Wed. Nov 18th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಡಿ.3 : ಬಿ.ಕೆ ಫ್ರೆಂಡ್ಸ್ ನಾಟಿ ನರಿಕೊಂಬು ನೆತ್ತ ವತಿರ್ದ್ ಬಂಟ್ವಾಳಡ್ ” ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ” ಆಟ

ಬಿ.ಕೆ ಫ್ರೆಂಡ್ಸ್ ನಾಟಿ ನರಿಕೊಂಬು ನೆತ್ತ ವತಿರ್ದ್ ಬಂಟ್ವಾಳಡ್ ಸುರುತ ಸರ್ತಿ ಶ್ರೀ ಆದಿ ಧೂಮಾವತಿ ಶ್ರೀ ದೇಯಿಬೈದೆತಿ ಕೃಪಾ ಪೋಷಿತ ಯಕ್ಷಗಾನ ಮಂಡಳಿ ಮೂಲಸ್ಥಾನ ಗೆಜ್ಜೆಗಿರಿ ಮೊಕ್ಲೆರ್ದ್ ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಆಟ ಡಿ.3 ಶನಿಯಾರ ಶ್ರೀ ಕೋದಂಡರಾಮಚಂದ್ರ ದೇವಲ್ಯ ವಠಾರ, ನಾಟಿ ಬೀದಿ ನರಿಕೊಂಬುಡ್ ನಡಪರೆ ಉಂಡು.


ಈ ಲೇಸ್ ಗ್ ಮಾತೆರ್ಲ ಬತ್ ದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಭದ್ರಕಾಳಿ ಉಪಖಂಡ ಸಮಿತಿ ಏರಮಲೆ, ನರಿಕೊಂಬು ಮೊಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಲೆಪ್ಪೋಲೆ ಇಜ್ಜಂದೆ ಮದಿಮೆಗ್ ಬತ್ತೆ ಪಂದ್ ಪಾತ್ರೆ ದೆಕ್ಕಾಯಿನ ಆಯೋಜಕೆರ್

ಕೆಲವೆರ್ ಬಂಜಿದ ಬಡವುಗು ಬೋಡಾದ್ ಲೆತ್ತಿಜಿಂಡಲ ಕೆಲವು ಮದಿಮೆಗ್ ಪೋಪೆರ್. ಇಂಚಿಪ್ಪಗ್ ಮಧ್ಯಪ್ರದೇಶದ ಜವನೆ ಒರಿ ಮದಿಮೆದ ಲೇಸ್‌ಗ್ ಲೆಪ್ಪೋಲೆ ಇಜ್ಜಂದೆ ಪೋದು ತಿಕ್ಕ್‌ದ್ ಬೂರ್ದೆರ್.

ಎಂಬಿಎ ಕಲ್ಪಾರ್ಥಿ ಆತಿನ ಮೇರ್ ಮದಿಮೆಗ್ ವನಸ್‌ಗ್ ಪಂದ್ ಪೋತಿನ ಪೊರ್ತುಡು ಮದಿಮೆದ ಆಯೋಜಕೆರ್ ಲೆಪ್ಪೋಲೆ ಉಂಡಾ ಪಂದ್ ಕೆನ್ನಗ ಜವನೆ ಇಜ್ಜಿ ಪಂತೆ. ಅಂಚಾದ್ ಕಲ್ಪಾರ್ಥಿನ ಕೈಟ್ ಪಾತ್ರೆ ದೆಕ್ಕಾದೆರ್. ಈ ವಿಡಿಯೋ ಇತ್ತೆ ವೈರಲ್ ಆದಿತ್ತ್‌ದ್, ಮಸ್ತ್ ಜನ ಬೆಚ್ಚ ಆತೆರ್.

ಡಿ. 4: ಹೊಯ್ಗೆ ಬಜಾರ್ ಶ್ರೀ ಅಶ್ವಥ ಕಟ್ಟೆ ಅಯ್ಯಪ್ಪ ಸ್ವಾಮಿ ಭಕ್ತ ವೃಂದ ಮುತಾಲಿಕೆಡ್ ಅಯ್ಯಪ್ಪ ಸಹಸ್ರ ದೀಪೋಚ್ಚಯ,ಅಪ್ಪದ ಸೇವೆ, ಕೆಂಡ ಸೇವೆ, ಮಹಾಪೂಜೆ, ಬಯಲಾಟ

ಕುಡ್ಲದ ಹೊಯ್ಗೆ ಬಜಾರ್ ಶ್ರೀ ಅಶ್ವಥ ಕಟ್ಟೆ ಅಯ್ಯಪ್ಪ ಸ್ವಾಮಿ ಭಕ್ತ ವೃಂದ ಮೊಕಲೆನ 18 ನೇ ವರ್ಷದ ಶಬರಿಮಲೆ ಯಾತ್ರೆದ ಸಲುವಾದ್ ಡಿ.4 ತಾರೀಕ್ ಐತಾರ ದಾನಿ ಅಯ್ಯಪ್ಪ ಸಹಸ್ರ ದೀಪೋಚ್ಚಯ ಅಪ್ಪ ಸೇವೆ, ಕೆಂಡ ಸೇವೆ, ಮಹಾಪೂಜೆ ಅಂಚನೆ ಯಕ್ಷಗಾನ ಬಯಲಾಟ ನಡಪರೆ ಉಂಡು.

