಷಿಣ ಕನ್ನಡ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರ್ ಪಚ್ಚಿನಡ್ಕ ಸೇಸಪ್ಪ ಕೋಟ್ಯಾನ್ ಬೊಕ್ಕ ಕರ್ಣಾಟಕ ಬ್ಯಾಂಕ್ ದ ಮಾಜಿ ಅಧ್ಯಕ್ಷೆರ್ ಪೊಳಲಿ ಜಯರಾಮ್ ಭಟ್ ಗ್ ಪೌರ ತಮ್ಮನ ಲೇಸ್ ಡಿ.12 ಗುರುವಾರ ಬಯ್ಯಗ್ 6 ಗಂಟೆಗ್ ನಡಪರೆ ಉಂಡು.


ಈ ಲೇಸ್ ದ ಅಧ್ಯಕ್ಷತೆನ್ ಬಂಟ್ವಾಳ ತಾಲೂಕ್ ದ ಪುಗರ್ತೆದ ಶಾಸಕೆರ್ ರಾಜೇಶ್ ನಾಯಕ್ ಉಳಿಪ್ಪಾಡಿಗುತ್ತು ಒಯಿಸೊನ್ವೆರ್. ಬೊಕ್ಕ ರಾಮಕೃಷ್ಣ ತಪೋವನ ಪೊಳಲಿದ ವಿವೇಕ ಚೈತನ್ಯಾನಂದ ಸ್ವಾಮೀಜಿ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ವೇದಮೂರ್ತಿ, ಜ್ಯೋತಿಷ್ಯ ವಿದ್ವಾನ್ ಕೋಡಿಮಜಲು ಅನಂತ ಪದ್ಮನಾಭ ಉಪಾಧ್ಯಾಯ ಶುಭಾಶಂಸನೆ ಕೊರ್ಪೆರ್. ಅಂಚನೆ ಮಲ್ಲ ಬಿನ್ನೆರಾದ್ ಪೊಳಲಿ ಶ್ರೀ ರಾಜರಾಜೇಶ್ವರೀ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಡಾ. ಮಂಜಯ್ಯ ಶೆಟ್ಟಿ ಬರಿಯೆರೆ ಉಲ್ಲೆರ್. ಬೊಕ್ಕ ರಾತ್ರೆ ಗಂಟೆ 8 ಗಂಟೆರ್ದ್ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ನಿರ್ದೇಶನಡ್ ಕಲಾಸಂಗಮ ಕಲಾವಿದೆರ್ದ್ ಸ್ವರಾಜ್ ಶೆಟ್ಟಿ ಅಭಿನಯದ ಶಿವದೂತೆ ಗುಳಿಗೆ ಭಕ್ತಿಪೂರ್ವಕ ತುಳು ನಾಟಕ ನಡಪುಂಡು. ಈ ಲೇಸ್ ಗ್ ನಿಕುಲು ಮಾತ ಬತ್ ದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಕರಿಯಂಗಳ ಗ್ರಾಮ ನಾಗರಿಕ ಸಮಿತಿ ಬೊಕ್ಕ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಬ್ರೈನ್ ಟ್ಯೂಮರ್ ಡ್ ತೀರ್ ಪೋಯಿನ 3ನೇ ಕ್ಲಾಸ್ ದ ಕಲ್ಪಾರ್ಥಿ

ಬ್ರೈನ್ ಟ್ಯೂಮರ್ ರ್ದ್ ಹುಷಾರ್ ಇಜ್ಜಂದೆ ಇತ್ತಿನ 3ನೇ ಕ್ಲಾಸ್ ದ ಕಲ್ಪಾರ್ಥಿ ಚಿಕಿತ್ಸೆ ಫಲಿಸಂದೆ ತೀರ್ ಪೋಯಿನ ಬಗೆಟ್ ಸುಳ್ಯರ್ದ್ ವರದಿ ಆತ್ಂಡ್.


ಅರಂತೋಡ್ ಪೇಂಟೆಡ್ ಹೋಟೆಲ್ ನಡಪಾವೊಂದು ಇತ್ತಿನ ಯೋಗೀಶ್ ಮೆರೆನ ಮಗಲ್ ಖುಷಿ (8 ವ. ) ತೀರ್ ಪೋಯಿನರ್. ಮೇರ್ ಅರಂತೋಡ್ ಸರಕಾರಿ ಪ್ರಾಥಮಿಕ ಶಾಲೆಡ್ 3ನೇ ಕ್ಲಾಸ್ ಕಲ್ತೊಂದು ಇತ್ತೆರ್.

