ಸರ್ಕಾರದ ಇಂದಿರಾ ಕ್ಯಾಂಟೀನ್ ಡ್ ನನ ಕಮ್ಮಿ ಕರ್ಚಿಡ್ ವನಸ್, ತಿಂಡಿದೊಟ್ಟಿಗೆ ಪೇರ್, ಕೊಜಪು, ನೆಯಿ, ಚೀಪೆ ತೆನಸ್ ಸೇರಿನಂಚೆನೆ ಕೆಎಮ್ ಎಫ್ ದ ನಂದಿನಿ ಬ್ರಾಂಡ್ ದ ಮಾತ ಸೊತ್ತುಲು ತಿಕ್ಕುಂಡು.
ಇಂದಿರಾ ಕ್ಯಾಂಟೀನ್ ದ ಆದಾಯ ಎಚ್ಚ ಮಲ್ಪರೆ ಸರ್ಕಾರ ಈ ಚಿಂತನೆ, ಕೆಎಂಎಫ್ ದೊಟ್ಟಿಗೆ ಇತ್ತೆ ಚರ್ಚೆ ಮಲ್ದ್ಂಡ್ ಪಂದ್ ವರದಿ ಆತ್ಂಡ್. ನೆರ್ದ್ ಕೆಎಮ್ ಎಫ್ ಗ್ಲಾ ಎಚ್ಚದ ಆದಾಯ ಬರಿಯೆರೆ ಉಂಡು.
ಶ್ರವಣಬೆಳಗೊಳ: ತಾರಾಯಿದ ಕೈಲ್ ಬೂರ್ದು
ಕಾಲೇಜ್ ಕಲ್ಪಾರ್ಥಿ ಒರಿ ತೀರ್ ಪೋಯಿನ ಘಟನೆ ಗುರುವಾರ ನಡತ್ಂಡ್.
ಶ್ರವಣಬೆಳಗೊಳ ಪೇಂಟೆರ್ದ್ ಒಂತೆ ದೂರ ಉಪ್ಪುನ ಉತ್ತೇನಹಳ್ಳಿದ ರವಿ ಬೊಕ್ಕ ಅನಸೂಯ ದಂಪತಿನ ಮಗೆ ಪ್ರಜ್ವಲ್(17) ತೀರ್ ಪೋಯಿನಾರ್.
ಬರಾಳು ಕೈತಲ್ ಇಪ್ಪುನ ಬಿ.ಚೋಳೇನಹಳ್ಳಿ ಗ್ರಾಮದ ತೋಟದ ಇಲ್ಲಲ್ ಅಕುಲು ವಾಸ ಇತ್ತೆರ್.
ಏಪದಲೆಕನೆ ಪ್ರಜ್ವಲ್ ತೋಟದ ಬೇಲೆ ಮುಗಿತ್ ದ್ ಕಾಲೇಜ್ ಗ್ ಪೋವೊಂದು ಇತ್ತೆರ್. ಗುರುವಾರಲ ಬೇಲೆ ಮಲ್ಪುನಗ ಮೆರೆನ ಮಿತ್ತ್ ತಾರಾಯಿದ ಕೈಲ್ ಬೂರ್ದುಂಡು. ಕೈತಲ್ ದಕುಲು ಕೂಡ್ಲೆ ಆಸ್ಪತ್ರೆಗ್ ಲೆತೊಂದು ಪೋನಗ ಮಾರ್ಗಗ್ ತೀರ್ ಪೋತೆರ್ ಪಂದ್ ಸಂಬಂಧಿಕೆರ್ ತೆರಿಪಾದೆರ್.
ಪ್ರಜ್ವಲ್ ಶ್ರವಣಬೆಳಗೊಳದ ಸರ್ಕಾರಿ ಪದವಿಪೂರ್ವ ಕಾಲೇಜ್ ಡ್ ಫಸ್ಟ್ ಪಿಯುಸಿ ಕಲ್ತೊಂದು ಇತ್ತೆರ್.
ಬೊಲ್ತೇರ್ ದ ಕಲ್ಪಾರ್ಥಿಯೊರ್ತಿ ಕುಡ್ಲಡ್ ಬಲ್ಲ್ ಪಾಡೊಂದು ತೀರ್ ಪೋಯಿನ ಘಟನೆ ಲೇಟಾದ್ ಗೊತ್ತಾತ್ಂಡ್‌.
ಬೊಲ್ತೇರ್ ದ ನೆರಿಯ ಗ್ರಾಮದ ನೆಕ್ಕರೆದ ನಿವಾಸಿ ದಾಸ್ ಪನ್ಪುನಾರೆನ ಮಗಲ್ ಆದೀರಾ (19 ತೀರ್ ಪೋಯಿನಾರ್ ಪಂದ್ ತೆರಿದ್ ಬೈದ್ಂಡ್.
