ಅಮೆರಿಕದ ಕ್ಯಾಲಿಫೋರ್ನಿಯಾಡ್ ರಾತ್ರೆ 5.5 ಬಿರ್ಸ್ ದ ಭೂಕಂಪ ಆತ್ಂಡ್ ಪಂದ್ ಅಧಿಕಾರಿಲು ತೆರಿಪಾದೆರ್.
ಸದ್ಯಗ್ ಒವ್ವೇ ಪ್ರಾಣಗ್ ಬೊಕ್ಕ ಆಸ್ತಿಪಾಸ್ತಿಗ್ ತೊಂದರೆ ಆಯಿನ ಬಗ್ಗೆ ಪೊಲಬು ತಿಕ್ಕಿಜಿ. ಭೂಕಂಪದ ಕೇಂದ್ರಬಿಂದು ನೆಲತ್ತೊಲಯಿ 10ಕಿಲೋಮೀಟರ್ ಅಡಿಟ್ಟ್ ಉಂಡು. ಸುಕ್ರಾರ ಕ್ಯಾಲಿಫೋರ್ನಿಯಾದ ಪೂರ್ವ ಕರಾವಳಿದ ನೈಋತ್ಯಗ್ 4 ಕಿಮೀ ದೂರಡ್ ಭೂಕಂಪ ಆತ್ಂಡ್ ಪಂದ್ ವರದಿ ಆದಿತ್ತ್ಂಡ್.
ತೋಕೂರು: ಮುಲ್ತ ಶ್ರೀ ಸುಬ್ರಹ್ಮಣ್ಯ ದೇವಲ್ಯನ್ ಜೀರ್ಣೋದ್ಧಾರ ಮಲ್ಪರೆ ಅಂಚೆನೆ ಸಂಪೂರ್ಣ ಶಿಲಾಮಯ ದೇವಲ್ಯವಾದ್ ಪರಿವರ್ತನೆ ಮಲ್ಪರೆ ಭಕ್ತೆರೆನ ಗುಂಪೇ ಸಂಕಲ್ಪ ಮಲ್ತಿನೆರ್ದಾವೆರ ಪಿರಾಕ್ ದ ದೇವಲ್ಯನ್ ಸಂಪೂರ್ಣವಾದ್ ದೆತ್ತ್ ದ್ ಪೊಸತಾದ್ ನಿರ್ಮಾಣ ಆಯಿನ ಶಿಲಾಮಯ ದೇವಲ್ಯದ ನಿರ್ಮಾಣಗ್ ಸುಮಾರ್ 8 ವರ್ಷದ ಎಲ್ಯ ಜೋಕುಲೆರ್ದ್ 90 ವರ್ಷ ಮುಟ್ಟದ ಪರಬೆರ್ ಮುಟ್ಟ, ಯುವ ಸಮುದಾಯ, ಪೊಂಜೋವ್ ನಕ್ಲೆನೊಟ್ಟಿಗೆ ಊರುದ ಪರವೂರುದ ಗ್ರಾಮಸ್ಥೆರ್ ಜಾತಿ ಮತ ಬೇದ ಇಜ್ಜಂದೇ ಪ್ರಾಮಾಣಿಕವಾದ್ ಶ್ರಮದಾನದ ಮುಕೇನ ಬೇಲೆ ಮಲ್ದಿನೆರ್ದಾವರ ಲಕ್ಷರ್ದ್ ಎಚ್ಚ ಜನತ್ತ ಪರಿಶ್ರಮರ್ದ್ ಪಗೆಲ್ ರಾತ್ರೆ ಪನಂದೆ ಬೆನೊಂದಿಪ್ಪುನೇರ್ದ್ ಸುಮಾರ್ 1.5 ಕೋ.ರೂ. ಬಿಲೆತ್ತ ಉಳಿತಾಯ ಮಲ್ದೆರ್ ಪಂದ್ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಪಂಡೆರ್.
ಪರತ್ತ್ ಸೊತ್ತುಲೆನ್ ದೆತ್ತ್ ದ್, ಕಲ್ಲ್-ಮಣ್ಣ್ ತುಂಬುನ, ಕಟ್ವಾನದ ಪರ ಸೊತ್ತುಲೆನ್ ಸಾಗಾವುನ ಇಂಚ ಬೇತೆ ಬೇತೆ ಬೇಲೆ ಪ್ರತಿದಿನಲ ನಡತ್ಂಡ್.
