Wed. Nov 18th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಆಜಿ ಜನ ಸಾಧಕೆರೆಗ್ ಜಾನಪದ ವಿವಿ ಗೌರವ ಡಾಕ್ಟರೇಟ್

ಹಾವೇರಿ: ರಂಗಕರ್ಮಿ ಯಶವಂತ ಸರದೇಶಪಾಂಡೆ ಸೇರ್ದ್ ಆಜಿ ಸಾಧಕೆರೆಗ್ ಜಾನಪದ ವಿವಿ ಗೌರವ ಡಾಕ್ಟರೇಟ್ ಕೊರ್ತುಂಡು.

ಮೊಕ್ಲೆಗ್ ಡಿಸೆಂಬರ್ 1ದಾನಿ ಗೋಟಗೋಡಿ ಜಾನಪದ ವಿವಿ ಆವರಣದ ಹಿರೇತಿಟ್ಟು ಬಯಲು ರಂಗಮಂದಿರಡ್ ಗೌರವ ಡಾಕ್ಟರೇಟ್ ಪ್ರದಾನ ಮಲ್ಪೆರೆ ಉಂಡು ಪಂದ್ ಜಾನಪದ ವಿವಿ ಕುಲಪತಿ ಪ್ರೊ| ಟಿ.ಎಂ. ಭಾಸ್ಕರ್‌ ತೆರಿಪಾದೆರ್. ಜಾನಪದ ಕ್ಷೇತ್ರಡ್ ಗಣನೀಯ ಸೇವೆ ಸಂದಾಯಿನ ರಾಣೆಬೆನ್ನೂರ್ ತಾಲೂಕ್ ಅರೆಮಲ್ಲಾಪೂರ ಗ್ರಾಮದ ಜಾನಪದ ಕ್ಷೇತ್ರದ ಕೆಂಚಪ್ಪ ಚನ್ನಬಸಪ್ಪ ನಾಗರಜ್ಜಿ, ದಕ್ಷಿಣ ಕನ್ನಡ ಜಿಲ್ಲೆ ಹಳೆಗೇಟ್ ರಂಗಮನೆ ಸಾಂಸ್ಕೃತಿಕ ಕಲಾ ಕೇಂದ್ರದ ಜೀವನ್‌ ರಾಂ ಸುಳ್ಯ ಬೊಕ್ಕ ಒಡಿಪು ಜಿಲ್ಲೆದ ತಲ್ಲೂರ್ ಶಿವರಾಮ ಶೆಟ್ಟಿ ಮೆರೆಗ್ 6ನೇ ವಾರ್ಷಿಕ ಬೊಕ್ಕ ಧಾರವಾಡ ಜಿಲ್ಲೆದ ಹುಬ್ಬಳ್ಳಿದ ಅಂತಾರಾಷ್ಟ್ರೀಯ ಕಲಾವಿದೆರ್ ಯಶವಂತ ಸರದೇಶಪಾಂಡೆ, ಗದಗದ ಪಾರಂಪರಿಕ ವೈದ್ಯೆರ್ ಬಸವರಾಜು ಮಲರಾಜಪ್ಪ ಕಂಚಿಗೇರಿ, ಬಾಗಲಕೋಟೆದ ಜಾನಪದ ಕಲಾವಿದೆರ್ ವೆಂಕಪ್ಪ ಅಂಬಾಜಿ ಸುಗೇತಕರ್‌ ಮೆರೆಗ್ 7ನೇ ವಾರ್ಷಿಕ ಘಟಿಕೋತ್ಸವದ ಡಾಕ್ಟರೇಟ್‌ ಪ್ರದಾನ ಮಲ್ಪೆರೆ ಉಂಡು ಪಂದ್ ಮೇರ್ ಮಾಧ್ಯಮದಕ್ಲೆಗ್ ತೆರಿಪಾಯೆರ್. 2020ನೇ ಸಾಲ್ ದ ರಡ್ಡ್ ಜನ ಬೊಕ್ಕ 2021ನೇ ಸಾಲ್ ದ ಮೂಜಿ ಜನ ವಿದ್ಯಾರ್ಥಿಲೆಗ್ ಬಂಗಾರ್ ದ ಪದಕ ಪ್ರದಾನ ಮಲ್ಪೆರೆ ಉಂಡು ಪಂದ್ ಭಾಸ್ಕರ್ ಪಂಡೆರ್.

