ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ತುಳು ಲಿಪಿ ಕಲ್ತ್ ದ್ ತುಳು ಭಾಷೆ ಒರಿಪಾಲೆ: ಸುಕೇಶ್ ಮಾಣಾಯಿ

ತುಳು ಲಿಪಿತ್ತ ಅಕ್ಷರಾಭ್ಯಾಸ ಮಲ್ಪುನೆತ್ತೊಟ್ಟಿಗೆ ತುಳು ಲಿಪಿ ಕಲ್ತ್ ದ್ ತುಳು ಭಾಷೆನ್ ಒರಿಪಾವೊಡು. ತುಳು ಭಾಷೆನ್ ನಮ ಪಾತೆರ್ಂಡಲ ತುಳು ಲಿಪಿ ಅಚ್ಚರದ ಗೇನ ನಮಕ್ಕಿಜ್ಜಿ. ಈ ಬಗೆಟ್ಟ್ ನಮ ಕಲ್ಪುನಂಚಿನ ಅಗತ್ಯ ಉಂಡು ಪಂದ್ ಅದ್ಯಪಾಡಿ ಆದಿನಾಥೇಶ್ವರ ದೇವಲ್ಯದ ಆಡಳಿತ ಮಂಡಳಿದ ಸದಸ್ಯೆರ್ ಸುಕೇಶ್ ಮಾಣಾಯಿ ಪಂಡೆರ್.

ಮೇರ್ ಸುಂಕದಕಟ್ಟೆ ಶ್ರೀನಿರಂಜನ ಸ್ವಾಮಿ ಅನುದಾನಿತ ಪದವಿ ಪೂರ್ವ ಕಾಲೇಜ್ ದ ತುಳು ಅಧ್ಯಯನ ಕೇಂದ್ರ, ಕರ್ನಾಟಕ ತುಳು ಸಾಹಿತ್ಯ ಆಕಾಡೆಮಿ ಬೊಕ್ಕ ಜೈ ತುಳುನಾಡ್ ಸಂಘಟನೆದ ಒಟ್ಟುಸೇರಿಗೆಡ್ ನಡತಿನ ‘ಬಲೆ ತುಳು ಕಲ್ಪುಗ’ ಲೇಸ್ ದ ಉದಿಪನ ಮಲ್ತ್ ದ್ ಪಾತೆರಿಯೆರ್.

ಬೊಕ್ಕ ಜೈ ತುಳುನಾಡ್ ಸಂಘಟನೆ ಅಂಚೆನೆ ತುಳು ಲಿಪಿತ್ತ ಶಿಕ್ಷಕೆರ್ ಕಿರಣ್ ತುಳುವೆ ಪಾತೆರಿಯೆರ್.

ಈ ಪೊರ್ತುಡು ಸುಂಕದಕಟ್ಟೆದ ಶ್ರೀ ನಿರಂಜನ ಸ್ವಾಮಿ ಎಜುಕೇಶನ್ ಟ್ರಸ್ಟ್ ದ ಟ್ರಸ್ಟಿ ದೀಪಕ್ ಕೋಟ್ಯಾನ್, ಕಾಲೇಜ್ ದ ಪ್ರಾಂಶುಪಾಲೆರ್ ಸುಧಾಕರ ಶೆಟ್ಟಿ, ತುಳು ಲಿಪಿ ಶಿಕ್ಷಕೆರ್ ಪ್ರಶಾಂತ್ ಪೂಜಾರಿ ನಂದಳಿಕೆ, ಜೈ ತುಳುನಾಡ್ ಸಂಘಟನೆದ ಉಪಾಧ್ಯಕ್ಷೆರ್ ಉದಯ್ ಪೂಂಜಾ ತಾಳಿಪಾಡಿಗುತ್ತು, ಸದಸ್ಯೆರ್ ನಿರಂಜನ್ ಕರ್ಕೇರ, ವಿನಯ್ ರೈ ಬೊಕ್ಕ ಕಲ್ಪಾರ್ಥಿಲು ಇತ್ತೆರ್.

ಕುಡ್ಲದ ಶಮಾ ವಾಜಿದ್ ಗ್ ಗ್ಲೋಬಲ್​ ಮಿಸೆಸ್​​ ಇಂಟರ್​ ನ್ಯಾಷನಲ್​ 2023 ಕಿರೀಟ

ಕುಡ್ಲ: ಡೆಲ್ಲಿಡ್ ಗ್ಲೋಬಲ್ ಇಂಡಿಯಾ ಎಂಟರ್‌ಟೈನ್‌ಮೆಂಟ್‌ ಪ್ರೊಡಕ್ಷನ್ಸ್ ಆಯೋಜನೆ ಮಲ್ತಿನ ಗ್ಲೋಬಲ್ ಮಿಸೆಸ್ ಇಂಡಿಯಾ ಇಂಟರ್‌ನ್ಯಾಷನಲ್‌ ಯೂನಿವರ್ಸ್ – 2023 ಪಂತೊಡು ಕುಡ್ಲದ ಶಮಾ ವಾಜಿದ್​​ ಗೆಂದ್ ದ್ ಕಿರೀಟ ಪಡೆತೆರ್.

ದೇಶದ 22 ರ್ದ್ ಎಚ್ಚ ರಾಜ್ಯಡ್ ನಡತಿನ ಆಡಿಷನ್​​ಡ್ ಆಯ್ಕೆ ಆಯಿನ ಮಾತ ಸ್ಪರ್ಧಿಲೆನ್ ಪಿರ ಪಾಡಿನ ಶಮಾ ಈ ಸಾಧನೆ ಮಲ್ದೆರ್.

ಈ ಪಂತೊಡು ಕಿರೀಟ ಪಡೆಯಿನ ಶಮಾ, 2024 ಟ್ಟ್ ನಡಪುನ ಗ್ಲೋಬಲ್​ ಮಿಸೆಸ್​ ಯುನಿವರ್ಸ್​ ಪಂತೊಗು ಭಾರತದ ಪ್ರತಿನಿಧಿ ಆತೆರ್. ಪ್ರಶಸ್ತಿ ಗೆಂದಿನ ಶಮಾ ವಾಜಿದ್​​ ಟಾಪ್​ 40 ತ್ತ ಪಟ್ಟಿಡ್ ತಾನನ್ ಪಡೆತೆರ್.