2022ನೇ ಎಪ್ರಿಲ್ 22 ಕ್ಕ್ ಸುರು ಆಯಿನ ಈ ಶ್ರಮದಾನ ಆದ್ ಬ್ರಹ್ಮಕಲಶ ಉಚ್ಚಯ, ನಾಗಮಂಡಲ ಉಚ್ಚಯ ದುಂಬುವರಿದ್ಂಡ್. ದೇವಲ್ಯದ ಈ ಮಲ್ಲ ಬೇಲೆಡ್ ಸುಮಾರ್ 145ಕ್ಕ್ ಎಚ್ಚ ಸ್ವಯಂ ಸೇವಕ ಸಂಘದ 6000 ಜನತ್ತ ಪುದರ್ ನ್ ನೋಂದಣಿ ಮಲ್ದೆರ್. ಸ್ವಯಂಪ್ರೇರಿತೆರಾದ್ ಬೆನ್ಪುನ ಕೈಕುಲು ಸುಮಾರ್ ಸಂಖ್ಯೆಡ್ ಉಂಡು.
ಅನ್ನದಾನ, ಉಪಾಹಾರ, ಭಕ್ತೆರೆಗ್ ಪ್ರಸಾದ ಕೊರಿಯೆರೆ, ಸಾಲ್ ಡ್ ಪೋವೆರೆ ಸಕಾಯ, ಪರ್ಪಿನ ನೀರ್, ಪುದೆಕಾಣಿಕೆ, ತರಕಾರಿ ತಯಾರ್, ಸ್ವಚ್ಚತೆ, ಸಾಂಸ್ಕೃತಿಕ ಕಲಾವಿದೆರೆಗ್ ಆಸರೆ ಇಂಚ ಬೇತೆ ಬೇತೆ ಮಾತ ಬೇಲೆಡ್ಲಾ ಸ್ವಯಂ ಸೇವಕೆರ್ ಇತ್ತೆರ್ ಪಂದ್ ಸ್ವಯಂ ಸೇವಕೆರೆನ ಉಪ ಸಮಿತಿದ ಮೇಲ್ವಿಚಾರಕೆರ್ ಸಂತೋಷ್ ದೇವಾಡಿಗ ಪಂತೆರ್.
ಭಜನೆ :
ಬ್ರಹ್ಮಕಲಶ ಉಚ್ಚಯದ ಲೆಕ್ಕೊಡು ಮೇ10 ರ್ದ್ 23 ಮುಟ್ಟ ಸೂರ್ಯೋದಯರ್ದ್ ಸೂಯಾಸ್ತ ಮುಟ್ಟ (ಕೆಲವು ದಿನ ರಾತ್ರೆ 12 ಗಂಟೆ ಮುಟ್ಟ) ಒಟ್ಟು 135 ಭಜನಾ ಕೂಟದಕುಲು ಪಾಲ್ ಪಡೆತೆರ್. ಕ್ಷೇತ್ರಡ್ ಭಜನೆ ಸಂಕೀರ್ತನೆಗ್ ಇಸೇಸ ಮಹತ್ವ ಕೊರ್ತುಂಡು ಪನ್ಪುನವು ಮುಲ್ಪದ ವೈಶಿಷ್ಠ ಆತ್ಂಡ್. ಭಜನೆ ಇತ್ತ್ ನಲ್ಪ ಒಲ್ಪಲ ವಿಭಜನೆ ಇಜ್ಜಿ ಪನ್ಪುನ ಪಾತೆರದಂಚೆನೆ ಪ್ರತೀ ಕೂಟಡ್ 10ರ್ದ್ 20 ಜನ ಸಂಕೀರ್ತನೆಡ್ ಪಾಲ್ ಪಡೆನವು ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಸಾರರ್ದ್ ಎಚ್ಚ ಜನ ಪಾಲ್ ಪಡೆದ್ ತನ್ನ ಸೇವೆನ್ ಕೊರಿನವು ಗಮನಾರ್ಹ ಆತ್ಂಡ್ ಪಂದ್ ಭಜನಾ ಸಂಕೀರ್ತನೆದ ಜಬದಾರಿ ದೆತೊಂದಿನ ಅನುಪಮಾ ರಾವ್ ಪಂತೆರ್.
