ನಟೆ ಪುನಿತ್ ರಾಜ್ ಕುಮಾರ್ ನೆಂಪುಗಾದ್ ಆಯೋಜನೆ ಮಲ್ತಿನ ಅಪ್ಪು ಕಪ್ ಸೀಸನ್ 2 ತ್ತ ಸ್ಯಾಂಡಲ್ ವುಡ್ ಬ್ಯಾಡ್ಮಿಂಟನ್ ಲೀಗ್ ಲೋಗೋ ಬುಡುಗಡೆ ಆತ್ಂಡ್.
ಬೆಂಗ್ಲೂರ್ ದ ಕರ್ನಾಟಕ ಬ್ಯಾಡ್ಮಿಂಟನ್ ಅಸೋಸಿಯೇಷನ್ ಡ್ ನಡತಿನ ಲೇಸ್ ಡ್, ಬ್ಯಾಡ್ಮಿಂಟನ್ ದಂತಕಥೆ ಪ್ರಕಾಶ್ ಪಡುಕೋಣೆ ಲೋಗೋ ಬುಡುಗಡೆ ಉದಿಪನ ಮಲ್ತೆರ್.
ಒಟ್ಟು 8 ಕೂಟಲು ಟೂರ್ನಿಡ್ ಪಾಲ್ ಪಡೆಯೆರೆ ಉಲ್ಲೆರ್. ದಿಗಂತ್, ಸೃಜನ್ ಲೋಕೇಶ್, ವಸಿಷ್ಠ ಸಿಂಹ, ಪ್ರಿಯಾಂಕ ಉಪೇಂದ್ರ, ರಾಗಿಣಿ, ಕವಿತಾ ಲಂಕೇಶ್ ಸೇರಿನಂಚೆನೆ ಸುಮಾರ್ ಜನ ಪಾಲ್ ಪಡೆದಿತ್ತೆರ್.
ಚೀನಾದ ವಾಯುವ್ಯ ಭಾಗದ ನಿಂಗ್ಕ್ಸಿಯಾಡ್ ಗ್ಯಾಸ್ ಪುಡಾದ್ 31ಜನ ತೀರ್ ಪೋಯೆರ್.
ಈ ಘಟನೆ ರೆಸ್ಟೋರೆಂಟ್ ಡ್ ನಡತ್ಂಡ್ ಪಂದ್ ಅಧಿಕಾರಿಲು ತೆರಿಪಾದೆರ್. ಲಿಕ್ವಿಡ್ ಪೆಟ್ರೋಲಿಯಂ ತೋರುನೆರ್ದ್ ಈ ಘಟನೆ ಆಯೆರೆ ಕಾರಣ. ಈ ಬಗ್ಗೆ ಎಚ್ಚದ ಪೊಲಬು ನನ ಗೊತ್ತಾವೊಡಾತೆ.
ಮಧ್ಯ ಅಮೆರಿಕದ ಹೊಂಡುರಾಸ್ ರಾಷ್ಟ್ರದ ಜೈಲ್ ವೊಂಜೇಟ್ಟ್ ಲಡಾಯಿ ಆದ್ 41 ಜನ ಕೈದಿ ಪೊಂಜೋವ್ ನಕುಲು ತೀರ್ ಪೋಯೆರ್.
ಹೊಂಡುರಾಸ್ ದ ರಾಜಬೂಡು ತೆಗುಸಿಗಲ್ಪಾರ್ದ್ 30 ಮೈಲಿ ದೂರಡ್ ಇಪ್ಪುನ ತಮಾರಾ ಪೊಂಜೋವ್ ಜೈಲ್ ಡ್ ಲಡಾಯಿ ನಡತ್ಂಡ್. ಲಡಾಯಿ ಪೊರ್ತುಡು ತೂ ಪೊತ್ತ್ ದ್, ಸುಮಾರ್ ಜನ ಜೀವೊಪ್ಪ ತೀರ್ ಪೋಯೆರ್. ನನ ಕೆಲವೆರ್ ಗುಂಡುದ ದಾಳಿಗ್ ತೀರ್ ಪೋಯೆರ್. 7 ಕೈದಿಲೆಗ್ ಪೆಟ್ಟಾದ್ ಅಕ್ಲೆಗ್ ಚಿಕಿತ್ಸೆ ಕೊರೊಂದು ಉಲ್ಲೆರ್.