ಕರ್ನಾಟಕನ್ ಪ್ರತಿನಿಧಿಸಾಯಿನ ಶಮಾ ವಾಜಿತ್​​ ಎಥ್ನಿಕ್​ ರೌಂಡ್​, ಟ್ಯಾಲೆಂಟ್​ ರೌಂಡ್​, ಪೂಲ್​ ರೌಂಡ್​​ ಇಂಚ ಮಾತ ರೌಂಡ್​ಡ್ ಎದುರು ಇತ್ತಿನ ಮೇರ್ ಬೊಕ್ಕ ಟಾಪ್​ 10 ಪೊಂಜೋವ್ ಲೆನ ಪಟ್ಟಿಡ್ ತಾನ ಪಡೆಯೆರ್.

ಅವೆರ್ದ್ ಬೊಕ್ಕ ಮಾತ ಸುತ್ತುನ್ ಗೆಂದಿನ ಶಮಾ ಬಾಲಿವುಡ್​ ನಟಿ ಮಲೈಕಾ ಅರೋರಾ ಮೆರೆನ ಕೈರ್ದ್ ಕಿರೀಟನ್ ತರೆಕ್ಕ್ ಏರಾವೊಂಡೆರ್. ಮೆರೆಗ್ 13 ತಿಂಗೊಲ್ದ ಎಲ್ಯ ಬಾಲೆ ಉಂಡು. ಮೇರ್ ಶ್ರೀನಿವಾಸ ಆರ್ಕಿಕ್ಟೆಟ್​ ಕಾಲೇಜ್ ಡ್ ಪ್ರೊಫೆಸರ್​ ಆದುಲ್ಲೆರ್.

ಮುಸ್ಲಿಂ ಸಮುದಾಯಡ್ ಫ್ಯಾಶನ್​ ಲೋಕೊಗು ಕಾರ್ ದೀಪಿನವು ಪಂಡ ಸುಲಭದ ಬೇಲೆ ಆತ್ತ್. ಆಂಡ ಮೆರೆಗ್ ಕುಟುಂಬದಕುಲು ಈ ಸಾಧನೆ ಮಲ್ಪರೆ ಬೆರಿಬಲ ಕೊರ್ತೆರ್.

ಧರ್ಮಸ್ಥಳಡ್ ಭಕ್ತೆರ್ ಸಿಎಂ ಸಿದ್ದರಾಮಯ್ಯೆರ್ನ ಪುದರ್ ಡ್ ಸೇವೆ ಕೊರ್ಪೆರ್ : ಡಾ.ವೀರೇಂದ್ರ ಹೆಗ್ಗಡೆ

ರಾಜ್ಯಡ್ 14ನೇ ಬಜೆಟ್ ನ್ ಮಂಡನೆ ಮಲ್ತಿನ ಸಿಎಂ ಸಿದ್ದರಾಮಯ್ಯ ಮೆರೆಗ್ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ವೀರೇಂದ್ರ ಹೆಗ್ಗಡೆ ಮೇರ್ ಅಭಿನಂದನೆ ಪತ್ರ ಬರೆತೆರ್.

‘ಸುಮಾರ್ ಯೋಜನೆದ ಮುಖೇನ ಜನಕ್ಲೆಗ್ ಉಪಯೋಗ ಆಪಿನ ಲೇಸ್ ನ್ ಕೊರ್ತರ್. ಧರ್ಮಸ್ಥಳ ಕ್ಷೇತ್ರಗ್ ಬರೊಂದು ಇಪ್ಪುನ ಭಕ್ತೆರ್, ಇಸೇಸವಾದ್ ಪೊಂಜೋವ್ ನಕುಲು ಇರೆನ ಪುದರ್ ಡ್ ಶ್ರೀ ಮಂಜುನಾಥ ಸ್ವಾಮಿಗ್ ಸೇವೆ ಬೊಕ್ಕ ಕಾಣಿಕೆ ಸಂದಾವೊಂದು ಉಲ್ಲೆರ್. ಜೈನ ಸಮುದಾಯಗ್ ಇಸೇಸ ಅನುದಾನ ಕೊರ್ದು ಪ್ರೋತ್ಸಾಹ ಮಲ್ತಿನ ಇಚಾರ ತೆರಿದ್ ಇಡೀ ಸಮಾಜಗ್ ಕುಸಿ ಆತ್ಂಡ್. ಇಂಚಾದ್ ಮಾತೆರ್ನಾ ಪರವಾದ್ ಅಭಿನಂದನೆಲು. ಅವಕಾಶ ಇಪ್ಪುನಗ ಕ್ಷೇತ್ರಗ್ ಬತ್ತ್ ದ್ ಶ್ರೀ ಮಂಜುನಾಥ ಸ್ವಾಮಿನ ದರ್ಶನ ಪಡೆದ್ ಪೋಲೆ” ಪಂದ್ ಹೆಗ್ಡೆರ್ ಪತ್ರಡ್ ಬರೆತೆರ್.

ಆ.6 : ಕಟೀಲ್ ರಾಮ್ ಫ್ರೆಂಡ್ಸ್ (ರಿ.) ವಾರ್ಷಿಕ ಉಚ್ಚಯ

ಕಟೀಲ್ ರಾಮ್ ಫ್ರೆಂಡ್ಸ್ (ರಿ.) ಕೂಟದ 4ನೇ ವರ್ಷದ ವಾರ್ಷಿಕ ಉಚ್ಚಯ ಆಗಸ್ಟ್ 6 ಐತಾರ ಬಯ್ಯಗ್ 3 ಗಂಟೆಗ್ ಕಟೀಲ್ ಕಾಮತ್ ಕಾಂಪ್ಲೆಕ್ಸ್ ಶ್ರೀ ಲಕ್ಷ್ಮಿ ಸಭಾಂಗಣಡ್ ನಡಪರೆ ಉಂಡು.