ಪೂಜ್ಯ ಗುರುಕುಲು ಜಯ ಪ್ರಕಾಶ್ ಶಾಂತಿ ಅಂಚನೆ ಸಂಜೀವ ಗುರುಸ್ವಾಮಿ ಮೊಕುಲೆನ ಆಶೀರ್ವಾದದೊಟ್ಟುಗು ನಿತಿನ್ ಗುರುಸ್ವಾಮಿ ಮೆರೆನ ಮುತಾಲಿಕೆಡ್ ಈ ಲೇಸ್ ನಡಪರೆ ಉಂಡು. ಈ ಲೇಸ್‌ಗ್ ಮಾತ ಭಕ್ತೆರ್ ಬತ್ತ್‌ದ್ ಶ್ರೀ ಅಯ್ಯಪ್ಪ ಸ್ವಾಮಿ ದೇವೆರೆನ ಪ್ರಸಾದ ದೆತೊಂದು ಸ್ವಾಮಿನ ಕೃಪೆಗ್ ಪಾತ್ರರಾವೊಡು ಪಂದ್ ಅಶ್ವಥಕಟ್ಟೆ ಅಯ್ಯಪ್ಪ ಭಕ್ತವೃಂದ ಹೊಯ್ಗೆ ಬಜಾರ್‌ದ ವಿನೋದ್ ಗುರುಸ್ವಾಮಿ ಲೆಪ್ಪೋಲೆಡ್ ತೆರಿಪಾದೆರ್.

ಪಿರವುರ್ದ್ ಬರೊಂದಿತ್ತಿನ ಟೆಂಪೋ ಗುದ್ದುದು ಬೈಕ್ ಸಮೇತ ಲಾಗಿದ್ ಎದುರುಗು ಪೋವೊಂದಿತ್ತಿನ ಕಾರ್‌ಗ್ ಗುದ್ದುದು ಫೋಟೋಗ್ರಾಫರ್ ತೀರ್ ಪೋಯೆರ್

ಕಾರವಾರ: ಬೈಕ್ ಬೊಕ್ಕ ಟೆಂಪೋದ ನಡುಟ್ಟ್ ಆಕ್ಸಿಡೆಂಟ್ ಆದ್ ಆಸ್ಪತ್ರೆಗ್ ಕೊನನಗ ಸಾದಿದ ನಡುಟ್ಟ್ ಬೈಕ್ ಡ್ರೈವರ್ ತೀರ್ ಪೋಯಿನ ಘಟನೆ ಕಾರವಾರದ ಅಮದಳ್ಳಿ ಕೈತಲ್ ನಡತ್ಂಡ್.

ಕುಮಟಾದ ಫೋಟೊಗ್ರಾಫರ್ ಆಯಿನ ಮಹಾಬಲೇಶ್ವರ ಅಂಬಿಗ ತೀರ್ ಪೋಯಿನಾರ್. ಬೈಕ್‌ಡ್ ಪೋವೊಂದಿಪ್ಪುನಗ ಮಹಾಬಲೇಶ್ವರ ತಿರ್ಗಾಸ್‌ಡ್ ಬೈಕ್ ಟರ್ನ್ ಮಲ್ಪುನಗ ಈ ಘಟನೆ ನಡತ್ಂಡ್.

ಬೈಕ್‌ದ ಪಿರವು ಇತ್ತಿನ ಟೆಂಪೋ ಡ್ರೈವರ್‌ನ ನಿಯಂತ್ರಣ ತಿಕ್ಕಂದೆ ದುಂಬು ಇತ್ತಿನ ಮಹಾಬಲೇಶ್ವರ ಮೆರೆನ ಬೈಕ್‌ಗ್ ಗುದ್ದುದ್ಂಡ್. ಬೈಕ್‌ಡ್ ಇತ್ತಿನ ಮಹಾಬಲೇಶ್ವರ ಪಿಚ್ಚರ್‌ದ ರೀತಿಡ್ ಬೈಕ್ ಸಮೇತ ಲಾಗಿದ್ ಎದುರುಗು ಪೋವೊಂದಿತ್ತಿನ ಕಾರ್‌ಗ್ ಗುದ್ದುದು ಮಾರ್ಗದ ಬರಿಕ್ಕ್ ಬೂರ್ದೆರ್.