ರೇಡಿಯೋ ಮಣಿಪಾಲ್ 90.4mhz ಡ್ ಶುದ್ಧ ಜಲ, ಸ್ವಚ್ಛ ನೆಲ, ಆರೋಗ್ಯವಾಗಿರಲಿ ಜೀವಸಂಕುಲ ಸರಣಿ ಲೇಸ್

ರೇಡಿಯೋ ಮಣಿಪಾಲ್ 90.4mhz ಡ್ ಗ್ರಾಮೀಣ ಪರ್ಪುನ ನೀರ್ ಬೊಕ್ಕ ನೈರ್ಮಲ್ಯ ಇಲಾಖೆ ಬೆಂಗ್ಲೂರ್ ದ ಮುತಾಲಿಕೆಡ್ ಶುದ್ಧ ಜಲ, ಸ್ವಚ್ಛ ನೆಲ, ಆರೋಗ್ಯವಾಗಿರಲಿ ಜೀವಸಂಕುಲ ಸರಣಿ ಲೇಸ್ ನ.30 (ಇನಿ) ಬಯ್ಯಗ್ 6 ಗಂಟೆಗ್ ಪ್ರಸಾರ ಆಯೆರೆ ಉಂಡು.


ಈ ಸಂಚಿಕೆ ಟಾಯ್ಲೆಟ್ ಲೆರ್ದ್ ಆರೋಗ್ಯದ ಮಿತ್ತ್ ಆಪುನ ಪರಿಣಾಮದ ಬಗೆಟ್ ಪ್ರಸಾರ ಅಪುಂಡು. ಈ ಸಂಚಿಕೆಡ್ ಅಂಬಲ್ಪಾಡಿ ಗ್ರಾಮದ ಆಶಾ ಕಾರ್ಯಕರ್ತೆರಾಯಿನ ಚಂದ್ರಿಕ ಬೊಕ್ಕ ಕೋಟ ಜನತಾ ಸಮೂಹ ಸಂಸ್ಥೆದ ಸಮಾಜಕಾರ್ಯ ವಿಭಾಗಡ್ ಸಂಯೋಜಕೆರಾದಿಪ್ಪುನ ರವಿಕಿರಣ್ ಕೋಟ ಬೊಕ್ಕ ನಿವೃತ್ತ ಆರೋಗ್ಯ ಕಾರ್ಯಕರ್ತೆರಾಯಿನ ಸಾಕಮ್ಮ ಪಾಲ್ ಪಡೆಯೆರೆ ಉಲ್ಲೆರ್. ನನ ಈ ಸಂಚಿಕೆ ಡಿ.1 ಮಧ್ಯಾಹ್ನ 2 ಗಂಟೆಗ್ ಮರುಪ್ರಸಾರ ಆಯೆರೆ ಉಂಡು.

ಡಿ.4:ಜೈ ತುಳುನಾಡ್ (ರಿ.)ಒಡಿಪು ಜಿಲ್ಲಾಸ್ಪತ್ರೆದ ರಕ್ತನಿಧಿ ಒಟ್ಟು ಸೇರಿಗೆಡ್ ನೆತ್ತೆರ್ ಉಂಬೊಲಿ ಲೇಸ್

ಜೈ ತುಳುನಾಡ್ (ರಿ.) ಮುತಾಲಿಕೆಡ್ ರಕ್ತನಿಧಿ, ಜಿಲ್ಲಾ ಆಸ್ವತ್ರೆ ಒಡಿಪು ಒಟ್ಟು ಸೇರಿಗೆಡ್ ಡಿ.4 ಕ್ ಐತಾರದಾನಿ ಕಾರ್ಲ ರೋಟರಿ ಬಾಲಭವನಡ್ ನೆತ್ತೆರ್ ಉಂಬೊಲಿ ಲೇಸ್ ನಡಪರೆ ಉಂಡು.

