ಎನ್ಮ ಜನ ಭಾರತೀಯ ಮಾಜಿ ಭಾರತೀಯ ನೌಕಾಪಡೆ ಸಿಬ್ಬಂದಿಲೆಗ್ ಕತಾರ್‌ದ ಕೋರ್ಟ್ ಮರಣದಂಡನೆ ಕೋರ್ನ ಬಗ್ಗೆ ವಿದೇಶಾಂಗ ಇಲಾಖೆ ತೆರಿಪಾದ್‌ಂಡ್.
ಮರಣದಂಡನೆಗ್ ಮಾಜಿ ಭಾರತೀಯ ನೌಕಾಪಡೆ ಸಿಬ್ಬಂದಿಲು ಕರಿನ ವರ್ಷ ಆಗಸ್ಟ್‌ರ್ದ್ ಜೈಲ್‌ಡ್‌ ಇತ್ತೆರ್. ಅಕ್ಲೆನ ವಿರುದ್ಧದ ಆರೋಪಲೆನ್ ಕತಾರ್ ಅಧಿಕಾರಿಲು ಬಹಿರಂಗ ಮಲ್ತ್ ಇಜ್ಜಾಂಡ್. ನೆತ್ತ ಬಗ್ಗೆ ಮಾಹಿತಿ ಕೋರ್ನ ವಿದೇಶಾಂಗ ವ್ಯವಹಾರದ ಸಚಿವಾಲಯ, ಅಲ್ ದಹ್ರಾ ಕಂಪನಿದ ಎನ್ಮ ಭಾರತೀಯ ಉದ್ಯೋಗಿಲೆನ ಕೇಸ್‌ಡ್ ಕತಾರ್‌ದ ಸುರುತ ನಿರ್ದೇಶನದ ನ್ಯಾಯಾಲಯ ತೀರ್ಪು ಕೊರ್ತುಂಡ್ ಪಂದ್ ತೆರಿದ್ ಬೈದ್ಂಡ್.
ಪುತ್ತೂರು: ಪ್ರಾಥಮಿಕ ಶಾಲಾ ಶಿಕ್ಷಕರ ನೇಮಕಾತಿ ವಿಚಾರಡ್ ನ್ಯಾಯಾಲಯಡ್‌ ತಡೆಯಾಜ್ಞೆ ತೆರವು ಆದ್, ಸರಕಾರ ದ.ಕ. ಜಿಲ್ಲೆಗ್ 546 ಶಿಕ್ಷಕೆರೆನ್ ನೇಮಕ ಮಲ್ತ್ ಆದೇಶ ಕೊರ್ತುಂಡ್, ಈ ಪೈಕಿ ಪುತ್ತೂರುಗ್ 131 ಶಿಕ್ಷಕೆರೆನ್ ನೇಮಕ ಮಲ್ತ್‌ದೆರ್. ಪುತ್ತೂರು ಸೇರಿನಂಚ ದ.ಕ ಜಿಲ್ಲೆದ ಸರಕಾರಿ ಪ್ರಾಥಮಿಕ ಶಾಲೆಡ್ ಶಿಕ್ಷಕೆರ್ನ ಕೊರತೆ ಇತ್ತ್‌ಂಡಲ ಶಿಕ್ಷಕೆರೆನ್ ನೇಮಕ ಮಲ್ಪುನಂಚ ಇಜ್ಜಾಂಡ್.
ಶಿಕ್ಷಕರ ನೇಮಕಾತಿ ವಿಚಾರಡ್ ನ್ಯಾಯಾಲಯದ ತಡೆಯಾಜ್ಞೆ ಇತ್ತಿನ ಕಾರಣ ಕರಿನ ಕೆಲವು ವರ್ಷರ್ದ್ ಅತಿಥಿ ಶಿಕ್ಷಕ ನೇಮಕ ಮಲ್ತೊಂದು ಇಜ್ಜಾಂಡ್. ಇತ್ತೆ ನ್ಯಾಯಾಲಯ ತಡೆಯಾಜ್ಞೆ ದೆತ್ತಿನೆಕ್ಕ್ ಶಿಕ್ಷಕರ ನೇಮಕಾತಿ ಪ್ರಕ್ರಿಯೆ ನಡಪೆರೆ ಉಂಡು. ನ್ಯಾಯಾಲಯದ ತಡೆಯಾಜ್ಞೆ ವಿಚಾರನ್ ಪುತ್ತೂರು ಶಾಸಕೆರ್ ಅಶೋಕ್ ರೈ ಸರಕಾರದ ಗಮನಗ್‌ ಕನತ್‌ ಇತ್ತೆರ್. ಶಿಕ್ಷಕರ ಕೊರತೆರ್ದ್ ಸರಕಾರಿ ಶಾಲೆಡ್ ಗುಣಮಟ್ಟದ ಶಿಕ್ಷಣನ್‌ ಕೊರಿಯೆರೆ ಸಾಧ್ಯ ಆವೊಂದು ಇಜ್ಜಿ. ಗ್ರಾಮೀಣ ಭಾಗದ ಕಲ್ಪಾರ್ಥಿಲೆಗ್ ತೊಂದರೆ ಆವೊಂದು ಉಂಡು. ಅಂಚಾದ್ ನೇಮಕಾತಿ ವಿಚಾರಡ್ ಸರಕಾರ ಮಧ್ಯ ಪ್ರವೇಶ ಮಲ್ಪುನಂಚ ಮನವಿ ಮಲ್ತ್ ಇತ್ತೆರ್.