ಕಡೆಕ್ಕ್‌ಲ ಬಂದ್ ಆಂಡ್ ತೊರ್ತಲ್ ದ ಟೋಲ್; ಕೇಕ್ ತಿಂದ್ ಕುಸಿ ಪಡೆಯಿನ ಪೊರ್ಂಬಾಟಗಾರೆರ್

ಕುಡ್ಲ: ಭಾರೀ ವಿವಾದರ್ದ್ ಬೊಕ್ಕ ತೊರ್ತಲ್ದ (ಸುರತ್ಕಲ್) ಎನ್‌ಐಟಿಕೆ ಟೋಲ್‌ಗೇಟ್ ಡಿಸೆಂಬರ್ 1 ಜೆಡ್ದ್ ಬಂದ್ ಆದಿತ್ತ್‌ದ್, ಇನಿರ್ದ್ ಸರಾಗವಾದ್ ಗಾಡಿಲು ಪೋವೊಂದು ಉಂಡು.

ಕರಿನ 35 ದಿನರ್ದ್ ನಡತಿನ ಪೊರ್ಂಬಾಟ ಕಡೆ ಆದಿತ್ತ್‌ದ್, ಇನಿ ಸುರತ್ಕಲ್ ಎನ್‌ಐಟಿಕೆ ಟೋಲ್‌ಗೇಟ್ ವಿರೋಧಿ ಪೊರ್ಂಬಾಟಗಾರೆರ್ ಕೋಡೆ ನಡುರಾತ್ರೆ ಕೇಕ್ ಕಟ್ ಮಲ್ತ್‌ದ್ ವಿಜಯೋತ್ಸವ ಆಚರಣೆ ಮಲ್ತೆರ್. ಈ ಪೊರ್ತುಡು ಪೊರ್ಂಬಾಟ ಸಮಿತಿದ ಮುಖಂಡೆರ್, ಕಾರ್ಯಕರ್ತೆರ್ ಅಂಚನೆ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಸಮಾನ ಮನಸ್ಕ ಸಂಘಟನೆದ ಮುಖಂಡೆರ್ ಇತ್ತೆರ್.

ಡಿ‌. 6: ಬಿ.ಸಿ.ರೋಡ್ ದ ಶ್ರೀ ರಕ್ತೇಶ್ವರೀ ದೇವಲ್ಯಡ್ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ

ಹಿಂದು ಜಾಗರಣ ವೇದಿಕೆ, ಬಂಟ್ವಾಳ ತಾಲೂಕ್ ನೆತ್ತ ಮುತಾಲಿಕೆಡ್ ಉಂದುವೇ ಬರ್ಪುನ ಡಿ‌. 6 ಅಂಗಾರೆದಾನಿ ಬೊಲ್ಪುಗು 10 ಗಂಟೆರ್ದ್ ಬಿ.ಸಿ.ರೋಡ್ ದ ಶ್ರೀ ರಕ್ತೇಶ್ವರೀ ದೇವಲ್ಯಡ್ ಅಯೋಧ್ಯೆ ಶ್ರೀ ರಾಮ ಜನ್ಮಸ್ಥಾನದ ಮುಕ್ತಿ ಆಂದೋಲನದ ವಿಜಯೋಚ್ಚಯದ ಅಂಗವಾದ್ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ ನಡಪರೆ ಉಂಡು.


ಅಯಿರ್ದ್ ಬೊಕ್ಕ ಮಧ್ಯಾಹ್ನ 11 ಗಂಟೆಗ್ ಸಭಾ ಲೇಸ್ ನಡಪುಂಡು. ನೆತ್ತ ಅಧ್ಯಕ್ಷತೆನ್ ವೆಂಕಟ್ರಮಣ ಮುಚ್ಚಿನ್ನಯ ಕಾರಿಂಜ‌ (ಖ್ಯಾತ ಜ್ಯೋತಿಷ್ಯೆರ್) ಒಯಿಸೊನ್ವೆರ್. ಕರ್ನಾಟಕ ರಾಜ್ಯ ಹಿಂಜಾವೇ ಗೌರವಾಧ್ಯಕ್ಷೆರ್, ಶ್ರೀ ವಜ್ರದೇಹಿ ಮಠ, ಗುರುಪುರದ ಶ್ರೀ ಶ್ರೀ ಪರಮಪೂಜ್ಯ ರಾಜಶೇಖರಾನಂದ ಸ್ವಾಮೀಜಿ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಕರ್ನಾಟಕ ದಕ್ಷಿಣ ಹಿಂಜಾವೇ ಪ್ರಾಂತ ಸಂಚಾಲಕೆರ್ ದೋ. ಕೇಶವಮೂರ್ತಿ ದಿಕ್ಸೂಚಿ ಭಾಷಣನ್ ಮಲ್ಪೆರೆ ಉಲ್ಲೆರ್ ಪಂದ್ ಬಂಟ್ವಾಳ ತಾಲೂಕ್ ದ ಹಿಂದು ಜಾಗರಣ ವೇದಿಕೆದಕುಲು ತೆರಿಪಾದೆರ್.