ಟೈಟಾನಿಕ್ ಕಪ್ಪಲ್ ದ ಅವಶೇಷದ ವೀಕ್ಷಣೆಗ್ ಪ್ರವಾಸಿಗೆರೆನ್ ಕೊನೊಂದು ಇತ್ತಿನ ಟೈಟಾನ್ ಸಬ್ ಮೆರಿನ್ ನನಲ ಪತ್ತೆ ಆತಿಜಿ.
ಟೈಟಾನ್ ಡ್ ಐನ್ ಜನ ಉಲ್ಲೆರ್. ಪತ್ತೆಗಾದ್ ಕಾರ್ಯಾಚರಣೆ ನಡತೊಂದು ಉಂಡು. ಐತಾರ ಬೊಲ್ಪುಗು ಪೋಲಾರ್ ಪ್ರಿನ್ಸ್ ಕಪ್ಪಲ್ ರ್ದ್ ಸಂಪರ್ಕ ಕಳೆವೊನ್ನ ಟೈಟಾನ್ ಡ್ ಬ್ರಿಟನ್ ದ ಬಿಲಿಯನೇರ್, ಪಾಕ್ ದ ಉದ್ಯಮಿ ಬೊಕ್ಕ ಆಯನ ಮಗೆ ಸೇರಿನಂಚನೆ 5 ಜನ ಇತ್ತೆರ್ ಪಂದ್ ತೆರಿದ್ ಬೈದ್ಂಡ್.
ಪಶ್ಚಿಮ ಬಂಗಾಳಡ್ ತೆಡಿಲ್ ಹಾಕ್ ದ್ 3 ಜೋಕುಲು ಸೇರಿನಂಚನೆ 7 ಜನ ತೀರ್ ಪೋಯೆರ್.
ಓಲ್ಡ್ ಮಾಲ್ಡಾಡ್ ಒರಿ ತೀರ್ ಪೋತೆರ್, ಬೊಕ್ಕ ಒರಿನ 6 ಜನ ಕಾಲಿಯಾಚಕ್ ಪ್ರದೇಶಡ್ ತೀರ್ ಪೋಯೆರ್.
ಅತ್ತಂದೆ ಈ ಘಟನೆಡ್ 9 ಕೈಕಂಜಿ ಪ್ರಾಣ ಕಳೆವೊಂದುಂಡು. ಮಾಲ್ಡಾದ ಶಾಲೆದ ಕೈತಲ್ ತೆಡಿಲ್ ಹಾಕಿನೆರ್ದ್ 12 ಜೋಕುಲೆಗ್ ಪೆಟ್ಟಾತ್ಂಡ್. ಮೊಕ್ಲೆನ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್.
ಮ್ಯಾನ್ಮಾರ್ ದ ದಕ್ಷಿಣ ಕರಾವಳಿಡ್ ಇನಿ ಬೊಲ್ಪುಗು 4.2 ಬಿರ್ಸ್ ದ ಭೂಕಂಪ ನಡತ್ಂಡ್ ಪಂದ್ ಭೂಕಂಪದ ರಾಷ್ಟ್ರೀಯ ಕೇಂದ್ರ ಪೊಲಬು ಕೊರ್ತುಂಡು.
ನೆರ್ದ್ ಒವ್ವೇ ಪ್ರಾಣಗ್ ತೊಂದರೆ ಆತಿಜಿ. ಎಚ್ಚದ ಪೊಲಬು ನನ ಗೊತ್ತಾವೊಡಾತೆ.
Myanmar: experiences an earthquake of 4.2 intensity
The south coastal areas of Mayanmar recorded an earthquake of 4.2 intensity said sources from National Earthquake centre.No damage to life has been reported.