ಕಾರ್ಲ ಪೊಲೀಸ್‌ ಠಾಣೆ ವೃತ್ತ ನಿರೀಕ್ಷಕೆರಾದ್ ನಾಗರಾಜ್‌ ಟಿ.ಡಿ ನೇಮಕ

ಬಂಟ್ವಾಳ ಗ್ರಾಮಾಂತರ ಪೊಲೀಸ್‌ ಠಾಣೆ ವೃತ್ತ ನಿರೀಕ್ಷಕೆರಾದಿತ್ತಿನ ನಾಗರಾಜ್‌ ಟಿ.ಡಿ. ಮೇರ್ ಕಾರ್ಲ ಪೊಲೀಸ್‌ ಠಾಣೆ ವೃತ್ತ ನಿರೀಕ್ಷಕೆರಾದ್ ವರ್ಗಾವಣೆ ಆತೆರ್.

ಬೊಕ್ಕ ಕಾರ್ಲ ವೃತ್ತ ನಿರೀಕ್ಷಕೆ ಸಂಪತ್ ಕುಮಾರ್ ಎ. ಮೆರೆನ್ ಕರಾವಳಿ ಕಾವಲು ಪೊಲೀಸ್ ನಿರೀಕ್ಷಕೆರಾದ್ ವರ್ಗಾವಣೆ ಮಲ್ತ್ ದ್ ಪಂದ್ ಸರಕಾರ ಆದೇಶ ಕೊರ್ತುಂಡು. ಅಂಚನೆ ಒಡಿಪು ಪೇಂಟೆದ ಪೊಲೀಸ್‌ ಠಾಣಾ ಪೊಲೀಸ್‌ ನಿರೀಕ್ಷಕೆರ ಪ್ರಮೋದ್‌ ಕುಮಾರ್‌ ಮಲ್ಪೆ ಕರಾವಳಿ ಕಾವಲು ಪೊಲೀಸ್‌ ಠಾಣಾ ನಿರೀಕ್ಷಕೆರಾದ್, ಕರಾವಳಿ ಕಾವಲು ಪೊಲೀಸ್‌ ನಿರೀಕ್ಷಕೆರ್ ಮಂಜಪ್ಪ ಡಿ.ರಾಮಕೊಂಡಾಡಿ ಒಡಿಪು ಪೇಂಟೆದ ಪೊಲೀಸ್‌ ಠಾಣೆ ನಿರೀಕ್ಷಕೆರಾದ್, ವರ್ಗಾವಣೆ ಆತೆರ್.

ದೇಶಡ್ ಎಲ್ಲೆರ್ದ್ ಬೊಕ್ಕ ಡಿಜಿಟಲ್ ಕರೆನ್ಸಿ ಸುರು

ದಿಲ್ಲಿ: ಆರ್‌ಬಿಐ ಡಿಜಿಟಲ್ ರೂಪಾಯಿನ್ ಡಿಸೆಂಬರ್ 1 ಕ್ಕ್ ಪ್ರಾಯೋಗಿಕವಾದ್ ಸುರು ಮಲ್ಪರೆ ಉಂಡು. ಉಂದೆರ್ದಾವರ ಕಾಸ್‌ದ ವಹಿವಾಟುಗ್ ಪೊಸ ಅವಕಾಶ ತಿಕ್ಕರೆ ಉಂಡು.