ಉದ್ಯಾವರ: ಡಿ.8 – ಡಿ. 10 ಮುಟ್ಟ ಬೊಳ್ಜೆ ಶ್ರೀ ಬ್ರಹ್ಮಬೈದರ್ಕಳ ಗರಡಿಡ್ ವಾರ್ಷಿಕ ನೇಮೋಚ್ಚಯ

ಉದ್ಯಾವರದ ಬೊಳ್ಜೆ ಶ್ರೀ ಬ್ರಹ್ಮಬೈದರ್ಕಳ ಗರಡಿ ಕ್ಷೇತ್ರಡ್ ಡಿ.8 – ಡಿ. 10 ಮುಟ್ಟ ವಾರ್ಷಿಕ ನೇಮೋಚ್ಚಯ ನಡಪರೆ ಉಂಡು.

ಡಿ.8 ತಾರೀಕ್ ಗುರುವಾರ ಕಾಂಡೆ 6 ಗಂಟೆಗ್ ತೋರಣ ಪ್ರತಿಷ್ಠೆ, 6.15 ಕ್ಕ್ ನುಪ್ಪು ಸೇವೆದ ಹಸಿರುವಾಣಿ ಗರಡಿ ಬರಿಯರೆ, 6.30 ಗ್ ನವಕ ಪ್ರಧಾನ ಹೋಮ ನಡಪರೆ ಉಂಡು. ಡಿ.9 ಗ್ ಸುಕ್ರಾರ ಮಧ್ಯಾಹ್ನ 12.05 ಗಂಟೆಗ್ ಮಹಾಪೂಜೆ, 12.15 ಗ್ ಪಲ್ಲಪೂಜೆ ಆದ್, ಬಯ್ಯ 2.30 ಗಂಟೆಗ್ ಶ್ರೀ ಬೈದರ್ಕಳ ನೇಮ ನಡಪರೆ ಉಂಡು. ಡಿ.10 ಸನಿವಾರ ಮಧ್ಯಾಹ್ನ 2.30 ಗಂಟೆಗ್ ಮಾಯಂದಾಲ್ ನೇಮ, ಬಯ್ಯ 6.30 ಗಂಟೆಗ್ ವ್ಯಾಘ್ರ ಚಾಮುಂಡಿ ಕೋಲ ನಡಪರೆ ಉಂಡು.

ಈ ಲೇಸ್‌ಗ್ ಮಾತ ಭಕ್ತೆರ್ ಬತ್ತ್‌ದ್ ಸಿರಿಮುಡಿ ಗಂಧ-ಪ್ರಸಾದನ್ ದೆತೊಂದು, ಶ್ರೀ ಬ್ರಹ್ಮಬೈದರ್ಕಳ ಅಂಚನೆ ಕ್ಷೇತ್ರದ ಮಹಾಶಕ್ತಿಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ಬ್ರಹ್ಮಬೈದರ್ಕಳ ಗರಡಿ ಸೇವಾ ಸಮಿತಿ (ರಿ.) ದ ಅಧ್ಯಕ್ಷೆರ್ ಬೊಕ್ಕ ಸರ್ವ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಡಿ.25: ಐಕಳ ಕಾಂತಾಬಾರೆ ಬೂದಾಬಾರೆ ಫ್ರೆಂಡ್ಸ್ ಕ್ಲಬ್ ಮುತಾಲಿಕೆಡ್ ವಾಲಿಬಾಲ್ ಪಂತೊ 2022

ಕಿನ್ನಿಗೋಳಿ : ಕಾಂತಾಬಾರೆ-ಬೂದಾಬಾರೆ ಫ್ರೆಂಡ್ಸ್ ಕ್ಲಬ್ ಐಕಳ ನೆತ್ತ ಮುತಾಲಿಕೆಡ್ ಸಾರ್ವಜನಿಕ ಸೇವಾ ಚಟುವಟಿಕೆಲೆನ ಸಹಾಯಾರ್ಥವಾದ್ ಗ್ರಾಮೀಣ ವಲಯ ಮಟ್ಟದ ವಾಲಿಬಾಲ್ ಪಂದ್ಯಾಟ-2022 ಡಿ.25 ಐತಾರದಾನಿ ಬೊಲ್ಪುಗು 9 ಗಂಟೆಗ್ ಐಕಳ ಕಂಬುಲದ ಮಂಜ್ಜೊಟ್ಟಿ ಕಂಡದ ಕೈತಲ್ ದ ಮೈದಾನಡ್ ನಡಪರೆ ಉಂಡು.