ಆದೀರಾ ಅರೆನ ಮೆಗ್ಯೆ ಪಲಯನೊಟ್ಟುಗು ಕರಿನ ಮೂಜಿ ತಿಂಗೊಲ್ ರ್ದಿಂಚ ಕುಡ್ಲದ ಕುಲಶೇಖರದ ಬಾಡಿಗೆ ಇಲ್ಲಲ್ ಇತ್ತೆರ್. ಆದೀರಾ ಮುಲ್ಪರ್ದೆ ಪ್ಯಾರಾ ಮೆಡಿಕಲ್ ಕಲ್ತೊಂದು ಇತ್ತೆರ್ ಪಂದ್ ತೆರಿದ್ ಬೈದ್ಂಡ್.
ಈ ಬಗೆಟ್ ಕಂಕನಾಡಿ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ಪೊಲೀಸೆರ್ ಪೊಣ್ಣನ ಮೊಬೈಲ್ ವಿವರನ್ ಪರಿಶೀಲನೆ ಮಲ್ತೊಂದುಲ್ಲೆರ್.
ಉಳ್ಳಾಲ: ಮಾರ್ಗ ಕಡತ್ತೊಂದು ಇತ್ತಿನ ಪೊಂಜೋವ್ ಒರ್ತಿಗ್ ಖಾಸಗಿ ಬಸ್ಸೊಂಜಿ ಗುದ್ದುನೆನ್ ಡ್ರೈವರ್ ತಪ್ಪಾಯಿನ ಘಟನೆ ತೌಡುಗೋಳಿ ಕ್ರಾಸ್ ದಲ್ಪ ಜೂ.20 ಕ್ಕ್ ಮಧ್ಯಾಹ್ನ 12 ಗಂಟೆಗ್ ನಡತ್ ದಿತ್ತ್ಂಡ್.
ಮುಡಿಪುರ್ದ್ ತೌಡುಗೋಳಿ ಮಾರ್ಗವಾದ್ ಕುಡ್ಲದಂಚಿ ಬರೊಂದು ಇತ್ತಿನ ಬಸ್ಸ್ ತ್ತ ಡ್ರೈವರ್ ತ್ಯಾಗರಾಜ್ ಬಿರ್ಸ್ ದ ಚಾಲನೆ ಬೊಕ್ಕ ನಿರ್ಲಕ್ಷ್ಯ ಬೊಕ್ಕ ಜೋರುದ ಹಾರ್ನ್ ಪಾಡೊಂದು ಬಸ್ಸ್ ಡ್ರೈವ್ ಮಲ್ದೆರ್ ಪಂದ್ ಬಸ್ಸ್ ತ್ತ ಡ್ರೈವರ್ ನ ಮಿತ್ತ್ ಸಂಚಾರ ದಕ್ಷಿಣ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಪಾದಚಾರಿ ಪೊಂಜೋವ್ ಒರ್ತಿ ಬಸ್ ಆಕ್ಸಿಡೆಂಟ್ ರ್ದ್ ಬಚಾವು ಆಯಿನ ಘಟನೆ ತೌಡುಗೋಳಿ ಕೈತಲ್ ದ ನರಿಂಗಾನಡ್ ಅಂಗಾರೆ ನಡತ್ ದಿತ್ತ್ಂಡ್. ನೆತ್ತ ವೀಡಿಯೋ ವೈರಲ್ ಆದ್ ತ್ತ್ಂಡ್.
ಕೊಪ್ಪಳ: ಬಜೀ 2 ಬಲ್ಬ್ ಇಪ್ಪುನ ಅಜ್ಜಿಯೊರ್ತಿನ ತಗಡ್ ದ ಶೆಡ್‍ದ ಇಲ್ಲ್ ಗ್ ಜೆಸ್ಕಾಂ ಸಿಬ್ಬಂದಿ 1 ಲಕ್ಷದ 3 ಸಾವಿರದ 315 ರೂ. ಬಿಲ್ ಕೊರಿನ ಘಟನೆ ನಡತ್ಂಡ್.
ಬಿಲ್ ತೂದು ಪೋಡಿನ ಅಜ್ಜಿ ಬೊಕ್ಕ ಆರೆನ ಮಗೆ ಈ ಇಲ್ಲ್ ಮಾರ್ಂಡಲ ಆತ್ ಬಿಲ್ ಕಟ್ಟೆರೆ ಸಾಧ್ಯ ಇಜ್ಜಿ ಪಂತೆರ್.