ತೋಕೂರು: ತುಳುನಾಡ ಮಣ್ಣ್ ಡ್ ಮಾಯೊಕೊದ ಮಾಣಿಯಾದ್ ಬತ್ತ್ ದ್ ನಿಲೆ ಉಂತಿನ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನ ಸಂಪೂರ್ಣ ಜೀರ್ಣೋದ್ಧಾರ ಆದ್ ದೇವೆರೆಗ್ ಮೇ 21 ಐತಾರ ಸಾರ ಸಾರ ಭಕ್ತೆರೆನ ನಡುಟ್ಟು ಭಾರಿ ಶ್ರದ್ಧಾ ಭಕ್ತಿಡ್ ಬ್ರಹ್ಮಕಲಶ ಅಭಿಷೇಕ ನಡತ್ಂಡ್.
ಶ್ರೀ ಕ್ಷೇತ್ರದ ತಂತ್ರಿಲಾಯಿನ ಶಿಬರೂರು ಗೋಪಾಲಕೃಷ್ಣ ತಂತ್ರಿಲೆನ ಮಾರ್ಗದರ್ಶನೊಡು ಬೊಲ್ಪುಗು 5-45ಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವರೆಗ್ ಬ್ರಹ್ಮಕುಂಭಾಭಿಷೇಕ ನಡತ್ಂಡ್.
ಸುರುಟ್ಟು ಕಲಾಶಾಭಿಷೇಕ, ಪ್ರಸನ್ನಪೂಜೆ, ನ್ಯಾಸಪೂಜೆ, ಮಹಾಪೂಜೆ, ಪ್ರಸಾದ ವಿತರಣೆ ನಡತ್ ದ್, ಭಾರಿ ಗೌಜಿಡ್ ಪಗೆಲ್ ತೇರ್ ದ ಉಚ್ಚಯ ನಡತ್ಂಡ್. ಅವೆರ್ದ್ ಬೊಕ್ಕ ಪಲ್ಲಪೂಜೆ, ಪ್ರಸನ್ನಪೂಜೆ ಆದ್ ಮಹಾ ಅನ್ನಸಂತರ್ಪಣೆ ನಡತ್ಂಡ್. ಬಯ್ಯಡ್ ಉತ್ಸವ ಬಲಿ, ಶ್ರೀ ಭೂತಬಲಿ, ದೇವೆರೆಗ್ ಶಯನ ಉಚ್ಚಯ ಆದ್ ಕವಾಟ ಬಂಧನ ವಿಧಿ ನಡತ್ಂಡ್.
ಮೂಲ್ಕಿ ಸೀಮೆದ ಅರಸೆರ್ ಎಂ. ದುಗ್ಗಣ್ಣ ಸಾವಂತೆರ್, ಶಾಸಕೆರ್ ಅಂಚೆನೆ ಬ್ರಹ್ಮಕಲಶೋತ್ಸವ ಸಮಿತಿದ ಗೌರವಾಧ್ಯಕ್ಷೆರ್ ಉಮಾನಾಥ ಎ. ಕೋಟ್ಯಾನ್ ಭೇಟಿ ಕೊರ್ದಿತ್ತೆರ್.
ದೇವಲ್ಯಗ್ ಬರ್ಪಿನ ಹಿರಿಯೆರೆಗ್ ಉಚಿತ ರಿಕ್ಷಾ ಸೇವೆ ಇತ್ತ್ಂಡ್. ಸುಮಾರ್ 50 ಸಾರ ಜನಕ್ಕ್ ಮಲ್ಲ ಅನ್ನಛತ್ರಡ್ ಅನ್ನಸಂರ್ಪಣೆ ನಡತ್ಂಡ್. ಬೇತೆ ಬೇತೆ ಸಂಘಸಂಸ್ಥೆಲೆನ ಸ್ವಯಂಸೇವಕೆರ್ ಭಾರಿ ಅಚ್ಚುಕಟ್ಟಾದ್ ಭಕ್ತರೆಗ್ ಅನ್ನಪ್ರಸಾದ ಪಟ್ಟಿಯೆರ್.