ಡಿಜಿಟಲ್ ರೂಪಾಯಿ ಕೇಂದ್ರ ಹಣಕಾಸು ಸಚಿವೆರ್ ನಿರ್ಮಲಾ ಸೀತಾರಾಮನ್ ಕರಿನ ಕೇಂದ್ರ ಬಜೆಟ್‌ಡ್ ಘೋಷಣೆ ಮಲ್ತಿತ್ತೆರ್. ಈ ಯೋಜನೆ ಮಾತ ಜಾಗೆಲೆಡ್ ಇಪ್ಪುಜಿ. ಸುರುಕ್ಕ್ ಕೆಲ ಪ್ರದೇಶಡ್ ಮಾತ್ರ ಇಪ್ಪುಂಡು. ಹಂತ ಹಂತವಾದ್ ಪ್ರಯೋಗನ್ ವಿಸ್ತರಣೆ ಮಲ್ಪರೆ ಉಂಡು ಪಂದ್ ಆರ್‌ಬಿಐ ತೆರಿಪಾದ್ಂಡ್.

ಡಿಜಿಟಲ್ ರೂಪಾಯಿ ಸುರುಕ್ಕ್ ಸ್ಟೇಟ್‌ಬ್ಯಾಂಕ್ ಆಫ್ ಇಂಡಿಯಾ, ಐಸಿಐಸಿಐ ಬ್ಯಾಂಕ್, ಯೆಸ್ ಬ್ಯಾಂಕ್, ಐಡಿಎಫ್‌ಸಿ ಬ್ಯಾಂಕ್ ಮುಕೇನ ಪ್ರಮುಖ ನಾಲ್ ಪೇಂಟೆಡ್ ಪ್ರಾಯೋಗಿಕ ಬಳಕೆ ಮಲ್ಪರೆ ಉಂಡು. ಒರಿನ ಬ್ಯಾಂಕ್‌ಲೆಡ್ ಹಂತ ಹಂತವಾದ್ ಸುರು ಆಯರೆ ಉಂಡು.

ಡಿ.1-7: ಒಡಿಯೂರು ಶ್ರೀ ಗುರುದೇವದತ್ತ ಸಂಸ್ಥಾನಡ್ ಶ್ರೀ ದತ್ತ ಜಯಂತಿ ಉಚ್ಚಯ, ತುಳು ನಾಟಕ ಉಚ್ಚಯ

ದಕ್ಷಿಣ ಗಾಣಗಾಪುರದ ಒಡಿಯೂರು ಶ್ರೀ ಗುರುದೇವದತ್ತ ಸಂಸ್ಥಾನಮ್ ಶ್ರೀ ದತ್ತಾಂಜನೇಯ ಕ್ಷೇತ್ರಡ್ 2022 ಡಿ. 1 – 7 ಮುಟ್ಟ ಶ್ರೀ ದತ್ತ ಜಯಂತಿ ಮಹೋಚ್ಚಯ, ಶ್ರೀದತ್ತ ಮಹಾಯಾಗ ಸಪ್ತಾಹ, ಹರಿಕಥಾ ಸತ್ಸಂಗ ಸಪ್ತಾಹ ಅಂಚನೆ ಒಡಿಯೂರು ತುಳು ನಾಟಕೋತ್ಸವ ಲೇಸ್ ಶ್ರೀ ಸಂಸ್ಥಾನದ ರಾಜಾಂಗಣಡ್ ನಡಪರೆ ಉಂಡು.

ಏಳ್ ದಿನಲ ಬೇತೆ ಬೇತೆ ರೀತಿದ ವೈದಿಕ, ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮದ ಓರುಟ್ಟು ಈ ಲೇಸ್ ನಡಪರೆ ಉಂಡು. ಅಂಚನೆ 1 ತಾರೀಕ್‌ರ್ದ್ 6 ಮುಟ್ಟ ಬೇತೆ ಬೇತೆ ರೀತಿದ ತುಳು ನಾಟಕ ಪಂತೊ ನಡಪರೆ ಇತ್ತ್‌ದ್ ಈ ಲೇಸ್‌ಗ್ ಮಾತೆರ್‍ಲ ಬರೋಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಡಿ.3-10: ಉರ್ವದ ಬೋಳೂರು ಶ್ರೀ ರಾಮ ಭಜನಾ ಮಂದಿರಡ್ 26 ನೇ ವಾರ್ಷಿಕ ಏಕಾಹ ಭಜನೋಚ್ಚಯ