ಈ ಲೇಸ್ ಡ್ “2022-23 ನೇ ಸಾಲ್ ಡ್ ಎಸ್ ಎಸ್ ಎಲ್ ಸಿ ಬೊಕ್ಕ ಪಿಯುಸಿಡ್ ಎಡ್ಡೆ ಮಾರ್ಕ್ ಪಡೆಯಿನ ಕಲ್ಪಾರ್ಥಿಲೆಗ್ ಗೌರವಾರ್ಪಣೆ ಬೊಕ್ಕ ವಿದ್ಯಾರ್ಥಿ ವೇತನ ಕೊರಿಯೆರೆ ಉಂಡು. ಸಮಾಜಡ್ ಸೇವೆ ಮಲ್ತಿನ ಸಾಧಕೆರೆಗ್ ಬೊಕ್ಕ ಸಮಾಜ ಸೇವಕೆರೆಗ್ ತಮ್ಮನ ಲೇಸ್ ಬೊಕ್ಕ ಆಸಕ್ತ ಕುಟುಂಬಲೆಗ್ ಅಶಕ್ತ ಸಹಾಯಧನನ್ ಗಣ್ಯೆರೆನ ಬೊಕ್ಕ ಕೂಟದ ಸೇವಾ ಬಂಧುಲೆನ ಸಮ್ಮುಖಡ್ ಪಟ್ಟಿಯೆರೆ ಉಂಡು.

ಈ ಲೇಸ್ ಡ್ ಶ್ರೀ ಹರಿನಾರಾಯಣದಾಸ ಆಶ್ರಣ್ಣ ಕಟೀಲ್ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ನೆತ್ತ ಉದಿಪನನ್ ಮುಲ್ಕಿ ಬೆದ್ರ ಕ್ಷೇತ್ರದ ಶಾಸಕೆರ್ ಉಮಾನಾಥ ಕೋಟ್ಯಾನ್ ಮಲ್ಪರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಉದ್ಯಮಿ ಶಿವರಾಮ್ ಕೋಟ್ಯಾನ್ ಪೆರ್ಮುದೆ, ರಂಜಿತ್ ಪೂಜಾರಿ ತೋಡರ್, ರಾಜೇಶ್ ಅಮೀನ್ ಪೊರ್ಕೋಡಿ, ಪ್ರಕಾಶ್ ಸರ್ಕಲ್ ಇನ್ಸ್ ಪೆಕ್ಟರ್ ಬಜಪೆ ಠಾಣೆ, ಅರುಣ್ ರೈ ತೋಡರ್, ಲೋಕಯ್ಯ ಸಾಲಿಯಾನ್ ಕೊಂಡೇಲ-ಕಟೀಲ್, ಅಭಿಲಾಷ್ ಶೆಟ್ಟಿ ಕಟೀಲ್, ಪ್ರಕಾಶ್ ಕುಕ್ಯಾನ್ ಎಕ್ಕಾರ್, ರಾಜಶೇಖರ್ ಎನ್, ಕಟೀಲ್ ರಾಮ್ ಫ್ರೆಂಡ್ಸ್ (ರಿ.) ಕೂಟದ ಸಂಸ್ಥಾಪಕೆರ್ ರಮಾನಂದ ಪೂಜಾರಿ ಕಟೀಲ್, ಅಧ್ಯಕ್ಷೆರ್ ರೋಹಿತ್ ಪೊಳಲಿ ಬೊಕ್ಕ ಕೂಟದ ಮತ ಪದಾಧಿಕಾರಿಲು, ಸರ್ವಸದಸ್ಯೆರ್ ಪಾಲ್ ಪಡೆಯೆರೆ ಉಲ್ಲೆರ್.

ಎಲ್ಲೆ ಮುಲ್ಕಿಡ್ ಕನ್ನಡ ಮೀಡಿಯಂದ ಜೋಕುಲೆಗ್ ಶಾಲೆದ ಫೀಸ್ ಬೊಕ್ಕ ಯುನಿಫಾರ್ಮ್ ಪಟ್ಟುನ ಲೇಸ್

ಮುಲ್ಕಿ ಸುರಭಿ ಎಲೆಕ್ಟ್ರಾನಿಕ್ಸ್ ಬೊಕ್ಕ ಯುವ ಪಡೆ ಒಟ್ಟುಸೇರಿಗೆಡ್ ಕನ್ನಡ ಮಾಧ್ಯಮ ಶಾಲೆದ ಆರ್ಥಿಕವಾದ್ ಪಿರ ಇಪ್ಪುನ ಜೋಕುಲೆಗ್ ಶಾಲೆದ ಫೀಸ್ ಬೊಕ್ಕ ಯುನಿಫಾರ್ಮ್ ಪಟ್ಟುನ ಲೇಸ್ ಜು.14 ಸುಕ್ರಾರ ಬೊಲ್ಪುಗು 10:30 ಕ್ಕ್ ಮುಲ್ಕಿ ಸುರಭಿ ಇಲೆಕ್ಟ್ರಾನಿಕ್ಸ್ ಬೊಕ್ಕ ಫರ್ನಿಚರ್ ಸ್ಟೋರ್ ಡ್ ನಡಪರೆ ಉಂಡು.

ಈ ಲೇಸ್ ಡ್ ಮುಲ್ಕಿ ಪೊಲೀಸ್ ಇನ್ಸ್ ಪೆಕ್ಟರ್ ವಿದ್ಯಾದರ್ ಬೈಕೇರಿಕರ್ ಜೋಕುಲೆಗ್ ಶಾಲೆದ ಫೀಸ್ ಬೊಕ್ಕ ಯುನಿಫಾರ್ಮ್ ಪಟ್ಟಿಯೆರೆ ಉಲ್ಲೆರ್.