ಈ ಲೇಸ್ ನ್ ಕಾರ್ಲ ಶ್ರೀ ಅನಂತಪದ್ಮನಾಭ ದೇವೊಲ್ಯ, ಯೋಗದೀಪಿಕ ವಿದ್ಯಾಪೀಠ, ಪಲಿಮಾರ್ ಬೊಕ್ಕ ಅನುವಂಶಿಕ ಪ್ರಧಾನ ಅರ್ಚಕೆರ್, ಪ್ರಾಂಶುಪಾಲೆರ್ ಡಾ. ಕಾ. ವೇ ಶಂಕರನಾರಾಯಣ ಭಟ್ ಉದಿಪನ ಮಲ್ಪೆರೆ ಉಲ್ಲೆರ್. ಲೇಸ್ ದ ಗುರ್ಕಾರ್ಮೆನ್ ಜೈ ತುಳುನಾಡ್ (ರಿ.) ಗುರ್ಕಾರ್ಲು ಅಶ್ವಥ್ ತುಲುವೆ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಆಳುಪ ವಂಶಸ್ಥೆರ್, ತುಳು ಸಾಹಿತ್ಯ ಅಕಾಡೆಮಿ ಮಾಜಿ ಪದುಕೆರ್ ಡಾ. ಆಕಾಶ್ ರಾಜ್ ಜೈನ್, ಒಡಿಪು ರಕ್ತನಿಧಿ ಜಿಲ್ಲಾ ಆಸ್ಪತ್ರೆ ವೈದ್ಯಾಧಿಕಾರಿ ಡಾ. ವೀಣಾ ಕುಮಾರಿ, ಬೊಕ್ಕ ಬಿನ್ನೆರಾದ್ ಕಾರ್ಲ ಜಿ.ಎಸ್.ಬಿ ಹಿತರಕ್ಷಣಾ ವೇದಿಕೆ ಸಂಚಾಲಕೆರ್ ಆರ್. ವಿವೇಕಾನಂದ ಶೆಣೈ, ಕುಡ್ಲ ಹೆಚ್ ಡಿ.ಎಫ್.ಸಿ ಬ್ಯಾಂಕ್ ಲಿ. ಒತ್ತು ವ್ಯವಸ್ಥಾಪಕೆರ್ ವಿವೇಕ್ ಹೆಗ್ಡೆ, ಕಾರ್ಲ ಎಗ್ಗೆ ಯುವವಾಹಿನಿ (ರಿ.) ಗುರ್ಕಾರ್ಲು ತಾರನಾಥ ಕೋಟ್ಯಾನ್, ಜಾರ್ಕಳ-ಮುಂಡ್ಲಿ ಸೌಹಾರ್ದ ಫ್ರೆಂಡ್ಸ್ ಕ್ಲಬ್ ಗುರ್ಕಾರ್ಲು ಪ್ರಜ್ವಲ್ ಜೈನ್, ಕಾರ್ಲ ಅಮ್ಮಾಸ್ ಸ್ಪೋರ್ಟ್ಸ್ & ಗಿಫ್ಟ್ ಧಣಿ ಸುಧೀರ್ ಪೂಜಾರಿ, ನೆಲ್ಲಿಗುಡ್ಡೆ ಬಜಗೋಳಿ ಗೆಳೆಯರ ಬಳಗ ಗುರ್ಕಾರ್ಲು ಸುರೇಶ್ ಸಾಲ್ಯಾನ್, ಕಾಂತರಗೋಳಿ ಛತ್ರಪತಿ ಶಿವಾಜಿ ಮಹಾರಾಜ್ ಬಳಗ ಗುರ್ಕಾರ್ಲು ಸತೀಶ್ ಪೂಜಾರಿ ಕಾಂತರಗೋಳಿ ಬರಿಯೆರೆ ಉಲ್ಲೆರ್.
ಲೇಸ್ ದ ಒತ್ತು ಪಾಲ್ ಆದ್ ಜೈ ತುಳುನಾಡ್ (ರಿ.) ಒತ್ತು ಗುರ್ಕಾರ್ಲು ತುಲುವೆ ವಿಶು ಶ್ರೀಕೇರ ಉಲ್ಲೆರ್. ಈ ಲೇಸ್ ನ್ ಸ್ವರಾಜ್ ಶೆಟ್ಟಿ ಕಾರ್ಲ ಸುಧಾರಿಕೆ ಮಲ್ಪೆರೆ ಉಲ್ಲೆರ್.