ಕುಡ್ಲದ ಹಾಲು ಉತ್ಪಾದಕರ ಸಹಕಾರ ಸಂಘದ ಮುಕೇನ ಅಲೆ ನೀರ್ ಅಂಚೆನೆ ಹಳೆಯಂಗಡಿ ಶ್ರೀ ದುರ್ಗಾ ವಿನಾಯಕ ಮಠ, ಶ್ರೀ ನಾಲ್ಕೂರ ಪಂಜುರ್ಲಿ ದೈವಸ್ಥಾನ ಪಡುಪಣಂಬೂರು, ಶ್ರೀ ವಿಶ್ವಕರ್ಮ ಸಮಾಜ ಸೇವಾ ಸಂಘ ಕಿನ್ನಿಗೋಳಿ ಬೊಕ್ಕ ಗುರುಗಳ ಗುರು ಸೇವಾ ಪರಿಷತ್ ಆನೆಗುಂದಿ ಸರಸ್ವತಿ ಪೀಠ, ಪಡುಕುತ್ಯಾರು ಮೊಕ್ಲೆನ ವತಿರ್ದ್ ಉಚಿತ ಬಚ್ಚಂಗಾಯಿ ವಿತರಣೆ ಅಂಚೆನೆ ಪೊಂಜೋವುಲೆಗ್ ಪನ್ನೀರ್ ಸೇವೆ, ಅರಸಿನ ಕುಂಕುಮ, ಪೂ ಬೊಕ್ಕ ಕಾಜಿ ಪಟ್ಟಿಯೆರ್.
ದೇವಳದ ಪ್ರಧಾನ ಅರ್ಚಕೆರ್ ಮಧುಸೂದನ ಆಚಾರ್ಯ ಮೇರ್ ಧಾರ್ಮಿಕ ವಿಧಿ ವಿಧಾನ ನಡಪಾದ್ ಕೊರಿಯೆರ್. ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು, ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್‌ಕುಮಾರ್ ಹೆಗ್ಡೆ, ಪ್ರಧಾನ ಕಾರ್ಯದರ್ಶಿ ರಾಮಣ್ಣ ದೇವಾಡಿಗ, ಬೇತೆ ಬೇತೆ ಸಮಿತಿದ ಪ್ರಮುಖೆರಾಯಿನ ಸೋಂದಾ ಭಾಸ್ಕರ ಭಟ್, ಮೋಹನ್‌ದಾಸ್, ವಿಜಯಕುಮಾರ್ ರೈ, ಟಿ.ಪುರುಷೋತ್ತಮ ರಾವ್, ಲೋಕಯ್ಯ ಕೆ. ಸಾಲ್ಯಾನ್, ಯೋಗೀಶ್ ಆರ್. ಕೋಟ್ಯಾನ್, ಅನಂತರಾಮ ಶಿಮಂತ್ರಾಯ, ಆರ್.ಎನ್. ಶೆಟ್ಟಿಗಾರ್, ಗಂಗಾಧರ ಶೆಟ್ಟಿ, ಗುರುರಾಜ್ ಎಸ್. ಪೂಜಾರಿ, ಶಂಕರ ಶೆಟ್ಟಿಗಾರ್ ಬೆಳ್ಳಾಯರು, ಸಂಪತ್ ದೇವಾಡಿಗ, ದೀಪಕ್ ಸುವರ್ಣ, ವನಿತಾ ಸನಿಲ್, ವಿನೋದ್‌ಕುಮಾರ್, ಸಂತೋಷ್ ದೇವಾಡಿಗ, ವರುಣ್ ಅಂಚನ್, ನಾರಾಯಣ ಜಿ.ಕೆ, ದೀಪು ಸುವರ್ಣ ಮೊಕುಲು ಬೇತೆ ಬೇತೆ ಜವಬ್ದಾರಿನ್ ಒಯಿಸ್ ದಿತ್ತೆರ್.