ಪುತ್ತೂರು: ರಬ್ಬರ್ ಬೇಲೆದಕ್ಲೆನ ಕೊರಿಯೆರೆ ಬಾಕಿ ಇಪ್ಪುನ ಬೋನಸ್‌ನ್ ಬೇಗಡ್‌ ಕೋರ್ಪ ಪಂದ್ ಅರಣ್ಯ ಸಚಿವೆರ್ ಈಶ್ವರ ಖಂಡ್ರೆ ಪುತ್ತೂರು ಶಾಸಕ ಅಶೋಕ್ ರೈಗ್‌ ಭರವಸೆ ಕೊರಿಯೆರ್.
ಬೋನಸ್ ಕೊರಿಯೆರೆ ಕೆಎಫ್‌ಡಿಸಿ ಬೊಕ್ಕ ಹಣಕಾಸು ಇಲಾಖೆದ ಒಪ್ಪಿಗೆ ತಿಕ್ಕೆರೆ ತಡ ಆಯಿನ ಕಾರಣ ಪಿರ ವಿಳಂಬ ಆತ್‌ಂಡ್. ಅ. 26 ದಾನಿ ಪಿರ ಅರಣ್ಯ ಸಚಿವೆರೆನ್‌ ಭೇಟಿಯಾದ್ ಶಾಸಕೆರ್ ಮಾತುಕತೆ ನಡಪಾದ್‌ ಬೇಗಡೆ ಬಾಕಿ ಇಪ್ಪುನ ಬೋನಸ್‌ನ್ ಕಾರ್ಮಿಕೆರೆಗ್ ಕೊರ್ಪ ಪಂದ್ ಶಾಸಕರೆಗ್‌ ತೆರಿಪಾದೆರ್. ಕರಿನ ಒಂಜಿ ವರ್ಷರ್ದ್ ಕಾರ್ಮಿಕೆರ್ ಬೋನಸ್‌ಗಾದ್ ಒತ್ತಾಯ ಮಲ್ತ್ ಇತ್ತೆರ್.
ಸುಳ್ಯ : ಡೈರಿ ರಿಚ್ ಐಸ್ ಕ್ರೀಂ ಉದ್ಯಮಿ, ಕನಕಮಜಲು ಕಾಪಿಲ ಗಿರಿಯಪ್ಪ ಗೌಡೆರ್ನ ಮರ್ಮಲ್ ಬೆಂಗಳೂರ್‌ಡ್ ಆತ್ಮಹತ್ಯೆ ಮಲ್ತೊನ್ನ ಘಟನೆ ವರದಿ ಆತ್‌ಂಡ್. ಗಿರಿಯಪ್ಪ ಗೌಡ ಮೇರ್‌ನ ಮಗೆ ರಾಜೇಶ್‌ನ ಬುಡೆದಿ ಐಶ್ವರ್ಯ(26) ಆತ್ಮಹತ್ಯೆ ಮಲ್ತೊನ್ನಾರ್. ಉಬರಡ್ಕ ಮಿತ್ತೂರು ಗ್ರಾಮದ ಮದುವೆಗದ್ದೆ ಸುಬ್ರಹ್ಮಣ್ಯ ಗೌಡ ಬೊಕ್ಕ ಉಷಾ ದಂಪತಿನ ಮಗಲ್ ಐಶ್ವರ್ಯ ನಾಲ್ ವರ್ಷದ ಪಿರ ರಾಜೇಶ್ ಮೇರೆನ್‌ ಮದಿಮೆ ಆದಿತ್ತೆರ್.