ಕಿನ್ನಿಗೋಳಿ: ಮರ ಕಡ್ಪರೆ ಪೋಯಿನಾರೆಗ್ ಮರಟ್ಟೇ ತರೆ ತಿರ್ಗ್ ದ್ ತೊಂದರೆ ಆಪಿನ ಸ್ಥಿತಿಡ್ ಇಪ್ಪುನಗ ಸಾದಿಡ್ ಪೋವೊಂದಿತ್ತಿನ ಜವನೆಯೊರಿ ಬಚಾವ್ ಮಲ್ತಿನ ಘಟನೆ ಕಿನ್ನಿಗೋಳಿ ಚರ್ಚ್ ದಲ್ಪ ನಡತ್ಂಡ್.
ಕಿನ್ನಿಗೋಳಿ ಪಟ್ಟಣ ಪಂಚಾಯತ್ ದ ಬಿನ್ನಾಪುದಂಚ ಅಪಾಯಕಾರಿ ಮರಕ್ಲೆನ್ ಅರಣ್ಯ ಇಲಾಖೆದಕುಲು ಕಡ್ಪಾವೊಂದಿತ್ತೆರ್. ಕೆಮ್ಮಡೆದ ಹರೀಶ್ ಬೊಕ್ಕ ಕುಡೊರಿ ಜವನೆ ಮರಕ್ಕ್ ಮರಟ್ಟಿತ್ತೆರ್. ಹರೀಶ್ ಮೆರೆಗ್ ಮರಟ್ಟೆ ತರೆ ತಿರ್ಗ್ ದ್ ತೊಂದರೆಡ್ ಇತ್ತೆರ್. ಈ ಪೊರ್ತುಡು ಅರಣ್ಯಾಧಿಕಾರಿಲೆಗ್ ಬೊಕ್ಕ ಪಂಚಾಯತ್ ಸಿಬಂದಿಲೆಗ್ ದಾದ ಮಲ್ಪೊಡು ಪಂದ್ ಗೊತ್ತಾಯಿಜಿ. ಆತಾನಗ ಈ ಮಾರ್ಗಡ್ ಪೋವೊಂದು ಇತ್ತಿನ ಏಳಿಂಜೆ ಪಟ್ಟೆ ನಿವಾಸಿ ಎಲೆಕ್ಟ್ರೀಶಿಯನ್ ವಿಜಯ ಅಮೀನ್ ಕೂಡ್ಲೆ ಮರಕ್ಕ್ ಮಿತರ್ದ್ ಹರೀಶೆರ್ನ ಸೊಂಟಗ್ ಬಲ್ಲ್ ಕಟ್ಟ್ ದ್ ತಿರ್ತ್ ಬೂರಂದಿಲೆಕ್ಕ ತೂವೊಂಡೆರ್. ಬೊಕ್ಕ ಅರಣ್ಯಾಧಿಕಾರಿಲು ಕ್ರೈನ್ ಕನತ್ ದ್ ಹರೀಶ್ ಮೆರೆನ್ ತಿರ್ತ್ ಜಪುಡಾಯೆರ್‌. ವಿಜಯ್ ಅಮೀನ್ ಪಟ್ಟೆ ಮೆರೆನ ಸಕಾಯ ಬೊಕ್ಕ ಸಾಹಸನ್ ಮಾತೆರ್ಲಾ ಮೆಚ್ಚ್ ದೆರ್.
ರಾಜ್ಯಡ್ ಬೇಗಡೇ ನಂದಿನಿ ಪೇರ್ ಬೊಕ್ಕ ಕೊಜಪುದ ಕಿರಯಿ ಎಚ್ಚಾಪಿನ ಅಂದಾಜಿ ಉಂಡು.