ಅಜ್ಜಿ ಗಿರಿಜಮ್ಮ ಪನ್ಪುನಾರ್ ಇಲ್ಲಗ್ ಭಾಗ್ಯ ಜ್ಯೋತಿ ಯೋಜನೆಡ್ ಕರೆಂಟ್ ಸಂಪರ್ಕ ಪಡೆತೆರ್. ಸುರುಕು ಪ್ರತಿ ತಿಂಗೊಲ್ 70 ರೂ. ರ್ದ್ 80 ರೂ. ಬಿಲ್ ಬರೊಂದಿತ್ತ್ಂಡ್. ಆಂಡ ಇತ್ತೆ ಒರಾನೆ ಇತ್ ಜಾಸ್ತಿ ಆತ್ಂಡ್ ಪಂದ್ ತೆರಿಪಾದೆರ್.
ಕಡಬ: ತನ್ನನೇ ಬಂಗಾರ್ ದಂಗಡಿ ಓಪನ್ ದ ತಯಾರಿಡ್ ಇತ್ತಿನ ಜವನೆಯೊರಿನ ಪುನ ಆಕ್ಸಿಡೆಂಟ್ ಡ್ ತೀರ್ ಪೋಯಿನ ರೀತಿ ಪತ್ತೆ ಆಯಿನ ಘಟನೆ ಜೂ.22 ಗುರುವಾರ ನಡತ್ಂಡ್.
ಕಡಬ ನಿವಾಸಿ ದಯಾನಂದ ಆಚಾರ್ಯ ಮೆರೆನ ಮಗೆ ನಾಗಪ್ರಸಾದ್ ತೀರ್ ಪೋಯಿನ ಜವನೆ. ಮರ್ಧಾಳದ ಪಲ್ಲಿ ಬಿಲ್ಡಿಂಗ್ ಡ್ ಇನಿ (ಜೂನ್ 22) ಐಶ್ವರ್ಯ ಗೋಲ್ಡ್ ಪುದರ್ ದ ಬಂಗಾರ್ ದಂಗಡಿ ಓಪನ್ ಆಯೆರೆ ಇತ್ತ್ಂಡ್. ನೆತ್ತ ತಯಾರಿಲ ಆದಿತ್ತ್ಂಡ್. ಆಂಡ ಇನಿ ಬೊಲ್ಪುಗು ಸಕಲೇಶಪುರ ಠಾಣಾ ವ್ಯಾಪ್ತಿದ ಗುಂಡ್ಯ ಕೆಂಪುಹೊಳೆದಲ್ಪ ಆಕ್ಸಿಡೆಂಟ್ ಡ್ ತೀರ್ ಪೋಯಿನ ಸ್ಥಿತಿಡ್ ಮೆರೆನ ಪುನ ತಿಕ್ಕ್ ದ್ಂಡ್. ಈ ಘಟನೆದ ಬಗ್ಗೆ ಸಾರ್ವಜನಿಕೆರ್ ಸಂಶಯ ತೂಪಾದೆರ್. ತನಿಖೆದ ಬೊಕ್ಕನೇ ನೆತ್ತ ಕಾರಣ ಗೊತ್ತಾವೊಡಾತೆ.
ಸುಳ್ಯ: ಕಾರ್- ಕಂಟೈನರ್ ಲಾರಿ ಗುದ್ದುದು ಒರಿ ತೀರ್ ಪೋಯೆರ್, ಬೊಕ್ಕ 5 ಜನಕ್ಕ್ ಪೆಟ್ಟಾಯಿನ ಘಟನೆ ಮಾಣಿ-ಮೈಸೂರ್ ಮಾರ್ಗದ ಸಂಪಾಜೆದ ದೇವರಕೊಲ್ಲಿಡ್ ಕೋಡೆ ರಾತ್ರಿ ನಡತ್ಂಡ್.
ಈ ಘಟನೆಡ್ ತೀರ್ ಪೋಯಿನಾರ್ ಬೆಂಗ್ಲೂರ್ ಮೂಲದ ನಿವಾಸಿ ರವಿ ಬೊಕ್ಕ ಪೆಟ್ಟಾಯಿನ ಲಾರಿ ಡ್ರೈವರ್ ಕುಡ್ಲದ ಕುಳಾಯಿ ನಿವಾಸಿ ಈಶ್ವರ (42), ಕಾರ್ ಡ್ ಇತ್ತಿನ ಪ್ರಯಾಣಿಕೆರ್ ಚಂದ್ರಶೇಖರ, ನಿತಿನ್, ಜಗದೀಶ್ ಬೊಕ್ಕ ಹರ್ಷ ಪಂದ್ ತೆರಿದ್ ಬೈದ್ಂಡ್. ಮೊಕ್ಲೆನ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಈ ಘಟನೆದ ಜಾಗೆಗ್ ಸುಳ್ಯ ಪೊಲೀಸೆರ್ ಭೇಟಿ ಕೊರ್ದು ಪರಿಶೀಲನೆ ನಡಪಾದೆರ್.