ಐಶ್ವರ್ಯ ಬೆಂಗಳೂರ್‌ದ ಕಂಪೆನಿಡ್‌ ಬೇಲೆ ಮಲ್ತೊಂದು ಇತ್ತೆರ್. ಕಂಡನಿ ರಾಜೇಶ್ ಸ್ವಂತ ಐಸ್ ಕ್ರೀಮ್ ಪಾರ್ಲರ್ ನಡಪಾವೊಂದು ಬೆಂಗಳೂರುಡ್‌ ವಾಸ ಆದಿತ್ತೆರ್. ಐಶ್ವರ್ಯನ ಪೊಪ್ಪ ಅಮ್ಮಲ ಬೆಂಗಳೂರ್‌ಡೆ ಇತ್ತೆರ್. ಕೆಲವು ಸಮಯರ್ದ್‌ ಐಶ್ವರ್ಯ ತನ್ನ ಅಪ್ಪೆನ ಇಲ್ಲಗ್‌ ಬತ್ತಿತ್ತೆರ್. ಇಲ್ಲಲ್‌ ಏರ್ಲ ಇಜ್ಜಂದಿನ ಸಮಯ ತೂದು ಆತ್ಮಹತ್ಯೆ ಮಲ್ತೊಂದೆರ್‌ ಪಂದ್ ತೆರಿದ್ ಬೈದ್ಂಡ್.
ಸಿರಿಯಾದ ಮಿತ್ತ್ ಅಮರಿಕ ಏಕಾಏಕಿ ವೈಮಾನಿಕ ದಾಳಿ ಮಲ್ದ್ಂಡ್.
ಅ.17 ರ್ದ್ ಸಿರಿಯಾಡ್ ಇಪ್ಪುನ ಅಮೆರಿಕದ ಸೇನಾ ನೆಲೆತ್ತ ಮಿತ್ತ್ ದಾಳಿ ಮಲ್ದ್ಂಡ್. ಅತ್ತಂದೆ ಅ.17-24 ಮುಟ್ಟ ಸಿರಿಯಾದ ಯುಎಸ್ ಸೇನಾ ನೆಲೆತ್ತ ಮಿತ್ತ್ 13 ದಾಳಿ ನಡತ್ ದ್ಂಡ್ ಪಂದ್ ಅಮೆರಿಕದ ರಕ್ಷಣಾ ಸಚಿವಾಲಯ ಪೆಂಟಗನ್ ಪಂತ್ಂಡ್.
ಬೆಂಗ್ಲೂರು : ಪರಿಸರ ನಿರ್ವಹಣೆ ಬೊಕ್ಕ ನೀತಿ ಸಂಶೋಧನಾ ಸಂಸ್ಥೆ (EMPRI) ಸಂಶೋಧಕೆರ್ ಬೆಂಗ್ಲೂರ್ ಮಾರ್ಕೆಟ್ ಡ್ ತಿಕುನ ತರಕಾರಿಡ್ ಕರ್ಬದ ಅಂಶ ಮಿತಿರ್ದ್ ಎಚ್ಚ ಉಂಡು ಪಂದ್ ಪಂತೆರ್.
ಪೇಂಟೆದ 20 ಅಂಗಡಿರ್ದ್ 400 ಮಾದರಿನ್ ಸಂಗ್ರಹ ಮಲ್ತ್ ದ್ ಪರೀಕ್ಷೆ ಮಲ್ಪುನಗ ಕರ್ಬದ ಅಂಶ 425.5 ಮಿಗ್ರಾಂ/ ಕೆಜಿ ಇತ್ತ್ ದ್, ಕ್ಯಾಡ್ಮಿಯಂ ಪ್ರಮಾಣ ಎಚ್ಚ ಇಪ್ಪುನವು ತೆರಿದ್ ಬೈದ್ಂಡ್. ರೈತೆರ್ ಬೊರ್ಚಂದಿನ ನೀರ್ ನ್ ಕೃಷಿಗ್ ಗಲಸೆಯೆರೆ ಬಲ್ಲಿನ್ ಸಲಹೆ ಕೊರ್ತೆರ್.
ಪವರ್ ಗ್ರಿಡ್ ಕಾರ್ಪೊರೇಷನ್ ಆಫ್ ಇಂಡಿಯಾ ಲಿಮಿಟೆಡ್ ಡ್ ಖಾಲಿ ಇಪ್ಪುನ 184 ಟ್ರೈನಿ ಇಂಜಿನಿಯರ್ ಬೇಲೆಗ್ ಅಭ್ಯರ್ಥಿಲು ಅರ್ಜಿ ಸಂದಾವೊಲಿ.
ಅ.20 ರ್ದ್ ಅರ್ಜಿಲೆನ್ ಸ್ವೀಕಾರ ಮಲ್ಪರೆ ಸುರು ಮಲ್ದ್ಂಡ್. ನ.10 ಮುಟ್ಟ ಅರ್ಜಿ ಸಂದಾವೊಲಿ. ಅರ್ಹ ಅಭ್ಯರ್ಥಿಲು ಅಧಿಕೃತ ವೆಬ್‌ಸೈಟ್‌ Powergird.in ಗ್ ಭೇಟಿ ಕೊರ್ದು ಅರ್ಜಿ ಸಂದಾವೊಲಿ. ಅಭ್ಯರ್ಥಿಲು BE, B.Tech, B.Sc (ಎಂಜಿನಿಯರಿಂಗ್) ಡ್ ಶೇ.60 ದಾತ್ ಮಾರ್ಕ್ ಪಡೆದಿಪ್ಪೊಡು.