ಬಂಟ್ವಾಳ : ನೇತ್ರಾವತಿ ಸುದೆಟ್ ಈ ಸರ್ತಿ ನೀರ್ ದ ಮಟ್ಟ ಕಮ್ಮಿ ಆಯಿರ್ನೆದಾವೆರ ಬಂಟ್ವಾಳ ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ಕೈತಲ್ ಸುದೆತ್ತ ನಡುತ್ತ ಕಲ್ಲ್ ದ ಮಿತ್ತ್ ಇಪ್ಪುನ ಸೀತಾದೇವಿನ ಪಾದ ತೋಜಿದ್ ಬೈದ್ಂಡ್.
ತುದೆಟ್ ಇಂಚಿನ ಸುಮಾರ್ ಕಲ್ಲ್ ದ ರಚನೆಲು ಇತ್ತ್ಂಡಲ ಇಂಚಿಪ್ಪದ ವರ್ಷಡ್ ಆಣೆಕಟ್ಟೆದ ನಿರ್ಮಾಣರ್ದ್ ಅವು ನೀರ್ ದ ಉಲಯಿ ಇಪ್ಪುಂಡು. ಈ ಸರ್ತಿ ಸುದೆ ನೀರ್ ಪೂರ್ ಖಾಲಿ ಆಯಿನೆರ್ದಾವರ ತುದೆಟ್ ಇಪ್ಪುನ ಇಸೇಸಲು ತೂಯೆರೆ ತಿಕ್ಕೊಂದು ಉಂಡು. ಶಿವಲಿಂಗ, ಪೂ, ಜಡೆ, ಬಟ್ಟಲ್, ನಂದಿ, ಪಾದಲು ಇಂಚ ಸುಮಾರ್ ರಚನೆಲು ಮುಲ್ಪದ ಕಲ್ಲ್ ಡ್ ಕೆತ್ತ್ ದೆರ್. ಕೈತಲ್ ದಕುಲು ಪಾದದ ರಚನೆ ಸೀತಾ ದೇವಿನವೇ ಪಾದ ಪಂದ್ ಪೂಜೆದ ಭಾವನೆ ದೀತೆರ್. ಕೆಲವೊಂಜಿ ಧಾರ್ಮಿಕ ನಂಬಿಕೆದ ಗುಂಡಿಲು, ಕಯಲು ಈ ಸರ್ತಿ ತೂವೆರೆ ತಿಕ್ಕುಂಡು. ಕಲ್ಲ್ ಬಂಡೆ ಬೇತೆ ಬೇತೆ ವಿನ್ಯಾಸಲು ಆಕರ್ಷಣೀಯವಾದ್ ಉಂಡು. ನೆನ್ ತೂವೆರೆ ಜನ ಬರೊಂದು ಉಲ್ಲೆರ್. ಉಂದುವೇ ಒಂಜಿ ಆಕರ್ಷಣೆದ ಕೇಂದ್ರ ಆತ್ಂಡ್.
ತೋಕೂರು ಬ್ರಹ್ಮಕಲಶದ ನಿಲೆಟ್ಟ್ ಮಾತೃ ಸಮಾವೇಶ
ತೋಕೂರು: ನಮ್ಮ ನಾಡ್ ಸರ್ವ ಜನಾಂಗದ ಶಾಂತಿಯ ಸೌಹಾರ್ದದ ತೋಟ ಆವೊಡ್ಡ ನಮ ಮಾತೆರ್ಲ ಮಾತಾ ಧರ್ಮದ ತಿರ್ಲ್ ನ್ ತೆರಿಯೊನುಡು ಪಂದ್ ಒಡಿಪುದ ಡಾ.ಜಿ.ಶಂಕರ್ ಮಹಿಳಾ ಪ್ರಥಮ ದರ್ಜೆ ಕಾಲೇಜ್ ದ ಪ್ರಾಧ್ಯಾಪಕೆರ್ ಅಂಚೆನೆ ವಿಭಾಗ ಮುಖ್ಯಸ್ಥೆರ್
ಡಾ.ನಿಕೇತನ ಪಂಡೆರ್.
ಆರ್ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಬ್ರಹ್ಮಕಲಶದ ನಿಲೆಟ್ಟ್ ಶನಿವಾರ ನಡತಿನ 5ನೇ ದಿನತ್ತ ಧರ್ಮಸಭೆತ್ತ ಮಾತೃ ಸಮಾವೇಶಡ್
“ಸಮಾಜೋನ್ನಯನ ಬೊಕ್ಕ ಮಹಿಳೆ” ಪನ್ಪಿನ ವಿಚಾರೊಡು ಉಪನ್ಯಾಸ ಕೊರಿಯೆರ್.