ತೊರ್ತಾಲ್ ದ ಮಾರಿಯಮ್ಮನ ಬಾಕಿಮಾರ್ ಕಂಡೊಡು ನೇಜಿ ನಡ್ಪಿನ ಲೇಸ್

ನವದುರ್ಗಾ ಫ್ರೆಂಡ್ಸ್ ಸರ್ಕಲ್ (ರಿ.) ರಥಬೀದಿ ಸುರತ್ಕಲ್ (ತೊರ್ತಾಲ್) ಬೊಕ್ಕ ತ್ರೈರೂಪಿಣಿ ಮಹಿಳಾ ಮಂಡಳಿದ ಒಟ್ಟುಸೇರಿಗೆಡ್ ಊರುದ ಪತ್ತ್ ಸಮಸ್ತೆರ್ ಸೇರೊಂದು ಇತಿಹಾಸ ಪುಗರ್ತೆದ ಪಿರಾಕ್ ದ ತೊರ್ತಾಲ್ ಮಾರಿಗುಡಿ ಶ್ರೀ ಮಾರಿಯಮ್ಮ ದೇವಲ್ಯ ಬೊಕ್ಕ ಶ್ರೀ ವೀರಭದ್ರ ದುರ್ಗಾಪರಮೇಶ್ವರೀ ದೇವಲ್ಯದ ಬಾಕಿಮಾರ್ ಕಂಡೊಡು ನೇಜಿ ನಡ್ಪುನ ಲೇಸ್ ಇಂಚೊಗು ನಡತ್ಂಡ್.

ಮಾರಿಯಮ್ಮನ ಸನ್ನಿಧಿಡ್ ನೇಜಿ ದೀದ್ ಕ್ಷೇತ್ರದ ಅರ್ಚಕೆರ್ ಪ್ರಾರ್ತನೆ ಮಲ್ತೆರ್. ನವದುರ್ಗಾ ಫ್ರೆಂಡ್ಸ್ ಸರ್ಕಲ್ ದ ಗೌರವಾಧ್ಯಕ್ಷೆರ್ ಮಹಾಬಲ ಪೂಜಾರಿ ಕಡಂಬೋಡಿ, ಕ್ಷೇತ್ರದ ಆಡಳಿತ ಸಮಿತಿದ ಅಧ್ಯಕ್ಷೆರ್ ಉಸ್ತಾದ್ ಕೇಶವ ಪಿ.ಶೆಟ್ಟಿಗಾರ್, ಕೋಶಾಧಿಕಾರಿ ಓಂಪ್ರಕಾಶ್ ಡಿ. ಶೆಟ್ಟಿಗಾರ್ ಕಡಂಬೋಡಿ, ಕೃಷಿ ಕಾರ್ಯದ ಉಸ್ತುವಾರಿ ಸುರೇಶ್ ಪಿ.ಶೆಟ್ಟಿಗಾರ್ ದೇವೆರೆನ ಪುರ್ಸಾದ ಪಾಡ್ದ್ ಬಾಕಿಮಾರ್ ಕಂಡಗ್ ಜತ್ತ್ ದ್ ನೇಜಿ ನಡಿಯೆರ್.

ನವರಾತ್ರಿದ ಸುರುತ್ತ ದಿನ ಊರುದ ಪತ್ತ್ ಸಮಸ್ತೆರ್ ಕುರಲ್ ಪರ್ಬಗ್ ಬಾಕಿಮಾರ್ ಕಂಡರ್ದೆ ಕುರಲ್ ದೆತೊಂದು ಪೋದು ಇಲ್ಲಲ್ ಕಟ್ಟುನ ಸಂಪ್ರದಾಯನ್ ದುಂಬು ಕೊನೊಪುನ ದಿಟ್ಟಿಡ್ ಈ ಸಂಸ್ಥೆದ ಸೇವಾ ಕಾರ್ಯನ್ ನೆಂಪು ದೀವೊಡಾಯಿನವು ಪಂದ್ ಗೌರವಾಧ್ಯಕ್ಷೆರ್ ಮಹಾಬಲ ಪೂಜಾರಿ ಕಡಂಬೋಡಿ ಪಂಡೆರ್.

ಈ ಲೇಸ್ ಡ್ ಕೃಷಿ ಕಾರ್ಯದ ಪೆರಿಯೆರ್ ಭವಾನಿ, ದಮಯಂತಿ, ಪ್ರೇಮ ಮೆರೆನ ಮಾರ್ಗದರ್ಶನಡ್ ಊರುದ ಜವನೆರ್, ಪೊಂಜೋವ್ ನಕುಲು, ಜಂಟಿ ಸಂಸ್ಥೆದ ಪದಾಧಿಕಾರಿಲು, ಸದಸ್ಯೆರ್ ಇತ್ತೆರ್.

ದೇವೆರೆ ಪಾದೊ ಸೇರಿಯೆರ್ ಮೂಜೂರು ಲೋಕು ಪೂಜಾರಿ

ಸುಮಾರ್ ವರ್ಷೊರ್ದಿಂಚ ಬ್ರಹ್ಮ ಬೈದರ್ಲೆನ ಸೇವೆ ಮಲ್ತೊಂದು ಬದ್ ಕ್ ನ ಸಾರ್ತಕ ಮಲ್ತಿನ  ಬೈದೆರ್ಲೆ ದರ್ಶನ ಪಾತ್ರಿ ಮೂಜೂರು ಲೋಕು ಪೂಜಾರಿ ಮೇರ್ ಇನಿ ದೇವೆರೆ ಪಾದೊ ಸೇರಿಯೆರ್.

ಮೆರೆನ ಆತ್ಮೊಗು  ಬ್ರಹ್ಮ ಬೈದರ್ಕಳ ದೇವೆರ್ ಸದ್ಗತಿನ್ ಕೊರಡ್ ಪಂದ್ ಪ್ರಜ್ಞಾನಂ ಬ್ರಹ್ಮ ಬಳಗದಕುಲು ಸುಗಿತೊಂದೆರ್.