ಕುಡ್ಲ: ಉರ್ವದ ಬೋಳೂರು ಶ್ರೀ ರಾಮ ಭಜನಾ ಮಂದಿರಡ್ 26ನೇ ವಾರ್ಷಿಕ ಏಕಾಹ ಭಜನೋಚ್ಚಯ ಬೊಕ್ಕ ನಗರ ಭಜನೆ, ನೃತ್ಯ ಬಲಿ ಸೇವೆ, ಪಲ್ಲಕ್ಕಿ ಉಚ್ಚಯ, ಯಕ್ಷಗಾನ ಬಯಲಾಟ ಡಿ.3 – 10 ಮುಟ್ಟ ನಡಪರೆ ಉಂಡು.

ಡಿ.3 ತಾರೀಕ್ ಸನಿವಾರ ಕಾಂಡೆ 8 ಗಂಟೆಗ್ ವೇ| ಮೂ| ಶ್ರೀ ಕೆ. ಪುರುಷೋತ್ತಮ ಭಟ್ ಮೆರೆನ ಪೌರೋಹಿತ್ಯಡ್ ದೇವತಾ ಪ್ರಾರ್ಥನೆ, ತೋರಣ ಮೂರ್ತ, ಕೊರಗಜ್ಜ ಕ್ಷೇತ್ರಡ್ ಪರ್ವಸೇವೆ, ಪ್ರಾರ್ಥನೆ ನಡಪರೆ ಉಂಡು.

ಡಿ.3-5 ತಾರೀಕ್ ಮುಟ್ಟ ನಗರ ಭಜನೆ ನಡಪರೆ ಉಂಡು. ಡಿ. 6 ಕ್ಕ್ ಅಂಗಾರೆ ಆದ್ಯ ಗಣಯಾಗ, ನವಕ ಕಲಶ ಸ್ಥಾಪನೆ, ಪ್ರಧಾನ ಹವನ, ಪಂಜಾಮೃತ ಫಲಾಭಿಷೇಕ, ಕಲಶಾಭಿಷೇಕ, ಅಲಂಕಾರ ಪೂಜೆ ನಡಪರೆ ಉಂಡು.

8 ದಿನಲ ಬೇತೆ ಬೇತಿ ರೀತಿದ ಧಾರ್ಮಿಕ, ಸಾಂಸ್ಕೃತಿಕ, ವೈದಿಕ ಕಾರ್ಯಕ್ರಮ ನಡಪರೆ ಉಂಡು. ಡಿ. 9 ತಾರೀಕ್‌ಗ್ ಬಯ್ಯ 6 ಗಂಟೆಗ್ ಪಲ್ಲಕ್ಕಿ ಉಚ್ಚಯ-ಅವಭ್ರತ ಉಚ್ಚಯ ನಡತ್ತ್‌ದ್ ಡಿ. 10 ತಾರೀಕ್‌ಗ್ ಬಯ್ಯ 6 ಗಂಟೆರ್ದ್ ಉರ್ವ ಮಾರ್ಕೆರ್ಟ್ ಮೈದಾನೊಡು ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯ ಸ್ವಾಮಿ ಕೃಪಾಪೋಷಿತ ಯಕ್ಷಗಾನ ಮಂಡಳಿ ಪಾವಂಜೆ ಮೊಕಲೆರ್ದ್ ಯಕ್ಷಧ್ರುವ ಪಟ್ಲ ಸತೀಶ್ ಶೆಟ್ಟಿ ಮೆರೆನ ಭಾಗವತಿಕೆಡ್ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ ನಡಪರೆ ಉಂಡು.