ಅಂಚನೆ ಈ ಪಂದ್ಯಾಡ್ ಗೆಂದಿನಕ್ಲೆಗ್ ಸುರುತ ಇನಾಮ್ 10,001/- ಬೊಕ್ಕ ಶಾಶ್ವತ ಫಲಕ, ರಡ್ಡ್ ನೇ ಇನಾಮ್ 7001/- ಶಾಶ್ವತ ಫಲಕ, ಮೂಜಿನೇ ಇನಾಮ್ ಶಾಶ್ವತ ಫಲಕ, ನಾಲ್ ನೇ ಇನಾಮ್ ಶಾಶ್ವತ ಫಲಕ ತಿಕ್ಕುಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಮಂಜೇಶ್ವರ: ಪೊಯ್ಯತ್ತಬೈಲು ಶ್ರೀ ಮಹಾವಿಷ್ಣುಮೂರ್ತಿ ದೇವಲ್ಯಡ್ ಪುನರ್ ಪ್ರತಿಷ್ಠೆ ಅಷ್ಟಬಂಧ ಬ್ರಹ್ಮಕಲಶೋಚ್ಚಯ

ಮಂಜೇಶ್ವರದ ಪೊಯ್ಯತ್ತಬೈಲ್ ಶ್ರೀ ಮಹಾವಿಷ್ಣುಮೂರ್ತಿ ದೇವಲ್ಯಡ್ ಜನವರಿ 22 – 27 ಮುಟ್ಟ ಶ್ರೀ ಮಹಾಗಣಪತಿ ಬೊಕ್ಕ ಶ್ರೀ ಮಹಾವಿಷ್ಣುಮೂರ್ತಿ ದೇವೆರೆನ ನೂತನ ಬಿಂಬ ಪುನಃ ಪ್ರತಿಷ್ಠೆ, ಅಷ್ಟಬಂಧ ಬ್ರಹ್ಮಕಲಶಾಭಿಷೇಕ ಉಚ್ಚಯ ನಡಪರೆ ಉಂಡು.

ಬ್ರಹ್ಮಶ್ರೀ ನೀಲೇಶ್ವರ ಉಚ್ಚಿಲತ್ತಾಯ ಪದ್ಮನಾಭ ತಂತ್ರಿಲೆನ ಮುತಾಲಿಕೆಡ್ ಗ್ರಾಮದ ಕೂಡುಕಟ್ಟ್‌ದ ಯಜಮಾನೆರ್‍ನ ಒಟ್ಟು ಸೇರಿಗೆಡ್ ಈ ಉಚ್ಚಯ ನಡಪರೆ ಉಂಡು. ಅಂಚನೆ 7 ದಿನಲ ವೈದಿಕ, ಧಾರ್ಮಿಕ ಅಂಚನೆ ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು.

ಜನವರಿ 22 ತಾರೀಕ್‌ಗ್ ಬಯ್ಯ 6 ಗಂಟೆಗ್ ಧಾರ್ಮಿಕ ಸಭಾ ಕಾರ್ಯಕ್ರಮ ಆದ್, 8.30 ಗ್ ನಾಟ್ಯನಿಲಯಂ ಶ್ರೀ ಬಾಲಕೃಷ್ಣ ಮಂಜೇಶ್ವರ ಶಿಷ್ಯ ವೃಂದರ್ದ್ ನೃತ್ಯ ಸಿಂಚನ, ರಾತ್ರೆ 10 ಗಂಟೆಗ್ ಶಾರದಾ ಆರ್ಟ್ಸ್ ಕಲಾವಿದೆರ್ (ರಿ.) ಮಂಜೇಶ್ವರ ಮೊಕುಲೆರ್ದ್ “ಯಾನ್ ಉಲ್ಲೆತ್ತ” ತುಳು ನಾಟಕ ನಡಪರೆ ಉಂಡು. ಅಂಚನೆ ಜನವರಿ 23 ತಾರೀಕ್‌ಗ್ ರಾತ್ರೆ 10 ಗಂಟೆಗ್ ಶಿವದೂತೆ ಗುಳಿಗೆ ಪೌರಾಣಿಕ ನಾಟಕ, ಜನವರಿ 24 ಕ್ಕ್ ಬಯ್ಯ 6.30 ಗಂಟೆಗ್ ಕಟೀಲು ಮೇಳರ್ದ್ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ, ಜನವರಿ 25 ಕ್ಕ್ ರಾತ್ರೆ 9 ಗಂಟೆಗ್ ಮಾಯೊದ ಮಾಯಂದಾಳ್ ತುಳು ನಾಟಕ, 26 ಕ್ಕ್ ರಾತ್ರೆ 10 ಗಂಟೆಗ್ ಶ್ರೀ ಬೆಂಕಿನಾಥೇಶ್ವರ ಕೃಪಾಪೋಷಿತ ದಶಾವತಾರ ಯಕ್ಷಗಾನ ಮಂಡಳಿರ್ದ್ ಸತ್ಯೊದ ಸ್ವಾಮಿ ಕೊರಗಜ್ಜ ಯಕ್ಷಗಾನ ನಡಪರೆ ಉಂಡು.