ಈ ಬಗೆಟ್ ಸುಳಿವು ಕೊರ್ನ ಕೆಎಮ್ ಎಫ್ ಪೊಸ ಅಧ್ಯಕ್ಷೆರ್ ಭೀಮಾನಾಯ್ಕ್, ‘ಅಗತ್ಯ ಸೊತ್ತುದ ಬಿಲೆ ಎಚ್ಚಾಯಿನೆರ್ದಾವರ ಕಿರಯಿ ಎಚ್ಚ ಮಲ್ಪುನವು ಅನಿವಾರ್ಯ ಆತ್ಂಡ್’ ಪಂದ್ ಪಂಡೆರ್.
ಬೆಂಗ್ಲೂರ್ ಡ್ ಪಾತೆರಿನ ಮೇರ್, ನಂದಿನಿ ಪೇರ್, ಕೊಜಪ್ಪುದ ಕಿರಯಿ ಲೀ.ಗ್ 5 ರೂ. ಎಚ್ಚ ಮಲ್ಪುನ ಬಗೆಟ್ಟ್ ಮಾತ ಪೇರ್ ಒಕ್ಕೂಟದಕುಲು ಬಿನ್ನಾಪು ಮಲ್ದೆರ್. ಈ ಬಗೆಟ್ ಸಿಎಂನೊಟ್ಟಿಗೆ ಚರ್ಚೆ ಮಲ್ತ್ ದ್ ಅಕೇರಿದ ತೀರ್ಮಾನ ದೆತೊನೊವ ಪಂದ್ ಪಂಡೆರ್.
ಬೆಂಗ್ಲೂರ್: ಕರ್ನಾಟಕ ಹಾಲು ಮಾರಾಟ ಮಹಾಮಂಡಳ (KMF) ಅಧ್ಯಕ್ಷೆರೆ ತಾನಗ್ ಕಾಂಗ್ರೆಸ್ ನಾಯಕೆ, ಮಾಜಿ ಶಾಸಕೆರ್ ಭೀಮಾ ನಾಯ್ಕ್ ಅವಿರೋಧ ಆಯ್ಕೆ ಆಯೆರ್. ಅಧಿಕೃತ ಘೋಷಣೆ ಆವರೆ ಬಾಕಿ ಉಂಡು.
ಇನಿ ನಾಮಪತ್ರ ಸಂದಾದ್ ಇನಿಯೇ ವೋಟು ನಡಪೊದಿತ್ತ್ಂಡ್. ಆಂಡ ಪಂತೊಡು ಹಾಲಿ ಅಧ್ಯಕ್ಷೆರ್ ಬಿಜೆಪಿ ಶಾಸಕೆ ಬಾಲಚಂದ್ರ ಜಾರಕಿಹೊಳಿ ಮೆರೆನ ಅಧಿಕಾರಾವಧಿ ಮುಗಿನೆರ್ದಾವೆರ ಭೀಮಾ ನಾಯ್ಕ್ ಅವಿರೋಧವಾದ್ ಆಯ್ಕೆ ಆಪಿನ ಖಚಿತ ಆತ್ಂಡ್.
ಬೊಲ್ತೇರ್: ಕೆಎಸ್ ಆರ್ ಟಿಸಿ ಬಸ್ ಕ್ಕ್ ಬೈಕ್ ಗುದ್ದುದು ಬೈಕ್ ಸವಾರೆ ಜಾಗೆಡೇ ತೀರ್ ಪೋಯಿನ ಘಟನೆ ಬುಧಾರ ಬೊಲ್ಪುಗು ಗರ್ಡಾಡಿ ಗ್ರಾಮದ ನಂದಿಬೆಟ್ಟ ಕೈತಲ್ ನಡತ್ಂಡ್.
ಈ ಘಟನೆಡ್ ತೀರ್ ಪೋಯಿನಾರ್ ಓಡೀಲು ನಿವಾಸಿ ಆಯಿನ ದೀಕ್ಷಿತ್ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ವೇಣೂರು ಠಾಣೆದ ಪೊಲೀಸೆರ್ ಜಾಗೆಗ್ ಬತ್ತ್ ದ್ ಪರಿಶೀಲನೆ ನಡಪಾದೆರ್.