“ಸರ್ಕಸ್ ” ಪಿಕ್ಚರ್ ದ ಸಕ್ಸೆಸ್ ಗ್ ಟೀಮ್ ವರ್ಕ್ ಕಾರಣ: ರೂಪೇಶ್ ಶೆಟ್ಟಿ

ಕುಡ್ಲ: ಸರ್ಕಸ್ ಪಿಕ್ಚರ್ ಗೆಂದ್ ನಿ ಒರಿಯರ್ದ್ ಅತ್ತ್. ಎನ್ನ ಇಡೀ ಕೂಟ ನೆಕ್ಕಾದ್ ರಾತ್ರೆ ಪಗೆಲ್ ಬೆನ್ತ್ಂಡ್. ಎಚ್ಚಿನಕುಲು ಭಾಷೆದ ಮಿತ್ತ್ ಮೋಕೆ ದೀದ್ ತುಳು ಪಿಕ್ಚರ್ ಮಲ್ಪುವೆರ್, ಆಂಡ ಬುಡುಗಡೆ ಪೊರ್ತುಡು ಅಮಸರ ಮಲ್ಪುವೆರ್. ನೆರ್ದ್ ಎಡ್ಡೆ ಪಿಕ್ಚರ್ ಲ ಸೋಪುಂಡು.ಅಂಚಾದ್ ಪಿಕ್ಚರ್ ಬುಡುಗಡೆ ಪೊರ್ತುಡು ಜಿದ್ದ್ ಬೊರ್ಚಿ ಪಂದ್ ಸರ್ಕಸ್ ಪಿಕ್ಚರ್ ದ ನಿರ್ದೇಶಕೆರ್ ರೂಪೇಶ್ ಶೆಟ್ಟಿ ಪಂಡೆರ್.

ಮೇರ್ ತನ್ನ ನಿರ್ದೇಶನ ಬೊಕ್ಕ ಅಭಿನಯದ “ಸರ್ಕಸ್” ತುಳು ಪಿಕ್ಚರ್ ಜೂನ್ 23 ಕ್ಕ್ ಜಗತ್ತ್ ಇಡೀ ಬುಡುಗಡೆಯಾದ್, ಯಶಸ್ಸ್ ಆಯಿನ ಪೊರ್ತುಡು ಮಲ್ತಿನ ಸಕ್ಸಸ್ ಮೀಟ್ ಡ್ ಪಾತೆರಿಯೆರ್.

ಭೋಜರಾಜ್ ವಾಮಂಜೂರು ಮೇರ್ ಪಾತೆರ್ದ್, “ಸರ್ಕಸ್ ಪಿಕ್ಚರ್ ದ ಬಗ್ಗೆ ಪಾತೆರಿಯೆರೆ ಪೆರ್ಮೆ ಆಪುಂಡು. ದಾಯೇ ಪಂಡ ತುಳುನಾಡ್ ಡ್ ಮಾತ್ರ ಅತ್ತಂದೆ ದೇಶ ವಿದೇಶಡ್ಲಾ ಪಿಕ್ಚರ್ ಪುದರ್ ಮಲ್ತೊಂದು ಉಂಡು. ಪಿಕ್ಚರ್ ಗೆಂದಿಯೆರೆ ಮಾಧ್ಯಮ ಮಿತ್ರೆರೆನ ಸಹಕಾರ ಮಸ್ತ್ ಅಗತ್ಯ. ಅವ್ವೇ ರೀತಿ ಸರ್ವಧರ್ಮದ ಪ್ರೇಕ್ಷಕೆರೆನ ಪ್ರೀತಿರ್ದ್ ಪಿಕ್ಚರ್ ಗೆಂದ್ ದ್ಂಡ್. ಆಯಿಕ್ಕಾದ್ ಮಾತೆರೆಗ್ಲಾ ಸೊಲ್ಮೆಲು. ರೂಪೇಶ್ ಶೆಟ್ಟಿ ಟೀಮ್ ಮಲ್ತಿನ ನಿರಂತರ ಪ್ರಯತ್ನದ ಫಲವಾದ್ ಪಿಕ್ಚರ್ ಎಡ್ಡೆ ಪುದರ್ ಪಡೆತ್ಂಡ್. ಉಂದುವೇ ರೀತಿ ನನ ಬರ್ಪಿನ ಮಾತ ತುಳು ಪಿಕ್ಚರ್ ಗ್ಲಾ ನಿಕ್ಲೆನ ಮಾತ ಪ್ರೋತ್ಸಾಹ ಇಪ್ಪಡ್” ಪಂದ್ ಪಂಡೆರ್.

ಸಂಭಾಷಣೆ ಬರೆಯಿನ ಪ್ರಸನ್ನ ಶೆಟ್ಟಿ ಬೈಲೂರು ಪಾತೆರ್ದ್, “ಬಲೇ ತೆಲಿಪಾಲೆ ಮುಖೇನ ಬತ್ತಿನ ಎಲ್ಯ ಕಲಾವಿದೆ ಯಾನ್. ಎನನ್ ಗುರುತಿಸಾದ್ ಪಿಕ್ಚರ್ ಡ್ ಸಂಭಾಷಣೆ ಬರೆಯೆರೆ ಅವಕಾಶ ಮಲ್ತ್ ಕೊರಿನ ರೂಪೇಶ್ ಶೆಟ್ಟಿ ಮೆರೆಗ್ ಸೊಲ್ಮೆ ಸಂದಾವೆ. ಕುಡ್ಲ ಮಾತ್ರ ಅತ್ತಂದೆ ಬೆಂಗ್ಲೂರ್ ದ ಕನ್ನಡಿಗೆರ್ ಪಿಕ್ಚರ್ ದ ಕಾಮಿಡಿ ಸೀನ್ ಡ್ ತೆಲಿತೊಂದು ಉಲ್ಲೆರ್. ಭಾಷೆ ಅರ್ಥ ಆವಂದೆ ಇತ್ತ್ಂಡಲ ಕಲಾವಿದೆರೆನ ನಟನೆ ಜನಕ್ಲೆನ್ ತೆರಿದ್ಂಡ್ ಪಂಡ ಆಯಿಕ್ಕ್ ರೂಪೇಶ್ ಶೆಟ್ಟಿ ಮೆರೆನ ದಕ್ಷ ನಿರ್ದೇಶನ ಕಾರಣ” ಪಂದ್ ಪಂಡೆರ್.