ಜನವರಿ 27 ತಾರೀಕ್‌ಗ್ ಕಾಂಡೆ 9.47 ರ್ದ್ 11.27 ತ್ತ ಮೀನ ಲಗ್ನಡ್ ಶ್ರೀ ಮಹಾವಿಷ್ಣು ದೇವೆರೆನ ಬಿಂಬ ಪ್ರತಿಷ್ಟೆ, ಅಷ್ಟಬಂಧ ಲೇಪನ, ಕುಂಭೇಶ ಕಲಶಾಭಿಷೇಕ, ಜೀವಕಲಶಾಭಿಷೇಕ, ಪರಿಕಲಶಾಭಿಷೇಕ ಬ್ರಹ್ಮಕಲಶ ಅಭಿಷೇಕ, ಪ್ರತಿಷ್ಠಾ ಬಲಿ ನಡಪರೆ ಉಂಡು.

ಬಂಗಾರ್ದ್ ಅಂಗಡಿ, ಬ್ಯಾಂಕ್ ಲೂಟಿ ಮಲ್ಪುನ “ಸಾಹೇಜ್ ಗಂಜ್’ ಗ್ಯಾಂಗ್ ಅರೆಸ್ಟ್..!

ಕುಡ್ಲ: ಉಳ್ಳಾಲ ಪೊಲೀಸ್ ಠಾಣೆ ವ್ಯಾಪ್ತಿದ ಬಂಗಾರ್ದ ಅಂಗಡಿ ಒಂಜೆನ್ ಪುಡಾತ್ ದ್ ನ.29 ದಾನಿ ರಾತ್ರೆ ಕಂಡಿಯೆರೆ ತೂಯಿನ ಉತ್ತರ ಭಾರತದ ಕುಖ್ಯಾತ ಆಂತಾರಾಜ್ಯ ಬಂಗಾರ್ದ ಅಂಗಡಿ, ಬ್ಯಾಂಕ್ ದರೋಡೆ ಮಲ್ಪುನ “ಸಾಹೇಜ್ ಗಂಜ್’ ಗ್ಯಾಂಗ್ ದ 9 ಜನನ್ ಸಿಸಿಬಿ ಘಟಕದ ಪೊಲೀಸ್ ಇನ್ಸ್ ಪೆಕ್ಟರ್ ಮಹೇಶ್ ಪ್ರಸಾದ್ ಮೆರೆನ ಮುತಾಲಿಕೆದ ಕುಡ್ಲ ಸಿಸಿಬಿ ಪೊಲೀಸೆರ್ ಅರೆಸ್ಟ್ ಮಲ್ದೆರ್.