ಎಂಆರ್ ಪಿಎಲ್ ಶಿಕ್ಷಣ ವಿಭಾಗದ ಜನರಲ್ ಮ್ಯಾನೇಜರ್ ವೀಣಾ ಶೆಟ್ಟಿ ಗುರ್ಕಾರ್ಮೆ ಒಯಿಸ್ ದಿತ್ತೆರ್.
ಈ ಪೊರ್ತುಡು ನಿವೃತ್ತ ಶಿಕ್ಷಕೆರಾಯಿನ ಪುಷ್ಪಾ ಟೀಚರ್ ಅಂಚೆನೆ ಪುಷ್ಪಲತಾ ಆರ್ ಹೆಬ್ಬಾರ್ ಮೆರೆಗ್ ಮಾನಾದಿಗೆ ಮಲ್ತೆರ್. ವಿನೋದಾ ಭಟ್ ಮೇರ್ ಸನ್ಮಾನಿತೆರ್ನ ಪೊಲಬು ಮಲ್ತ್ ಕೊರಿಯೆರ್.
ಮಲ್ಲ ಬಿನ್ನೆರಾದ್ ಕುಡ್ಲ ಸಾಯಿ ಆಶ್ರಯದ ಮುಖ್ಯಸ್ಥೆರ್ ಲತಾ ರಾವ್, ನ್ಯೂ ಮುಂಬಯಿ ಬಂಟರ ಸಂಘದ ಮಹಿಳಾ ವಿಭಾಗದ ಮಾಜಿ ಕಾರ್ಯಾಧ್ಯಕ್ಷೆರ್ ಲತಾ ಜಿ ಶೆಟ್ಟಿ, ನಿಡ್ಡೋಡಿ ಬಂಟರ ಸಂಘದ ಮಾಜಿ ಅಧ್ಯಕ್ಷೆರ್ ಶಾಂಭವಿ ಶೆಟ್ಟಿ, ಕೆಮ್ರಾಲ್ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಲೀಲಾ ಕೃಷ್ಣಪ್ಪ, ಪಡುಪಣಂಬೂರು ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಮಂಜುಳಾ, ಹಳೆಯಂಗಡಿ ಪಂಚಾಯತ್ ಅಧ್ಯಕ್ಷೆರ್ ಪೂರ್ಣಿಮಾ , ವಿಪುಲ ಡಿ.ಶೆಟ್ಟಿಗಾರ್, ಶೋಭಾ ಅಂಚನ್ ಮತ್ತರ್ಮೆಡ್ ಇತ್ತೆರ್.
ರಚನಾ ಪ್ರಾಸ್ತಾವಿಕ ವಾದ್ ಪಾತೆರಿಯೆರ್. ಶ್ರಾವ್ಯ ಎನ್ ಕೋಟ್ಯಾನ್ ಸೊಲ್ಮೆ ಸಂದಾಯ ಮಲ್ತೆರ್. ಅರ್ಪಿತಾ ಶೆಟ್ಟಿ ಧರ್ಮ ಸಭೆ ಸುಧಾರಿಕೆ ಮಲ್ತೆರ್.
A place were every religion can bloom in harmony – Dr Niketana
Tokur: Let Tulunadu be a place were every religion can bloom in harmony and let us understand the core of all religions said Dr Niketana principal of Dr Shankar women’s college while addressing the social gathering on the occasion of Brahmakalash at Tokkur Subramanya temple
ಬೆಂಗ್ಲೂರ್: ರಾಜ್ಯದ ಪೊಸ ಮುಖ್ಯಮಂತ್ರಿಯಾದ್ ಸಿದ್ದರಾಮಯ್ಯ ಮೇರ್ ದೇವೆರೆನ ಪುದರ್ ಡ್ ಅಂಚೆನೆ ಡಿಕೆ ಶಿವಕುಮಾರ್ ಮೇರ್ ಅಜ್ಜಯ್ಯನ ಪುದರ್ ಡ್ ಉಪಮುಖ್ಯಮಂತ್ರಿಯಾದ್ (ಸನಿಯಾರ) ಇನಿ ಪ್ರಮಾಣ ವಚನ ಸ್ವೀಕಾರ ಮಲ್ತೆರ್.