ಪತ್ರಿಕಾಗೋಷ್ಠಿಡ್ ನಟಿ ರಚನಾ ರೈ, ಭೋಜರಾಜ್ ವಾಮಂಜೂರ್, ಪಂಚಮಿ ವಾಮಂಜೂರ್, ಪ್ರಸನ್ನ ಶೆಟ್ಟಿ ಬೈಲೂರು, ಸಂದೀಪ್ ಶೆಟ್ಟಿ, ನವೀನ್ ಶೆಟ್ಟಿ, ನಿರ್ಮಾಪಕೆರ್ ಮಂಜುನಾಥ್ ಅತ್ತಾವರ, ಸಂಗೀತ ನಿರ್ದೇಶಕೆರ್ ಲಾಯ್ ವೇಲೆಂಟೈನ್ ಡಿಸೋಜ, ಪಿಕ್ಚರ್ ದ ವಿತರಣೆಕಾರೆರ್ ಸಚಿನ್ ಎ.ಎಸ್. ಉಬಾರ್ ಇತ್ತೆರ್.

130ರ್ದ್ ಎಚ್ಚ ಟಾಕೀಸ್ ಡ್ ಬುಡುಗಡೆ ಆಯಿನ ಸುರುತ್ತ ತುಳು ಪಿಕ್ಚರ್

ಸರ್ಕಸ್ ಇಡೆ ಮುಟ್ಟ 14 ದೇಶ ಸೇರ್ದ್ ಒಟ್ಟು 130 ಚಿತ್ರ ಮಂದಿರಡ್ ಬುಡುಗಡೆ ಆತ್ಂಡ್. ಅತ್ತಂದೆ ದೇಶ ಇಡೀ ಬುಡುಗಡೆ ಆಯಿನ ಸುರುತ್ತ ತುಳು ‘ಪ್ಯಾನ್ ಇಂಡಿಯಾ’ ಪಿಕ್ಚರ್ ಪನ್ಪುನ ಪುದರ್ ಪಡೆತ್ಂಡ್.

ಭಾರತ್ ಸಿನಿಮಾಸ್ ರ್ದ್ ಕನ್ನಡದಾತೆ ಆದಾಯದ ಉಡುಗೊರೆ:

ಸರ್ಕಸ್ ಪಿಕ್ಚರ್ ದ ಕೂಟದ ಶ್ರಮನ್ ತೂದು ಭಾರತ್ ಸಿನಿಮಾಸ್ ಕನ್ನಡ ಪಿಕ್ಚರ್ ಗ್ ತಿಕ್ಕುನ ಆದಾಯದ ಅಂಸದಾತೇ ಸರ್ಕಸ್ ಗ್ ಕೊರಿಯೆರೆ ನಿರ್ಧಾರ ಮಲ್ದ್ಂಡ್. ಆಂಡ ಸುರುತ್ತ ವಾರಡ್ ತನ್ನ ಸಂಸ್ಥೆದ ಚಿತ್ರಮಂದಿರಡ್ 18000 ಜನ ಪಿಕ್ಚರ್ ತೂವೊಡು ಪಂದ್ ಶರ್ತ ಪಾಡ್ದ್ ಇತ್ತ್ಂಡ್.
ಭಾರತ್ ಸಿನಿಮಾಸ್ ದ ಮುಖ್ಯಸ್ಥೆರಾಯಿನ ಬಾಲಕೃಷ್ಣ ಶೆಟ್ಟಿ ಮೆರೆನ ಈ ನಿರ್ಧಾರರ್ದ್ ಸರ್ಕಸ್ ಕೂಟಗ್ ಮಲ್ಲ ಸಹಕಾರ ಆತ್ಂಡ್.

ಸರ್ಕಸ್ ಪಿಕ್ಚರ್ ದ ಪೊಲಬು

ರೂಪೇಶ್ ಶೆಟ್ಟಿ ನಿರ್ದೇಶನದ ಗಿರಿಗಿಟ್ ಬೊಕ್ಕ ಸರ್ಕಸ್ ರಡ್ಡ್ ಪಿಕ್ಚರ್ ಲ ಸೂಪರ್ ಹಿಟ್ ಆತ್ಂಡ್. ಗಿರಿಗಿಟ್ ಗ್ ಸಂಭಾಷಣೆ ಬರೆಯಿನ ಪ್ರಸನ್ನ ಶೆಟ್ಟಿ ಬೈಲೂರ್ ಈ ಪಿಕ್ಚರ್ ಗ್ಲಾ ಸಂಭಾಷಣೆ ಬರೆತೆರ್. “ಸಲಗ” ಖ್ಯಾತಿದ ಯಶ್ ಶೆಟ್ಟಿ ಸರ್ಕಸ್ ಮುಖೇನ ತುಳುಕ್ಕ್ ಪರಿಚಯ ಆತೆರ್. ಅವ್ವೇ ರೀತಿ ರಚನಾ ರೈ ಪನ್ಪುನ ನಟಿನ್ ತುಳು ಪಿಕ್ಚರ್ ಗ್ ಪರಿಚಯ ಮಲ್ದೆರ್.

ಈ ಪಿಕ್ಚರ್ ಡ್ ತುಳು ಪಿಕ್ಚರ್ ದ ಕಲಾವಿದೆರಾಯಿನ ನವೀನ್‌ ಡಿ. ಪಡೀಲ್‌, ಭೋಜರಾಜ ವಾಮಂಜೂರು, ಅರವಿಂದ ಬೋಳಾರ್, ಸಾಯಿಕೃಷ್ಣ ಕುಡ್ಲ, ಪ್ರಸನ್ನ ಶೆಟ್ಟಿ ಬೈಲೂರು, ಸಂದೀಪ್ ಶೆಟ್ಟಿ ಮಾಣಿಬೆಟ್ಟು, ಉಮೇಶ್ ಮಿಜಾರ್, ಚಂದ್ರಹಾಸ ಉಳ್ಳಾಲ್, ನಿತೇಶ್ ಶೆಟ್ಟಿ ಎಕ್ಕಾರ್, ಪ್ರದೀಪ್ ಆಳ್ವ, ರೂಪಾ ವರ್ಕಾಡಿ, ಪಂಚಮಿ ಭೋಜರಾಜ್ ಉಲ್ಲೆರ್.