ಡಿ.1 ಕ್ಕ್ ಗುರುವಾಯನಕೆರೆ ಶ್ರೀ ಪಿಲಿಚಂಡಿ ದೈವದ ದೊಂಪದ ಬಲಿ ಉಚ್ಚಯ

ಬೊಲ್ತೇರ್ ತಾಲೂಕ್‌ದ ಗುರುವಾಯನಕೆರೆ ಪಿಲಿಚಾಮುಂಡಿಕಲ್ಲು ಮುಲ್ಪ ವರ್ಷಂಪ್ರತಿ ನಡಪುನ ಶ್ರೀ ಪಿಲಿಚಂಡಿ ದೈವದ ದೊಂಪದ ಬಲಿ ಉಚ್ಚಯ ಡಿ. 1 ತಾರೀಕ್‌ಗ್ ಬಯ್ಯ 6 ಗಂಟೆಗ್ ನಡಪರೆ ಉಂಡು.

ಈ ಉಚ್ಚಯಗ್ ಮಾತ ಭಕ್ತೆರ್ ಬತ್ತ್‌ದ್, ಗಂಧಪ್ರಸಾದನ್ ದೆತೊಂದ್ ದೈವದ ಕೈಪೆಗ್ ಪಾತ್ರರಾವೊಡು ಪಂದ್ ಪಿಲಿಚಾಮುಂಡಿಕಲ್ಲು ದೊಂಪದಬಲಿ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಸೋಮಶೇಖರ ದೇವಸ್ಯ ಬಾಳಿಕೆ, ಉಪಾಧ್ಯಕ್ಷೆರ್ ವಿತೇಶ್ ಬಂಗೇರ ಅಂಚನೆ ಶ್ರೀನಿವಾಸ ಅಸ್ರಣ್ಣೆರ್ ಮೂಡುಮನೆ, ಅಳದಂಗಡಿ ಅರಮನೆತ್ತ ಎ. ರಾಜಶೇಖರ ಶೆಟ್ಟಿ, ಗೌರವಾಧ್ಯಕ್ಷೆರ್ ಪ್ರವೀಣ್ ಕುಮಾರ್ ಅಜ್ರಿ, ಪ್ರಧಾನ ಕಾರ್ಯದರ್ಶಿ ಜಿ. ನಾಗೇಶ್ ಮೂಲ್ಯ, ಕಾರ್ಯದರ್ಶಿ ಶೋಭಿತ್ ಜೈನ್, ಕೋಶಾಧಿಕಾರಿ ನಾರಾಯಣ ಆಚಾರ್ಯ ಬರಾಯ ಸೇರಿನಂಚನೆ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಬ್ರಹ್ಮಶ್ರೀ ಮುಗೇರ ಮಹಾಂಕಾಳಿ ದೈವೋಲ್ಯ ಈಶ್ವರಗೋಳಿದ ಜೀರ್ಣೋದ್ದಾರದ ವಿಜ್ಞಾಪನ ಪತ್ರ ಬುಡುಗಡೆ

ಈಶ್ವರಗೋಳಿದ ಬ್ರಹ್ಮಶ್ರೀ ಮುಗೇರ
ಮಹಾಂಕಾಳಿ ದೈವೋಲ್ಯದ ಜೀರ್ಣೋದ್ದಾರದ ವಿಜ್ಞಾಪನ ಪತ್ರ ಬುಡುಗಡೆ ಲೇಸ್ ನಡತ್ಂಡ್.


ಈ ಲೇಸ್ ಡ್ ವಿಜ್ಞಾಪನ ಪತ್ರನ್ ಶಾಸಕೆರ್ ಡಾ. ಭರತ್ ಶೆಟ್ಟಿ ಮೇರ್ ಬುಡುಗಡೆ ಮಲ್ತೆರ್.
ವರದಿ: ನಿತೇಶ್ ಕುಳಾಯಿ

ಭಾರತೀಯ ಒಲಂಪಿಕ್ ಸಂಸ್ಥೆದ ಪೊಸ ಅಧ್ಯಕ್ಷೆರಾದ್ ಪಿಟಿ ಉಷಾ ಆಯ್ಕೆ

ಡೆಲ್ಲಿ: ಭಾರತೀಯ ಒಲಂಪಿಕ್ ಸಂಸ್ಥೆ(ಐಒಎ)ದ ಪೊಸ ಅಧ್ಯಕ್ಷೆರಾದ್ ಪುಗರ್ತೆದ ಮಾಜಿ ಅಥ್ಲೀಟ್ ಪಿಟಿ ಉಷಾ ಮೇರ್ ಅವಿರೋಧ ಆಯ್ಕೆ ಆತೆರ್.