ಸಿದ್ದರಾಮಯ್ಯ ಮೆರೆಗ್ ರಾಜ್ಯಪಾಲ ಥಾವರ್ ಚಂದ್ ಗೆಹ್ಲೋಟ್ ಮೇರ್ ಪ್ರತಿಜ್ಞಾವಿಧಿ ಭೋದನೆ ಮಲ್ತೆರ್.
ಬೊಕ್ಕ 8 ಜನ ಶಾಸಕೆರಾಯಿನ ಎಂ.ಬಿ. ಪಾಟೀಲ್, ಡಾ.ಜಿ.ಪರಮೇಶ್ವರ್, ಕೆ.ಎಚ್.ಮುನಿಯಪ್ಪ, ಕೆ.ಜೆ.ಜಾರ್ಜ್, ಸತೀಶ್ ಜಾರಕಿಹೊಳಿ, ಪ್ರಿಯಾಂಕ್ ಖರ್ಗೆ, ರಾಮಲಿಂಗಾರೆಡ್ಡಿ, ಜಮೀರ್ ಅಹ್ಮದ್ ಸಚಿವೆರಾದ್ ಪ್ರಮಾಣವಚನ ಸ್ವೀಕಾರ ಮಲ್ತೆರ್.
ಈ ಪೊರ್ತುಡು ಕಾಂಗ್ರೆಸ್‌ ನಾಯಕೆರ್ ರಾಹುಲ್ ಗಾಂಧಿ, ಪ್ರಿಯಾಂಕಾ ಗಾಂಧಿ, ಮಲ್ಲಿಕಾರ್ಜುನ ಖರ್ಗೆ, ತಮಿಳುನಾಡ್ ಸಿಎಂ ಸ್ಟಾಲಿನ್ ಸೇರ್ದ್ ಮಸ್ತ್ ಜನ ಬಿನ್ನೆರಾದ್ ಬತ್ತಿತ್ತೆರ್.
ಬೆಂಗ್ಲೂರ್: ಕರ್ನಾಟಕದ ಪೊಸ ಮುಖ್ಯಮಂತ್ರಿಯಾದ್ ಸಿದ್ದರಾಮಯ್ಯ ಮೇರ್ 2ನೇ ಸರ್ತಿ ಬೊಕ್ಕ ಕೆಪಿಸಿಸಿ ಅಧ್ಯಕ್ಷೆರ್ ಡಿ.ಕೆ. ಶಿವಕುಮಾರ್ ಮೇರ್ ಸುರುತ್ತ ಸರ್ತಿ ಉಪ ಮುಖ್ಯಮಂತ್ರಿಯಾದ್, ಬೊಕ್ಕ 8 ಜನ ಶಾಸಕೆರ್ ಸಚಿವೆರಾದ್ ಇನಿ ಮಧ್ಯಾಹ್ನ 12.30 ಕ್ಕ್ ಬೆಂಗ್ಲೂರ್ ದ ಕಂಠೀರವ ಕ್ರೀಡಾಂಗಣಡ್ ಪ್ರಮಾಣವಚನ ಸ್ವೀಕಾರ ಮಲ್ಪೆರೆ ಉಲ್ಲೆರ್.
ಇನಿ ಬೆಂಗ್ಲೂರ್ ದ ಕಂಠೀರವ ಕ್ರೀಡಾಂಗಣಡ್ ಪ್ರಮಾಣವಚನ ಸ್ವೀಕಾರ ಲೇಸ್ ನಡಪರೆ ಉಂಡು. ಈ ಲೇಸ್ ಗ್ ರಾಜ್ಯದ ಮೂಲೆ ಮೂಲೆರ್ದ್ ಜನ ಬರಿಯೆರೆ ಉಲ್ಲೆರ್. ಕಂಠೀರವ ಕ್ರೀಡಾಂಗಣದ ಪ್ರವೇಶ ದ್ವಾರಡ್ ಬೊಲ್ಪಗೇ ಉರುಡಪಟ ಸುರು ಆತ್ಂಡ್. ಜನಕುಲೆನ್ ನಿಯಂತ್ರಣ ಮಲ್ಪೆರೆ ಪೊಲೀಸೆರ್ ಲಘು ಲಾಠಿ ಚಾರ್ಜ್ ಮಲ್ದೆರ್. ನೇರ್ದಾವೆರ ರಡ್ಡ್ ಜನಕ್ಕ್ ಪೆಟ್ಟಾತ್ಂಡ್. ಮೊಕ್ಲೆಗ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್.