ರಾಜ್ಯಡ್ ಬೇತೆ ಬೇತೆ ವಲಯಡ್ ಸೇವೆ ಸಂದಾಯಿನ 10 ಸಂಘ ಸಂಸ್ಥೆಲೆಗ್ ಸೇರಿನ 68 ಜನ ಸಾಧಕೆರೆಗ್ ಈ ಸರ್ತಿದ ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ ಕೊರಿಯೆರೆ ಉಂಡು ಪಂದ್ ಸಚಿವೆರ್ ಶಿವರಾಜ ತಂಗಡಗಿ ಪಂಡೆರ್.
ಬೆಂಗ್ಲೂರ್ ದ ಸಿಎಂ ನಿವಾಸಡ್ ಸಭೆ ಮುಗಿನ ಬೊಕ್ಕ ಮೇರ್ ಪಾತೆರ್ದ್, ಈ ಸಲದ ರಾಜ್ಯೋತ್ಸವ ಪ್ರಶಸ್ತಿಗ್ 3523 ಅರ್ಜಿಲು ಬೈದ್ಂಡ್. ಆಯ್ಕೆ ಸಮಿತಿ ಸದಸ್ಯೆರ್ ಇತ್ತೆನೇ ಅರ್ಹರೆನ್ ಆಯ್ಕೆ ಮಲ್ದೆರ್. ಸಮಿತಿದ ಸದಸ್ಯೆರ್ ಲ ಸಿಎಂ ನಿರ್ಧಾರಗ್ ಬದ್ದೆರಾತ ಪಂದ್ ಪಂತೆರ್.
ತುಮಕೂರು : ಇಂಜಿನಿಯರಿಂಗ್ ಕಲ್ತೊಂದು ಇತ್ತಿನ ಕಲ್ಪಾರ್ಥಿ ಆತ್ಮಹತ್ಯೆ ಮಲ್ತಿನ ಘಟನೆ ಪ್ರತಿಷ್ಠಿತ ಸಿದ್ಧಾರ್ಥ ಇಂಜಿನಿಯರಿಂಗ್ ಕಾಲೇಜ್‌ಡ್‌ ನಡತ್ಂಡ್. ಚಿತ್ರದುರ್ಗ ಜಿಲ್ಲೆ ಹೊಳಲ್ಕೆರೆ ಮೂಲದ ಶಿವಪುರ ಗ್ರಾಮದ ಬನಸಿರಿ (20) ಆತ್ಮಹತ್ಯೆ ಮಲ್ತೊನ್ನ ಪೊಣ್ಣು.
ಗೃಹ ಸಚಿವ ಡಾ.ಜಿ. ಪರಮೇಶ್ವರ್ ಒಡೆತನದ ಸಿದ್ಧಾರ್ಥ ಇಂಜಿನಿಯರಿಂಗ್ ಕಾಲೇಜು ಉಂದು ಆತ್‌ಂಡ್. ತುಮಕೂರ್‌ದ ತಿಲಕ್ ಪಾರ್ಕ್ ಠಾಣಾ ವ್ಯಾಪ್ತಿಡ್‌ ಕೇಸ್ ದಾಖಲಾತ್‌ಂಡ್.
ಚೀನಾದ ಮಾಜಿ ಪ್ರಧಾನಿ ಲಿ ಕೆಕಿಯಾಂಗ್ ತಿಗಲೆ ಬೇನೆಡ್ ತೀರ್ ಪೋಯೆರ್.
ಮೆರೆಗ್ 69 ವರ್ಷ ಆದಿತ್ತ್ಂಡ್. ಮೆರೆಗ್ ಕೋಡೆ ಒರಾನೇ ತಿಗಲೆ ಬೇನೆ ಬೈದ್ಂಡ್. ಕೂಡ್ಲೆ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಮೆರೆನ್ ಒರಿಪಾಯೆರೆ ಮಾತ ಪ್ರಯತ್ನಲ ನಡತ್ಂಡ್ ಆಂಡ ಇನಿ ಬೊಲ್ಪುಗು ತೀರ್ ಪೋಯೆರ್.
ಮೇರ್ 2022 ಮುಟ್ಟ CCP ಡ್ 2ನೇ ಮಲ್ಲ ಶಕ್ತಿಶಾಲಿ ವ್ಯಕ್ತಿ ಆದಿತ್ತೆರ್. ಮೇರ್ 2013-2023 ಮುಟ್ಟ ಚೀನಾದ ಪ್ರಧಾನಿಯಾದ್ ಸೇವೆ ಸಂದಾದೆರ್.