ಶೂಲಿನ್ ಫಿಲಂಸ್, ಮುಗ್ರೋಡಿ ಫಿಲಂಸ್ ಲಾಂಛನಡ್ ಈ ಪಿಕ್ಚರ್ ತಯಾರಾತ್ಂಡ್. ಅನಿಲ್ ಶೆಟ್ಟಿ, ಸುಧಾಕರ ಶೆಟ್ಟಿ, ಮಂಜುನಾಥ ಅತ್ತಾವರ ಈ ಪಿಕ್ಚರ್ ನ್ ನಿರ್ಮಾಣ ಮಲ್ದೆರ್. ತುಳುನಾಡ್ ದ ಸುತ್ತಮುತ್ತದ ಪರಿಸರಡ್ ನೆತ್ತ ಶೂಟಿಂಗ್ ನಡತ್ಂಡ್. ಸಂಭಾಷಣೆ ಪ್ರಸನ್ನ ಶೆಟ್ಟಿ ಬೈಲೂರು, ನವೀನ್ ಶೆಟ್ಟಿ ನೃತ್ಯ ನಿರ್ದೇಶನ, ನಿರಂಜನ ದಾಸ್ ಕ್ಯಾಮರಾ, ರಾಹುಲ್ ವಶಿಷ್ಠ ಸಂಕಲನ, ಲೋಯ್ ಮೆರೆನ ಸಂಗೀತ ಈ ಪಿಕ್ಚರ್ ಗ್ ಉಂಡು.

ಬಿಜೆಪಿದ ವಿರುದ್ಧ ಕಾಂಗ್ರೆಸ್ ನಾಯಕೆರೆನ ಮೌನ ಪ್ರತಿಭಟನೆ

ಕಾಂಗ್ರೆಸ್ ನಾಯಕೆ ರಾಹುಲ್ ಗಾಂಧಿ ಮೆರೆನ ವಿರುದ್ಧ ಬಿಜೆಪಿ ನಡಪಾವೊಂದು ಇಪ್ಪುನ ಪಗೆತ್ತ ರಾಜಕಾರಣನ್ ಖಂಡಿಸಾದ್ ಜು.12 ಕ್ಕ್ ಮುಲ್ಕಿ ನಗರ ಪಂಚಾಯತ್ ದ ಕೈತಲ್ ಕಾಂಗ್ರೆಸ್ ಕಾರ್ಯಕರ್ತೆರ್ ‘ಮೌನ ಪ್ರತಿಭಟನೆ’ ಮಲ್ತೆರ್.

ಈ ಪ್ರತಿಭಟನೆಡ್ ಮಾಜಿ ಸಚಿವೆರ್ ಕೆ ಅಭಯ ಚಂದ್ರ ಜೈನ್ ಬೊಕ್ಕ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಶ್ರೀ ಮಿಥುನ್ ರೈ ಪಾಲ್ ಪಡೆದಿತ್ತೆರ್.

ಈ ಪೊರ್ತುಡು ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್, ಮುಲ್ಕಿ ಕೆಪಿಸಿಸಿ ಸದಸ್ಯೆರ್ ವಸಂತ ಬೆರ್ನಾಡ್, ಬೆದ್ರ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ವಲೇರಿಯನ್ ಸಿಕ್ವೇರಾ, ಬೆದ್ರ ಕೆಪಿಸಿಸಿ ಸದಸ್ಯೆರ್ ಚಂದ್ರಹಾಸ ಸನಿಲ್, ವಕ್ತಾರೆರ್ ರಾಜೇಶ್ ಕಡಲ ಕೆರೆ, ನಗರ ಪಂಚಾಯತ್ ಸದಸ್ಯೆರ್ ಯೋಗೀಶ್ ಕೋಟ್ಯಾನ್, ಪುತ್ತುಭಾವ, ಮಂಜುನಾಥ ಕಂಬಾರ, ಮಹೇಶ್ ಮುನ್ನ ಸೇವಾದಳದ ಧರ್ಮಾನಂದ ಶೆಟ್ಟಿಗಾರ್ ಭೀಮಶಂಕರ್ ಆರ್ ಕೆ, ಮಹಿಳಾ ಕಾಂಗ್ರೆಸ್ ದ ಪದ್ಮಾವತಿ ಶೆಟ್ಟಿ, ನಾಯಕೆರ್ ಪ್ರಮೋದ್ ಕುಮಾರ್ ಗೋಪಿನಾಥ್ ಪಡಂಗ, ಉಲ್ಲಾಸ್ ಶೆಟ್ಟಿ, ದೀಪಕ್ ಪೆರ್ಮುದೆ, ಅಬ್ದುಲ್ ಖಾದರ್, ಅನಿಲ್ ಪೂಜಾರಿ ಸಸಿಹಿತ್ಲು ಜನಾರ್ಧನ್ ಬಂಗೇರ ನೆಲ್ಸನ್ ಲೋಬೋ, ಎಕ್ಕಾರ್ ಮೋನಪ್ಪ ಶೆಟ್ಟಿ, ಬಶೀರ್ ಕುಳಾಯಿ ಮೊಕುಲು ಮಾತ ಇತ್ತೆರ್.

ಸೆ.19-21: ಬಂಟ್ಸ್ ಹಾಸ್ಟೆಲ್ ಡ್ ಸಾರ್ವಜನಿಕ ಶ್ರೀ ಗಣೇಶ ಉಚ್ಚಯ, ಪ್ರತಿಭಾನ್ವೇಷಣೆ ಸಮಿತಿದ ಅಟ್ಟಣೆದ ಸಭೆ

ಕುಡ್ಲ: ಬಂಟರ ಯಾನೆ ನಾಡವರ ಮಾತೃ ಸಂಘ ಬೊಕ್ಕ ಸಿದ್ದಿ ವಿನಾಯಕ ಪ್ರತಿಷ್ಠಾನದ ಆಶ್ರಯಡ್ 17ನೇ ವರ್ಷದ ಸಾರ್ವಜನಿಕ ಗಣೇಶ ಉಚ್ಚಯ ಸೆಪ್ಟಂಬರ್ 19-21ಮುಟ್ಟ ದಕ್ಷಿಣ ಕನ್ನಡ, ಒಡಿಪು, ಕಾಸ್ರೋಡು ಜಿಲ್ಲೆದ ಸರ್ವಬಂಟ ಸಮಾಜದ ಸಹಕಾರಡ್ ಬಂಟ್ಸ್ ಹಾಸ್ಟೆಲ್ ಡ್ ನಡಪರೆ ಉಂಡು.