ಫೇಸ್ ಬುಕ್ ಮಾತೃಸಂಸ್ಥೆದ ಮೆಟಾ 6 ಸಾರ ಜನನ್ ಬೇಲೆ ದೆಪ್ಪೆರೆ ದುಂಬಾತ್ಂಡ್.
ಸಂಸ್ಥೆದ ಜಾಗತಿಕ ವ್ಯವಹಾರಲೆನ ಅಧ್ಯಕ್ಷೆರ್ ನಿಕ್ ಕ್ಲೆಗ್ ಪೊಲಬು ಕೊರ್ತೆರ್. 2022 ತ್ತ ನವೆಂಬರ್ ಡ್ 11 ಸಾರ ಜನನ್ ಬೊಕ್ಕ ಮಾರ್ಚ್ ಡ್ 4 ಸಾರ ಜನನ್ ಬೇಲೆ ದೈದ್ಂಡ್.
ಮ್ಯಾನ್ಮಾರ್ ಡ್ ಕರಿನ ಐತಾರರ್ದ್ ಸುರು ಆಯಿನ ಚಂಡಮಾರುತಡ್ 145 ರ್ದ್ ಎಚ್ಚ ಜನ ತೀರ್ ಪೋಯೆರ್.
ನನಲ ಸಾವುದ ಸಂಖ್ಯೆ ಎಚ್ಚಾಪುನ ಅಂದಾಜಿ ಉಂಡು. ಚಂಡಮಾರುತರ್ದ್ ರಾಖಿನೆ ರಾಜ್ಯಗ್ ಮಾಸ್ತ್ ಪೆಟ್ಟಾತ್ಂಡ್. ತೀರ್ ಪೋಯಿನಕ್ಲೆನೆಟ್ಟ್ ನಾಲ್ ಜನ ಸೈನಿಕೆರ್, 24 ಜನ ಸ್ಥಳೀಯೆರ್ ಬೊಕ್ಕ 117 ಜನ ರೋಹಿಂಗ್ಯನಕುಲು ಇತ್ತೆರ್.
ಬಿಸಿಸಿಐ ಎಂಜಿಎಂ ಮೇ27 ಕ್ಕ್ ನಡಪರೆ ಉಂಡು.
ಅನಿಯೇ ಪೊಸ ಲೈಂಗಿಕ ಕಿರುಕುಳ ತಡೆ ನೀತಿಗ್ ಬಿಸಿಸಿಐ ಸದಸ್ಯೆರ್ ಅನುಮೋದನೆ ಕೊರಿಯೆರೆ ಉಲ್ಲೆರ್ ಪಂದ್ ವರದಿ ಆತ್ಂಡ್. ನೆತ್ತೊಟ್ಟಿಗೆ ಅಕ್ಟೋಬರ್-ನವೆಂಬರ್ ಡ್ ನಡಪುನ ಏಕದಿನ ವಿಶ್ವಕಪ್ ದ ತಯಾರ್ ದ ಬಗೆಟ್ ಮೇಲ್ವಿಚಾರಣೆ ಕೂಟನ್ ರಚನೆ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.
ಮಹಿಳಾ ಪ್ರೀಮಿಯರ್‌ ಲೀಗ್ ಗ್ ಪೊಸ ಸಮಿತಿ ರಚನೆ ಆತ್ಂಡ್. ಅತ್ತಂದೆ ಆರ್ಥಿಕ ಚಟುವಟಿಕೆಲೆನ ಬಗ್ಗೆಲ ಯೋಜನೆ ರಡಿ ಮಲ್ಪೆರೆ ಉಂಡು ಪಂದ್ ತೆರಿದ್ ಬೈದ್ಂಡ್.