ಐಒಎ ಅಧ್ಯಕ್ಷೆರಾದ್ ಆಯ್ಕೆ ಆಯಿನ ಸುರುತ ಪೊಂಜೋವ್ ಪನ್ಪುನ ಪುದರ್ ಗ್ ಪಿ.ಟಿ.ಉಷಾ ಮೇರ್ ಪಾತ್ರರಾತೆರ್. ಮೆರೆಗ್ ಕೇಂದ್ರ ಕ್ರೀಡಾ ಸಚಿವೆರಾದಿತ್ತಿನ, ಕೇಂದ್ರ ಕಾನೂನು ಸಚಿವೆರ್ ಕಿರಣ್ ರಿಜಿಜು ಸೊಲ್ಮೆ ಸಂದಾದೆರ್.

ಮದಿಮೆದ ಲೇಸ್ ಡ್ ನಲಿತೊಂದುಪ್ಪುನಗನೇ ತಿಗಲೆ ಬೇನೆಡ್ ತೀರ್ ಪೋಯಿನ ಬಿನ್ನೆ

ವಾರಣಾಸಿ: ಮದಿಮೆ ಲೇಸ್ ಡ್ ಡ್ಯಾನ್ಸ್ ಮಲ್ಪುನಗ ವ್ಯಕ್ತಿಯೊರಿ ತಿಗಲೆ ಬೇನೆರ್ದ್ ತೀರ್ ಪೋಯಿನ ಘಟನೆ ಉತ್ತರ ಪ್ರದೇಶದ ವಾರಣಾಸಿಡ್ ನಡತ್ಂಡ್.


ತೀರ್ ಪೋಯಿನಾರ್ ಮನೋಜ್ ವಿಶ್ವಕರ್ಮ ಪಂದ್ ತೆರಿದ್ ಬೈದ್ಂಡ್. ನೆತ್ತ ವೀಡಿಯೋ ಸಾಮಾಜಿಕ ಜಾಲತಾಣಡ್ ವೈರಲ್ ಆತ್ಂಡ್.

ಡಿಸೆಂಬರ್ 16,17,18: ಕಾಪು ಕಡಲ ಬರಿಟ್ಟ್ ಕಡಲ ಐಸಿರ-2022

ಕಾಪು: ಲಾಲ್ ಬಹದ್ದೂರ್ ಶಾಸ್ತ್ರಿ ಸ್ಪೋರ್ಟ್ಸ್ ಅಂಡ್ ಕಲ್ಚರಲ್ ಕ್ಲಬ್ (ರಿ.) ಕಾಪು, ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ಕಾಪು ಪಡು, ದಿ| ಆರ್ ಡಿ ಮೆಂಡನ್ ಕಾಪು ಸ್ಮರಣಾರ್ಥ ಜನ್ಮ ಶತಮಾನೋತ್ಸವ ಆಚರಣೆ ಸಮಿತಿ ಕಾಪು ನೆತ್ತ ಸಂಯುಕ್ತ ಆಶ್ರಯಡ್ ಕಾಪು ದೀಪಸ್ಥಂಭದ ಕೈತಲ್ ಕಡಲ ಬರಿಟ್ಟ್ ಬೀಚ್ ಉಚ್ಚಯ ಕಡಲ ಐಸಿರ 2022, ಡಿಸೆಂಬರ್ 16,17,18 ದಾನಿ ನಡಪರೆ ಉಂಡು ಪಂದ್ ಸಂಸ್ಥೆದ ಗೌರವಾಧ್ಯಕ್ಷೆರ್ ಕಾಪು ಶಾಸಕೆರ್ ಲಾಲಾಜಿ ಆರ್ ಮೆಂಡನ್ ಪತ್ರಿಕಾಗೋಷ್ಠಿಡ್ ಮಾಹಿತಿ ಕೊರಿಯೆರ್.