ಸಾರ್ವಜನಿಕ ಗಣೇಶ ಉಚ್ಚಯದ ಲೆಕ್ಕೊಡು ಪ್ರತಿಭಾನ್ವೇಷಣೆಡ್ ಬೇತೆ ಬೇತೆ ಲೇಸ್ ನ್ ಆಯೋಜನೆ ಮಲ್ತ್ ದಿತ್ತೆರ್. ನೆತ್ತ ಅಟ್ಟಣೆದ ಸಭೆ ಬಂಟ್ಸ್ ಹಾಸ್ಟೆಲ್ ದ ಅಮೃತೋತ್ಸವ ಕಟ್ವಾನದ ಚಾವಡಿಡ್ ನಡತ್ಂಡ್.

ನೆತ್ತ ಗುರ್ಕಾರ್ಮೆನ್ ಬಂಟರ ಯಾನೆ ನಾಡವರ ಮಾತೃ ಸಂಘದ ಪ್ರಧಾನ ಕಾರ್ಯದರ್ಶಿ ಕೆ.ಎಂ. ಶೆಟ್ಟಿ ಒಯಿಸ್ ದಿತ್ತೆರ್.

ಕೊರೊನಾರ್ದ್ ಕರಿನ ಮೂಜಿ ವರ್ಷೊರ್ದಿಂಚ ಸಾರ್ವಜನಿಕ ಗಣೇಶೋತ್ಸವನ್ ಆಚರಣೆ ಮಲ್ಪರೆ ಆದಿಜ್ಜಂಡ್. ಈ ವರ್ಷ 17ನೇ ವರ್ಷದ ಸಾರ್ವಜನಿಕ ಗಣೇಶೋತ್ಸವನ್ ಮಾತೆರ್ಲಾ ಸೇರ್ದ್ ಆಚರಿಸಾವೊಂದು ಉಲ್ಲ. ನೆಕ್ಕ್ ಮಾತೆರ್ನಲ ಸಹಕಾರ ಅಗತ್ಯ ಪಂದ್ ಪಂಡೆರ್. ಸಮುದಾಯದ ಮಾತೆರೆನ್ಲಾ ಒಟ್ಟಿಗೆ ಸೇರ್ಸಾಯೆರೆ ಕೆಲವು ಲೇಸ್ ನ್ ಆಯೋಜನೆ ಮಲ್ದ. ನೆಕ್ಕ್ ಸಮಿತಿ, ಉಪ ಸಮಿತಿ ರಚನೆ ಮಲ್ದ. ಆಸಕ್ತೆರೆನ್ ಸಮಿತಿಗ್ ಸೇರ್ಸಾವುನ ಸಭೆ ನಡಪರೆ ಉಂಡು ಪಂದ್ ಸಿದ್ದಿ ವಿನಾಯಕ ಟ್ರಸ್ಟ್ ದ ಟ್ರಸ್ಟಿ ಆಶಾಜ್ಯೋತಿ ರೈ ಪಂಡೆರ್.

ಆಗಸ್ಟ್ 28ಕ್ಕ್ ಬೇತೆ ಬೇತೆ ದೇವಲ್ಯದ ಬಂಟ ಆಡಳಿತ ಮೊಕ್ತೇಸರೆರ್ನಬೊಕ್ಕ ದೈವೊಲ್ಯದ ಗಡಿಗಾರೆರೆನ ಸಮ್ಮೇಳನ, ಸೆಪ್ಟೆಂಬರ್ 3 ಕ್ಕ್ ಬಂಟ ಕಲೋತ್ಸವ, ಸೆಪ್ಟೆಂಬರ್ 10 ಕ್ಕ್ ಬಂಟ ಕ್ರೀಡೋತ್ಸವ, ಸೆಪ್ಟೆಂಬರ್ 16 ಕ್ಕ್ ಬಂಟ ಯುವ ಸಮ್ಮಿಲನ ನಡಪರೆ ಉಂಡು ಪಂದ್ ಪಂಡೆರ್.

ಪ್ರಮುಖೆರಾಯಿನ ಉಲ್ಲಾಸ್ ಆರ್ ಶೆಟ್ಟಿ ಪೆರ್ಮುದೆ, ದಿವಾಕರ ಸಾಮಾನಿ ಚೇಳಾಯಿರು , ಸತೀಶ್ ಶೆಟ್ಟಿ ಕೊಡಿಯಾಲ್ ಬೈಲ್, ಅಶ್ವತ್ಥಾಮ ಹೆಗ್ಡೆ ಬೊಕ್ಕ ಕಿರಣ್ ಪಕ್ಕಳ ಎಡ್ಡೆ ಪೊಲಬುನ್ ಸಭೆಕ್ಕ್ ತೆರಿಪಾಯೆರ್.

ಈ ಪೊರ್ತುಡು ಬಂಟರ ಮಾತೃ ಸಂಘದ ಕುಡ್ಲ ತಾಲೂಕ್ ದ ಸಮಿತಿದ ಸಂಚಾಲಕೆರ್ ವಸಂತ ಶೆಟ್ಟಿ, ಬಂಟರ ಮಾತೃ ಸಂಘದ ಕೋಶಾಧಿಕಾರಿ ಮನಮೋಹನ ರೈ, ಸಿದ್ದಿ ವಿನಾಯಕ ಪ್ರತಿಷ್ಠಾನದ ಟ್ರಸ್ಟಿಲು ನಿಟ್ಟೆಗುತ್ತು ರವಿರಾಜ ಶೆಟ್ಟಿ ಬೊಕ್ಕ ಬೇತೆ ಬೇತೆ ಬಂಟರ ಸಂಘಲೆನ ಪದಾಧಿಕಾರಿಲು ಇತ್ತೆರ್. ನಿವೇದಿತಾ ಶೆಟ್ಟಿ ಸಭೆ ಸುಧಾರಿಕೆ ಮಲ್ತೆರ್.