ಗುರುಪುರ: ಖಾಸಗಿ ಬಸ್ ಬೈಕ್ ಗ್ ಗುದ್ದುದು ಬೈಕ್ ಸವಾರೆ ತೀರ್ ಪೋಯಿನ ಘಟನೆ ಗುರುಪುರಡ್ ಜೂ 22 ಗುರುವಾರ ನಡತ್ಂಡ್.
ತೀರ್ ಪೋಯಿನಾರ್ ಕರಿಯಂಗಳ ನಿವಾಸಿ ದಿ.ಅಣ್ಣಿ ಪೂಜಾರಿ ಪನ್ಪುನಾರೆನ ಮಗೆ ಸಂತೋಷ್ (38) ಪಂದ್ ತೆರಿದ್ ಬೈದ್ಂಡ್.
ಸಂತೋಷ್ ಮೇರ್ ವಾಮಂಜೂರುದ ಬ್ಯಾಂಕ್ ಒಂಜೇತ್ತ ಉದ್ಯೋಗಿ ಆದಿತ್ತೆರ್. ಮೇರ್ ತನ್ನ ಇಲ್ಲರ್ದ್ ಬೇಲೆಗ್ ಏಪದಲೆಕನೆ ಪೋವೊಂದಿಪ್ಪುನಗ ಗುರುಪುರದ ಬ್ಯಾಂಕ್ ದಲ್ಪ ಈ ಘಟನೆ ನಡತ್ ದ್ಂಡ್.
ಸಿಎಂ ಸಿದ್ದರಾಮಯ್ಯ ಮೆರೆನ ಮುತಾಲಿಕೆದ ಸಚಿವ ಸಂಪುಟ ಸಭೆ ಜೂನ್ 28 ಕ್ಕ್ ಬೊಲ್ಪುಗು 11 ಗಂಟೆಗ್ ನಡಪರೆ ಉಂಡು.
ವಿಧಾನಸೌಧಡ್ ನಡಪುನ ಈ ಸಭೆಟ್ಟ್ ಅನ್ನಭಾಗ್ಯ ಬೊಕ್ಕ ಗೃಹಜ್ಯೋತಿ ಯೋಜನೆದ ಬಗೆಟ್ ಮಹತ್ವದ ನಿರ್ಧಾರ ದೆತ್ತೊನ್ನ ಅಂದಾಜಿ ಉಂಡು ಪಂದ್ ತೆರಿದ್ ಬೈದ್ಂಡ್.
ಈ ಸಭೆಟ್ಟ್ ಲೋಕಸಭೆ ವೋಟುದ ಬಗೆಟ್ ಡೆಲ್ಲಿ ನಾಯಕೆರ್ ಕೊರಿನ ಸೂಚನೆನ್ ತೆರಿಪಾಯೆರೆ ಉಂಡು ಪಂದ್ ತೆರಿದ್ ಬೈದ್ಂಡ್.
ಜುಲೈ 3 ರ್ದ್ 14 ಮುಟ್ಟ ವಿಧಾನಸಭೆತ್ತ ಸುರುತ್ತ ಅಧಿವೇಶನ ನಡಪರೆ ಉಂಡು.
ಸುರುತ್ತ ದಿನ ರಾಜ್ಯಪಾಲೆರ್ ಥಾವರಚಂದ್ ಗೆಹ್ಲೋಟ್ ಮೇರ್ ಉಭಯ ಸದನನ್ ಉದ್ದೇಶಿಸಾದ್ ಭಾಷಣ ಮಲ್ಪೆರೆ ಉಲ್ಲೆರ್. ಪನವುದ ಖಾತೆ ಇಪ್ಪುನ ಸಿಎಂ ಸಿದ್ದರಾಮಯ್ಯ ಮೇರ್ ಜು.7 ಕ್ಕ್ ಬಜೆಟ್ ಮಂಡನೆ ಮಲ್ಪೆರೆ ಉಲ್ಲೆರ್.
ನನ ಸುರುತ್ತ ಸರ್ತಿ ಆಯ್ಕೆ ಆಯಿನ 70 ಶಾಸಕೆರೆಗ್ ಉಂದುವೇ 26 ರ್ದ್ 3 ದಿನ ತರಬೇತಿ ಶಿಬಿರ ಆಯೋಜನೆ ಮಲ್ದೆರ್ ಪಂದ್ ವಿಧಾನಸಭಾಧ್ಯಕ್ಷೆರ್ ಯು.ಟಿ ಖಾದರ್ ತೆರಿಪಾದೆರ್.