ಲಾಲ್ ಬಹುದ್ದೂರ್ ಶಾಸ್ತ್ರಿ ಸ್ಪೋರ್ಟ್ಸ್ ಆಂಡ್ ಕಲ್ಚರಲ್ ಕ್ಲಬ್ ಸಂಸ್ಥೆದ 45ನೇ ವಾರ್ಷಿಕ ಉಚ್ಚಯ ಕಾಪು ಪಡು ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ವಾರ್ಷಿಕ ಉಚ್ಚಯ ದಿ. ಆರ್ ಡಿ ಮೆಂಡನ್ ಕಾಪು ಮೆರೆನ ಸ್ಮರಣಾರ್ಥ ಜನ್ಮ ಶತಮಾನೋತ್ಸವ ಆಚರಣೆ ಸಂಯುಕ್ತ ಆಶ್ರಯಡ್, ಬೇತೆ ಬೇತೆ ಲೇಸ್ ಲು ಕಾಪು ಕಡಲ ಬರಿಟ್ಟ್ ನಡಪರೆ ಉಂಡು. ನೆರ್ದ್ ದುಂಬು ಲೇಸ್ ಲೆನ್ ಅಟ್ಟಣೆ ಮಲ್ತಿನ ಕೂಟ ಈ ಸರ್ತಿ ಗೊಬ್ಬುದೊಟ್ಟಿಗೆ, ಬೇತೆ ಬೇತೆ ಪಂತೊಲು, ಸಾಂಸ್ಕೃತಿಕ ಪಂತೊ, ಚಿತ್ರ ಬುಡುಪಾವುನ ಪಂತೊ, ಫಲಪುಷ್ಪ ಕಲಾ ಪಂತೊ- ಪ್ರದರ್ಶನ, ಫುಡ್ ಫೆಸ್ಟಿವಲ್, ಲೇಸರ್ ಷೋ, ರಸಮಂಜರಿ, ಬಲೆ ಬೀಸ್ ದ್ ಮೀನ್ ಪತ್ತುನ, ಗಾಳ ಪಾಡ್ದ್ ಮೀನ್ ಪತ್ತುನ, ಚೆಂಡೆ ಪಂತೊ, ಬೀಚ್ ವಾಲಿಬಾಲ್ ಪಂತೊ, ಪೊಂಜೋವ್ ನಕ್ಲೆಗ್ ತ್ರೋಬಾಲ್, ಸಂಗೀತ ಕುರ್ಚಿ ಪಂತೊಲು, ಕೊಳಲು ತಬಲ ಕೂಟ, ಶ್ವಾನ ಪಂತೊ, ಈಜು ಸ್ಪರ್ಧೆ, ಮರಳ್ ಡ್ ಕಲಾಕೃತಿ, ವೋಡ ಒಚ್ಚುನ ಪಂತೊ, ಗಾಳಿಪಟ ಪಂತೊಲೆನ್ ಆಯೋಜನೆ ಮಲ್ತ್ ದ. ನೆಟ್ ಸುರುತ, ರಡ್ಡ್ ನೇ, ಮೂಜಿನೇ ಸ್ಥಾನ ಗಲಸಿನಕ್ಲೆಗ್ ನಗದು ಇನಾಮ್ ಉಂಡು ಪಂದ್ ಪಂಡೆರ್. ಈ ಪೊರ್ತುಡು ಸಂಸ್ಥೆದ ಅಧ್ಯಕ್ಷೆರ್ ಶೀಲರಾಜ್ ಪುತ್ರನ್, ಉಪಾಧ್ಯಕ್ಷೆರ್ ಆನಂದ ಶ್ರೀಯಾನ್, ಕಾರ್ಯದರ್ಶಿ ಸಚಿನ್ ಪುತ್ರನ್, ಕೋಶಾಧಿಕಾರಿ ಕುಶ ಸಾಲ್ಯಾನ್, ದಿನೇಶ್ ಸುವರ್ಣ, ನಿತೇಶ್ ಸುವರ್ಣ, ರಾಜೇಶ್ ಸುವರ್ಣ ಇತ್ತೆರ್.