ಆರೋಪಿಲೆನ ಪೈಕಿ‌ ಬಂಟ್ವಾಳ ಕನ್ಯಾನದ ಭಾಸ್ಕರ ಬೆಳ್ಚಪಾಡ(65), ಗುಜರಾತ್ ವಲ್ಸಾದ್ ದ ನೇಪಾಳಡ್ ವಾಸ ಇಪ್ಪುನ ದಿನೇಶ್ ರಾವಲ್, ಜಾರ್ಖಂಡ್ ರಾಜ್ಯದ ಸಾಹೇಬ್ ಗಂಜ್ ಜಿಲ್ಲೆದ ಮೊಹಮ್ಮದ್ ಜಾಮೀಲ್ ಶೇಖ್(29) ಜಾರ್ಖಂಡ್ ಮಾಣಿಕ್ ಪಾರಾದ ಇಂಜಮಾಮ್ ಉಲ್ ಹಕ್(27),  ನೇಪಾಳದ ಅಂಚಲ್ ರಾಜ್ಯದ ಬಿಸ್ತ ರೂಪ್ ಸಿಂಗ್ (34), ನೇಪಾಳದ ಅಚ್ಚಾಂ ಡಿಸ್ಟ್ರಿಕ್ ಕೃಷ್ಣ ಬಹದ್ದೂರ್ ಬೋಗಟಿ (41) ಜಾರ್ಖಂಡ್ ನ ಗಂಝಾಂ ಡಿಸ್ಟ್ರಿಕ್ಟ್ ಇಮ್ದದುಲ್ ರಝಾಕ್ ಶೇಖ್(32),ಸಾಹೇಜ್ ಗಂಜ್ ಜಿಲ್ಲೆದ ಬಿವುಲ್ ಶೇಖ್(31), ಇಮ್ರಾನ್ ಶೇಖ್, (30) ಅರೆಸ್ಟ್ ಆತೆರ್. ಆರೋಪಿಲು ಮಾತೆರ್ಲಾ ಉತ್ತರ ಭಾರತ ಮೂಲದ ಕುಖ್ಯಾತ “ಸಾಹೇಬ್ ಗಂಜ್” ದರೋಡೆ ಗ್ಯಾಂಗ್ ದ ಸದಸ್ಯೆರಾತೆರ್. ಮೊಕುಲು ಕುಡ್ಲ ತೊಕ್ಕೊಟ್ಟುದ ಸೂಪರ್ ಜ್ಯುವೆಲ್ಲರಿ ಅಂಗಡಿನ್ ದರೋಡೆ ಮಲ್ಪುನ ಉದ್ದೇಶರ್ದ್ ಸುಮಾರ್ 15 ದಿನತ ಪಿರವು ಕುಡ್ಲಗ್ ರೈಲ್ ಡ್ ಬತ್ ದ್, ಬೊಕ್ಕ ತೊಕ್ಕೊಟ್ಟು ಕೈತಲ್ ಲಾಡ್ಜ್ ಒಂಜೇಟ್ ಬೊಕ್ಕ ತೊಕ್ಕೊಟ್ಟು ಮಂಚಿಲ ಕೈತಲ್ ದ ವ್ಯಕ್ತಿಯೊರಿನ ಇಲ್ಲ್ ಒಂಜೆನ್ ಬಾಡಿಗೆಗ್ ದೆತೊಂದು ಬೊಕ್ಕ ಕಂಡಿಯೆರೆ ಪ್ಲಾನ್ ಮಲ್ತ್ ದ್, ಸೂಪರ್ ಗೋಲ್ಡ್ & ಡೈಮಂಡ್ಸ್ ಜ್ಯುವೆಲ್ಲರಿ ಶಾಪ್ ಸೆಲೆಕ್ಟ್ ಮಲ್ತ್ ದ್, ಕಂಡಿಯೆರೆ ಬೋಡಾಯಿನ ಗ್ಯಾಸ್ ಕಟ್ಟರ್, ಆಕ್ಸಿಜನ್ ಸಿಲಿಂಡರ್, ಗ್ಯಾಸ್ ಸಿಲಿಂಡರ್, ಗ್ಯಾಸ್ ಕಟ್ಟಿಂಗ್ ನೋಝಲ್, ಕಟ್ಟಿಂಗ್ ಹೋಸ್ ಪೈಪ್, ಲೆದರ್ ಹ್ಯಾಂಡ್ ಗ್ಲೌಸ್, ಕರ್ಬದ ರಾಡ್, ತಲವಾರು, ಆ್ಯಕ್ಸೋ ಬ್ಲೇಡ್, ಹ್ಯಾಮರ್, ಸ್ಕ್ರೂಡ್ರೈವರ್, ಮುಂಜಿದ ಪೊಡಿ, ನೈಲಾನ್ ಬಲ್ಲ್ ಬೊಕ್ಕ ಬೇತೆ ಸುಮಾರ್ ಸೊತ್ತುಲೆನ್ ಆರೋಪಿಲೆನ ಕೈರ್ದ್ ಪೊಲೀಸೆರ್ ವಶಕ್ ದೆತೊನೊದೆರ್. ಮೊಕ್ಲೆರ್ದ್ 2,90,000 ರೂ. ಬಿಲೆತ್ತ ಸೊತ್ತು ವಶಮಲ್ದೆರ್. ಈ ಬಗೆಟ್ ಉಳ್ಳಾಲ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ಇಂಚಿಪ್ಪ ಕುಡ್ಲ ಪೇಂಟೆದ ಕೊಣಾಜೆ ಠಾಣೆ ವ್ಯಾಪ್ತಿದ ನಾಟೆಕಲ್, ಉಳ್ಳಾಲ ಪೊಲೀಸ್ ಠಾಣೆ ವ್ಯಾಪ್ತಿದ ಆಂಬಿಕಾ ರೋಡ್, ಉಚ್ಚಿಲ ಕೈತಲ್ ರ್ದ್ ರಾತ್ರೆಡ್ ಮೂಜಿ ದ್ವಿಚಕ್ರ ಗಾಡಿದ ಸವಾರೆರೆನ್ ಅಡ್ಡಕಟ್ಟ್ ದ್, ಹಿಂದಿಡ್ ನೆರ್ದ್, ರಾಡ್ ಡ್ ಹಾಕ್ ದ್ ಅಕ್ಲೆರ್ದ್ ಸ್ಕೂಟರ್ ಲೆನ್ ಬಲವಂತವಾದ್ ದೆತೊಂದು ಇತ್ತೆರ್. ಈ ಸ್ಕೂಟರ್ ದ ಪತ್ತೆದ ಬಗೆಟ್ ಮಾಹಿತಿ ಸಂಗ್ರಹ ಮಲ್ತೊಂದು ಇತ್ತಿನ ಪೊರ್ತುಡು ಉಂದುವೇ ಸಾಹೇಜ್ ಗಂಜ್ ದರೋಡೆ ಗ್ಯಾಂಗ್ ದ ಆರೋಪಿಲು ಜ್ಯುವೆಲ್ಲರಿ ದರೋಡೆ ನಡಪಾಯೆರೆ ಪ್ಲಾನ್ ಪಾಡಿನ ಪೊರ್ತುಡು, ಕೈತಲ್ ದಕ್ಲೆರ್ದ್ ಬಲಿಪುನ ಸಲುವಾದ್, ಈ ಸ್ಕೂಟರ್ ದ ಸವಾರರೆಗ್ ಕರ್ಬದ ರಾಡ್ ರ್ದ್ ಪೆಟ್ಟ್ ಪಾಡ್ದಿತ್ತೆರ್. ಈ ಮೂಜಿ ಸ್ಕೂಟರ್ ಲೆನ್ ವಶಕ್ ದೆತೊಂದೆರ್. ಆರೋಪಿನಕ್ಲೆನ ಮಿತ್ತ್ ಬೊಂಬೈ, ಪುಣಿ, ಸೂರತ್, ಮಧ್ಯಪ್ರದೇಶದ ಮಾಧವ ನಗರ, ಕೇರಳದ ತ್ರಿಶೂರ್, ಪಂಜಾಬ್ ರಾಜ್ಯಲೆನ ಬೇತೆ ಬೇತೆ ಪೊಲೀಸ್ ಠಾಣೆಲೆಡ್ ಬ್ಯಾಂಕ್ ದರೋಡೆ, ಜ್ಯುವೆಲ್ಲರಿ ದರೋಡೆ ಕೇಸ್ ದಾಖಲ್ ಆತ್ಂಡ್. ಈ ಕುಖ್ಯಾತ ಸಾಹೇಬ್ ಗಂಜ್ ದರೋಡೆ ಗ್ಯಾಂಗ್ ನ್ ಪತ್ತೆ ಮಲ್ಪುನ ಕಾರ್ಯಡ್ ಸಿಸಿಬಿ ಘಟಕದ ಪೊಲೀಸ್ ನಿರೀಕ್ಷಕೆರಾಯಿನ ಮಹೇಶ್ ಪ್ರಸಾದ್, ಪಿಎಸ್ಐ ರಾಜೇಂದ್ರ ಬಿ, ಪ್ರದೀಪ ಟಿ ಆರ್, ಎಎಸ್ಐ ಆಯಿನ ಶಶಿಧರ ಶೆಟ್ಟಿ, ಮೋಹನ್ ಕೆ ವಿ, ಹರೀಶ ಪಿ ಬೊಕ್ಕ ಸಿಸಿಬಿ ಸಿಬ್ಬಂದಿಲು ಪಾಲ್ ಪಡೆದಿತ್ತೆರ್.
ಸಾಹೇಜ್ ಗಂಜ್ ಗ್ಯಾಂಗ್:
ಈ ಗ್ಯಾಂಗ್ ಜಾರ್ಖಂಡ್ ರಾಜ್ಯದ ಕುಖ್ಯಾತ ದರೋಡೆ ಗ್ಯಾಂಗ್ ಆದುಂಡು. ಈ ಗ್ಯಾಂಗ್ ಡ್ ನೇಪಾಳದಕುಲುಲ ಉಲ್ಲೆರ್. ಮೊಕುಲು ಪ್ರಮುಖವಾದ್ ಮಲ್ಲ ಮಲ್ಲ ಪೇಂಟೆದ ಬ್ಯಾಂಕ್, ಜ್ಯುವೆಲ್ಲರಿ ಅಂಗಡಿಲೆನ್ ನಾಡ್ದ್ ಅಲ್ಪದ ಪರಿಸರಡ್ ಬಾಡಿಗೆಗೆ ಇಲ್ಲ್ /ಲಾಡ್ಜ್ ಲೆನ್ ಮಲ್ತ್ ದ್, ಕೈತಲ್ ರ್ದ್ ದರೋಡೆ ಮಲ್ಪೆರೆ ಬೊಡಾಯಿನ ಸೊತ್ತುಲೆನ್ ದೆತೊಂದು ಬೊಕ್ಕ ಜ್ಯುವೆಲ್ಲರಿ ಅಂಗಡಿ, ಬ್ಯಾಂಕ್ ದ ಗೋಡೆ ಕನ್ನ ಕೊರೆದ್, ಗ್ಲಾಸ್ ಕಟ್ಟರ್ ಮುಖೇನ ತಿಜೋರಿನ್ ಪುಡಾತ್ ದ್, ಕೋಟ್ಯಾಂತರ ಬಿಲೆತ ಸೊತ್ತುಲೆನ್ ದರೋಡೆ ಮಲ್ಪುನ ಕುಖ್ಯಾತ ಗ್ಯಾಂಗ್ ಆದುಂಡು. ಈ ಗ್ಯಾಂಗ್ ಡ್ ನೇಪಾಳ ದೇಶದ ಸುಮಾರ್ ಜನ ಆರೋಪಿಲು ಉಲ್ಲೆರ್. ದರೋಡೆ ಮಲ್ತಿ ಬೊಕ್ಕ ನೇಪಾಳೊಗು ಬಲ್ತೊಂದಿತ್ತೆರ್.