ಡಿ.17: ಸಾರ್ವಜನಿಕ ಶ್ರೀ ಶನೈಶ್ಚರ ಪೂಜೆದ ಲೆಪ್ಪೋಲೆ ಬುಡುಗಡೆ ಮಲ್ತಿನ ಶಾಸಕೆರ್ ಹರೀಶ್ ಪೂಂಜ

ಬೊಲ್ತೇರ್: ವಿಶ್ವ ಹಿಂದೂ ಪರಿಷತ್ ಬಜರಂಗದಳ ರೆಖ್ಯ ಘಟಕದ ಮುತಾಲಿಕೆಡ್ ಡಿ.17 ಕ್ ನಡಪರೆ ಇಪ್ಪುನ 2 ನೇ ವರ್ಷದ ಸಾರ್ವಜನಿಕ ಶ್ರೀ ಶನೈಶ್ಚರ ಪೂಜೆ ಬೊಕ್ಕ ಧಾರ್ಮಿಕ ಸಭೆ ಲೇಸ್ ದ ಲೆಪ್ಪೋಲೆನ್ ಬೊಲ್ತೇರ್ ವಿಧಾನಸಭೆ ಕ್ಷೇತ್ರದ ಶಾಸಕೆರ್ ಹರೀಶ್ ಪೂಂಜ ಬುಡುಗಡೆ ಮಲ್ತೆರ್.


ಈ ಪೊರ್ತುಡು ವಿಶ್ವ ಹಿಂದೂ ಪರಿಷತ್, ಬಜರಂಗದಳ ಬೊಲ್ತೇರ್ ಪ್ರಖಂಡದ ಮುಖಂಡೆರ್ ಅಖಿಲ್ ರೆಖ್ಯ, ಅರಸಿನಮಕ್ಕಿ ಗ್ರಾ. ಪಂ ಅಧ್ಯಕ್ಷೆರ್ ನವೀನ್ ರೆಖ್ಯ, ರೆಖ್ಯ ಘಟಕದ ಕಾರ್ಯದರ್ಶಿ ಯೋಗಿಶ್ ಪಿಲತ್ತಡಿ, ಕಾರ್ಯಕರ್ತೆರ್ ಜಗದೀಶ್ ನಾಗಂಡ, ಬೊಕ್ಕ ಚೇತನ್ ಕೆರೆಜಾಲು ಇತ್ತೆರ್.

ಕಾರ್ ಆಕ್ಸಿಡೆಂಟ್: ಅಯ್ಯಪ್ಪ ಸ್ವಾಮಿ ಮಾಲೆ ಪಾಡಿಯೆರೆ ಪೋವೊಂದು ಇತ್ತಿನ ವ್ಯಕ್ತಿ ತೀರ್ ಪೋಯೆರ್

ಗಂಗಾವತಿ: ಶ್ರೀರಾಮನಗರದ ದುರ್ಗಾಸ್ವೀಟ್ ಅಂಗಡಿದ ಧಣಿ ನಾಗೇಶರಾವ್ (46) ಮೇರ್ ಅಯ್ಯಪ್ಪ ಸ್ವಾಮಿ ಮಾಲೆ ಪಾಡಿಯೆರೆ ಪೆರಿಯ ಅಯ್ಯಪ್ಪ ಸ್ವಾಮಿಲೆನೊಟ್ಟಿಗೆ ಕಾರ್ ಡ್ ಪೋವೊಂದು ಇತ್ತಿನ ಪೊರ್ತುಡು ಮೊಕ್ಲೆನ ಕಾರ್ ಕಂರ್ಬುದ ಟ್ರಾಕ್ಟರ್ ಗ್ ಗುದ್ದುದು ಪಲ್ಟಿ ಆದ್ ನಾಗೇಶ್ ರಾವ್ ಆ ಜಾಗೆಡೇ ತೀರ್ ಪೋಯಿನ ಘಟನೆ ಶ್ರೀರಾಮನಗರ ಬೊಕ್ಕ ಪ್ರಗತಿನಗರದ ನಡುಟು ಇಪ್ಪುನ ಹಳ್ಳದ ಕೈತಲ್ ದ ಮಾರ್ಗಡ್ ಬುಧಾರ ಬೊಲ್ಪುಗು 5;30 ಕ್ ನಡತ್ಂಡ್.

ಈ ಘಟನೆಡ್ ಕಾರ್ ಡ್ ಇತ್ತಿನ ಅಂಜೂರಿಕ್ಯಾಂಪಿದ ಶೇಷಾದ್ರಿರಾವ್ ಬೊಕ್ಕ ಸುರೇಶ್ ಮೊಕ್ಲೆಗ್ ಪೆಟ್ಟಾತ್ಂಡ್. ಮೊಕುಲು ಗಂಗಾವತಿ ಸರಕಾರಿ ಆಸ್ಪತ್ರೆಡ್ ದಾಖಲ್ ಆತೆರ್. ಈ ಬಗೆಟ್ ಗ್ರಾಮೀಣ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.